၂၀၂၆ ခုနှစ်၏ ပထမ ၇ လတာကာလအတွင်း ကမ္ဘောဒီးယားနိုင်ငံနှင့် အာဆီယံအဖွဲ့ဝင် နိုင်ငံများအကြား ကုန်သွယ်မှုပမာဏသည် အမေရိကန်ဒေါ်လာ ၁၁.၆၈ ဘီလီယံအထိ ရောက်ရှိခဲ့ပြီး ယခင်နှစ် ကာလတူတွင် စံချိန်တင်ခဲ့သည့် ဒေါ်လာ ၉.၆၇ ဘီလီယံထက် ၂၀.၇ ရာခိုင်နှုန်း မြင့်တက်လာခဲ့ကြောင်း သြဂုတ်လ ၁၇ ရက်နေ့က ထုတ်ပြန်သည့် စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန၏ အစီရင်ခံစာအရ သိရသည်။
ဇန်နဝါရီလမှ ဇူလိုင်လအထိ အာဆီယံနိုင်ငံများသို့ ကမ္ဘောဒီးယား၏ ပို့ကုန်တင်ပို့မှုသည် ယခင်နှစ် ကာလတူထက် ၀.၁၄ ရာခိုင်နှုန်း အနည်းငယ်မျှသာ တိုးတက်ခဲ့ပြီး ဒေါ်လာ ၃.၅၄ ဘီလီယံရှိခဲ့သည်။ တစ်ချိန်တည်းမှာပင် သွင်းကုန်တင်သွင်းမှုမှာမူ ၃၂.၆ ရာခိုင်နှုန်းအထိ အရှိန်အဟုန်ဖြင့် မြင့်တက်ခဲ့ပြီး ဒေါ်လာ ၈.၁၄ ဘီလီယံအထိ ရှိခဲ့ကြောင်း အစီရင်ခံစာတွင် ဖော်ပြထားကြောင်း သိရသည်။
အဆိုပါ ၇ လတာကာလအတွင်း ကမ္ဘောဒီးယားနိုင်ငံ၏ စုစုပေါင်း ကမ္ဘာ့ကုန်သွယ်မှုပမာဏ ဒေါ်လာ ၄၅.၄၈ ဘီလီယံ၏ ၂၅.၆ ရာခိုင်နှုန်းမှာ ဒေသတွင်း ကုန်သွယ်မှုမှဖြစ်သည်။ ဗီယက်နမ်၊ စင်္ကာပူ၊ ထိုင်း၊ မလေးရှားနှင့် အင်ဒိုနီးရှားနိုင်ငံတို့သည် ကမ္ဘောဒီးယား၏ ထိပ်သီး ဒေသတွင်းကုန်သွယ်ဖက် ၅ နိုင်ငံအဖြစ် ထွက်ပေါ်လာခဲ့သည်။ အဓိက ပို့ကုန်များတွင် အထည်အလိပ်၊ ဖိနပ်၊ ခရီးဆောင်ပစ္စည်း၊ ဆိုလာပြား၊ မော်တော်ယာဉ်တာယာ၊ အီလက်ထရွန်နစ်နှင့် ဆန်၊ သီဟိုဠ်စေ့၊ ရာဘာစိမ်း၊ ပလောပီနံ၊ ဒူးရင်းသီးနှင့် ငှက်ပျောသီး ကဲ့သို့သော စိုက်ပျိုးရေး ထွက်ကုန်များပါဝင်သည်။
ကမ္ဘောဒီးယား နည်းပညာနှင့် သိပ္ပံတက္ကသိုလ်၏ တရုတ်-အာဆီယံ လေ့လာရေးစင်တာမှ ဒုတိယညွှန်ကြားရေးမှူး Thong Mengdavid က အဆိုပါ တိုးတက်မှုသည် ဒေသတွင်း စီးပွားရေးပေါင်းစည်းမှု ပိုမိုနက်ရှိုင်းလာခြင်းကြောင့်ဖြစ်ကြောင်း သုံးသပ်ပြောကြားခဲ့ကြောင်း သိရသည်။
ခိုင်မာသည့် ထောက်ပံ့ပို့ဆောင်ရေးကွန်ရက်များ၊ နယ်စပ်ဖြတ်ကျော် ကုန်သွယ်မှုများ ကျယ်ပြန့်လာခြင်းနှင့် အာဆီယံ စီးပွားရေး အသိုက်အဝန်း၊ ဒေသတွင်း ဘက်စုံ စီးပွားရေးပူးပေါင်းဆောင်ရွက်မှု (RCEP) ကဲ့သို့သော ဒေသတွင်း မူဘောင်များကြောင့် တိုးတက်မှု အရှိန်အဟုန် ရရှိလာခြင်းဖြစ်ကြောင်း သိရှိရပါသည်။
Source : Xinhua
DOCA (ရန်ကုန်)