HighLight News

      ၂၀၂၄ခုနှစ်၊ မေလ ၁၀ရက်နေ့၊ နေ့လယ် (၁၆:၀၀) နာရီအချိန်တွင် ရှမ်းပြည်နယ် (တောင်ပိုင်း)၊ စားသုံးသူရေးရာဦးစီးဌာန၊ တောင်ကြီးခရိုင်းဦးစီးမှူးရုံးခန်း၌ ဆန်ကုန်သည်နှင့် ဆန်လုပ်ငန်းရှင်များအားတွေ့ဆုံပြီး ဈေးနှုန်းတည်ငြိမ်စေရေးနှင့် ဆန်လိုအပ်ချက်များအတွက် တွေ့ဆုံဆွေးနွေးခဲ့ပါသည်။ အဆိုပါဆွေးနွေးပွဲတွင် စားသုံးသူရေးရာဦးစီးဌာန၊ ရှမ်းပြည်နယ်(တောင်ပိုင်း)၏ ဆန်လိုအပ်ချက်များအပြင် ရှမ်းအရှေ့ကျိုင်းတုံသို့ တင်ပို့ဆောင်ရွက်နေသည့်အခြေအနေများ၊ ဆန်စက်များလည်ပတ်မှုအခြေအနေများ၊ ရောင်းဝယ်ဖာက်ကားမှုအခြေအနေများကိုဆွေးနွေးခဲ့ပြီး ဆန်ရောင်းဝယ်မှုသယ်ယူမှုအတွက် အခက်အခဲရှိပါက သက်ဆိုင်ရာဒေသအာဏာပိုင်များ၊ ဌာနဆိုင်ရာများနှင့် ပူးပေါင်းချိတ်ဆက်ကူညီ‌ဆောင်ရွက်ပေးသွားမည်ဖြစ်ကြောင်း ပြောကြားခဲ့ပါသည်။ ဆန်ကုန်သည်အသင်းအနေဖြင့်လည်း လက်ရှိအချိန်တွင် ဆန်ဝယ်ယူမှုရရှိရေးမှာ လွယ်ကူသောကြောင့် ဆန်လုံလောက်မှုရှိပြီး ဆန်လုပ်ငန်းမှာ ပြည်တွင်းတွင် ထုတ်လုပ်လျက်ရှိသော လုပ်ငန်းဖြစ်ပြီး ရှမ်းပြည်နယ်(တောင်ပိုင်း)တွင် ဆန်စျေးမြင့်တက်မှုကို ထိန်းချုပ်နိုင်ကြောင်း၊ စက်ရုံအတွက် သုံးစွဲနေသောလောင်စာနှင့်  သယ်ယူပို့ဆောင်စရိတ်များလျော့ကျလာမည်ဆိုပါက ကုန်စျေးနှုန်းများလည်းလျော့ကျလာနိုင်မည်ဖြစ်ကြောင်း ပြောကြားခဲ့ပြီး ဆွေးနွေးမှုအား နေ့လယ် (၁၆:၃၀)နာရီအချိန်တွင် ရုပ်သိမ်းခဲ့ကြောင်း သတင်းရရှိပါသည်။

DOCA(ရှမ်း)

      ၂၀၂၄ခုနှစ်၊ မေလ(၉)ရက်နေ့၊ နံနက်(၀၉:၀၀)နာရီအချိန်တွင် ရှမ်းပြည်နယ်(မြောက်ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးအရာရှိများနှင့် ဝန်ထမ်းများသည် မိတ်ဖက်ဌာနဆိုင်ရာများနှင့်ပူးပေါင်း၍ လားရှိုးမြို့၊ စည်ပင်သာယာမြို့မဈေးအတွင်းရှိ စတိုးဆိုင်များနှင့် စားသောက်ကုန်ပစ္စည်းအရောင်းဆိုင်များသို့သွားရောက်၍ ကွင်းဆင်းစစ်ဆေးခဲ့ကြပါသည်။

     ထိုသို့ကွင်းဆင်းစစ်ဆေးရာ၌  ဈေးကွက်အတွင်းရောင်းချနေသော ကုန်စည်များတွင်  စားသုံးသူပြည်သူများ ဘေးအန္တရာယ်ကင်းရှင်းစေရန်အတွက် ကုန်စည်များပေါ်တွင် ဖော်ပြပါရှိရမည့် ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြမှုရှိ/ မရှိ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာဘာသာဖြင့်ဖြစ်စေ၊  မြန်မာဘာသာနှင့် အခြားသာဘာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ရေးသားဖော်ပြထားခြင်းရှိ/ မရှိကို ဈေးကွက်စောင့်ကြည့်စစ်ဆေးခဲ့ကြကြောင်းသိရှိရပါသည်။

DOCA(ရှမ်း)

     ၂၀၂၄ခုနှစ်၊ မေလ(၁၀)ရက်နေ့၊ နံနက်(၀၉း၃၀)နာရီအချိန်တွင် တိုင်းဒေသကြီးဦးစီးမှူးနှင့်အတူ ခရိုင်ဦးစီးမှူးနှင့်ဝန်ထမ်းများသည် မြိတ်မြို့ပေါ်ရှိ စားသုံးသူရေးရာဦးစီးဌာနပိုင်မြေကွက်နှင့် သိုလှောင်ရုံများသို့ သွားရောက်ကွင်းဆင်းစစ်ဆေးခဲ့ကြပါသည်။

       ဌာနပိုင်မြေကွက်၊ သိုလှောင်ရုံများသို့ သွားရောက်ကွင်းဆင်းရာတွင် ငှားရမ်းထားသော ပုဂ္ဂလိကလုပ်ငန်းရှင်များနှင့်တွေ့ဆုံပြီး ငှားရမ်းထားသော မြေကွက်များပေါ်တွင် ဆောက်လုပ်ထားသည့် ယာယီအဆောက်အဦများနှင့် ငှားရမ်းမြေကွက်ပေါ်တွင် ရုံးချုပ်ခွင့်ပြုချက်မရရှိဘဲ လုပ်ငန်းများဆောင်ရွက်နေမှုရှိ/ မရှိအား ကွင်းဆင်းစစ်ဆေးခဲ့ပြီး သတ်မှတ်တင်ပြထားသော လုပ်ငန်းကိုသာလုပ်ကိုင်ကြရန်ပြောကြားခဲ့ကြောင်း သိရှိရပါသည်။

DOCA(တနင်္သာရီ)

       ၂၀၂၄ခုနှစ်၊ မေလ (၉)ရက်နေ့၊ နေ့လယ်(၁၃း၀၀)နာရီအချိန်တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူးနှင့် ကွမ်းသီးလုပ်ငန်းရှင်တို့သည် မြိတ်ခရိုင်၊ စားသုံးသူရေးရာဦးစီးဌာနတွင် တွေ့ဆုံပြီး ကွမ်းသီးလုပ်ငန်းနှင့်ပတ်သက်၍ ဆောင်ရွက်နေမှုအခြေအနေများအား ဆွေးနွေးခဲ့ကြပါသည်။

     ထိုသို့ဆွေးနွေးရာတွင် မြိတ်ခရိုင်ကွမ်းသီးလုပ်ငန်းရှင်များအသင်းကို အဖွဲ့ဝင် (၂၆)ဦးဖြင့် ဖွဲ့စည်းခဲ့ကြောင်း၊ မြိတ်ခရိုင်တွင် ကွမ်းသီးစိုက်ဧကမှာ (၂၀၂၃-၂၀၂၄) ခုနှစ်တွင် ၄၅၅၉၂ဧကခန့်ရှိကြောင်း၊ မြိတ်ခရိုင်တွင် ကွမ်းသီးတရားမဝင်တင်ပို့မှုမဖြစ်စေရေးနှင့် ဒေသထွက်ကွမ်းသီးဖြစ်ကြောင်းကို ဌာနဆိုင်ရာကွမ်းသီးစစ်ဆေးရေးအဖွဲ့ဖြင့်စစ်ဆေးပြီးနောက် ရန်ကုန်နှင့်မန္တလေးဒေသများသို့ တင်ပို့နေကြောင်းဆွေးနွေးခဲ့ပြီး တိုင်း‌ဒေသကြီးဦးစီးမှူးက အသင်းအဖွဲ့တွင် အခက်အခဲရှိပါက စစ်ဆေးရေးအဖွဲ့များ၊ အသင်းသားများနှင့် ပူးပေါင်းဖြေရှင်းဆောင်ရွက်ရန်နှင့် လိုအပ်ပါက သက်ဆိုင်ရာဌာနများနှင့် ချိတ်ဆက်ဆောင်ရွက်ပေးမည်ဖြစ်ကြောင်းသိရှိရပါသည်။

DOCA(တနင်္သာရီ)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည်နှင့်ဝန်ဆောင်မှုများကိုအသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှုရှိစေရေးအတွက် အစဉ်ဆောင်ရွက်လျက်ရှိပါသည်။ စားသုံးသူများအတွက် လုံခြုံစိတ်ချရမှုမရှိသောကုန်စည်များ၊ စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)၊ ပုဒ်မ ၄၁ပါ ကုန်အညွှန်းအမှတ်အသားများပြည့်စုံမှုမရှိသော ကုန်စည်များထုတ်လုပ်ဖြန့်ဖြူးခြင်း၊  ဈေးကွက်အတွင်း တင်သွင်းရောင်းချခြင်းမရှိစေရန်ရည်ရွယ်၍ မုံရွာခရိုင်ဦးစီးမှူးရုံးမှ ဒု-ခရိုင်ဦးစီးမှူး ချောင်းဦးမြို့နယ်တာဝန်ခံနှင့် ဝန်ထမ်း (၁) ဦး တို့ဦးဆောင်၍ ခရိုင်တိုင်းရင်ဆေးပညာဦးစီးဌာနမှ ဝန်ထမ်း(၁)ဦး၊ မြို့နယ်စည်ပင်သာယာရေးအဖွဲ့မှ ဝန်ထမ်း(၁)ဦးတို့သည် (၈-၅-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် မုံရွာမြိုပေါ်ရှိ တိုင်းရင်းဆေးအရောင်းဆိုင်များသို့သွားရောက်ကာ ဈေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။

       ထိုသို့ဆောင်ရွက်ရာ မုံရွာမြို့ပေါ်ရှိ တိုင်းရင်းဆေးအရောင်းဆိုင်များတွင်  ကုန်အညွှန်းအမှတ်အသားပြည့်စုံမှုမရှိသော ကုန်စည်များရောင်းချနေခြင်းရှိ/မရှိ စစ်ဆေးခဲ့ကြပြီး ဆိုင်ပိုင်ရှင်များအား  စီးပွားရေးလုပ်ငန်းရှင်၏တာဝန်များနှင့် ကုန်အညွှန်းအမှတ်အသားပြည့်စုံမှုမရှိသော ကုန်စည်များအား တင်သွင်းရောင်းချခြင်းမပြုကြရန်ပြောကြားခဲ့ပြီး ကုန်အညွှန်အမှတ်အသားဖော်ပြချက်ဆိုင်ရာ အသိပညာပေးလက်ကမ်းစာစောင်များပေးဝေခဲ့ကြောင်း သတင်းရရှိပါသည်။

DOCA(စစ်ကိုင်း)