HighLight News

  ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံသည် ၂၀၂၃ခုနှစ်၊ စက်တင်ဘာလ(၁၃)ရက်နေ့၊ နံနက်(၁၀:၀၀)နာရီအချိန်တွင် ဖျာပုံမြို့၊   အမှတ်(၁)ရပ်ကွက်ရှိ ထိပ်ခေါင်မုန့်ဟင်းခါးဖိုလုပ်ငန်းသို့သွားရောက်၍ SMEs လုပ်ငန်းဖွံ့ဖြိုးရေးနှင့် ထုတ်ကုန်လုံခြုံစိတ်ချရမှုရှိစေရေး ကွင်းဆင်းဆောင်ရွက်ခဲ့ကြပါသည်။

   အဆိုပါ တွေ့ဆုံဆွေးနွေးရာတွင် မြို့နယ်တာဝန်ခံက ခေတ်မီစက်ကြီးဖြင့် ထုတ်လုပ်လျက်ရှိ သည့်အတွက် အားရကျေနပ်မိပါကြောင်းနှင့် တစ်ရက်ထုတ်လုပ်ဖြန့်ဖြူးမှုအခြေအနေ၊ ဈေးနှုန်းဈေးကွက်အခြေအနေများကိုဆွေးနွေးမေးမြန်းခဲ့ပါသည်။ လုပ်ငန်းရှင်ဦးသိန်းလွင်ကလည်း လျှပ်စစ်မီးပုံမှန်မလာသဖြင့် စက်သုံးဆီများဝယ်ယူသုံးစွဲရာတွင် ဈေးနှုန်းကြီးမြင့်ခြင်းကြောင့် တွက်ခြေကိုက်မှုနည်းပါးလျက်ရှိပါကြောင်းနှင့် လျှပ်စစ်မီးပုံမှန်ရရှိရေး ဆောင်ရွက်ပေးပါက လုပ်ငန်းဖွံ့ဖြိုးတိုးတက်လာမှုရှိလာမည်ဖြစ်ကြောင်း တင်ပြဆွေးနွေးခဲ့မှုကို သတင်းရရှိပါသည်။

DOCA(ဧရာဝတီ)

 စားသုံးသူရေးရာဦးစီးဌာန၊ မကွေးတိုင်းဒေသကြီး၊ မ‌ကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်းနှင့်ဝန်ထမ်းများသည် စားသုံးသူပြည်သူများ ဘေးအန္တရာယ်ကင်းရှင်းသောကုန်စည်တို့ ဝယ်ယူစားသုံးနိုင်စေရန်အတွက် (၂၀-၉-၂၀၂၃)ရက်နေ့၊ နံနက်(၀၇:၃၀)နာရီအချိန်မှ နံနက်(၀၉:၃၀)နာရီအချိန်ထိ မကွေးမြို့၊ ရန်ပယ်စျေး၌ အစားအသောက်နှင့်ဆေးဝါးကွပ်ကဲရေးဦးစီးဌာန၊ စျေးတာဝန်ခံ(စည်ပင်သာယာရေး) အဖွဲ့များနှင့်ပူးပေါင်းပြီး စျေးကွက်အတွင်းရှိ (S/K) အမှတ်တံဆိပ်(ပဲပြားများ)၊ နနွင်းမှုန့်၊ အရောင်တင်မှုန့်၊ ငါးပိ၊ ငါးခြောက်၊ ချင်းပေါက်၊ ကွမ်းသီး၊ ထန်းလျက်၊ အသားတု၊ ဆန်ကြာဇံနှင့် လက်ဖက်တို့ကို နမူနာအနေဖြင့်ဝယ်ယူပြီး Mobile Lab ဖြင့် ချက်ချင်းစစ်ဆေးခြင်းများဆောင်ရွက်ခဲ့ကြောင်းသိရှိရပါသည်။

  ၎င်းကုန်စည်များအနက် (K) အမှတ်တံဆိပ်ပဲပြားတွင် တာရှည်ခံ‌ဆေးသတ်မှတ်ပမာဏထက် ကျော်လွန်ပါဝင်နေကြောင်းတွေ့ရှိရ၍ စျေးကွက်အတွင်းရှိ (K) အမှတ်တံဆိပ်ပဲပြား(၆၀)တွဲ၊ တစ်တွဲလျှင် ကျပ်(၄၂၀)၊ စုစုပေါင်းတန်ဖိုး ကျပ်(၂၅၂၀၀)ကို စျေးတာဝန်ခံရုံးခန်းရှေ့၌ဖျက်ဆီးခဲ့ပြီး တစ်ဆင့်ရောင်းချသည့် စျေးသည်(၄)ဦးအား ဆက်လက်ရောင်းချခြင်းမပြုရန်အတွက် အစားအသောက်နှင့်ဆေးဝါးကွပ်ကဲရေးဦးစီးဌာနအနေဖြင့် ဝန်ခံကတိလက်မှတ်ရေးထိုးစေခဲ့ကြောင်းသိရှိရပါသည်။

DOCA(မကွေး)

 စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးရုံးအစည်းအဝေးခန်းမ၌ (၁၉-၉-၂၀၂၃) ရက်နေ့မှ (၂၀-၉-၂၀၂၃)ရက်နေ့အထိ ဝန်ထမ်းစွမ်းဆောင်ရည်မြှင့်တင်ရေးသင်တန်း(၉/၂၀၂၃) ကျင်းပပြုလုပ်ခဲ့ပါသည်။

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး ဦးမြင့်ဝင်းက အဖွင့်အမှာစကားပြောကြားရာတွင် ဝန်ထမ်းများဝမ်းစာပြည့်ဝရေး၊ Capacity မြှင့်တင်ရေးအတွက် ဆောင်ရွက်ရခြင်းဖြစ်ကြောင်း၊ တစ်ဦးချင်းအနေဖြင့် အားထုတ်ကြိုးပမ်း‌ရန်လိုအပ်ပါကြောင်း၊ သင်တန်းပို့ချချက်များကိုလည်း သေချာစွာလေ့လာမှတ်သားကြစေလိုကြောင်း ပြောကြားခဲ့ပါသည်။ သင်တန်းတွင် ဒုတိယတိုင်းဒေသကြီးဦးစီးမှူး ဒေါ်အေးအေးမိုး(လက်ထောက်ညွှန်ကြားရေးမှူး)က အငြင်းပွားမှုဖြေရှင်းရေး စေ့စပ်ညှိနှိုင်းသူ (Mediator)များ၏ အခန်းကဏ္ဍအကြောင်းကိုလည်းကောင်း၊ စီမံရေးရာဌာနခွဲတာဝန်ခံ ဦးသိန်းဦး(ဦးစီးအရာရှိ)က အဂတိလိုက်စားမှုနှင့်စပ်လျဉ်း၍ တားဆီးကာကွယ်ခြင်းကဏ္ဍအကြောင်း သိကောင်းစရာများကိုလည်းကောင်း၊ စားသုံးသူရေးရာဌာနခွဲနှင့် ထုတ်ကုန်လုံခြုံစိတ်ချရမှုဌာနခွဲမှ ကြီးကြပ်သူအရာရှိ တာဝန်ခံ ဒေါ်အေးမဉ္ဇူခိုင်(ဦးစီးအရာရှိ)က ကုန်အညွှန်းအမှတ်အသားစိစစ်ရာတွင် သတိမူရမည့်အချက်များနှင့် လုပ်ငန်းရှင်များအား အဓိက  ထားဆွေးနွေးဟောပြောရမည့်အချက်များအကြောင်းကိုလည်းကောင်း၊ ထုတ်ကုန်လုံခြုံစိတ်ချရမှုဌာနခွဲတာဝန်ခံ ဒေါ်အေးအေးခိုင်(ဦးစီးမှူး)က စီးပွားရေးလုပ်ငန်းရှင်များသိသင့်သည့် စားသုံးသူကာကွယ်ရေးဥပဒေအကြောင်း သိကောင်းစရာများကိုလည်းကောင်း Power Point များဖြင့် အသေးစိတ်ဆွေးနွေးခဲ့ပြီး တက်ရောက်လာသောသင်တန်းသားများ၏ သိလိုသည်များမေးမြန်းမှုအပေါ် အပြန်အလှန်ဆွေးနွေးခဲ့ကြပါသည်။ အဆိုပါသင်တန်းသို့ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး၊ ဒုတိယတိုင်းဒေသကြီးဦးစီးမှူး၊ ခရိုင်ဦးစီးမှူးများနှင့်ဌာနတာဝန်ခံများ၊ အရာထမ်း/အမှုထမ်းများနှင့် သင်တန်းနည်းပြများ စုစုပေါင်း(၄၅)ဦးတက်ရောက်ခဲ့ကြကြောင်း သတင်းရရှိပါသည်။ 

DOCA(မကွေး)

  စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဝန်ထမ်း(၁)ဦးတို့သည် (၁၉-၉-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် ကန့်ဘလူမြို့ အမှတ်(၅)ရပ်ကွက်ရှိ “သိန်းကမ္ဘာ”စက်သုံးဆီအရောင်းဆိုင်သို့ သတ်မှတ်ရည်ညွှန်းဈေးဖြင့် ရောင်းချနေခြင်းရှိ/မရှိကို ကွင်းဆင်းစိစစ်ကြပ်မတ်ဆောင်ရွက်ခဲ့ပါသည်။

     ထိုသို့စစ်ဆေးရာတွင် စက်သုံးဆီတင်သွင်းဖြန့်ဖြူးရောင်းချနေသည့် လုပ်ငန်းရှင်အနေဖြင့် တရားမဝင် စက်သုံးဆီ၊ ချောဆီများတင်သွင်းဖြန့်ဖြူးရောင်းချနေခြင်းကိုစစ်ဆေးတွေ့ရှိရပါက အရေးယူဆောင်ရွက်သွားမည်ဖြစ်ကြောင်း၊ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက နေ့စဉ်ထုတ်ပြန်သော စက်သုံးဆီရည်ညွှန်းဈေးထက် ပိုမိုရောင်းချခြင်းမရှိစေရေး၊ ပြည်သူများအဆင်ပြေစွာဝယ်ယူနိုင်ရန်အတွက် စက်သုံးဆီအရောင်းဆိုင်များ စက်သုံးဆီပြတ်လပ်မှုမရှိစေရေး၊ ပုံမှန်ဖွင့်လှစ်ရောင်းချနိုင်ရေးနှင့် စက်သုံးဆီများကို အချင်အတွယ်မှန်ကန်စွာရောင်းချနိုင်ရေး ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ကြရန် အသိပညာပေး၍ လက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံးလက်အောက်ရှိ ကျွန်းလှမြို့နယ်တာဝန်ခံ ဒေါ်ဝေဝေအောင်သည် ၂၀၂၃ခုနှစ်၊ စက်တင်ဘာလ(၁၈)ရက်နေ့ နေ့လယ်(၁၂း၃၀)နာရီအချိန်တွင် စစ်ကိုင်းတိုင်းဒေသကြီး၊  ကန့်ဘလူခရိုင်၊ ကျွန်းလှမြို့၊ သစ်ရာမြိုင်ရပ်ကွက်ရှိ “ရွှေတောင်တန်း” ကိတ်၊ မွေးနေ့ကိတ်နှင့်မုန့်မျိုးစုံလုပ်ငန်းရှင်နှင့်သွားရောက်တွေ့ဆုံဆွေးနွေး၍ အသိပညာပေးခဲ့ပါသည်။

    ထိုသို့တွေ့ဆုံဆွေးနွေးရာတွင် စားသုံးသူရေးရာဦးစီးဌာန၊ ကျွန်းလှမြို့နယ်တာဝန်ခံ ဒေါ်ဝေဝေအောင်က အသင့်စားရသည့်မုန့်ဖြစ်သောကြောင့် ထုတ်လုပ်ရောင်းချခြင်းနှင့်ပတ်သက်၍ စားသုံးသူကာအကွယ်ရေး ဥပဒေ(၂၀၁၉)၊ အခန်း(၁၅၊) ပုဒ်မ(၂၈)အရ ကုန်စည် (သို့မဟုတ်) ဝန်ဆောင်မှုများလုံခြုံစိတ်ချရမှုရှိစေရေးနှင့် စားသုံးသူပြည်သူများဘေးအန္တရာယ်ကင်းရှင်းစေရေး  အခန်း(၁၈)ပါ ကုန်အညွှန်းအမှတ်အသားနှင့်ပတ်သက်၍ စားသုံးသူကာကွယ်ရေးကော်မရှင်ကထုတ်ပြန်ထားသော ညွှန်ကြားချက်အမှတ် (၂/၂၀၁၉)နှင့်အညီ ကုန်ပစ္စည်းများတွင် မြန်မာစာဖြင့် မဖြစ်မနေဖော်ပြရမည့် အသေးစိတ်စိစစ်ချက်များကိုဖော်ပြထားခြင်း ရှိ/မရှိတို့အတွက် “ရွှေတောင်တန်း” ကိတ်၊ မွေးနေ့ကိတ်နှင့် မုန့်မျိုးစုံလုပ်ငန်းသည် အသင့်စားရသော မုန့်များဖြစ်သည့်အတွက်  သန့်ရှင်းမှုရှိစေရေး၊ မုန့်များထုတ်လုပ်မှုအဆင့်ဆင့်တွင်လည်း သန့်ရှင်းသပ်ရပ်စွာထုတ်လုပ်စေရေးနှင့် မုန့်များထုတ်လုပ်ရာတွင် ကုန်အညွှန်းအမှတ်အသားများ ပြည့်စုံမှန်ကန်စွာထည့်သွင်းဖော်ပြရန်အတွက် မိမိတို့စာသုံးသူရေးရာဦးစီးဌာနအနေဖြင့် ဆောင်ရွက်ပေးလျက်ရှိပါကြောင်းနှင့် မိမိတို့မြို့နယ်အတွင်း ထုတ်လုပ်နေသောလုပ်ငန်းရှင်များ၊ မုန့်မျိုးစုံလုပ်ငန်းများနှင့် အစားအသောက်ထုတ်လုပ်နေသည့် လုပ်ငန်းရှင့်များကိုလည်း ကျွန်မတို့စားသုံးသူရေးရာဦးစီးဌာနက ကုန်အညွှန်းအမှတ်အသားပြည့်စုံစွာဖော်ပြခြင်းနှင့်ပတ်သက်ပြီး အခမဲ့ဆောင်ရွက်ပေးနေကြောင်း စကားလက်ဆင့်ကမ်းကူညီဆောင်ရွက်ပေးရန်နှင့်  ဒေသထွက် “ရွှေတောင်တန်း” ကိတ်၊ မွေးနေ့ကိတ်နှင့် မုန့်မျိုးစုံလုပ်ငန်းမှ ထုတ်လုပ်နေသော အမှတ်တံဆိပ်ကိုစိစစ်၍ ကုန်အညွှန်းအမှတ်အသားပြည့်စုံမှုမရှိသေးပါသဖြင့် ပြည့်စုံအောင် ဖြည့်သွင်းကူညီဆောင်ရွက်ပေးခဲ့ပြီး ကုန်အညွှန်းအမှတ်အသားလျှောက်ထားရန် တိုက်တွန်းပြောကြားခဲ့ပါသည်။ ထို့နောက် မိမိတို့ စားသုံးသူကာကွယ်းရေးဥပဒေပါ စီးပွားရေးလုပ်ငန်းရှင်တို့လိုက်နာဆောင်ရွက်ရမည့်တာဝန်များအကြောင်း ရှင်းလင်းဆွေးနွေးပြောကြားပြီး လက်ကမ်းစာစောင်ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)