HighLight News

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ၂၀၂၃ခုနှစ်၊ စက်တင်ဘာလ ၆ရက်နေ့၊  နံနက် (၇:၀၀)နာရီအချိန်တွင် အစားအသောက်နှင့် ဆေးဝါးကွပ်ကဲရေးဦးဌာန၊ တိုင်းဒေသကြီးဦးစီးမှူး ဒေါ်မေသန်းနိုင်ဦးဆောင်၍ တောင်ငူမြို့နယ်၊  ညောင်ပင်ဈေးတွင် ရောင်းချလျက်ရှိသော အစားအသောက်များ၌ စားသုံးရန်မသင့်သည့် ဓာတုပစ္စည်းများပါဝင်မှုရှိ/ မရှိ ကွင်းဆင်းစစ်ဆေးရာ ပူးပေါင်းပါဝင်ဆောင်ရွက်ခဲ့ပါသည်။

    အစားအသောက်နှင့်ဆေးဝါးကွပ်ကဲရေးဦးစီးဌာန၊ တိုင်းဒေသကြီးဦးစီးမှူး ဦးဆောင်သောအဖွဲ့သည် ဈေးအတွင်းရောင်းချလျက်ရှိသော ပဲပြား၊ ပဲသွေး၊ အမဲသွေးခဲ၊ ကြက်သွေးခဲများကို နမူနာကောက်ယူပြီး Mobile Laboratory Micro Bus ဖြင့် ဖော်မလင်ကဲ့သို့သော စားသုံးရန်မသင့်သည့် တာရှည်ခံဓာတုဆေးများပါဝင်မှုရှိ/မရှိကို စမ်းသပ်စစ်ဆေးခဲ့ပါသည်။

   ကွင်းဆင်းစစ်ဆေးရာသို့ မြို့နယ်အစားသောက်နှင့်ဆေးဝါးကြီးကြပ်ကွပ်ကဲရေးကော်မတီဝင် ဌာနဆိုင်ရာများဖြစ်သော အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့မှူးရုံး၊ မြို့နယ်စည်ပင်သာယာရေးအဖွဲ့နှင့် မြို့နယ်ပြည်သူ့ကျန်းမာရေးဦးစီးဌာနတို့မှ တာဝန်ရှိသူတို့က ပူးပေါင်းပါဝင်ဆောင်ရွက်ခဲ့ကြောင်းသိရပါသည်။

DOCA(ပဲခူး)

    ပဲခူးတိုင်းဒေသကြီးအစိုးရအဖွဲ့ဝန်ကြီးချုပ် ဦးမျိုးဆွေဝင်းသည် ၂၀၂၃ခုနှစ်၊ စက်တင်ဘာလ ၃ရက်နေ့၊ နေ့လယ်ပိုင်းတွင် တောင်ငူခရိုင်၊ ရေတာရှည်မြို့နယ်၊ ကြံသနွယ်ကျေးရွာအုပ်စု၊ တောင်နန်ချွန်ကျေးရွာရှိ စပါးခွံဓာတ်ငွေ့သုံး လျှပ်စစ်ဓာတ်အားပေးစက် Gasifier Power Plant တပ်ဆင်အသုံးပြု၍ မုန့်ဖတ်ခြောက်ထုတ်လုပ်နေသည့် ဟိန်းစားသောက်ကုန်လုပ်ငန်းသို့သွားရောက်ကြည့်ရှုစစ်ဆေးရာ လုပ်ငန်းရှင် ဦးသောင်းဝင်းထွန်းက လုပ်ငန်းဆောင်ရွက်မှုအခြေအနေများကို ရှင်းလင်းတင်ပြပါသည်။

    တိုင်းဒေသကြီးဝန်ကြီးချုပ်က Gasifier မှထွက်ရှိသည့် ရေဆိုးများကို စနစ်တကျသန့်စင်ပြီးမှသာ စွန့်ပစ်ရန်၊ ထွက်ရှိလာသော စပါးခွံဖွဲပြာတို့ကို လောင်စာတောင့်ထုတ်လုပ်သွားရန်၊ မုန့်ဖတ်ခြောက်ထုပ်ပိုးမှုစနစ်အဆင့်မြှင့်တင်၍ ပြည်ပနိုင်ငံများသို့ တိုက်ရိုက်တင်ပို့ရောင်းချနိုင်ရေး ဆောင်ရွက်ရန် လမ်းညွှန်မှာကြာခဲ့ပြီး သက်ဆိုင်ရာဌာနဆိုင်ရာများမှ တာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးခဲ့ပါသည်။

    တိုင်းဒေသကြီးဝန်ကြီးချုပ်သည် ၂၀၂၃ခုနှစ်၊ စက်တင်ဘာလ ၄ရက်နေ့၊ နံနက်ပိုင်းတွင် တောင်ငူမြို့၊ ဘုရင့်နောင်ဈေးအနီးတွင် ဖွင့်လှစ်ရောင်းချလျက်ရှိသော ကိုယ်တိုင်စိုက်ပျိုးမွေးမြူထုတ်လုပ်သူများ၏ တိုက်ရိုက်အရောင်းဈေးတွင် တောင်ငူမြို့ရှိ ဆန်ကုန်သည်များနှင့်ဆန်စက်လုပ်ငန်းရှင်များ၊ ဆီကုန်သည်များ၊ မွေးမြူရေးလုပ်ငန်းရှင်များနှင့် တစ်နိုင်တစ်ပိုင်စိုက်ပျိုးသူများက ဆန်၊ စားသုံးဆီ၊ သားငါးနှင့် ဟင်းသီးဟင်းရွက်များတိုက်ရိုက်ရောင်းချနေမှုကို ကြည့်ရှုစစ်ဆေးပြီး တာဝန်ရှိသူများအား လိုအပ်သည်များမှာကြားခဲ့ကြောင်းသိရှိရပါသည်။

DOCA(ပဲခူး)

   ပဲခူးတိုင်းဒေသကြီး၊ ကဝမြို့နယ်၊ သပြုကျေးရွာသည် သတ္တုကုန်ချောပစ္စည်းများကို သက်တမ်း(၁၀၀)ကျော်   မိရိုးဖလာလုပ်ငန်းအဖြစ် ရွာလုံးကျွတ်နီးပါး လုပ်ကိုင်ဆောင်ရွက်သည့် ကျေးရွာတစ်ရွာဖြစ်ပါသည်။ ကုန်ကြမ်းပစ္စည်းများဖြစ်သော သံ၊ သတ္တုပစ္စည်းအဟောင်းများ၊ ကျောက်မီးသွေး၊ ရေနံချိုး၊ မီးသွေးနှင့် ဒီဇယ်ဆီတို့ကို ရန်ကုန်တိုင်းဒေသကြီး၊ ရွှေပေါက်ကံမြို့၊ ဘုရင့်နောင်၊ တောင်ဒဂုံ၊ စော်ဘွားကြီးကုန်းမှရရှိပါသည်။ လုပ်ငန်းတစ်ခုလျှင် လုပ်သားဦးရေ(၁၀)ဦးမှ (၂၀)ဦးခန့်လုပ်ကိုင်ဆောင်ရွက်လျက်ရှိပါသည်။ နေအိမ်များတွင် အသုံးပြုနေသော မိုးဗြဲဒယ်၊ သတ္တုဒယ်ဆိုဒ်စုံ ၊ သတ္တုငရုတ်ဆုံ၊ မော်တာပန်ကာဒလက်၊ ကားလက်ကိုင်ဂျက်၊ ဆိုင်ကယ်ခြေနင်း စသည့်ပစ္စည်းများကို သဲပုံလောင်းနည်းပညာဖြင့် ထုတ်လုပ်ပေးလျက်ရှိပါသည်။ လုပ်ငန်းလုပ်ကိုင်သူ (၁၀၀)ကျော်ခန့်ရှိပြီး ထိုလုပ်ငန်းများမှ အလုပ်သမားဦးရေ (၇၀၀) ဦးကျော်ခန့်အလုပ်အကိုင်ရရှိလျက်ရှိပါသည်။ ဈေးကွက်အနေဖြင့် ဒေသတွင်းနှင့် ရန်ကုန်၊ မန္တလေး၊ ဧရာဝတီ၊ မော်လမြိုင်မြို့များသို့ တင်ပို့ရောင်းချလျက်ရှိပြီး  ဒေသတွင်းပြပွဲများနှင့် နိုင်ငံတော်အဆင့်ပြပွဲကြီးများတွင် ပါဝင်ပြသနိုင်သည့်အတွက် လူသိများသည့်ထုတ်ကုန် တစ်မျိုးဖြစ်ပြီး ဈေးကွက်လည်းပိုမိုရရှိလာကြောင်းသိရှိရပါသည်။ လုပ်ငန်းများရေရှည်ရပ်တည်နိုင်စေရန်နှင့် ဒေသတွင်း MSMEs လုပ်ငန်းဖွံ့ဖြိုးတိုးတက်စေရန်အတွက်လည်း သက်ဆိုင်ရာဌာနများက MSMEs ချေးငွေများရရှိရေး ချိတ်ဆက်ဆောင်ရွက်ပေးလျက်ရှိရာ ၎င်းဒေသအတွက် အလုပ်အကိုင်အခွင့်အလမ်းများ ပိုမိုရရှိလာမည်ဖြစ်ပါကြောင်းသိရှိရပါသည်။

DOCA(ပဲခူး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဆိပ်ဖြူမြို့နယ်တာဝန်ခံ ဒေါ်မြင့်မြင့်သန်း၊ ဒေါ်တင်မာရီ ဒု-ဦးစီးမှူးသည် စားသုံးသူများဘေးကင်းလုံခြုံမှုရှိစေရေးအတွက် မိတ်ဖက်ဌာနဖြစ်သော မြို့နယ်စည်ပင်သာယာရေး အဖွဲ့၏ဦးဆောင်မှုဖြင့် (၆-၉-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် ဆိပ်ဖြူမြို့၊ ပတ္တမြားဈေးအတွင်း/အပြင်နှင့် အနောက်ပိုင်းရပ်ကွက်ရှိ စားသောက်ကုန်ရောင်းချသည့် ဈေးဆိုင်(၁၂)ဆိုင်၌ မကွေးတိုင်းဒေသကြီး၊ အစားအသာက်နှင့်ဆေးဝါးကွပ်ကဲရေးဦးစီးဌာန (FDA)မှ တိုင်းတာဝန်ခံ ဒေါက်တာ စိုင်းမင်းသူထွန်းဦးဆောင်သောအဖွဲ့သည် ဈေးကွက်အတွင်း ရောင်းချလျက်ရှိသောကုန်ပစ္စည်း(၂၄)မျိုးအား နမူနာကောက်ယူပြီး ဓာတ်ခွဲစစ်ဆေးချက်တွေ့ရှိမှုအရ စားသုံးရန်မသင့်သော စားသောက်ကုန်ပစ္စည်း(၅)မျိုးတွေ့ရှိခဲ့ပါသည်။

     မကွေးတိုင်းဒေသကြီး၊ အစားအသာက်နှင့် ဆေးဝါးကွပ်ကဲရေးဦးစီးဌာနမှ အကြောင်းကြားချက်အရ (၈-၉-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် ပတ္တမြားဈေးအတွင်းရှိ ဈေးဆိုင်များ၌ ရောင်းချခြင်းရှိ/ မရှိ မြို့နယ်စည်ပင်ဦးဆောင်မှုဖြင့် ဈေးကွက်စောင့်ကြည့်စစ်ဆေးခဲ့ပါသည်။

    ထိုသို့စစ်ဆေးရာ၌ စားသုံးရန်မသင့်သည့်ပစ္စည်း(၅)မျိုးဖြစ်သည့် အရောင်တင်မှုန့်(၁၀)ကျပ်သား၊ မလိုင်ခဲ(၇၅)ထုပ်၊ ပဲပြား(၇)ခဲ၊ ပဲသွေး(၁၀)ခဲ၊ ဒံပေါက်သုံးအမှုန့်အနီ(၉၀)ထုပ်၊ အဝါ(၇)ထုပ်တို့ကို ဆိပ်ဖြူမြို့၊ ပတ္တမြားဈေးရှိ ကုန်စုံဆိုင်ပေါ်တွင် ရောင်းချဖြန့်ဖြူးနေသည်ကိုတွေ့ရှိရပြီး စားသုံးသူများအတွက် ဘေးကင်းလုံခြုံမှုမရှိသောကုန်စည်များကို ဈေးကွက်အတွင်းမှ အမြန်ဆုံးပပျောက်စေရေး  မြို့နယ်စည်ပင်အဖွဲ့က ဦးဆောင်သိမ်းဆည်းခဲ့ပြီး စားသုံးရန်မသင့်သည့်ပစ္စည်း(၅)မျိုးကိုဖျက်ဆီးခဲ့ပါသည်။

   ထုတ်လုပ်ရောင်းချဖြန့်ဖြူးရောင်းဝယ်ဖောက်ကားသော ဈေးဆိုင်ပိုင်ရှင်များကိုလည်း စားသုံးသူကာကွယ်ရေးဥပဒေ ၂၀၁၉တွင်ပါရှိသော စီးပွားရေးလုပ်ငန်းရှင်တာဝန်များ၊ အခန်း(၁၈)ကုန်အညွှန်းအမှတ်အသားဆိုင်ရာ ပြဋ္ဌာန်းချက်များနှင့် ပုဒ်မ ၄၁၊ ပုဒ်မခွဲ (ခ)နှင့်(ဆ)တို့အရ ကုန်အညွှန်းအမှတ်အသားများဖော်ပြရာတွင် မြန်မာဘာသာနှင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ရေးသားဖော်ပြခြင်းပါရှိသောကုန်စည်များကိုသာ ‌စားသုံးသူများဘေးကင်းလုံခြုံမှုရှိစေရေးအတွက် ရောင်းချဖြန့်ဖြူးရမည်ဖြစ်ကြောင်း အသေးစိတ်ရှင်းလင်းဆွေးနွေးခဲ့ပြီး ဒုတိယအကြိမ်တွင် ထပ်မံစစ်ဆေးတွေ့ရှိပါက အရေးယူခံရမည်ဖြစ်ကြောင်းသိရှိစေရန်နှင့် အရေးယူမှုအနေဖြင့် ရောင်းချဖြန့်ဖြူးသူတို့မှာ သိရှိနားလည်ကြောင်း ဝန်ခံကတိလက်မှတ်ရေးထိုးစေခဲ့ကြောင်းသိရှိရပါသည်။

 DOCA(မကွေး)

   ကချင်ပြည်နယ်၊   စားသုံးသူရေးရာဦးစီးဌာန၊      ဗန်းမော်ခရိုင်ဦးစီးမှူးရုံးမှ     ခရိုင်ဦးစီးမှူး ဦးအောင်ကျော်ဦးသည် (၁၂-၉-၂၀၂၃) ရက်နေ့တွင်  ဗန်းမော်ခရိုင်ဦးစီးမှူးရုံး၌ စားအုန်းဆီဖြန့်ဖြူးရောင်းချသော စီးပွားရေးလုပ်ငန်းရှင်(၂)ဦးနှင့်တွေ့ဆုံဆွေးနွေးခဲ့ပါသည်။

    ထိုသို့ဆွေးနွေးရာတွင် ခရိုင်ဦးစီးမှူးက စားသုံးသူကာကွယ်ရေးဥပဒေ ၂၀၁၉ပါ စီးပွားရေးလုပ်ငန်းရှင်၏တာဝန်များ၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍  ကုန်စည်အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာဖော်ပြရမည့်အချက်များ၊ ကုန်အညွှန်းအမှတ်အသားဖော်ပြချက်နှင့်စပ်လျဉ်း၍ စားသုံးဆီဖြန့်ဖြူးရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ်(၁/၂၀၂၁) ကို တိတိကျကျလိုက်နာဆောင်ရွက်သွားရန်၊ စီးပွားရေးလုပ်ငန်းရှင်သည် ကုန်စည်နှင့်စပ်လျဥ်း၍ စားသုံးသူလက်ခံသုံးစွဲနိုင်သောအရည်အသွေးရှိခြင်း၊ ကုန်စည်၏အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိခြင်း၊ ဘေးအန္တရာယ်ကင်းရှင်းစေခြင်း၊ သုံးစွဲသူ၏လိုအပ်ချက်အတွက် သင့်လျော်မှုရှိခြင်း စသည့်အာမခံချက်များကိုပေးအပ်ရမည်ဖြစ်ကြောင်း ရှင်းလင်းဆွေးနွေးပြောကြားခဲ့ပြီး စားသုံသူကာကွယ်ရေးဆိုင်ရာလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(ကချင်)