သတင်းနှင့် လှုပ်ရှားမှုများ

            ဖျာပုံခရိုင်၊ ဘိုကလေးမြို့နယ်၊ စားသုံးသူရေးရာဦးစီးဌာနဦးစီးမှူးရုံးမှ မြို့နယ်တာဝန်ခံနှင့်ဝန်ထမ်းတို့သည် မေလ(၂)ရက်နေ့ နံနက်(၁၀:၃၀)နာရီတွင် စားသုံးဆီဖြန့်ဖြူးရောင်းချသူလုပ်ငန်းရှင်(၇)ဦးတို့အား စားသုံးသူကာကွယ်ရေးဆိုင်ရာ အသိပညာပေး ဆောင်ရွက်ခဲ့ပါသည်။

          အဆိုပါအခမ်းအနားတွင် မြို့နယ်တာဝန်ခံက ဟင်းသီးဟင်းရွက်ဆီ( Vegetable Oil, Cooking Oil ) နှင့်စပ်လျဉ်း၍ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်များအရ ဈေးကွက်အတွင်းစားသုံးဆီများအနက် အချို့သောစားသုံးဆီများကို ဟင်းသီးဟင်းရွက်ဆီ(Vegetable Oil, Cooking Oil ) ဖော်ပြပြီးထုတ်လုပ်ဖြန့်ဖြူးရောင်းချလျက်ရှိကြောင်း စိစစ်တွေ့ရှိရ၍ အဆိုပါကုန်စည်၏ကုန်အညွှန်းအမှတ်အသားဖော်ပြခြင်းဆိုင်ရာ ပြဌာန်းချက်များကို စားသုံးသူများထင်ယောင်ထင်မှားမဖြစ်စေရေးနှင့် အခြေခံလိုအပ်ချက်အပေါ်တွင် စိတ်ကျေနပ်မှုရှိစေရေးတို့အတွက် ပင်ရင်းပါဝင်ပစ္စည်းကို အခြေခံသောကုန်စည်၏အမျိုးအမည်နှင့် အသားတင်အလေးချိန်ယူနစ် တိကျစွာ မြန်မာဘာသာဖြင့်ဖော်ပြထားရန် (၁၈.၁၂.၂၀၂၂) နေ့ကြေးမုံသတင်းစာတွင်  စတင်ထုတ်ပြန်ထားပြီး (၆) လပြည့်ပြီးသည့်နေ့ရက်မှ စတင်အာဏာသက်ရောက်မည်ဖြစ်ကြောင်းနှင့် ပြည်ပမှ တင်သွင်းထားသည့် စားသုံးဆီများဖြန့်ဖြူးသယ်ယူပို့ဆောင်ခြင်း ညွှန်ကြားချက်အရလည်း ရန်ကုန်မြို့ ဆီသိုလှောင်ရုံခန်းများမှ လက်ကားဖြန့်ချီခြင်းလုပ်ငန်းစဉ်ကို (၂၀၂၂)ခုနှစ်မေလ(၁)ရက်နေ့မှ စတင်အကောင်အထည်ဖော် ဆောင်ရွက်နေပြီဖြစ်ကြောင်း၊ ဆီကုန်သည်နှင့်ဆီလုပ်ငန်းရှင်များအနေဖြင့် ရန်ကုန်ဆီသိုလှောင်ကန်များမှ ဆီများကိုလာရောက်ထုတ်ယူရာတွင် သတ်မှတ်ထားသည့်အဝါရောင် ပေပါအသစ် (သို့မဟုတ်) သန့်စင်ပြီးအဝါရောင်ပေပါများဖြင့် ထုတ်ယူခွင့်ပြုသွားမည်ဖြစ်ကြောင်း အသိပေးကြေငြာချက်ကို ဒေသတွင်းဆီလုပ်ငန်းရှင်များ ကျယ်ကျယ်ပြန့်ပြန့် သိရှိစေရန်ဆွေးနွေးပြောကြားခဲ့ပါသည်။

          ထိုနောက် တက်ရောက်လာသူများမှ သိလိုသည်များမေးမြန်းမှုအပေါ်  မြို့နယ်တာဝန်ခံက ပြန်လည်ဖြေကြားခဲ့ကြောင်း သတင်းရရှိပါသည်။

DOCA(ဧရာဝတီ)

             ပဲခူးတိုင်းဒေသကြီး ၊ သာယာဝတီခရိုင် ၊ ကြို့ပင်ကောက်မြို့နယ်တွင် (၄.၅.၂၀၂၂ )ရက်နေ့ နံနက်ပိုင်းတွင် တူးမြောင်းအုပ်စု ၊ ဇီးတောကျေးရွာနှင့် နေ့လည်ပိုင်းအချိန်တွင် ကြို့ကုန်းအုပ်စု ၊သံဖြူကျောင်းကျေးရွာများသို့ စိုက်ပျိုးမွေးမြူရေး ကုန်ထုတ်လုပ်မှု ဖွံ့ဖြိုးတိုးတက်ရေး သင်တန်းအား (၈)ဌာန ပူးပေါင်း၍ တောင်သူ ၈၈ဦးအား စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများမှ အသိပညာပေး ဟောပြောခဲ့ပါသည်။

          တက်‌ရောက်လာသူများအား စားသုံးသူရေးရာဦးစီးဌာန ဖြစ်ပေါ်လာပုံနှင့် ဌာန၏လုပ်ငန်း ဆောင်ရွက်ချက် ၊ စားသုံးသူကာကွယ်ရေး ဥပဒေပေါ်ပေါက်လာပုံ ၊ ဥပဒေပါ အကြောင်းအရာထဲမှ စားသုံးသူအခွင့်အရေးများ နစ်နာဆုံးရှုံးလျှင် တိုင်ကြားနိုင်မည့်လမ်းကြောင်း ၊ ကုန်စည်နှင့် ဝန်ဆောင်မှုများ ဝယ်ယူသုံးစွဲရာတွင် အထောက်အထားပြေစာများ လက်ခံရယူကြရန်နှင့် ဝယ်ယူသည့် ကုန်စည်တွင် စားသုံးသူဥပဒေမှပါရှိသည့် အခန်း (၁၈)ပါ ကုန်အညွှန်းအမှတ်အသားနှင့်ပတ်သက်၍ သတိပြုဝယ်ယူ သုံးစွဲကြရန် ဥပမာပစ္စည်း နမူနာများပြသ၍ ဟောပြောခဲ့ပါသည်။  

          စားသုံးဆီ ၊ စက်သုံးဆီ ၊ အခြေခံစားသောက်ကုန် ဆေးစျေးနှုန်း ၊ စျေးကွက်များကို နေ့စဉ်မိမိတို့ ဌာနမှ စျေးကွက်တွင် သတင်းရယူပေးရသည့် ပြည်တွင်းကုန်သွယ်မှုလုပ်ငန်း အကြောင်းများကိုလည်း အသိပညာပေးပြီး ဆီစားသုံးမှုလျှော့ချစေရေးနှင့် ပိုမိုစားသုံးလျှင် ကျန်းမာရေးထိခိုက်နိုင်ကြောင်း ထည့်သွင်းပြောကြားခဲ့ပြီး စားသုံးဆီဖူလုံရေးအတွက် တောင်သူများအနေဖြင့် တစ်နိုင်တစ်ပိုင် နေကြာသီးနှံကိုလည်း စိုက်ပျိုးကြရန် အကြံပေးပြောကြားခဲ့၍ လက်ကမ်းစာစောင်များ ဖြန့်ဝေခဲ့ကြောင်း သိရှိိရပါသည်။

DOCA(ပဲခူး)

            စားသုံးသူရေးရာဦးစီးဌာန၊ ဖြူးမြို့နယ်တာဝန်ခံ ဒေါ်သန္တာစိုးနှင့် ဌာနခွဲစာရေး ဒေါ်ခင်န္တာဦးတို့သည် ဖြူးမြို့နယ် စီမံအုပ်ချုပ်ရေးအဖွဲ့ ဥက္ကဌ ဦးစောမင်းသူ ဦးဆောင်သော ဌာနဆိုင်ရာပူးပေါင်းအဖွဲ့ဝင်များနှင့်အတူ မေလ ၅ ရက်နေ့ နံနက်ပိုင်းက ဖြူးမြို့နယ် လိပ်သေကျေးရွာအုပ်စု၊ ကွာရီကျေးရွာ ဘုန်းတော်ကြီးကျောင်း ဓမ္မာရုံ၌ စားသုံးသူကာကွယ်ရေးဆိုင်ရာ အသိပညာပေးဟောပြောခဲ့ပါသည်။

              ဟောပြောပွဲတွင် မြို့နယ်တာဝန်ခံ ဒေါ်သန္တာစိုးက စားသုံးသူကာကွယ်ရေးဆိုင်ရာဆောင်ရွက်ချက်များနှင့် စားသုံးသူနစ်နာဆုံးရှုံးမှုများအတွက် တိုင်ကြားနိုင်သည့် အကြောင်းများကိုလည်းကောင်း၊ ပြည်တွင်းကုန်သွယ်မှုဖွံ့ဖြိုးရေးအတွက် ဈေးနှုန်းဈေးကွက်သတင်းများ၊ သီးနှံများ၏ စိုက်အောင်ထွက် စားသုံးပိုလျှံ သတင်းအချက်အလက်များကို ရယူစုဆောင်း၍ တင်ပြဆောင်ရွက်ပေးနေသည့် အခြေအနေများ၊ သီးနှံအစုအဖွဲ့များ ဖွဲ့စည်း၍ ပူးပေါင်းဆောင်ရွက်သည့် အလေ့အထများရှိစေရေးဆောင်ရွက်ပေးသည့် အခြေအနေများကိုလည်းကောင်း၊ ကျန်းမာရေးဌာနက အကြံပြုထားသည့် လူတစ်ဦးစားသုံးသင့်သည့် ဆီပမာဏထက်ကျော်လွန်စားသုံးခြင်းမပြုခြင်းဖြင့် ကျန်းမာရေးနှင့် ညီညွတ်သည့်အပြင် မိသားစုစီးပွားရေးကိုလည်း အထောက်အကူပြုမည့် အခြေအနေများ၊ မြေပဲ၊ နှမ်းနှင့် နေကြာတိုးချဲ့စိုက်ပျိုးခြင်းဖြင့် ကျန်းမာရေးနှင့်ညီညွတ်သည့် စားသုံးဆီကို စားသုံးရမည့်အပြင် ပြည်တွင်းစားသုံးဆီဖူလုံရေးအတွက် အထောက်အကူပြုမည့် အခြေအနေများကိုလည်းကောင်း ဟောပြောပါသည်။

              ဟောပြောပွဲတွင် အထွေထွေအုပ်ချုပ်ရေးဦးစီးဌာန၊ ဆည်မြောင်းဦးစီးဌာန၊ စီမံကိန်းရေးဆွဲရေးဦးစီးဌာန၊ စိုက်ပျိုးရေးဦးစီးဌာန၊ ကျေးလက်လမ်းဦးစီးဌာနနှင့် ကျေးလက်ဒေသဖွံ့ဖြိုးရေးဦးစီးဌာနဌာနတို့မှ တာဝန်ရှိသူများကလည်း မိမိတို့ဌာန၏ ဆောင်ရွက်ချက်များကို ရှင်းလင်းပြောကြားပါသည်။ ဟောပြောပွဲသို့ ကွာရီကျေးရွာတောင်သူဦးကြီးများနှင့် မိသားစုဝင်များ ၅၀ ဦးခန့် တက်ရောက်ကြောင်း သိရှိရပါသည်။

DOCA(ပဲခူး)

                 စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံ ဦးမြင့်သူနှင့် ခရိုင်ရုံးမှ ဝန်ထမ်းများသည် မြိုနယ်စည်ပင်သာယာရေးအဖွဲ့နှင့် ပူးပေါင်း၍ မေလ ၂ ရက်နေ့ နံနက် (၁၀:၀၀)နာရီ အချိန်တွင် တောင်ငူမြို့ပေါ်ရှိ ဆီဆိုင်ပိုင်ရှင်များနှင့် တွေ့ဆုံခဲ့ပါသည်။

              ထို့နောက် မြို့နယ်တာဝန်ခံမှ ဆိုင်တာဝန်ရှိသူများအား မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ အရ စားသုံးဆီ၏ အမျိုးအမည်၊ အရွယ်အစား၊ အရေအတွက်၊ အသားတင်ပမာဏနှင့် ထားသိုသိမ်းဆည်းမှု အညွှန်းတို့ကိုလည်းကောင်း၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/၂၀၂၁ အရ ပင်ရင်း ပါဝင်ပစ္စည်းကို အခြေခံသောကုန်စည်၏ အမျိုးအမည်ကို တိကျစွာ မြန်မာဘာသာဖြင့် ဖော်ပြရမည်ဖြစ်ကြောင်းနှင့် ကုန်စည်၏ အသားတင်ပမာဏနှင့် အရွယ်အစားတို့အား မြန်မာအလေးချိန် ယူနစ်ဖြစ်သော ပိဿာကျပ်သားတို့ကို မြန်မာဘာသာဖြင့် ဖော်ပြရမည်ဖြစ်ကြောင်းတို့ကို ဆွေးနွေးခဲ့ပါသည်။

              ထို့ပြင် စားသုံးသူပြည်သူများ ဘေးဉပါဒ်အန္တရာယ်ကင်းစင်ရန်အတွက် (၁.၅.၂၀၂၂) ရက်နေ့မှ စတင်၍ ဆီကန်မှ ထုတ်ယူသော စားသုံးဆီများအား Food Grade Tank အဆင့်ရှိ အဝါရောင် ပေပါအသစ်အတွင်းသို့ ဆီဖြည့်သွင်းရမည်ကိုလည်း အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(ပဲခူး)

              စားသုံးသူရေးရာဦးစီးဌာန၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် မေလ ၅ ရက်နေ့ နံနက်ပိုင်းက ရေတာရှည်မြို့ပေါ်ရှိ စားသုံးဆီရောင်းချသည့် ကုန်စုံဆိုင်ကြီးများသို့ သွားရောက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ပြည်ပမှတင်သွင်းလာသည့် စားအုန်းဆီများ ဖြန့်ဖြူးသယ်ယူပို့ဆောင်ရာတွင် ညွှန်ကြားချက်များကို လိုက်နာစေရေးအတွက်  ရှင်းလင်းပြောကြားခဲ့ပါသည်။

              မြို့နယ်တာဝန်ခံက စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေဖြင့် ပြည်ပမှ တင်သွင်းလာသည့် စားသုံးဆီများ အရည်အသွေးပြည့်မီရေး၊ ပြည်သူများ ကျန်းမာရေးနှင့်ညီညွတ်ပြီး ဘေးအန္တရာယ်ကင်းရှင်းသည့် စားသုံးဆီများ သုံးစွဲနိုင်ရေး၊ ဈေးကွက်အတွင်း ဖြစ်သင့်ဖြစ်ထိုက်သည့် ဈေးနှုန်းများဖြင့် ဝယ်ယူသုံးစွဲနိုင်ရေးတို့အတွက် ပြည်ပမှ စားသုံးဆီများတင်သွင်းခြင်း၊ သိုလှောင်ခြင်း၊ ဖြန့်ဖြူးခြင်းလုပ်ငန်းများကို ထိန်းကျောင်းကြပ်မတ် ဆောင်ရွက်လျှက်ရှိရာ ဈေးကွက်အတွင်းသို့ စားသုံးဆီများ ဖြန့်ဖြူးရာတွင် ဘေးအန္တရာယ်ကင်းရှင်းသည့် လုပ်ငန်းစဉ်များကို စနစ်တကျ အကောင်အထည်ဖော် ဆောင်ရွက်နိုင်ရေးအတွက် လုပ်ငန်းအဖွဲ့များ ဖွဲ့စည်း၍ ဆောင်ရွက်လျှက်ရှိကြောင်း၊ ၂၀၂၂ ခုနှစ်၊ မေလ ၁ ရက်နေ့မှစ၍ စားအုန်းဆီများ ဖြန့်ဖြူးသယ်ဆောင်ရာတွင် ရန်ကုန် ဆိပ်ကမ်းရှိ Shore Tank များမှ ဆီထုတ်ယူရာတွင် အဝါရောင် Food Grade Clean Drum များဖြင့် လည်းကာင်း၊  Food Grade Bowser Truck ဖြင့်လည်းကောင်း စတင်အသုံးပြုရန်၊ ဈေးကွက်အတွင်းသို့ ဖြန့်ဖြူးရာတွင် ဓါတုဗေဒပစ္စည်းများ ထည့်သွင်းအသုံးပြုထားသည့် Drum များတွင် စားအုန်းဆီများ ထည့်သွင်းသုံးစွဲခြင်းမပြုရန်၊ ဈေးကွက်အတွင်းသို့ ဖြန့်ဖြူးရာတွင် Food Grade (New Drum/ Clean Drum/ Jerry Can/ Consumer Pack)များ အသုံးပြုရန်၊ ဈေးကွက်အတွင်းဖြန့်ဖြူးမည့် ထုပ်ပိုးပစ္စည်းများအပေါ်တွင် “စားသုံးဆီတင်သွင်း၊ သိုလှောင်၊ ဖြန့်ဖြူးခြင်း လုပ်ငန်းကြီးကြပ်ရေးကော်မတီ”ထံမှ ခွင့်ပြုချက်ရရှိပြီးသည့် သက်ဆိုင်ရာကုမ္ပဏီ၏ Cap Seal များဖြင့် ချိတ်ပိတ်၍ ကုန်အမှတ်တံဆိပ် (Logo)များ ကပ်နှိပ်ရန် စီမံဆောင်ရွက်လျှက်ရှိပါကြောင်း၊ သို့ဖြစ်ပါ၍ မိမိတို့ မြို့နယ်အတွင်းရှိ ဆီကုန်သည်များ၊ ဆီလုပ်ငန်းရှင်များအနေဖြင့် ရန်ကုန်မြို့ရှိ ဆီသိုလှောင်ကန်များသို့ ဆီများသွားရောက်ထုတ်ယူရာတွင် သတ်မှတ်ထားသည့် အဝါရောင်ပီပါအသစ် သို့မဟုတ် သန့်စင်ဆေးကြောပြီး အဝါရောင်ပီပါများဖြင့်သာ ထုတ်ယူခွင့်ပြုမည်ဖြစ်ပါသဖြင့် ဝန်ကြီးဌာန၏ အသိပေးကြေညာထားသည့်အတိုင်း လိုက်နာဆောင်ရွက်ကြရန် အသိပေးပြောကြားခဲ့ပြီး ဝန်ကြီးဌာန၏ အသိပေးကြေညာချက်အား ဖြန့်ဝေခဲ့ပါသည်။

DOCA(ပဲခူး)