မန္တလေးတိုင်းဒေသကြီး တိုင်းဒေသကြီးဦးစီးမှူးနှင့် မန္တလေးတိုင်းဒေသကြီး ချည်မျှင်စက်ရုံလုပ်ငန်းရှင်များ တွေ့ဆုံ၍ ပုဂ္ဂလိကချည်မျှင်စက်ရုံ လုပ်ငန်းရှင်များအသင်း ဖွဲ့စည်းနိုင်ရေး တွေ့ဆုံဆွေးနွေး
၂၄.၇.၂၀၂၀ ရက်နေ့တွင် တိုင်းဒေသကြီးဦးစီးမှူးနှင့် မန္တလေးတိုင်းဒေသကြီး ချည်မျှင်စက်ရုံလုပ်ငန်းရှင်များသည် မန္တလေးတိုင်းဒေသကြီး စားသုံးသူရေးရာဦးစီးဌာန၊ အစည်းအဝေးခန်းမတွင် ပုဂ္ဂလိကချည်မျှင် စက်ရုံလုပ်ငန်းရှင်များအသင်း ဖွဲ့စည်းနိုင်ရေးအတွက် တွေ့ဆုံခဲ့ပါသည်။ အစည်းအဝေးတွင် ချည်မျှင်စက်ရုံလုပ်ငန်းရှင် ဦးထွန်းနိုင်မှ မြန်မာနိုင်ငံပုဂ္ဂလိက ချည်မျှင်စက်ရုံလုပ်ငန်းရှင်များအသင်း ဖွဲ့စည်းလိုကြောင်း၊ ချည်မျှင်နှင့် အထည်အသင်းကို ၂၀၁၆ ခုနှစ်တွင် စက်မှု(၁)က ဖွဲ့စည်းပေးခဲ့သည့် အသင်းတစ်ခုရှိခဲ့ကြောင်း၊ မိမိတို့အနေဖြင့် ပုဂ္ဂလိက ချည်မျှင်လုပ်ငန်းရှင်များအသင်းကို ဖွဲ့စည်းလိုကြောင်း၊ UMFCCIကို ဆက်သွယ်မေးမြန်းရာတွင် အသင်းတစ်သင်းတွင် တိုင်းဒေသကြီး(၇)တိုင်း ပါဝင်ပါက ဖွဲ့စည်းနိုင်ကြောင်း၊ ချည်မျှင်စက်ရုံလုပ်ငန်းများမှာ တစ်ပြည်လုံးနီးပါးခန့်တွင်ရှိပြီး၊ အသင်းတွင် အသင်းဝင်(၁၀၀)ကျော်နှင့် ဖွဲ့စည်းသွားမည်ဖြစ်ကြောင်း ပြောကြားခဲ့ပါသည်။
ဆက်လက်၍ တိုင်းဒေသကြီးဦးစီးမှူးက မြန်မာနိုင်ငံအသင်း ဖွဲ့စည်းမည်ဆိုပါက တိုင်းဒေသကြီးနှင့်ပြည်နယ်များတွင်ရှိသော ချည်မျှင်စက်ရုံလုပ်ငန်းရှင်များကို အသင်းဝင် အဖြစ်ထည့်၍ အသင်းဖွဲ့စည်းကာ အသင်းအဖွဲ့စည်းမျဉ်းရေးဆွဲပြီး မြန်မာနိုင်ငံအသင်းအဖြစ် ဆောင်ရွက်နိုင်ကြောင်း၊ အသင်းမှတ်ပုံတင်ရန်အတွက် ကုမ္ပဏီများညွှန်ကြားမှုဦးစီးဌာန(DICA)သို့ တင်ရမည်ဖြစ်ကြောင်းနှင့် လိုအပ်သည့်အချက်များအား ကူညီဆောင်ရွက်ပေးမည်ဖြစ်ကြောင်း၊ တိုင်းနှင့်ပြည်နယ်များရှိ ချည်မျှင်စက်ရုံများ ပါဝင်ပါက မြန်မာနိုင်ငံအသင်း ဖွဲ့စည်းနိုင်မည်ဖြစ်ကြောင်း၊ တိုင်းဒေသကြီးနှင့်ပြည်နယ်များတွင် အစုအဖွဲ့များ ဖွဲ့စည်းပြီးမှ မြန်မာနိုင်ငံအသင်းကို ဖွဲ့စည်းသင့်ကြောင်း၊ အသင်းဖွဲ့စည်းပြီးပါက ပြည်ပမှ အရင်းအနှီး၊ နည်းပညာ အထောက်အပံ့များရရှိနိုင်သည့် အားသာချက်များရှိကြောင်း၊ ပွဲစားကုန်သည် စက်ပိုင်များ မဟာကထိန်တော်အသင်း၏ စည်းမျဉ်းစည်းကမ်းများကို အခြေခံ၍ ဆောင်ရွက်စေလိုကြောင်း၊ သဘောသဘာဝခြင်း မတူညီသော်လည်း တူညီနိုင်သည့်အချက်များကို အခြေခံ၍ အသင်းအဖွဲ့စည်းမျဉ်းဆွဲသင့်ကြောင်း၊ ထို့ပြင် ချည်မျှင်စက်ရုံ လုပ်ငန်းရှင်များအနေဖြင့် ဝါဂွမ်းသည် စက်မှုကုန်ကြမ်း သီးနှံဖြစ်သည့်အတွက် ပြည်တွင်းမှာရှိသည့် ကုန်ထုတ်လုပ်မှုလုပ်ငန်းစဉ်များအတွက် အထောက်အကူပြုနိုင်ပြီး Value Added ဆောင်ရွက်မည်ဆိုပါက တိုင်းပြည်တွင် ဝင်ငွေပိုမိုရရှိနိုင်ကြောင်း၊ ပြည်တွင်းမှာရှိသည့် အလုပ်သမားများ၏ လုပ်သားအင်အားကိုလည်း အကျိုးပြုသည့် လုပ်ငန်းစဉ်များလည်း ဖြစ်လာနိုင်မည်ဖြစ်ကြောင်း၊ လုပ်သားများ၏ တည်ငြိမ်မှု၊ တောင်သူများ၏ အကျိုးအတွက်ပါ ထည့်သွင်းရေးဆွဲသင့်ကြောင်း၊ အသင်းအဖွဲ့ စည်းမျဉ်းနှင့် ပတ်သက်ပြီး အခက်အခဲများရှိပါက လိုအပ်သည့်အကြံဉာဏ်များ၊ အခြားလိုအပ်သည်များကို တတ်နိုင်သမျှ ကူညီပေးမည် ဖြစ်ကြောင်း အကြံပြုဆွေးနွေးခဲ့ပါသည်။
မန္တလေးတိုင်းဒေသကြီး
စားသုံးသူရေးရာဦးစီးဌာန
