သတင်းနှင့် လှုပ်ရှားမှုများ

          ပဲခူးတိုင်းဒေသကြီး၊ နတ်တလင်းခရိုင်၊  စားသုံးသူ‌ရေးရာဦးစီးဌာန နတ်တလင်းမြို့နယ် တာဝန်ခံရုံး၌ စားသုံးသူရေးရာဦးစီးဌာန ခရိုင်တာဝန်ခံမှ (၆-၁၂-၂၀၂၄)ရက်နေ့ နံနက် (၁၀:၃၀) နာရီအချိန်တွင် စားသုံးသူပြည်သူများအား Online  အွန်လိုင်းမှတဆင့်ဝယ်ယူခြင်းနှင့် စပ်လျဉ်း၍ သိကောင်းစရာများအကြောင်း အသိပညာပေးဆွေးနွေး ခြင်းပြုလုပ်ခဲ့ကြောင်းသိရသည်။

            ထိုသို့ ဆွေးနွေးရာတွင် စားသုံးသူအခွင့်အရေးနှင့် တာဝန်များအကြောင်း အွန်လိုင်းမှ ဈေးဝယ်ယူခြင်းနှင့်ပတ်သက်၍  အားနည်းချက်၊ အားသာချက်၊ မှတ်ပုံတင်ထားသည့် အွန်လိုင်းရောင်းချမှု လုပ်ငန်းများမှ ဈေးဝယ်ယူခြင်းဖြင့်ရရှိလာမည့်  အကျိုးရလဒ်များ ကုန်စည်နှင့် ဝန်ဆောင်မှုကို အွန်လိုင်းမှဝယ်ယူသုံးစွဲမှုနှင့် ပတ်သက်၍ နစ်နာဆုံးရှံးမှုများရှိပါက တိုင်ကြားနိုင်သည့် နည်းလမ်းများအကြောင်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ပဲခူး)

     ၆.၁၂.၂၀၂၄ ရက်နေ့တွင် မွန်ပြည်နယ်၊စားသုံးသူရေးရာဦးစီးဌာန၊ ဒုတိယပြည်နယ် ဦးစီးမှူးသည် သံဖြူဇရပ်မြို့နယ်၊ ခြံတစ်ရာကျေးရွာရှိ Bao Heng ကုမ္ပဏီမှ တာဝန်ရှိသူ နှင့်တွေ့ဆုံ၍ လုပ်ငန်းလည်ပတ်မှုအခြေအနေ၊ ကုန်ထုတ်လုပ်မှုအခြေအနေများကို တွေ့ဆုံဆွေးနွေးခဲ့ပါသည်။

      ထိုသို့ တွေ့ဆုံဆွေးနွေးရာတွင် ဒုတိယပြည်နယ်ဦးစီးမှူးက ကုန်ကြမ်းစုဆောင်းမှု၊ တစ်လကုန်ချောထုတ်လုပ်နိုင်မှု၊ တစ်နေ့စက်ရုံလည်ပတ်မှု၊ ဈေးနှုန်းအခြေအနေများကို မေးမြန်းခဲ့ရာ အဆိုပါ ကုမ္ပဏီမှ တာဝန်ရှိသူက ၎င်းစက်ရုံမှာ မွန်ပြည်နယ်၊ သံဖြူဇရပ် မြို့နယ်၊ ခြံတစ်ရာကျေးရွာတွင်တည်ရှိပြီး လုပ်ငန်းလည်ပတ်ချိန် တစ်နေ့လျှင် (၈) နာရီ (၂) ဆိုင်းဖြင့် လည်ပတ်လျက်ရှိကြောင်း၊ လုပ်သားအင်အားမှာ (၁၀၀၀) ဦးအား အလုပ် အကိုင်ဖန်တီးပေးနိုင်ကြောင်း၊ ထုတ်ကုန်အမျိုးအစားမှာ ရာဘာသစ်ခွဲသားများ ထုတ်လုပ်ကြောင်း၊ အသုံးပြုသည့် ကုန်ကြမ်းအမျိုးအစားများမှာ ရာဘာသစ်ပင် အိုပင်ဟောင်း များကိုအသုံးပြုပြီး ကုန်ကြမ်း လိုအပ်မှုမှာ တစ်လလျှင် တန်ချိန် (၆၅၀၀) လိုအပ်ကြောင်း၊ ထုတ်လုပ်မှုအနေဖြင့် တစ်လလျှင် ကုန်ချော (4550 CBM-Cubic Meter) ထုတ်လုပ်လျက်ရှိကြောင်း၊ လျှပ်စစ်မီးသုံးစွဲမှုစက်စွမ်းအားအရ ကုန်ထုတ်လုပ်နိုင်မှုမှာ တစ်လလျှင် (6370 CBM- Cubic Meter) ထုတ်လုပ်နိုင်ကြောင်း၊ ဈေးကွက်အနေဖြင့် ပြည်တွင်းရှိစက်ရုံများနှင့် တရုတ်နိုင်ငံသို့တင်ပို့ရောင်းချကြောင်း ဆွေးနွေးခဲ့ ပါသည်။

DOCA(မွန်)

     ၂၀၂၄ ခုနှစ် ၊ ဒီဇင်ဘာလ ၁၀ ရက်နေ့၊ နံနက်(၁၀း၀၀)အချိန်တွင် Polytechnic University (Dawei) တွင် ဆရာ/ဆရာမများ၊ကျောင်းသား/ကျောင်းသူများအား တနင်္သာရီတိုင်း‌ဒေသကြီး၊ စားသုံးသူ ရေးရာဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာနတို့ ပူးပေါင်း၍ စားသုံးသူကာကွယ်ရေး ဥပဒေအကြောင်းသိကောင်းစရာများနှင့်ပတ်သက်၍ အသိပညာပေးဟောပြောဆွေးနွေးပွဲ ကျင်းပပြုလုပ်ခဲ့ပါသည်။

    အဆိုပါဟောပြောပွဲ၌ စားသုံးသူရေးရာဦးစီးဌာနမှ ဦးစီးအရာရှိ‌ ဒေါ်အေးအေးလွင်မှ စားသုံးသူကာကွယ်ရေးဥပဒေကို ကျယ်ကျယ်ပြန့်ပြန့် သိရှိနိုင်စေရေးအတွက် စားသုံးသူအခွင့်အရေးနှင့် စားသုံးသူ၏တာဝန်များ၊ ကုန်အညွှန်းအမှတ်အသား ဖော်ပြခြင်းဆိုင်ရာများအကြောင်း၊ စားသုံးသူပြည်သူများ ကုန်စည်နှင့်ဝန်ဆောင်မှုများကို ဝယ်ယူသုံးဆောင်ရာတွင် ဘေးအန္တရာယ်ကင်းရှင်းစေရေး၊ စားသုံးသူ၏ နစ်နာဆုံးရှုံးမှုများအား ကုစားနိုင်ရန်အတွက် တိုင်ကြားနိုင်သည့်နည်းလမ်းများ၊ အစားအသောက်နှင့် ဆေးဝါးကွပ်ကဲရေးဦးစီးဌာနမှ တိုင်းဒေသကြီးတာဝန်ခံ ဦးလင်းကျော်ဇံစိုးက ဆေးဝါးများနှင့်ပက်သက်၍ လိုက်နာဆောင်ရွက်ရမည့်နည်းလမ်းများအကြောင်း ဆွေးနွေးဟောပြောဆွေးနွေးခဲ့ပြီး အဆိုပါဟောပြောပွဲသို့ ကျောင်းသား/ကျောင်းသူစုစုပေါင်း (၁၀၀)ဦး ခန့်တက်ရောက်ခဲ့ကြောင်း သိရှိရပါသည်။

DOCA(တနင်္သာရီ)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် မြို့နယ်ဦးစီးမှူး ဦးလှထွဋ်ဦးသည် (၆.၁၂.၂၀၂၄)ရက်နေ့ နံနက်(၁၁:၀၀) မြောင်းမြမြို့နယ် အမှတ်(၇)ရပ်ကွက်၊ အုပ်ချုပ်ရေးမှူးရုံးတွင် ရပ်ကွက်နေ ပြည်သူများအား စားသုံးသူကာကွယ်ရေး အသိပညာပေးဟောပြောပွဲ ဆောင်ရွက်ခဲ့ပါသည်။

      ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ မြောင်းမြခရိုင်၊ မြို့နယ်ဦးစီးမှူး ဦးလှထွဋ်ဦးမှ တက်ရောက်လာသော ရပ်ကွက်နေပြည်သူများအား မိတ်ဆက်စကားပြောကြားပြီး၊ စားသုံးသူရေးရာဦးစီးဌာန ပေါ်ပေါက်လာပုံ၊ ဌာန၏လက်ရှိဆောင်ရွက်နေသော လုပ်ငန်းတာဝန်များ၊ ဆက်လက်ဆောင်ရွက်ရမည့် လုပ်ငန်း တာဝန်များအား ဦးစွာရှင်းလင်း ပြောကြားခဲ့ပြီး၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ၂၀၁၉ပါ ပြဌာန်းချက်များ၊ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင် ၏ တာဝန်များ၊ တားမြစ်ချက်များ၊ ပြစ်မှုပြစ်ဒါဏ်များအကြောင်း စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍  ပုဒ်မ-၄၁ ပုဒ်မခွဲ(ခ)နှင့်(ဂ)တို့ပါ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများ ထုတ်လုပ်မှုအမှတ်စဉ် ကျန်းမာရေးဆိုင်ရာ ဘေးထွက်ဆိုးကျိုး (သို့)ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်များအကြောင်းကို ရှင်းလင်းဆွေးနွေးခဲ့ပြီး၊ မိမိတို့ပါတ်ဝန်းကျင်တွင် ရောင်းချနေသော အစားအသောက်များတွင် စားသုံးရန်မသင့်သောအစားအစာများ၊ ဓါတုဆိုးဆေးများလွန်ကဲစွာ အသုံးပြုထားသော မုန့်ပဲ၊ သွားရည်စာများကို စားသောက်မိပါက ကျန်းမာရေးဆိုင်ရာ ဘေးထွက်ဆိုးကျိုးများခံစားရပြီး၊ ဆေးရုံဆေးခန်းပြသရန်အတွက် ကုန်ကျစရိတ်များနှင့် နောက်ဆက်တွဲဆိုးကျိုးများဖြစ်ပေါ်လာနိုင်ကြောင်း ရပ်ကွက်နေပြည်သူများအနေဖြင့် အစားအသောက်များကို မိမိတို့အသိစိတ်ဖြင့် ရွေးချယ်ဝယ်ယူစားသောက်နိုင်ကြစေရန် အသိပေးဟောပြောခဲ့ပြီး ဟောပြောပွဲသို့ ရပ်ကွက်နေပြည်သူ (၆၅)ဦး တက်ရောက်ခဲ့ပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူး ဦးဇော်လင်းအောင်နှင့် မြို့နယ် ဦးစီးမှူးဦးလှထွဋ်ဦးတို့သည် (၅.၁၂.၂၀၂၄)ရက်နေ့ နံနက်(၁၀:၀၀)နာရီက စားသုံးသူရေးရာဦးစီးဌာန ခရိုင်ဦးစီးမှူးရုံး တွင် စားသုံးဆီလက်လီအရောင်းဆိုင်ပိုင်ရှင်များအား စားသုံးသူကာကွယ်ရေးအသိပညာပေးဟောပြောပွဲ ဆောင်ရွက်ခဲ့ပါသည်။

      ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ ခရိုင်ဦးစီးမှူးမှ စားသုံးဆီရောင်းချသူ စီးပွားရေး လုပ်ငန််းရှင်များအား ခေါ်ယူတွေ့ဆုံ၍ လက်ရှိဖြစ်ပေါ်နေသော စားသုံးဆီဈေးနှုန်းကြီးမြင့်ခြင်းနှင့်ပတ်သက်ပြီး စားသုံးဆီရောင်းချသောလုပ်ငန်းရှင်များအနေဖြင့် သတ်မှတ်ရည်ညွှန်းဈေးထက် ပိုမိုရောင်းချခြင်းမပြုလုပ်ကြရန် ဈေးနှုန်းမြှင့်တင်ရောင်းချခြင်း စစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှု ဥပဒေအရ အရေးယူ ဆောင်ရွက် သွားမည်ဖြစ်ကြောင်း အသေးစိတ်ရှင်း လင်းဆွေးနွေးခဲ့ပြီး၊ မြို့နယ်ဦးစီးမှူးမှ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ ၂၀၁၉ ပါ ပြဌာန်းချက်များမှ အခန်း(၁၈) ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်အညွှန်းပြည့်စုံစွာဖော်ပြထားသော ကုန်ပစ္စည်းများကိုသာ ရောင်းချကြရန် စားသုံးသူ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအား အသေးစိတ်ရှင်းလင်းဟောပြောခဲ့ပြီး တက်ရောက်လာသော ဆီလုပ်ငန်းရှင်များမှ သိရှိလိုသည့်မေးမြန်းချက်များအား မြို့နယ်ဦးစီးမှူးမှ ပြန်လည်ရှင်းလင်းဆွေးနွေးခဲ့ပါသည်။အဆိုပါ ဟောပြောပွဲသို့ စားသုံးဆီလက်လီအရောင်းဆိုင်ပိုင်ရှင် စီးပွားရေးလုပ်ငန်းရှင် (၃၅)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)