သတင်းနှင့် လှုပ်ရှားမှုများ

    မအူပင်ခရိုင်၊ ပန်းတနော်မြို့နယ် စားသုံးသူရေးရာဦးစီးဌာန၊ ကျန်းမာရေးဦးစီးဌာန၊ စည်ပင်သာယာရေးအဖွဲ့နှင့် တိုင်းရင်းပညာဦးစီးဌာနတို့သည် (၂၁.၁၀.၂၀၂၄) ရက်နေ့ နေ့လယ် (၁၂:၀၀) အချိန်က ပန်းတနော် အနောက်ပိုင်းရပ်ကွက်ရှိ ဆေးမျိုးစုံရောင်းချနေသော ဆေးဆိုင်(၇)ဆိုင်အား စားသုံးသူဘေးအန္တရာယ်ကင်းရှင်းစွာ သုံးစွဲနိုင်ရေး၊ ကုန်ဈေးနှုန်းတည်ငြိမ်စေရေး၊ ဆေးဝါးပြန်လပ်မှုမရှိစေရေးအတွက် ပူးပေါင်းအဖွဲ့ဖြင့် လစဉ် ဈေးကွက်စောင့်ကြည့်စစ်ဆေးလျက်ရှိကြောင်း သိရသည်။

     ကွင်းဆင်းစစ်ဆေးရာတွင် ဂွမ်းလေးဆေးဆိုင်၊ ခင်မောင်ထွန်းဆေးဆိုင်၊ အေးမေတ္တာ ဆေးဆိုင်၊ ချမ်းစိမ့်ဆေးဆိုင် တို့တွင် ဆေးများ ပြတ်လပ်မှု ရှိ/မရှိကို မေးမြန်းခြင်း၊ ဆေးဝါးများတွင် စနစ်တကျ ဆေးဝါးမှတ်ပုံတင်အမှတ် ပါဝင်မှု ရှိ/မရှိ။ တိုင်းရင်းဆေးပညာဌာန၏ ခွင့်ပြုချက် ပါဝင်မှု ရှိ/မရှိ၊ စားသုံးသူရေးရာဦးစီးဌာန ကုန်အညွှန်းအမှတ်အသားဖော်ပြချက် ဥပဒေပါအခန်း(၁၈)နှင့် ကိုက်ညီမှု  ရှိ/မရှိတို့ကို စစ်ဆေးခဲ့ကြသည်။ ဆေးရောင်းချသူလုပ်ငန်းရှင်များကို ပူးပေါင်းစစ်ဆေးရေးအဖွဲ့မှ စပ်ဆေးအန္တရာယ်သတိထား၍ ကျောက်ကပ်ပျက်စီးလွယ်၍ မရောင်းချရန် ၊ စားသုံးသူပြည်သူများကို မလိုအပ်ပဲ အကိုက်အခဲပျောက်ဆေးမသောက်စေရန် ဆရာဝန်ညွှန်ကြားချက်ဖြင့်သာ သောက်သုံးရန်ပညာပေးခြင်း၊ Date ကျော်သောဆေးဝါးများကို ဘယ်အရာမှ မသုံးသင့်မရောင်းချသင့်ကြောင်း၊ သတ်မှတ်ချက် တားမြစ်ချက်များကို လိုက်နာဆောင်ရွက်ရန် လိုက်နာဆောင်ရွက်ခြင်းမရှိပါက သက်ဆိုင်ရာဌာနတို့ ဥပဒေအရ မရေးယူမည်ဖြစ်ပြီး၊ အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်းကို ဆေးဆိုင်ပိုင်ရှင်များအား ရှင်းလင်းပြောကြား ခဲ့ကြောင်း သိရှိရပါသည်။

DOCA(ဧရာဝတီ)

      ၂၀၂၄ ခုနှစ်၊ အောက်တိုဘာလ ၂၃ ရက်နေ့၊ နံနက် (၁၀:၀၀)နာရီအချိန်တွင် ထားဝယ်အထူးစီးပွားရေးဇုန် ၁၃/၂၀၂၄-၂၀၂၅ MC+OSSC အစည်းအဝေးအား Online Virtual ဖြင့် ကျင်းပခဲ့ရာ တနင်္သာရီတိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူးမှ တက်ရောက်ခဲ့ပါသည်။

     အစည်းအဝေးတွင် ထားဝယ်အထူးစီးပွား‌ရေးဇုန်စီမံခန့်ခွဲမှုကော်မတီ ဥက္ကဋ္ဌမှ အဖွင့်အမှာစကားပြောကြားခြင်း၊ ယခင်အစည်းအဝေးမှတ်တမ်း ၁၂/၂၀၂၄-၂၀၂၅ အားအတည်ပြုခြင်း၊ OSSC အဖွဲ့ဝင်များမှ တစ်လတာအတွင်း မိမိတို့ဌာနအလိုက် ဆောင်ရွက်မှုများအား အသီးသီးတင်ပြခြင်း၊ OSSC အဖွဲ့ခေါင်းဆောင်မှ OSSC လုပ်ငန်းများအား ဖြည့်စွက်ဆွေးနွေးခြင်း၊ အစည်းအဝေးတက်ရောက်သူများမှ သိရှိလိုအသည်များနှင့် လိုအပ်သည်များအား အထွေထွေဆွေးနွေးခြင်းများနှင့် အစည်းအဝေးဆုံးဖြတ်ချက်များ ချမှတ်ကာ ထားဝယ်အထူးစီးပွား‌ရေးဇုန်စီမံခန့်ခွဲမှုကော်မတီ ဥက္ကဋ္ဌမှ နိဂုံးချုပ်အမှာစကားပြောကြားခဲ့ကာ အစည်းအဝေးအား နေ့လယ် (၁၂း၃၀)အချိန်တွင် ပြီးမြောက်ခဲ့ကြောင်း  သိရှိရပါသည်။

DOCA(တနင်္သာရီ)

           စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးသည် အောက်တိုဘာလ ၁၀ ရက်နေ့ နံနက်(၀၉:၀၀)နာရီအချိန်တွင် ဖြူးမြို့စည်ပင်သာယာဈေး၌ ဈေးသူ ဈေးသားများအား စားသုံးသူကာကွယ်ရေးဆိုင်ရာများကို အသိပညာပေးဟောပြောခဲ့ပါသည်။

            ဟောပြောပွဲတွင် မြို့နယ်တာဝန်ခံက စားသုံးသူအခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုဖြစ်ပေါ်ပါက တိုင်ကြားနိုင်ခြင်းများကိုလည်းကောင်း၊ အွန်လိုင်းဝန်ဆောင်မှုများနှင့် စပ်လျဉ်း၍ စားသုံးသူပြည်သူများ သိသင့်သိထိုက်သည့် အချက်များကိုလည်ကောင်း ဟောပြောဆွေးနွေးခဲ့ပါသည်။

            ထို့နောက်တက်ရောက်လာသည့် ဈေးသူဈေးသားများ၏ ဆွေးနွေးမေးမြန်းချက်များကို ပြန်လည်ရှင်းလင်းဆွေးနွေးခဲ့ကြောင်းနှင့် ဆွေးနွေးပွဲသို့ ဈေးကော်မတီဝင်နှင့် ဈေးသူဈေးသား (၁၈) ဦး တက်ရောက်ကြောင်း သိရှိရပါသည်။

DOCA(ပဲခူး)

     ၂၂.၁၀.၂၀၂၄ ရက်နေ့၊ နံနက် (၁၀:၀၀) အချိန်၌ မွန်ပြည်နယ်၊ စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ကျိုက်မရောမြို့နယ်၊ ကျွန်းရွာ အခြေခံပညာအထက်တန်းကျောင်းခွဲ၌ ဆရာ၊ ဆရာမများနှင့် ကျောင်းသား၊ကျောင်းသူများအား စားသုံးသူကာကွယ်ရေးဆိုင်ရာ အသိပညာပေးဟောပြောပွဲဆောင်ရွက်ခဲ့ပါသည်။

      အဆိုပါဟောပြောပွဲတွင် စားသုံးသူရေးရာဦးစီးဌာန ကျိုက်မရောမြို့နယ် တာဝန်ခံသည် စားသုံးသူကာကွယ်ရေးပေါ်ပေါက်လာပုံ သမိုင်းကြောင်းနှင့် စားသုံးသူ၏ အဓိပ္ပါယ်ဖွင့်ဆိုချက်၊ စားသုံးသူအခွင့်အရေး(၈)ချက်ဖြစ်သည့် စိတ်ကြိုက် ရွေးချယ်ခွင့်၊ ဘေးအန္တရာယ်ကင်းရှင်းစွာသုံးစွဲခွင့်၊ မှန်ကန်သော သတင်းအချက်အလက်များရရှိခွင့်၊ အခြေခံလိုအပ်ချက်များကို စိတ်ကျေနပ်မှုရရှိခွင့်၊ နစ်နာဆုံးရှုံးမှုများကိုတိုင်ကြားခွင့်၊ နစ်နာဆုံးရှုံးမှုများနှင့် စပ်လျဉ်း၍ကုစားခွင့်၊ အသိပညာဗဟုသုတများ၊ အခွင့်အရေးများနှင့် လိုအပ်သောအချက်အလက်များ သိရှိလေ့လာနိုင်ခွင့်၊ ကျန်းမာဝပြောသည့် ပတ်ဝန်းကျင်ကောင်းတွင် ရှင်သန်နိုင်ခွင့်တို့ကို ရှင်းလင်းဟောပြောခြင်း၊ ကျောင်းသား၊ ကျောင်းသူများသည် အသင့်စားအစားအစာများကို ဝယ်ယူအသုံးပြုရာတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားသည့် အစားအစာများကို ရွေးချယ်ဝယ်ယူအသုံးပြုရန် နမူနာပစ္စည်းများဖြင့်ရှင်းလင်းခြင်း၊ သက်တမ်းကုန်ဆုံး ရက်စွဲများ သေချာသိရှိနားလည်စေရန် ပုံစံနမူနာပြသ၍ အပြန်အလှန်မေးမြန်းခြင်းတို့ကို အသိပညာ‌ပေးဟောပြောခဲ့ပြီး စားသုံးသူကာကွယ်ရေးဆိုင်ရာ အသိပညာပေး လက်ကမ်းစာစောင်များနှင့် ထုတ်ကုန်လုံခြုံစိတ်ချရမှုရှိသော အသင့်စားမုန့်ထုတ်များကို ဖြန့်ဝေခဲ့ပါသည်။ အဆိုပါ အသိပညာပေးဟောပြောပွဲသို့ ဆရာ၊ ဆရာမ (၈)ဦးနှင့် ကျောင်းသား၊ ကျောင်းသူ (၈၈)ဦး ၊ စုစုပေါင်း (၉၆)ဦး တက်ရောက်ခဲ့ကြောင်း သိရှိရပါသည်။

DOCA(မွန်)

    မွန်ပြည်နယ်၊ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများသည် (၂၁.၁၀.၂၀၂၄) ရက်နေ့တွင် မွေးမြူရေးနှင့်ကုသရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာနတို့နှင့်ပူးပေါင်း၍ ဘီးလင်းမြို့နယ်၊ ရွှေလှေကျေးရွာ အ.ထ.က(ရွှေလှေ)ကျောင်း၌ စားသုံးသူကာကွယ်ရေးအသိပညာပေး ဟောပြောပွဲ ပြုလုပ်ခဲ့ရာတွင် မွေးမြူရေးနှင့်ကုသရေးဦးစီးဌာနမှ လက်ထောက်ညွှန်ကြားရေးမှူး ဒေါ်ဥမ္မာနှင်းမှ ခွေးရူးရောဂါကာကွယ်ရေးအကြောင်း ဟောပြောဆွေးနွေးခဲ့ပြီး စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်ဇင်ဖြူဝင်း (ဦးစီးမှူး)မှ ဌာန၏ မျှော်မှန်းချက်၊ ရည်မှန်းချက်တာဝန်များ၊ လက်ရှိကာလတွင် ဌာနမှ ဆောင်ရွက်နေသော လုပ်ငန်းတာဝန်များကို ဦးစွာပထမရှင်းလင်း၍ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားပြည့်စုံမှသာလျှင် စိတ်ချယုံကြည်စွာရွေးချယ်ဝယ်ယူအသုံးပြု စားသုံးကြစေရန်နှင့် စားသုံးသူများ နစ်နာဆုံးရှုံးမှုများ ဖြစ်ပေါ်လာပါက ဖြေရှင်းနိုင်မှုနည်းလမ်းများကို ဟောပြောဆွေးနွေးခဲ့ပြီး အဆိုပါ အသိပညာပေး ဟောပြောပွဲသို့ ကျောင်းအုပ်ဆရာကြီး ဦးတင်ထွဋ်လွင်နှင့် ဆရာ၊ ဆရာမ (၁၅) ဦး၊ ကျောင်းသား၊ ကျောင်းသူ (၃၀၀) ဦး တို့တက်ရောက်၍ ဌာနမှ လက်ကမ်းစာစောင်များကို ဖြန့်ဝေပေးအပ်ခဲ့ပါကြောင်း သတင်းရရှိပါသည်။

DOCA(မွန်)