သတင်းနှင့် လှုပ်ရှားမှုများ

         ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်ဈေးကွက်အတွင်း စားသောက်ကုန်ပစ္စည်းများဖြန့်ဖြူးရောင်းချလျက်ရှိသော ဈေးဆိုင်များသို့ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ညွှန်ကြားချက်အရ အောက်တိုဘာလ(၁၂)ရက်နေ့၊ နံနက်(၁၀း၀၀)နာရီအချိန်တွင် "အဖွားလက်ရာ" အမှတ်တံဆိပ်ပါ အသားဟင်း၊ ငါးဟင်း စည်သွပ်ဘူးများတွင် ကုန်အညွှန်းအမှတ်အသားကွဲလွဲမှုရှိ/ မရှိ ဈေးကွက်စောင့်ကြည့်ကွင်းဆင်းစစ်ဆေးခဲ့ကြောင်းသိရသည်။

        ထိုသို့ဈေးကွက်စောင့်ကြည့်စစ်ဆေးခဲ့ရာတွင် မြို့နယ်စည်ပင်သာယာရေးအဖွဲ့မှ ဈေးတာဝန်ခံနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့သည် ကော့မှူးမြို့နယ်၊ စည်ပင်သာယာမြို့မဈေးအတွင်း/ အပြင်ရှိ အခြေခံစားသောက်ကုန်ပစ္စည်းများဖြန့်ဖြူးရောင်းချလျက်ရှိသော ဈေးဆိုင်မျာ၌ အမေရိကန်နိုင်ငံ၊ စိုက်ပျိုးရေးဝန်ကြီးဌာနက လူထုကျန်းမာရေးဆိုင်ရာ သတိပေးချက်ထုတ်ပြန်ခဲ့သည့် "အဖွားလက်ရာ" အမှတ်တံဆိပ်ပါ အသားဟင်း၊ ငါးဟင်း စည်သွပ်ဘူးများတွင်ရိုက်နှိပ်ထားသော ကုန်အညွှန်းအမှတ်အသားများနှင့် စတစ်ကာကပ်၍ဖော်ပြထားသည့် အညွှန်းဖော်ပြချက်များမှာ တူညီမှုမရှိဘဲ ကွဲလွဲမှုများရှိဖြစ်ပေါ်လျက်ရှိသဖြင့် အဆိုပါကွဲလွဲမှုကြောင့် စားသုံးသူပြည်သူများ နားလည်မှုလွဲမှားစေနိုင်သည့်အတွက် ကုန်အညွှန်းအမှတ်အသားကွဲလွဲမှုများဖြစ်ပေါ်လျက်ရှိသည့် "အဖွားလက်ရာ" အမှတ်တံဆိပ်ကုန်စည်များကို ကော့မှူးမြို့နယ်ဈေးကွက်အတွင်း ဖြန့်ဖြူးရောင်းချခြင်းရှိ/ မရှိကို ဈေးကွက်စောင့်ကြည့်ကွင်းဆင်းစစ်ဆေးခဲ့ရာတွင် "အဖွားလက်ရာ" အမှတ်တံဆိပ်နှင့်ပတ်သက်သော စားသောက်ကုန်ပစ္စည်းစည်သွပ်ဘူးအမျိုးမျိုးကို ဖြန့်ဖြူးရောင်းချနေခြင်းမရှိကြောင်းသိရှိရပါသည်။

DOCA(ရန်ကုန်)

        ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်အတွင်းရှိ စားသုံးသူပြည်သူများအနေဖြင့် စားသောက်ကုန်ပစ္စည်းအမျိုးမျိုးအား ဝယ်ယူစားသုံးရာ၌ အစားအစာဘေးကင်းလုံခြုံစိတ်ချရမှုရှိစေရေးနှင့် စနစ်တကျဝယ်ယူစားသုံးတတ်စေရေန်ရည်ရွယ်ပြီး ထုတ်ကုန်များလုံခြုံစိတ်ချရမှုရှိစေရေးအတွက် ၂၀၂၄ခုနှစ်၊ အောက်တိုဘာလတွင် ဦးစားပေးကုန်စည်များ၌ ဈေးကွက်စောင့်ကြည့်စစ်ဆေးရမည့် အသင့်စားခေါက်ဆွဲခြောက်ထုပ်အမျိုးမျိုးအားစစ်ဆေးရန် စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်နှင့်အညီ အောက်တိုဘာလ(၁၀)ရက်နေ့၊ နံနက်(၀၉း၃၀)နာရီအချိန်တွင် ခရမ်းမြို့နယ်၊ စည်ပင်သာယာမြို့မဈေးအတွင်း/ အပြင်ရှိ စားသောက်ကုန်ပစ္စည်းအရောင်းဆိုင်များသို့ သွားရောက်ကွင်းဆင်းစစ်ဆေးခဲ့ကြောင်းသိရသည်။

        ထိုသို့ကွင်းဆင်းစစ်ဆေးခဲ့ရာတွင် ခရမ်းမြို့နယ်၊ စည်ပင်သာယာရေးအဖွဲ့မှ မြို့နယ်ဈေးတာဝန်ခံနှင့် စားသုံးသူရေးရာဦးစီးဌာန၊ မြို့နယ်တာဝန်ခံတို့ပူပေါင်းအဖွဲ့သည် စည်ပင်သာယာမြို့မဈေးအတွင်း/ အပြင်ရှိ စားသောက်ကုန်ပစ္စည်းအရောင်းဆိုင်ပိုင်ရှင် စီးပွားရေးလုပ်ငန်းရှင်များအနေဖြင့် အသင့်စားခေါက်ဆွဲခြောက်ထုပ်အမျိုးမျိုးကိုဖြန့်ဖြူးရောင်းချရာတွင် စားသုံးသူရေးရာဦးစီးဌာမှသတ်မှတ်ထားသော အစားအသောက်များအုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့်အချက်များဖြစ်သော ကုန်ပစ္စည်းအမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့အား မြန်မာဘာသာဖြင့် ပြည့်စုံစွာဖော်ပြထားသော အသင့်စားခေါက်ဆွဲခြောက်ထုပ်အမျိုးမျိုးကိုသာ ဝယ်ယူဖြန့်ဖြူးရောင်းချပေးကြရန်နှင့် စံချိန်၊ စံညွှန်းများနှင့်ကိုက်ညီမှုမရှိသော၊ ခွင့်ပြုသက်တမ်းကုန်နေသော၊ သက်ဆိုင်ရာဌာနများ၏ ခွင့်ပြုချက်များမရှိသော၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော စားသောက်ကုန်ပစ္စည်းများကို မိမိတို့၏ဈေးဆိုင်များတွင် ဖြန့်ဖြူးရောင်းချခြင်းများမပြုလုပ်ကြရန်နှင့် မိမိတို့၏ဆိုင်များတွင် ဖြန့်ဖြူးရောင်းချခြင်းများကိုစစ်ဆေးတွေ့ရှိပါက သက်ဆိုင်ရာဥပဒေ၊ လုပ်ထုံး၊ လုပ်နည်းများနှင့်အညီ ထိရောက်စွာအရေးယူခံရမည်ဖြစ်ကြောင်း စားသုံးသူကာကွယ်ရေးအသိပညာများ ဆွေးနွေးဟောပြောခဲ့ကြောင်းသိရှိရပါသည်။

DOCA(ရန်ကုန်)

      (၁၁.၁၀.၂၀၂၄) ရက်နေ့၊နေ့လယ်  (၁၅:၃၀) နာရီအချိန်တွင် ဧရာဝတီတိုင်းဒေသကြီးဦးစီးမှူးရုံးမှ ဒုတိုင်းဒေသကြီး ဦးစီးမှူး ဦးထွန်ထွန်းနှင့် အဖွဲ့သည် မအူပင်ခရိုင်ဦးစီးမှူးရုံးသို့ လာရောက်၍ မအူပင်မြို့နယ်အတွင်း Online Shop ရောင်းချသူလုပ်ငန်းရှင် (၁၈)ဦးနှင့် တွေ့ဆုံ၍ ကုန်စည်နှင့် ဝန်ဆောင်မှုများကို အွန်လိုင်းရောင်းချမှုနှင့် စပ်လျဉ်း၍ မှတ်ပုံတင်ဆောင်ရွက်ပြီး လုပ်ကိုင်ဆောင်ရွက်နိုင်ရန်ကို အရေးကြီးကုန်စည်နှင့် ဝန်ဆောင်မှုဥပဒေအကြောင်း အသိပညာပေး ရှင်းလင်းဟောပြောခဲ့ပါသည်။

      အသိပညာပေး ဆွေးနွေးရာတွင် ခေတ်မီလာသော ယနေ့ခတ်ကာလတွင် စားသုံးသူတို့သည် ကုန်စည်နှင့် ဝန်ဆောင်မှုတွေကို အွန်လိုင်းမှ ဝယ်ယူပြီး အသုံးပြုလာကြသဖြင့် စားသုံးသူအများပြည်သူများ အွန်လိုင်းမှ ဝယ်ယူမှုများ နစ်နာမှု လိမ်လည်ခံရမှု များမရှိစေရန် အွန်လိုင်းစနစ်နှင့် ရောင်းဝယ်မှုကို ထိန်ကြောင်း ဆောင်ရွက်နိုင်ရန် ဥပဒေဖြင့် ကာကွယ်ပေးနိုင်ရန် အစိုးရဌာနအသီးသီးက သက်ဆိုင်ရာ ဥပဒေစည်မျည်း စည်းကမ်းတွေထုတ်ပြန်ပြီး ထိန်ကြောင်း ဆောင်ရွက်ခြင်း ဖြစ်ကြောင်း၊ အရေးကြီးကုန်စည်နှင့် ဝန်ဆောင်မှု ဥပဒေအရ ၂၀၂၃ခုနှစ် ဇူလိုင်လ ၂၁ရက်နေ့က အမိန့်ကြော်ငြာစာအမှတ် ၅၀/၂၀၂၃ကို ထုတ်ပြန်ခဲ့ပြီး အွန်လိုင်း စနစ်ဖြင့်ရောင်းချသော လုပ်ငန်းများကို အရေးကြီးကုန်စည်နှင့် ဝန်ဆောင်မှုဥပဒေအဖြစ် သတ်မှတ်ပြီး မှတ်ပုံတင်လက်မှတ်လျောက်ထားရရှိပြီးမှသာ ဆောင်ရွက်ခွင့်ရှိတဲ့ လုပ်ငန်းအဖြစ်သတ်မှတ်ပြီး ထုတ်ပြန်ခဲ့ခြင်း ဖြစ်ကြောင်း၊ လုပ်ငန်းရှင်များအနေဖြင့် လုပ်ငန်းဆောင်ရွက်နိုင်ရန် ကြိုတင်ပြင်ဆင်နိုင်စေရန် အမိန့်ကြော်ငြာစာ ထုတ်ပြန်ပြီး ၆လအတွင်း ပြင်ဆင်ချိန်ကာလကို သတ်မှတ်ထားပြီး ဖြစ်ပါကြောင်း၊ သတ်မှတ်ချိန်ကာလ ပြည့်မြောက်သည့်နေ့မှာ အွန်လိုင်းမှတ်ပုံတင် လျောက်ထားခြင်းမရှိပဲ ရောင်းချခြင်းမျိုး စစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေ ပုဒ်မ -၅ ဖြင့် အရေးယူဆောင်ရွက်မည် ဖြစ်ကြောင်း လုပ်ငန်းရှင်များသိရှိနိုင်ရန်  အသိပညာပေးခဲ့ပြီး အွန်လိုင်းမှတ်ပုံတင်ပြီးရောင်းချသော လုပ်ငန်း၏ အားသာချက်များနှင့် အောင်မြင်သော စီးပွားရေးတာဝန်ယူမှု ၊ တာဝန်ခံမှုရှိသော လုပ်ငန်းဖြစ်ကြောင်းကိုလည်း ရှင်းလင်းပြော ကြားခဲ့သည်။ အွန်လိုင်းစနစ်ဖြင့် မှတ်ပုံတင်လျောက်ထားရန် လုပ်ငန်းလိုအပ်သောအချက်များနှင့် သတ်မှတ်ချက်များကို သိရှိနိုင်ရန် Shop vedio ဖြင့် ချပြရှင်းလင်း ဆွေးနွေးခဲ့ပြီး လုပ်ငန်းရှင်များက သိလိုသည်များ မေးမြန်းကြကာ ပြန်လည်ရှင်းလင်းပေးခဲ့ပြီး ဟောပြောပွဲကို နေ့လယ် (၁၄:၃၀) အချိန်တွင် အောင်မြင်စွာရုပ်သိမ်းခဲ့ကြောင်း သိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည် (၁၁-၁၀-၂၀၂၄)ရက်နေ့၊ နံနက်(၁၁:၀၀) နာရီအချိန်တွင် ကြံခင်းမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန (Community Centre)ခန်းမ၌ အွန်လိုင်းစနစ်ဖြင့်ရောင်းချခြင်းလုပ်ငန်းမှတ်ပုံတင်ခြင်းဆိုင်ရာ Talk Show အစီအစဉ်ဆောင်ရွက်ခဲ့ပါသည်။

         အဆိုပါအစီအစဉ်တွင် မြို့နယ်တာဝန်ခံ ဦးကျော်နိုင်ဝင်းက စီးပွားရေးလုပ်ငန်းရှင်များသည် အွန်လိုင်းစနစ်ဖြင့် ရောင်းချခြင်းလုပ်ငန်းကိုဆောင်ရွက်ပါက အွန်လိုင်းစနစ်ဖြင့် ဦးစီးဌာနသို့ မှတ်ပုံတင်လက်မှတ်လျှောက်ထားရမည် ဖြစ်ကြောင်းကို ရှင်းလင်းပြောကြားခဲ့ပါသည်။ ထိုသို့ပြောကြားရာတွင် မှတ်ပုံတင်လက်မှတ်လျှောက်ထားသူသည် လူပုဂ္ဂိုလ်ဖြစ်ပါက ပြည်ထောင်စုသမ္မတမြန်မာနိုင်ငံတော်အတွင်း  အခြေချနေထိုင်လျက်ရှိပြီး အသက်(၁၈)နှစ်ပြည့်ပြီးသူဖြစ်ရမည်။ ထုတ်ပြန်ချက်ပါ သတ်မှတ်ချက်များကို လိုက်နာနိုင်သူ၊ လုပ်ငန်းလုပ်ကိုင်ဆောင်ရွက်မည့်နေရာကို တင်ပြနိုင်သူ၊ အစိုးရအဖွဲ့အစည်းတရပ်ရပ်က အမည်ပျက်ကြေညာထားသော ပုဂ္ဂိုလ်များမဖြစ်ရဟုဖော်ပြထားပါသည်။ ကုမ္ပဏီ သို့မဟုတ် စီးပွားရေးအဖွဲ့အစည်းဖြစ်ပါက တည်ဆဲဥပဒေတစ်ရပ်ရပ်ဖြင့် ဖွဲ့စည်းတည်ထောင်ထားသော၊ ကိုယ်ပိုင်သတ်မှတ်ချက်ဖြင့် တရားဝင်ဝက်ဘ်ဆိုဒ်ရရှိထားပြီး  အွန်လိုင်းစနစ်ဖြင့် ရောင်းချခြင်းလုပ်ငန်းလုပ်ကိုင် ဆောင်ရွက်မည့် နေရာတင်ပြနိုင်သောအဖွဲ့အစည်းဖြစ်ရပါမည်။ မှတ်ပုံတင်လက်မှတ်လျှောက်ထားရာတွင် ကုမ္ပဏီ သို့မဟုတ် စီးပွားရေးအဖွဲ့အစည်းဖြစ်ပါက အဖွဲ့အစည်းရှိ တာဝန်ခံပုဂ္ဂိုလ်၏ ရောင်စုံဓာတ်ပုံ၊ လူပုဂ္ဂိုလ်ဖြစ်ပါက ယင်း ပုဂ္ဂိုလ်၏ ရောင်စုံဓာတ်ပုံ၊ နိုင်ငံသားစိစစ်ရေးကတ်ပြားမိတ္တူ၊ လုပ်ငန်းအမှန်တကယ်တည်ရှိကြောင်း သက်ဆိုင်ရာအစိုးရဌာန၊ အစိုးရအဖွဲ့အစည်း သို့မဟုတ် ရပ်ကွက်/ ကျေးရွာအုပ်ချုပ်ရေးမှူး၏ထောက်ခံချက်၊ အွန်လိုင်းစနစ်ဖြင့်ရောင်းချမည့် ကုန်စည် သို့မဟုတ် ဝန်ဆောင်မှု အမျိုးအစားစာရင်း၊ အချက်အလက်နှင့် အာမခံချက်၊ ကုန်စည်နှင့်စပ်လျဉ်း၍ မည်သည့်နိုင်ငံမှတင်သွင်းကြောင်း သို့မဟုတ် ပြည်တွင်း၌ထုတ်လုပ်ကြောင်း ဖော်ပြထားသည့်အချက်အလက်များ၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ သက်ဆိုင်ရာအစိုးရဌာန၊ အစိုးရအဖွဲ့အစည်းကခွင့်ပြုထားသော အထောက်အထားများရှိပါက   ယင်းတို့နှင့်စပ်လျဉ်းသည့် အထောက်အထားများကိုပါ ပူးတွဲတင်ပြ၍ အွန်လိုင်းမှတ်ပုံတင်လက်မှတ်လျှောက်ထားရမည်ဟု  ဖော်ပြထားကြောင်း အသိပညာပေးရှင်းလင်းခဲ့ပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊မအူပင်ခရိုင်၊ပန်းတနော်မြို့နယ် ဆန်စပါးကုန်သည်များအသင်းကော်မတီဝင်အဆင့်ဆင့်ကို (၁၀.၁၀.၂၀၂၄) နေ့၊နေ့လယ် (၁၂:၃၀) အချိန်တွင် ပန်းတနော် မြို့နယ်တာဝန်ခံရုံးတွင် ကျင်းပရာ လုပ်ငန်းရှင် (၁၅) ဦးတက်ရောက်ခဲ့ပြီး  အသင်းအဖွဲ့စည်းမျဉ်း၊ အသင်းအဖွဲ့ မှတ်တမ်းများနှင့်အညီ မြို့နယ်ဆန်စပါး ကုန်သည်များအသင်းကို ရွေးချယ်ဖွဲ့စည်းခဲ့ပါသည်။

    ထိုသို့ ရွေးချယ်ဖွဲ့စည်းရာတွင် မအူပင်ခရိုင်ဦးစီးမှူးမှ ဆန်၊ စပါးကုန်သည်အသင်းတွင်ပါဝင်မည့် အသင်းသားများသည် မိမိမြို့နယ်အတွက် ဦးဆောင်၍ ဆောင်ရွက်ပေးနိုင်မည့်သူများ၊ အထက်အဖွဲ့ အစည်းအဆင့်ဆင့်၏ညွှန်ကြားချက်၊ လမ်းညွှန်ချက်များကိုလည်း မိမိအသင်းသားများအား အချိန်နှင့် တပြေးညီ ချပြနိုင်သူများ၊ ဌာနဆိုင်ရာများနှင့်လည်း ပူးပေါင်းဆောင်ရွက်ပေး နိုင်မည့်သူများကိုသာ ဦးစားပေးရွေးချယ်ပေးစေလိုကြောင်း၊ အဖွဲ့အစည်းနှင့်ဆောင်ရွက်ရာတွင် တစ်ဦးကောင်း၊ တစ်ယောက်ကောင်းဖြင့် ဆောင်ရွက်၍မရကြောင်း၊ ညီညီညွတ်ညွတ်၊ စည်းစည်း လုံးလုံးနှင့် အားလုံးပူးပေါင်း ပါဝင်ဆောင်ရွက်ကြစေလိုကြောင်း ရှင်းလင်းဆွေးနွေးခဲ့ပါသည်။

    ဆက်လက်၍ ဆန်စပါး ကုန်သည်များအသင်း ဖွဲ့စည်းရခြင်း၏ အဓိကရည်ရွယ်ချက်မှာ ဆန်စပါးဈေးကွက်တည်ငြိမ် မှန်ကန်ရေးနှင့်၊ဆန်စပါးလုပ်ငန်း ဖွံ့ဖြိုးတိုးတက်ရေး ၊နိုင်ငံတော်၏အကျိုး၊ ဆန်စပါးကဏ္ဍ အကျိုးနှင့်ဆန်စပါးလုပ်ငန်း လုပ်ကိုင် ဆောင်ရွက်သူတို့၏ အကျိုးစီးပွားတို့ကို တည်ဆဲဥပဒေများ၊ လမ်းညွှန်ချက်များနှင့်အညီ စီးပွားရေးလုပ်ငန်း အသင်းအဖွဲ့များအတွက် သတ်မှတ်ချက်များ ၊အသင်းအဖွဲ့စည်းမျဥ်း၊ အသင်းအဖွဲ့ မှတ်တမ်းများနှင့်အညီ ဖွဲ့စည်းဆောင်ရွက်ရသည်ကို အကျယ်တဝင့် ရှင်းလင်းဆွေးနွေးခဲ့ပြီး အဆိုပြုစနစ်ဖြင့် ရွေးချယ်ခဲ့ရာ မြို့နယ်ဆန်စပါး ကုန်သည်များအသင်းကို အဖွဲ့ဝင် (၉) ဦးဖြင့် ဖွဲ့စည်းခဲ့ကြောင်း သိရှိရပါသည်။

DOCA(ဧရာဝတီ)