သတင်းနှင့် လှုပ်ရှားမှုများ

     ဖက်ရှင်လုပ်ငန်းသည် AI နှင့် ဒစ်ဂျစ်တယ်နည်းပညာများကို အသုံးပြုပြီး ထုတ်လုပ်မှု လျှော့ချခြင်း၊ ဖောက်သည်အလိုက် ကိုက်ညီမှု မြှင့်တင်ခြင်း၊ စျေးကွက်ခန့်မှန်းမှု တိကျစေခြင်းတို့ဖြင့် တိုးတက်နေပြီဖြစ်ပါတယ်။ AI နှင့် ဒစ်ဂျစ်တယ်နည်းပညာများကို အသုံးပြုပြီး ဖက်ရှင် လုပ်ငန်း များသည် Virtual Fitting Rooms (အဝတ်အစားကို မဝတ်ကြည့်ဘဲ စမ်းကြည့်နိုင်သော နည်းပညာ)၊ AI-powered Design (AI ဖြင့် အလိုအလျောက် ဒီဇိုင်း ဖန်တီးခြင်း)၊ 3D Fashion Design (3D မော်ဒယ် များဖြင့် အဝတ်အစား တည်ဆောက်ခြင်း)စသော နည်းပညာများကြောင့် ဖက်ရှင် ထုတ်လုပ်မှု ကို ပိုမို မြန်ဆန်စေပြီး၊ ထုတ်လုပ်မှုအရည်အသွေး တိုးတက်လာနိုင်ပါတယ်။ ထို့အပြင် Sustainable Fashion (ပတ်ဝန်းကျင်ထိန်းသိမ်းသောဖက်ရှင်) ထွန်းကားလာခြင်းကြောင့် AI နှင့် Blockchain (ဒေတာ မှန်ကန်မှုစစ်ဆေးနိုင်သောနည်းပညာ) ကိုအသုံးပြု၍ ထုတ်လုပ်မှုဖြစ်စဉ် ထိန်းချုပ်ခြင်းနှင့် သုံးစွဲသူများနှင့် တိုက်ရိုက် ချိတ်ဆက်နိုင်ခြင်းတို့မှာလည်းသုံးစွဲသူများအတွက် ပိုမိုကောင်းမွန်လာစေနိုင်ပါတယ်။ ထို့ကြောင့် AI နှင့် ဒစ်ဂျစ်တယ်နည်းပညာများကြောင့် ဖက်ရှင်လုပ်ငန်းသည် ပိုမို မြန်မြန်ဆန်ဆန် ပြောင်းလဲလာပြီး၊ အနာဂတ်တွင် ပိုမို ထိရောက်ကောင်းမွန်လာနိုင်မည် ဖြစ်ပါတယ်။

DOCA(ဧရာဝတီ)

    ၂၀၂၅ ခုနှစ် နှင့် ၂၀၂၆ ခုနှစ် တို့တွင် ကမ္ဘာ့စီးပွားရေးသည် တဖြည်းဖြည်း တိုးတက်လာမည်ဟု စီးပွားရေးဆိုင်ရာ ပူးပေါင်းဆောင်ရွက်မှုနှင့် ဖွံ့ဖြိုးတိုးတက်မှုအဖွဲ့ (OECD) နှင့် ကမ္ဘာ့ဘဏ်တို့မှ ခန့်မှန်းထားပါတယ်။

      OECD ၏ ခန့်မှန်းချက်အရ ၂၀၂၅ နှင့် ၂၀၂၆ အတွက် စီးပွားရေး တိုးတက်မှုနှုန်းအနေဖြင့် ၃.၁% ရှိမည်ဟု ခန့်မှန်းထားသော်လည်း အဆိုပါ တိုးတက်မှုသည် ဒေသအလိုက် ကွဲပြားမှုများ ရှိနေခဲ့ရာ အမေရိကန် (၂.၂% - ၂.၀%) နှင့် ဥရောပ (၁.၅% - ၁.၃%) တို့တွင် ကျဆင်းနိုင်သော်လည်း၊ တရုတ် (၄.၅%) နှင့် အာရှဒေသ (၅% အထက်) တွင် အားကောင်းသော တိုးတက်မှု ရှိနိုင်သည်ဟု ခန့်မှန်းထားပါသည်။  

   ကမ္ဘာ့ဘဏ်သည် OECD ၏ ခန့်မှန်းချက်အရ ၂၀၂၅ နှင့် ၂၀၂၆ အတွက် စီးပွားရေး တိုးတက်မှုနှုန်းအနေဖြင့် ၂.၇% ခန့်မှန်းထားပြီး၊ ဥရောပ (၁.၂%) နှင့် မြောက်အမေရိက (၂.၅%) တွင် တည်ငြိမ်မှုရှိနိုင်သော်လည်း၊ အရှေ့အလယ်ပိုင်း (၂.၈%) နှင့် အနောက်တောင်အာရှ (၅.၃%) တို့တွင် တိုးတက်မှုမြင့်မားနိုင်သည် ဟုလည်း ခန့်မှန်းထားပါတယ်။

    ငွေကြေးမူဝါဒများ၊ နည်းပညာဆိုင်ရာ ရင်းနှီးမြှုပ်နှံမှုများနှင့် နိုင်ငံတကာကုန်သွယ်ရေး မူဝါဒများသည် ကမ္ဘာ့စီးပွားရေး၏ အနာဂတ်ကို ဆောင်ကြဉ်းနိုင်မည်ဖြစ်ပြီး၊ အမေရိကန်နှင့် ဥရောပတွင် ငွေကြေးမူဝါဒ ပြောင်းလဲမှုများက စီးပွားရေးအတိုးနှုန်းကို ထိခိုက်စေနိုင်သော်လည်း၊ တရုတ်နှင့် အာရှဒေသများသည် တည်ငြိမ်မှုရှိသော တိုးတက်မှုကို ဆက်လက်ထိန်းသိမ်းနိုင်မည်ဟု ခန့်မှန်းထားပါကြောင်း ရေးသားတင်ပြလိုက်ရပါတယ်။

DOCA(ဧရာဝတီ)

    စားသုံးသူရေးရာဦးစီးဌာန၊ ပုသိမ်ခရိုင်ဦးစီးမှူးရုံးအနေဖြင့် ပြန်ကြားရေးနှင့် ပြည်သူ့ ဆက်ဆံရေးဦးစီးဌာနနှင့် ပူးပေါင်း၍ Talk Show အစီအစဉ်များ ဟောပြောဆောင်ရွက်လျက်ရှိ ရာ သာပေါင်းမြို့နယ်၊ ဒေါ်တင်တင်နိုင်(ဒု-ဦးစီးမှူး)သည် (၂၆.၃.၂၀၂၅)ရက်နေ့တွင် အွန်လိုင်း မှတဆင့် ဈေးရောင်းခြင်းများနှင့် ပတ်သက်၍ အသိပညာပေးဆွေးနွေးခဲ့ကြောင်း သိရှိရပါသည်။

      ထိုသို့ဆောင်ရွက်ရာတွင် အွန်လိုင်းမှတဆင့် ရောင်းချသူများအနေဖြင့် လိုက်နာရမည့် အချက်များ၊ ဝယ်ယူသူများအနေဖြင့် သိသင့်သိထိုက်သော အချက်များကို ရှင်းလင်းဆွေးနွေးပြီး အွန်လိုင်းမှတဆင့် လိမ်လည်ခြင်းများ မဖြစ်ပွားရအောင် စားသုံးသူကာကွယ်ရေး အသိပညာပေး ဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

     ပုသိမ်ခရိုင်၊ သာပေါင်းမြို့နယ်၊ သဲဖြူကျေးရွာအုပ်စု၊ သန်လျက်စွန်းကျေးရွာ၊ ကွင်းအမှတ် (၆၇၉)၊ တောင်သူဦးမြင့်စိုးပိုင် လယ်မြေ(၂၀) ဧက ပေါ်တွင် စိုက်ပျိုးထားသော Supersun (၄) မျိုး ဆောင်းနေကြာစံပြစိုက်ကွင်းရိတ်သိမ်းပွဲ အခမ်းအနားကို တက်ရောက်ခဲ့ပါသည်။

      ထိုဆောင်းနေကြာစံပြစိုက်ကွင်းရိတ်သိမ်းပွဲအခမ်းအနားတွင် မြို့နယ်စိုက်ပျိုးရေးဦးစီးမှူးမှ နေကြာသီးနှံအတွက် မျိုး၊ မြေ၊ ရေ၊ နည်း အတိုင်းစနစ်တကျ စိုက်ပျိုးရန်နှင့် တောင်သူစိတ်ပါဝင်စားရေး၊ အထွက်တိုးရေး၊ ဈေးကွက်ရရှိရေး၊ မြေချဉ်ငံဓာတ်တိုင်းတာရေး စသည်ဖြင့် ဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

    မွန်ပြည်နယ်၊ ဘီးလင်းမြို့နယ်၌ ၂၀၂၄-၂၀၂၅ ပညာသင်နှစ် အလယ်တန်းအဆင့် ဘာသာရပ် စွမ်းရည်မြှင့်ဆွေးနွေးပွဲ သင်တန်းကို (၂၄.၃.၂၀၂၅) နံနက်ပိုင်းက ဘီးလင်းမြို့ အခြေခံပညာအထက်တန်းကျောင်း(ပညာ့အားမာန်)ခန်းမ၌ ကျင်းပပြုလုပ်ခဲ့သည်။

   သင်တန်းဖွင့်ပွဲတွင် ဘီးလင်းမြို့နယ် မြို့နယ်ပညာရေးမှူး ဦးဝင်းရှိန်က သင်တန်းဖွင့်အမှာစကားပြောကြားပြီး ဒုတိယမြို့နယ် ပညာရေးမှူး ဦးတင်မွန်က သင်တန်းဆိုင်ရာကိစ္စရပ်များနှင့် ပက်သက်၍ ရှင်းလင်းပြောကြားခဲ့သည်။ 

    ယင်းနောက် ဆွေးနွေးပွဲပြုလုပ်ရာ သင်တန်းနည်းပြဆရာ၊ ဆရာမ(၁၂)ဦးက စာသင်ခန်း (၆)ခန်းရှိ သင်တန်းသား၊ သင်သင်တန်းသူ(၁၉၀)ဦးတို့အား အလယ်တန်းအဆင့်ဘာသာရပ်များအား ပြန်လည်ရှင်းလင်းဆွေးနွေးပြီး သင်တန်းသား၊ သင်တန်းသူများနှင့်ပြန်လည်ဆွေးနွေးခြင်း များဆောင်ရွက်ခဲ့သည်။

     အဆိုပါ အလယ်တန်းအဆင့်ဘာသာရပ်စွမ်းရည်မြှင့်မွမ်းမံသင်တန်းကို မတ်လ ၂၄ ရက်နေ့မှ မတ်လ ၂၈ ရက်နေ့ထိ လေးရက်ကြာ စာတွေ့လက်တွေ့သင်ကြားပို့ချပေးသွားမည်ဖြစ်ကြောင်း သိရသည်။

DOCA(မွန်)