သတင်းနှင့် လှုပ်ရှားမှုများ

    ၁၃.၉.၂၀၂၄ ရက်နေ့တွင် စားသုံးသူရေးရာဦးစီးဌာန၊ မော်လမြိုင်ခရိုင်၊ မော်လမြိုင်မြို့နယ် တာဝန်ခံနှင့် ဝန်ထမ်းများသည် မော်လမြိုင်မြို့နယ်၊ သီရိမြိုင် မူလွန်ကျောင်း၌ စားသုံးသူကာကွယ်ရေးဆိုင်ရာ အသိပညာပေးဟောပြောခြင်းကို ဆောင်ရွက်ခဲ့ပါသည်။

     အဆိုပါဟောပြောပွဲတွင် ကျောင်းအုပ်ဆရာမကြီး ဒေါ်ခိုင်သင်္ကြန်မွန်က အဖွင့်အမှာစကား ပြောကြားခဲ့ပြီး စားသုံးသူရေးရာဦးစီးဌာနမှ အငယ်တန်းစာရေး ဒေါ်သဇင်ဖြိုးမြတ်က ဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဆိုင်ရာဥပဒေများအကြောင်း၊ စားသုံးသူအခွင့်အရေးနှင့် တာဝန်များအကြောင်း၊ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ဖော်ပြထားသော ကုန်စည်များကိုသာ ရွေးချယ်ဝယ်ယူသင့်ကြောင်း၊ ကျန်းမာရေးနှင့်ညီညွတ်သော အစားအစာများကို ရွေးချယ်ဝယ်ယူ စားသုံးကြရန်နှင့် ကုန်စည်၊ ဝန်ဆောင်မှုများကြောင့် စားသုံးသူများနစ်နာဆုံးရှုံးမှုများရှိလာပါက  အရေးဆိုတိုင်ကြား နိုင်သည့် Consumer Call Center No. (1535) သို့ ဆက်သွယ်မေးမြန်းတိုင်ကြား နိုင်ကြောင်း၊ စားသုံးသူကိစ္စရပ်များနှင့် သိလိုသည်များကိုလည်း ဆက်သွယ်မေးမြန်းတိုင်ကြား နိုင်ကြောင်း ဟောပြောခဲ့ပြီး ကျောင်းသား/ကျောင်းသူများမှ သိလိုသည်များကို အပြန်အလှန်မေးမြန်းခြင်းများ ဆောင်ရွက်ခဲ့ကြောင်း သိရှိရပါသည်။

    ဟောပြောပွဲသို့ ဆရာ/ဆရာမ၊ ကျောင်းသား/ကျောင်းသူ (၁၀၅) ဦး တက်ရောက်ခဲ့ပြီး ကျောင်းအုပ်ဆရာမကြီးထံသို့ လက်ကမ်းစာစောင်များပေးအပ်ခဲ့ကြောင်း သတင်းရရှိပါသည်။

DOCA(မွန်)

   ၁၂.၉.၂၀၂၄ ရက်နေ့ နံနက် (၀၉:၃၀) နာရီအချိန်တွင် မွန်ပြည်နယ် စားသုံးသူရေးရာဦးစီးဌာန၊ အစည်းအဝေးခန်းမတွင်  မွန်ပြည်နယ်စီးပွားရေးရာဝန်ကြီး နိုင်လယိတမမှ မွန်ပြည်နယ်အတွင်း စားအုန်းဆီဖြန့်ဖြူးပေးလျက်ရှိသော ဆီအရောင်းကိုယ်စားလှယ်၊ လက်ကား၊ လက်လီ ဆီကုန်သည်များနှင့် တွေ့ဆုံခဲ့သည်။ အခမ်းအနားသို့ စားသုံးသူရေးရာဦးစီး ဌာန၊ ပြည်နယ်ဦးစီးမှူး ဦးမြင့်ဝင်းနှင့် ဝန်ထမ်းများ၊ ပြည်နယ်စားသုံးသူရေးရာကော်မတီ အဖွဲ့ဝင်များ၊ မြို့နယ်အလိုက်စားအုန်းဆီ ဖြန့်ဖြူးရောင်းချသည့် ကိုယ်စားလှယ်၊ လက်ကား၊ လက်လီ ဆီကုန်သည်များ စုစုပေါင်း (၈၄) ဦး တက်ရောက်ခဲ့ပါသည်။

    အဆိုပါအခမ်းအနားတွင် စီးပွားရေးရာဝန်ကြီး နိုင်လယိတမမှ မွန်ပြည်နယ်အတွင်း ဆီဖြန့်ဖြူး ရောင်းချကြသည့် ဆီလက်ကား၊ လက်လီကုန်သည်များအနေဖြင့် စားသုံးသူပြည်သူများသို့ ရောင်းချရာတွင် သတ်မှတ်ဈေးနှုန်းဖြင့် ရောင်းချရေးနှင့် သတ်မှတ်အရေအတွက်အတိုင်း ရောင်းချရေး တာဝန်ယူမှုတာဝန်ခံမှု အဆင့်ဆင့်ဆောင်ရွက်ကြရန်၊ သတ်မှတ်ခွဲတမ်းအတိုင်း ရောင်းချခြင်းမရှိဘဲ သိုလှောင်ထားပြီး ပြင်ပပေါက်ဈေးဖြင့် ရောင်းချခြင်း ရောနှောဆီဖြန့်ဖြူး ခြင်းများ လုံးဝမပြုလုပ်ကြရန်၊ စားအုန်းဆီဖြန့်ဖြူးမှုစနစ်သစ်အရ၊ အဆင့်ဆင့်တာဝန်ရှိသဖြင့် ကုမ္ပဏီမှ ဆီထုတ်ကိုယ်စားလှယ်၊ ဆီထုတ်ကိုယ်စားလှယ်မှ လက်ကားကုန်သည်၊ လက်ကား ကုန်သည်မှ လက်လီကုန်သည်များအထိ အဆင့်ဆင့်ကြီးကြပ်ဆောင်ရွက်ရန်၊ နိုင်ငံတော်မှ ပြည်သူများသက်သာစေရန် ရည်ရွယ်ဆောင်ရွက်ခြင်းဖြစ်၍ ပြည်သူမျက်နှာကြည့်ပြီး ဆောင်ရွက်ရန် မသမာမှုများမပြုလုပ်ကြရန်၊ ဖြန့်ခွဲရောင်းချသည့်‌ နေရာများကို တစ်နေရာတည်း မဟုတ်ဘဲ နေရာများခွဲ၍ တစ်ပြိုင်တည်း၊ တစ်ချိန်တည်းရောင်းချ ဆောင်ရွက်ကြရန်၊ လူအများကြီး တန်းစီတိုးဝှေ့ဝယ်ယူရခြင်း မရှိအောင် စီမံဆောင်ရွက်သွားရန်၊ တန်းစီစနစ်၊ တုံကင်စနစ်၊ စာအုပ်စနစ်များတွင် မည်သည့်စနစ်ဖြင့် ရောင်းချသည်ဖြစ်စေ ပြည်သူလက်ဝယ်သို့ ပြည့်ပြည့်ဝဝရောက်ရှိအောင် ရောင်းချပေးရန် လမ်းညွှန်မှာကြားပါသည်။ ဆက်လက်ပြီး ပြည်နယ်ဦးစီးမှူးနှင့် တက်ရောက်လာသူများမှ အပြန်အလှန် ဆွေးနွေးကြပြီး အခမ်းအနားကို နေ့လယ် (၁၂:၀၀) နာရီအချိန်တွင် ရုပ်သိမ်းကြောင်း သိရပါသည်။

DOCA(မွန်)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ပြည်တွင်းကုန်သွယ်မှုလုပ်ငန်းများဖွံ့ဖြိုးတိုးတက်ရေးနှင့် စားသုံးသူကာကွယ်ရေးဥပဒေပါ ပြဋ္ဌာန်းချက်များအား လုပ်ငန်းရှင်များအပါအဝင် စားသုံးသူပြည်သူများသိရှိနားလည်လိုက်နာစေရန်နှင့် နစ်နာဆုံးရှုံးမှုများကို အရေးဆိုတိုင်ကြားနိုင်ရန်အတွက် ကွင်းဆင်းတွေ့ဆုံမှုများ၊ အသိပညာပေးဟောပြောဆွေးနွေးမှုများကို စဉ်ဆက်မပြတ်ဆောင်ရွက်လျက်ရှိရာ (၆-၉-၂၀၂၄)ရက်နေ့၊ နေ့လယ် (၁၆:၃၀) နာရီအချိန်တွင် စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး) သည် စားသောက်ကုန်လုပ်ငန်းရှင်များအား ခရိုင်ဦးစီးမှူးရုံးအစည်းအဝေးခန်းမ၌တွေ့ဆုံ၍ အသိပညာပေးဟောပြောပွဲဆောင်ရွက်ခဲ့ပါသည်။

         အဆိုပါဟောပြောဆွေးနွေးမှုတွင် ဦးသန်းစိုး(လက်ထောက်ညွှန်ကြားရေးမှူး)က စားသုံးသူကာကွယ်ရေးဆိုသည်မှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူ၏အခွင့် အရေးနှင့် အကျိုးစီးပွားကိုကာကွယ်ပေးခြင်းနှင့် စားသုံးသူနှင့် စီးပွားရေးလုပ်ငန်းရှင်တို့ကြား ကော်မရှင်နှင့် ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိသော လုပ်ငန်း စဉ်ကိုဆိုလိုသည့်အတွက် စားသုံးသူများကိုကာကွယ်ပေးပြီး စီးပွားရေးလုပ်ငန်းရှင်များကို ဖိနှိပ်ခြင်းမျိုးမဟုတ်ဘဲ စားသုံးသူများကို အပြည့်အဝကာကွယ်ပေးပြီး တဖက်မှလည်း စီးပွားရေးလုပ်ငန်းရှင်များ၏ ထုတ်လုပ်သည့်ကုန်ပစ္စည်းများ အရည်အသွေးပြည့်ဝကောင်းမွန်၍ ပြည်တွင်းဈေးကွက်တွင်သာမက ပြည်ပဈေးကွက်ထိ ထိုးဖောက်ရောင်းချနိုင်စေရန် တွန်းအားတစ်ခုဖြစ်ပြီး လုပ်ငန်းများဖွံ့ဖြိုးတိုးတက်ကာ လုပ်ငန်းရှင်များလည်း အကျိုးစီးပွားဖြစ်ထွန်းလာစေနိုင်ကြောင်းနှင့် စားသုံးသူပြည်သူများမှာလည်း လုံခြုံစိတ်ချရမှုနှင့်အာမခံချက်ပေးနိုင်သော ကုန်စည်များကို စားသောက်သုံးစွဲလာရသဖြင့် ထိခိုက်နစ်နာဆုံးရှုံးမှုများနည်းပါးလာကာ လူမှုဘဝများသာယာလာမည်ဖြစ်ပါကြောင်း၊ သို့ဖြစ်၍ စားသုံးသူကာကွယ်ရေးဥပဒေပါ ပြဋ္ဌာန်းချက် များကို လုပ်ငန်းရှင်များအနေဖြင့် နားလည်သဘောပေါက်ပြီး လိုက်နာဆောင်ရွက်ကြရန်နှင့် စားသုံးသူအား စိတ်စေတနာအပြည့်အဝထားရန်လိုအပ်ကြောင်း၊ ကုန်စည်နှင့်ဝန်ဆောင်မှုများနှင့်ပတ်သက်၍ စီးပွားရေးလုပ်ငန်းရှင်များ သိသင့်သိထိုက်သည့်အကြောင်းအရာများ၊ ကုန်အညွှန်းအမှတ်အသားဖော်ပြပါရှိရမည့် အချက်များအား ရှင်းလင်းဆွေးနွေးဟောပြောခဲ့ကြောင်းနှင့် ဟောပြောဆွေးနွေးပွဲသို့ ညောင်ဦးမြို့နယ်အတွင်းရှိ စားသောက်ဆိုင်လုပ်ငန်းရှင်များ၊ လက်ဖက်ရည်ဆိုင်လုပ်ငန်းရှင်များ၊ ပဲကြော်လုပ်ငန်းရှင်များ၊ အာလူးကြော်လုပ်ငန်းရှင်များ၊ ကိတ်မုန့်ပေါင်မုန့်လုပ်ငန်းရှင်များ၊ လက်ဖက်ပဲကြမ်းလုပ်ငန်းရှင်များ၊ စုစုပေါင်း( ၇၀ )ဦးတက်ရောက်ခဲ့ကြောင်းသိရှိရပါသည်။

DOCA(မန္တလေး)

         စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးအစည်းအဝေးခန်းမ၌  ၁၂-၉-၂၀၂၄ ရက်နေ့၊ နေ့လယ် (၁၄း၀၀) နာရီအချိန်တွင် ခေတ္တတိုင်းဒေသကြီးဦးစီးမှူးသည်   Monkeypox မျောက်ကျောက်ရောဂါသိကောင်းစရာနှင့် ရောဂါကာကွယ်ထိန်းချုပ်ရေး၊ ကုသရေးလုပ်ငန်းစဉ်များနှင့် ဆောင်ရွက်ထားရှိမှုများအကြောင်းကို ရှင်းလင်းဆွေးနွေးခဲ့ရာ အရာထမ်းများ၊ အမှုထမ်းများ၊ စုစုပေါင်း ( ၄၀ ) ဦးတက်ရောက်ခဲ့ကြောင်းသိရပါသည်။

          အဆိုပါအခမ်းအနားတွင် ခေတ္တတိုင်းဒေသကြီးဦးစီးမှူး ဒေါ်ရီလင်းထွဋ်က ဝန်ထမ်းများအား  မျောက်ကျောက်ရောဂါနှင့်ပတ်သက်၍ ရှင်းလင်းဆွေးနွေးခဲ့ရာ မျောက်ကျောက်ရောဂါသည် ဗိုင်းရပ်စ်ပိုးကြောင့်ဖြစ်ပွားသည့် ကူးစက်ရောဂါတစ်မျိုးဖြစ်ကြောင်း၊ မျောက်မှလူသို့ ကူးစက်မှုကို စတင်တွေ့ ရှိခဲ့ကြောင်းနှင့် မျောက်ကျောက်ရောဂါဖြစ်ပွားမှုရောဂါကူးစက်နည်းလမ်းများ၊ ရောဂါကူးစက်ခံရနိုင် ဘွယ်အခွင့်အလမ်းများသူများ၊ မျောက်ကျောက်ရောဂါဖြစ်ပွားခြင်းမှ ကာကွယ်နိုင်သောနည်းလမ်းများ၊ မျောက်ကျောက်ရောဂါလက္ခဏာများ၊ မျောက်ကျောက်ရောဂါကြောင့် သေဆုံးနိုင်မှုနှင့် ရောဂါကုသခြင်းအကြောင်းများ၊ ရောဂါကာကွယ်ထိန်းချုပ်ရေးနှင့် ကုသရေးလုပ်ငန်းစဉ်များအကြောင်းကို ရှင်းလင်းဆွေးနွေးခဲ့ပါသည်။

         ဆက်လက်၍ စစ်ကိုင်းတိုင်းဒေသကြီးမှ မျောက်ကျောက်ရောဂါကာကွယ်ထိန်းချုပ်ရေးနှင့် ကုသရေးဆောင်ရွက်ထားရှိမှုမှာ   ဒေသအာဏာပိုင်များနှင့် ဌာနဆိုင်ရာများအား အသိပေးဆွေးနွေးခြင်း၊  ပြည်သူလူထုအတွင်း ရောဂါကာကွယ်ရေးနည်းလမ်းများအး ကျန်းမာရေးအသိပညာပေးခြင်း၊ ရောဂါစောင့်ကြပ်ကြည့်ရှု့ခြင်း (အပြည်ပြည်ဆိုင်ရာလေဆိပ်၊ ဆိပ်ကမ်းနှင့်နယ်စပ်ဝင်/ ထွက်ပေါက်များ)နှင့် တုံ့ပြန်ဆောင်ရွက်ခြင်းတို့ကိုမြှင့်တင်လုပ်ဆောင်ခြင်း၊ ဝန်ကြီးဌာနများနှင့်ပူးပေါင်းဆောင်ရွက်ခြင်း၊ ဆေးရုံဆေးခန်းများတွင် သီးခြားလူနာဆောင်များ ပြင်ဆင်ထားရှိခြင်းနှင့် ရောဂါပိုးထိန်းချုပ်ရေးလုပ်ငန်းရပ်များကို စနစ်တကျလိုက်နာဆောင်ရွက်ခြင်း၊ လိုအပ်သောဆေးနှင့် ရောဂါကာကွယ်ရေးပစ္စည်းများစုဆောင်းပြင်ဆင်ထားရှိခြင်း၊ မိတ်ဖက်အဖွဲ့အစည်း/ လူမူရေးအသင်းများနှင် စည်းရုံးပူးပေါင်းဆောင်ရွက်ခြင်း၊ အချိန်နှင့်တပြေးညီ သတင်းပေးပို့ခြင်း၊ ရောဂါကာကွယ်ရေးနှင့် ကုသရေးလုပ်ငန်းများကို အဆင့်ဆင့်ကြီးကြပ်ခြင်းဆောင်ရွက်ထားလျက်ရှိကြောင်းသိရှိရပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှမုံရွာမြို့နယ်တာဝန်ခံ ဒေါ်စန်းစန်းဝေသည် (၁၁-၉-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြု (Community Center) ခန်းမ၌ အွန်လိုင်းစနစ်ဖြင့်ရောင်းချခြင်း (Online Sale) လုပ်ငန်းများ မှတ်ပုံတင်လက်မှတ်လျှောက်ထားခြင်းနှင့်ပတ်သက်၍ သိကောင်းစရာများကို အသိပညာပေး Talk Show ကျင်းပပြုလုပ်ခဲ့ကြပါသည်။

        စားသုံးသူရေးရာဦးစီးဌာန၊ မုံရွာမြို့နယ်တာဝန်ခံ ဒေါ်စန်းစန်းဝေက အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်သည့်အမိန့်အကြောင်း၊ ကုန်စည်/ဝန်ဆောင်မှုကို Online ဖြင့် အရောင်းအဝယ်လုပ်ငန်းလုပ်ကိုင်နေကြသူမည်သူမဆို အွန်လိုင်းစနစ်ဖြင့်ရောင်းချခြင်းလုပ်ငန်းကို မှတ်ပုံတင်လက်မှတ်လျှောက်ထားရရှိပြီးမှသာ လုပ်ကိုင်ရမည်ဖြစ်ကြောင်း၊ အွန်လိုင်းစနစ်ဖြင့်ရောင်းချခြင်းလုပ်ငန်းကို ဆောင်ရွက်လိုသူများအနေဖြင့် စီးပွားရေးနှင့်ကူးသန်းရောင်းဝယ်ရေးဦးစီးဌာန၊ ကုန်သွယ်ရေးဦးစီးဌာနက သတ်မှတ်ထားသော လျှောက်လွှာပုံစံများတွင်ဖြည့်သွင်းပြီး အွန်လိုင်းစနစ်နှင့် ဦးစီးဌာနသို့ လျှောက်ထားရမည်ဖြစ်ကြောင်း၊  Online မှတ်ပုံတင်လျှောက်ထားရာတွင် အမျိုးအစား (၂) မျိုးရှိပြီး မှတ်ပုံတင်လျှောက်ထားလျှင် ပေးသွင်းရမည့်မှတ်ပုံတင်ကြေးများ၊ သက်တမ်းတိုးကြေးများ၊ ပြင်ဆင်ချက်တစ်ချက်ပြင်ဆင်လိုလျှင် သတ်မှတ်ထားသည့်ပြင်ဆင်ကြေးများအကြောင်း၊ မှတ်ပုံတင်လက်မှတ်ရရှိပြီး ရောင်းချသူများအနေဖြင့် ရရှိနိုင်သည့်အခွင့်အရေးများအကြောင်းကို    ဆွေးနွေးပြောကြားခဲ့ကြောင်းသိရှိရပါသည်။

DOCA(စစ်ကိုင်း)