သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ တောင်ငူခရိုင်၊ အုတ်တွင်းမြို့နယ်တာဝန်ခံ ဒေါ်အေးအေးခိုင်နှင့် ဝန်ထမ်းများသည် (၁၀.၅.၂၀၂၃) ရက်နေ့၊ နံနက်ပိုင်းက အုတ်တွင်းမြို့နယ် ညောင်ခြေထောက်မြို့ ရန်ကုန်-မန္တလေးလမ်း၊ အမှတ်(၁၁၅)ရှိ DS သောက်ရေသန့်စက်ရုံသို့ ရောက်ရှိပြီး လုပ်ငန်းရှင် ဦးဂရမ်းကျမ်းနှင့်တွေ့ဆုံ၍ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ လိုက်နာ ဆောင်ရွက်ရမည့် ပြဌာန်းချက်များကို‌ဆွေးနွေးခဲ့ပါသည်။

   ထို့နောက် မြို့နယ်တာဝန်ခံသည်  စက်ရုံအလုပ်သမားများ(၁၂)ဦးအား စားသုံးသူကာကွယ်ရေးဆိုင်များကို အသိပညာပေးဟောပြောရာတွင် စားသုံးသူ၏ အခွင့်အရေးနှင့်တာဝန်များ၊ ကုန်စည်များ ဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်ပုံများ၊ စားသုံးသူ နစ်နာဆုံးရှုံးမှုများကို တိုင်ကြားနိုင်ခြင်းများကို ရှင်းလင်းပြောကြားခဲ့ပါသည်။

  ဆက်လက်၍ မြို့နယ်တာဝန်ခံနှင့်အဖွဲ့သည် လုပ်ငန်းဆောင်ရွက်နေမှုအခြေအနေများကို ကြည့်ရှုလေ့လာရာ လုပ်ငန်းရှင်က လိုက်လံရှင်းလင်းပြသခဲ့ပါသည်။ DS သောက်ရေသန့်စက်ရုံတွင် ၂၀ လီတာနှင့် တစ်လီတာ ရေသန့်ဘူးများကို ထုတ်လုပ်ဖြန့်ဖြူးကြောင်း၊ ၀.၆ လီတာဘူးများမှာ ဘူးခွံဝယ်ယူရရှိမှု အခက်အခဲကြောင့် ဘူးခွံဝယ်ယူရရှိမှုအပေါ်မူတည်၍ ထုတ်လုပ်ကြောင်း သိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ တောင်ငူခရိုင်၊ အုတ်တွင်းမြို့နယ်တာဝန်ခံ ဒေါ်အေးအေးခိုင်နှင့် ဌာနခွဲစာရေး ဦးအောင်ဝင်းတို့သည် (၉.၅.၂၀၂၃ )ရက်နေ့၊ နံနက်ပိုင်းက  အုတ်တွင်းမြို့ စည်ပင် သာယာဈေးသို့ သွားရောက်၍ ဈေးအတွင်းရှိ ကုန်စုံဆိုင်များတွင် ရောင်းချလျှက်ရှိသော ရေထွက် ပစ္စည်းများဖြစ်သည့် ငံပြာရည်ပုလင်းများ၊ ငါးပိဘူးများ၊ ပုဇွန်ခြောက်ဘူးများ၌ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ မြန်မာဘာသာဖြင့် ဖော်ပြရမည့် ကုန်အညွှန်းအမှတ်အသားများ ပြည့်စုံစွာဖော်ပြထားခြင်း ရှိ/မရှိကို စောင့်ကြည့်စစ်ဆေးခဲ့ပါသည်။

    မြို့နယ်တာဝန်ခံက စားသုံးသူကာကွယ်ရေးဥပဒေတွင် ကုန်စည်များ၌ ကုန်အညွှန်း အမှတ်အသားများ ဖော်ပြရန် ပြဌာန်းထားရှိရာ စီးပွားရေးလုပ်ငန်းရှင်များက ကုန်အညွှန်းအမှတ် အသားများဖော်ပြရာတွင် အဆင်ပြေလွယ်ကူမှုရှိစေရန် မြန်မာနိုင်ငံစားသုံးသူကာကွယ်ရေး‌ ကော်မရှင်က ညွှန်ကြားချက်အမှတ် ၂/၂၀၁၉ ကို ထုတ်ပြန်ခဲ့ကြောင်း၊ ယင်းညွှန်ကြားချက်ကို ယခင်နှစ်များက ဆိုင်များသို့ဖြန့်ဝေပေးပြီးဖြစ်ပါကြောင်း၊ သို့ဖြစ်ပါ၍ ယင်းညွှန်ကြားချက်နှင့်အညီ မြန်မာဘာသာဖြင့် ကုန်အညွှန်းအမှတ်အသားဖော်ပြထားခြင်းမရှိသော ကုန်စည်များအား ရောင်းချခြင်း မပြုရန်လိုပါကြောင်း ဆိုင်ပိုင်ရှင်များနှင့် အရောင်းကိုယ်စားလှယ်များအား အသိပညာပေးဆွေးနွေးခဲ့ပါသည်။

   ဆက်လက်၍ မြို့နယ်တာဝန်ခံနှင့် အဖွဲ့သည်  အုတ်တွင်းမြို့နယ်၊ ကျွဲပွဲမြို့၊ အမှတ်(၁) ရပ်ကွက်၊ ငုဝါလမ်းရှိ ဦးထွန်းထွန်းနိုင်၏ သစ်သားအခြေခံမီးဖိုချောင်သုံး ပစ္စည်းလုပ်ငန်းသို့ သွားရောက်လေ့လာခဲ့ပြီး လုပ်ငန်းရှင်ဦးထွန်းထွန်းနိုင်နှင့်တွေ့ဆုံ၍ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များနှင့်သက်ဆိုင်သည့် ပြဌာန်းချက်များကို ဆွေးနွေးခဲ့ကြောင်း၊  ယင်းလုပ်ငန်းတွင် မီးဖိုချောင်သုံးယောက်မ၊ ငရုပ်ဆုံ၊ စင်းတီတုံးများအပြင် ဆွမ်းတော်တင်ကလပ်နှင့် ဆွမ်းအုပ်များကို သစ်သားဖြင့် ထုတ်လုပ်ကြောင်း သိရပါသည်။

DOCA(ပဲခူး)

      မကွေးတိုင်းဒေသကြီး၊ မကွေးခရိုင်၊ မြို့သစ်မြို့နယ်အတွင်းရှိ ဒေသခံပြည်သူများသည် စားသောက်ကုန်ပစ္စည်းများကိုဝယ်ယူစားသုံးရာတွင် ဘေးကင်းလုံခြုံမှုရှိစေရေးနှင့် အန္တရာယ်ကင်းသည့်စားသောက်ကုန်များအား ရွေးချယ်ဝယ်ယူစားသုံးနိုင်စေရေးအတွက် စားသုံးသူကာကွယ်ရေးဥပဒေ ၂၀၁၉ပါ  ကုန်အညွှန်းအမှတ်အသားများအကြောင်းနှင့် စားသုံးရန်မသင့်သည့် တားမြစ်ထားသောစားသောက်ကုန်များအား ဒေသခံပြည်သူများသိရှိနားလည်သဘောပေါက်စေရန်အတွက် မြို့သစ်မြို့နယ်ဦးစီးမှူး ဦးဆယ်မောင်က စည်ပင်သာယာစျေး၌ (၁၁-၅-၂၀၂၃) ရက်နေ့၊ နေ့လယ် (၁၄:၀၀) နာရီအချိန်တွင်သွားရောက်၍ အသိပညာပေးဆွေးနွေးဟောပြောခဲ့ပါသည်။

      ထိုသို့ ကွင်းဆင်း၍ အသိပညာပေးဆွေးနွေးရာတွင် မြို့နယ်ဦးစီးမှူး ဦးဆယ်မောင်က ရောင်းချနေသောဈေးသည်များအား မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ပါ အကြောင်းအရာများ၊ ၎င်းညွှန်ကြားချက်ပါ ကုန်အညွှန်းအမှတ်အသားများပြည့်စုံစွာဖော်ပြထားသောကုန်စည်များကိုသာ ဆိုင်တင်ရောင်းချကြရန်ဖြစ်ကြောင်း၊ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များကိုသိရှိလိုက်နာကြရန်ဖြစ်ကြောင်းနှင့် အစားအသောက်နှင့်ဆေးဝါးကွပ်ကဲရေးဦးစီးဌာန (FDA) က စားသုံးရန်မသင့်သည့် တားမြစ်ထားသောစားသောက်ကုန်များအကြောင်း၊ တားမြစ်ထားသောစားသောက်ကုန်ပစ္စည်းများဖြန့်ဖြူးရောင်းချမှုအား စစ်ဆေးတွေ့ရှိရပါက ဥပဒေအရ အရေးယူဆောင်ရွက်သွားမည်ဖြစ်ကြောင်း အသိပညာပေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ပါသည်။

DOCA(မကွေး)

           စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးဦးဆောင်၍ ဒု-ခရိုင်ဦးစီမှူးနှင့် ဝန်ထမ်း(၃)ဦး၊ ခရိုင်ပြည်သူ့ကျန်းမာရေးဦးစီးဌာနမှ တာဝန်ရှိသူများနှင့် ပူးပေါင်း၍ ၂၀၂၃ ခုနှစ်၊ မေ ၁၅ ရက်နေ့ နံနက်(၁၀း၃၀)အချိန်တွင် စစ်ကိုင်းမြို့ပေါ်ရှိ “မင်းမင်း”ဆေးဆိုင်၊ “စွယ်စုံ”ဆေးဆိုင်၊ “အောင်ဇမ္ဗူ” ဆေးဆိုင် (၃)ဆိုင်သို့ ကွင်းဆင်း၍  ဆိုရှယ်မီဒီယာ (Facebook) အသုံးပြု၍ “Aung Lay” အမည်ဖြင့်  Account မှ မျက်စိအားဆေး(ဖြည့်စွက်စာ)အဖြစ် LUTEIN ESTER BLUEBERRY SALTALGA ဆေး၊ LB အမှတ်တံဆိပ်ပါ Lutein Billberry Plus ဆေးနှင့် အရောင်ခွဲနိုင်မှုမရှိသူများ (Colour Blind) အတွက် ကုန်အညွှန်းအမှတ်အသားမပါရှိသည့် မျက်ကပ်မှန်များနှင့် အရည်အသွေးနိမ့် မျက်မှန်များ အပါအဝင် အခြားသောမျက်စိဆေးများရောင်းချနေခြင်း ရှိ/ မရှိ ကွင်းဆင်းစစ်ဆေးခဲ့ပါသည်။ 

စစ်ဆေးခဲ့သောဆိုင်ပိုင်ရှင်များအား ဆိုရှယ်မီဒီယာ (Facebook) များဖွင့်လှစ်ပြီး  Online ပေါ်တွင် ရောင်းချနေသည့် ထောက်ခံချက်မပါရှိသော ဆေးဝါးများနှင့်  FDAမှ တားမြစ်ထားသည့် ဆေးဝါးများအား ဝယ်ယူရောင်းချခြင်းမပြုရန်၊ မှတ်ပုံတင်ထားရှိပြီး တရားဝင်တင်သွင်းသည့် ဆေးဝါး များကိုသာ ရောင်းချရန်၊ စားသုံးသူကာကွယ်ရေးဥပ‌ဒေအခန်း(၁၈) ပုဒ်မ၄၁၊ ပုဒ်မခွဲ (ခ) နှင့် (ဆ) အရ မြန်မာဘာသာဖြင့်ဖြစ်စေ၊ မြန်မာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ကုန်အညွှန်းအမှတ်အသား ဖော်ပြပါရှိသည့် ဆေးဝါးများကိုသာ ရွေးချယ်ဝယ်ယူရောင်းချရန်တို့ကို    ခရိုင်ဦးစီးမှူးက အသိပညာပေးဆွေးနွေးခဲ့ပါသည်။

DOCA(စစ်ကိုင်း)

    စားသုံးသူရေးရာဦးစီးဌာန၊ မြစ်ကြီးနားခရိုင်းဦးစီးမှူးရုံးမှ စစ်ဆေးရေးမှူး ဦးဘောမ်ဇုန်းနှင့် ဦးတင်မောင်ထွန်းတို့သည် (၁၂.၅.၂၀၂၃) ရက်နေ့၊ ၁၄း၀၀ နာရီအချိန်တွင် မြစ်ကြီးနားမြို့၊ ရွှေစက်ရပ်ကွက်ရှိ ဒေါ်တင်တင်ကုန်စုံဆိုင်နှင့် ဦးခင်မောင်ကြည် ကုန်စုံဆိုင်(၂)ဆိုင်အား ကုန်အညွှန်း အမှတ်အသားဖော်ပြခြင်းနှင့်ပတ်သက်၍ စားသုံးသူကာကွယ်ရေးဥပဒေပါ ပြဌာန်းချက်များနှင့် ကိုက်ညီခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

     ထိုသို့ စစ်ဆေးရာတွင် Royal Tea Mix အမှတ်တံဆိပ်ပါ အသင့်ဖျော်လက်ဖက်ရည်နှင့်  Carabao အမှတ်တံဆိပ်ပါ ခွန်အားဖြည့်အချိုရည်တို့တွင် ကုန်စည်အမျိုးအစားအလိုက် သတ်မှတ်ချက်နှင့်အညီ မြန်မာဘာသာဖြင့် သိသာထင်ရှားစွာဖော်ပြရမည့် ကုန်စည်၏ အမျိုးအမည်၊ အရွယ်အစား၊ အရေအတွက် အသားတင်ပမာဏ၊ ထားသိုသိမ်းဆည်းမှုအညွှန်းနှင့် ဓါတ်မတည့်ကြောင်းဖော်ပြချက် စသည့်အချက်များအား ကုန်အညွှန်းအမှတ်အသား ဖော်ပြထားရှိခြင်း ရှိ/မရှိကို ဈေးကွက်စောင့်ကြည့် စစ်ဆေးခဲ့ရာ ကုန်အညွှန်းအမှတ်အသား ပြည့်စုံစွာဖော်ပြထားရှိကြောင်း စစ်ဆေးတွေ့ရှိ၍ ကုန်စုံဆိုင်ပိုင်ရှင်များကို ကုန်အညွှန်းအမှတ်အသား ပြည့်စုံမှန်ကန်မှုရှိသော ကုန်စည်များကိုသာ ရောင်းချရန် အသိပညာပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)