သတင်းနှင့် လှုပ်ရှားမှုများ

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊  လပွတ္တာမြို့နယ် တာဝန်ခံဦးမြင့်ဌေးနှင့်ဝန်ထမ်းများသည်မြို့နယ်စည်ပင်သာယာရေးအဖွဲ့နှင့်ပူးပေါင်း၍  (၂.၆.၂၀၂၃) ရက်နေ့၊နံနက်(၁၁:၃၀)နာရီတွင် လပွတ္တာမြို့၊ အမှတ်(၆)ရပ်ကွက်၊ ရွေးနဒီဈေးအတွင်းရှိ  မုန့်မျိုးစုံဆိုင်များသို့ ဈေးကွက်စောင့်ကြည့် စစ်ဆေးဆောင်ရွက်ခဲ့ပါသည်။

   ထိုသို့ကွင်းဆင်းဆောင်ရွက်ရာတွင် မြို့နယ်တာဝန်ခံဦးမြင့်ဌေးမှ လပွတ္တာမြို့၊ အမှတ်(၆) ရပ်ကွက်၊ ရွေးနဒီဈေးအတွင်းရှိ မုန့်မျိုးစုံရောင်းချနေသော ဆိုင်(၃)ဆိုင်ရှိ OiSHI PATATA အာလူးဖုတ်အရသာ မုန့်ထုပ်များတွင် ကုန်အညွှန်းအမှတ်အသားရှိ/မရှိ စစ်ဆေးခဲ့ပြီး ဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ(၂၀၁၉) ပါပြဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁)ပုဒ်မခွဲ(ခ)နှင့် (ဆ)တို့ပါ ကုန်အညွှန်း အမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ထားသည့် ဥပဒေညွှန်ကြားချက်များနှင့်အညီ လိုက်နာဆောင်ရွက်ကြရန် ဈေးကွက်အတွင်း ရောင်းချနေသော ကုန်စည်များတွင် ကုန်အညွှန်းအမှတ်အသား ပြည့်စုံစွာဖော်ပြထားမှုရှိ/မရှိအား ဌာနမှ ဈေးကွက်စောင့်ကြည့်စစ်ဆေးမှုအား စဉ်ဆက်မပြတ် ဆောင်ရွက်သွားမည်ဖြစ်ကြောင်း အသိပေးစစ်ဆေးခဲ့ပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးမှ တာဝန်ရှိသူများနှင့်အတူ တိုင်းဒေသကြီးကော်မတီအဖွဲ့ဝင်များဖြစ်သော အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့တို့မှ တာဝန်ရှိသူများပူးပေါင်း၍ (၂၄-၅-၂၀၂၃) ရက်နေ့တွင် ပဲခူးတိုင်းဒေသကြီးအတွင်းရှိ ထုတ်လုပ်ဖြန့်ဖြူးရောင်းချလျက်ရှိသော သက်တမ်းလွန်သောက်ရေသန့်များအား ကွင်းဆင်းစစ်ဆေးခဲ့ပါသည်။

      ထိုသို့စစ်ဆေးရာတွင် ပဲခူးတိုင်းဒေသကြီးအတွင်းရှိ ထုတ်လုပ်ဖြန့်ဖြူးရောင်းချလျက်ရှိသော သက်တမ်းလွန်သောက်ရေသန့်လုပ်ငန်းရှင်များ၏ စက်ရုံများသို့သွား‌ရောက်၍ ထုတ်လုပ်ဖြန့်ဖြူးရောင်းချမှုအခြေအနေ၊ ထုတ်လုပ်မှုဖြစ်စဉ်များ၊ သက်တမ်းတိုးရန်အတွက် လိုအပ်မှုအခြေအနေများကို ရှင်းလင်းဆွေးနွေးပြီး ကုန်အညွှန်းအမှတ်အသားပြည့်စုံမှန်ကန်မှုရှိ/မရှိကို စောင့်ကြည့်စစ်ဆေးခဲ့ကြောင်း သိရှိရပါသည်။

DOCA(ပဲခူး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်ဦးစီးမှူးရုံးအနေဖြင့် စားသုံးသူကာကွယ်ရေးအသိပညာပေးဟောပြောပွဲများကို စဉ်ဆက်မပြတ်ဆောင်ရွက်လျက်ရှိရာ (၁-၆-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် မကွေးမြို့၊ မြန်မာ့လယ်ယာဖွံ့ဖြိုးရေးဘဏ်၌ ၂၀၂၃ခုနှစ်၊ မိုးရာသီစိုက်စရိတ်ချေးငွေလာရောက်ထုတ်ယူသော မြင်းစိုင်းရွာ၊ ကိုးပင်ရွာနှင့် ထန်းပင်စမ်းကျေးရွာများမှ တောင်သူများအား စားသုံးသူကာကွယ်ရေးအသိပညာပေးဟောပြောပွဲကျင်းပပြုလုပ်ခဲ့ပါသည်။

     အဆိုပါဟောပြောပွဲတွင် စားသုံးသူရေးရာဦးစီးဌာန၊ မကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်း(မကွေးမြို့နယ်တာဝန်ခံ)က စားသုံးသူရေးရာဦးစီးဌာနပေါ်ပေါက်လာပုံ၊ ဌာန၏ဆောင်ပုဒ်၊ မျှော်မှန်းချက်၊ ရည်မှန်းချက်များ၊ စားသုံးသူများရရှိနိုင်မည့်အခွင့်အရေး (၈) ချက်၊ လိုက်နာရမည့်တာဝန် (၄) ချက်၊ ကုန်အညွှန်းအမှတ်အသားဖော်ပြရာတွင် ပြည့်စုံစွာပါဝင်ရမည့်အချက်များ၊ ကုန်စည်၊ ဝန်ဆောင်မှုလုပ်ငန်းများနှင့်စပ်လျဉ်း၍ စားသုံးသူကတောင်းဆိုနိုင်သည့်အခွင့်အရေးများ၊ စားသုံးသူများနစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သူများ၊ တိုင်ကြားနိုင်သည့်နေရာများ၊ တိုင်ကြားပုံနည်းလမ်းနှင့် အလွယ်တကူခေါ်ဆိုတိုင်ကြားသော Consumer Call Center No. (1535) တို့အား ကျေးလက်ဒေသနေတောင်သူများသိရှိနိုင်စေရန် အသေးစိတ်ရှင်းလင်းဆွေးနွေးခဲ့ပါသည်။

      စားသုံးသူကာကွယ်ရေးအသိပညာပေးဆွေးနွေးပွဲတွင် မကွေးမြို့၊ မြန်မာ့လယ်ယာဖွံ့ဖြိုးရေးဘဏ်မှ ဝန်ထမ်း (၁၀) ဦး၊ မြင်းစိုင်းရွာ၊ ကိုးပင်ရွာနှင့် ထန်းပင်စမ်းရွာတို့မှ တောင်သူ (၂၀၀) ဦးတို့တက်ရောက်ခဲ့ပြီး ဌာနမှထုတ်ဝေသည့် လက်ကမ်းစာစောင်များဖြန့်ဝေပေးခဲ့ပါသည်။

DOCA(မကွေး)

     ၂၀၂၃ခုနှစ်၊ ဇွန်လ (၂) ရက်နေ့၊ နံနက် (၉:၃၀) နာရီအချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးနှင့် တာဝန်ရှိသူများသည် ရပ်ကွက် (၄)၊ အုပ်ချုပ်ရေးမှူးရုံးရှိ တာဝန်ရှိသူများနှင့်ပူးပေါင်း၍ ကျိုင်းတုံမြို့၊ အမှတ် (၄) ရပ်ကွက်အတွင်းရှိ “IQ” အမှတ်တံဆိပ် သောက်ရေသန့်ထုတ်လုပ်ရေးစက်ရုံအား ထုတ်ကုန်များလုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားပြည့်စုံစွာဖော်ပြပါရှိရေးတို့နှင့်ပတ်သက်၍ ဈေးကွက်စောင့်ကြည့်စစ်ဆေးခဲ့ပြီး သောက်ရေသန့်ထုတ်လုပ်သည့် စီးပွားရေးလုပ်ငန်းရှင်နှင့်လည်း တွေ့ဆုံဆွေးနွေးခြင်းလုပ်ငန်းဆောင်ရွက်ခဲ့ပါသည်။

  ထိုသို့ ဈေးကွက်စောင့်ကြည့်စစ်ဆေးခြင်းဆောင်ရွက်ရာတွင် “IQ”  အမှတ်တံဆိပ် သောက်ရေသန့်ထုတ်လုပ်ရေးလုပ်ငန်းအနေဖြင့် သက်ဆိုင်ရာဌာန၏ထောက်ခံချက်များပါရှိပြီး ကုန်အညွှန်းအမှတ်အသားပြည့်စုံစွာဖော်ပြထားသည်ကိုတွေ့ရှိရပါသည်။

      ဆက်လက်၍ စစ်ဆေးရေးမှူးနှင့် တာဝန်ရှိသူများသည် စားသုံးသူကာကွယ်ရေးဥပဒေ ၂၀၁၉၊ အခန်း (၁၀) ပါ “စီးပွားရေးလုပ်ငန်းရှင်၏တာဝန်များ” ကို သိရှိလိုက်နာဆောင်ရွက်စေရန် အသိပညာပေးဆွေးနွေးခြင်းလုပ်ငန်းဆောင်ရွက်ခဲ့ပါသည်။ 

DOCA(ရှမ်း)

      စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ဒု - ခရိုင်ဦးစီးမှူး ဒေါ်တိုးတိုးချွန်နှင့် ဝန်ထမ်း (၂) ဦးတို့သည် ၂၀၂၃ခုနှစ်၊ ဇွန်လ (၅) ရက်နေ့၊ နံနက် (၉:၃၀) အချိန်တွင် မုံရွာမြို့၊ ဘုရားကြီးရပ်ကွက်ရှိ ရွှေမောင်း လက်ဖက်စို/လက်ဖက်ခြောက်လုပ်ငန်းရှင် ဒေါ်ခင်နှင်းဝေနှင့် တွေ့ဆုံမေးမြန်းခဲ့ပါသည်။

    ထိုသို့တွေ့ဆုံမေးမြန်းရာတွင် ရွှေမောင်း လက်ဖက်စို၊ လက်ဖက်ခြောက်လုပ်ငန်းကို ၁၉၃၈ ခုနှစ်၊ ဘိုးဘွားများ လက်ထက်မှ စတင်လုပ်ကိုင်ခဲ့ရာ ယခုအချိန်ထိ နှစ်ပေါင်း (၈၅)နှစ် ရှိပြီဖြစ်ကြောင်း၊ လက်ဖက်များကို ရှမ်းပြည်နယ် တောင်ပိုင်းနှင့် မြောက်ပိုင်းတို့မှ ကိုယ်တိုင်သွားရောက်ဝယ် ယူခြင်းများရှိသလို၊ လာရောက်ရောင်းချကြသည်များလည်း ရှိပါကြောင်း၊ ကိုယ်တိုင်သွားရောက် ဝယ်ယူပါက လက်ဖက်အစို (၁)ပိဿာလျှင် ၃၉၀၀ ကျပ်နှုန်းဖြင့် ဝယ်ယူရပြီး ကားခမှာ အနီးအဝေး ပေါ်မူတည်၍ တစ်ပိဿာ ၁၀၀ ကျပ်မှ ၄၀၀ ကျပ် ပေးရကြောင်း၊ ဆိုင်သို့ လာရောက်သွင်းပါက တစ်ပိဿာလျှင် ကျပ် ၄၂၀၀ -၄၅၀၀ ဖြင့်ဝယ်ယူရပါကြောင်း၊ လက်ဖက်အညွန့်၊ လက်ဖက်အနှပ်နှင့် လက်ဖက်ခြောက် (၃)မျိုး ထုတ်လုပ် ရောင်းချပါကြောင်း၊ လုပ်သားအင်အား (၁၅)ဦး နှင့်  တစ်လလျှင် ၂၆ ရက် လည်ပတ်ပါကြောင်း၊ လုပ်ငန်းကျွမ်းကျင်မှုပေါ်မူတည်၍ လုပ်ခလစာများမှာ တစ်ဦးလျှင် ၁၂၀၀၀၀ ကျပ်မှ ၃၀၀၀၀၀ ကျပ်အထိ ပေးရကြောင်း၊ လက်ဖက်စို၊လက်ဖက်ခြောက်များကို အညာဒေသ၊ မုံရွာ၊ ချောင်းဦး၊ ဘုတလင်၊ ကနီ၊ ယင်းမာပင်၊ ပုလဲမြို့များသို့ တင်ပို့ရပါကြောင်း၊ လက်ဖက်အစို တစ်ပိဿာလျှင် အရည်အသွေးအပေါ် မူတည်၍ ၆၀၀၀ ကျပ်မှ ၂၅၀၀၀ ကျပ်အထိ ရောင်းချလျက်ရှိပါကြောင်း၊ လက်ဖက်နှပ်တစ်ပိဿာလျှင် ၁၀၀၀၀ ကျပ်မှ ၁၅၀၀၀ကျပ်၊ လဖက်ခြောက် တစ်ပိဿာလျှင်  အမျိုးအစားအလိုက် ၁၅၀၀၀မှ ၅၀၀၀၀ ကျပ်အထိ ရောင်းချရပါကြောင်း၊ ရွှေမောင်းလက်ဖက်စို၊ လက်ဖက်ခြောက် တံဆိပ်များတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားများနှင့်လည်း ပြည့်စုံမှုရှိပါကြောင်း  တွေ့ရှိရပါသည်။

DOCA(စစ်ကိုင်း)