သတင်းနှင့် လှုပ်ရှားမှုများ

     မွန်ပြည်နယ်၊ မုဒုံမြို့နယ်တွင် ရော်ဘာအထွက်နှုန်းတိုးတက်ရေးနှင့် အရည်အသွေးမြင့်မားရေးအတွက် နည်းပညာပေးဆွေးနွေးပွဲကို ၂၆-၆-၂၀၂၄ ရက်နေ့က နှစ်ရှည်ပင်များသုတေသနနှင့် နည်းပညာဖွံ့ဖြိုးရေးခြံ (မုဒုံ)ရှိ အစည်းအဝေးခန်းမဆောင်၌ ပြုလုပ်ခဲ့သည်။

      အခမ်းအနားတွင် မွန်ပြည်နယ်၊ စိုက်ပျိုးရေးဦးစီးဌာနမှ ပြည်နယ်ဦးစီးမှူး ဦးလှမိုးအောင်က အဖွင့်အမှာစကားပြောကြားခဲ့ပြီး မော်လမြိုင်ခရိုင်၊ နှစ်ရှည်ပင်များသုတေသနနှင့် နည်းပညာဖွံ့ဖြိုးရေးခြံမှ ဒုတိယညွှန်ကြားရေးမှူး ဒေါ်စမ်းစမ်းတင့်နှင့် တာဝန်ရှိသူများက ရော်ဘာအထွက်နှုန်းတိုးတက်စေရေးအတွက် ရော်ဘာစိုက်တောင်သူများလိုက်နာရမည့်အချက်၊ ရော်ဘာပင်အား မိုးကာအုပ်အစေးခြစ်ခြင်းဖြင့် အကျိုးအမြတ်ရရှိနိုင်မှု၊ ရော်ဘာမျိုးသစ်များ၏ ကြီးထွားမှုနှင့် အထွက်နှုန်းတွေ့ရှိချက်များအား ရှင်းလင်းဆွေးနွေးခဲ့သည်။

     အဆိုပါဆွေးနွေးပွဲသို့ မွန်ပြည်နယ်၊ စိုက်ပျိုးရေးဦးစီးဌာန၊ ပြည်နယ်ဦးစီးမှူးနှင့် ခရိုင်အဆင့်ဌာနဆိုင်ရာများ၊ မုဒုံမြို့နယ်၊ စားသုံးသူရေးရာဦးစီးဌာန၊ မြို့နယ်စီမံအုပ်ချုပ်ရေးအဖွဲ့နှင့် ပြည်နယ်အတွင်းရှိ ရော်ဘာစိုက်ခြံရှင်များတက်ရောက်ကြ၍ သိရှိလိုသည်များကိုမေးမြန်းရာ တာဝန်ရှိသူများက အသီးသီးပြန်လည်ဖြေကြားခဲ့ကြောင်းသိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည် ဌာနဆိုင်ရာတာဝန်ရှိသူများနှင့်ပူးပေါင်း၍ ၂၆-၆-၂၀၂၄ ရက်နေ့တွင် မုဒုံမြို့နယ်၊ စျေးကွက်အတွင်း ဖြန့်ဖြူးရောင်းချနေသည့်ဆန်ဆိုင်များ စျေးနှုန်းမြှင့်တင်ရောင်းချမှုမရှိစေရေးအတွက် ကွင်းဆင်းစစ်ဆေးခဲ့ကြောင်းသိရှိရသည်။

      ထိုသို့ကွင်းဆင်းစစ်ဆေးရာတွင် မုဒုံမြို့နယ်၊ အထွေထွေအုပ်ချုပ်ရေးဦးစီးဌာန၊ မြို့နယ်စားသုံးသူရေးရာဦးစီးဌာန၊ စည်ပင်သာယာရေးအဖွဲ့၊ မြို့နယ်အထူးစုံစမ်းစစ်ဆေးဦးစီးဌာန၊ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ပူးပေါင်း၍ မြို့ပေါ်ရှိဆန်ဆိုင်ကြီးများ၊ ဆန်ဂိုထောင်များအားစစ်ဆေးခဲ့ပြီး ဆန်လက်ကျန် ပေါင်၁၀၈အိတ်၊ ပေါင်၁၀၀အိတ်၊ ပေါင်၅၀အိတ်၊ ပေါင်၂၅အိတ်အရေအတွက်များ၊ နယ်ထွက်ပေါ်ဆန်း၊ ရွှေဘိုပေါ်ဆန်း၊ ဧည့်မထအုပ်စုဆန်အမျိုးအစားများနှင့် လက်ရှိရောင်းချနေသည့် စျေးနှုန်းများကိုစစ်ဆေးခဲ့ပြီး ဈေးနှုန်းအဆမတန်မြှင့်တင်ရောင်းချခြင်းမပြုကြရန်၊ သင့်တင့်မျှတသောဈေးနှုန်းဖြင့်သာရောင်းချရန်၊ ဈေးကစားရန်ရည်ရွယ်၍ သိုလှောင်ခြင်းမပြုလုပ်ရန် ဆိုင်ရှင်များအား ရှင်းလင်းပြောကြားခဲ့ကြောင်းသိရှိရပါသည်။

DOCA(မွန်)

       စားသုံးသူရေးရာဦးစီးဌာန မွန်ပြည်နယ်၊ သထုံခရိုင်၊ ပေါင်မြို့နယ်တာဝန်ခံသည် သက်ဆိုင်ရာအဖွဲ့များနှင့် ပူးပေါင်း၍ ၂၆-၆-၂၀၂၄ ရက်နေ့တွင် ဆန်ဆိုင်များ၌ ဈေးနှုန်းမြှင့်တင်ရောင်းချခြင်းရှိ/မရှိ ကွင်းဆင်းစစ်ဆေးခဲ့ကြောင်းသိရှိရပါသည်။

       ထိုသို့ကွင်းဆင်းစစ်ဆေးရာတွင် ပေါင်မြို့နယ်၊ ကဒါမြို့သစ် (၂) လမ်းရှိ ဦးမြင့်အေးဆန်ဆိုင်၊ ဦးတင်အေးဆန်ဆိုင်၊ ဦးအောင်မင်းဆန်ဆိုင်တို့သို့သွားရောက်စစ်ဆေးရာ ပေါ်ဆန်း(ဒေသ) ဆန် (၁၀၈) ပေါင်ပါ တစ်အိတ်လျှင် (၁၃၂၀၀၀) ကျပ်၊ ဧည့်မထဆန် (၁၀၈) ပေါင်ပါ တစ်အိတ်လျှင် (၇၇၀၀၀) ကျပ်ဖြင့်ရောင်းချလျက်ရှိကြောင်း၊ ဈေးကစားရန်ရည်ရွယ်၍ သိုလှောင်ထားခြင်းမရှိကြောင်းစစ်ဆေးတွေ့ရှိရပြီး ဆန်ဆိုင်များအား သင့်တင့်မျှတသောဈေးနှုန်းဖြင့်သာ ရောင်းချရန်၊ ဈေးကစားရန်ရည်ရွယ်၍ သိုလှောင်ထားခြင်းမပြုကြရန် ဆွေးနွေးခဲ့ကြောင်းသိရှိရပါသည်။

DOCA(မွန်)

    ၂၀၂၄ ခုနှစ်၊ ဇွန်လ ၂၅ ရက်နေ့ နံနက် (၁၀:၃၀) နာရီအချိန်တွင် ရှမ်းပြည်နယ်(တောင်ပိုင်း) စားသုံးသူရေးရာဦးစီးဌာန၊ တောင်ကြီးခရိုင်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် မြို့နယ်စည်ပင်သာယာရေးဌာန၊ အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ ပြည်နယ်ဆန်စပါးအသင်းတို့နှင့်ပူးပေါင်း၍ တောင်ကြီးမြို့ပေါ်ရှိ  Ocean Centre ၊ Star Mart နှင့် ယုန်ဖြူမလေးဆန် အရောင်းဆိုင်များ ရောင်းချနေသော ဆန်များ ဈေးနှုန်းမြှင့်တင် ရောင်းချခြင်း ရှိ/ မရှိ ကွင်းဆင်း စစ်ဆေးခဲ့ပါသည်။

    ထိုသို့ကွင်းဆင်းစစ်ဆေးဆောင်ရွက်ရာတွင် ရောင်းချနေသော ဆန်များ ဈေးကွက်အတွင်း  ဈေးနှုန်းမြှင့်တင်ရောင်းချမှုမရှိစေရေး၊ ဈေးကွက်လိုအပ်ချက်အပေါ်မူတည်၍ ဆန်များအား သိုလှောင် ပြီး ဈေးကစားမှု မပြုလုပ်ရန် ဆွေးနွေးပြောကြားခဲ့ပါသည်။  မြန်မာနိုင်ငံ ဆန်စပါးအသင်းချုပ်မှ ၂၀၂၄ ခုနှစ်၊ ဇွန်လအတွက် သတ်မှတ်ထုတ်ပြန်ထားသော ဈေးနှုန်းများထက် ဈေးနှုန်းမြှင့်တင် ရောင်းချခြင်းမပြုရေး၊ ဖြစ်သင့်ဖြစ်ထိုက်သည့် ဈေးနှုန်းအမြတ်ဖြင့်သာ ရောင်းချရန် ဆွေးနွေး ပြောကြားပြီး ဆန်ဆိုင်များ ပုံမှန်ဈေးနှုန်းများဖြင့် ရောင်းချလျက်ရှိကြောင်းနှင့် ဆန်ဈေးနှုန်း လက်ကမ်းစာစောင်များ ဖြန့်ဝေခဲ့ကြောင်း သတင်းရရှိခဲ့ပါသည်။

DOCA(ရှမ်း)

    စားသုံးသူရေးရာဦးစီးဌာန၊ မွန်ပြည်နယ်၊ သထုံခရိုင်၊ ပေါင်မြို့နယ်တာဝန်ခံသည် မိတ်ဖက်ဌာနများနှင့်ပူးပေါင်း၍  ၂၄-၆-၂၀၂၄ ရက်နေ့တွင် ပေါင်မြို့နယ်၊ ဇင်းကျိုက်မြို့၊ ဗိုလ်ချုပ်ဈေးရှိ ကုန်စုံဆိုင်များတွင် ရောင်းချနေသော စားသုံးဆီအမျိုးမျိုးကို ဈေးကွက်စောင့်ကြည့်စစ်‌ဆေးခြင်းဆောင်ရွက်ခဲ့ကြောင်းသိရသည်။ 

    ထိုသို့ဈေးကွက်စောင့်ကြည့်စစ်ဆေးရာတွင် ဇင်းကျိုက်မြို့၊ ဗိုလ်ချုပ်ဈေးရှိကုန်စုံဆိုင်များတွင် ရောင်းချလျက်ရှိသော စားသုံးဆီအမျိုးမျိုးတို့၌ ဘေးအန္တရာယ်ဖြစ်ပေါ်နိုင်မှုရှိ/မရှိ၊ စားသုံးသူကာကွယ်ရေးဥပဒေတွင် ပြဋ္ဌာန်းထားသော ကုန်အညွှန်းအမှတ်အသားဖော်ပြချက်နှင့်ကိုက်ညီမှုရှိ/မရှိစစ်ဆေးရာ စားသုံးဆီအမျိုးမျိုးပေါ်တွင် ကုန်အညွှန်းအမှတ်အသားပြည့်စုံစွာဖော်ပြထားကြောင်း စစ်ဆေးတွေ့ရှိရပါသည်။

DOCA(မွန်)