သတင်းနှင့် လှုပ်ရှားမှုများ

           ၇.၁၀.၂၀၂၄ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ကျိုက်ထိုမြို့နယ်တာဝန်ခံသည် မိတ်ဖက်ဌာနများနှင့် ပူးပေါင်း၍ ကျိုက်ထိုမြို့နယ်အတွင်းရှိ ကုန်စုံဆိုင်များတွင် ငရုတ်ဆီနှင့် အချဉ်ရည်အမျိုးမျိုးအား ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

        ထိုသို့ ဈေးကွက်စောင့်ကြည့်စစ်ဆေးရာတွင် ဈေးကွက်အတွင်းရောင်းချနေသော ငရုတ်ဆီနှင့်အချဉ်ရည်အမျိုးမျိုးတို့တွင် စားသုံးသူကာကွယ်ရေးဥပဒေ အခန်း (၁၈) တွင် ပြဌာန်းထားသည့် ကုန်အညွှန်းအမှတ်အသားဖော်ပြခြင်းဆိုင်ရာ အချက်အလက်များနှင့် ကိုက်ညီမှုရှိ/ မရှိ၊ သက်ဆိုင်ရာဌာနများ၏ ခွင့်ပြုထောက်ခံချက်ပါ/ မပါတို့ကိုစစ်ဆေးခဲ့ရာ ကုန်အညွှန်းအမှတ်အသားပြည့်စုံစွာပါရှိပြီး သက်ဆိုင်ရာဌာနများ၏ ခွင့်ပြုထောက်ခံချက်များပါရှိကြောင်း တွေ့ရှိရပါသည်။

DOCA(မွန်)

          စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ ဒု-ခရိုင်ဦးစီးမှူးနှင့် ဝန်ထမ်းတို့သည် (၇-၁-.၂၀၂၄) ရက်နေ့၊ နေ့လယ် (၁၃:၀၀) နာရီအချိန်တွင် ရေလဲလမ်းအပေါ်ရှိ လားရှိုးပေါင်မုန့်ကိတ်လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဥပဒေ(၂၀၁၉)၊ အခန်း (၁၈) အရ ကုန်အညွှန်းအမှတ်အသားဆိုင်ရာ ပြဋ္ဌာန်းချက်များနှင့်ပတ်သက်၍ စီးပွားရေးလုပ်ငန်းရှင်များသိရှိလိုက်နာဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါသည်။

         ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ပုဒ်မ ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ရေးဆိုင်ရာဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်းကို အသိပညာပေးဆွေးနွေးပြောကြားခဲ့ကြပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(ဧရာဝတီ)

         ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် အထွေထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူးရုံးခန်းမ၌ စားသုံးဆီဖြန့်ဖြူးရောင်းချခြင်းဆိုင်ရာ လုပ်ငန်းစဉ်များနှင့် ပတ်သက်၍ လုပ်ငန်းညှိနှိုင်းအစည်းအဝေးကို အောက်တိုဘာလ(၄)ရက်နေ့၊ ညနေ (၁၆း၀၀)နာရီအချိန်တွင် ကျင်းပခဲ့ကြောင်းသိရသည်။

      အဆိုပါလုပ်ငန်းညှိနှိုင်းအစည်းအဝေးတွင် ကော့မှူးမြို့နယ်စီမံအုပ်ချုပ်ရေးအဖွဲ့ ခေတ္တဥက္ကဌ ဗိုလ်မှူးဇော်ဖြိုးမြင့်က ကော့မှူးမြို့နယ်အနေဖြင့် တစ်မြို့နယ်လုံး လူဦးရေစုစုပေါင်း (၁၃၅၀၉၂)ဦး နေထိုင်လျက်ရှိပြီး စားသုံးဆီလူတစ်ဦး တစ်ရက်စာနှုန်းအား (၂.၂၅)ကျပ်သားဖြင့်တွက်ချက်၍ တစ်မြို့နယ်လုံးအတိုင်းအတာအနေဖြင့် စားသုံးဆီခွဲတမ်းများကို အီကိုဟာမိုနီနှင့် ဇဗ္ဗူကံထွန်းကုမ္ပဏီများမှ ပြည့်မီအောင်ခွဲတမ်းရရှိထားပြီးဖြစ်သလို ၎င်းကုမ္ဗဏီများမှ စားသုံးဆီကိုယ်စားလှယ်များဖြစ်သော ဦးသိန်းထွဠ်၊ ဒေါ်ခင်ပြုံးဝေ၊ ဦးဇော်လတ်စိုးတို့အနေဖြင့် မိမိတို့ရရှိထားသည့်ခွဲတမ်းများအား စားသုံးသူပြည်သူများလက်ဝယ်တိုက်ရိုက်ဖြန့်ဖြူးရောင်းချခြင်း စားသုံးဆီကိုယ်စားလှယ်များမှတဆင့် ကျေးရွာ/ ရပ်ကွက်များတွင် ဖြန့်ဖြူးရောင်းချပေးနေသည့် တစ်ဆင့်ခံကိုယ်စားလှယ်များ စားသုံးဆီဖြန့်ဖြူးရောင်းချရာတွင် အိမ်ထောင်စုတစ်စု၏လူဦးရေနှင့်အညီ လူတစ်ဦးစားသုံးဆီ တစ်ရက်နှုန်း(၂.၂၅)ကျပ်သားဖြင့် တစ်ပတ်စာတွက်ချက်ပြီး စနစ်တကျဖြန့်ဖြူးရောင်းချပေးကြရန် မိမိတို့ဖြန့်ဖြူးရောင်းချပေးလိုသော အိမ်ထောင်စုစာရင်း၊ လူဦးရေ၊ စားသုံးဆီ ပိဿာစာရင်းတို့အားမှတ်တမ်းထားရှိရန်တစ်ပတ်စာစားသုံးဆီခွဲတမ်းများအား လက်ကျန်မထားဘဲ စားသုံးသူပြည်သူများ၏ သာရေး၊ နာရေး၊ အလှူတန်းများအတွက် သက်ဆိုင်ရာ အဖွဲ့အစည်းများ၏ ထောက်ခံချက်ဖြင့် ဖြန့်ဖြူးရောင်းချပေးကြရန် ဆွေးနွေးပြောကြားခဲ့ကြောင်းသိရသည်။ အဆိုပါ လုပ်ငန်းညှိနှိုင်းအစည်းအဝေးသို့ မြို့နယ်စီမံအုပ်ချုပ်ရေးအဖွဲ့ ခေတ္တဥက္ကဌ၊ မြို့နယ်အထွေထွေအုပ်ချုပ်ရေးဦးစီးဌာနမှ ခေတ္တမြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်ရဲတပ်ဖွဲ့မှခေတ္တ မြို့နယ်ရဲမှူး၊ စည်ပင်သာယာရေးအဖွဲ့မှ မြို့နယ်အမှုဆောင်အရာရှိ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်စားသုံးဆီကိုယ်စားလှယ်များတက်ရောက်ခဲ့ကြောင်းသိရှိရပါသည်။

DOCA(ရန်ကုန်)

       ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်အခြေခံပညာမူလတန်းကျောင်း အမှတ်(၆)တွင် စားသုံးသူကာကွယ်ရေး အသိပညာပေးဆွေးနွေးဟောပြောပွဲကို အောက်တိုဘာလ(၄) ရက်နေ့၊ နံနက်(၁၀း၀၀)နာရီအချိန်တွင် ကျင်းပခဲ့ကြောင်းသိရသည်။

       ထိုသို့ဟောပြောဆွေးနွေးခဲ့ရာတွင် အခြေခံပညာမူလတန်းကျောင်း အမှတ်(၆)မှ ကျောင်းအုပ်ဆရာမကြီးက အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာန၊ ခရမ်းမြို့နယ်တာဝန်ခံက စားသုံးသူပြည်သူများဘေးအန္တရာယ်ကင်းရှင်းစေရေး၊ စီးပွားရေးလုပ်ငန်းရှင်များအနေဖြင့် ထုတ်ကုန်များလုံခြုံစိတ်ချရမှုရှိစေရေးတို့အတွက် စားသုံးသူကာကွယ်ရေးဥပဒေကို ထုတ်ပြန်ခဲ့ရခြင်းဖြစ်ကြောင်း စားသုံးသူကာကွယ်ရေးဥပဒေပါ စားသုံးသူ၏အခွင့်အရေးနှင့် တာဝန်များဖြစ်သော စားသုံးသူပြည်သူများ၏အခြေခံလိုအပ်ချက်များပြည့်စုံစေနိုင်မှု၊ လုံခြုံစိတ်ချစွာဖြင့် ဘေးအန္တရာယ်ကင်းရှင်းစေနိုင်မှု၊ ကုန်ပစ္စည်းနှင့်ပတ်သက်သည့် သတင်းအချက်အလက်များပြည့်စုံစွာရရှိစေနိုင်မှု၊ လွတ်လပ်စွာရွေးချယ်ဝယ်ယူနိုင်စေမှု၊ နစ်နာဆုံးရှံးမှုများအတွက် ပြောဆိုတင်ပြကြားနာနိုင်စေမှု၊ ထိခိုက်နစ်နာမှုများရှိလာပါက လျော်ကြေးရရှိနိုင်စေမှု၊ စားသုံးသူရေးရာကိစ္စရပ်များနှင့်ပတ်သက်၍ သင်ယူလေ့လာနိုင်စေမှုစသည့်အချက်များ အမှန်တကယ်ရရှိမှသာ ကောင်းမွန်စွာရှင်သန်နိုင်သောပတ်ဝန်းကျင်ကို ရရှိနိုင်စေမှာဖြစ်သည့်အကြောင်း စသည့်စားသုံးသူ၏အခွင့်အရေးနှင့် တာဝန်များအကြောင်း၊ ကုန်စည်နှင့် ဝန်ဆောင်မှုများမဝယ်ယူ မီသတိပြုရမည့်အချက်များအား အကျယ်တဝင့် ရှင်းလင်းဟောပြောဆွေးနွေးခဲ့ကြောင်း သိရှိရပါသည်။

DOCA(ရန်ကုန်)

         ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်ဦးစီးမှူးရုံးသို့ ညောင်တုန်းငှက်ပျောကြော်လုပ်ငန်းအသစ်နှစ်ခုမှ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စိစစ်ပေးနိုင်ရန် ၇-၁၀-၂၀၂၄ ရက်နေ့၊ နံနက်(၁၀:၀၀)နာရီအချိန်တွင်  လာရောက်တင်ပြလျှောက်ထားမှုကို မြို့နယ်ဦးစီးမှူးရုံးတာဝန်ရှိသူများက ကူညီဆောင်ရွက်ပေးခဲ့ကြောင်းသိရသည်။

           ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ လျှောက်ထားသူ ညောင်တုန်း (မျိုး) အဆင့်မြင့်ဆီသန့်ငှက်ပျောကြော်နှင့် (ထူးရှယ်) အဆင့်မြင့်ဆီသန့်ငှက်ပျောကြော်လုပ်ငန်းတို့က စားသုံးသူရေးရာဦးစီးဌာန၊ မြို့နယ်ဦးစီးမှူး ဦးအောင်လွင်ထံ ကုန်စည်ထုတ်လုပ်ရာတွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စိစစ်ပေးနိုင်ပါရန် တင်ပြလျှောက်ထားလာသည်။ လာရောက်လျှောက်ထားသူ လုပ်ငန်းရှင်များကို မြို့နယ်ဦးစီးမှူးက စားသုံးသူကာကွယ်ရေးဥပဒေ(၂၀၁၉) အရ စီးပွားရေးလုပ်ငန်းရှင်များ၏တာဝန်များကိုလည်းကောင်း၊ မိမိတို့ထုတ်လုပ်သည့် ကုန်ပစ္စည်းနှင့်ပတ်သက်၍ သတင်းအချက်အလက်များအား စားသုံးသူများသိရှိနိုင်ရန်အတွက် ပြည့်စုံစွာဖော်ပြရန် လိုအပ်ကြောင်း၊ ကုန်ပစ္စည်းများထုတ်လုပ်ရာတွင် ကုန်အညွှန်းအမှတ်အသားများကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့မဟုတ်)တစ်ခုထက်ပို၍တွဲလျက်ဖြစ်စေ ကုန်စည်အမျိုးအစားအလိုက် ဖော်ပြရန်နှင့် စားသုံးသူများကို ဘေးအန္တရာယ်ဖြစ်စေနိုင်သည့် ဓာတုဆိုးဆေးများ၊ တာရှည်ခံဆေးများကိုမသုံးစွဲကြရန်နှင့် ကုန်အမှတ်တံဆိပ် မူပိုင်ခွင့်ဆိုင်ရာပြဋ္ဌာန်းထားသော ကုန်အမှတ်တံဆိပ်မူပိုင်ခွင့်ဥပဒေနှင့် မှတ်ပုံတင်ခြင်းဆိုင်ရာ လုပ်ထုံးလုပ်နည်းများ၊ လုပ်ငန်းစဉ်များအားလည်းကောင်း ဆွေးနွေးအသိပညာပေးဆွေးနွေးခဲ့ပါသည်။ ဆက်လက်၍ ကုန်အညွှန်းအမှတ်အသားစိစစ်ဆောင်ရွက်နိုင်ရန်အတွက် အထက်အဆင့်ဆင့်သို့ တင်ပြဆောင်ရွက်ပေးသွားမည်ဖြစ်ကြောင်းနှင့် လုပ်ငန်းဆောင်ရွက်ပြီးစီးပါက ဆက်သွယ်ဆောင်ရွက်ပေးသွားမည်ဖြစ်ကြောင်း ခရိုင်ဦးစီးမှူးရုံးသို့ တင်ပြလျှောက်ထားရာတွင် လိုအပ်သည့်အချက်အလက်များကိုစစ်ဆေးဆောင်ရွက်ပြီး ကုန်အညွှန်းအမှတ်အသားနှင့် ပတ်သက်သည့် လက်ကမ်းစာစောင်များပေးအပ်ခြင်းတို့ဆောင်ရွက်ခဲ့ကြောင်း သတင်းရရှိပါသည်။