သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများအားလုံးသည် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေးအတွက် ခရိုင်အတွင်းရှိ  ထုတ်လုပ်လျက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ်အသားများပြည့်စုံမှန်ကန်စွာဖော်ပြမှုရှိစေရေးရည်ရွယ်၍ ဆောင်ရွက်လျက်ရှိရာ ပြည်ခရိုင်အတွင်း ၂၀၂၄ခုနှစ်၊ ဇွန်လ (၁၆)ရက်နေ့မှ (၃၀)ရက်နေ့အတွင်း ပြည်မြို့၊ နဝဒေးစက်မှုဇုန်ရှိ ဦးဇော်ထက်ပိုင်၏ ဇေယျာရွှေတည်ဆန်စက်နှင့် ဦးမြတ်သူ၏ ပွင့်ထွန်းဆန်စက်သို့လည်းကောင်း၊ စက်မှုဇုန်(၁)ရှိ ဦးအောင်ဇော်မင်း၏ A-1လယ်ယာသုံးစက်ကိရိယာလုပ်ငန်းသို့လည်းကောင်း၊ ရွှေတောင်မြို့၊ ကြာနီကန်ရပ်ကွက်၊ ရန်ကုန်-ပြည်လမ်းနေ ဦးရဲမျိုးအောင်၏ သရဖူဆန်စက်သို့လည်းကောင်း၊ ပန်းတောင်းမြို့တွင် ဥသျှစ်ပင်ဒေသရှိ ဦးစိုးသူရအောင်၏ စိန်သုံးလုံးအိမ်ဆောက်ပစ္စည်းဆိုင်၊ ဒေါ်သဉ္ဇာလတ်၏ ဘရဏီအိမ်ဆောက်ပစ္စည်းဆိုင်နှင့် ဦးဝင်းလတ်၏ ဘရဏီစက်သုံးဆီအရောင်းဆိုင်သို့လည်းကောင်း၊ ပေါက်ခေါင်းမြို့တွင် အမှတ်(၅)ရပ်ကွက်ရှိ ဦးသိန်းဇော်၏ ဝါစက်သို့လည်းကောင်း၊ အမှတ်(၃)ရပ်ကွက်ရှိ ဒေါ်ခင်မာလွင်ဆန်စက်သို့လည်းကောင်း သက်ဆိုင်ရာမြို့နယ်တာဝန်ခံနှင့် ဝန်ထမ်းများသည်သွားရောက်၍ မိမိတို့ဖြန့်ဖြူးရောင်းချလျက်ရှိသောကုန်စည်များတွင် အရည်အသွေး၊ အလေးချိန်၊ အချင်အတွယ်၊ ပမာဏနှင့် အမျိုးအစားများ မှန်ကန်စွာဖြန့်ဖြူးရောင်းချမှုရှိစေရေး၊ စီးပွားရေးကျင့်ဝတ်၊ စည်းကမ်းနှင့်အညီ ထုတ်လုပ်ရောင်းချမှုရှိစေရေး၊ ကုန်စည်အလိုက် ဖော်ပြရမည့်ကုန်အညွှန်းအမှတ်အသားများ၊ ပြည့်စုံမှန်ကန်စွာဖော်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့်အတူ အရေးယူဆောင်ရွက်မှုများပြုလုပ်ဆောင်ရွက်သွားမည်ဖြစ်သည့်အတွက် စီးပွားရေးလုပ်ငန်းရှင်များအနေဖြင့် အထူးအလေးထားလိုက်နာဆောင်ရွက်ကြရန် ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(ပဲခူး)

     ကချင်ပြည်နယ်အစိုးရအဖွဲ့၊ စီးပွားရေးရာဝန်ကြီး၊ ဦးမျိုးဆွေနှင့် စားသုံးသူရေးရာဦးစီးဌာန၊ ပြည်နယ်ဦးစီးမှူး၊ ဦးကိုကိုဦးတို့သည် ကချင်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးအစည်းအဝေးခန်းမ၌ ၂၆-၆-၂၀၂၄ ရက်နေ့၊ နေ့လယ် (၁၅း၀၀) နာရီအချိန်တွင် ကချင်ပြည်နယ်အတွင်း စားအုန်းဆီဖြန့်ဖြူးရောင်းချရာ၌ စနစ်တကျရှိစေရေးနှင့် စျေးကွက်အတွင်း သင့်တင့်မျှတသည့်စျေးနှုန်းဖြင့် ဖြန့်ဖြူးရောင်းချစေရေးအတွက် စားအုန်းဆီ လက်လီ/လက်ကားရောင်းချသည့် ကုန်သည်များနှင့်တွေ့ဆုံဆွေးနွေးပွဲအခမ်းအနားကျင်းပပြုလုပ်ခဲ့ပါ သည်။

      ထိုတွေ့ဆုံဆွေးနွေးပွဲအခမ်းအနားတွင် ကချင်ပြည်နယ်အစိုးရအဖွဲ့၊ စီးပွား‌ရေးရာဝန်ကြီး ဦးမျိုးဆွေက ကချင်ပြည်နယ်အနေနှင့် စားအုန်းဆီများကို စားသုံးသူပြည်သူများသို့ စျေးနှုန်းသက်သာစွာရောင်းချနိုင်ရန် ၂၀၂၃ခုနှစ်၊ မေလမှ စ၍ထုတ်ယူဖြန့်ဖြူးရောင်းချပေးလျက်ရှိပြီး တစ်လလျှင် တန်(၁၀၀) ခွဲတမ်းရရှိခဲ့ကြောင်း၊ ၂၀၂၃ခုနှစ်၊ ဒီဇင်ဘာလတွင် ကချင်ပြည်နယ်အစိုးရအဖွဲ့၏ တောင်းဆိုမှုကြောင့် တစ်လလျှင် တန်(၅၀၀) ခွဲတမ်းရရှိခဲ့ပြီး၊ ၂၀၂၄ခုနှစ်၊ မေလနှင့် ဇွန်လများတွင် တန်(၁၀၀) သာပြန်လည်ရရှိခဲ့သည့်အတွက် ၂၀၂၄ခုနှစ်၊ ဇွန်လ ၈ရက်နေ့တွင် ကျင်းပပြုလုပ်ခဲ့သည့် စားသုံးဆီတင်သွင်းသိုလှောင်ဖြန့်ဖြူးရောင်းချခြင်းဆိုင်ရာ လုပ်ငန်းညှိနှိုင်းအစည်းအဝေးတွင် ကော်မတီဥက္ကဋ္ဌဖြစ်သည့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးအား တစ်လလျှင် တန်(၅၀၀) ထုတ်ယူခွင့်ပြုပါရန် တင်ပြခဲ့ကြောင်း၊ ၂၀၂၄ခုနှစ်၊ ဇွန်လ ၁၉ရက်‌နေ့တွင် ကျင်းပပြုလုပ်သည့်   ပြည်ထောင်စုကုန်ဈေးနှုန်းတည်ငြိမ်ရေးကော်မတီ၏  (၂/၂၀၂၄ )ကြိမ်မြောက်အစည်းအဝေးတွင်လည်း  ပြည်နယ်ဝန်ကြီးချုပ်က တန် (၅၀၀)ထုတ်ယူခွင့်ပြုပါရန် တင်ပြခဲ့ကြောင်း၊ စားအုန်းဆီများကို သတ်မှတ်ပေးထားသည့် စျေးနှုန်းဖြင့်သာရောင်းချရန်နှင့်‌ စျေးနှုန်းမြှင့်တင်ရောင်းချခြင်း (သို့မဟုတ်) ဈေးနှုန်းမြင့်တင်ရောင်းချရန်ရည်ရွယ်ချက်ဖြင့် သိုလှောင်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း၊ စားအုန်းဆီရောင်းချနေမှုအား ပြည်နယ်စားအုန်းဆီဖြန့်ဖြူးခြင်းလုပ်ငန်းကြီးကြပ်ရေးအဖွဲ့ဖြင့် စစ်ဆေးသွားမည်ဖြစ်ပါကြောင်း ပြောကြားခဲ့ပါသည်။ စားသုံးသူရေးရာဦးစီးဌာန၊ ပြည်နယ်ဦးစီးမှူး၊ ဦးကိုကိုဦးက လိုအပ်သည်များကို ဖြည့်စွက်ရှင်းလင်းဆွေးနွေးခဲ့ပြီးအခမ်းအနားကို နေ့လယ်(၁၅း၃၀)နာရီ အချိန်တွင် ရုပ်သိမ်းခဲ့ကြောင်း၊ အဆိုပါအခမ်းအနားသို့ စားအုန်းဆီ လက်လီ/လက်ကားကုန်သည် ၂၉ဦးတက်ရောက်ခဲ့ကြောင်းသိရှိရပါသည်။

DOCA(ကချင်)

       ဖျာပုံခရိုင်၊ ဒေးဒရဲမြို့နယ်၊ စားသုံးသူရေးရာဦးစီးဌာန၊ ဒု-ခရိုင်ဦးစီးမှူး ဦးစိုးမင်းထိုက်၊ ခရိုင်စားသုံးထုတ်လုံမှ  ဦးစီးမှူး ဒေါ်ကေသွယ်ဝင်းနှင့် ဒေးဒရဲမြို့နယ်ဦးစီးမှူးတို့သည် ၂၀၂၄ခုနှစ်၊ ဇွန်လ (၁၈) ရက်နေ့၊ နံနက် (၉:၃၀) နာရီအချိန်တွင် ဒေးဒရဲမြို့၊ အမှတ်(၁) ရပ်ကွက် ၊ အ.ထ.က (၃) ကျောင်းရှိ ဆရာ/မ (၃၄) ဦး၊ ကျောင်းသား/သူ (၆၁၁)ဦးတို့အား စားသုံးသူကာကွယ်ရေးအသိပညာ ပေးဟောပြောခဲ့ပါသည်။

         ဒု-ခရိုင်ဦးစီးမှူး ဦးစိုးမင်းထိုက်က အဖွင့်အမှာစကားပြောကြားခဲ့ပြီးနောက် စားသုံးသူကာကွယ်ရေးဥပဒေပါ စားသုံးသူ၏အခွင့်အရေး(၈)ချက်ကိုပြောကြားခဲ့ပြီး ခရိုင်စားသုံးထုတ်လုံမှ ဦးစီးမှူး ဒေါ်ကေသွယ်ဝင်းက စားသုံးသူများနစ်နာဆုံးရှုံးမှုများဖြစ်ပေါ်လာပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ဖွင့်လှစ်ထားရှိပြီး ကုန်စည်နှင့်ဝန်ဆောင်မှုများတွင် ငွေကြေး (သို့) ကျန်းမာရေးဆိုင်ရာထိခိုက်နစ်နာမှုများရှိပါက တိုင်ကြားနိုင်မှုများနှင့်စပ်လျဉ်း၍ ရှင်းလင်းပြောကြားခဲ့ပါသည်။ ဒေးဒရဲမြို့နယ်ဦးစီးမှူး ဦးသိမ်းမောင်ကလည်း ဘေးအန္တရာယ်ကင်းရှင်းပြီး လုံခြုံစိတ်ချရသော ကုန်စည်နှင့်ဝန်ဆောင်မှုများအား ဝယ်ယူသုံးစွဲနိုင်ရေး ထပ်ဆင့်အသိပညာပေးဟောပြောခဲ့သည်ဟု သတင်းရရှိပါသည်။

DOCA(ဧရာဝတီ)

          စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန ကန့်ဘလူမြို့နယ်တာဝန်ခံရုံးသည် စားသုံးသူကာကွယ်ရေးလုပ်ငန်းများကို တိုင်းဒေသကြီးဦးစီးမှူး၏လမ်းညွှန်မှု၊ ခရိုင်ဦးစီးမှူး၏ကြီး ကြပ်မှုတို့ဖြင့် စားသုံးသူကာကွယ်ရေးအကြောင်းသိမှတ်ဖွယ်ရာများကို ကျယ်ကျယ်ပြန့်ပြန့်သိရှိ စေရန် အသိပညာပေးဟောပြောပွဲများကို လစဉ်ဆောင်ရွက်လျက်ရှိရာ ၂၀၂၄ ခုနှစ် ၊ ဇွန်လ ၂၀ ရက်နေ့ နံနက်(၁၀:၃၀)နာရီအချိန်တွင် ပြန်ကြားရေးနှင့်ပြည်သူ့ ဆက်ဆံရေးဦးစီးဌာန Community Center၌ စားသုံးသူအသိပညာပေး Talk Show ကျင်းပပြုလုပ်ခဲ့သည်။

       ဆွေးနွေးပွဲတွင် ကန့်ဘလူမြို့နယ်တာဝန်ခံ ဦးမျိုးဝင်းသန်းက စားသုံးသူကာကွယ်ရေးဥပဒေအကြောင်း ခေါင်းစဉ်ဖြင့် စားသုံးသူကာကွယ်ရေးဥပဒေ ပြဌာန်းရခြင်း၏ ရည်ရွယ်ချက်များ၊ ဥပဒေပါ စားသုံးသူကာကွယ်ရေးနှင့် စားသုံးသူအခွင့်အရေးများအကြောင်း၊ စားသုံးသူနှင့် စီးပွားရေးလုပ်ငန်းရှင်ဆိုတာ ဘယ်လိုလူတွေကိုခေါ်တယ်၊ အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ အသေးစိတ်ဖော်ပြရမည့်အချက်များကို ဟောပြောဆွေးနွေးခဲ့ကြောင်း၊ စားသုံးသူများ သည် ကုန်စည်(သို့မဟုတ်)ဝန်ဆောင်မှုများကို ဝယ်ယူအသုံးပြုရာတွင် စားသုံးသူအခွင့်အရေးချိုး ဖောက်ခံရပါက သက်ဆိုင်ရာပြည်နယ်နှင့်တိုင်းဒေသကြီးအပါအဝင် ခရိုင်ဦးစီးမှူးရုံးများရှိ CICCများ သို့ လူကိုယ်တိုင်ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင် ကြောင်း၊ DOCA Myanmar Mobile Application တွင်လည်းကောင်း၊ DOCA Facebook Page နှင့် Consumer Call Center 1535 သို့လည်း ဆက်သွယ်တိုင်ကြားနိုင်ကြောင်း အသိပညာပေးဆွေးနွေးခဲ့ကြောင်း သိရသည်။

DOCA(စစ်ကိုင်း)

        စစ်ကိုင်းတိုင်းဒေသကြီး၊ ရွှေဘိုခရိုင်၊ ရွှေဘိုမြို့တွင် စစ်ကိုင်းတိုင်းဒေသကြီးအစိုးရအဖွဲ့၏ လမ်းညွှန်မှု၊ ရွှေဘိုခရိုင်စီမံအုပ်ချုပ်ရေးအဖွဲ့၏ ကြီးကြပ်မှုဖြင့် (၂၄.၆.၂၀၂၄)ရက်နေ့၊ နံနက်(၁၀:၀၀)နာရီ အချိန်တွင် ရွှေဘိုခရိုင် အထွေထွေအုပ်ချုပ်ရေးဦးစီးဌာရုံးအစည်းအဝေးခန်းမ၌ ပြည်တွင်းစားဆန် ဈေးနှုန်းများ သင့်တင့်မျှတစွာဖြင့်  တည်ငြိမ်မှန်ကန်စေရေးနှင့် MyRo တွင် သိုလှောင်ရုံမှတ်ပုံတင် ဆောင်ရွက်ရေး ရှင်းလင်းပွဲကို ကျင်းပခဲ့ပါသည်။

          အဆိုပါတွေ့ဆုံပွဲတွင် ရွှေဘိုခရိုင် ကုန်ဈေးနှုန်းတည်ငြိမ်ရေးကော်မတီဥက္ကဌမှ အဖွင့်အမှာစကား ပြောကြားခဲ့ပြီး စားသုံးသူရေးရာဦးစီးဌာန၊ ခရိုင်ဦးစီးမှူးက စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၏ဆောင်ပုဒ်၊ မျှော်မှန်းချက်များ၊ ဝန်ကြီးဌာနအောက်ရှိ ဦးစီးဌာနများ၊ စားသုံးသူရေးရာ ဦးစီးဌာန၏ မျှော်မှန်းချက်၊ ရည်မှန်းချက်များ၊ မြန်မာနိုင်ငံဆန်စပါးအသင်းချုပ်၏ ဆန်စပါးသိုလှောင်မှု မှတ်ပုံတင်ရေး စီစဉ်ဆောင်ရွက်ရန်နှင့် သင့်တင့်မျှတသောဆန်ဈေးနှုန်းများဖြင့် ရောင်း/ဝယ်ရန် တိုက်တွန်းနှိုးဆော်ချက် ထုတ်ပြန်ထားရှိမှုများ၊ MyRo တွင် သိုလှောင်ရုံမှတ်ပုံတင်ဆောင်ရွက်ရေး အကြောင်းများနှင့်စပ်လျဉ်း၍ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ မြန်မာနိုင်ငံဆန်စပါး အသင်းချုပ်နှင့် စားသုံးသူရေးရာဦးစီးဌာနတို့၏ အသိပေးကြေငြာထားမှုအခြေအနေများ၊ (၁၇.၆.၂၀၂၄) ရက်နေ့ထိ MyRo တွင် ဆန်စပါးသိုလှောင်ရုံ မှတ်ပုံတင်ထားသည့်စာရင်းများကို အသေးစိတ် ရှင်လင်း ဆွေးနွေးခဲ့ကြောင်း၊ ဆက်လက်၍ တက်ရောက်လာသည့်လုပ်ငန်းရှင်များမှ မရှင်းလင်းသည်များနှင့် သိရှိလိုသည်များကို မေးမြန်းဆွေးနွေးခြင်း၊ အထွေထွေဆွေးနွေးခြင်းများပြုလုပ်ခဲ့ပြီး ခရိုင်ကုန်ဈေးနှုန်းတည်ငြိမ်ရေး ကော်မတီဥက္ကဌက နိဂုံးချုပ်စကားပြောကြားခဲ့ပါသည်။

အစည်းအဝေးသို့ ရွှေဘိုခရိုင်ကုန်ဈေးနှုန်း တည်ငြိမ်ရေးလုပ်ငန်းအဖွဲ့ဥက္ကဌနှင့် အဖွဲ့ဝင်များ၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ တာဝန်ရှိသူများ၊ ခရိုင်စက်မှုကြီးကြပ်ရေးနှင့် စစ်ဆေးရေးဦးစီးဌာနမှတာဝန်ရှိသူများ တက်ရောက်ခဲ့ပြီး   ဆန်စက်လုပ်ငန်းရှင်နှင့် ဆန်ကုန်သည် (၁၀၅) ဦး တက်ရောက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)