သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်မှာကြားချက်အရ ပြည်တွင်းဆေးဝါးပြတ်လပ်မှုမရှိစေရေး အရှေ့ပိုင်းခရိုင်စားသုံးသူရေးရာဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာနတို့ပူးပေါင်း၍ ၉-၁၀-၂၀၂၄ ရက်နေ့၊ နေ့လယ် (၁၄:၀၀) နာရီအချိန်တွင်  ဆိုင်အမှတ် (ရုံ(က)၂၁၂/၂၁၃/၂၁၄))သာကေတ(၁၀)ဈေး၊ သာကေတမြို့နယ်ရှိ ဝါဝင့်ကြည်ဆေးဆိုင်မှ  ဆိုင်တာဝန်ခံ‌ ဒေါ်မေသဇင်ဦးနှင့်တွေ့ဆုံ၍ ဆေးဆိုင်အတွင်းရှိ ဆေးဝါးများကို စစ်ဆေးမှုများပြုလုပ်ခဲ့ကြောင်းသိရှိရပါသည်။

          ထိုသို့စစ်ဆေးမေးမြန်းရာ၌ ဆေးဆိုင်ရှိဆေးများတွင် ကုန်အညွှန်းအမှတ်အသားများပြည့်စုံစွာဖော်ပြထားခြင်းရှိ/ မရှိနှင့် စပ်ဆေးများမရောင်းချရန်တို့ကို အသိပညာပေးစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

          မြိတ်ခရိုင်ဆန်ကုန်သည်များအသင်းသည် မြိတ်ခရိုင်အတွက်လိုအပ်သောဆန်များကို (၃၀.၉. ၂၀၂၄)ရက်နေ့တွင် လက်ပွတ္တာခရိုင်၊ မော်လမြိုင်ကျွန်းမြို့နယ်မှဝယ်ယူ၍ MV အာသာဝတီ ရေယာဉ်ဖြင့် ဆန်အိတ်များသယ်ဆောင်လာခဲ့ပြီး မြိတ်မြို့သို့ (၇.၁၀.၂၀၂၄)ရက်နေ့တွင် ရောက်ရှိလာခဲ့ပါသည်။

  ထိုသို့ရောက်ရှိလာသောဆန်အိတ်များကို မြိတ်ခရိုင်စားသုံးသူရေးရာဦးစီးဌာန၊ မြိတ်ခရိုင်အကောက်ခွန်ဦးစီးဌာန၊ မြိတ်ခရိုင်လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၊ မြိတ်ကုန်သွယ်ရေးဦးစီးဌာန၊ မြိတ်ခရိုင်ရဲတပ်ဖွဲ့တို့ပါဝင်သောအဖွဲ့များဖြင့် ကုန်စည်စီးဆင်းမှုမှန်ကန်မြန်ဆန်စေရေး ကွင်းဆင်းစစ်ဆေးခဲ့ပြီး ကွင်ဆင်းစစ်ဆေးချက်အရ ဆန်အိတ်ရေ (၆၀၀၀)၊ ဆန်တန် (၃၀၀)တို့ တင်ဆောင်လာခဲ့ကြောင်း သိရှိရပါသည်။

DOCA(တနင်္သာရီ)

    ဧရာဝတီတိုင်းဒေသကြီး၊ ညောင်တုန်းမြို့နယ် အထွေထွေအုပ်ချုပ်ရေးဦးစီးမှူးရုံး အစည်းအဝေးခန်းမတွင် (၆.၁၀.၂၀၂၄) ရက်နေ့ ၊နံနက် (၁၀:၀၀)နာရီက ညောင်တုန်းမြို့ ဆီရောင်းချသူ လုပ်ငန်းရှင် ၁၅ဦးအား ဖိတ်ကြား၍ အရေးကြီးကုန်စည်ဝန်ဆောင်မှု ဥပဒေအကြောင်းနှင့် ကုန်ဈေးနှုန်းတည်ငြိမ်စေရေး၊ စားသုံးသူကာကွယ်ရေးလုပ်ငန်းစဉ်အကြောင်းတို့ကို အသိပညာပေး ရှင်းလင်း ဆွေးနွေးခဲ့ကြသည်။

      အဆိုပါတွေ့ဆုံပွဲတွင် စားသုံးသူရေးရာဦးစီးဌာနမှ မြို့နယ်ဦးစီးမှူး ဦးအောင်လွင်က စားသုံးဆီထုတ်လုပ်သည့် လုပ်ငန်းရှင်များအနေဖြင့် မိမိတို့ဆိုင်၌ရောင်းချနေသည့် စားသုံးဆီဘူးများပေါ်၌ မြန်မာနိုင်ငံ စားသုံးသူကာကွယ်ရေးကော်မရှင်၏ (၃-၁၂-၂၀၁၉)ရက်စွဲပါ ညွှန်ကြားချက်အမှတ် (၂/၂၀၁၉) ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ (၂၀-၁၂-၂၀၂၁)ရက်စွဲပါ ညွှန်ကြားချက်အမှတ် (၁/၂၀၂၁)ကို လိုက်နာ ဆောင်ရွက်မည့်အပြင် မြန်မာနိုင်ငံ အစားအသောက်နှင့်ဆေးဝါးအာဏာပိုင်အဖွဲ့ မှထုတ်ပြန်ထားသည့် ဟင်းသီးဟင်းရွက်ဆီများကို ရောနှောဆီ(Blended Oil)အဖြစ် ရောစပ်ရာတွင် အရည်အသွေးအာမခံချက်နှင့် အမှတ်တံဆိပ်ကပ်ခြင်းဆိုင်ရာ သတ်မှတ်သည့် အမိန့်အမှတ်(၂/၂၀၂၄) ကိုပါလိုက်နာ ဆောင်ရွက်သွားရမည်ဖြစ်ကြောင်းနှင့် လိုက်နာဆောင်ရွက်ခြင်းမရှိပါက သက်ဆိုင်ရာ ဥပဒေများနှင့်အညီအရေးယူ ဆောင်ရွက်သွားမည်ဖြစ်ကြောင်း ၊ ၁၈-၉-၂၀၁၈ အမိန့်ကြော်ငြာစာ ၄၆/၂၀၁၈ ဆင့်ပွားဈေးကွက်ဖြန့်ချိရေးလုပ်ငန်းနှင့် စပ်လျဉ်း၍ တားမြစ်ခြင်းအကြောင်း၊ ၁၆-၁၀-၂၀၂၈ အမ်န့်ကြော်ငြာစာ ၅၃/၂၀၁၈ စပါးဆန်/ ပဲမျိုးစုံ ကြိတ်ခွဲစက် ဖျက်သိမ်းအမိန့်အကြောင်း၊ ၃၀-၃-၂၀၂၀ အမိန့်ကြော်ငြာစာ ကုန်စည်များ အပေါ် တားမြစ်မိန့် ထုတ်ပြန်ခြင်း အကြောင်း ကို လည်းကောင်း၊ ၈-၄-၂၀၂၂ အမိန့်အမှတ် ဝါသီးနှံနှင့် ဝါဂွမ်းအပေါ် တားမြစ်မိန့်အကြောင်း၊ ၂၁-၇-၂၀၂၃ အမိန့်ကြော်ငြာစာ အွန်လိုင်းစနစ်ဖြင့် ရောင်းချခြင်းလုပ်ငန်း အရေးကြီးကုန်စည်နှင့် ဝန်ဆောင်မှု လုပ်ငန်းအဖြစ် သတ်မှတ်အမိန့်စသည့်  အမိန့်နှင့်ညွှန်ကြားချက်များအား အကျယ်တဝင့် ရှင်းလင်းပြောကြားခဲ့ပါသည် ။ ဆွေးနွေးပွဲသို့ စားသုံးဆီရောင်းချသည့် စီးပွားရေး လုပ်ငန်းရှင်(၁၅)ဦး တက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ ဧရာဝတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ် တာဝန်ခံသည် မိတ်ဖက်ဌာနများ ပူးပေါင်း၍ ကျောင်းဖွင့်ရာသီတွင် ကျောင်းနေအရွယ် ကျောင်းသား၊ ကျောင်းသူများ စားသုံးသူအခွင့်အရေး ဗဟုသုတကြွယ်စေပြီး တောင်းဆိုတက်ရှိစေရန်နှင့် ဘေးအန္တရာယ်ကင်းသော ကုန်စည်နှင့် အစားအသောက်များ ရွေးချယ်ဝယ်ယူစားသောက်နိုင်ရေးအတွက် (၇.၁၀.၂၀၂၄)ရက်နေ့၊ နေ့လယ် (၁၃:၃၀)အချိန်တွင် အသိပညာပေးဟောပြောခဲ့ပါသည်။

     ဟောပြောပွဲတွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အားကစားနှင့် ကာယပညာဦးစီးဌာန၊ စားသုံးသူရေးရာဦးစီးဌာနတို့ ပူးပေါင်းကာ ညောင်တုန်းမြို့ ကြိမ်ပင်ဆယ်ကျေးရွာ၊ စက္ကော့အခြေခံပညာ အထက်တန်းကျောင်းတွင် ကျောင်းသူ၊ ကျောင်းသား(၁၇၅)ဦး၊ ဆရာ၊ ဆရာမ(၆)ဦးတို့အား  စာဖတ်ခြင်း၏ အကျိုးကျေးဇူးများ၊ အားကစား နှင့်ကာယပညာဦးစီးမှူးမှ အားကစားသိပ္ပံအကြောင်း၊ စားသုံးသူရေးရာဦးစီးဌာန မြို့နယ်ဦးစီးမှူး ဦးအောင်လွင်က  စားသုံးသူကာကွယ်ရေး ဥပဒေပြဌာန်းချက်များနှင့်အညီ ဆောင်ရွက်သောဌာနတစ်ခုဖြစ်ကြောင်း၊ စားသုံးသူကာကွယ်ရေးလုပ်ငန်းဖြင့် လူနေမှုဘဝ အကျိုးစီးပွားကို ကာကွယ်ဆောင်ရွက်ခြင်း၊ လူ့အခွင့်အရေးကာကွယ်မြင့်တင်ဖို့ လုပ်ဆောင်ခြင်း၊ စီးပွားရေး လုပ်ငန်းရှင်နှင့် စားသုံးသူအကြား စားသုံးသူနစ်နာမှုကို ကာကွယ်ပေးခြင်း၊ စားသုံးသူ အခွင့်အရေးအခြေခံ ၈ချက်ကို သိရှိနားလည်ထားကြရန်၊ သတ်မှတ်ထားသော ဥပဒေနည်း ဥပဒေများဖြင့် ဆောင်ရွက်ခြင်း လုပ်ငန်းဖြစ်ကြောင်းကို အကျယ်တဝင့် ရှင်းလင်းခြင်း၊ စားသုံးသူအခွင့်အရေး နစ်နာဆုံးရှုံးမှုအပေါ် တိုင်ကြားနိုင်သော ဌာနဖြစ်သည့် စားသုံးသူရေးဦးစီးဌာနတွင် တိုင်ကြားမှုများကို လက်ခံဖြေရှင်းဆောင်ရွက်ပေးသည့် လုပ်ငန်းစဉ်များအကြောင်းကို အသေးစိတ်ရှင်းလင်းပြသကာ တိုင်ကြားလိုရသော နည်းလမ်းများဖြစ်သည့် www.doca.gov.mm တွင် တိုင်ကြားနိုင်ကြောင်း၊ DOCA Myanmar Mobile Applaction ဖြင့် တိုင်ကြားနိုင်ကြောင်း၊ သက်ဆိုင်ရာမြို့နယ်၊ ခရိုင်/တိုင်း/ပြည်နယ်များတွင် ဖွင့်လှစ်ထားသော CICCများသို့ လူကိုယ်တိုင်သော်လည်းကောင်း၊ စာဖြင့်ဖြစ်စေ၊ ဖုန်းဖြင့်ဖြစ်စေ တိုင်ကြားနိုင်ကြောင်း၊ FaceBook Page Messanger မှတဆင့် တိုင်ကြားနိုင်ခြင်း၊ Consumer Call Center 1535 ကိုလည်း ဆက်သွယ်မေးမြန်းတိုင်ကြားလို့ရကြောင်းကို ရှင်းလင်းပြီး ကျောင်းသား/ကျောင်းသူများက သိရှိလိုသည်များကို မေးမြန်းကြ၍ ပြန်လည်ဖြေကြား ရှင်းလင်းခဲ့ကြောင်း သတင်းရရှိပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ အင်္ဂပူမြို့နယ်ဦးစီးမှူးသည် မိတ်ဘက်ဌာနဆိုင်ရာများနှင့်ပူးပေါင်း၍ (၇.၁၀.၂၀၂၄)နေ့ နေ့လယ်(၁၃:၃၀)နာရီအချိန်တွင် အင်္ဂပူမြို့၊ အမှတ်(၂)ရပ်ကွက်၊ မြို့မ(မြောက်)ရှိ အခြေခံပညာ မူလတန်း(လွန်)ကျောင်းတွင် ဆရာ၊ ဆရာမနှင့် ကျောင်းသား၊ ကျောင်းသူ ၁၃၁ ဦးအား စားသုံးသူကာကွယ်ရေးအသိပညာပေးဟောပြောခြင်းကို ဆောင်ရွက်ခဲ့ပါသည်။

       ဟောပြောပွဲတွင် မြို့နယ်တာဝန်ခံ ဦးဘိုဘိုက စားသုံးသူကာကွယ်ရေးဥပဒေပါ စားသုံးသူ အခွင့်အရေးနှင့် တာဝန်များအကြောင်း၊ အစားအသောက်နှင့် ကုန်စည်တွေပေါ်မှာဖော်ပြရမည့် ကုန် အညွှန်းအမှတ်အသားများအကြောင်း၊ဝယ်ယူအသုံးပြုခဲ့သော ကုန်စည်နှင့် ဝန်ဆောင်မှုများကြောင့် နစ်နာဆုံးရှုံးမှုများဖြစ်ပေါ်လာပါက ပြောဆိုတင်ပြတိုင်ကြားခွင့်နှင့်ပြန်လည်ကုစားနိုင်ခွင့်များအကြောင်း ကို အကျယ်တဝင့် ရှင်းလင်းဆွေးနွေးဟောပြောခဲ့ပါသည်။

    ဟောပြောပွဲအပြီးတွင် မြို့နယ်တာဝန်ခံနှင့်အဖွဲ့သည် ကျောင်းမုန့်ဈေးတန်းကော်မတီဝင်များနှင့်အတူ ကျောင်းမုန့်ဈေးတန်းများရှိ ရောင်းချနေသောမုန့်များတွင် ကုန်အညွှန်းအမှတ်အသား ပြည်စုံ မှုရှိမရှိ ကွင်းဆင်းစိစစ်ခဲ့ပြီး၊ ကုန်အညွှန်းအမှတ်အသားပြည့်စုံသော မုန့်များကိုသာ ရောင်းချရန် မုန့်ဈေးတန်းရောင်းချသူများအား မှာကြားခဲ့ကြောင်း သိရှိရပါသည်။

DOCA(ဧရာဝတီ)