သတင်းနှင့် လှုပ်ရှားမှုများ

      မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူး၊ ဒုတိယပြည်နယ်ဦးစီးမှူးနှင့် ဝန်ထမ်းများသည် အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ၂၁-၆-၂၀၂၄ ရက်နေ့တွင် မော်လမြိုင်မြို့ပေါ်ရှိ မောင်ငံရပ်ကွက်၊ ကွင်းရပ်ရပ်ကွက်၊ ဈေးကြိုရပ်ကွက်တို့ရှိ ဆန်ဆိုင်များအား ဈေးကွက်စောင့်ကြည့်စစ်ဆေးခဲ့သည်။

      ထိုသို့ဈေးကွက်စောင့်ကြည့်စစ်ဆေးရာတွင် ဆန်ဆိုင်များ၌ ဆန်များဈေးနှုန်းအဆမတန်မြှင့်တင်ရောင်းချခြင်းရှိ/မရှိ၊ ဈေးကစားရန်ရည်ရွယ်၍ သိုလှောင်ထားခြင်းရှိ/မရှိစစ်ဆေးခဲ့ရာ သင့်တင့်မျှတသောဈေးနှုန်းများဖြင့် ရောင်းချလျက်ရှိကြောင်း၊ ဈေးကစားရန်ရည်ရွယ်၍ သိုလှောင်ထားခြင်းမရှိကြောင်း စစ်ဆေးတွေ့ရှိရပြီး ဆိုင်ရှင်များအား သင့်တင့်မျှတသော ဈေးနှုန်းဖြင့်သာ ရောင်းချရန် အသိပေးပြောကြားခဲ့ကြောင်းသိရှိရပါသည်။

DOCA(မွန်)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဦး၊ ဒုတိယဦးစီးမှူးပါ (၄)ဦးသည် ၂၁-၆-၂၀၂၄ ရက်နေ့တွင် လှိုင်သာယာ(အနောက်ပိုင်း) မြို့နယ်၊ အောင်မင်္ဂလာဈေးနှင့် ရေဥက္ကံဈေးသို့သွားရောက်၍ စားအုန်းဆီများကို အကန့်အသတ်ဖြင့်ရောင်းချနေပြီး လိုသလောက် ဝယ်မရသတင်းနှင့်စပ်လျဉ်း၍ ကွင်းဆင်းစစ်ဆေးခဲ့ပါသည်။

      ထိုသို့စစ်ဆေးခဲ့ရာတွင် အောင်မင်္ဂလာဈေးမှ ဈေးတာဝန်ခံ ဦးထွန်းထွန်းအေးပါ (၃)ဦးတို့ပူးပေါင်းပါဝင်လျက် ဈေးတွင်းရရှိသောစားအုန်းဆီများကို ဈေးအတွင်းကုန်မျိုးစုံဆိုင်(၉)ဆိုင်အား ခွဲဝေပေးခဲ့ပြီး ဈေးတွင်းရရှိသော ကုန်စုံဆိုင်များရှိ ဆိုင်တိုင်း၌ Venyl များလည်းချိတ်ဆွဲထားပြီး ရောင်းချရာတွင်လည်း သတ်မှတ်ဈေးနှုန်းအတိုင်းရောင်းချပေးပြီး ကပ်များဖြန့်ဝေပေးခြင်းဖြင့် လူတစ်ဦးလျှင် (၅၀)ကျပ်သားနှုန်းရောင်းချပေးလျက်ရှိကြောင်း၊ အလေးချိန်ကိုလည်း ပြည့်ဝစွာချင်တွယ်ပေးကြောင်း စစ်ဆေးတွေ့ရှိခဲ့ရပါသည်။

DOCA(ရန်ကုန်)

     ရှမ်းပြည်နယ် (အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် ၂၀၂၄ခုနှစ်၊ ဇွန်လ(၂၁)ရက်နေ့၊ နေ့လယ် (၁၅:၀၀) နာရီအချိန်တွင်မြန်မာနိုင်ငံရဲတပ်ဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်စည်ပင်သာယာရေးဦးစီးဌာန၊ ကျန်းမာရေးဌာန၊ မြို့နယ်အထွေထွေအုပ်ချုပ်ရေးဦးစီးဌာတို့နှင့်ပူးပေါင်း၍ ကျိုင်းတုံမြို့၊ ရပ်ကွက်(၄)၊ အခွန်လွတ်ဈေး (အာခါဈေး) အတွင်းရှိ ကုန်စုံဆိုင်များတွင် ရောင်းချနေသောစာသုံးဆီများအား ကုန်ညွှန်အမှတ်အသားနှင့်ပတ်သက်၍ ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ခဲ့ပါသည်။

      ထိုသို့ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ရာတွင် စစ်ဆေးရေးမှူးနှင့် ဌာနဆိုင်ရာဝန်ထမ်းများသည် စားသုံးဆီအရောင်းဆိုင်ရှင်များအား ကုန်အညွှန်းအမှတ်အသား နှင့်ပြည့်စုံသော စားသောက်ကုန်များကိုသာဖြန့်ဖြူးရောင်းချရန်၊ အစားအသောက်နှင့်ဆေးဝါးကွပ်ကဲရေးဦးစီးဌာနမှတားမြစ်ထားသော ကုန်စည်များကိုရောင်းချခြင်းမပြုရန်နှင့် စားသုံးသူကာကွယ်ရေးဥပဒေ အခန်း (၁၈)ပါ “ကုန်အညွှန်းအမှတ်အသားဖော်ပြခြင်း”နှင့် အခန်း(၁၀)ပါ “စီးပွားရေးလုပ်ငန်းရှင်၏တာဝန်များ” ကိုသိရှိလိုက်နာဆောင်ရွက်စေရန် အသိပညာပေးဆွေးနွေး ခြင်းများဆောင်ရွက်ခဲ့ကြောင်းသိရှိရပါသည်။

DOCA(ရှမ်း)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ် တာဝန်ခံ သည် မိတ်ဖက်ဌာနများ ပူးပေါင်း၍ ကျောင်းများဖွင့်လှစ်နေပြီ ဖြစ်သည့်အတွက် ကျောင်းနေအရွယ် ကျောင်းသား၊ ကျောင်းသူများ ကျန်းမာရေး ဗဟုသုတရရှိစေရန်နှင့် ဘေးအန္တရာယ်ကင်းသော အစားအသောက်များ စားသောက်နိုင်ရေး အသိပညာပေးဟောပြောခဲ့ပါသည်။

   (၂၀.၆.၂၀၂၄)ရက်နေ့၊ နံနက်(၀၉:၃၀)အချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီး ဌာန၊ အားကစားနှင့်ကာယပညာဦးစီးဌာန၊ စားသုံးသူရေးရာဦးစီးဌာနတို့ ပူးပေါင်းကာ မင်းဘူးမြို့ ကျောက်တန်း အလယ်တန်းကျောင်းတွင် ကျောင်းသူ၊ ကျောင်းသား(၁၂၅)ဦး၊ ဆရာ၊ ဆရာမ(၂)ဦး အားလည်းကောင်း၊ (၂၁.၆.၂၀၂၄)ရက်နေ့၊ နံနက်(၀၉:၀၀)နာရီတွင် သီရိမင်္ဂလာ မူလတန်းကျောင်း တွင် ကျောင်းသား၊ ကျောင်းသူ(၁၀၂)ဦး၊ ဆရာ၊ ဆရာမ(၄)ဦးနှင့် နေ့လယ်(၁၁:၃၀)နာရီတွင် မြောက်ရပ် မူလတန်းကျောင်း၌ ကျောင်းသား၊ ကျောင်းသူ(၁၁၂)ဦး၊ ဆရာ၊ ဆရာမ (၄)ဦးတို့အား ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးမှူးမှ စာဖတ်ခြင်း၏ အကျိုးကျေးဇူးများ၊ အားကစား နှင့်ကာယပညာဦးစီးမှူးမှ အားကစားသိပ္ပံအကြောင်း၊ စားသုံးသူရေးရာဦးစီးဌာန မြို့နယ်တာဝန်ခံမှ စားသုံးသူကာကွယ်ရေးဥပဒေပြဌာန်းချက်များမှ စားသုံးသူအခွင့်အရေးနှင့်တာဝန်များ၊ အခန်း(၁၈) ပါ ကုန်အညွှန်းအမှတ်အသားဆိုင်ရာ ကုန်စည် အမျိုးအစားအလိုက်သိသာထင်ရှားစွာ ဖော်ပြရမည့် သတ်မှတ်ချက်(၈)ချက်နှင့်ပြစ်မှုပြစ်ဒဏ်များ၊ စားသုံးသူနှင့်လုပ်ငန်းရှင်ကြား ပြဿနာတစ်စုံတရာ ဖြစ်ပေါ်လာပါက တိုင်ကြားနိုင်သော နေရာများ စသည့်အချက်များအား အသိပညာပေးဟော ပြောခဲ့ကြောင်း သိရှိရပါသည်။

DOCA(မကွေး)

    ၂၀၂၄ ခုနှစ်၊ ဇွန်လ ၂၄ ရက်နေ့ နံနက်(၀၉း၀၀)နာရီအချိန်တွင် ရှမ်းပြည်နယ်(တောင်ပိုင်း) စားသုံးသူရေးရာဦးစီးဌာန၊ တောင်ကြီးခရိုင်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် မြို့နယ်စည်ပင်သာယာရေးဌာန၊ အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးမှူးဦးစီးဌာန၊ ပြည်နယ်ဆန်စပါးအသင်းတို့နှင့်ပူးပေါင်း၍ တောင်ကြီးမြို့ပေါ်ရှိဆန်ဆိုင်များ ဆန်ဈေးနှုန်းများ ဈေးနှုန်းမြှင့်တင်ရောင်းချခြင်း ရှိ/ မရှိ ကွင်းဆင်းစစ်ဆေးခဲ့ကြောင်းသိရှိရပါသည်။

       ထိုသို့ကွင်းဆင်းစစ်ဆေးဆောင်ရွက်ရာတွင် ဆန်ဆိုင်ပိုင်ရှင်များအား ဈေးကွက်အတွင်းဆန်များအား ဈေးနှုန်းမြှင့်တင်ရောင်းချမှုမရှိစေရေး၊ ဈေးကွက်လိုအပ်ချက်အပေါ်မူတည်၍ ဆန်များအား သိုလှောင်ပြီး ဈေးကစားမှုမပြုလုပ်ရန် ဆွေးနွေးပြောကြားခဲ့ပါသည်။  မြန်မာနိုင်ငံဆန်စပါးအသင်းချုပ်မှ ၂၀၂၄ ခုနှစ်၊ ဇွန်လအတွက် ထုတ်ပြန်ထားသော ဆန်တစ်အိတ်ဈေးနှုန်းများအနေဖြင့် ဧည်မထအုပ်စု ၇၀၀၀၀ ကျပ်မှ ၇၈၀၀၀ ကျပ်၊  အထူးဧမထည့်အုပ်စု 85000 ကျပ်မှ  90000 ကျပ်၊ ဧရာမင်း/ ဧရာပဒေသာ 95000 ကျပ်မှ 100000 ကျပ်၊ ဧရာဝတီပေါ်ဆန်း 110000 ကျပ်မှ 120000 ကျပ်၊ အခြားပေါ်ဆန်း 100000 ကျပ်မှ 110000 ကျပ်၊ ဧရာဝတီကားပျံ 120000 ကျပ်မှ 130000 ကျပ်၊ ရွှေဘိုပေါ်ဆန်း 135000 ကျပ်မှ 145000 ကျပ် ဖြစ်ပြီး သတ်မှတ်ထားသော ဈေးနှုန်းများထက် ဈေးနှုန်းမြှင့်တင်ရောင်းချခြင်းမပြုရေး၊ ဖြစ်သင့်ဖြစ်ထိုက်သည့် ဈေးနှုန်းအမြတ် ဖြင့်သာ ရောင်းချရန် ဆွေးနွေးပြောကြားပြီး ဆန်ဆိုင်များပုံမှန်ဈေးနှုန်းများဖြင့် ရောင်းချလျက်ရှိ ကြောင်း စစ်ဆေးတွေ့ရှိခဲ့ပါသည်။

DOCA(ရှမ်း)