သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည် မိတ်ဖက်ဌာနဆိုင်ရာများနှင့်ပူးပေါင်း၍ (၁-၁၀-၂၀၂၄)ရက်နေ့၊ နေ့လယ်(၁၄:၀၀)နာရီအချိန်တွင် ဟင်္သာတမြို့၊ နတ်မော်လမ်းရှိ အမှတ်(၅)၊ အခြေခံပညာအထက်တန်းကျောင်း၌ ဆရာ/ ဆရာမနှင့် ကျောင်းသား/ ကျောင်းသူ ၃၁၀ဦးအား စားသုံးသူကာကွယ်ရေးအသိပညာပေးဟောပြောခြင်းဆောင်ရွက်ခဲ့ပါသည်။

          အဆိုပါဟောပြောပွဲတွင် မြို့နယ်ဦးစီးမှူး ဦးမိုးကျော်က စားသုံးသူကာကွယ်ရေးဥပဒေကို ၂၀၁၉ခုနှစ်၊ မတ်လ(၁၅) ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဋ္ဌာန်းခဲ့ကြောင်း၊ စားသုံးသူစကားရပ်၏ အဓိပ္ပါယ်ဖွင့်ဆိုချက်၊  စားသုံးသူအခွင့်အရေးနှင့် တာဝန်များအကြောင်း၊ အစားအသောက်နှင့် ကုန်စည်များပေါ်တွင်ဖော်ပြရမည့် ကုန်အညွှန်းအမှတ်အသားများအကြောင်း၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းများ၊ တားမြစ်ချက်များ၊ ပြစ်မှုပြစ်ဒဏ်များအကြောင်း၊ စားသုံးသူတို့အနေဖြင့် အသင့်စားမုန့်များဝယ်ယူစားသုံးရာတွင် ထုတ်လုပ်သည့်ရက်စွဲနှင့် သက်တမ်းကုန်ဆုံးရက်များကို အဓိကဖတ်ရှုရမည်ဖြစ်ကြောင်း၊ ဝယ်ယူအသုံးပြုခဲ့သော ကုန်စည်နှင့်ဝန်ဆောင်မှုများကြောင့် နစ်နာဆုံးရှုံးမှုများဖြစ်ပေါ်လာပါက ပြောဆိုတင်ပြတိုင်ကြားခွင့်နှင့် ပြန်လည်ကုစားနိုင်ခွင့်များအကြောင်းကို အကျယ်တဝင့်ရှင်းလင်းဆွေးနွေးဟောပြောခဲ့ပါသည်။

          ဟောပြောပွဲအပြီးတွင် မြို့နယ်တာဝန်ခံနှင့်အဖွဲ့သည် ကျောင်းမုန့်ဈေးတန်းကော်မတီဝင်များနှင့်အတူ ကျောင်းမုန့်ဈေးတန်းများရှိ ရောင်းချနေသောမုန့်များတွင် ကုန်အညွှန်းအမှတ်အသားပြည်စုံမှုရှိ/မရှိကို ကွင်းဆင်းစိစစ်ခဲ့ပြီး၊ ကုန်အညွှန်းအမှတ်အသားပြည့်စုံသော မုန့်များကိုသာရောင်းချရန် မုန့်ဈေးတန်းရောင်းချသူများအား မှာကြားခဲ့ကြောင်းသိရှိရပါသည်။

DOCA(ဧရာဝတီ)

    တနင်္သာရီတိုင်းဒေသကြီး၊  ထားဝယ်မြို့၊ အ.ထ.က(၃) ကျောင်း၌ ကျင်းပပြုလုပ်သည့် ၂၀၂၄-၂၀၂၅ ပညာသင်နှစ်၊ တက္ကသိုလ်ဝင်တန်းအထောက်အကူပြုစာအုပ်များအား Mandalay Media မှ ပေးအပ်လှူဒါန်းပွဲအား တနင်္သာရီတိုင်းဒေသကြီးဝန်ကြီးချုပ်၊ တိုင်းဒေသကြီးအစိုးရအဖွဲ့မှဝန်ကြီးများ၊ တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီးအဆင့်ဌာနဆိုင်ရာများနှင့်အတူ တိုင်းဒေသကြီးစားသုံးသူရေးရာဦးစီးဌာနမှ တက်ရောက်ခဲ့ပါသည်။

     အဆိုပါဟောပြောပွဲတွင် တနင်္သာရီတိုင်းဒေသကြီးဝန်ကြီးချုပ်မှ အဖွင့်အမှာစကားပြော ကြားခဲ့ပါသည်။ ထို့နောက် Mandalay Media မှ ပါမောက္ခ ဒေါက်တာသန့်ဇင်က တက္ကသိုလ်ဝင်တန်းအထောက်အကူပြုစာအုပ်များအကြောင်း ရှင်းလင်းပြောကြားခဲ့ပြီးနောက် Mandalay Media မှတာဝန်ရှိသူ ဦးကျော်ဇေယျက စာမူများအား မည်သို့ပြုလုပ်ခဲ့ရကြောင်း ပြောကြားခဲ့ပါသည်။ ထို့နောက် တနင်္သာရီတိုင်းဒေသကြီးဝန်ကြီးချုပ်မှ Mandalay Media မှ တာဝန်ရှိသူများအား ဂုဏ်ပြုမှတ်တမ်းများပေးအပ်ခဲ့ပြီး  အခမ်းအနားပြီးမြောက်ကြောင်း သတင်းရရရှိပါသည်။

DOCA(တနင်္သာရီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ဦးစီးမှူးရုံးမှ မြို့နယ်တာဝန်ခံများသည်  စားသုံးသူများ အသုံးပြုလျက်ရှိသည့် ကုန်စည်များဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေး၊ စားသုံးသူကာကွယ်ရေးဥပဒေပါ ပြဋ္ဌာန်းချက်များနှင့် ကိုက်ညီမှုရှိစေရေးအတွက် သက်ဆိုင်ရာမြို့နယ်အလိုက် ဈေးကွက်စောင့်ကြည့် စစ်ဆေးခြင်းများပြုလုပ်လျက်ရှိရာ စက်တင်ဘာလအတွင်း ပျဉ်းမနားမြို့နယ်၊ အခြေခံပညာအထက် တန်းကျောင်း၊ အ-ထ-က(၅)(ကန်နား)ကျောင်းနှင့် အခြေခံပညာအလယ်တန်းကျောင်း၊ အ-လ-က(မင်္ဂလာကျောင်း)များရှိ ကျောင်းမုန့်ဈေးတန်းကိုလည်းကောင်း၊ ပုဗ္ဗသီရိမြို့နယ်ဈေးအတွင်းရှိ ကုန်စုံဆိုင်များတွင်လည်းကောင်း၊ ဒက္ခိဏသီရိမြို့နယ်‌ဈေးအတွင်းရှိ ကုန်စုံဆိုင်များကိုလည်းကောင်း၊ ပျဉ်းမနားမြို့မဈေးအတွင်းရှိ ကလေးအသုံးအဆောင်ပစ္စည်းဆိုင်များကိုလည်းကောင်း၊ ပျဉ်းမနား မြို့နယ်၊ ယုဇနဈေးအတွင်းရှိ ကုန်စုံဆိုင်များကိုလည်းကောင်း သွားရောက်၍ အသင့်စား စားသောက်ကုန်များ၊ အချိုရည်များ၊ မုန့်မျိုးစုံများ၊ စားသုံးဆီများ၊ ကလေးအသုံးအဆောင်ပစ္စည်းအမျိုးမျိုးတို့တွင် ကုန်ပစ္စည်းများ ဘေးအန္တရာယ်ကင်းရှင်းမှုရှိ/ မရှိ၊ ကုန်အညွှန်းအမှတ်အသားပြည့်စုံစွာ ဖော်ပြထားခြင်းရှိ/ မရှိ၊ သက်တမ်းလွန်သောစားသောက်ကုန်များ ရောင်းချနေမှုရှိ/ မရှိ၊ တားမြစ်ထားသော ကုန်ပစ္စည်းများရောင်းချမှုရှိ/ မရှိ ဈေးကွက်စောင့်ကြည့်စစ်ဆေးခြင်းကို စက်တင်ဘာလအတွင်း (7)ကြိမ် ဆောင်ရွက်ခဲ့ပါကြောင်းနှင့် တစ်နှစ်စာအတွင်း ဦးစားပေးဆောင်ရွက်ရန် လျာထားသည့် ကုန်စည်(၁၀)မျိုးအနက် စက်တင်ဘာလအတွင်း ဦးစားပေးဆောင်ရွက်ရန်လျာထားသည့် ကုန်စည်များအား ဈေးကွက်စောင့်ကြည့် စစ်ဆေးခဲ့ခြင်းဖြစ်ပါကြောင်း သိရှိခဲ့ရပါသည်။

     ပြည်ထောင်စုနယ်မြေ၊ နေပြည်တော်(၈)မြို့နယ်အတွင်းရှိ ဈေးများ၊ ရပ်ကွက်ကုန်စုံဆိုင်များ၊ ဆေးဆိုင်များ၌ ဝမ်းရောဂါနှင့်ပတ်သက်သည့်ဆေးဝါးများ၊ အားဆေး၊ အရိုးဆေး၊ သွေးကျဆေး၊ အသည်းဆေး၊ အာရုံကြောဆေး၊ အကိုက်အခဲပျောက်ဆေး၊ သွေးကျဲဆေး၊ လေဆေးစသည့် ဆေးအုပ်စုများ၊ အခြေခံစားကုန်(၂၃)မျိုးတို့အား ဆေးပစ္စည်းများပြတ်လပ်မှုရှိ/ မရှိ၊ ဈေးနှုန်းမြင့်တက်ခြင်း ရှိ/မရှိနှင့် ဆန်အမျိုးမျိုးအား စားသုံးသူရေးရာဦးစီးဌာနမှ သတ်မှတ်ထားသည့် ရည်ညွှန်းဈေးအတိုင်း ရောင်းချဖြန့်ဖြူးခြင်းရှိ/ မရှိတို့ကို စက်တင်ဘာလအတွင်း   အထူးဈေးကွက်စောင့်ကြည့်စစ်ဆေးခြင်း အနေဖြင့်  (၆၉)ကြိမ်ဆောင်ရွက်နိုင်ခဲ့ပါကြောင်း သိရှိခဲ့ရပါသည်။

DOCA(ပြည်ထောင်စုနယ်မြေ)

     မကွေတိုင်းဒေသကြီး၊ မကွေးခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းသည် (၂.၁၀.၂၀၂၄) ရက်နေ့၊ နံနက် (၀၈:၀၀)နာရီအချိန်တွင် မကွေးမြို့၊ ရန်ကင်းစျေးတွင် အစားအသောက်နှင့် ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့တို့နှင့် ပူးပေါင်းပြီး စျေးကွက်အတွင်းရှိ စားသောက်ကုန်များအား စားသုံးရန်သင့်/မသင့် ဓါတ်ခွဲစမ်းသပ်ရန် ကုန်စည်နမူနာဝယ်ယူခြင်းနှင့် စျေးကွက်အတွင်းရှိ ကုန်စည်များ၌ ကုန်အညွှန်းအမှတ်အသားဆိုင်ရာ သတ်မှတ်ချက်များ ပါဝင်မှုရှိ/မရှိ စျေးကွက်စောင့်ကြည့်စစ်ဆေးခဲ့ကြောင်း သိရသည်။

     မကွေးမြို့၊ ရန်ကင်းစျေး၌ ရောင်းချလျှက်ရှိသော အမဲသွေး၊ ပဲသွေး၊ ရှောက်ချဉ်၊ ပဲတီချဉ်၊ မုန့်ဖက်၊ မျှစ်၊ (S)ပဲပြား၊ (K) ပဲပြားတို့အား နမူနာဝယ်ယူခဲ့ပြီး စားသုံးသူများဘေးအန္တရာယ်ကင်းရှင်းစေ ရေးအတွက် ခွင့်မပြုတာရှည်ခံဆေး၊ ခွင့်မပြုချွတ်ဆေးနှင့် ခွင့်မပြုဆိုးဆေးများ သုံးစွဲထားခြင်းရှိ/မရှိအား အစားအသောက်နှင့်ဆေးဝါးကွပ်ကဲရေးဦးစီးဌာနပိုင် ဓါတ်ခွဲခန်းသို့ ယူဆောင်စစ်ဆေးပြီး ခွင့်မပြုတာ ရှည်ခံဆေး၊ ခွင့်မပြုချွတ်ဆေးနှင့် ခွင့်မပြုဆိုးဆေးများ သုံးစွဲထားကြောင်း စစ်ဆေးတွေ့ရှိပါက ထုတ်လုပ်ရောင်းချသူ ကုန်စည်ပိုင်ရှင်များအား အရေးယူဆောင်ရွက်သွားမည်ဖြစ်ကြောင်းနှင့် စျေးကွက်အတွင်းရှိ ကုန်စည်များ၌ ကုန်အညွှန်းအမှတ်အသားဆိုင်ရာ သတ်မှတ်ချက်များ ပြည့်စုံစွာမပါဝင်သော ကုန်စည်များရောင်းချမှုမရှိကြောင်း သိရှိရပါသည်။

DOCA(မကွေး)

     ၂၀၂၄ ခုနှစ်၊ အောက်တိုဘာလ (၁)ရက်နေ့တွင် မြန်မာနိုင်ငံတစ်နိုင်ငံလုံးတွင် လူဦးရေနှင့် အိမ်အကြောင်းအရာ သန်းခေါင်စာရင်းကောက်ယူလျက်ရှိရာ မွန်ပြည်နယ်၊ ဘီးလင်းမြို့နယ်တွင် ၂.၁၀.၂၀၂၄ ရက်နေ့တွင် ဘီးလင်းမြို့နယ်သန်းခေါင်စာရင်းကော်မတီဥက္ကဌ၊ မြို့နယ်အုပ်ချုပ်ရေးမှူးဦးစည်သူအောင်၊ စီမံအဖွဲ့ဝင်(၁) ဗိုလ်မှူးနေယူအောင်၊ မြို့နယ်ရဲတပ်ဖွဲ့မှူး ရဲမှူးမင်းတင်၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ မြို့နယ်ဦးစီးမှူး ဦးခင်မောင်နှင့်တာဝန်ရှိသူအသီးသီးတို့က လိုက်လံကြည့်ရှုအားပေးခဲ့ကြသည်။

     သန်းခေါင်စာရင်းကောက်ယူရာတွင် ဘီးလင်းမြို့၊ ကန်သာယာရပ်ကွက်၊ ဘိုးလှကြီးရပ်ကွက်၊ ဆရာစံရပ်ကွက်အတွင်းရှိ သန်းခေါင်စာရင်းကောက်ကွက် ၂၇ ကွက်တို့၌ စာရင်းကောက်သူတို့က လူဦးရေနှင့်အိမ်အကြောင်းအရာစာရင်းများ တိကျမှန်ကန်စွာ ရရှိရေးအတွက် အိမ်ထောင်စုအသီးသီးတို့၏ လူဦးရေဆိုင်ရာ အချက်အလက်များ၊ အိမ်အကြောင်းအရာများ စနစ်တကျမေးမြန်းနေမှုများကို မြို့နယ်သန်းခေါင်စာရင်းကော်မတီ ဥက္ကဌ ဦးစည်သူအောင်နှင့်တာဝန်ရှိသူတို့က တစ်အိမ်တက်ဆင်း လိုက်လံကြည့်ရှုအားပေးကာ လိုအပ်သည်တို့ကို ပံ့ပိုးကူညီပေးခဲ့ကြသည်။

     ဘီးလင်းမြို့နယ်တွင် ရပ်ကွက်/ကျေးရွာ အသီးသီးတို့၌ သန်းခေါင်စာရင်းကောက်ကွက်ပေါင်း (၂၀၅)ကွက်ရှိပြီး မြို့နယ်သန်းခေါင်စာရင်း ကော်မတီ၏ကြီးကြပ်မှုဖြင့် ၂၀၂၄ ခုနှစ်၊ လူဦးရေနှင့်အိမ်အကြောင်းအရာ သန်းခေါင်စာရင်းကောက်ယူခြင်း လုပ်ငန်းများကို စာရင်းစစ်၊ စာရင်းကောက် (၁၃၇) ဦးတို့မှ လိုက်လံဆောင်ရွက်လျက်ရှိကြောင်း သိရှိရပါသည်။

DOCA(မွန်)