သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မြန်အောင်မြို့နယ်တာဝန်ခံသည် မိတ်ဖက်ဌာနဆိုင်ရာများနှင့်ပူးပေါင်း၍ ၂၀၂၄ခုနှစ်၊ အောက်တိုဘာလ(၂၂) ရက်နေ့၊ နံနက်(၁၀:၀၀) နာရီအချိန်တွင် မြန်အောင်မြို့၊ အမှတ်(၃)ရပ်ကွက်၊ ပရိက္ခရာလမ်းရှိ“ကြံခင်းမုန့်တိုက်” သို့ SMEs လုပ်ငန်းဖွံ့ဖြိုးတိုးတက်စေရေး သွားရောက်ကွင်းဆင်းစစ်ဆေးခြင်းများဆောင်ရွက်ခဲ့ ပါသည်။

    ထိုသို့ကွင်းဆင်းစစ်ဆေးရာတွင် “ ကြံခင်းမုန့်တိုက်”မှထုတ်လုပ်သော မုန့်မျိုးစုံတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပြည့်စုံစွာဖော်ပြထားမှုရှိ/ မရှိ၊ သက်ဆိုင်ရာ ဌာနများ၏ထောက်ခံချက်များရှိ/မရှိတို့ကိုစစ်ဆေးခဲ့ပြီး၊ လုပ်ငန်းရှင်များအနေဖြင့် စားသုံးသူများဘေးအန္တရာယ်ကင်းရှင်းစေရေးတို့ကို အလေးထားဆောင်ရွက်ရန်၊ ကုန်ကြမ်းများကို စနစ်တကျသိုလှောင်ထားရှိစေရေး၊ ထုတ်လုပ်သောကုန်စည်များ အရည်အသွေးပြည့်မီစေရေး၊ ဈေးနှုန်းဈေးကွက်အခြေအနေများနှင့် ထုပ်ပိုးမှုစနစ်များလုံခြုံစိတ်ချရမှုရှိစေရေး၊ လုပ်သားအင်အား၊ ဖြန့်ဖြူးမှုအခြေအနေများကိုဆွေးနွေးခဲ့ပြီး၊ လုပ်ငန်းရှင်ဘက်မှလည်း စားသုံးသူများဘေးအန္တရာယ်ကင်းရှင်းစွာစားသုံးနိုင်ရေး ဦးစားပေးဆောင်ရွက်လျက်ရှိကြောင်းသိရှိရပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည် (၂၂-၁၀-၂၀၂၄)ရက်နေ့၊ နေ့လယ် (၁၃:၀၀) နာရီအချိန်တွင် ကြံခင်းမြို့နယ်၊ မြို့မရပ်ကွက်ရှိ မြို့နယ်ထွေအုပ်ရုံး၊ အစည်းအဝေးခန်းမ၌ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးသိန်းတန်၊ ဒု-မြို့နယ်စီမံအုပ်ချုပ်ရေးမှူးနှင့် အဖွဲ့ဝင်(၂)၊ ဆန်စက်လုပ်ငန်းရှင်၊ ဆန်/စပါးကုန်သည်များနှင့်တွေ့ဆုံ၍ ဆန်/ စပါးကုန်သည်များအသင်းဖွဲ့စည်းခြင်းနှင့်စပ်လျဉ်း၍ တွေ့ဆုံဆွေးနွေးခြင်းဆောင်ရွက်ခဲ့ပါသည်။

         ထိုသို့ဆွေးနွေးရာတွင် ကြံခင်းမြို့နယ်တာဝန်ခံ ဦးကျော်နိုင်ဝင်းက ဆန်/စ ပါးကုန်သည်အသင်းဖွဲ့စည်းနိုင်ရေးကိစ္စရပ်များကိုဆွေးနွေးခြင်း၊ အသင်းဖွဲ့စည်းမည့် အခြေအနေကိစ္စရပ်များကိုညှိနှိုင်းခြင်း၊ ဆန်စပါးဆိုင်ရာမူဝါဒ၊ စည်းမျဉ်းစည်းကမ်း၊ ဥပဒေများအား လိုက်နာရန်လိုအပ်ကြောင်း၊ ဆန်စပါးပြည်ပပို့ကုန်လုပ်ငန်းသည် အလွန်အရေးပါသည့် ကဏ္ဏဖြစ်လာမည်ဖြစ်၍ မြို့နယ်ဆန်စပါးကုန်သည်အသင်းဖွဲ့စည်းနိုင်ရန်လိုအပ်ကြောင်း၊ လုပ်ငန်းအမှန်တကယ် လုပ်ကိုင်ဆောင်ရွက်နိုင်သူများကို ရွေးချယ်တင်မြှောက်ပြီး လက်ရှိဆန်စပါးစျေးကွက်အခြေအနေ တည်ငြိမ်စေရေး၊ ဖွံ့ဖြိုးတိုးတက်စေရေး ပူးပေါင်းဆောင်ရွက်ရန်ဖြစ်ကြောင်း ရှင်းလင်းဆွေးနွေးခဲ့ပါသည်။ ဆန်စက်လုပ်ငန်းရှင်နှင့် ဆန်/ စပါးကုန်သည် (၁၆)ဦးတက်ရောက်ခဲ့ပြီး အသင်းဝင် (၉)ဦးဖြင့် ဆန်/ စပါးကုန်သည်အသင်းအား ဖွဲ့စည်းဆောင်ရွက်ပြီးကြောင်းသိရှိရပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည်နှင့်ဝန်ဆောင်မှုများ အသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှု ရှိစေရေးအတွက် အစဉ်ဆောင်ရွက်လျက်ရှိပါသည်။ စားသုံးသူများအတွက် လုံခြုံစိတ်ချရမှုမရှိသောကုန်စည်များ၊ စားသုံးသူကာကွယ်ရေး ဥပဒေ (၂၀၁၉)၊ အခန်း(၁၈) ပုဒ်မ ၄၁ ပါ ကုန်အညွှန်းအမှတ်အသားများနှင့် ပြည့်စုံမှုမရှိသော ကုန်စည်များ ထုတ်လုပ်ဖြန့်ဖြူးခြင်း၊  ဈေးကွက်အတွင်း တင်သွင်းရောင်းချခြင်းမရှိစေရန်ရည်ရွယ်၍ မုံရွာခရိုင်ဦးစီးမှူးရုံးမှ  ခရိုင်ဦးစီးမှူးရုံးနှင့် ဝန်ထမ်း (၃) ဦးတို့သည် (၂၄.၁၀.၂၀၂၄) ရက်နေ့ နံနက် (၁၀:၀၀) နာရီအချိန်တွင် မုံရွာမြို့၊ ရတနာပုံရပ်ကွက်ရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များသို့ ဈေးကွက်စောင့်ကြည့် စစ်ဆေးခဲ့ကြောင်း သတင်းရရှိပါသည်။

   ထိုသို့ဆောင်ရွက်ရာတွင်မုံရွာမြို့၊ ရတနာပုံရပ်ကွက်ရှိ လူသုံးကုန်နှင့် စားသောက်ကုန်ပစ္စည်း အရောင်းဆိုင်များတွင်  ကုန်အညွှန်းအမှတ်အသားနှင့် ပြည့်စုံမှုမရှိသော ကုန်စည်များ ရောင်းချနေခြင်းရှိ/မရှိ စစ်ဆေးခဲ့ကြပြီး ဆိုင်ပိုင်ရှင်များအား  စီးပွားရေးလုပ်ငန်းရှင်၏ တာဝန်များနှင့် ကုန်အညွှန်းအမှတ်အသား ပြည့်စုံမှုမရှိသော ကုန်စည်များအား တင်သွင်းရောင်းချခြင်း မပြုကြရန်ပြောကြားခဲ့ပြီး လက်ကမ်းစာစောင်များ ပေးဝေခဲ့ကြောင်း သတင်းရရှိပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူပြည်သူများ နေ့စဉ်အသုံးပြုလျက်ရှိသော ကုန်စည်နှင့်ဝန်ဆောင်မှုများ ဘေးအန္တရာယ် ကင်းရှင်းပြီး လုံခြုံစိတ်ချရမှုရှိစေရေး၊ နစ်နာဆုံးရှုံးမှုမရှိစေရေး၊ ကုန်စည်များကို သတ်မှတ်စံချိန်စံညွှန်းများ၊ ညွှန်ကြားချက်များ၊ စားသုံးသူကာကွယ်ရေးဥပဒေပါပြဌာန်းချက်များနှင့် ကိုက်ညီမှုရှိစေရေး၊ လိုက်နာဆောင်ရွက်နိုင်မှုရှိစေရေးတို့အတွက် ဈေးကွက်စောင့်ကြည့်ခြင်းများ၊  စစ်ဆေးခြင်းများကို အစဉ်တစိုက် ဆောင်ရွက်လျက်ရှိပါသည်။

   ထိုသို့ဆောင်ရွက်လျက်ရှိရာ (၂၂.၁၀.၂၀၂၄)ရက်နေ့၊ နံနက်ပိုင်း၌ စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံးမှ ဝန်ထမ်းများသည် သက်ဆိုင်ရာဌာန ပူးပေါင်းအဖွဲ့များနှင့်အတူ မြင်းခြံမြို့၊ အေးမြသီတာဈေးအတွင်းအပြင်ရှိ ကုန်စုံဆိုင်များ၌ ရောင်းချလျက်ရှိသော ကုန်ပစ္စည်းတွင် အမေရိကန်နိုင်ငံ၊ စိုက်ပျိုးရေးဝန်ကြီးဌာနက လူထုကျန်းမာရေးဆိုင်ရာ သတိပေးထုတ်ပြန်ခဲ့သည့် အဖွားလက်ရာအမှတ်တံဆိပ်ပါ အသားဟင်း၊ ငါးဟင်းစည်သွပ်ဗူးများမှာ ရိုက်နှိပ်ထားသော အညွှန်းဖော်ပြချက်များနှင့် စတစ်ကာကပ်၍ ဖော်ပြထားသည့် အညွှန်းဖော်ပြချက်များသည် တူညီမှုမရှိဘဲ ကွဲလွဲမှုများဖြစ်ပေါ်လျက်ရှိသဖြင့် အဆိုပါကွဲလွဲမှုကြောင့် စားသုံးသူများ နားလည်မှုလွဲမှားစေနိုင်သည့်အတွက် အဆိုပါကုန်ပစ္စည်းများ ဈေးကွက်အတွင်း ရောင်းချမှုရှိ/မရှိနှင့် ကုန်အညွှန်းအမှတ်အသားများကွဲလွဲမှုရှိ/မရှိတို့အား ကွင်းဆင်းစစ်ဆေးခဲ့ရာ အဖွားလက်ရာ အမှတ်တံဆိပ်ပါ အသားဟင်း၊ ငါးဟင်းစည်သွပ်ဗူးများ ရောင်းချခြင်းမရှိသည်ကို စစ်ဆေးတွေ့ရှိ ရပြီး၊ အခြားအမှတ်တံဆိပ်ဖြစ်သည့် A1 ၊ Golden ၊   Hi-Q စသည့်ငါးသေတ္တာဗူးများကိုသာ ရောင်းချမှုရှိကြောင်းနှင့် ၎င်းအမှတ်တံဆိပ်များသည် ကုန်အညွှန်းအမှတ်အသားများ ပြည့်စုံစွာ ပါဝင်ကြောင်း စိစစ်တွေ့ရှိရပါသည်။ ကုန်ပစ္စည်းရောင်းချသူ လုပ်ငန်းရှင်များအနေဖြင့် စားသုံးသူ ပြည်သူများအား ဘေးအန္တရာယ်ကင်းရှင်းစေဖို့အတွက် သက်ဆိုင်ရာဌာနများမှ သတ်မှတ်ထုတ်ပြန်ထားသော ညွှန်ကြားချက်များ၊ ဥပဒေများနှင့် အညီထုတ်လုပ်ထားသော ကုန်ပစ္စည်းများကိုသာ ထုတ်လုပ်ရောင်းချရန်၊ သက်တမ်းလွန်ကုန်ပစ္စည်းများရောင်းချမှုမပြုရန်၊ ဥပဒေပါပြဌာန်းချက်များ၊ ညွှန်ကြားချက်များကိုလိုက်နာမှုမရှိဘဲ ဖောက်ဖျက်ကျူးလွန်ပါက သက်ဆိုင်ရာ ဥပဒေများနှင့်အညီ အရေးယူခံရနိုင်သည့် ပြစ်မှုပြစ်ဒဏ်များ၊ ကုန်အညွှန်းအမှတ်အသားများနှင့် ပတ်သက်၍ အသိပညာပေးကာ ဈေးကွက်စောင့်ကြည့်စစ်ဆေးခြင်းများကို ဆောင်ရွက်ခဲ့ပါ သည်။

DOCA(မန္တလေး)

        ကျုံပျော်မြို့နယ်၊ စားသုံးသူရေးရာဦးစီးဌာနတွင် ၂၀၂၄ခုနှစ်၊ အောက်တိုဘာလ ၁၅ရက်နေ့၊ နေ့လယ် (၁၂:၀၀) နာရီအချိန်၌ ကျုံပျော်မြို့နယ်၊ ရေကြည်မြို့နယ်၊ ကျောင်းကုန်းမြို့နယ်များမှ ဆန်စပါးလုပ်ငန်းလုပ်ကိုင်ဆောင်ရွက်သူ လုပ်ငန်းရှင် (၁၉) ဦးဖြင့် ကျုံပျော်ခရိုင်၊ ဆန်စပါးလုပ်ငန်းရှင်အသင်းဖွဲ့စည်းခဲ့ပါသည်။ အဆိုပါအသင်းဖွဲ့စည်းရေးအတွက် စားသုံးသူရေးရာဦးစီးဌာန၊ ဧရာဝတီတိုင်းဒေသကြီးဦးစီးမှူးနှင့် ကျုံပျော်ခရိုင်ဦးစီးမှူးတို့ အသင်းအဖွဲ့စည်းမျဉ်းစည်းကမ်းများနှင့် ဖွဲ့စည်းဆောင်ရွက်ပေးကြောင်းသိရှိရပါသည်။

DOCA(ဧရာဝတီ)