သတင်းနှင့် လှုပ်ရှားမှုများ

           နတ်တလင်းခရိုင်၊ ပေါင်းတည်မြို့နယ် စားသုံးသူရေးရာဦးစီးဌာန မြို့နယ်တာဝန်ခံနှင့် ဝန်ထမ်းများသည်  (၉.၁၀.၂၀၂၄)ရက်နေ့ နေ့လယ် (၁၃:၀၀) နာရီအချိန်တွင် မြို့နယ်စည်ပင်သာယာရေးအဖွဲ့၊ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ မြို့နယ်တိုင်းရင်းဆေးဦးစီးဌာနတို့ပူးပေါင်း၍  ပေါင်းတည်မြို့နယ်အတွင်းရှိ ကုန်မျိုးစုံဆိုင်များနှင့် ဆေးဝါးရောင်းချနေသော ဆေးဆိုင်များသို့ ဈေးကွက်စောင့်ကြည့်စစ်ဆေးခြင်းလုပ်ငန်းများကို ဆောင်ရွက်ခဲ့ပါသည်။

          ထိုသို့ကွင်းဆင်းစစ်‌ဆေးရာ၌ ဆီသွပ်ဗူးများတွင် ကုန်ညွှန်းအမှတ်အသားများ ပြည့်စုံစွာမှန်ကန်စွာ ပါဝင်ခြင်းရှိ/ မရှိ ကြည့်ရှုစစ်ဆေးခဲ့ပြီး ကုန်ညွှန်းအမှတ်အသား ပြည့်စုံစွာပါဝင်ခြင်းမရှိပါက ရောင်းချခြင်းမပြုရန်နှင့် ဆေးဝါးရောင်းချသည့်ဆေးဆိုင်များတွင် တရားမဝင်ဆေးဝါးများ ရောင်းချခြင်းမပြုရန်၊ သက်တမ်းလွန်ဆေးဝါးများ ရောင်းချခြင်းရှိ/ မရှိ၊ တိုင်းရင်းဆေးဝါးများတွင် မှတ်ပုံတင်ထားခြင်းရှိ/ မရှိ တို့ကိုစစ်ဆေးဆောင်ရွက်ခဲ့ကြောင်းသိရှိရပါသည်။

DOCA(ပဲခူး)

     မွန်ပြည်နယ်၊ ကျိုက်ထိုမြို့နယ်၊ စားသုံးသူရေးရာဦးစီးဌာနမှ ဦးစီးအရာရှိ ဦးအောင်ကျော်မင်းနှင့် ကျိုက်ထိုမြို့နယ်တာဝန်ခံတို့သည် ကျိုက်ထိုမြို့နယ် အခြေခံပညာ အလယ်တန်းကျောင်း(ခွဲ)ခလွန်ကျောင်းတွင် (၂၅.၁၀.၂၀၂၄) ရက်နေ့၌ စားသုံးသူကာကွယ်ရေးအသိပညာပေး ဟောပြောပွဲကျင်းပပြုလုပ်ခဲ့ကြပါသည်။

    အသိပညာပေးဟောပြောပွဲတွင် ကျောင်းအုပ်ဆရာမကြီး ဒေါ်စုနန္ဒာဦးမှ အဖွင့်အမှာစကားပြောကြားပြီး စားသုံးသူရေးရာဦးစီးဌာနမှ  ဦးစီးအရာရှိ ဦးအောင်ကျော်မင်းမှ စားသုံးသူ၏ အခွင့်အရေးနှင့် တာဝန်အကြောင်း၊ စားသုံးသူနစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်သည့်နည်းလမ်းများအကြောင်း၊ ကုန်အညွှန်းအမှတ်အသား ပြည့်စုံမှန်ကန် သောကုန်စည်များကိုသာ ယုံကြည်စိတ်ချစွာရွေးချယ်ဝယ်ယူတတ်စေရန် အကျယ်တဝင့် ဟောပြောဆွေးနွေးခဲ့ကြပါသည်။

    အဆိုပါ အသိပညာပေးဟောပြောပွဲသို့ ဆရာ/ဆရာမ (၆) ဦး၊ ကျောင်းသား/သူ (၈၀) ဦး တက်ရောက်ခဲ့ပြီး စားသုံးသူရေးရာဦးစီးဌာန ကျိုက်ထိုမြို့နယ်တာဝန်ခံဦးဇော်ဦးမှ ကျောင်းဆရာမတစ်ဦးအား လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မွန်)

    ၂၅.၁၀.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် မော်လမြိုင်မြို့၊ ခရွမ်းရှမ်းရွာရှိ “ကိုး” အအေးခန်းစက်ရုံလုပ်ငန်းရှင်နှင့် တွေ့ဆုံဆွေးနွေးခဲ့သည်။

  ထိုသို့ တွေ့ဆုံဆွေးနွေးရာတွင် ပြည်နယ်ဦးစီးမှူးက လုပ်ငန်းရှင်အား အအေးခန်း အရေအတွက်၊ အအေးခန်း၌ကုန်သိုလှောင်ထားရှိမှု၊ လုပ်သားအင်အားအခြေအနေနှင့် ကြုံတွေ့ရသောအခက်အခဲများကို ဆွေးနွေးမေးမြန်းရာ လုပ်ငန်းရှင်က ၎င်းအနေဖြင့် အအေးခန်း (၈) ခန်းဖြင့် လည်ပတ်လျက်ရှိကြောင်း၊ အအေးခန်းတွင် ငရုတ်သီးခြောက်၊ ငါးခြောက်၊ မန်ကျည်းမှည့်၊ Freezer အခန်းတွင် ပင်လယ်စာများ သိုလှောင်ထားရှိကြောင်း၊ ငါးခြောက်သိုလှောင်သည့် ဖောက်သည်များမှာ‌ ရေး၊ သံဖြူဇရပ်နှင့် မော်လမြိုင်တို့မှ ဖြစ်ကြောင်း၊ ငါးခြောက်စပေါ်သည့်အချိန် အောက်တိုဘာလမှ မေလအတွင်း သိုလှောင်ထားကြပြီး မိုးတွင်းကာလတွင် ထုတ်ယူရောင်းချကြကြောင်း၊ ဝန်ဆောင်ခအနေဖြင့် တစ်နေ့လျှင် တစ်ပိဿာသိုလှောင်ခ (၆) ကျပ်နှုန်းဖြင့် ဝန်ဆောင်ခပေးလျှက်ရှိကြောင်း လုပ်သား (၁၅) ဦးကို အလုပ်အကိုင်ပေးထားနိုင်ကြောင်း၊ လျှပ်စစ်မီတာသုံးစွဲခမှာ တစ်လလျှင် (၃၅) သိန်းကျပ် ကုန်ကျပြီး လျှပ်စစ်မီးပြတ်တောက်မှုများရှိသဖြင့် ယခုအခါ Solar တပ်ဆင်ထားကြောင်း ပြန်လည်ဆွေးနွေးခဲ့ပါသည်။

DOCA(မွန်)

             စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏လမ်းညွှန်ချက်အရ စားသုံးသူများအားလုံးသည် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေးအတွက် ခရိုင်အတွင်းရှိ  ထုတ်လုပ်လျက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ်အသားများ ပြည့်စုံမှန်ကန်စွာဖေါ်ပြမှုရှိစေရေးရည်ရွယ်၍ ဆောင်ရွက်လျက်ရှိရာ ပြည်ခရိုင်အတွင်း ၂၀၂၄ ခုနှစ်၊ အောက်တိုဘာလ(၁)ရက်နေ့မှ(၁၅)ရက်နေ့အတွင်း ပြည်မြို့တွင် နဝဒေးရပ်ကွက်၊ နီလာလမ်းရှိ ဦးဖုန်းမြင့်အောင်၏ ဆန်မရွေးလုပ်ငန်းသို့လည်းကောင်း၊ ကျောင်းကြီးအိုးတန်းရပ်ကွက်ရှိ ဦးဘမောင်၏ပရဆေးဆိုင်သို့လည်းကောင်း၊ မြို့သစ်(၁၃)လမ်းရှိ ဦးဇေယျာဘုန်းမြင့်၏ စန်းကမ္ဘာဆန်ဆိုင်သို့လည်းကောင်း၊ မြို့သစ်(၃/ ၂)လမ်းထိပ်ရှိ ဦးဝင်းကျော်၏ ရွှေပိတောက်ဆန်ဆိုင်သို့လည်းကောင်း၊ မြို့သစ်(၃/၉)လမ်းရှိ ဦးဝေဖြိုးအောင်၏ နှင်းဥခင်ဆန်ဆိုင်သို့လည်းကောင်း၊  ရွှေတောင်မြို့တွင်မင်းရပ်တန်းလမ်း၊ ယွန်းတန်းရပ်ကွက်ရှိ ဦးကျော်ကျော်ဌေး၏ အောင်ချမ်းသာဆန်စက်သို့လည်းကောင်း၊ ယွန်းတန်းရပ်ကွက်၊ ပျော်ဘွယ်တန်းလမ်းရှိ ဦးကျော်ကျော်ဝင်း၏ ကေဝိုင်းဆီစက်သို့လည်းကောင်း သက်ဆိုင်ရာမြို့နယ်တာဝန်ခံနှင့် ဝန်ထမ်းများသည်သွားရောက်၍ မိမိတို့ ဖြန့်ဖြူးရောင်းချလျက်ရှိသော ကုန်စည်များတွင် အရည်အသွေး၊ အလေးချိန်၊ အချိန်အတွယ်၊ ပမာဏနှင့် အမျိုးအစားများ မှန်ကန်စွာဖြန့်ဖြူးရောင်းချမှုရှိစေရေး၊ စီးပွားရေးကျင့်ဝတ်၊ စည်းကမ်းနှင့် အညီ ထုတ်လုပ်ရောင်းချမှုရှိစေရေး၊ ကုန်စည်အလိုက်ဖေါ်ပြရမည့် ကုန်အညွှန်းအမှတ်အသားများ၊ ပြည့်စုံမှန်ကန်စွာဖေါ်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့် အတူ အရေးယူဆောင်ရွက်မှုများ ပြုလုပ်ဆောင်ရွက်သွားမည်ဖြစ်သည့် အတွက် စီးပွားရေးလုပ်ငန်းရှင်များအနေဖြင့် အထူးအလေးထားလိုက်နာဆောင်ရွက်ကြရန် ရှင်းလင်းဆွေးနွေးပြောကြားခဲ့ကြောင်း သတင်းရရှိပါသည်။

DOCA(ပဲခူး)

           စားသုံးသူပြည်သူများအား ထုတ်ကုန်လုံခြုံစိတ်ချရမှုရှိစေရေး ဘေးအန္တရာယ်ရှိသောကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖေါ်ပြထားမှုအခြေအနေတို့နှင့် စပ်လျဉ်း၍ သက်ဆိုင်ရာမိတ်ဖက်ဌာနများနှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်လျက်ရှိရာ ၂၀၂၄ ခုနှစ်၊ အောက်တိုဘာလ (၁)ရက်နေ့မှ (၁၅)ရက်နေ့အတွင်းတွင် ပြည်ခရိုင်၊ ပြည်မြို့တွင် မြို့ပေါ်ရပ်ကွက်ရှိ တိုင်းရင်းဆေးဆိုင်များသို့ တိုင်းရင်းဆေးအမျိုးမျိုးကိုလည်းကောင်း၊ ရွှေတောင်မြို့တွင် ကြာနီကန်ရပ်ကွက်ရှိ တိုင်းရင်းဆေးဆိုင်များသို့ တိုင်းရင်းဆေးအမျိုးမျိုးကိုလည်းကောင်း၊ ပန်းတောင်းမြို့တွင် မြို့ပေါ်ဆေးဆိုင်များသို့ တိုင်းရင်းဆေးအမျိုးမျိုးကိုလည်းကောင်း၊ ပန်းတောင်းဈေးရှိ ကုန်စုံဆိုင်များသို့ စားသုံးဆီအမျိုးမျိုးကိုလည်းကောင်း၊ ပေါက်ခေါင်းမြို့တွင် မြို့ပေါ်ရပ်ကွက်ရှိဆေးဆိုင်များသို့ တိုင်းရင်းဆေးအမျိုးမျိုးကိုလည်းကောင်း၊ မြို့မဈေးရှိကုန်စုံဆိုင်များသို့ စားသုံးဆီအမျိုးမျိုးကိုလည်းကောင်း သက်ဆိုင်ရာမြို့နယ်တာဝန်ခံနှင့် ဝန်ထမ်းများသည်သွားရောက်၍ ကုန်အညွှန်းအမှတ်အသားပါ သတ်မှတ်ချက်များနှင့် ကိုက်ညီမှုရှိသောကုန်စည်များကို တင်သွင်းရောင်းချခြင်းရှိ/ မရှိ၊ သက်ဆိုင်ရာဌာန၏ ထောက်ခံမှုရှိ/ မရှိ ဈေးကွက်စောင့်ကြည့်စစ်ဆေးခဲ့ပါကြောင်းနှင့် စောင့်ကြည့်စစ်ဆေးခဲ့သည့် ကုန်စည်များတွင် ကုန်အညွှန်းအမှတ်အသားဖေါ်ပြချက်များနှင့် ကိုက်ညီမှုရှိပါကြောင်း သတင်းရရှိပါသည်။

DOCA(ပဲခူး)