သတင်းနှင့် လှုပ်ရှားမှုများ

    ဧရာတီတိုင်းဒေသကြီး စားသုံးသူရေးရာဦးစီးဌာန မြောင်းမြခရိုင်တွင် ခရိုင်ဦးစီးမှူး ဦးဇော်လင်းအောင်၊  ဒု-ခရိုင်ဦးစီးမှူး ဦးလှထွဋ်ဦးနှင့်ဝန်ထမ်းများသည် ဆန်စပါးကုန်သည်များနှင့် ပူးပေါင်း၍ (၂၂.၁၀.၂၀၂၄)ရက်နေ့ နံနက်(၁၀:၀၀)နာရီအချိန်တွင် မြောင်းမြခရိုင် ဆန်စပါးကုန်သည် များအသင်း အလုပ်အမှုဆောင် ရွေးချယ်တင်မြှောက်ခြင်းအခမ်းအနား ဆောင်ရွက်ခဲ့ပါသည်။

  အခမ်းအနားတွင် ခရိုင်ဦးစီးမှူးမှ အဖွင့်အမှာစကားပြောကြားပြီး   စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန တိုင်းဒေသကြီးဦးစီးမှူးရုံး၏ ညွှန်ကြားချက်အရ ဆန်စပါးကုန်သည်များ အသင်းကိုဖွဲ့စည်းပုံနှင့်အညီ အမြန်ရွေးချယ်ဆောင်ရွက်ရန် ပြောကြားခဲ့ပြီး ဆက်လက်၍ ဒု-ခရိုင် ဦးစီးမှူးမှ မြန်မာနိုင်ငံဆန်စပါးကုန်သည်များအသင်းဖွဲ့စည်းရခြင်း၏ ရည်ရွယ်ချက်များ အသင်း၏ တာဝန်များအား အသေးစိတ်ရှင်းလင်းဖတ်ကြားပြီး တက်ရောက်လာသော ဆန်စပါးကုန်သည်များ အတွင်းမှအသင်း၏ ဥက္ကဌ၊ ဒုဥက္ကဌ(၂)ဦး၊ အတွင်းရေးမှုး၊ တွဲဖက်အတွင်းရေးမှူး(၂)ဦး၊ ဘဏ္ဍာရေးမှူး၊ တွဲဖက်ဘဏ္ဍာရေးမှူး(၂)ဦး၊ စာရင်းစစ်၊ တွဲဖက်စာရင်းစစ်(၂)ဦး၊ အဖွဲ့ဝင်(၇)ဦး စုစုပေါင်း(၁၉)ဦးဖြင့် အောင်မြင်စွာဖွဲ့စည်းပေးခဲ့ပြီး အသင်းဥက္ကဌမှ အသင်းရည်ရှည်ဖွံ့ဖြိုး တိုးတက်ရေးအတွက် အသင်းသားများနှင့် ပူးပေါင်းဆောင်ရွက်ရမည်ဖြစ်ကြောင်း ဆွေးနွေးပြီး နိဂုံးချုပ်အနေဖြင့် ခရီုင်ဦးစီးမှူးမှ လိုအပ်သည်များကို ထပ်မံ၍ဖြည့်စွက်မှာကြားပြီး အစည်းအဝေးကို နေ့လယ်(၁၂:၀၀)နာရီအချိန်တွင် ရုပ်သိမ်းခဲ့ပါသည်။ အစည်းအဝေးပွဲသို့ ဆန်စပါးကုန်သည် (၂၅)ဦး တက်ရောက်ခဲ့ပါသည်။

DOCA(ဧရာဝတီ)

         ရန်ကုန်တိုင်းဒေသကြီး၊ ပြည်တွင်းရေကြောင်းသွားရေယာဉ်ဖြင့်သယ်ဆောင်လာသည့် ကုန်ပစ္စည်းအမည်၊ အရေအတွက်ဖော်ပြသည့် ကုန်တင်လွှာစနစ် စံပြုလုပ်ငန်းစဉ် (SOPs)အပေါ် ကြပ်မတ်စစ်ဆေးရေးအဖွဲ့များဖြစ်သော အကောက်ခွန်ဦးစီးဌာနမှဦးဆောင်၍ ရေကြောင်းရဲတပ်ဖွဲ့၊ တိုင်းရဲတပ်ဖွဲ့၊ အမှတ်(၃)မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့(ရန်ကုန်)၊ မြန်မာ့ဆိပ်ကမ်းအာဏာပိုင်တို့ပါဝင်သော အဖွဲ့များသည် ၂၂-၁၀-၂၀၂၄ ရက်နေ့၊ နေ့လယ် (၁၂:၀၀) နာရီအချိန်တွင် (သိန်းဦး) ဆိပ်ကမ်းစစ်ဆေးမှုကို အရှေ့ပိုင်းခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့် တာဝန်ရှိဝန်ထမ်းများက ပူးပေါင်းပါဝင်စစ်ဆေးပေးခဲ့ကြောင်းသိရှိရပါသည်။

          ထိုသို့စစ်ဆေးရာတွင် (ကော့သောင်းမှရန်ကုန်)သို့ ထွက်ခွာလာသည့် ကမ်းရိုးတန်းသွားသင်္ဘောဖြစ်သော   MV. လော်ပန် (5) သင်္ဘောဖြင့် ကုန်ပစ္စည်းမျိုးစုံကိုတင်ဆောင်ထားရာ တရားမဝင်ကုန်ပစ္စည်းများတင်ဆောင်လာခြင်းရှိ/မရှိစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

            စားသုံးသူရေးရာဦးစီးဌာန၊ မြန်အောင်မြို့နယ်ရုံးမှ ဒု-ဦးစီးမှူး ဒေါ်ယဉ်ယဉ်ထွန်းသည် (၂၂.၁၀.၂၀၂၄) ရက်နေ့ နံနက်(၁၀:၃၀) နာရီအချိန်တွင် မြန်အောင်မြို့နယ်၊ ပြန်ကြားရေးနှင့် ပြည်သူ့ ဆက်ဆံရေးဦးစီးဌာန၊ လူထုအခြေပြုဗဟိုဌာန (Community Centre)ခန်းမ၌ အွန်လိုင်းစနစ်ဖြင့် ရောင်းချခြင်းလုပ်ငန်းမှတ်ပုံတင်ခြင်းဆိုင်ရာ Talk Show အစီအစဉ်ကိုဆောင်ရွက်ခဲ့ပါသည်။

          အဆိုပါ အစီအစဉ်တွင် ဒု-ဦးစီးမှူး ဒေါ်ယဉ်ယဉ်ထွန်းက စီးပွားရေးလုပ်ငန်းရှင်များသည် အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်ပါက အွန်လိုင်းစနစ်ဖြင့် ဦးစီးဌာနသို့ မှတ်ပုံတင်လက်မှတ် လျှောက်ထားရမည်ဖြစ်ကြောင်း ရှင်းလင်းပြောကြားခဲ့ပါသည်။ ထိုသို့ပြောကြားရာတွင် မှတ်ပုံတင်လက်မှတ်လျှောက်ထားသူသည် လူပုဂ္ဂိုလ်ဖြစ်ပါက ပြည်ထောင်စုသမ္မတမြန်မာနိုင်ငံတော်အတွင်း အခြေချနေထိုင်လျက်ရှိပြီး အသက်(၁၈)နှစ် ပြည့်ပြီးသူဖြစ်ရမည်။ ထုတ်ပြန်ချက်ပါ သတ်မှတ်ချက်များကို လိုက်နာနိုင်သူ၊ လုပ်ငန်းလုပ်ကိုင်ဆောင်ရွက်မည့်နေရာကိုတင်ပြနိုင်သူ၊ အစိုးရအဖွဲ့အစည်းတရပ်ရပ်က အမည်ပျက်ကြေညာထားသော ပုဂ္ဂိုလ်များမဖြစ်ရဟု ဖော်ပြထားပါသည်။ ကုမ္ပဏီ သို့မဟုတ် စီးပွားရေးအဖွဲ့အစည်းဖြစ်ပါက တည်ဆဲဥပဒေတစ်ရပ်ရပ်ဖြင့် ဖွဲ့စည်းတည်ထောင်ထားသော၊ ကိုယ်ပိုင်သတ်မှတ်ချက်ဖြင့် တရားဝင်ဝက်ဘ်ဆိုဒ်ရရှိထားပြီး  အွန်လိုင်းစနစ်ဖြင့်ရောင်းချခြင်းလုပ်ငန်း လုပ်ကိုင်ဆောင်ရွက်မည့်နေရာ တင်ပြနိုင်သောအဖွဲ့အစည်းဖြစ်ရပါမည်။ မှတ်ပုံတင်လက်မှတ်လျှောက်ထားရာတွင် ကုမ္ပဏီ (သို့မဟုတ်) စီးပွားရေးအဖွဲ့အစည်းဖြစ်ပါက အဖွဲ့အစည်းရှိ တာဝန်ခံပုဂ္ဂိုလ်၏ရောင်စုံဓါတ်ပုံ၊ လူပုဂ္ဂိုလ်ဖြစ်ပါက ယင်းပုဂ္ဂိုလ်၏ ရောင်စုံဓါတ်ပုံ၊ နိုင်ငံသားစိစစ်ရေးကတ်ပြားမိတ္တူ၊ လုပ်ငန်းအမှန်တကယ်တည်ရှိကြောင်း သက်ဆိုင်ရာအစိုးရဌာန၊ အစိုးရအဖွဲ့အစည်း (သို့မဟုတ်) ရပ်ကွက်/ကျေးရွာအုပ်ချုပ်ရေးမှူး၏ထောက်ခံချက်၊ အွန်လိုင်းစနစ်ဖြင့်ရောင်းချမည့် ကုန်စည် (သို့မဟုတ် ဝန်ဆောင်မှု  အမျိုးအစားစာရင်း၊ အချက်အလက်နှင့် အာမခံချက်၊ ကုန်စည်နှင့်စပ်လျဉ်း၍ မည်သည့်နိုင်ငံမှ တင်သွင်းကြောင်း သို့မဟုတ် ပြည်တွင်း၌ ထုတ်လုပ်ကြောင်း ဖော်ပြထားသည့်အချက်အလက်များ၊ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ သက်ဆိုင်ရာအစိုးရဌာန၊ အစိုးရအဖွဲ့အစည်းကခွင့်ပြုထားသော အထောက်အထားများရှိပါက   ယင်းတို့နှင့်စပ်လျဉ်းသည့် အထောက်အထားများပါပူးတွဲတင်ပြ၍ အွန်လိုင်းမှတ်ပုံတင်လက်မှတ် လျှောက်ထားရမည်ဟု  ဖော်ပြထားကြောင်း အသိပညာပေးရှင်းလင်းခဲ့ပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ ဟင်္သာတမြို့နယ်တာဝန်ခံသည် (၂၁.၁၀.၂၀၂၄) ရက်နေ့နံနက်(၁၁:၀၀)နာရီအချိန်တွင် ဟင်္သာတမြို့နယ်၊ပြန်ကြားရေးနှင့်ပြည်သူဆက်ဆံရေးဦးစီးဌာန(Community  Centre)ခန်းမ၌ တရားမဝင်ကုန်သွယ်မှု၏ အဓိပ္ပာယ်အကြောင်း သိကောင်းစရာများ အသိပညာပေးခြင်း Talk Show အစီအစဉ်ကို ဆောင်ရွက်ခဲ့ပါသည်။

           အစီအစဉ်တွင် မြို့နယ်တာဝန်ခံ ဦးမိုးကျော်က တရားမဝင်ကုန်သွယ်မှုဆိုသည်မှာ တင်သွင်း/ တင်ပို့ခြင်းခွင့်ပြုမထားသော ကုန်ပစ္စည်းများအား သက်ဆိုင်ရာဌာနများ၏ ခွင့်ပြုချက် တစ်စုံတစ်ရာမရှိဘဲ ပြည်တွင်း/ ပြည်ပများအားတင်သွင်းခြင်း၊ တင်ပို့ခြင်းမပြုစေရေး၊ အတုအပတင်သွင်းခြင်း၊  ကုန်ပစ္စည်း၏တန်ဖိုးများအားလျော့ပြ၍ တင်သွင်းခြင်းများဖြစ်ကြောင်း၊ ဗဟိုကော်မတီဖွဲ့စည်းဖြစ်ပေါ်လာမှုအခြေအနေ၊ တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီပြင်ဆင်ဖွဲ့စည်းခြင်းများအား အသိပညာပေးဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)

           စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ်တာဝန်ခံနှင့် ဒု-ဦးစီးမှူးတို့သည် မိတ်ဘက်ဌာနဆိုင်ရာများနှင့် ပူးပေါင်း၍ ၂၀၂၄ ခုနှစ်၊ အောက်တိုဘာလ(၂၂) ရက်၊ နံနက်(၀၉:၀၀) နာရီအချိန်တွင် ဇလွန်မြို့၊ ညောင်ပင်ဈေးရပ်ကွက်၊ ဗိုလ်ချုပ်လမ်းရှိ “စေတနာမွန်” ဆန်စက်သို့ MSMEs လုပ်ငန်းဖွံ့ဖြိုးတိုးတက်စေရေး ကွင်းဆင်း စစ်ဆေးခြင်းများ ဆောင်ရွက်ခဲ့ပါသည်။

            ထိုသို့ကွင်းဆင်းစစ်ဆေးရာတွင် “စေတနာမွန်” ဆန်စက်မှ စပါးဝယ်ယူရရှိမှုနှင့် ကြိတ်ခွဲထုတ်လုပ်မှုအခြေအနေ၊ ထုတ်လုပ်သောကုန်စည်များ အရည်အသွေးပြည့်မီစေရေး၊ ဆန်စပါး ဈေးနှုန်းဈေးကွက်အခြေအနေများနှင့် ထုတ်ပိုးမှုစနစ်များလုံခြုံစိတ်ချရမှုရှိစေရေး၊ ခေတ်မှီစက်ကိရိယာများ တပ်ဆင်ထားမှုရှိ/ မရှိ၊ လုပ်သားအင်အား၊ ဖြန့်ဖြူးမှုအခြေအနေများကို ဆွေးနွေးခဲ့ပြီး၊ လုပ်ငန်းရှင်ဘက်မှလည်း လုပ်သားရှားပါးမှုနှင့် စပါးဈေးအနိမ့်အမြင့်အပေါ် မူတည်၍ ကြိတ်ခွဲထုတ်လုပ်ကြောင်း၊ ဆန်စက်ကြိတ်ခွဲရာမှ ထွက်ရှိလာသောစွန့်ပစ်ပစ္စည်းများကိုလည်း စနစ်တကျစွန့်ပစ်ကြောင်း သိရှိရပြီး၊ MSMEs လုပ်ငန်းဖွံ့ဖြိုး တိုးတက်စေရေးအတွက် ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ဧရာဝတီ)