သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်မှာကြားချက်အရ တိုင်းဒေသကြီးကွပ်ကဲမှုအောက်ရှိ ခရိုင်ဦးစီးမှူးရုံးများအနေဖြင့် ခရိုင်အတွင်းမြို့နယ်များတွင် ရောင်းချနေသော ဘိလပ်မြေဆိုင်များ၌ ကုန်ပစ္စည်းလက်ကျန်အခြေအနေများကိုသိရှိနိုင်ရန် မြေပြင်ကွင်းဆင်းစစ်ဆေးမှုများပြုလုပ်ခဲ့ကြပါသည်။

     ထိုသို့ကွင်းဆင်းစစ်ဆေးဆောင်ရွက်မှုများပြုလုပ်ရာတွင် ရန်ကုန်တိုင်းဒေသကြီး၏ ကြီးကြပ်ကွက်ကဲမှုအောက်ရှိ ခရိုင်မှူးများသည်  (၇-၃-၂၀၂၄) ရက်နေ့၊ နေ့လယ် (၁၄:၀၀) နာရီအချိန်၌ ဒဂုံမြို့သစ်ခရိုင်၊ တောင်ဒဂုံမြို့နယ်၊ စက်မှုဇုန်(၁)ရှိ စက်မှုကုန်ထုတ်လုပ်ငန်းများ၏ လုပ်ငန်းလည်ပတ်မှုအခြေအနေ၊ ကြုံတွေ့နေရသည့်အခက်အခဲနှင့် လုင်ငန်းအမျိုးအစားတို့ကို မြေပြင်ကွင်းဆင်းစစ်ဆေးမှုများဆောင်ရွက်ခဲ့ကြောင်းသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးတွင် ပြည်နယ်ဦးစီးမှူးနှင့် ဦးစီးအရာရှိ (၄)ဦးတို့သည် နေပြည်တော်ရုံးချုပ်၌ ပြုလုပ်သည့် အရာထမ်းစွမ်းဆောင်ရည်မြှင့်တင်ရေးသင်တန်း အမှတ်စဉ် (၁/၂၀၂၄) ဖွင့်ပွဲအခမ်းအနားကို Zoom ဖြင့်တက်ရောက်ခဲ့ကြောင်း သိရှိရပါသည်။

    အဆိုပါသင်တန်းကို (၄.၃.၂၀၂၄) ရက်နေ့မှ (၈.၃.၂၀၂၄) ရက်နေ့ထိ သင်တန်း(၅) ရက်ကြာ သင်ခန်းစာများ ပို့ချသွားမည်ဖြစ်ကြောင်း သိရှိရသည်။ သင်ခန်းစာများမှာ နိုင်ငံဝန်ထမ်းနည်းဥပဒေ၊ ရုံးလုပ်ငန်းလက်စွဲ၊ အဂတိလိုက်စားမှုတားဆီးကာကွယ်ရေးအဖွဲ့ CPU၊ ပြည်တွင်းကုန်သွယ်မှုဖွံ့ဖြိုးရေး နှင့်ပြည်ပတင်ပို့မှုဆိုင်ရာ အထောက်အကူပြုလုပ်ငန်းများ အကောင်အထည်ဖော်ဆောင်ရွက်မှု အခြေအနေ၊ ရသုံးမှန်းခြေငွေစာရင်းရေးဆွဲခြင်း၊ ဘဏ္ဍာရေးစည်းမျဉ်းများ၊ ဝင်ငွေနှင့်အသုံးစရိတ်များ၊ ဌစစာရင်းများရေးသွင်းခြင်းနှင့် ဌာနတွင်း စာရင်းစစ်ဆေးခြင်း၊ စီမံကိန်းရေးဆွဲခြင်းနှင့် အကောင် အထည်ဖော်ဆောင်ရွက်ခြင်းဆိုင်ရာ ကိစ္စရပ်များ၊ စားသုံးသူကာကွယ်ရေးဥပဒေ၊ ICT နည်းပညာနှင့် E-Government ဆိုင်ရာဆောင်ရွက်မှုများ၊ Food Safety ဘာသာရပ်နှင့် အရည်အသွေးစီမံခန့်ခွဲခြင်း ဘာသာရပ်၊ ပြန်လည်သိမ်းဆည်းခြင်းနှင့် တားမြစ်ခြင်းဘာသာရပ်၊ ဈေးကွက်စောင့်ကြည့်စစ်ဆေးခြင်း ဘာသာရပ်၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာနှင့် စပ်လျဉ်း သည့်ကိစ္စရပ်များ၊ စားသုံးသူကာကွယ်ရေးဆိုင်ရာအသိပညာပေးခြင်း၊ အာဆီယံစားသုံးသူကာကွယ် ရေးကော်မတီနှင့် အာဆီယံနိုင်ငံများ၏ စားသုံးသူအကာအကွယ်ပေးရေးဆောင်ရွက်မှု အခြေအနေနှင့် NCPPရေးဆွဲမှု၊ အမျိုးသားပို့ကုန်မဟာဗျူဟာဘာသာရပ်၊ မူပိုင်ခွင့်ဦးစီးဌာနမှ သင်ခန်းစာများ၊ ကုန်သွယ်ရေးဦးစီးဌာနမှ သင်ခန်းစာများကို ပို့ချသင်ကြားမည်ဖြစ်ကြောင်း သိရှိရပါသည်။

DOCA(မွန်)

   ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်အတွင်း၌ ဆန်၊ ဆီဝယ်ယူစားသုံးမှုအဆင်ပြေရန်ရည်ရွယ်၍ စည်ပင်သာယာမြို့မဈေးနယ်နိမိတ်အတွင်း/အပြင်ရှိ ဆန်၊ ဆီ လက်လီအရောင်းဆိုင်များအား ၂၀၂၄ခုနှစ်၊ ဖေဖော်ဝါရီလ(၂၉)ရက်နေ့၊ နေ့လယ်(၁၃:၀၀)နာရီအချိန်တွင် လုပ်ငန်းရှင်များနှင့်တွေ့ဆုံကာ ဆန်၊ ဆီများကို ဈေးနှုန်းမြှင့်တင်ရောင်းချနေခြင်းရှိ/မရှိ ကွင်းဆင်းစစ်ဆေးခဲ့ကြောင်းသိရှိရပါသည်။

       ထိုသို့ကွင်းဆင်းစစ်ဆေးခဲ့ရာတွင် မြို့နယ်အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်စခန်းမှူးနှင့် တပ်ဖွဲ့ဝင်များ၊ မြို့နယ်မီးသတ်ဦးစီးဌာနမှ ဦးစီးမှူး၊ စည်ပင်သာယာဦးစီးဌာနမှ အမှုဆောင်အရာရှိနှင့်ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံတို့ပူးပေါင်းအဖွဲ့သည် စည်ပင်သာယာမြို့မဈေးအတွင်း/အပြင်၌ ဖွင့်လှစ်ရောင်းချနေသည့် ဆန်၊ ဆီတို့နှင့်တွဲလျက်ရောင်းချနေသော ကုန်ခြောက်ဆိုင်ပိုင်ရှင်လုပ်ငန်းရှင်များနှင့် သွားရောက်တွေ့ဆုံပြီး စားအုန်းဆီများလက်လီရောင်းချရာတွင် စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီဖွဲ့စည်းကာ စားအုန်းဆီအဓိကထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင်ဖြစ်ပေါ်နေသည့် FOP ဈေးနှုန်းများကို နေ့စဉ်စောင့်ကြည့်ပြီး သယ်ယူပို့ဆောင်ခကုန်ကျစရိတ်များ၊ ဘဏ်စရိတ်များ၊ အခွန်အခများထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးကို အပတ်စဉ်တနင်္လာနေ့တွင် ထုတ်ပြန်ပေးလျက်ရှိကြောင်း၊ ဈေးကွက်အတွင်း ဈေးနှုန်းအဆမတန်မြှင့်တင်ရောင်းချနေခြင်းများမပြုလုပ်စေရန်နှင့်  စားအုန်းဆီလက်လီ/လက်ကားဖြန့်ဖြူးရောင်းချမှုများကိုစစ်ဆေးရန်တို့အတွက် မြို့နယ်စားအုန်းဆီဖြန့်ဖြူးရောင်းချမှုစိစစ်ကြပ်မတ်ဆောင်ရွက်နိုင်ရေးကော်မတီတို့ကိုလည်း ဖွဲ့စည်းဆောင်ရွက်လျက်ရှိကြောင်း၊ ၎င်းနောက် ဌာန၏ သတ်မှတ်ချက်များနှင့်မကိုက်ညီသောဆန်များကို ဝယ်ယူဖြန့်ဖြူးရောင်းချနေခြင်းများမပြုလုပ်ကြရန် အသိပညာပေးပြောကြားခဲ့ပြီးနောက် ဈေးကွက်စောင့်ကြည့်ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ပင်ခရိုင်ဦးစီးမှူးရုံးသည် ၁.၃.၂၀၂၄ ရက်နေ့ နံနက်(၁၀:၀၀) အချိန်တွင် မအူပင်ခရိုင်ဦးစီးမှူးရုံး တာဝန်ထမ်းဆောင်နေသော ဝန်ထမ်းများနှင့် မအူပင်မြို့နယ်၊ ပန်းတနော်မြို့နယ်၊ ညောင်တုန်းမြို့နယ်၊ ဓနုဖြူမြို့နယ် တာဝန်ထမ်းဆောင်သူဝန်ထမ်း စုစုပေါင်း (၁၅)ဦး တက်ရောက်သည့် ၂၀၂၄ခုနှစ်( ၂/၂၀၂၄)ကြိမ်မြောက်ဝန်ထမ်းထု ဆန္ဒဖော်ထုတ်ပွဲ ကျင်းပပြုလုပ်ခဲ့ပါသည်။

    အဆိုပါ အခမ်းအနားတွင် ခရိုင်ဦးစီးမှူးဦးဇော်မင်း(လက်ထောက်ညွှန်ကြားရေးမှူး) မှ ခရိုင်ရုံးရှိဝန်ထမ်းများအား လုပ်ငန်းအခက်အခဲများနှင့် ဝန်ထမ်းတို့၏ တင်ပြစရာရှိသော ကိစ္စရပ်များကို ပွင်းလင်းစွာ တင်ပြဆွေးနွေးနိုင်ကြောင်းနှင့်၊ မိမိတို့ ဌာန၏ လက်ရှိလုပ်ငန်းနေသော လုပ်ငန်းများ၏ အမိန့်၊ ညွှန်ကြားချက်များကို ဝန်ထမ်းများသိရှိနားလည်စေရန် ရှင်းလင်းဆွေးနွေးခြင်း၊ ဒေသန္တရမိတ်ဖက် ဌာနများ၏ လုပ်ငန်းဆောင်ရွက်မှုများကို ပူးပေါင်းဆောင်ရွက်သင့်သည်ကိစ္စရပ်များကို ပူးပေါင်း ဆောင်ရွက်ကြရန်၊ မိမိတို့ဌာန၏အဓိကလုပ်ဆောင်နေသော စားသုံးသူကာကွယ်ရေးလုပ်ငန်းများကို လုပ်ဆောင်ရာတွင် စားသုံးသူနှင့် စီးပွားရေးလုပ်ငန်းရှင်ကို အသိပညာပေးရာတွင်  ဌာန၏ ရည်ရွယ်ချက်၊ အဓိကလုပ်ဆောင်ချက်၊ အဖွဲ့အစည်းလုပ်ပိုင်ခွင့်၊ တားမြစ်ချက်များ၊ ပြစ်မှု၊ပြစ်ဒဏ်နှင့် အထွေထွေကိစ္စရပ်များအတွက် သေချာလေ့လာထားရန်၊ ဥပဒေ၊ နည်းဥပဒေများကို သိရှိထားရန်၊ စားသုံးသူအခွင့်အရေးအတွက် တိုင်ကြားလာသည့်အခါ ပြစ်ဒဏ်ထက် ညှိနှိုင်းဖြေရှင်းဆောင်ရွက်လုပ်ငန်းများကို ဖြေရှင်းလုပ်ဆောင်တတ်စေရန်၊ စားသုံးသူကာကွယ်ရေးလုပ်ငန်းသာမက၊ ပြည်တွင်း ကုန်သွယ်မှုလုပ်ငန်းများကိုပါ လေ့လာသင်ယူပြီး၊ မိမိတို့ဝန်ကြီးဌာနလက်အောက်ရှိ ဦးစီးဌာနများ၏ လုပ်ငန်းနှင့် ဥပဒေများကိုပါလေ့လာပြောကြားခဲ့ပြီး ဖေဖော်ဝါရီလ လုပ်ငန်း ဆောင်ရွက်ပြီးစီးမှုနှင့် မတ်လလုပ်ငန်းစီမံလျာထားချက်များကို ဌာနခွဲအသီးသီးမှ တင်ပြကြရန် ပြောကြားခဲ့ပါသည်။

    ဆက်လက်၍ မအူပင်ခရိုင်ဦးစီးမှူးရုံးမှ ဌာနခွဲတာဝန်ခံများမှ ဖေဖော်ဝါရီလအတွင်း လုပ်ငန်းဆောင်ရွက်ပြီးစီးမှုအခြေအနေများးကို တင်ပြကြပြီး၊ မတ်လအတွင်း ဆောင်ရွက်ရမည့် လုပ်ငန်းလျာထားချက်များကို တင်ပြကာ ဌာန၏ အမိန့်၊ ညွှန်ကြားချက်များအတိုင်း လိုက်နာဆောင်ရွက်မည်ဖြစ်ပြီး၊ မိတ်ဖက်ဌာနတို့နှင့်လည်း ပူးပေါင်းဆောင်ရွက်ကြမည်ဖြစ်ကြောင်းနှင့် မတ်လအတွင်း အငြိမ်စားခွင့်ခံစားမည့် ဦးမြင့်သူ(ဒု-ကြီးကြပ်ရေးမှူး)မှ နေ့လယ်စာထမင်းနှင့် ဝန်ထမ်းများအား နှုတ်ဆက်ဧည့်ခံကျွေးမွေးပြီး လုပ်ငန်းညှိနှိုင်းအစည်းအဝေးနှင့် ဝန်ထမ်းထုဆန္ဒဖော်ထုတ်ပွဲကို နေ့လယ်(၁၂:၀၀)တွင် ပြီးမြောက်ခဲ့ကြောင်း သိရပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ မြန်အောင်မြို့နယ်ဦးစီးမှူးနှင့်အဖွဲ့သည် မြန်အောင်မြို့နယ် ကျွဲတဲကုန်းကျေးရွာအုပ်စုရှိ ဘုန်းကြီးကျောင်းဓမ္မာရုံတွင် စားသုံးသူပြည်သူ(၂၀၀)ဦးအား (၄.၃.၂၀၂၄)နေ့၊ နံနက် (၁၁:၀၀) တွင် စားသုံးသူကာကွယ်ရေး အသိပညာပေးဟောပြောခြင်းများကို ဆောင်ရွက်ခဲ့ပါသည်။

     ဟောပြောပွဲတွင် မြို့နယ်ဦးစီးမှူး ဦးမြင့်အောင်က စားသုံးသူကာကွယ်ရေးဥပဒေများအကြောင်း၊  စားသုံးကာကွယ်ရေး ဥပဒေပါ စားသုံးသူအခွင့်အရေးနှင့် တာဝန်များအကြောင်း၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သိကောင်းစရာများအကြောင်း၊ ကုန်စည် (သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်းများအကြောင်း၊ ပြစ်မှုနှင့်ပြစ်ဒဏ်များအကြောင်း၊ ဈေးကွက်အတွင်း ရောင်းချနေသော ကုန်ပစ္စည်းများကို ရွေးချယ်ဝယ်ယူအသုံးပြုတတ်စေရန် အသိပညာပေးခြင်းများ၊ စားသုံးသူမိဘပြည်သူများအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်း စသည့်တို့ကို အသိပညာပေးဟောပြောခဲ့ကြောင်း သိရှိရပါသည်။

DOCA(ဧရာဝတီ)