သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ ရန်တိုင်းဒေသကြီးဦးစီးမှူးရုံးတွင် အခမ်းအနားမှူးပညာနှင့်ပတ်သက်၍ သင်တန်းကို (၂၉-၂-၂၀၂၄) ရက်နေ့တွင် ဖွင့်လှစ်ခဲ့ပါသည်။ သင်တန်းဖွင့်ပွဲအခမ်းအနားကို စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူး ဦးကျော်ကျော်လွင်၊ သင်ကြားပေးမည့် လက်ထောက်ညွန်ကြားရေးမှူး ဒေါက်တာသရဖီထွန်းနှင့် သင်တန်းသူများတက်ရောက်ခဲ့ကြပါသည်။ အခမ်းအနားစတင်ချိန်တွင် တိုင်းဒေသကြီးဦးစီးမှူး ဦးကျော်ကျော်လွင်က ဝန်ထမ်းများ၏ စွမ်းဆောင်ရည်မြှင့်တင်စေနိုင်ရန်အတွက် ယခုကဲ့သို့ သင်တန်းဖွင့်လှစ်ရခြင်းဖြစ်ကြောင်းနှင့် အခမ်းအနားမှူးကောင်းတစ်ဦး၏ အင်္ဂါရပ်များကိုအသိပညာပေးပြောကြားခဲ့ပါသည်။ ထို့နောက် လက်ထောက်ညွှန်ကြားရေးမှူး ဒေါက်တာသရဖီထွန်းက အခမ်းအနားမှူးတစ်ယောက်အတွက် သိသင့်သည့်အချက်များ၊ ဆောင်ရန်ရှောင်ရန်ကိစ္စရပ်များကို အတွေ့အကြုံများနှင့်ပေါင်းစပ်ကာ သင်ကြားပေးခဲ့ပါသည်။ ထို့နောက် သင်တန်းသူများကို တစ်ဦးချင်းလက်တွေ့လေ့ကျင့်စေခဲ့ပြီး အခမ်းအနားအောင်မြင်စွာပြီးမြောက်ခဲ့ကြောင်းသိရှိရပါသည်။

DOCA(ရန်ကုန်)

     ၂၇.၂.၂၀၂၄ ရက်နေ့တွင် စားသုံးသူရေးရာဦးစီးဌာန၊ သထုံခရိုင်ဦးစီးမှူးနှင့် သထုံမြို့နယ် တာဝန်ခံတို့သည် သထုံခရိုင်ဦးစီးမှူးရုံး၌ ဆန်စက်လုပ်ငန်းရှင်များနှင့် တွေ့ဆုံခဲ့သည်။

   ထိုသို့ တွေ့ဆုံရာတွင် သထုံခရိုင်ဦးစီးမှူးက ဆန်စက်လုပ်ငန်းရှင်များအား သထုံခရိုင်အတွင်းရှိ ဆန်စက်လုပ်ငန်းများဖွံ့ဖြိုးတိုးတက်စေရေး၊ ဆန်စက်လုပ်ငန်းရှင်များ အသီးသီးစည်းလုံးညီညွတ်မှုရှိစေရေး၊ ဆန်/စပါးများ ဝယ်ယူခြင်း၊ သိုလှောင်ခြင်း၊ ကြိတ်ခွဲခြင်းဆိုင်ရာများနှင့် စပ်လျဉ်း၍ ဆွေးနွေးခဲ့ပြီး သထုံမြို့နယ်တာဝန်ခံက သထုံမြို့နယ်အတွင်း စပါး/ဆန် စီးဝင်မှု၊ စီးထွက်မှု၊ လက်ရှိ ဈေးနှုန်းအခြေအနေများအား ဆွေးနွေးခဲ့ပြီး ဆန်အိတ်များပေါ်တွင် စားသုံးသူကာကွယ်ရေး ဥပဒေတွင် ပြဌာန်းထားသည့် ကုန်အညွှန်းအမှတ်အသားများအတိုင်း ပြည့်စုံစွာ ဖော်ပြရန် ဆွေးနွေးခဲ့ကြကြောင်း သတင်းရရှိပါသည်။

DOCA(မွန်)

    မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ ရုံးအစည်းအဝေးခန်းမတွင် စားသုံးဆီဖြန့်ဖြူးရေးစီမံခန့်ခွဲမှု Software နှင့်ပတ်သက်၍ ရှင်းလင်းပွဲအခမ်းအနားကို (၂၉-၂-၂၀၂၄ ) ရက်နေ့၊ နေ့လယ် (၁၃း၀၀) နာရီအချိန်တွင် ကျင်းပခဲ့ပါသည်။

     အဆိုပါ ရှင်းလင်းပွဲအခမ်းအနားကို ကုန်ဈေးနှုန်းတည်ငြိမ်ရေးလုပ်ငန်းအဖွဲ့ ဒုတိယဥက္ကဋ္ဌ၊ မန္တလေးတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီး ဦးသိန်းဌေးနှင့် ဌာနဆိုင်ရာမှ တာဝန်ရှိသူများ၊ မန္တလေးတိုင်းဒေသကြီးအတွင်းရှိ တိုင်းဒေသကြီး/ခရိုင်ဆီကုန်သည်နှင့် ဆီလုပ်ငန်းရှင်များအသင်းဥက္ကဋ္ဌနှင့် အတွင်းရေးမှူးများ၊ ဒေသတွင်းရှိ စားအုန်းဆီ လက်ကားဖြန့်ဖြူးရောင်းချလျက်ရှိသော ဆီအသင်းဝင်ကုန်သည်များစုစုပေါင်း (၇၀) ဦးခန့်တက်ရောက်ခဲ့ကြပါသည်။

    အခမ်းအနားတွင် စီးပွားရေးရာဝန်ကြီး ဦးသိန်းဌေးက အဖွင့်အမှာစကားပြောကြားခဲ့ပြီးနောက် ပြည်သူများအနေဖြင့် ကျန်းမာရေးနှင့်ညီညွတ်သည့် စားဆီများကို ဈေးနှုန်းတည်ငြိမ်စွာဝယ်ယူသုံးစွဲနိုင်ရေးအတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေဖြင့် အမိန့်ကြော်ငြာစာအမှတ် (၂၀/၂၀၂၁) အရ အရေးကြီးကုန်စည်အဖြစ်သတ်မှတ်ထားကြောင်း၊ စားသုံးဆီတင်သွင်းသိုလှောင်ဖြန့်ဖြူးခြင်းကြီးကြပ်ရေးကော်မတီဖွဲ့စည်းပြီး ကြီးကြပ်ထိန်းကြောင်းလျက်ရှိကြောင်း၊ တိုင်းဒေသကြီး/ခရိုင်များတွင် ကုန်ဈေးနှုန်းတည်ငြိမ်ရေးလုပ်ငန်းအဖွဲ့များက သက်ဆိုင်ရာဒေသအလိုက် ခွဲဝေရရှိသောစားအုန်းဆီအရေအတွက်အပြည့်အဝရရှိမှုနှင့် ရောက်ရှိမှုရှိ/မရှိ၊ သက်မှတ်ရည်ညွှန်းဈေးနှုန်းအတိုင်း ရောင်းချမှုရှိ/မရှိတို့ကို စားသုံးဆီဖြန့်ဖြူးမှုလုပ်ငန်းစဉ်များအတိုင်း စိစစ်ကြပ်မတ်ဆောင်ရွက်လျက်ရှိကြောင်း၊ စားသုံးဆီဖြန့်ဖြူးရေးလုပ်ငန်းများပိုမိုအဆင်ပြေချောမွေ့နိုင်စေရေးအတွက် Software အသုံးပြုပြီး  စီမံခန့်ခွဲမှုများပြုလုပ်ခြင်းသည် စားသုံးဆီဖြန့်ဖြူးရေးလုပ်ငန်းများကို ပိုမိုစနစ်တကျရှိစေရန်ဖြစ်ကြောင်း Software နှင့်ပတ်သက်သော သတင်းအချက်အလက်ဆွေးနွေးမှုများကို ဂရုတစိုက်သေချာနားထောင်ပြီး အကြံပြုဆွေးနွေးလိုကြောင်း နိဂုံးချုပ်ပြေကြားခဲ့ပါသည်။

      ဆက်လက်၍ Capital Connect Company Limited မှ ဦးကျော်မျိုးသက် (Chief Technology Officer) က စားသုံးဆီဖြန့်ဖြူရေးစီမံခန့်ခွဲမှု Software နှင့်ပတ်သက်၍ ရှင်းလင်းပြောကြားခဲ့ပါသည်။ ထို့နောက် တက်ရောက်လာသူများက သိရှိလိုသည်များမေးမြန်းခဲ့ပြီး အစည်းအဝေးကို ညနေ (၁၅း၀၀) နာရီအချိန်တွင် ရုတ်သိမ်းခဲ့ကြောင်းသိရှိရပါသည်။

DOCA(မန္တလေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ၂၀၁၉ခုနှစ်၊ မတ်လ(၁၅)ရက်နေ့တွင် ပြည်ထောင်စုလွှတ်တော်ဥပဒေအမှတ် (၉)ဖြင့် အတည်ပြုပြဋ္ဌာန်းခဲ့သည့် စားသုံးသူကာကွယ်ရေးဥပဒေအရ ကုန်စည် သို့မဟုတ် ဝန်ဆောင်မှုနှင့်စပ်လဉ်း၍ စားသုံးသူများနစ်နာဆုံးရှုံးမှုများဖြစ်ပေါ်တိုင်ကြားလာပါက ဥပဒေနှင့်အညီ ညှိနှိုင်းဖြေရှင်းအရေးယူဆောင်ရွက်လျက်ရှိပါသည်။

     မန္တလေးတိုင်းဒေသကြီးအတွင်း စားသုံးသူနစ်နာဆုံးရှုံးမှုများအပေါ် ဖြေရှင်းဆောင်ရွက်ထားရှိမှုအခြေအနေများနှင့် ဖြေရှင်းရန်ကျန်ရှိသောတိုင်ကြားမှုများ၊ ဈေးကွက်အတွင်း ဦးစားပေးကုန်စည်များသတ်မှတ်၍ ဈေးကွက်စောင့်ကြည့်စစ်ဆေးမှုအခြေအနေများ၊ စားသုံးဆီများနှင့်ပတ်သက်၍ အမှုဖွင့်အရေးယူဆောင်ရွက်ထားရှိမှုအပေါ် တိုးတက်မှုအခြေအနေများအား ညှိနှိုင်းဆွေးနွေးရန်အတွက် (၂၉-၂-၂၀၂၄) ရက်နေ့၊  နံနက်(၀၉:၀၀) နာရီအချိန်တွင် စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံး အစည်း အဝေးခန်းမ၌ မန္တလေးတိုင်းဒေသကြီး၊ စားသုံးသူရေးရာကော်မတီဥက္ကဋ္ဌ၊ အတွင်းရေးမှူးနှင့် အဖွဲ့ဝင်စုစုပေါင်း (၉) ဦးတက်ရောက်ခဲ့ကြပါသည်။

     အစည်းအဝေးတွင် တက်ရောက်လာသည့် ဥက္ကဋ္ဌ၊ အတွင်းရေးမှူးနှင့်အဖွဲ့ဝင်များက ဖြေရှင်းရန်ကျန်ရှိသော စားသူတိုင်ကြားမှုနှင့်ပတ်သက်၍ ဆွေးနွေးခြင်း၊ ဦးစားပေးကုန်စည်များသတ်မှတ်၍ ဈေးကွက်စောင့်ကြည့်စစ်ဆေးရာတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်များအား လိုက်နာဆောင်ရွက်ခြင်းမရှိသည့် သောက်ရေသန့်အမှတ်တံဆိပ် (၂) မျိုးနှင့် ကလေးအာဟာရဖြည့်စွက်စာအမှတ်တံဆိပ် (၁)မျိုး၊ စုစုပေါင်း(၃)မျိုး ထုတ်လုပ်ဖြန့်ဖြူးရောင်းချသည့် စီးပွားရေးလုပ်ငန်းရှင်များကို “သတိပေးခြင်းအမိန့်” ချမှတ်ဆောင်ရွက်ခဲ့သည့်အခြေအနေများကို ဝိုင်းဝန်းဆွေးနွေးဆောင်ရွက်ခဲ့ကြကြောင်းသိရှိရပြီး အစည်းအဝေးကို နံနက်(၁၀:၃၀)နာရီအချိန်တွင် ရုပ်သိမ်းခဲ့ကြောင်းသတင်းရှိပါသည်။

DOCA(မန္တလေး)

    မွန်ပြည်နယ်၊ စားသုံးသူရေးရာဦးစီးဌာန၊ ချောင်းဆုံမြို့နယ်တာဝန်ခံနှင့် ဝန်ထမ်းများသည် ၂၆.၂.၂၀၂၄ ရက်နေ့တွင် ချောင်းဆုံမြို့နယ်၊ ဘိုးနက်ကျေးရွာရှိ ဈေးဆိုင်များတွင်ရောင်းချလျက်ရှိသော မုန့်အမျိုးမျိုးအား ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

    ထိုသို့ ဈေးကွက်စောင့်ကြည့်စစ်ဆေးရာ ဈေးဆိုင်များတွင် ရောင်းချလျက်ရှိသော မုန့်အမျိုးမျိုး တွင်ကုန်အညွှန်းအမှတ်အသားပြည့်စုံမှု ရှိ/မရှိကို ကွင်းဆင်းစစ်ဆေးခဲ့ပြီး ရောင်းချလျက်ရှိသော မုန့်အမျိုးမျိုးတွင် ကုန်အညွှန်းအမှတ်အသား ပြည့်စုံစွာပါရှိကြောင်း တွေ့ရှိရပါသည်။ မြို့နယ်တာဝန်ခံက  ရောင်းချလျက်ရှိသောဆိုင်ရှင်များအား မိမိတို့ဆိုင်ပေါ်တွင် ကုန်အညွှန်းအမှတ်အသားပြည့်စုံခြင်းမရှိသော ကုန်စည်များကို ရောင်းချခြင်းမပြုရန် အသိပညာပေး ရှင်းလင်းဆွေးနွေးခဲ့ပြီးနောက် စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မွန်)