သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ ရခိုင်ပြည်နယ်၊ ကျောက်ဖြူခရိုင်ဦးစီးမှူးရုံးမှ ဝန်ထမ်းများသည် ရုံးချုပ်၏ လမ်းညွှန်ချက်အရ ကျောက်ဖြူမြို့နယ် ဈေးကွက်အတွင်း Bella Plus Plaster  ရောင်းချမှုရှိ/မရှိ ဈေးကွက်စောင့်ကြည့်စစ်ဆေးခြင်းကို (၁၇-၅-၂၀၂၂)နေ့ နေ့လည် (၃:၀၀)အချိန်တွင် ကျောက်ဖြူမြို့ပေါ်ရပ်ကွက်ရှိ ဆေးနှင့်ဆေးဝါးပစ္စည်းအရောင်းဆိုင်များသို့သွားရောက်၍ ကွင်းဆင်းစိစစ်ဆောင်ရွက်ခဲ့ပါသည်။

             Bella Plus Plaster  သည် ထုတ်လုပ်သည့် နိုင်ငံ၊ ထုတ်လုပ်သည့်ကုမ္ပဏီ၊ ဆေးဝါး မှတ်ပုံတင်အမှတ်နှင့် Import Registration No.(IR)ဖော်ပြမှုမရှိဘဲ ဈေးကွက်အတွင်း ရောင်းချလျက်ရှိခြင်းကြောင့် သတ်မှတ်ကုန်အညွှန်းအမှတ်အသားများအား ဖော်ပြထားမှုမရှိခြင်း၊ သုံးစွဲမှုမိဘပြည်သူများအနေဖြင့် သတင်းအချက်အလက်မှန်ကန်ပြည့်စုံစွာမရရှိနိုင်ခြင်းနှင့် တရားဝင်အခွန်အခများပေးသွင်း၍ တင်သွင်းရောင်းချသူများအနေဖြင့် အကျိုးစီးပွား ထိခိုက်နစ်နာမှုများ ကြုံတွေ့နေရခြင်းတို့ကြောင့် သွားရောက်စစ်ဆေးရခြင်းဖြစ်ပါသည်။ ၎င်း Bella Plus Plaster  ဆေးပစ္စည်းအား ကျောက်ဖြူမြို့ပေါ်ရပ်ကွက်ရှိ ဆေးနှင့်ဆေးဝါးပစ္စည်းများရောင်းချ နေသည့် ဆိုင်များတွင် ရောင်းချမှုရှိ/မရှိစိစစ်ရာ ရောင်းချမှုမရှိဘဲ သုံးစွဲမှုများသည့် TIGER BALM PLASTER  သာရောင်းချမှုရှိကြောင်း တွေ့ရှိရသည့်အတွက် ဆေးဝါးရောင်းချသည့်လုပ်ငန်းရှင်များ အား Bella Plus Plaster နှင့်စပ်လျဉ်း၍ ရှင်းလင်းပြောကြားခြင်း၊ ၂၀၁၉ စားသုံးသူကာကွယ်ရေး ဥပဒေပါ ကုန်ပစ္စည်းများအား ကုန်သွယ်ရောင်းဝယ်မှုပြုလုပ်ရာတွင် လုပ်ငန်းရှင်များ လိုက်နာဆောင်ရွက်ရမည့်အချက်များအား ရှင်းလင်းပြောကြား အသိပညာပေးခြင်းများ ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)

               ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ပန်းတနော် မြို့နယ်တာဝန်ခံနှင့် ဝန်ထမ်းများသည် ကျန်းမာရေးဦးစီးဌာန၊ စည်ပင်သာယာရေးအဖွဲ့နှင့် ပူးပေါင်း၍ (၁၈.၅.၂၀၂၂) နေ့ ထွန်းတောက်ဆန်စက်သို့ ကွင်းဆင်းဆောင်ရွက်ခဲ့ပါသည်။

            အဆိုပါ ကွင်းဆင်ဆောင်ရွက်မှုတွင် ပန်းတနော်မြို့နယ်တွင် ကျေးရွာအုပ်စု (၅၂) အုပ်စုရှိပြီး ရေကြီးကွင်း၊ ရေနက်ကွင်းများရှိသောကြောင့် မိုးစပါးနှင့် နွေစပါး စိုက်ဧကများတွင် ရေကျနောက်စိုက်ဟုခေါ်သော နွေစပါးစိုက်ပျိုးထုတ်လုပ်မှုများ များစွာရှိကြောင်း၊ ယနေ့ ဧည်မထစပါး တင်း (၁၀၀)လျှင် ဆန်စက်အရောက်ဈေးမှာ (၈၁၀၀၀၀) ဈေးရှိကြောင်း၊ ဆန်တစ်အိတ်လျှင် (၃၂၀၀၀) ကျပ်ဖြင့် အရောင်းအဝယ် တွင်ကျယ်နေပြီး ရန်ကုန်ဘုရင့်နောင်ဈေးကွက်ထိ တင်ပို့နေရကြောင်း ဆန်စက်ပိုင်ရှင် ဦးတင်သန်း၏ ပြောကြားချက်အရ သိရှိရပါသည်။

            ပန်းတနော်မြို့နယ်တာဝန်ခံ ဒေါ်သင်းသင်းစိုးမှ စားသုံးသူကာကွယ်‌ပေးရေးဥပဒေပါ၊ ထုတ်ကုန်လုံခြုံစိတ်ချရမှုရှိစေရေးအတွက် လိုက်နာရမည့် ဥပဒေအကြောင်း၊ SMEလုပ်ငန်းများ ဖွံ့ဖြိုးတိုးတက်စေရေးကိစ္စရပ်များကို ရှင်းပြဆွေးနွေးပြီး ရန်ကုန်ဈေးကွက်မှသည် ပြည်ပဈေးကွက်အထိ တင်ပို့နိုင်ရေးအတွက် အပြန်အလှန်ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန ၊ဒေးဒရဲမြို့နယ်စစ်ဆေးရေးအရာရှိဦးသိန်းမောင် သည် (၁၆.၅.၂၀၂၂)ရက်နေ့နေ့လည်(၀၂:၀၀)နာရီအချိန်တွင် မြို့မဈေးအတွင်းရှိ အလှကုန်အရောင်း ဆိုင်များတွင် Bella Plus Plaster ရောင်းချနေမှုရှိ/မရှိဈေးကွက်စောင့်ကြည့်ကြပ်မတ်ရေးအဖွဲ့ဖြင့် ကွင်းဆင်းစစ်ဆေးခဲ့ပါသည်။

          အဆိုပါ ကွင်းဆင်းစစ်ဆေးမှုအား မြို့နယ်အထွေထွေအုပ်ချုပ်ရေးဦးစီးဌာနနှင့် စည်ပင်သာယာရေးဦးစီးဌာနတို့ ပူးပေါင်းဆောင်ရွက်ပြီး ဒေးဒရဲမြို့နယ် မြို့မဈေးအတွင်းရှိ အလှကုန်အရောင်းဆိုင်များတွင် Bella Plus Plaster ရောင်းချနေမှုရှိ/မရှိ စစ်ဆေးရာ ရောင်းချနေမှုမရှိကြောင်း တွေ့ရှိရပါသည်။ ထိုနောက် စစ်ဆေးရေးအရာရှိသည် အလှကုန်အရောင်းဆိုင်များကို တရားမဝင်ကုန်စည်များ ရောင်းချခြင်းမပြုရန် ၊ ဝယ်ယူသုံးစွဲသူများ ဘေးအန္တရာယ်ကင်းရှင်းစေရေးအတွက် ရောင်းချသောကုန်ပစ္စည်းများတွင် ကုန်အညွှန်းအမှတ်အသားပြည့်စုံစွာဖော်ပြထားသော ကုန်ပစည်းများသာရောင်းချရန်၊ ဥပဒေနှင့်အတိုက်ညီသည့် ကုန်ပစ္စည်းများရောင်းချပါက ဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း အသိပညာပေးဆောင်ရွက်ခဲ့ပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ပုသိမ်ခရိုင်ဦးစီးမှူးရုံးမှ ဦးဝင်းမြင့် မြို့နယ်တာဝန်ခံသည် မေလ ၁၆ ရက်က ပုသိမ်မြို့၊ အောင်ချမ်းသာ(၁)လမ်းရှိ ငွေကျားအမှတ်တံဆိပ် ပဲဆီ၊ နှမ်း ဆီ၊ နေကြာဆီ ထုတ်လုပ်ရောင်းချသည့် ဆီစက်ပိုင်ရှင်အားတွေ့ဆုံပြီး စားသုံးဆီရောင်းချမှုနှင့် စပ်လျဉ်း၍ ညွှန်ကြားချက်အမှတ် (၁/၂၀၂၁)အား ရှင်းလင်းဆွေးနွေးခဲ့သည်။

          ထိုသို့ဆွေးနွေးရာတွင် ကုန်စည်အုပ်စု(၈)ခုအနက် အုပ်စု(က)ဖြစ်သော စားသောက်ကုန်စည် အုပ်စုတွင်ပါဝင်သော စားသုံးဆီအမျိုးမျိုးနှင့်စပ်လျဉ်း၍ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းပုံအညွှန်းတို့ကို မြန်မာဘာသာဖြင့် မဖြစ်မနေဖော်ပြရန် လိုအပ်ကြောင်း၊ ဈေးကွက်အတွင်းဖြန့်ဖြူးရောင်းချနေသည့် စားသုံးဆီအမျိုးမျိုးတို့ကို အမျိုးအစားအလိုက် ကုန်အညွှန်းအမှတ်အသားဖော်ပြရာတွင် ပါဝင်ပစ္စည်းများကို တိကျစွာ မြန်မာဘာသာဖြင့်ဖော်ပြရမည်ဖြစ်ကြောင်း၊ အသားတင်ပမာဏနှင့် အရွယ်အစားတို့အား မြန်မာအလေးချိန်ယူနစ်ဖြစ်သော ပိဿာ/ ကျပ်သားတို့ဖြင့်သာဖော်ပြရမည်ဖြစ်ကြောင်း၊ စီးပွားရေးလုပ်ငန်းရှင်များအနေနှင့် ကုန်အညွှန်းအမှတ်အသားဖော်ပြရာတွင် ကိုက်ညီမှုရှိ၊မရှိကို စားသုံးသူရေးရာဦးစီးဌာနတွင် တင်ပြလျှောက်ထားရန်နှင့် ကုန်အညွှန်းအမှတ်အသားရရှိပြီးမှသာလျှင် ဈေးကွက်တွင်ဖြန့်ဖြူး ရောင်းချရမည်ဖြစ်ကြောင်း၊ ညွှန် ကြားချက်များကို တိကျစွာလိုက်နာဆောင်ရွက်မှုမရှိပါက စားသုံးသူကာကွယ်ရေးဥပဒေအရ ပြစ်မှု ပြစ်ဒဏ်များကျခံရမည်ဖြစ်ကြောင်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

            မွန်ပြည်နယ်၊ စားသုံးသူရေးရာဦးစီးဌာနမှ ဘီးလင်းမြို့နယ်တာဝန်ခံနှင့် ဝန်ထမ်းများသည် ဘီးလင်းမြို့ပေါ်ရှိ ဆေးဆိုင် (၉) ဆိုင်သို့ သွားရောက်၍ Bella Plus Plaster အား ဈေးကွက်အတွင်း ရောင်းချနေခြင်းရှိ/မရှိကို ၂၀၂၂ ခုနှစ်၊ မေလ (၁၇) ရက်နေ့တွင် ဈေးကွက်စောင့်ကြည့် စစ်ဆေးခဲ့ကြပါသည်။

                Bella Plus Plaster သည် ထုတ်လုပ်သည့်နိုင်ငံ၊ ထုတ်လုပ်သည့် ကုမ္မဏီ၊ တင်သွင်းသည့် ကုမ္မဏီ၊ ဆေးဝါးမှတ်ပုံတင်အမှတ်နှင့် Import Registration No.(12) များဖော်ပြထားခြင်းမရှိဘဲ ဈေးကွက်အတွင်း ရောင်းချလျက်ရှိသောကြောင့် တရားဝင်တင်သွင်းရောင်းချနေသူများအနေဖြင့် အကျိုး စီးပွားထိခိုက်နစ်နာနေမှုများ ကြုံတွေ့နေရသဖြင့် စားသုံးသူရေးရာဦးစီးဌာနမှ ဈေးကွက်စောင့်ကြည့် စစ်ဆေးခဲ့ရာ ဘီးလင်းမြို့ရှိဆေးဆိုင်များ၌ Bella Plus Plaster နှင့် ပတ်သက်၍ ဈေးကွက်အတွင်း ရောင်းချနေခြင်းမရှိကြောင်း သိရှိရပါသည်။

DOCA(မွန်)