ပြည်တွင်းကုန်သွယ်မှုသတင်း

                 ရှမ်းပြည်နယ်(အရှေ့ပိုင်း) တာချီလိတ်ခရိုင်၊ တာချီလိတ်မြို့နယ်အတွင်းရှိ ဖန်မင်အုပ်စု၊ ဝမ်ကောကျေးရွာနှင့် တာလေမြို့နယ်ခွဲတို့တွင် GAP-Good Agriculture Practices စနစ်ဖြင့် (သီးနှံများစတင် စိုက်ပျိုးရန် မြေစတင်ရွေးချယ်ချိန်မှစ၍ စားသုံးသူများ လက်ဝယ်ရောက်ရှိသည် အထိ စိုက်ပျိုးထုတ်လုပ်မှုအဆင့်တိုင်းကို သီးနှံများ၌ ဓာတုဆေးများ၊ ကူးစက်မှုများစသည့် ဘေးအန္တရာယ်ကင်းရှင်းရေးကို အထူးဂရုပြုဆောင်ရွက်ခြင်း အလေ့အကျင့်ကောင်း) စိုက်ပျိုးထား ရှိသော ပျားလိမ္မော်ဧက(၅၀၀)ကျော်ပိုင်ဆိုင်သော ရွှေရှင်းပျားလိမ္မာ်ခြံ၏ စိုက်ဧက၊ သွင်းအားစု၊ သီးနှံထွက်ရှိမှုအခြေအနေနှင့် ဈေးနှုန်း/ဈေးကွက်အခြေအနေတို့အား သိရှိနိုင်ပါရန် ရွှေရှင်းပျား လိမ္မော်ခြံ လုပ်ငန်းရှင်နှင့် တွေ့ဆုံမေးမြန်းခဲ့ပါသည်။

                ပျားလိမ္မော်သည် အေး၍ စိုစွတ်သော ရာသီဥတုကို နှစ်သက်၍ ရေသွင်းစိုက်ပျိုးရသော သီးနှံအမျိုးအစားဖြစ်သော်လည်း ရေဝပ်မှုဒဏ်ကိုမခံနိုင်သော အပင်မျိုးဖြစ်ပါသည်။ လေဝင် လေထွက်ကောင်းရန်အတွက် ပင်ခြားတန်းခြား (၉'×၁၈') ခြား၍ စိုက်ပျိုးရသော အပင်မျိုး ဖြစ်ပြီး တစ်နှစ်သားအောက်အပင်များကို သဘာဝမြေဩဇာဖြစ်သော နွားချေးကို(၃)လတစ်ကြိမ် ထည့်သွင်း ပေးရပါသည်။ အပင်သုံးနှစ်သားအရွယ်မှသာ အသီးစတင်ခူးစွတ်ပြီး အသီးမခူးစွတ်မီ(၃)ပတ်အလို တွင် ပိုးသတ်ဆေးပက်ဖြန်းခြင်း မပြုလုပ်တော့ကြောင်း သိရှိရပါသည်။

              အသီးခူးစွတ်ချိန်မှာ ဒီဇင်ဘာလမှ မတ်လအထိဖြစ်ပြီး အသီးခူးစွတ်ရာတွင် အသီးအတွဲလိုက် ရှိသော အကိုင်းအခက်များကို ကတ်ကြေးဖြင့် ဖြတ်တောက်ပြီးနောက် အသီးတစ်လုံးခြင်းစီ ဖြစ်အောင် ပြန်လည်ဖြတ်တောက်ကာ ၎င်းအသီးများကို သန့်ရှင်းအောင်ပြုလုပ် ထုပ်ပိုးကြပါသည်။ ပျားလိမ္မော် တစ်ပင်လျှင် အထွက်နှုန်းကီလို (၅၀) မှ (၆၀)အထိ ထွက်ရှိကြောင်း ယခုနှစ်တွင် တစ်ကီလိုဈေးနှုန်းမှာ ကျပ်(၂၅၀၀) မှ ကျပ်(၃၀၀၀)အထိ ပေါက်ဈေးရှိပြီး ယခင်နှစ် တစ်ကီလို ဈေးနှုန်းမှာ ကျပ်(၂၀၀၀)မှ ကျပ်(၃၀၀၀)အထိ ရှိသဖြင့် ဈေးပိုမိုရရှိကြောင်း တွေ့ရှိရပါသည်။

                 ရွှေရှင်းပျားလိမ္မော်ခြံအနေဖြင့် ဒေသအတွင်းဖြစ်သော ကျိုင်းတုံခရိုင်၊ တာချီလိတ်ခရိုင်နှင့် မိုင်းဆတ်ခရိုင်များရှိ မြို့နယ်များသို့ ဖြန့်ဖြူးရောင်းချလျက်ရှိပါသည်။ ပြည်မ (ရန်ကုန်-မန္တလေး)မြို့ များသို့ တင်ပို့ရန်ဆန္ဒရှိသော်လည်း လမ်းပန်းဆက်သွယ်ရေးကွာဝေးခြင်းနှင့် သယ်ယူစရိတ်ကြီးမြင့် ခြင်းစသည့်အခက်အခဲများကြောင့် နယ်စပ်ဒေသဖြစ်သည့်အလျောက် အိမ်နီးချင်းနိုင်ငံများသို့ တင်ပို့ ရန်သာ အဓိကထားဆောင်ရွက်လျက်ရှိပါသည်။ ယခင်နှစ်က ထိုင်းနိုင်ငံသို့ ပျားလိမ္မော် တန်ချိန် (၁၀၅၆)တန် တင်ပို့နိုင်ခဲ့ပြီး ယခုနှစ်တွင် ဒေသအတွင်းစားသုံးရန်အတွက်သာ ဖြန့်ဖြူးရောင်းချနိုင်ပါသည်။ ထိုင်းနိုင်ငံမှ ဝယ်ယူမည်ဆိုပါက လက်ရှိတွင် တန်ချိန်(၂၀၀)ခန့်တင်ပို့နိုင်ရန် အဆင်သင့်ရှိ ကြောင်းသိရှိရပါသည်။

          ရွှေရှင်းပျားလိမ္မော်ကို ယခုနှစ်တွင် ယခင်နှစ်ကဲ့သို့ ပြင်ပတင်ပို့ရန် နှောင့်နှေးကြန့်ကြာနေရ ခြင်းမှာ ထိုင်းနိုင်ငံအနေဖြင့် ၎င်းနိုင်ငံတွင် စိုက်ပျိုးထွက်ရှိသည့် ပျားလိမ္မော်များကိုသာ အဓိကထား ဖြန့်ဖြူးရောင်းချလျက်ရှိပြီး နိုင်ငံအတွင်းဖြန့်ဖြူးရောင်းချရန် မလုံလောက်သည့် အခြေအနေမှသာ တင်သွင်းခွင့်ကို လက်ခံဆောင်ရွက်မည်ဖြစ်ခြင်း၊ ထိုင်းနိုင်ငံ၏ ပုဂ္ဂလိကဓာတ်ခွဲခန်းထောက်ခံချက်ရ မှသာ တင်သွင်းခွင့်ပြုသည့်အတွက် ထောက်ခံချက်ရရှိရန်ခက်ခဲခြင်း၊ ကမ္ဘာ့ကပ်ရောဂါ Covid-19 ရောဂါဖြစ်ပွားလျက်ရှိခြင်းတို့ကြောင့် ရွှေရှင်းပျားလိမ္မော်အနေဖြင့် ထိုင်းနိုင်ငံသို့ တင်ပို့ရောင်းချရန် အဆင်သင့် ဖြစ်နေပြီဖြစ်သော်လည်း တင်ပို့နိုင်ခြင်းမရှိသေးကြောင်း သိရှိရပါသည်။

DOCA(ရှမ်း)

          ပဲခူးတိုင်းဒေသကြီး၊ သာယာဝတီခရိုင်သည် ဆန်စပါးပဲမျိုးစုံ အဓိကထားစိုက်ပျိုး ထုတ်လုပ်နေ သောခရိုင်တစ်ခုဖြစ်ပြီး ယခုနှစ်မိုးစပါးစိုက်ဧက (၆၇၅၅၉၂) ဧကစိုက်ပျိုးခဲ့ပြီးဖြစ်ပါသည်။ နွေစပါးစိုက် ဧက(၇၉၀၀၃) ခန့် စိုက်ပျိုးရန်လျာထားလျက်ရှိပြီး လက်ပံတန်းမြို့နယ်တွင် နွေစပါး(၁၂၁၀၀) ဧကခန့် လျာထား စိုက်ပျိုးမည်ဖြစ်ကြောင်းသိရှိရပါသည်။

          သာယာဝတီခရိုင် စီမံအုပ်ချုပ်ရေးအဖွဲ့မှ ဒုတိယဗိုလ်မှူးကြီး အောင်စည်သူနှင့်အဖွဲ့၊ ခရိုင်စိုက်ပျိုးရေးဦးစီးနှင့် အဖွဲ့ဝင်များ၊ လက်ပံတန်းမြို့နယ်စိုက်ပျိုးရေးအဖွဲ့များ၊ စားသုံးသူရေးရာဦးစီးဌာန၊ သာယာဝတီခရိုင်၊ ဒု-ခရိုင်ဦးစီးမှူးဦးသန်းစိုး၊ သတင်းအချက်အလက်နှင့် နည်းပညာဌာနခွဲ တာဝန်ခံ ဒေါ်ကြည်ကြည်ချိုနှင့် လက်ပံတန်းမြို့နယ်တာဝန်ခံ ဦးချစ်ကိုကိုတို့သည် (၁၈.၁.၂၀၂၂) နေ့ နံနက်(၉:၀၀)နာရီ အချိန်တွင် လက်ပံတန်းမြို့နယ် ကျွန်းကလေးအုပ်စု ၊ ကျွန်းကလေးကျေးရွာ အထွက်တိုး နယ်မြေရှိ လယ်စိုက်တောင်သူ ဦးမြင့်ရွှေ၏ နွေစပါးစိုက်ဧက (၆)ဧက စိုက်ခင်းနေရာသို့ သွားရောက်တွေ့ဆုံလေ့လာခဲ့ပါသည်။

          စပါးစိုက်တောင်သူ ဦးမြင့်ရွှေနှင့် တွေ့ဆုံမေးမြန်းရာတွင် မျိုးစေ့ထုတ်စိုက်ခင်းအား ၎င်းကိုယ်တိုင် ဦးစီးဆောင်ရွက်စိုက်ပျိုးနေခြင်းဖြစ်ပြီး တောင်သူဦးမြင့်ရွှေသည် ပြည်တွင်း၌ ဖွင့်လှစ်သော စိုက်ပျိုးရေးသင်တန်းများအပြင် ပြည်ပနိုင်ငံ(၃)နိုင်ငံတို့တွင် စိုက်ပျိုး‌ရေးနှင့်ပတ်သက်သော နည်းပညာများသင်ယူလေ့လာခဲ့သော သူတစ်ယောက်ဖြစ်ပြီး စပါးစိုက်ပျိုးရန်အတွက် လယ်ယာမြေ ပြုပြင်ရာတွင်စက်ဖြင့်(၄)စပ်ထွန်ယက်ရပါသည်။ ၁၇ ဗန်း ထွန်စက်၂စပ်၊ ၁စပ်လျှင် ထွန်ယက်ခနှုန်း ၁၇၀၀၀ကျပ်၊ ၂စပ် ထွန်ယက်ခ (၃၄၀၀၀)ကျပ်ဖြင့် ထွန်ယက်ပြီးသော မြေပြင်အားမြေညှိတမံခုတ်ရန် ဒလက်ခုတ်စက် ၂စပ်၊ တစ်စပ်လျှင် (၁၈၀၀၀)ကျပ်ဖြင့် ၂စပ်ခုတ်ခ (၃၆၀၀၀)ကျပ်ကုန်ကျကြောင်း သိရှိရပါသည်။ မြေပြုပြင်ပြီးစိုက်ပျိုးရန်အသင့်ရှိသော မြေပြင်အား ဂျပန်နိုင်ငံထုတ်ဦးကျားကူး အမှတ် တံဆိပ်ပါ မြေဆီကိုမြေခံအဖြစ်အသုံးပြုရပြီး မြေဆီတစ်အိတ်လျှင် ကျပ်(၆၀၀၀၀/-) စျေးနှုန်းဖြင့် ဝယ်ယူရပါသည်။ တစ်ဧကသုံးစွဲမှုအနေဖြင့် (၁/၂)အိတ် သုံးစွဲရပါသည်။ DW-11စပါးမျိုးတစ်တင်းလျှင် (၂၉၀၀၀/-)ဖြင့် စိုက်ဧက(၆)ဧက စိုက်ပျိုးရန်အတွက် (၄၆) ပေါင်၊ (၅)တင်းစိုက်ပျိုးရရှိပါသည်။ ပျိုးပင်အသက်(၁၅)ရက်မှ (၁၉)ရက်အတွင်း စတင်စိုက်ပျိုးရပါသည်။ ကောက်စိုက်စက်အားအသုံးပြု၍ စိုက်ပျိုးရာတွင် တစ်ဧကစိုက်ခနှုန်း (၂၅၀၀၀)နှုန်းဖြင့် တစ်နေ့လျှင်(၅)ဧက စိုက်ပျိုးနိုင်ပါသည်။ စတင်ပျိုးထောင်ချိန်မှ စိုက်ပျိုးပြီးချိန်အထိ လုပ်သားနှစ်ဦးဖြင့် (၁၀) ရက်ခန့် လုပ်ကိုင်ရပြီး တစ်ရက်လုပ်ခ တစ်ဦးလျှင်(၇၀၀၀/)ကျပ်ခန့်ဖြင့် ကုန်ကျငွေ (၁၄၀၀၀၀/)ကျပ်ကုန်ကျပါသည်။ စုစုပေါင်းကုန်ကျစရိတ်တစ်ဧကလျှင် (၃၆၀၀၀၀/) ကျပ်ကုန်ကျမည်ဖြစ်ပြီး တစ်ဧကစပါးထွက်ရှိမှု နှုန်းမှာ တင်းပေါင်း (၁၅၀)ကျော်ထွက်ရှိနိုင်မည်ဟုခန့်မှန်း သိရှိရပါသည်။

          ကောက်စိုက်စက်ဖြင့် စိုက်ပျိုးရန်အတွက်မြေပြင်ရာတွင်အရေးကြီးသော အချက်နှစ်ချက်ရှိပါ သည်။ အဓိကမှာ(၁) သမန်းပြင် ညီညာပြန့်ပြူးရမည်ဖြစ်ပြီး အတက်နိုင်ဆုံး‌ရေမဝပ်ရန်ဆောင်ရွက် ရပါသည်။ (၂) ရေသွင်းရေထုတ်အလွယ်တကူလုပ်နိုင်ရပါသည်။ တောင်သူများအနေဖြင့် ကောက်စိုက် စက်ဖြင့်စိုက်ပျိုးခြင်းအလေ့အထကောင်းများ ပါဝင်လက်ခံလာစေရေးအတွက်နွေစပါး ရာသီချိန်တွင်သာ အဓိကထား စည်းရုံးလုပ်ဆောင်ခြင်းသည် အဆင်အပြေဆုံးဖြစ်ပါသည်။ ထို့သို့စိုက်ပျိုးရာတွင် စပါးပျိုးပင်တန်း ကြား(၁၁)လက်မ၊ ပင်ကြား(၄-၅)လက်မစိုက်စက်ဖြင့်စိုက်ပျိုးခြင်းဖြစ်သည့်အတွက် အပင်အစိပ်အကျဲ ညီညာခြင်း၊  ကောက်ကွက်တစ်သိန်းနှစ်သောင်းကျော် အထိဝင်အောင် စိုက်ပျိုးနိုင်ခြင်း၊ လေဝင် လေထွက် ကောင်းခြင်းကြောင့် ပိုးမွှား‌‌ရောဂါများကျရောက်မှုနည်းပါးခြင်း၊ စိုက်ပျိုးပြီးချိန်တွင် သမန်းပြင်အား ရေနှစ်လက်မခန့်တွင် ထားခြင်းကြောင့် ပေါင်းမြက်မပေါက်ရောက်နိုင်ခြင်း၊ ကြဲခင်းများကဲ့သို့ ပေါင်းသတ်ဆေးအသုံးပြုရန်မလိုအပ်ခြင်း၊ စက်သုံးဆီလျှော့ချသုံးစွဲနိုင်ခြင်း၊ အထွက်တိုးခြင်းနှင့် မျိုးကောင်းမျိုးသန့်များ ထုတ်လုပ်ရရှိနိုင်ခြင်းစသည့်အကျိုး ကျေးဇူးများရရှိနိုင်ကြောင်းသိရှိရပါသည်။

DOCA(ပဲခူး)

         ယခုအချိန်၌ ရှမ်းပြည်နယ်(တောင်ပိုင်း) ၊ တောင်ကြီး ၊ ဟဲဟိုး နှင့် အောင်ပန်းဒေသများတွင် ပဲလိပ်ပြာများ အများအပြားထွက်ရှိလျက်ရှိပါသည်။ ပဲလိပ်ပြာကို ထောပတ်ပဲ၊  မောင်မခေါ်ပဲ၊ ပဲဆိတ်တိုစသဖြင့်လည်းအမျိုးမျိုးခေါ်ဝေါ်ကြပြီး အရသာမှာ စိမ့်သောအရသာရှိသောကြောင့် လူကြိုက်များသောပဲတစ်မျိုးဖြစ်သည်။ ရှမ်း(တောင်) တွင် ပဲလိပ်ပြာကို မေလ နှင့် ဇွန်လများတွင် စိုက်ပျိုးကြပြီး ဇူလိုင်၊ ဩဂုတ်လများတွင် စတင်ထွက်ပေါ်ကာ ဖေဖော်ဝါရီ လအထိ ထွက်ရှိကြောင်းသိရှိရသည်။

       ပဲလိပ်ပြာသည် အရသာကောင်းမွန်ရုံသာမက ဈေးနှုန်းအနေဖြင့်လည်း လက်လီ တစ်ဗူးလျှင် ရာသီပေါ်ဈေး (ကျပ် ၂၀၀မှ ၃၀၀ခန့်အတွင်း) မျှသာရှိပါသည်။ ပဲလိပ်ပြာ အများအပြားထွက်ရှိချိန်၌ အခြောက်ခံထားပြီး  ရာသီကုန်ဆုံးချိန်ရောက်လျှင် (ပဲလိပ်ပြာ ခြောက်)အဖြစ် တစ်ဗူးလျှင် (ကျပ်၈၀၀ မှ ၁၀၀၀ခန့်အထိ) ရောင်းချကြကြောင်းလည်း သိရှိရပါသည်။ ပဲလိပ်ပြာကို  ကြော်ခြင်း၊ နှပ်ခြင်း၊ ဟင်းရည်သောက်ချက်စားခြင်းများ အမျိုးမျိုးပြုလုပ်စားသုံးကြပြီး ယခုရာသီအချိန်၌ ပဲလိပ်ပြာဝယ်လိုအားမြင့်တက်လျက်ရှိကြောင်း သတင်းရရှိရပါသည်။

စားသုံးသူရေးရာဦးစီးဌာန

ရှမ်းပြည်နယ်

        စာသုံးသူရေးရာဦးစီးဌာန၊ မုံရွာခရိုင်ဦးစီးမှူးဦးဆောင်ပြီး စစ်ကိုင်းတိုင်းဒေသကြီး ဦးစီးမှူးရုံးမှ တာဝန်ရှိသူများနှင့် ဒု-ခရိုင်ဦးစီးမှူးတို့သည် ၂၆.၁.၂၀၂၂ရက်နေ့တွင် မုံရွာမြို့နယ်၊ ရွာတုံရပ်ရှိ စစ်ကိုင်းတိုင်းဒေသကြီး မုန့်လုပ်ငန်းရှင်များအသင်းမှ ဦးစီးတည်ထောင်သည့် မုန့်လုပ်ငန်းဇုန်သို့သွားရောက်၍ အသင်း၏ ဒုတိယဥက္ကဌနှင့်တွေ့ဆုံ၍ မုန့်လုပ်ငန်းဇုန်နှင့်သက်ဆိုင်သော အချက်အလက်များအား တွေ့ဆုံမေးမြန်းရာ ဒုတိယဥက္ကဌက မိမိတို့၏ မုန့်လုပ်ငန်းဇုန်ကို ၂၀၁၈-၂၀၁၉ ခုနှစ်တွင် စတင်တည်ထောင်ခဲ့ပြီး ၂၀၂၁ခုနှစ်၊ ဇန်နဝါရီလတွင် နှစ်(၅၀) ရင်းနှီးမြှုပ်နှံခွင့်ပြုသည့် ခွင့်ပြုစာရရှိခဲ့ကြောင်း၊ မြေဧက(၇၀)ကျော်ဖြင့် ကွက်စိပ်ရိုက်ထားပြီး လုပ်ငန်းရှင်ပေါင်း(၃၀၀)‌ကျော်အထိ လုပ်ကိုင်နိုင်ကြောင်း၊ လက်ရှိတွင် လုပ်ငန်းရှင်(၂၀၀)ကျော်ရှိပြီးဖြစ်ကြောင်း၊ ၂၀၂၂ ခုနှစ် ဖေဖော်ဝါရီလတွင် နှစ်ပတ်လည် မုန့်လုပ်နည်းပညာသင်တန်းကျောင်း ဖွင့်လှစ်ရန် စီစဉ်ထားကြောင်း၊ သင်တန်းကျောင်းတွင် မူလတန်း၊ အလယ်တန်း၊ အထက်တန်း ဟူ၍ အဆင့်(၃)မျိုးခွဲပြီးဖွင့်လှစ် သင်ကြားပေးမည်ဖြစ်ကြောင်း၊ သင်တန်း သားလက်ခံရာတွင်လည်း ကျန်းမာရေးဝန်ကြီးဌာနက သတ်မှတ်ပေးထားသော ကိုဗစ်-၁၉ စည်းကမ်း ချက်များနှင့်အညီ သင်တန်းသားဦးရေကို ကန့်သတ်လက်ခံမည်ဖြစ်ကြောင်း၊ လက်ရှိ မုံရွာမြို့ပေါ်အနေဖြင့် မုန့်လုပ်ငန်းရှင် (၈၀)ကျော်ထိရှိကြောင်း၊ မိမိတို့အနေဖြင့် မုန့်လုပ်ငန်းရှင်အသင်းနှင့် မုန့်လုပ်ငန်းဇုန်ကို စားသုံးသူများ ဘေးအန္တရာယ်ကင်းရှင်းစေရေးနှင့် အနာဂတ်ဒေသ ဖွံ့ဖြိုးတိုးတက်ရေးကို ဦးတည်၍ ဆောင်ရွက်နေပါကြောင်း တင်ပြခဲ့ရာ ဌာနမှ တာဝန်ရှိသူများက မုန့်လုပ်ငန်း ဇုန်တည်ထောင်မှုနှင့် မုန့်လုပ်ငန်းရှင်အသင်း စတင်ဖွဲ့စည်းမှု အခြေအနေများနှင့်ပတ်သက်၍ သိလိုသည့်အချက်အလက်များအား မေးမြန်းပြီးနောက် ခရိုင်ဦးစီးမှူးက ဇုန်အတွင်းလုပ်ကိုင်ကြသော အသင်းဝင်လုပ်ငန်းရှင် တစ်ဦးချင်းတွေ့ဆုံ၍ စားသုံးသူကာကွယ်ရေး ဥပဒေပါ လုပ်ငန်းရှင်များ လိုက်နာရမည့်တာဝန်များ၊ ကုန်အညွှန်းအမှတ်အသားနှင့်စပ်လျဉ်းပြီး ဆောင်ရွက်ရမည့်အချက်များကို ဌာနအနေဖြင့်ဆွေးနွေးခြင်း၊ လက်ကမ်းစာစောင်များကို ဖြန့်ဝေပေးခြင်းများ ဆောင်ရွက်ခဲ့ပြီး စားသုံးသူကာကွယ်ရေးဥပဒေကို ပို၍လွှမ်းခြုံမှုရှိစေရန် အသင်းဒု-ဥက္ကဌအနေဖြင့် မိမိ၏အသင်းသားလုပ်ငန်းရှင်များကို ထပ်မံဖြည့်စွက်၍ လက်ဆင့်ကမ်း အသိပညာပေးစေလိုကြောင်း ဆွေးနွေးပြောကြားခဲ့ပါသည်။

DOCA(စစ်ကိုင်း)

          အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ၂၀၂၂ခုနှစ်၊ ဇန်နဝါရီလ (၁၈)ရက်နေ့မှ ဇန်နဝါရီလ (၂၆)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊ မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါသည်။ ထိုသို့ ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်(ပိဿာ) ကျပ် (၁၄၀၀) မှ (၂၄၀၀) အတွင်း၊ ဂေါ်ဖီထုပ်(တစ်ထုပ်) ကျပ် (၁၂၀၀) မှ (၂၀၀၀)အတွင်း၊ ပန်းဂေါ်ဖီ(ထုပ်) ကျပ် (၈၀၀) မှ (၁၉၀၀)အတွင်း၊ အာလူး(ပိဿာ) ကျပ်(၁၈၀၀) မှ (၂၃၀၀)အတွင်း၊ မုန်လာဥနီ(ပိဿာ) ကျပ်(၁၇၀၀) မှ (၂၂၀၀)အတွင်း၊ ရွှေဖရုံသီး(လုံး) ကျပ်(၁၀၀၀) မှ (၁၅၀၀)အတွင်း၊ ဗူးသီး(လုံး) ကျပ် (၈၀၀) မှ (၁၅၀၀)အတွင်း၊ မုန်ညှင်း(ထုပ်) (ပိဿာ)ကျပ်(၁၀၀၀) မှ (၁၂၀၀)အတွင်း၊ ကြက်သွန်နီ(ဆိပ်ဖြူ) ကျပ်(၆၀၀) မှ (၁၂၀၀)အတွင်း၊ ကြက်သွန်ဖြူ(ရှမ်း)(ပိဿာ) (၂၅၀၀) မှ (၃၀၀၀)အတွင်း၊ ကြက်သွန်ဖြူ(ကြူကုတ်)(ပိဿာ) ကျပ်(၂၄၀၀) မှ (၃၀၀၀)အတွင်း၊ ချင်း(ပိဿာ) ကျပ်(၁၅၀၀) မှ (၁၈၀၀)အတွင်း၊ ဆလပ်ရွက်(စီး) ကျပ်(၂၀၀) မှ (၃၅၀)အတွင်း၊ ချဉ်ပေါင်ရွက်(စီး) ကျပ်(၆၀) မှ (၁၂၀)အတွင်း၊ ခရမ်းသီး(ရှည်)(လုံး) ကျပ်(၇၀) မှ (၁၅၀)အတွင်း၊ သံပရာသီး(လုံး) ကျပ်(၇၀) မှ (၁၅၀)အတွင်း၊ ငရုတ်သီးစိမ်း(ကျောက်စိမ်း)(ပိဿာ) (၉၀၀) မှ (၁၂၀၀)အတွင်း၊ ဖရဲသီး (အကြီး၊ အလတ်၊အသေး) ကျပ်(၁၅၀၀) မှ (၄၅၀၀)အတွင်း ဖြစ်ကြောင်းသိရှိရပါသည်။ တညင်းကုန်း လက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၂၁၃၀၀)ကျော်၊ ခရမ်းသီး(ရှည်)(လုံး) (၁၉၈၀၀)ကျော်၊ ဗူးသီးအလုံးပေါင်း (၈၁၅၀)ကျော်၊ ရွှေဖရုံသီးအလုံးပေါင်း (၇၄၀၀)ကျော်၊ ဂေါ်ဖီထုပ်ပေါင်း (၁၈၆၀၀)ကျော်၊ ပန်းဂေါ်ဖီထုပ်ပေါင်း (၁၆၉၀၀)ကျော်၊ မုန်ညှင်းထုပ်(ပိဿာ)ပေါင်း(၆၈၀၀)ကျော်၊ ဖရဲသီးလုံးပေါင်း(၂၃၅၀၀)ကျော် အသီးသီးကုန်အဝင်ရှိ ကြောင်းသိရှိရပါသည်။

စားသုံးသူရေးရာဦးစီးဌာန

ရန်ကုန်တိုင်းဒေသကြီး