ပြည်တွင်းကုန်သွယ်မှုသတင်း

       စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး ဦးကျော်ကျော်လွင်နှင့် တာဝန်ရှိသူများ၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ ဒေါ်နှင်းစန္ဒာတို့သည် ၂၀၂၂ ခုနှစ်၊ ဇွန်လ ၂၄ ရက်နေ့ (နံနက် ၉း၃၀) နာရီတွင် စစ်ကိုင်းတိုင်းဒေသကြီး၊ မုံရွာမြို့ရှိ မုံရွာပညာရေးဒီဂရီကောလိပ်တွင် ကျင်းပပြုလုပ်သည့် စားသုံးသူရေးရာ အသိပညာပေးဟောပြောပွဲ၌ သက်ဆိုင်ရာခေါင်းစဉ်များဖြင့် အသိပညာပေး ဟောပြောဆွေးနွေးကြပါသည်။

      အဆိုပါ ဟောပြောဆွေးနွေးပွဲ၌ ရှေးဦးစွာ မုံရွာပညာရေးဒီဂရီကောလိပ်မှ ကျောင်းအုပ်ဆရာမကြီး ဒေါက်တာမင်းမင်းသိန်းက ကြိုဆိုနှုတ်ခွန်းဆက်စကားပြောကြားရာတွင် မိမိတို့ကောလိပ်သို့စားသုံးသူရေးရာကိစ္စရပ်များနှင့် စပ်လျှဉ်း၍ ယခုကဲ့သို့ လာရောက်ဆွေးနွေးဟောပြောပေးသည့်အတွက် တာဝန်ရှိသူများအား အထူး ကျေးဇူးတင်ရှိပါကြောင်း၊ မိမိတို့လူနေမှုဘဝအတွက် အရေးကြီးသည့် မှတ်သားဖွယ်ဗဟုသုတများ ရရှိနိုင်မည်ဟု မျှော်လင့်ပါကြောင်း၊ ယခုဟောပြောပွဲမှ ရရှိသော သိမှတ်ဖွယ်ဗဟုသုတများကို ဆရာ၊ဆရာမအနေဖြင့် မိမိတာဝန်ကျရာကျောင်းများသို့ ရောက်ရှိသောအခါ ပြန်လည်ဝေမျှကြရမည် ဖြစ်ပါကြောင်း ပြောကြားပါသည်။

       ထို့နောက် စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးမှ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနဖွဲ့စည်းပုံ၊ ဝန်ကြီးဌာနအောက်ရှိဦးစီးဌာနများ၏ လုပ်ငန်းဆောင်ရွက်နေမှုများ၊ စားသုံးသူအခွင့်အရေးများဖြစ်ပေါ်လာပုံ သမိုင်း၊ စားသုံးသူရေးရာဦးစီးဌာနသမိုင်း၊ ဌာန၏မျှော်မှန်းချက်၊ ရည်မှန်းချက်တာဝန်များ၊ ဌာနကဆောင်ရွက်လျက်ရှိသောလုပ်ငန်းများကို မိတ်ဆက်ရှင်းလင်း ဟောပြောပါသည်။

     ဆက်လက်၍ စားသုံးရေးရာဦးစီးဌာနမှ ဒုတိယညွှန်ကြားရေးမှူး ဒေါ်ရီလင်းထွဋ်က စားသုံးသူ ရေးရာဦးစီးဌာနမှ ဆောင်ရွက်လျက်ရှိသောလုပ်ငန်းများ၊ စားသုံးသူကာကွယ်ရေးဥပဒေပါ စားသုံးသူ အခွင့်အရေးနှင့်တာဝန်များနှင့်ပတ်သက်၍ အသေးစိပ်ရှင်းလင်းဟောပြောခြင်း၊ ဒုတိယညွှန်ကြားရေးမှူး ဦးဝေဖြိုးထက်က စားသုံးသူရေးရာဦးစီးဌာနသို့ ဆက်သွယ်တိုင်ကြားနိုင်သည့် နည်းလမ်းများနှင့် ဌာနကဖြေရှင်းဆောင်ရွက်ပေးခဲ့သည့် စားသုံးသူအငြင်းပွားမှုများနှင့် ပတ်သက်၍ နမူနာဖြစ်စဉ် များနှင့်တကွ ရှင်းလင်း​ဟောပြောခြင်း၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ တိုင်းဒေသကြီးတာဝန်ခံ ဒေါ်အေးမြသိင်္ဂီ က အစားအသောက်၊ ဆေးဝါးနှင့် အလှကုန်များကို  ဘေးအန္တရာယ်ကင်းရှင်းစွာအသုံးပြုနိုင်ရေး လိုက်နာဆောင်ရွက်သင့်သည့် အချက်များကို ရှင်းလင်းဟောပြောခြင်းများ ဆက်လက်ဆောင်ရွက်ခဲ့ကြပြီး တက်ရောက်လာသူများက သိလိုသည်များ မေးမြန်မှုအပေါ် သက်ဆိုင်ရာကဏ္ဍအလိုက် အသီးသီး​ဆွေးနွေးဖြေကြားပေးခဲ့ပါသည်။

    အဆိုပါ စားသုံးသူရေးရာအသိပညာပေးဟောပြောပွဲသို့ မုံရွာပညာရေးဒီဂရီကောလိပ်မှ ကျောင်းအုပ်ဆရာမကြီးနှင့် ဆရာ၊ဆရာမများ၊ ကျောင်းသား၊ကျောင်းသူများ စုစုပေါင်း ၅၀၀ ဦးခန့်တက်ရောက်ခဲ့ကြပြီး စားသုံးသူရေးရာအသိပညာပေး လက်ကမ်းစာစောင်များ၊ အစားအသောက်နှင့် ဆေးဝါးကွပ်ကဲရေးဦးစီးဌာမှ ပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

              ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ်တွင် ၂၀၂၂-၂၀၂၃ ခုနှစ်၊ ဆီထွက်သီးနှံ စိုက်ပျိုးမှုစာရင်းတွင် မိုးနှမ်း ၁၀၁ ဧက စိုက်ပျိုးထားရှိကြောင်း သက်ဆိုင်ရာ ဦးစီးဌာန၏ စာရင်းများ အရ သိရှိရပါသည်။ မိုးမြေပဲ၊ နှမ်း စသည့် ဆီထွက်သီးနှံများ စစ်တောင်းမြစ်ဘေးရှိ သဲနှုံးမြေများတွင် အများဆုံးစိုက်ပျိုးကြပါသည်။ ဇွန်လ ၁၉ ရက် မနက် ၁၀ နာရီအချိန်တွင် တောင်ငူမြို့နယ် တာဝန်ခံသည် သက်ဆိုင်ရာဌာနဆိုင်ရာများနှင့် ပူးပေါင်း၍  စစ်တောင်းမြစ်ဘေးရှိ ကျေးရွာ စိုက်ခင်း များရှိရာသို့ ကွင်းဆင်းလေ့လာရာ အရှေ့ဆင်ကျေးရွာအုပ်စု၊ ဆင်ရွာလေးရွာ၊ မကုန်ရွာ၊ နောင်ဘိုရွာ၊ နောင်ချိုရွာ၊ ကမ္ဘားနီရွာ၊ သဲတောရွာ၊ တာနှောင်းရွာရှိ တောင်သူဦးကြီးများ စိုက်ပျိုးထားသော နှမ်းခင်းများ အောင်မြင်ဖြစ်ထွန်းလျက်ရှိကြောင်း တွေ့ရှိရပါသည်။

              နှမ်းစိုက်ပျိုးချိန်တွင် နှမ်းမျိုးတစ်ပြည်လျှင် ၄၅၀၀ ကျပ်ဖြင့် ဝယ်ယူရကြောင်း၊ နှမ်း တစ် ဧက စိုက်ပျိုးမည်ဆိုလျှင် မျိုးအဖြစ် အနည်းဆုံး နို့ဆီဗူး ၁၂ လုံး(တစ်ပြည်ခွဲ)ခန့်နှင့် အများဆုံး ၂ ပြည်ခန့် လိုအပ်ကြောင်း၊ ယခုအခြေအနေအတိုင်းဆိုလျှင် စစ်တောင်းမြစ်ရေရှိနေပြီး မိုးကြီး၍ စစ်တောင်းမြစ်ရေလျှံမှုဖြစ်ပါက နှမ်းခင်းများ အောင်မြင်ဖြစ်ထွန်းလာမည်ဖြစ်ကြောင်း၊ ဇူလိုင်လ ဒုတိယပတ်၊ တတိယပတ်တွင် ရိတ်သိမ်းမည်ဖြစ်ကြောင်း၊ တစ်ဧက အထွက်တင်း ၈ တင်းမှ ၁၀ တင်းခန့်အထိ ထွက်ရှိနိုင်ကြောင်း၊ နှမ်း ၁၆ ပြည် (တစ်တင်း)ကြိတ်လျှင် ဆီ ၆ ပိဿာခန့် ထွက်ရှိ ကြောင်း၊ တောင်သူတစ်ဦး ၃ ဧကမှ ၅ ဧကအထိ စိုက်ပျိုးထားကြောင်း၊ ထွက်ရှိလာသည့် နှမ်းများကို တနိုင်တပိုင် မိသားစုစားဆီအဖြစ်သာ သုံးကြောင်း၊ နှမ်းဖတ်များကို တိရစ္ဆာန်စာအဖြစ် နွားကျွေး၊ ဝက်ကျွေး အသုံးပြုကြောင်း၊ နှမ်းရိုးများကို လယ်ထဲချကာ မြေဩဇာအဖြစ် အသုံးပြုကြောင်း၊ တောင်သူတစ်ချို့လည်း နှမ်းရိုးများ မီးရှို့ပစ်ပါကြောင်း၊ ယခုနှမ်းဈေး တစ်ပြည် ၈၀၀၀ ကျပ်၊ နှမ်းဆီ တစ်ပိဿာ ၁၀၀၀၀ ကျပ် ဈေးရှိကြောင်း၊ မိုးကြီးမှု၊ စစ်တောင်းမြစ်ရေလျှံမှု မရှိပါက နှမ်းစိုက် တောင်သူများ စားဆီဖူလုံမှု ရှိလာမည်ဖြစ်ကြောင်း အရှေ့ဆင်ကျေးရွာအုပ်စု နောင်ဘိုကျေးရွာမှ နှမ်းစိုက် တောင်သူ ဦးကျော်ဝင်း၏ ပြောကြားချက်အရ သိရှိရပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

          ပခုက္ကူကုန်စည်ဒိုင်တွင် အညာဒေသမှထွက်ရှိသော ပဲစဉ်းငုံနီ၊ ကုလားပဲအမျိုးမျိူး၊ ပဲတီစိမ်း၊ ပဲလွန်းပြာ၊ ပြောင်းဖူးစေ့(CP)နှင့် အခြားပဲမျိုးစုံတို့ အရောင်းဝယ်ဖြစ်လျက်ရှိပါသည်။ ယခုတစ်ပတ်၏ ပဲဈေးနှုန်းများမှာ ပဲစဉ်းငုံနီ တစ်တင်းလျှင်  ၄၂၈၀၀ မှ ၄၃၃၀၀ ကျပ်၊ ပဲတီစိမ်းကြီးမှာ အရည်အသွေးကို လိုက်၍ တစ်တင်းလျှင်  ၄၀၀၀၀ မှ ၄၅၀၀၀ ကျပ် ၊ စွန်တာနီ တစ်တင်းလျှင် ၄၂၀၀၀ ကျပ် ၊ ကုလားပဲဝါ (Hl) တစ်တင်းလျှင် ၄၆၀၀၀ ကျပ်၊ ကုလားပဲ ဝါလုံးကြီး (929) တစ်တင်းလျှင် ၄၇၀၀၀ ကျပ် ၊ ကုလားပဲဖြူလုံးကြီး (V2/V6 )တစ်တင်းလျှင် ၄၉၅၀၀ မှ ၅၀၀၀၀  ကျပ်၊ ပြောင်းဖူးစေ့ (Cp) တစ်တင်းလျှင် ၁၇၅၀၀ ကျပ်ဖြင့် အရောင်းအဝယ်ဖြစ်နေပြီး ပဲစဉ်းငုံနီမှာ ယခင်တစ်ပတ်နှင့် ယခုတစ်ပတ်နှိုင်းယှဉ်ပါက  တစ်တင်း လျှင်(၅၀၀)ကျပ်ဈေးနှုန်းမြင့်တက်ကြောင်း၊ ပဲတီးစိမ်းကြီးမှာ ယခင်တစ်ပတ်နှင့်ယခုတစ်ပတ် ဈေးနှိုင်းယှဉ်ပါက တစ်တင်းလျှင် (၁၀၀၀)ကျပ် ဈေးနှုန်းကျဆင်းနေကြောင်း သိရှိရပါသည်။

           ယခုတစ်ပတ်၏ အရောင်းအဝယ်ဖြစ်မှုမှာ ပဲစဉ်းငုံနီ (၉၀၀)အိတ်၊ ကုလားပဲဝါ(Hl)  ၄၀၀ အိတ်၊ ကုလားပဲဝါလုံးကြီး (929) ၂၂၀ အိတ်၊ ကုလားပဲဖြူ လုံးကြီး (V2/V6 ) ၂၅၀ အိတ်၊ ပဲတီစိမ်းကြီး (၄၁၀၀) အိတ်၊ ထောပတ်ပဲဖြူ  (၁၀၀) အိတ် ၊ ပဲဇီးကွက်  ၅၀ အိတ်၊ ပြောင်းဖူးစေ့ (CP) ၃၀၀ အိတ် ဖြင့် အရောင်းအဝယ်ဖြစ်ခဲ့ပြီး တင်ပို့မှုအနေဖြင့် ရန်ကုန်နှင့် မန္တလေးမြို့များသို့ တင်ပို့လျှက်ရှိကြောင်း ကုန်သည်များ ထံမှ သိရှိရပါသည်။

DOCA(မကွေး)

         ရွှေဘိုခရိုင်အတွင်းရှိ မြို့နယ်များ၌ ဇွန်လ စတုတ္ထပတ်တွင် စပါး ဈေးနှုန်းနှင့် ဆန်ဈေးနှုန်းမှာ တည်ငြိမ်နေပါသည်။ ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ ဇွန်လ တတိယပတ်တွင် ရန်ကုန်သို့ အိတ်ရေ ၃၀၅၀၀ ၊ မန္တလေးသို့ အိတ်ရေ ၃၉၀၀၀၊ နေပြည်တော်သို့ အိတ်ရေ ၉၀၀၀၊ ရှမ်း(တောင်)သို့ အိတ်ရေ ၇၀၀၀၊ ရှမ်း(မြောက်)သို့ အိတ်ရေ ၆၅၀၀၊ပခုက္ကူသို့ အိတ်ရေ ၁၀၀၀၊ စုစုပေါင်းအိတ်ရေ ၉၃၀၀၀၊ တန်အားဖြင့် ၄၆၅၀တန် စီးထွက်ခဲ့ပါသည်။ယခုအပတ်တွင် ရွှေဘိုခရိုင်မှ အခြား တိုင်းဒေသကြီးများသို့ ဆန်စီးထွက် မှုမှာ ရန်ကုန်သို့ အိတ်ရေ ၄၀၀၀၀၊ မန္တလေးသို့ အိတ်ရေ ၅၀၀၀၀၊ နေပြည်တော်သို့ အိတ်ရေ၈၀၀၀ ၊ ရှမ်း(တောင်)သို့ အိတ်ရေ၇၀၀၀ ၊ ရှမ်း(မြောက်)သို့ အိတ်ရေ ၇၀၀၀၊ပခုက္ကူသို့ အိတ်ရေ၁၀၀၀ ၊ စုစုပေါင်းအိတ်ရေ ၁၁၃၀၀၀ ၊ တန်အားဖြင့် ၅၆၅၀တန် စီးထွက်ခဲ့သည့် အတွက် ယခင်အပတ်နှင့် နှိုင်းယှဉ်လျှင် ယခုအပတ်အတွင်း အိတ်ရေ ၂၀၀၀၀၊ တန်အားဖြင့် ၁၀၀၀တန် ပို၍ စီးထွက်ခဲ့ပါသည်။

          ရွှေဘိုမြို့၏ ဇွန်လ စတုတ္ထပတ်တွင် ဖြစ်ပေါ်နေသော စပါး/ဆန်  ဈေးနှုန်းများမှာ ရွှေဘိုပေါ်ဆန်းစပါး တင်း၁၀၀ လျှင် ကျပ်၁၅၅၀၀၀၀၊ ရွှေဘိုပေါ်ဆန်း ဆန်၂၄ပြည်ပါ တစ်အိတ်လျှင် ကျပ်၅၅၀၀၀၊ ဧရာမင်းစပါး တင်း၁၀၀ လျှင် ကျပ်၁၀၅၀၀၀၀၊ ဧရာမင်းဆန် ၂၄ပြည်ပါ တစ်အိတ်လျှင် ကျပ် ၄၄၀၀၀ဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(စစ်ကိုင်း)

          ကယားပြည်နယ်တွင် ဆီထွက်သီးနှံတစ်မျိုးဖြစ်သည့် မြေပဲကိုလည်း မိုး၊ဆောင်း အဓိကထား စိုက်ပျိုးလျှက်ရှိပြီး မြေပဲကို လွိုင်ကော်မြို့နယ်၊ ဒီမောဆိုမြို့နယ်၊ ဖရူဆိုမြို့နယ်များတွင် အများဆုံးစိုက်ပျိုးကြပြီး ဒေသထွက်မြေပဲကို ဒေသတွင်း ကြိတ်ခွဲ၍ စားသုံးမှုများပြီး အခြားဒေသဖြစ်သည့် တောင်ငူနှင့် ရန်ကုန်သို့ အနည်းငယ်သာ တင်ပို့မှုရှိကြောင်း ၊ လက်ရှိ ဇွန်လ စတုတ္တပတ် ဈေးကွက်အတွင်း ဖြစ်ပေါ်နေသော ဒေသထွက်မြေပဲဆံ နှင့် မြေပဲဆီ ဈေးနှုန်းမှာ မြေပဲဆံ တစ်ပိဿာလျှင် (၅၀၀၀) ကျပ်၊ မြေပဲဆီသန့် တစ်ပိဿာလျှင် (၁၂၀၀၀) ကျပ်ဖြင့် အရောင်းအဝယ်ဖြစ်လျှက်ရှိပြီး ယခင်မေလ စတုတ္တပတ်တွင် မြေပဲဆံ ဈေးနှုန်းမှာ တစ်ပိဿာလျှင် (၄၀၀၀) ကျပ်နှင့် မြေပဲဆီ တစ်ပိဿာလျှင် (၁၀၀၀၀) ကျပ်ရှိခဲ့ပြီး ယခင်မေလ စတုတ္တပတ်နှင့် ယခု ဇွန်လ စတုတ္တပတ် နှိုင်းယှဉ်လျှင် မြေပဲဆံ တစ်ပိဿာလျှင် (၁၀၀၀) ကျပ် ၊ မြေပဲဆီ တစ်ပိဿာလျှင် (၂၀၀၀) ကျပ်ခန့် မြှင့်တက်လာကြောင်း ၊ ဈေးနှုန်းမြှင့်တက်ရခြင်းမှာ ကုန်လက်ကျန် နည်းပါးလာ၍ ကုန်ကြမ်းရရှိရန် အခက်အခဲများရှိကြောင်း ဆီစက်လုပ်ငန်းရှင်တစ်ဦးထံမှ သိရပါသည်။

DOCA(ကယား)