ပြည်တွင်းကုန်သွယ်မှုသတင်း

      မိတ္ထီလာဈေးကွက်သို့ မတ်လလယ်ပိုင်းတွင် ဆောင်းကြက်သွန်နီအသစ်များ ဝင်ရောက်နေပြီဖြစ်ကြောင်း သိရသည်။ ဆောင်းကြက်သွန်နီမှာ ပုံမှန်အားဖြင့် ဧပြီလ(တန်ခူးလ)တွင် နှုတ်သိမ်းလေ့ရှိသော်လည်း ယခုနှစ်တွင် ဈေးကောင်းနေခြင်းကြောင့် ပုံမှန်နှုတ်သိမ်းချိန်မတိုင်မီစော၍ ရိတ်သိမ်းကြောင်း သိရသည်။ မိတ္ထီလာဈေးကွက်အနေနှင့် ကြက်သွန်နီကို ရန်ကုန်၊ ပဲခူးနှင့်ပြည်တွင်း ဈေးကွက်များသို့ ပုံမှန်တင်ပို့နေပြီး၊ ပြည်ပဝယ်လက်မှလည်း အဝယ်ရှိနေခြင်းကြောင့် ယခုအခါ မိုးကြက်သွန်နီ (မြှိတ်စား၊ဇော်မွှား) တို့အပြင် ဆောင်းကြက်သွန်နီစောစွာ နှုတ်သိမ်းလေ့ရှိလေ့သည့် မြစ်သားစတို့မှာ လက်ကျန်မရှိသလောက် နည်းလာပါသည်။ ထို့အတွက် ကြက်သွန်နီဈေးကောင်းနေရာ ဆောင်းကြက်သွန်နီကို ပုံမှန်ထက်စောစွာ နှုတ်သိမ်းခြင်းဖြစ်ပါသည်။ ယခုနှစ်ကြက်သွန်နီသီးနှံအနေနှင့် မိုးကြက်သွန်နီ လက်ကျန်မှာ ဆောလျင်စွာ မရှိတော့ခြင်း၊ ဝယ်လိုအားကောင်းခြင်းတို့ကြောင့် ကြက်သွန်နီဈေးများစွာ မနိမ့်နိုင်ကြောင်း ကုန်သည်များက ခန့်မှန်းထားကြပါသည်။ လက်ရှိကြက်သွန်နီဈေးမှာ တစ်ပိဿာ ၂၀၀၀ ကျပ် ဝန်းကျင်ဖြင့် ယခင်တစ်ပတ်နှင့်စာလျှင် ဈေးတန်းနေကြောင်း သိရသည်။

DOCA(မန္တလေး)

       မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်အတွင်းရှိ တောင်သူဦးကြီးများ၏ လူမှု့ဘဝတိုးတက်စေရန်ရည်ရွယ်၍ ပွင့်ဖြူမြို့နယ်၊ ကံသာကြီးကျေးရွာအုပ်စု၊ ကံသာကြီးကျေးရွာတွင် တိုင်းတောင်သူဖွံ့ဖြိုးရေးအဖွဲ့၊ မြို့နယ်တောင်သူအကျိုးပြုအဖွဲ့၊ Good Brother ကုမ္ပဏီနှင့် မြင့်မြတ်တော်ဝင်ကုမ္ပဏီတို့ပူးပေါင်း၍ ပဲမျိုးစုံသီးနှံ တောင်သူစုပေါင်းရောင်းချပွဲကျင်းပခဲ့ပါသည်။

       အဆိုပါပဲမျိုးစုံသီးနှံ တောင်သူစုပေါင်းရောင်းချပွဲသို့ ပွင့်ဖြူမြို့နယ်အတွင်းရှိ ဒေသခံတောင်သူများ ဝမ်းသာစွာလာရောက်ရောင်းချကြကြောင်း၊ ပဲမျိုးစုံသီးနှံဝယ်ယူရာတွင် ပဲအမျိုး အစားအလိုက် A,B,C နှင့် အခြားအဆင့်ဟူ၍ (၄)မျိုးခွဲခြားဝယ်ယူကြောင်း၊ ဝယ်ယူမှုဈေးနှုန်းအနေဖြင့် ကုလားပဲသီးနှံ (A)အဆင့် တစ်တင်းလျှင် ကျပ်(၈၅၀၀၀)၊ (B)အဆင့် တစ်တင်းလျှင် ကျပ်(၈၄၀၀၀)၊ (C)အဆင့် (၁)တင်းလျှင် ကျပ်(၈၃၀၀၀)ဖြင့်လည်းကောင်း၊ အခြားအဆင့် ကုလားပဲတစ်တင်းလျှင် ကျပ်(၈၂၀၀၀)၊ ပဲထောပတ်သီးနှံ (A)အဆင့် တစ်တင်းလျှင် ကျပ်(၁၁၉၅၀၀) ဖြင့်လည်းကောင်း၊ (B)အဆင့် ပဲထောပတ်သီးနှံတစ်တင်းလျှင် ကျပ်(၁၁၈၅၀၀)ဖြင့်လည်းကောင်း၊ (C)အဆင့် ပဲထောပတ်သီးနှံတစ်တင်းလျှင် ကျပ်(၁၁၇၄၀၀)ဖြင့်လည်းကောင်းဝယ်ယူကြောင်း၊ ထိုသို့ဝယ်ယူရာတွင် မကွေးဈေးနှုန်းအပေါ်  ပွဲခအလွတ်ဝယ်ယူပေးသဖြင့် တောင်သူများအနေဖြင့် တစ်တင်းရောင်းဈေးအပေါ်တွင် အသားတင်ရရှိကြောင်း၊ ကတ္တားအနေဖြင့်လည်း တောင်သူကြိုက်နှစ်သက်သော ကတ္တားဖြင့် ဝယ်ယူပေးမည်ဖြစ်ပြီး မိမိတို့ဝယ်ယူသော ကတ္တားအားလည်း မည်သူမဆိုလာရောက်၍ စစ်ဆေးခြင်းများပြုလုပ်နိုင်ကြောင်း၊ ထိုသို့ စုပေါင်းရောင်းချပွဲကိုလည်း (၁၁-၃-၂၀၂၄) ရက်နေ့မှ (၁၀-၄-၂၀၂၄)ရက်နေ့အထိ ရက်ပေါင်း(၃၀)တိတိ နေ့စဉ် နံနက်(၀၇:၃၀)နာရီမှ နေ့လယ် (၁၆:၀၀) နာရီအချိန်ထိ ဖွင့်လှစ်ဝယ်ယူသွားမည်ဖြစ်ကြောင်း မြို့နယ်တောင်သူအကျိုးပြုအဖွဲ့ ခေါင်းဆောင် ဦးမြင့်အောင်ထံမှသိရှိရပါသည်။

DOCA(မကွေး)

      ပြည်တွင်း၌ စားနပ်ရိက္ခာဖူလုံရုံသာမက အခြားလူသုံးကုန်ပစ္စည်းများနှင့် စက်မှုလုပ်ငန်းသုံး ပစ္စည်းပြတ်လပ်မှုမရှိစေရေးအတွက် နိုင်ငံတော်မှအလေးထားဆောင်ရွက် လျက်ရှိရာ တိုင်းဒေသကြီး နှင့်ပြည်နယ်များတွင် စားသောက်ကုန်ပစ္စည်းထုတ်လုပ်သည့်စက်ရုံ၊ လူသုံးကုန်ပစ္စည်းထုတ်လုပ်သည့်စက်ရုံနှင့် စက်မှုလုပ်ငန်းသုံးပစ္စည်းများထုတ်လုပ်သည့် စက်ရုံများတွင် ကုန်ကြမ်းပစ္စည်း ပြတ်လပ်မှုရှိ/မရှိတို့သိရှိရန်အတွက် စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံး အစည်းအဝေးခန်းမတွင် ၇.၃.၂၀၂၄ ရက်နေ့ နေ့လယ် (၁၃:၃၀)နာရီတွင် တိုင်းဒေသကြီးဦးစီးမှူး၊ ဗဟိုစာရင်းအင်းဦးစီးဌာနအပါအဝင် ဒေသတွင်း အကြီးစားထုတ်လုပ်ဖြန့်ဖြူးလျက်ရှိသည့် စားသောက်ကုန်ပစ္စည်းထုတ်လုပ်သည့် စက်ရုံ၊ လူသုံးကုန်ပစ္စည်းထုတ်လုပ်သည့်စက်ရုံ၊ စက်မှုလုပ်ငန်းသုံးပစ္စည်း ထုတ်လုပ်သည့်စက်ရုံများမှ လုပ်ငန်းရှင်များနှင့်တွေ့ဆုံဆွေးနွေးမှုများ ဆောင်ရွက်ခဲ့ပါသည်။

          အဆိုပါ ဆွေးနွေးမှုတွင်-

• တိုင်းဒေသကြီးဦးစီးမှူးမှ လက်ရှိနိုင်ငံတော်အစိုးရအနေဖြင့် ပြည်တွင်းစားနပ်ရိက္ခာ ဖူလုံစေရေး၊ သွင်းကုန်အစားထိုးထုတ်လုပ်နိုင်စေရေး၊ ပို့ကုန်အမယ်သစ်များ ပေါ်ထွန်းလာစေရေးတို့ကို အလေးထား ဆောင်ရွက်လျက်ရှိပါကြောင်း၊ လုပ်ငန်းရှင် များအနေနှင့် ဒေသတွင်းအကြီးစားနှင့်အလတ် စားထုတ်လုပ်ဖြန့်ဖြူးလျက်ရှိသည့် လုပ်ငန်းများ ဖြစ်သည့်အတွက် မိမိတို့၏အခက်အခဲများကိုလည်း ပွင့်ပွင့်လင်းလင်း ဆွေးနွေးကြပါရန် ဌာနအနေဖြင့် စက်မှုလုပ်ငန်းများသို့ ကွင်းဆင်းစစ်ဆေးမှုများ ပြုလုပ်၍ စက်ရုံများ ရပ်တန့်မှု မရှိစေရေးအတွက် အခက်အခဲများ အားသက်ဆိုင်ရာ ဌာနများနှင့် ပေါင်းစပ် ညှိနှိုင်းဆောင်ရွက်ခြင်း၊ လိုအပ်ပါက တိုင်းဒေသကြီး အစိုးရအဖွဲ့နှင့် အထက်ဌာနများသို့ တင်ပြဆောင်ရွက်ပေးမည်ဖြစ်ပါသည်။
• တွေ့ဆုံဆွေးနွေးပွဲတွင် စားသောက်ကုန်လုပ်ငန်းထုတ်လုပ်သည့် လုပ်ငန်းရှင်များမှ စားသောက်ကုန်လုပ်ငန်းအနေဖြင့် အဓိကသုံးစွဲရသည့် ကုန်ကြမ်းများမှာ ဂျုံ၊စားသုံးဆီ၊ သကြားတို့ဖြစ်ပြီး ကုန်ကြမ်းပြတ်လပ်မှုမရှိပါ။ ဂျုံကို ရန်ကုန်တိုင်းဒေသကြီးမှ ဝယ်ယူ အသုံးပြုကြောင်း၊ လုပ်ငန်းရှင်များအနေနှင့် လုပ်ငန်းလည်ပတ်ရန်အတွက် စားသုံးဆီ လိုအပ်ချက်ရှိကြောင်း၊ ဘီစကစ်လုပ်ငန်းအနေဖြင့် မုန့်ထုတ်လုပ်ရာတွင် အသုံးပြုသော အမိုနီယမ်ဗိုက်ကာဗွန်နိတ် (Ammonium Bicarbonate)မုန့်ပွဆေး ဝယ်ယူရာတွင်အခက် အခဲများရှိပြီး ယခင်က အဆိုပါမုန့်ပွဆေးဝယ်မရသဖြင့် စက်ရုံရပ်နားထားရပါတယ်။
• စားသောက်ကုန်လုပ်ငန်းတွင် အဓိကအသုံးပြုသည့် ပြည်တွင်းဂျုံမှုန့်နှင့် ပြောင်းဖူးမှုန့်ကို ပစ္စည်းပြတ်လပ်မှုမရှိသော်လည်း ပြည်ပဂျုံအနေနှင့် ပစ္စည်းပြတ်လပ်မှု ရှိပါသည်။ ဂျုံစက်လုပ်ငန်းအနေနှင့် ပြည်တွင်းပြည်ပမှ ဂျုံများကိုကြိတ်ခွဲ ထုတ်လုပ် ရာတွင် နိုင်ငံခြား ကုန်ကြမ်းဝင်ရောက်မှုနည်းသည့်အတွက် ယခင်ကလို သိုလှောင်ထားနိုင်မှုမရှိသော်လည်း တပါတ်စာလောက်သာ သိုလှောင်ထားရှိ ကြိတ်ခွဲ ထုတ်လုပ်နိုင်ပါသည်။
• လူသုံးကုန်ပစ္စည်းထုတ်လုပ်သည့် စက်ရုံများအနေဖြင့် စက်သုံးဆီလိုအပ်ချက်၊ Serenade Chemical(ဆီရိုနိတ်)နှင့် Sodium Silicate ဆိုဒီယမ်ဆီလီကိတ် အမွှေးဆီ၊ Recycled Rain Boots လုပ်ငန်းအနေနှင့် Bootsနှင့် ပိုက်များ ထုတ်လုပ်ရာတွင် စက်အပူချိန်ထိန်းညှိ ရန်နှင့် Dop-PVC ပလပ်စတစ်ပျော့ဆေးများ လိုအပ်မှုရှိပြီး၊ ပလပ်စတစ်ပျော့ဆေးကို ယခင်က ရန်ကုန်မြို့ရှိ First Myanmarမှ ဝယ်ယူရရှိသော်လည်း လက်ရှိအချိန်တွင် ဝယ်ယူရန်ခက်ခဲလျက်ရှိပါသည်။ အဆိုပါ ကုန်ကြမ်းလိုအပ်ချက်ကြောင့် လုပ်ငန်းအနေဖြင့် ပြည်တွင်းဝယ်လိုအား ဈေးကွက် ရှိသော်လည်း လုပ်ငန်းရပ်နားထားရပါသည်။

      မန္တလေးတိုင်းဒေသကြီး၊ စားသုံးသူရေးရာဦးစီးဌာနအနေနှင့် စားသောက်ကုန်ပစ္စည်း ထုတ်လုပ်သည့်စက်ရုံ၊ လူသုံးကုန်ပစ္စည်းထုတ်လုပ်သည့် စက်ရုံနှင့် စက်မှုလုပ်ငန်းသုံး ထုတ်လုပ်သည့် စက်ရုံများတင်ပြဆွေးနွေးမှုများကို အခြေခံ၍ စက်ရုံများလည်ပတ်ရန် အဓိက လိုအပ်ချက်စက်သုံးဆီ ဖြစ်သည့်အတွက် သက်ဆိုင်ရာဌာနဖြစ်သည့် ရေနံထွက်ပစ္စည်း ကြီးကြပ်စစ်ဆေးရေးဦးစီးဌာနနှင့် ညှိနှိုင်း၍ စက်မှုကုန်ကြမ်းသုံးစက်သုံးဆီ Own P.O ရောင်းချပေးသည့် စက်သုံးဆီအရောင်းဆိုင်များ နှင့် ချိတ်ဆက်ဝယ်ယူနိုင်ရေးအတွက် ကူညီ ဆောင်ရွက်ပေးမည်ဖြစ်ပါသည်။

     အခြားလိုအပ်ချက်များဖြစ်သည့် မုန့်ပွဆေး၊ အမိုနီယမ်ဗိုက်ကာဗွန်နိတ်၊ ပြည်ပဂျုံ ကုန်ကြမ်း လိုအပ်ချက်၊ ဆိုဒီယမ်ဆီလီကိတ်အမွှေးဆီ၊ Dop PVC ပလပ်စတစ်ပျော့ဆေး စသည့်လိုအပ်သည့် စက်ရုံများကို ကွင်းဆင်းစစ်ဆေး၍ လိုအပ်ချက်များကို တင်ပြဆောင်ရွက် ပေးမည်ဖြစ်ပါသည်။

      စားသုံးသူရေးရာဦးစီးဌာန၊ မန္တလေးတိုင်းဒေသကြီးအတွင်းရှိ စားသောက်ကုန်ပစ္စည်း ထုတ်လုပ်သည့်စက်ရုံ၊ လူသုံးကုန်ပစ္စည်းထုတ်လုပ်သည့်စက်ရုံနှင့် စက်မှုလုပ်ငန်းသုံးပစ္စည်း ထုတ်လုပ်သည့်စက်ရုံများနှင့်ကုန်ကြမ်းပစ္စည်းပြတ်လပ်မှုရှိ/မရှိနှင့် ပြည်တွင်း၌စားနပ်ရိက္ခာ ဖူလုံရုံသာမက အခြားလူသုံးကုန်ပစ္စည်းများနှင့် စက်မှုလုပ်ငန်းသုံးပစ္စည်းပြတ်လပ်မှုမရှိစေရေးအတွက် နိုင်ငံတော်မှ အလေးထားဆောင်ရွက်လျက်ရှိသည့် လုပ်ငန်းများကို စဉ်ဆက်မပြတ် ဆောင်ရွက်လျက်ရှိပါသည်။

DOCA(မန္တလေး)

       မန္တလေးမြို့တွင် ဥစားကြက်များကို ယခင်တချိန်ကလူများနေထိုင်သည့် ပတ်ဝန်းကျင်နှင့် ဝေးသည့်အရပ်တို့တွင်  မွေးမြူကြပါတယ်။ ယခုတွင်မူ ပြင်ဦးလွင်မြို့နယ် ၊ မိုးကြိုးကုန်းကျေးရွာတို့တွင်     ဥစားကြက်များကို စီးပွားဖြစ်မွေးမြူလျက်ရှိကြောင်း သိရှိရပါတယ်။ ပြင်ဦးလွင်မြို့ကလေးသည် အေးမြသည့်ရာသီဥတု ဖြစ်သည့်အတွက်ကြောင့် ကြက်များမွေးမြူရာတွင် အဆင်ပြေကြောင်း၊ ကြက်များသည် ‌ဆောင်းရာသီနှင့်အေးသည့်ဒေသတို့တွင် ဥထွက်နှုန်းကောင်းကြောင်း တွေ့ရှိရပါတယ်။ ယခုကဲ့သို့ ပူပြင်းသည့် တပေါင်း၊ တန်ခူး၊ကဆုန်လများတို့တွင် ပူပြင်းသည့် လနှင့် ကြက်စာများတွင် ပါဝင်သည့် ငါးခြောက်မှုန့်၊ ပုစွန်အခွံခြောက်မှုန့် အခြားတို့တွင် အငံဓါတ်ပါဝင်မှုရှိ၍ ရေသောက်များပြီး၊ဥနှုန်းများ ကျဆင်းကြောင်း၊ အေးသည့်ဒေသတွင် မွေးမြူကြသည့်ဥစားကြက်တို့၏ ဥနှုန်းများမှာလည်း ကွာခြားလျက်ရှိပါတယ်။ ကြက်ဥများကို အခြားလယ်ယာထွက်ကုန်များကဲသို့ ပြည်ပတင်ပို့မှုမရှိသော်လည်း တရုတ်နယ်စပ်မြို့ကလေးများထိ တင်ပို့ကြောင်း တွေ့ရှိရပါတယ်။ ကြက်ဥများကို မြန်မာလူမျိုးအများစုမှာ ချက်၊ပြုတ်၊ ကြော်စားရာတွင်သာမကဘဲ စားသောက်ကုန်လုပ်ငန်းများတွင် ဂျုံဖြင့်ပြုလုပ်သည့် မုန့်မျိုးစုံ လုပ်ငန်းများတွင်လည်း ကြက်ဥများထည့်၍ အသုံးပြုကြောင်း၊ ကြက်ဥပူတင်းအဖြစ် အအေးဆိုင်များတွင် ပြုလုပ်ရောင်းချကြောင်း တွေ့ရှိရပါသည်။ ကြက်ဥများကို မန္တလေးမြို့ အနီးတစ်ဝိုက်ရှိ မြို့များသို့တင်ပို့ရောင်းချကြပါတယ်။ ကြက်ဥဈေးမှာ ဇန်နဝါရီလနှင့် ဖေဖော်ဝါရီလတို့တွင် ကြက်ဥ တစ်ပိဿာလျှင် ၅၂၀ဝိ/- ဖြင့် လည်းကောင်း၊ အလုံးကြီးလျှင် ၂၆၀ဝိ/-၊အလတ် ၂၃၀ဝိ/-၊အသေး ၂၂၀ဝိ/- တို့ဖြင့် ရောင်းချကြပြီး ယခုလို မတ်လအတွင်းတွင် တစ်ပိဿာ ၅၉၀ဝိ/-၊ ၁၀ လုံးလျှင် အကြီး၂၇၀ဝိ/-၊ အလတ် ၂၅၀ဝိ/-၊အသေး ၂၂၀ဝိ/- တို့ဖြင့်လည်းကောင်း ရောင်းချလျက်ရှိပါတယ်၊ ကြက်ဥများ ယခုလို ပူပြင်းသည့်လတွင် အထွက်နှုန်းကျပြီး ဈေးတက်လျက်ရှိကြောင်း တွေ့ရှိရပါတယ်။

DOCA(မန္တလေး)

      ဝါးတန်းဆန်စပါးကုန်စည်ဒိုင်သို့ (၁၉.၃.၂၀၂၄) မှ (၂၅.၃.၂၀၂၄) နေ့ထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး၊ ဖျာပုံ၊ မြောင်းမြ၊ ဘိုက‌လေး၊ မော်ကျွန်း၊ ကျိုက်လတ်၊ ဓနုဖြူ၊ ဟင်္သာတ၊ လပ္ပတ္တာ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၅၃၁၃၀) အိတ်၊ ပေါ်ကျွဲ (၆၂၅၀) အိတ်၊ ဧည့်မထ(၁၁၃၁၂၁) အိတ်နှင့် ဆန်ကွဲ (၂၆၆၃၀) အိတ်ဝင်ရောက်ခဲ့ပြီး ပဲခူး (အရှေ့) ညောင်လေးပင်နှင့် ဖြူးမြို့နယ်များမှ ဧည့်မထ (၆၆၀၄) အိတ်နှင့် ပဲခူးတိုင်း(အနောက်)၊ သာယာဝတီ၊ လက်ပံတန်း၊ သုံးဆယ်မြို့နယ်များမှ ဧည့်မထ (၂၂၇၅၅) အိတ်၊ ငစိန် (၄၄၀၃) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ်ကုန်း၊ တိုက်ကြီး၊ ပျော်ဘွယ်၊ ဥက္ကံမြို့နယ်များမှ ဧည့်မထ (၁၁၁၄၂၀) အိတ်တို့ဝင်ရောက်မှုရှိကြောင်း ဝါးတန်းဆန်စပါးကုန်စည်ဒိုင်၏ ပြောကြားချက်အရ သိရှိရပါသည်။

DOCA(ရန်ကုန်)