အညာဒေသထွက် သရက်သီးစိမ်း(ခေါ်)သရက်ကင်းများ စတင်ခူးဆွတ်ရောင်းချလျက်ရှိ
စစ်ကိုင်းတိုင်းဒေသကြီး၊ မုံရွာမြို့နယ်၊ အညာဒေသ၌ သရက်သီးစိမ်း(ခေါ်) သရက်ကင်းများ စတင်ပေါ်နေပြီဖြစ်ရာ ရာသီစာအဖြစ်စားသုံးသောကြောင့် သရက်ကင်းဈေးကောင်းရရှိကာ ဝင်ငွေတိုးနေကြောင်း သရက်စိုက်ပျိုးသူများထံမှ သိရှိရပါသည်။
ယခုချိန်တွင် ကုန်စိမ်းဈေးကွက်အတွင်း သရက်သီးစိမ်း(ခေါ်)သရက်ကင်းဈေးမှာ အသီးအနေအထားပေါ် မူတည်၍ သရက်သီး (၁၀)လုံးလျှင် အနိမ့်ဆုံးငွေကျပ် ၁၀၀၀ မှ ကျပ် ၁၅ဝ၀ ဈေးအထိ လက်လီရောင်းချရကြောင်း၊ သရက်ကင်း(၁)ပိဿာလျှင် ကျပ် (၁၀၀၀၀-၁၂၀၀၀) နှုန်းဖြင့် ပွဲစားများ က ခြံအရောက် လာရောက်ဝယ်ယူမှုများလည်းရှိကြောင်း၊ မိသားစုလုပ်အား၊ လုပ်သားအင်အား အချိန်မပေးနိုင်သည့် သရက်ခြံပိုင်ရှင်များအနေဖြင့် သရက်သီးပွဲစားများထံ အပင်ပြတ်၊ ခြံပြတ်၊ ရောင်းချကာ ခြံကို ပြုစုကြကြောင်း ၊အသီးရရှိမှု၊ အပင်သက်တမ်း၊ အရွယ်စားပေါ်မူတည်၍ သရက်ပင်တစ်ပင်လျှင် ငွေကျပ် နှစ်သိန်းမှ သုံးသိန်းအထိ ဝင်ငွေရရှိကြောင်းနှင့် စိုက်ပျိုးသော သရက်မျိုးများမှာ ဟင်္သာ၊ ရွှေပို၊ လက်ခုတ်၊ ဝါဆို၊ စိန်တစ်လုံး၊ ပတ္တမြားငမောက်၊ မချစ်စု၊ ပန်းဆွဲ သရက်အမျိုးခွဲအစုံ စိုက်ပျိုးကြကြောင်း သိရသည်။
"ယခင်နှစ်ထက် ဒီနှစ်က အသီးပေါ်ချိန်နောက်ကျတယ်။အချို့သရက်ပင်တွေက ယခုမှ အပွင့်လှိုင်လှိုင်ပွင့်ကာ သီးကင်းတွေပဲ ရှိသေးတယ်၊ ဈေးကွက်အတွင်း လှိုင်လှိုင်မပေါ် သေးတဲ့အတွက် သရက်သီးစိမ်းဈေးက ဈေးကောင်းနေတာပါ"ဟု လက်ကားရောင်းဝယ်သူ သရက်ပွဲစားတစ်ဦးထံမှ သတင်းရရှိပါသည်။
DOCA(စစ်ကိုင်း)
