ပြည်တွင်းကုန်သွယ်မှုသတင်း

    တောင်ငူမြို့နယ်၊ ဒိုးသောင်ကျေးရွာအုပ်စု၊ ရှမ်းဝတီးကျေးရွာတွင် ဂန္ဓမာပန်းနှင့် မေမြို့ပန်း စုစုပေါင်းစိုက်ဧက ၈၈.၇၅ ဧကခန့်ရှိပါသည်။ ပန်းဝယ်လက်အပေါ်မူတည်၍ ပင်ကြား အကွာအဝေး (၈"× ၁၀")၊ ပန်းအခိုင်လိုက် သို့မဟုတ် ပန်းပဒေသာများကို (၁၈"× ၂၄") ကြားထား၍ စိုက်ပျိုးကြပြီး ယခင်က တစ်ဧကလျှင် ကျပ် ၂၅ သိန်း ဝန်းကျင်ခန့်ကုန်ကျပါသည်။ ယခုအခါတွင် သွင်းအားစု၊ ပိုးသတ်ဆေးနှင့် လုပ်သားခ မြင့်တက်ခြင်းတို့ကြောင့် ကုန်ကျစရိတ်မှာ ကျပ် ၃၅ သိန်း ခန့်ရှိပါသည်။

     ပန်းတစ်ဧကစိုက်လျှင် အထွက်နှုန်းအားဖြင့် ၁၀ ပင်စည်း အစည်းရေ ၅၀၀၀ ခန့် ထွက်ရှိ ပါသည်။ ရှမ်းဝတီးကျေးရွာထွက်ပန်းများကို တောင်ငူမြို့ ညောင်ပင်ဈေးရှိ ပန်းအဝယ်ဒိုင်များသို့ ပေးပို့ပါသည်။ ပန်းစည်း တစ်စည်းလျှင် ယခင်က ၈၀၀ ကျပ်၊ ယခုအခါ ၁၀၀၀ ကျပ်ဖြင့် ဒိုင်များသို့ ပေးသွင်းရပြီး ဒိုင်များမှတစ်ဆင့် အရောင်းဆိုင်များသို့ တစ်စည်းလျှင် ၁၂၀၀ ကျပ်ဖြင့် ပြန်လည် ဖြန့်ဖြူးပါသည်။

   ပန်းဆိုင်များမှ ပန်းပွင့်အနေအထားပေါ်မူတည်၍ ဂန္ဓမာပန်းတစ်စည်းလျှင် ၁၅၀၀ ကျပ် မှ ၂၀၀၀ ကျပ်အထိရောင်းချကြောင်းနှင့် ပန်းစိုက်တောင်သူများအနေဖြင့် တစ်ဧကလျှင် ကျပ် ၁၀ သိန်းမှ ၁၅ သိန်းအထိ အကျိုးအမြတ်ရရှိကြောင်း သိရပါသည်။

DOCA(ပဲခူး)

     ၂၀၂၃ ခုနှစ်၊ ဇူလိုင်လ ဒုတိယပတ်အတွင်း ရှမ်းပြည်နယ်(အရှေ့ပိုင်း)၊ ကျိုင်းတုံမြို့ရှိ အခြေခံစားသောက်ကုန်များဖြစ်သော ရွှေဘိုပေါ်ဆန်မွှေး(သိင်္ဂီ) တစ်ပြည် ၅၅၀၀ ကျပ်၊ ဧည့်မထ (ဒေသ)ဆန် တစ်ပြည် ၃၃၀၀ ကျပ်ဖြင့် ရောင်းဝယ်လျက်ရှိပါသည်။ စားဖိုဆောင်စားသောက်ကုန်များအနေဖြင့် ကြက်သွန်နီ တစ်ပိဿာ ၃၀၀၀ ကျပ်၊ ကြက်သွန်ဖြူ(ကြူကုတ်) တစ်ပိဿာ ၈၅၀၀ ကျပ်၊ (ရှမ်းစ) တစ်ပိဿာ ၈၀၀၀ ကျပ်၊ ငရုတ်သီးခြောက်(ရှည်)တစ်ပိဿာ ၁၈၀၀၀ ကျပ်၊ ခရမ်းချဉ်သီး တစ်ပိဿာ ၂၅၀၀ ကျပ်၊ အာလူး တစ်ပိဿာ ၄၀၀၀ ကျပ်၊ မန်ကျည်းသီးမှည့် တစ်ပိဿာ ၄၀၀၀ ကျပ်နှင့် ချင်း တစ်ပိဿာ ၄၀၀၀ ကျပ် စသည်ဖြင့် ရောင်းဝယ်လျက်ရှိပါသည်။

     ကျိုင်းတုံမြို့တွင် ဇူလိုင်လ ဒုတိယပတ်၌ စားသုံးဆီဈေးနှုန်းများအနေဖြင့် စားအုန်းဆီ တစ်ပိဿာ ၈၀၀၀ ကျပ်နှင့် ပဲဆီ(ရိုးရိုး) တစ်ပိဿာ ၁၆၀၀၀ ကျပ်၊ ကြက်ဥဈေးမှာ တစ်လုံး ၂၅၀ ကျပ် နှင့် ဘဲဥ တစ်လုံး ၃၅၀ကျပ်ဖြင့် ရောင်းဝယ်လျက်ရှိပါသည်။ အသား/ငါးဈေးနှုန်းများမှာ ကြက်သား (CP) တစ်ပိဿာ ၁၄၀၀၀ ကျပ်၊ ဝက်သား တစ်ပိဿာ ၂၂၀၀၀ ကျပ်၊ အမဲသား တစ်ပိဿာ ၂၄၀၀၀ ကျပ်၊ ငါးကြင်း တစ်ပိဿာ ၁၄၀၀၀ ကျပ်၊ ငါးမြစ်ချင်း တစ်ပိဿာ ၁၁၅၀၀ ကျပ် ဈေးနှုန်းများဖြင့် ရောင်းဝယ် လျက်ရှိကြောင်း သိရှိရပါသည်။

     ကျိုင်းတုံမြို့ အခြေခံစားသောက်ကုန်ဈေးနှုန်းများသည် ယခင်ဇွန်လဒုတိယပတ်နှင့် နှိုင်းယှဉ်ပါက ကြက်သွန်နီဈေးနှုန်းအနည်းငယ်ကျဆင်းလာပြီး၊ ကြက်သွန်ဖြူ(ကြူကုတ်)နှင့် အာလူး၊ ခရမ်းချဉ်သီး၊ ချင်း၊ မန်ကျည်းသီးမှည့်၊ စားအုန်းဆီ၊ ငါးကြင်း၊ ငါးမြစ်ချင်းဈေးနှုန်းတို့မှာ အနည်းငယ်မြင့် တက်လာပါသည်။ ကျန်အခြေခံစားသောက်ကုန်ဈေးနှုန်းများမှာ တည်ငြိမ်လျက်ရှိပါသည်။

DOCA(ရှမ်း)

   မိုးတွင်းကာလတွင် အလေ့ကျပေါက်လေ့ရှိသောဖလံတောင်ဝှေးပင်လေးများမှာ ဆေးဖက်အလွန်ဝင်ပြီး ခါးစပ်သောအရသာရှိပါသည်။ ဖလံတောင်ဝှေးပင်များကို ပလောင်တောင်ဝှေးပင်ဟူ၍လည်းခေါ်ဆိုကြပါသည်။ ဖလံတောင်ဝှေးကိုစားလျှင် ဝမ်းမီးကိုတောက်စေပြီး နှလုံးကိုအားဖြစ်စေပါသည်။ သလိပ်၊ သည်းခြေအဖျား၊ သွေးကြောင့်ဖြစ်သောရောဂါများကိုပျောက်ကင်းစေပါသည်။ ဖလံတောင်ဝှေးလှိုင်လှိုင်ပေါသည့် ၂၀၂၃ခုနှစ်၊ မိုးဦးကျချိန်တွင် တစ်စည်းလျှင် (၅၀၀) ကျပ်ဖြင့်သာရောင်းချကြပြီး အရိုင်းစည်းတစ်စည်းလျှင် (တစ်ပိဿာခန့်) (၁၅၀၀) ကျပ်ဖြင့်ရောင်းချကြပါသည်။ ဖလံတောင်ဝှေးနုနုလေးများကို ကြော်စား၍တစ်မျိုး၊ ကြော်ချက်၍တစ်ဖုံနှင့် တို့စရာအဖြစ်လည်းစားသုံးကြပါသည်။

     ဖလံတောင်ဝှေးကို ရေကြက်သားနှင့်ချက်စားလျှင် ဆီးကျောက်တည်၊ ဆီးပူ၊ ဆီးအောင့်၊ ဆီးအားနည်းခြင်းတို့ကိုပျောက်ကင်းစေနိုင်ပါသည်။ ပုစွန်ဆိတ်လေးများနှင့်ကြော်စားလျှင် လိပ်ခေါင်းသွေးကျခြင်းကိုသက်သာစေပါသည်။ ကင်ပွန်းချဉ်ရွက်နှင့်ကြော်စားလျှင် ဆံပင်ဖြူခြင်းနှင့် သွေးဆုံးကိုင်ဝေဒနာကိုသက်သာစေပါသည်။ ဖလံတောင်ဝှေးပင်သည် တစ်ပင်လုံးဆေးဖက်ဝင်စေပါသည်။ အမြစ်ကိုထောင်းထု၍ နှာစေး၊ ချောင်းဆိုး၊ အစာမကြေလေနာ၊ အရေပြားရောဂါ၊ မြွေကိုက်ခြင်းတို့ကို ဆေးမြီးတိုအဖြစ်အသုံးပြုကြပါသည်။ ဖလံတောင်ဝှေးပင်သည် အလွန်ဆေးဖက်ဝင်ပြီး စားသုံးရန်သင့်တော်သော အပင်မျိုးဖြစ်ကြောင်းသိရှိရပါသည်။

DOCA(ပဲခူး)

ယခုကဲ့သို့ မိုးရာသီကာလတွင် အလေ့ကျပေါက်ပင်တစ်မျိုးဖြစ်သော ငးရံ့ပတူရွက်များကို ဈေးများထဲတွင် ရောင်းချနေသည်ကိုတွေ့ရပါသည်။ ပြည်အနီးတဝိုက်ဒေသများမှထွက်ရှိပြီး ဈေးများတွင် လာရောက်ရောင်းချကြကာ တစ်စည်းလျှင် (၃၀၀) ကျပ်နှင့် (၂) စည်းလျှင် (၅၀၀) ကျပ်ဖြင့် ရောင်းချမှုရှိကြောင်းသိရပါသည်။ ငရံ့ပတူရွက်သည် ကျန်းမာရေးအတွက် စားသုံးပေးသင့်သော ရာသီစာအရွက်တစ်မျိုးဖြစ်ပါသည်။ ငရံ့ပတူပင်၏ပင်စည်နှင့် အမြစ်သည်လည်း ဆေးဖက်ဝင်သည့်အပြင် အပင်၏အရွက်ကိုပြုတ်၍ ကြက်သွန်နီ၊ ဆီချက်၊ မြေပဲ၊ ပုစွန်ခြောက်များနှင့်ရော၍ သုတ်စာလေ့ရှိကြပြီး ဗီတာမင်ဓာတ်များစွာပါဝင်ကာ အမျှင်ဓာတ်၊ ဇင့်ဓာတ်၊ ကယ်လ်ဆီယမ်၊ မဂ္ဂနီဆီယမ်၊ အမိုင်နိုအက်ဆစ်၊ ကောပါး၊ ပိုတက်ဆီယမ်၊ ပရိုတင်း၊ ကာဗွန်ဟိုက်ဒရိတ် စသည့်အာဟာရဓာတ်များစွာပါဝင်နေသောကြောင့် အမှန်တကယ်စားသုံးပေးသင့်သောအရွက်တစ်မျိုးဖြစ်ပါသည်။ ထို့ပြင် အာရုံကြောဆိုင်ရာကျန်းမာရေးပြဿနာများအပြင် ရောင်ရမ်းမှုကိုသက်သာစေခြင်း၊ အသည်းတွင်ရှိသောအဆိပ်အတောက်များကိုဖယ်ရှားပေးနိုင်ခြင်း၊ ဆီးချိုရောဂါဖြစ်ပွားခြင်းမှကာကွယ်ခြင်း၊ သွေးတိုးရောဂါကိုသက်သာစေခြင်း၊ ကင်ဆာရောဂါဝေဒနာခံစားနေရသူများသည် ငရံ့ပတူရွက်ကိုစားသုံးပေးခြင်းဖြင့် ရောဂါသက်သာစေသည်ဟုလည်းလေ့လာသိရှိရပါသည်။ အဝလွန်ခြင်းမှလည်းကာကွယ်ပေးနိုင်သည့်အတွက် ကျန်းမာရေးအတွက်အထောက်အကူပြုစေသော ငးရံ့ပတူရွက်များကိုစိုက်ပျိုး၍ စားသုံးပေးသင့်ပါကြောင်း လေ့လာတင်ပြလိုက်ပါသည်။

DOCA(ပဲခူး)

     ရွှေဖရုံသီးချက်နှင့် မန်ကျည်းသီးစိမ်းကြော်တို့သည် မိုးရာသီစာဟင်းတွဲဖက်ဖြစ်ပြီး မြန်မာလူမျိုးများနှစ်ခြိုက်စွာ စားသုံးကြပါသည်။ ရွှေဖရုံသီးချက်ပြီး မန်ကျည်းသီးစိမ်းထောင်း၍ မျှင်ငါးပိ၊ ပုဇွန်ခြောက်၊ ငရုတ်သီးစိမ်းတို့ ရော၍ကြော်ထားသော ဟင်းတွဲဖက်သည် ယခုလို မိုးရာသီ တွင် ခံတွင်းမြိန်စေသော ဟင်းတစ်ခွက်ဆိုလျှင်လည်း မမှားပါ။

       ထို့ပြင် ရွှေဖရုံသီးစားပေးခြင်းဖြင့် မျက်စိအားကောင်းခြင်း၊ ခုခံစွမ်းအားတိုးခြင်း၊ အစာ ခြေစနစ်ကောင်းမွန်ခြင်း၊ ကိုယ်အလေးချိန်လျှော့ချခြင်းအား အထောက်အကူပြုနိုင်ခြင်းစသည့် ကျန်းမာရေးအကျိုးကျေးဇူးများ ရရှိနိုင်မည့်အပြင် မန်ကျည်းသီးစိမ်း၏ ကျန်းမာရေးအာနိသင် အနေ ဖြင့် ရာသီဥတုကြောင့်ဖြစ်သော ဖျားနာခြင်း၊ လည်ချောင်းနာခြင်း၊ ရောင်ရမ်းခြင်းတို့အား သက်သာ စေခြင်း၊ မန်ကျည်းသီးတွင် အမျှင်ဓါတ်များပါခြင်းကြောင့် အူလမ်းကြောင်းရဲ့လုပ်ဆောင်မှုများ ကိုလည်း အထောက်အကူဖြစ်စေပါသည်။

     တောင်ငူမြို့ ညောင်ပင်ဈေးတွင် တောင်ငူဒေသထွက် မန်ကျည်းသီးစိမ်းနှင့် ဖရုံသီးများ ရောင်းချနေပါသည်။ မန်ကျည်းသီးစိမ်း တစ်ဆယ်သားလျှင် ၈၀၀ ကျပ်နှင့် ဖရုံသီး ကြီး၊ လတ်၊ သေး ဈေးနှုန်းများအနေဖြင့် တစ်လုံးလျှင် ၅၀၀ကျပ်၊ ၈၀၀ကျပ်နှင့် ၁၀၀၀ ကျပ်ဝန်းကျင်အထိ ရောင်းချ ပေးလျက်ရှိပါသည်။

      အစာလည်းဆေး၊ ဆေးလည်းအစာဆိုသကဲ့သို့ ယခုကဲ့သို့ မိုးရာသီတွင် ခံတွင်းမြိန်စေပြီး ကျန်းမာရေးအတွက် အထောက်အကူပြုနိုင်သော ရာသီစာ တွဲဖက်ဟင်းလျာအဖြစ် မြန်မာတို့ ကြိုက်နှစ်သက်သော ရွှေဖရုံသီးနှင့် မန်ကျည်းသီးစိမ်းမှာ ရောင်းရလျက်ရှိကြောင်း ဟင်းသီးဟင်းရွက်ရောင်းချသူများထံမှ သိရပါသည်။

DOCA(ပဲခူး)