ပြည်တွင်းကုန်သွယ်မှုသတင်း

  ရန်ကုန်တိုင်းဒေသကြီး၊ ခရမ်းမြို့နယ်၊ ကမာမတ်ကျေးရွာတွင် စားဖားအကောင်ဖောက်ရောင်းချခြင်းနှင့် မွေးမြူခြင်းလုပ်ငန်းများရှိပြီး ကမာမတ်ကျေးရွာမှ စားဖားသားပေါက်များအား ခရမ်းမြို့ပေါ် (၉) ရပ်ကွက်နှင့် ကျုံးကျုံးကျ၊ ကမာကလူ၊ ပေါက်ပင်၊ ကြူတော၊ ကမာစိန်ကျေးရွာများမှ ဝယ်ယူမွေးမြူခြင်းဖြင့် တစ်နိုင်တစ်ပိုင် မွေးမြူကြပါသည်။

    ကမာမတ်ကျေးရွာတွင်နေထိုင်သော ဦးနန်းဝေသည် စားဖားမွေးမြူခြင်းလုပ်ငန်းအား ၂၀၀၇ခုနှစ်မှစတင်၍မွေးမြူခဲ့ပါသည်။ မုဒုံမြို့နယ်မှ ဖားသားပေါက်များအား (၁) ကောင်လျှင် (၃၅၀) ကျပ်ဖြင့် ဖားအကောင်ရေ (၁၀၀၀)  ဝယ်ယူခဲ့ရာ ကမာမတ်ကျေးရွာရောက်ရှိချိန်တွင် ခရီးကွာဝေးမှုကြောင့် ဖားများမှာ အများစုသေကုန်ပြီး အနည်းငယ်သာကျန်ရှိခဲ့ရာ ကျန်ရှိသောဖားများကိုသာမွေးမြူ၍ သားဖောက်ခြင်း၊ မွေးမြူခြင်းလုပ်ငန်းများလုပ်ကိုင်ဆောင်ရွက်လျက်ရှိပါသည်။ စားဖားမွေးမြူရာတွင် အမျိုးအစား (၂) မျိုးရှိရာ ထိုင်းမျိုးနှင့်ကွင်းဖား (ဒေသဖား) ဟူ၍ရှိပြီး ထိုင်းမျိုးမှာ အဝါဖျော့ရောင်ရှိပြီး ကွင်းမျိုးဒေသဖားမှာ အမဲရောင်ရှိ၍ လူကြိုက်နည်းကြောင်းသိရပြီး အများအားဖြင့် ထိုင်းမျိုးများသာ အမွေးများကြောင်းသိရပါသည်။ ထိုင်းမျိုးသားပေါက်ဝယ်ယူမွေးမြူရာတွင် ရက် (၄၀) သားမှစတင်၍ မွေးမြူကြပြီး သားပေါက် (၁) ကောင် လျှင် (၂၂၀/-) ကျပ်မှ (၂၅၀/-) ကျပ်အထိဈေးရှိပါသည်။ သက်တမ်းကာလအားဖြင့် ရက်ပေါင်း (၁၀၀)၊ (၃) လခွဲကြာသည့်အခါ (၁) ကောင်လျှင် (၁၃) ကျပ်သားမှ (၁၅) ကျပ်သားထိချိန်ရှိလာပါက ထုတ်ရောင်း၍ရပြီး စားဖား (၁) ပိဿာလျှင် လက်ရှိပေါက်ဈေး (၉၀၀၀/-) ကျပ်မှ (၁၂၀၀၀/-) ကျပ်အထိရှိကြောင်းနှင့် စားဖားများကို ရန်ကုန်၊ ကြည်မြင်တိုင်ငါးဈေးတွင် ရောင်းချခြင်း၊ ပွဲစားများဖြင့်‌ရောင်းချခြင်းများရှိပါသည်။

    ဖားသားဖောက်ရာတွင် ဖားမ(၅) ကောင်လျှင် သားပေါက် ၅၀၀၀မှ ၁၀၀၀၀ထိသားပေါက်နိုင်ပြီး သားပေါက်များအမှီးပြတ်ချိန်တွင် တစ်ကောင်နှင့်တစ်ကောင်ကိုက်၍ သေခြင်းများရှိ၍ ကောင်ရေ ၃၀၀၀ခန့်သာ ကျန်ရှိတတ်ပြီး ဖားထီးနှင့်ဖားမများအားလည်းဆေးထိုး၍ အကောင်ဖောက်ပြီး မျိုးဖားမ (၁)ကောင်အား တစ်နှစ်လျှင် (၁)ကြိမ် ၊ (၂)နှစ်သားဖောက်နိုင်ကြောင်း သိရပါသည်။

      စားဖားမွေးမြူရာတွင် (၁) နှစ်လျှင် (၄) ကြိမ်ခန့်မွေးမြူနိုင်ပြီး အကောင်ရေ (၁၀၀၀) လျှင် ခြံမိုး၊ အစာဖိုးစရိတ်ချန်ပြီး ကျပ် (၂) သိန်းခန့်အမြတ်ရရှိနိုင်ကြောင်းသိရပါသည်။ စားဖားများအား အစာကြွေးရာတွင် ငါးစာဖြစ်သော ALLER AQUA၊ ဒီဟိုက်တံဆိပ်ပါ အစာအိတ်၊ 2MM၊ 4MM၊ 6MM စသည့်အမျိုးအစားများကို 15KG ရှိသည့်အိတ်များဝယ်ယူ၍ကျွေးရပါသည်။

    စားဖားအကောင် (၁၀၀၀) မွေးမြူခြင်းအတွက် စားဖားများအား အစာကျွေးရာတွင် ဖားသားပေါက် (၄၀) ရက်သားကို ALLER 2MM (15KG) (၁) အိတ်ကျွေးရပြီး တစ်အိတ်ဈေးမှာ  (၆၇၀၀၀/-) ကျပ်ဖြစ်ပါသည်။ (၅၀) ရက်သားရှိသောဖားသားပေါက်များကို ALLER 4MM (15KG) (၂) အိတ်ကျွေးရပြီး (၁) အိတ်ဈေးနှုန်းမှာ (၇၀၀၀၀/-) ကျပ်ဖြစ်ပါသည်။ ဖားသားပေါက် (၇၀) ရက်သားမှ (၁၀၀) ရက်သားအထိကို ALLER 6MM (15KG) (၃) အိတ်ကျွေးရပြီး တစ်အိတ်လျှင် (၅၇၀၀၀/-) ကျပ်ဈေးရှိကြောင်း သိရှိရပါသည်။

       စားဖားအကောင် (၁၀၀၀) လျှင် စားဖားမွေးမြူမည့် ခြံဆောက်လုပ်ခအနေဖြင့် တာပေါ်လင်အခင်း၊ အမိုးဇာပိုက်၊ ဝါးနှင့်ခြံမိုးများအတွက် စုစုပေါင်း ကျပ် (၂၀၀၀၀၀/-) ခန့် ကုန်ကျ၍ ခြံမပျက်စီးမချင်း စားဖားထည့်၍မွေးမြူရပါသည်။

    ယခင်နှစ်များတွင် စားဖားများမှာ ဈေးကောင်းရသော်လည်း ယခုနှစ်တွင် ဝယ်လက်သိပ်မရှိ၍ ဈေးနှုန်းများလျော့နည်းလာခြင်း၊ အစာဈေးများမြင့်တက်လာခြင်းကြောင့် မရှုံးရုံသာရှိပြီး အမြတ်နည်းလာကြောင်း၊ ရောဂါဝင်ခြင်းနှင့် တစ်ကောင်နှင့်တစ်ကောင်ကိုက်၍ သေဆုံးခြင်းများရှိလျှင် အရှုံးပေါ် နိုင်ပါကြောင်း စုံစမ်းသိရှိရပါသည်။

DOCA(ရန်ကုန်)

   ရန်ကုန်တိုင်းဒေသကြီး၊ လှိုင်မြို့နယ်၊ သီရိမင်္ဂလာဈေးတွင် ဇူလိုင်လ (၂၆) ရက်နေ့မှ ဩဂုတ်လ (၁) ရက်နေ့အထိဖြစ်ပေါ်ခဲ့သော သစ်သီးဝလံဈေးနှုန်းများမှာ မော်လမြိုင်မှ ကျွဲကောသီးအလုံးကြီးတစ်လုံးလျှင် ကျပ်၁၅၀၀၊ အလုံးလတ်တစ်လုံးလျှင် ကျပ်၁၀၀၀၊ အလုံးသေးတစ်လုံးလျှင် ကျပ်၅၀၀၊ ဝမ်းတွင်းမှ ဖရဲသီး (211) အလုံးကြီးတစ်လုံးလျှင် ကျပ်၃၅၀၀၊ အလုံးလတ်တစ်လုံးလျှင် ကျပ်၃၀၀၀၊ အလုံးသေးတစ်လုံးလျှင် ကျပ်၂၅၀၀၊ ပုပ္ပါးမှ မာလကာသီးအလုံးကြီးတစ်လုံးလျှင် ကျပ်၃၀၀၊ အလုံးလတ်တစ်လုံးလျှင် ကျပ်  ၂၀၀၊ အလုံးသေးတစ်လုံးလျှင် ကျပ်၁၅၀၊ ရေးမှ မင်းဂွတ်သီး အလုံးကြီး (၃၀၀) ပါ တစ်ခြင်းလျှင် ကျပ်၃၀၀၀၀၊ အလုံးလတ်တစ်ခြင်းလျှင် ကျပ်၂၀၀၀၀၊ ရေးမှ ဒူးရင်းသီး အလုံးကြီးတစ်လုံးလျှင် ကျပ်၅၀၀၀၊ အလုံးလတ်တစ်လုံးလျှင် ကျပ်၄၀၀၀၊ အလုံးသေးတစ်လုံးလျှင် ကျပ်၃၀၀၀၊ ပြင်ဦးလွင်မှ နဂါးမောက်သီးအလုံးကြီး (၁၇) လုံးပါ တစ်ဖာလျှင် ကျပ်၁၅၀၀၀၊အလုံးလတ်တစ်ဖာလျှင် ကျပ်၁၀၀၀၀၊ အလုံးသေးတစ်ဖာလျှင် ကျပ်၇၀၀၀၊ တိုက်ကြီးမှ ပိန္နဲသီး (ကိုင်းဆက်) အလုံးကြီးတစ်လုံးလျှင် ကျပ်၁၀၀၀၀၊ အလုံးလတ်တစ်လုံးလျှင် ကျပ်၅၀၀၀၊ အလုံးသေးတစ်လုံးလျှင် ကျပ်၃၀၀၀၊ အောင်ပန်း၊ နောင်ချိုမှ ရွှေလိမ္မော်သီးအလုံးကြီးတစ်လုံးလျှင် ကျပ်၁၀၀၀၊ အလုံးသေးတစ်လုံးလျှင် ကျပ်၇၀၀၊ မန္တလေးမှ သရက်သီး (ရင်ကွဲ) အလုံးကြီးတစ်လုံးလျှင် ကျပ်၇၀၀၊ အလုံးလတ်တစ်လုံးလျှင် ကျပ်၅၀၀၊ အလုံးသေးတစ်လုံးလျှင် ကျပ်၃၀၀၊ ပြင်ဦးလွင်မှ သစ်တော်သီး အလုံးကြီး (၃၀၀) ပါ တစ်ခြင်းလျှင် ကျပ်၄၅၀၀၀၊ အလုံးလတ်တစ်ခြင်းလျှင် ကျပ် ၃၅၀၀၀၊ သီပေါမှ နာနတ်သီးအလုံးကြီးတစ်လုံးလျှင် ကျပ်၇၀၀၊ အလုံးလတ်တစ်လုံးလျှင် ကျပ်၅၀၀၊ အလုံးသေးတစ်လုံးလျှင် ကျပ်၄၀၀၊ ကလောမှ ပန်းသီးအလုံးကြီး စက္ကူပုံးတစ်ပုံးလျှင် ကျပ်၅၀၀၀၀၊ အလုံးသေးစက္ကူပုံးတစ်ပုံးလျှင် ကျပ်၄၅၀၀၀ဈေးနှုန်းတို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံပန်းမန်ဟင်းသီးဟင်းရွက်စိုက်ပျိုးထုတ်လုပ်တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)

   ပုစွန်ခြောက်သည် မြန်မာနိုင်ငံတွင် လူအများကြိုက်နှစ်သက်မှုရှိသော စားသောက်ကုန်ပစ္စည်းတစ်ခုအပါအဝင်ဖြစ်ပြီး အသုပ်နှင့်အကြော်အလှော်များချက်ပြုတ်ရာတွင် ပုစွန်ခြောက်ကိုတွဲဖက်၍စာသုံးလေ့ရှိပါသည်။  တချို့စားသုံးသူများသည် ဘေးအန္တရာယ်ကင်းရှင်းစေရန်အတွက် ပုစွန်ခြောက်ကို အချိုမှုန့်အစားထိုးအဖြစ်လည်း အသုံးပြုလျက်ရှိပါသည်။

    မြန်မာနိုင်ငံ၏ကမ်းရိုးတန်းဒေသများဖြစ်သော တနင်္သာရီတိုင်းဒေသကြီး၊ မွန်ပြည်နယ်၊ ရခိုင်ကမ်းရိုးတန်းဒေသနှင့် ဧရာဝတီတိုင်းဒေသကြီး၏ မြစ်ဝကျွန်းပေါ်ဒေသများတွင် တစ်နိုင်တစ်ပိုင်အိမ်တွင်းမှုလုပ်ငန်းများကိုလုပ်ကိုင်သည့်အနက် ပုစွန်ခြောက်ကို စီးပွားဖြစ်လုပ်ကိုင်လျက်ရှိပါသည်။ ပုစွန်ခြောက်ကို ဖမ်းယူသည့် ပိုက်လှေအမျိုးအစားအပေါ်မူတည်၍ ကျားပုစွန်ခြောက်၊ ဖောင်ပုစွန်ခြောက်၊ ဒုံးပုစွန်ခြောက်ဟူ၍ အမျိုးအစားကွဲပြားလျက်ရှိပြီး ဆိုဒ်အမျိုးအစားအပေါ်မူတည်၍လည်း ဈေးနှုန်းကွာခြားမှုရှိပါသည်။

     ဒေသအတွင်း၌ လက်ရှိပုစွန်ခြောက်ဈေးနှုန်းများမှာ ကျားပုစွန်ခြောက် (ကြီး) တစ်ပိဿာလျှင် ကျပ်၅၀ဝ၀ဝမှ ကျပ်၅၃၀ဝ၀ခန့်၊ ဖောင်ပုစွန်ခြောက် (ကြီး) တစ်ပိဿာလျှင် ကျပ်၄၈၀ဝ၀မှ ကျပ်၅၀ဝ၀ဝခန့်၊ ဒုံးပုစွန်ခြောက် (ကြီး) တစ်ပိဿာလျှင် ကျပ်၇၀ဝ၀ဝမှ ၈၀ဝ၀ဝခန့်ဈေးနှုန်းတို့ဖြင့် အရောင်းအဝယ်ပြုလုပ်လျက်ရှိကြောင်း ပုစွန်ခြောက်လုပ်ငန်းရှင်ထံမှသိရှိပါသည်။

  ယခုမိုးရာသီကာလတွင် ပုစွန်ခြောက်ကုန်ကြမ်းထွက်ရှိမှုများပြားသော်လည်း ပုစွန်ခြောက်ကုန်ချောရရှိရန်အတွက် ပုစွန်များကိုအခြောက်ခံရာတွင် ဒေသတွင်း မိုးရွာသွန်းမှုများပြားနေသောကြောင့် နေရောင်ခြည်မရရှိသဖြင့် ကြပ်တိုက်၍အခြောက်ခံခြင်း၊ ပုစွန်တင်သည့်ဖောင်ဖြင့် အောက်မှမီးအပူပေး၍ အခြောက်ခံရသဖြင့် ပုစွန်ခြောက်ထွက်ရှိမှုနည်းပါးကြောင်း ပုစွန်ခြောက်လုပ်ငန်းရှင်ထံမှသိရှိရပါသည်။

DOCA(တနင်္သာရီ)

 မြန်မာနိုင်ငံစက်သုံးဆီတင်သွင်း/သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက တိုင်းဒေသကြီး/ ပြည်နယ်အလိုက် မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများကို နေ့စဉ် ထုတ်ပြန်ပေးလျက်ရှိပါသည်။

  ရွှေဘိုမြို့ရှိ စက်သုံးဆီဆိုင် (၁၉) ဆိုင်တို့မှာ ပုံမှန်ဖွင့်လှစ်ရောင်းချလျက်ရှိပြီး ၂၀၂၃ခုနှစ်၊ ဇူလိုင်လ၊ နောက်ဆုံးအပတ်တွင် စက်သုံးဆီဈေးနှုန်းများမှာ ဓာတ်ဆီ (92) တစ်လီတာလျှင် (၂၂၇၅) ကျပ်၊ ဓာတ်ဆီ (95) တစ်လီတာလျှင် (၂၃၈၀) ကျပ်၊ ဒီဇယ် (ရိုးရိုး) တစ်လီတာလျှင် (၂၂၇၅) ကျပ်၊ ဒီဇယ် (ပရီမီယမ်) တစ်လီတာလျှင် (၂၃၅၀) ကျပ်ဖြင့် ရောင်းချလျက်ရှိကြောင်းသိရသည်။

   ၂၀၂၃ခုနှစ်၊ ဩဂုတ်လ၊ ပထမအပတ်တွင်ဖြစ်ပေါ်နေသော စက်သုံးဆီဈေးနှုန်းများမှာ ဓာတ်ဆီ (92) တစ်လီတာလျှင် (၂၃၁၅) ကျပ်၊ ဓာတ်ဆီ (95) တစ်လီတာလျှင် (၂၄၂၅) ကျပ်၊ ဒီဇယ် (ရိုးရိုး) တစ်လီတာလျှင် (၂၄၇၅) ကျပ်၊ ဒီဇယ် (ပရီမီယမ်) တစ်လီတာလျှင် (၂၅၅၅) ကျပ်ဖြင့်ရောင်းချနေသောကြောင့် ယခင်အပတ်နှင့်နှိုင်းယှဉ်ပါက ဓာတ်ဆီ (92) တစ်လီတာလျှင် (၄၀) ကျပ်၊ ဓာတ်ဆီ (95) တစ်လီတာလျှင် (၄၅) ကျပ်၊ ဒီဇယ် (ရိုးရိုး) တစ်လီတာလျှင် (၂၀၀) ကျပ်၊ ဒီဇယ် (ပရီမီယမ်) တစ်လီတာလျှင် (၂၀၅) ကျပ်ဖြင့် ဈေးနှုန်းအသီးသီးမြင့်တက်လျက်ရှိကြောင်း စက်သုံးဆီဆိုင်များမှသတင်းရရှိပါသည်။

DOCA(စစ်ကိုင်း)

    ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်အတွင်းရှိ ဝက်ပုတ်၊ ပုတီးကုန်း၏ အနားပတ်ဝန်းကျင်တွင် ဟင်းသီးဟင်းရွက်သီးနှံမျိုးစုံတို့ကို များစွာ စိုက်ပျိုးထုတ်လုပ်၍ စီးပွားဖြစ်တင်ပို့ရောင်းချလျက်ရှိပါသည် ။ ထိုဟင်းသီးဟင်းရွက်သီးနှံများထဲတွင် တကူးတကစိုက်ပျိုးစရာမလိုဘဲ မိုးဦးကျတွင်ပေါက်ရောက်သော ဟင်းသီးဟင်းရွက်များလည်းပါဝင်ပေသည် ။ ထိုအလေ့ကျပေါက်ရောက်သော ဟင်းသီးဟင်းရွက်များထဲမှ ဖလှံတောင်ဝှေး၏အသုံးဝင်ပုံကို ရေးသားတင်ပြအပ်ပါသည်။

    စားသုံးသူတို့အနေဖြင့် ဖလှံတောင်ဝှေးပင်ကို ဓာတုကင်းလွတ်သောဟင်းသီးဟင်းရွက်အဖြစ် စိတ်ချစွာစားသုံးနိုင်ပါသည်။ အဘယ်ကြောင့်ဆိုသော် ဖလှံတောင်ဝှေးပင်သည် ဥမှအလေ့ကျပေါက်သော သြဂဲနစ်စစ်စစ်ဖြစ်ပါသည်။ ဖလှံတောင်ဝှေးပင်၏အဖျားပိုင်း (၁) ပေခန့်ကိုချိုးယူ၍ (၁၀) တောင့်စည်းတစ်စည်းလျှင် ပေါ်ကာစတွင် (၅၀၀) ကျပ်နှင့် လှိုင်သောအချိန်တွင် (၃၀၀) ကျပ်ခန့်ရရှိပါသည်။ ဖလှံတောင်ဝှေး၏ အပေါ်ယံအမျှင်ကိုသင်၍ လက်တစ်ဆစ်ခန့်လှီးဖြတ်ကာ ထက်ခြမ်းခြမ်း၍ ကြက်ဥနှင့်ကြော်စားလျှင် ဟင်းပွဲတစ်ပွဲအဖြစ်ရရှိပါသည်။ အပင်မှ အဖြူရောင်ပန်းများပွင့်ပြီး အပင်ရင့်သန်လာလျှင် ချိုးယူစားသောက်ခြင်းမပြုတော့ပါ။ သို့‌သော်ရင့်သော ပင်စည်ရိုးကို နားအူ၊ နားကိုက် ဝေဒနာများအတွက် မီးအုံး၍ အရည်ခပ်နွေးနွေးကို နားထဲညှစ်ထည့်ပေးလျှင် ပျောက်ကင်း၍ ဆေးဘက်ဝင်သည်ဟုကြားသိရပါသည်။ ဖလှံတောင်ဝှေးပင်သည် အမျှင်ဓာတ်ကြွယ်ဝ‌သောကြောင့် ဝမ်းချုပ်တတ်သူများ မကြာခဏစားသုံးပေးသင့်ကြောင်း၊ ဆီးရောဂါများနှင့် အခြားရောဂါများကိုလည်းသက်သာပျောက်ကင်း၍ အလွန် ဆေးဘက်ဝင်ကြောင်း ဆေးကျမ်းများအရသိရှိရပါသည် ။

    ယနေ့ခေတ် ဟင်းသီးဟင်းရွက်စိုက်ပျိုးထုတ်လုပ်သော တောင်သူများအနေဖြင့် စားသုံးသူဦးစားပေး၍ ဓာတ်မြေသြဇာနှင့်ဓာတုပိုးသတ်ဆေးတို့ကို စနစ်တကျသုံးစွဲသော တောင်သူဆိုသည်မှာ အလွန်ရှားပါးလှသဖြင့် ကျန်းမာရေးလိုက်စားသောစားသုံးသူများအတွက် ဓာတုကင်းလွတ်သောဟင်းသီးဟင်းရွက်ကို ရွေးချယ်စားသုံးနိုင်စေရန် တစ်နှစ်တစ်ကြိမ်သာပေါ်သော ရာသီစာ ဖလှံတောင်ဝှေး၏ဆေးဖက်ဝင်အသုံးဝင်ပုံကို ရေးသားဖော်ပြလိုက်ရပါသည်။

DOCA(ပဲခူး)