ပြည်တွင်းကုန်သွယ်မှုသတင်း

         ဩဂုတ်လ ဒုတိယပတ်အတွင်း ကော့ကရိတ်မြို့နယ်၌  အခြေခံစားကုန်များဖြစ်သော ရွှေဘို ပေါ်ဆန်းဆန် တစ်ပြည် ၅၅၀၀ ကျပ်၊ ဖျာပုံပေါ်ဆန်းဆန် တစ်ပြည် ၄၈၀၀ ကျပ်၊ သထုံပေါ်ဆန်းဆန် တစ်ပြည် ၃၆၀၀ ကျပ်၊ဧည့်မထဆန်(မနောသုခ)တစ်ပြည်   ၂၉၀၀ ကျပ်၊ ဧည့်မထဆန်(ဧရာမင်း) တစ်ပြည် ၃၃၀၀ ကျပ် ဖြင့် အရောင်းအဝယ်ဖြစ်လျက်ရှိပြီး ကြက်သွန်နီ(ကြီး)လက်လီဈေးမှာ တစ်ပိဿာ ၂၈၀၀ ကျပ်၊ ကြက်သွန်နီ(လတ်)တစ်ပိဿာ ၂၅၀၀ ကျပ်၊ ကြက်သွန်နီ(သေး) တစ်ပိဿာ ၂၀၀၀ ကျပ်၊ ကြက်သွန်ဖြူ(ဗမာ) တစ်ပိဿာ ၁၀၀၀၀ ကျပ်၊ ကြက်သွန်ဖြူ (ကြူကုတ်) တစ်ပိဿာ ၈၀၀၀ ကျပ်၊ ဂျင်း တစ်ပိဿာ ၇၀၀၀ ကျပ်၊ ငရုတ်သီးခြောက် အမျိုးအစားအလိုက် တစ်ပိဿာ ၁၆၀၀၀ ကျပ် မှ ၁၉၀၀၀ ကျပ်ထိ၊ အာလူး တစ်ပိဿာ ကျပ် ၂၈၀၀ မှ ၃၅၀၀ ထိ ၊ ကုလားပဲခြမ်း တစ်ပိဿာ ၇၀၀၀ ကျပ်၊ ပဲနီလေး တစ်ပိဿာ ၇၀၀၀ ကျပ်၊ ခရမ်းချဉ်သီး တစ်ပိဿာ ၂၅၀၀ ကျပ် ဖြင့် အရောင်းအဝယ်ဖြစ်နေသည်။

          ကြက်ဥ လက်လီဈေးနှုန်းမှာ (ကြီး)တစ်လုံးလျှင် ၃၀၀ ကျပ်၊ (သေး) တစ်လုံးလျှင် ၂၅၀ ကျပ်၊ ဘဲဥ(ကြီး)တစ်လုံး ၃၅၀ ကျပ်၊ (သေး) တစ်လုံး ၃၀၀ ကျပ်ရှိသည်။ အသား/ငါး ဈေးနှုန်းများမှာ ကြက်သား (CP) တစ်ပိဿာ ၁၂၀၀၀ ကျပ်၊ ကြက်သား(ဗမာ)တစ်ပိဿာ ၁၈၀၀၀ ကျပ်၊ ကြက်သား (ဥတုံး) တစ်ပိဿာ ၁၃၀၀၀ ကျပ်၊ ဝက်သား တစ်ပိဿာ ၂၀၀၀၀ ကျပ်၊ ဆိတ်သား တစ်ပိဿာ  ၃၀၀၀၀ ကျပ်၊ ငါးမြစ်ချင်း တစ်ပိဿာ ၆၀၀၀ ကျပ်၊ ချောင်း ငါးကြင်း တစ်ပိဿာ ၂၀၀၀၀ ကျပ်မှ ၂၅၀၀၀ ကျပ်ထိ၊ ငါးတန် တစ်ပိဿာ ၅၀၀၀ ကျပ်ဖြင့် အရောင်းအဝယ်ဖြစ်လျက်ရှိပါသည်။

          စားသုံးဆီ ဈေးနှုန်းများမှာ ပဲဆီသန့် တစ်ပိဿာလျှင် ၁၅၀၀၀ ကျပ်၊ စားအုန်းဆီ တစ်ပိဿာ လျှင် ၇၅၀၀ ကျပ်တို့ဖြင့် အရောင်းအဝယ်ဖြစ်နေကြောင်းသိရသည်။

DOCA(ကရင်)

      မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ဧရာဝတီမြစ်အနောက်ဘက်ကမ်းတွင်ရှိပြီး နှစ်စဉ်ဆီထွက်သီးနှံမြေပဲကို မိုးနှင့် ဆောင်း(၂)ရာသီစိုက်ပျိုးလေ့ရှိပါသည်။ (မိုး)မြေပဲများကို ဒေသတွင်းအနှံ့အပြား ကုန်းမြေယာများတွင် ဇူလိုင်လဆန်းမှ စတင်၍စိုက်ပျိုးပြီး အောက်တိုဘာလတွင် ရိတ်သိမ်းမည်ဖြစ်ကြောင်း၊ စိုက်ဧက(၃၀၀)ခန့် စိုက်ပျိုးထားရှိကြောင်း၊ သီးညှပ်သီးနှံအဖြစ် ပဲစဉ်းငုံ၊ ပဲတီစိမ်း၊ ပဲလွန်းဖြူသီးနှံတို့ကို စိုက်ပျိုးကြောင်း ဒေသခံတောင်သူများတဆင့် သိရှိရပါသည်။

    မြေပဲစိုက်ပျိုးရာတွင် မြေပဲမျိုးစေ့ တစ်ပြည်လျှင် ကျပ်(၇၀၀၀)၊ တစ်တင်းလျှင်ကျပ် (၁၁၂၀၀၀)ဈေးဖြင့်ဝယ်ယူရပြီး တစ်ဧကလျှင် မျိူးစေ့(၂)တင်းခန့် စိုက်ပျိုးရကြောင်း၊ အလုပ်သမားငှားပြီး လက်ဖြင့် အဆံတစ်စေ့ခြင်း စိုက်ပျိုးကြောင်း၊ အလုပ်သမား(၁၅)ဦး ငှားရမ်းရပြီး တစ်ဦးလျှင် ကျပ်(၂၅၀၀)၊ နွားတစ်ရှဉ်းလျှင် ကျပ်(၁၅၀၀၀)နှုန်းဖြင့် ငှားရမ်းစိုက်ပျိုးရကြောင်း၊ နွားရှဉ်းဖြင့် ထယ်ချောင်းဆွဲပြီး မျိုးစေ့ဖြူးချစိုက်ပျိုးလျှင် (၃)တင်းခန့် ဝယ်ယူစိုက်ပျိုးရကြောင်း၊ စိုက်တောင်သူအများစုမှာ မျိုးစေ့ကုန်ကျမှုနည်းပြီး အပင်ပေါက်စုံလင်စေရန်အတွက် အလုပ်သမားငှားရမ်း စိုက်ပျိုးမှုများကြောင်း၊ မကွေး(၁၁) နှင့် နှစ်ဆစ်တောင့် (အသေး) (၃)လပဲမျိုးကို အများဆုံးစိုက်ပျိုးကြောင်း သိရှိရပါသည်။

   ကုန်ကျစရိတ်အနေဖြင့် ယခင်နှစ်မြေပဲမျိုးစေ့တစ်ပြည်လျှင် ကျပ်(၄၀၀၀)ဖြင့်ဝယ်ယူ စိုက်ပျိုးရပြီး ကုန်ကျစရိတ်မှာ ကျပ်(၅၀၀၀၀၀)ခန့်ကုန်ကျပြီး မြေပဲအထွက်တင်း(၂၀ မှ ၃၀)ထွက်ရှိကြောင်း၊ သီးနှံပေါ်ချိန်ဒေသတွင်း ဈေးကွက်တွင် မြေပဲတောင့်(အခြောက်) တစ်တင်းလျှင် ကျပ် (၂၅၀၀၀)၊ အဆံတစ်ပြည်လျှင် ကျပ်(၆၀၀၀) ဈေးဖြင့်ရောင်းချရခြင်း၊ တစ်ဧကလျှင် ကျပ်(၃)သိန်းခန့် ရရှိ ကြောင်း၊ စိုက်ပျိုးမြေ၊ သွင်းအားစုသုံးစွဲမှု၊ ရာသီဥတုမတူညီ၍ စိုက်တောင်သူတစ်ဦးချင်းမှာ အကျိုး အမြတ်ရရှိပုံ မတူညီကြောင်း သိရှိရသည်။

     ယခုလက်ရှိ‌ ဒေသတွင်းဈေးကွက်တွင် မြေပဲဆီဈေးနှုန်းမှာ ဆုံဆီတစ်ပိဿာလျှင် ကျပ် (၁၆၀၀၀)၊ စက်ဆီတစ်ပိဿာလျှင် ကျပ်(၁၄၅၀၀)ဖြင့် အရောင်းအဝယ်ဖြစ်လျက်ရှိကြောင်း သိရှိရ ပါသည်။ ယခုနှစ်တွင် မြေထောက်ပဲများကို ပြည်တွင်းစားသုံးမှုမြင့်တက်လာခြင်းနှင့် ပြည်တွင်း ပြည်ပဝယ်လိုအားများသောကြောင့် ပြည်တွင်းဈေးကွက် ခိုင်မာလျက်ရှိပြီး ပြည်တွင်းမှထွက်ရှိသော မြေပဲဆံများကို ပြည်ပဖြစ်သော တရုတ်နိုင်ငံ၊ အိန္ဒိယနိုင်ငံများမှ အဓိကဝယ်ယူလျက်ရှိ၍ မြေပဲဈေးကွက် ခိုင်မာလျက်ရှိပါသည်။

    မြေပဲဆီသည် ကျန်းမာရေးနှင့် ညီညွှတ်သည့် ဆီထွက်သီးနှံတစ်မျိုးဖြစ်၍ စိုက်တောင်သူများအနေဖြင့် မိသားစုစားသုံးဆီဖူလုံမှုရရှိသည့်အပြင် ဈေးကွက်ခိုင်မာမှုရှိ၍ အကျိုးအမြတ်ရရှိခြင်းကြောင့် ဆီထွက်သီးနှံ(မိုး)မြေပဲများ ယခင်နှစ်ထက် တိုးချဲ့စိုက်ပျိုးလျက်ရှိပြီး စိုက်ခင်းများမှာလည်း ဖြစ်ထွန်းအောင်မြင်လျက်ရှိကြောင်း သိရှိရပါသည်။

DOCA(မကွေး)

    တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။

   တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။

    တနင်္သာရီတိုင်းဒေသကြီး၊ မြိတ်မြို့နယ်၊ ရှမ်းချောင်း (ကုန်စိမ်းဈေး) အတွင်းသို့ ရှမ်းပြည်နယ် (တောင်ပိုင်း)ရှိ အင်းလေး၊ အောင်ပန်းနှင့်အခြားဒေသများမှ  ခရမ်းချဉ်သီးများမှာ ယခင်လထက် လှိုင်လှိုင်ဝင်ရောက်လာကြကြောင်း မေးမြန်းသိရှိရပါသည်။

    မြိတ်မြို့နယ်အတွင်းရောင်းချနေသည့် ခရမ်းချဉ်သီးများကို ရှမ်းပြည်နယ် (တောင်ပိုင်း) မှ အဓိကထား၍ မှာယူဖြန့်ဖြူးရောင်းချရခြင်းဖြစ်ကြောင်း၊ လမ်းပမ်းဆက်သွယ်ရေးနှင့်သယ်ယူပို့ဆောင်ရေးအခက်အခဲကြောင့် ဈေးနှုန်းကြီးမြှင့်ရခြင်းဖြစ်ပြီး ယခုအခါ အခြားတိုင်းဒေသကြီး/ ပြည်နယ်များမှလည်းထွက်ပေါ်လာပြီဖြစ်၍ ဈေးနှုန်းများပြန်လည်ကျဆင်းလာကြောင်းကို ခရမ်းချဉ်သီးရောင်းချသော ကုန်သည်တစ်ဦးထံမှ မေးမြန်းသိရှိရပါသည်။ ဇွန်လ၊ စတုတ္တအပတ်တွင် ခရမ်းချဉ်သီး ၁ပိဿာလျှင် (၂၇၀ဝ-၃၀ဝ၀) ကျပ်တို့ရရှိခဲ့ပြီးဇူလိုင်လ၊ စတုတ္တအပတ်တွင် (၂၀ဝ၀-၂၅၀ဝ) ကျပ်သာရရှိကြောင်းသိရှိရပါသည်။

      ခရမ်းချဉ်သီးစိုက်ပျိုးသောတောင်သူများ၊ ကုန်စည်ဒိုင်များ၊ ပွဲရုံများ၊ ကုန်သည်များနှင့် တစ်ဆင့်ပြန်လည်ရောင်းချသူများအနေဖြင့် မိမိဝင်ငွေတိုးအောင် ခရမ်းချဉ်သီးနှင့်ပတ်သက်၍ တန်ဖိုးမြှင့်ထုတ်ကုန်များ (ခရမ်းချဉ်သီးယို) ကိုပြုလုပ်သင့်ပါသည်။ ခရမ်းချဉ်သီးကို တန်ဖိုးမြှင့်ထုတ်ကုန်များအဖြစ်ပြုလုပ်ရာတွင် လိုအပ်သောပါဝင်ပစ္စည်းများမှာ ခရမ်းချဉ်သီး ၁ပိဿာလျှင် သကြား (၄၅) ကျပ်သား၊ ကွမ်းစားထုံး (၃) ကျပ်သားနှင့် ဆားအနည်းငယ်တို့ဖြစ်ပါသည်။ ခရမ်းချဉ်သီးယိုပြုလုပ်ရာတွင် အရည်ရွှမ်းပြီး နီနီရဲရဲအသီးကိုရွှေးချယ်ကာ အစေ့များဖယ်ကျဉ်၍ အသီးထိပ်မှအညှာကိုဖယ်၍ ဒေါင်လိုက်ကိုင်ပြီး ဓားဖြင့်လေးပိုင်းခွဲကာ လေးစိတ်စိတ်ရပါသည်။ ခွဲထားသောခရမ်းချဉ်သီးများကို ရေဖျော်ထားသောထုံးထဲတွင် (၃) နာရီအကြာစိမ်ထားရပါသည်။ (၃) နာရီပြည့်လျှင် စိမ်ထားသောခရမ်းချဉ်သီးများကို ထုံးစင်အောင်ဆေးကြော၍ ကျိုမည့်အိုးထဲသို့ထည့်ကာ ဆား၊ သကြားများနှင့် ရေအနည်းငယ်ထည့်၍ မီးအေးအေးဖြင့် ခမ်းသည်အထိကျိုပေးရပါသည်။

    သကြားရည်များ ညောင်စေးကဲ့သို့ ခပ်ပြစ်ပြစ်ဖြစ်လာလျှင် နေလှန်းမည့်ဗန်းထဲသို့ တစ်လုံးချင်းစီကို အသာဆယ်ယူ၍ ဖြန့်ကာ နေရောင်ကောင်းစွာရသောနေရာတွင် ရက်သတ္တပတ် တစ်ပတ်ခန့်လှန်းပေးရပါမည်။ နေလှန်းနေသောကာလအတွင်း ခရမ်းချဉ်သီးယိုကို အထက်အောက်လှန်ပေးရမည်။ တစ်ပတ်ပြည့်လျှင် အသီးများသည် ခြောက်လည်းခြောက်၊ သကြားလည်းပွင့်သည့်အနေအထားတွင် အရသာကောင်းမွန်သောခရမ်းချဉ်သီးယိုကိုရရှိပြီဖြစ်ပါသည်။ ယခုကဲ့သို့ ဈေးကျနေသောကာလများတွင် တန်ဖိုးမြှင့်ထုတ်ကုန်များကိုထုတ်လုပ်၍ မိမိတို့၏ဝင်ငွေများတိုးလာအောင် ဆောင်ရွက်သင့်ကြောင်း ရေးသားလိုက်ရပါသည်။

DOCA(တနင်္သာရီ)