ပြည်တွင်းကုန်သွယ်မှုသတင်း

   ပဲခူးတိုင်းဒေသကြီး၊ သာယာဝတီခရိုင်၊ ကြိုပင်ကောက်မြို့တွင် (၁၇-၇-၂၀၂၃) ရက်နေ့မှစတင်၍  ကြိုပင်ကောက်မြို့မဈေးအနီး စည်ပင်သာယာရုံးရှေ့တွင် နံနက် (၈:၀၀) နာရီအချိန်တွင် တိုင်းဒေသကြီးအစိုးရအဖွဲ့၏ကြီးကြပ်မှုဖြင့် ကြို့ပင်ကောက်မြို့နယ်၊ စီမံအုပ်ချုပ်ရေးအဖွဲ့က စီစဉ်ကြီးကြပ်၍ အခြေခံလူတန်းစားပြည်သူများအတွက် စားသောက်ကုန်များကို သက်သာသောဈေးနှုန်းများဖြင့် နေ့စဉ် ရောင်းချပေးလျက်ရှိပါသည်။

   ထိုသို့ရောင်းချပေးခြင်းကို မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ၊ ဦးတင်မောင်ဌေး၏ကြီးကြပ်မှုဖြင့် မြို့နယ်အထွေထွေအုပ်ချုပ်ရေးဦးစီးဌာန၊ ရပ်ကွက်အုပ်ချုပ်ရေးမှူးအဖွဲ့ဝင်များ၊ စည်ပင်၊ တိမွေးကုဌာန၊ စားသုံးသူရေးရာဦးစီးဌာနမှဝန်ထမ်းများပါဝင်၍ ကိုယ်တိုင်စိုက်ပျိုး၊ မွေးမြူထုတ်လုပ်သူများနှင့်ပူးပေါင်းကာ အခြေခံစားသောက်ကုန်ဈေးနှုန်းကြီးမြင့်မှုမရှိစေရေးအတွက် ဆန်တစ်ပြည်လျှင် (၂၆၀၀) ကျပ်၊ စားအုန်းဆီတစ်ပိဿာလျှင် (၅၁၀၀) ကျပ်၊ ဝက်သားတစ်ပိဿာလျှင် (၁၃၀၀၀) ကျပ်၊ အမဲသားတစ်ပိဿာလျှင် (၁၂၀၀၀) ကျပ်၊ ဆိတ်သားတစ်ပိဿာလျှင် (၂၀၀၀၀) ကျပ်၊ ကြက်သား (စီပီ) တစ်ပိဿာလျှင် (၁၀၀၀၀) ကျပ်၊ ကြက်ဥတစ်လုံးလျှင် (၂၄၀) ကျပ်တို့ဖြင့် ရောင်းချပေးခဲ့ရာတွင် ပြင်ပပေါက်ဈေးထက် သက်သာသောဈေးနှုန်းဖြင့် ရောင်းချပေးခဲ့ကြောင်းသိရှိရပါသည်။

DOCA(ပဲခူး)

    လက်ပံတန်းမြို့မဈေးအတွင်း ၂၀၂၃ခုနှစ်၊ ဇူလိုင်လ (တတိယအပတ်) ၌ ရောင်းချပေးလျက်ရှိသော အခြေခံစားသောက်ကုန်များဖြစ်သည့် ရွှေဘိုပေါ်ဆန်းဆန်တစ်ပြည်လျှင် (၅၀၀၀) ကျပ်၊ ဧည့်မထဆန်တစ်ပြည်လျှင် (၂၉၅၀) ကျပ်၊ ကြက်သွန်နီတစ်ပိဿာလျှင် (၂၆၀၀) ကျပ်၊ ကြက်သွန်ဖြူ (ဗမာ) တစ်ပိဿာလျှင် (၁၀၀၀၀) ကျပ်၊ ကြူကုတ်တစ်ပိဿာလျှင် (၈၀၀၀) ကျပ်၊ ချင်းတက်တစ်ပိဿာလျှင် (၁၁၀၀၀) ကျပ်၊ ငရုတ်ခြောက် (အရှည်) တစ်ပိဿာလျှင် (၂၀၀၀၀) ကျပ်၊ ငရုတ်ခြောက် (အပု) တစ်ပိဿာလျှင် (၂၂၀၀၀) ကျပ်၊ အာလူး တစ်ပိဿာလျှင် (၃၅၀၀) ကျပ်၊ မန်ကျည်းသီးမှည့်အစေ့မပါ တစ်ပိဿာလျှင် (၄၀၀၀) ကျပ်၊ ကြက်ဥလက်လီဈေးနှုန်းများမှာ (ကြီး) တစ်လုံးလျှင် (၂၈၀) ကျပ်၊ (အသေး) တစ်လုံးလျှင် (၂၆၀) ကျပ်၊ ဘဲဥ (ကြီး) တစ်လုံးလျှင် (၃၈၀) ကျပ်၊ (အသေး) တစ်လုံးလျှင် (၃၅၀) ကျပ်စသည်ဖြင့် အသီးသီးရှိကြပါသည်။

    လက်ပံတန်းမြို့အတွင်း ရောင်းချလျက်ရှိသောအသား/ငါးဈေးနှုန်းများမှာ မွေးမြူကြက် CP ကြက်သားတစ်ပိဿာလျှင် (၁၀၀၀၀) ကျပ်မှ (၁၂၀၀၀) ကျပ်အထိ၊ ဆိတ်သားတစ်ပိဿာလျှင် (၂၃၀၀၀) ကျပ်မှ (၂၅၀၀၀) ကျပ်ထိ၊ ဝက်သားတစ်ပိဿာလျှင် (၁၅၀၀၀) ကျပ်မှ (၁၆၀၀၀) ကျပ်အထိ၊ အမဲသားတစ်ပိဿာလျှင် (၁၃၀၀၀) ကျပ်မှ (၁၅၀၀၀) ကျပ်အထိ၊ ငါးကြင်းတစ်ပိဿာလျှင် (၉၀၀၀) ကျပ်မှ (၁၂၀၀၀) ကျပ်အထိ၊ ငါးမြစ်ချင်းတစ်ပိဿာလျှင် (၇၀၀၀) ကျပ်မှ (၉၀၀၀) ကျပ်အထိတို့ဖြင့် အသီးသီးရောင်းဝယ်နေကြကြောင်းသိရှိရပါသည်။

    စားသုံးဆီဈေးနှုန်းများမှာ ဇူလိုင်လ (တတိယအပတ်) တွင် ပဲဆီတစ်ပိဿာလျှင် (၁၄၀၀၀) ကျပ်မှ (၁၆၀၀၀) ကျပ်၊ နှမ်းဆီတစ်ပိဿာလျှင် (၁၅၀၀၀) ကျပ်မှ (၁၆၀၀၀) ကျပ်အထိ၊ စားအုန်းဆီတစ်ပိဿာလျှင် (၇၃၀၀) ကျပ်မှ (၇၄၀၀) ကျပ်အထိတို့ဖြင့် အရောင်းအဝယ်ဖြစ်နေကြကြောင်းသိရှိရပါသည်။

DOCA(ပဲခူး)

      ယခုအချိန်ရာသီကာလသည် ကြက်မောက်သီးများ လှိုင်လှိုင်ပေါ်ချိန်ဖြစ်ရာ ပဲခူးဈေးကွက်အတွင်းသို့  ကြက်မောက်သီးများ စတင်ဝင်ရောက်လျက်ရှိနေပြီဖြစ်ကြောင်း သိရပါသည်။ အဆိုပါ ကြက်မောက်သီးများအား မွန်ပြည်နယ်အတွင်းရှိ ကျိုက်ထို ၊ ဘီးလင်း ၊ သထုံ ၊ မော်လမြိုင်မြို့များမှ အများဆုံးဝင်ရောက်လျက်ရှိကြောင်း သိရပါသည်။

    ကြက်မောက်သီးခြံများမှ တိုက်ရိုက်ဝယ်ယူသည့် ပဲခူးမြို့ဈေးကြီးမှ ကုန်သည်ကြီးများအနေဖြင့် အလုံး(၁၀၀)လျှင် ၁၃၀၀၀-၁၆၀၀၀ ကျပ်နှုန်းရှိကြောင်း သိရှိရပြီး လက်လီဈေးကွက်တွင် ကြက်မောက်သီးသည် လူကြိုက်များသည့် သီးနှံဖြစ်သောကြောင့် အလုံး(၁၀၀)လျှင် ၁၅၀၀၀-၂၀၀၀၀ ကျပ်နှုန်းဖြင့် ရောင်းချလျက်ရှိကြောင်း ၊ တစ်နေ့လျှင် အရေအတွက်အားဖြင့်  အလုံး(၅၀၀) မှ (၈၀၀)ကျော်အထိ ရောင်းချရကြောင်း သိရပါသည်။

DOCA(ပဲခူး)

       ပဲခူးမြို့၊ တောင်သူစုကျေးရွာတွင် တောင်ကြီးပဲပွကြော်၊ စားတော်ပဲကြော်၊ ပဲလွန်းကြော်၊ နှစ်ပြန်ကြော်လုပ်ငန်းများဖြင့် အကြော်စုံလုပ်ငန်းအား  လုပ်ကိုင်ဆောင်ရွက်လျက်ရှိပါသည်။

    အကြော်စုံလုပ်ငန်းမှ တောင်ကြီးပဲပွဲကြော်ကို တစ်မျိုးအားဖြင့် တရုတ်ပဲကြီးကြော်(သို့) ဒိုကြီးကြော်ဟုခေါ်ကြောင်း သိရှိရပါသည်။ တောင်ကြီးပဲနှင့် ပဲလွန်းများကို မန္တလေးတိုင်းဒေသကြီးမှ ပိဿာချိန် (၅၀) လျှင် (၃)သိန်းကျပ်ခန့်ဖြင့်  ဝယ်ယူရကြောင်း သိရပါသည်။

     ဝယ်ယူရရှိသော ပဲများကို သန့်စင်ပြီး စဉ့်အိုးများဖြင့် (၂၄)နာရီကြာရေစိမ်၍ ကြော်လှော်ခြင်း လုပ်ငန်းများကို အလျား(၄)ပေ၊ အနံ(၃)ပေရှိ ဆီဘွိုင်လာအိုးဖြင့်ကြော်ပြီး ပဲများကို အရသာ ရောယှက်ကာ Mixer ဖြင့် ရောသမမွှေ၍ လေလုံခံသည့် ပလတ်စတစ်အိတ်များဖြင့် ထည့်၍ ပီနံအိတ်များဖြင့် ထုပ်ပိုးသည်ဟု သိရှိရပါသည်။

     တောင်ကြီးပဲပွကြော်နှင့် စားတော်ပဲကြော်များကို ရန်ကုန်မြို့ရှိ ကျားကမ္ဘာပွဲရုံ၊ ဘုရင်နောင်ပွဲရုံ၊ ကျောက်ဆူးပွဲရုံများသို့ (၁)ပိဿာလျှင် (၆၀၀၀)ကျပ်နှုန်းဖြင့် တင်ပို့ရောင်းချပြီး ပဲခူးမြို့တွင်းနှင့် အနီးရှိမြို့ရွာများသို့ တောင်ကြီးပဲပွကြော်(၁)ပိဿာလျှင် (၈၀၀၀)ကျပ်၊ စားတော်ပဲကြော်(၁)ပိဿာလျှင် (၅၅၀၀) ကျပ်၊ ပဲလွန်းကြော်(၁)ပိဿာလျှင် (၅၀၀၀)ကျပ်နှင့် နှစ်ပြန်ကြော် (၁)ပိဿာလျှင်(၉၀၀၀) ကျပ်ဖြင့် ရောင်းချကြောင်း သိရှိရပါသည်။

    ပဲခူးမြို့နယ် ၊တောင်သူစုကျေးရွာရှိ အကြော်စုံလုပ်ငန်းများသည် လွန်ခဲ့သော (၁၅)နှစ်ခန့်က စတင်လုပ်ကိုင်ခဲ့သော လုပ်ငန်းဖြစ်ကာ လုပ်သားအင်အား(၇)ဦးဖြင့် တစ်ပိုင်တစ်နိုင်မိသားစု အိမ်တွင်းမှု စီးပွားရေး လုပ်ငန်းအဖြစ် အကျိုးအမြတ်ရရှိနေကြောင်း သိရှိရသည်။   

DOCA(ပဲခူး)

   ပဲခူးခရိုင် ၊ ပဲခူးမြို့နယ်အတွင်းရှိ ‌တောင်သူလယ်သမားများအနေဖြင့် မိုးစပါးအပြင် အခြားသီးနှံများ စိုက်ပျိုးလျက်ရှိရာ ပဲခူးမြို့နယ် ၊ မုန်တိုင်းကျေးရွာတွင် ခရမ်းစိုက်တောင်သူများ အောင်မြင်ဖြစ်ထွန်းပြီး နေ့စဉ် ဆွတ်ခူး‌ရောင်းချနေရသဖြင့် အပိုဝင်ငွေရရှိကာ မိသားစုစားဝတ်နေရေး အဆင်ပြေလျက်ရှိကြောင်း သိရှိရပါသည်။

    အဆိုပါ  ခရမ်းသီးနှံကို  တစ်ဧကလျှင် မျိုးစေ့ (၃၀၀) ဂရမ်နှုန်းဖြင့် ပျိုးနိုင်ခြင်း၊ တစ်ပင်နှင့် တစ်ပင်    ငါးပေခြား  စိုက်ပျိုး၍   ရေသွင်းရေထုတ်လွယ်ကူစေရန် မြေဘောင်များ  ပြုလုပ်ပေးရပါသည်။ အပင်ငယ်ချိန်တွင် မြေ ပေါင်းသင်ပေးကာ  တစ်လတစ်ကြိမ် အပင်ခြေများတွင်  မြေသြဇာ အနည်းငယ်မျှ ထည့်ရပြီး လိုအပ်ပါက  အပင်အားဖြည့်ဆေးနှင့် ပိုးသတ်ဆေး  ဖြန်းပေးရပါသည်။ စတင်စိုက်ပျိုးသည့် အချိန်မှစ၍ ခူးဆွတ်နိုင်သည့်ကာလမှာ အချိန် (၃)လ ခန့်ကြာမြင့်ပြီး  ဆွတ်ခူး ရောင်းချသည့်အခါ   ရက်ခြားခူး၍   ရောင်းရသကဲ့သို့  နေ့စဉ်ဆွတ်ခူး၍ လည်းရောင်းချရကြောင်း သိရှိရပါသည်။  ရင်းနှီးမြှုပ်နှံရသည့် (မျိုးစေ့၊ ပိုးသတ်ဆေး၊ အလုပ်သမား ငှားရမ်းခနှင့် ဓာတ်မြေသြဇာ) စသည့်ကုန်ကျစရိတ်များမှာ စုစုပေါင်း ကျပ် နှစ်သိန်း ဝန်းကျင်ခန့်ရှိပြီး ရောင်းစျေးအနေဖြင့်  ဖောက်သည်စျေး  ၁ပိဿာ ကျပ် ၁၈၀၀  မှ ၂၀၀၀ အထိ ရောင်းချ ရသည့်အတွက် နေ့စဉ် အပိုဝင်ငွေရရှိကာ မိသားစု စားဝတ်နေရေး အဆင်ပြေလျက်ရှိကြောင်း သိရပါသည်။

DOCA(ပဲခူး)