ပြည်တွင်းကုန်သွယ်မှုသတင်း

     ငါးရံ့ငါးဆိုလျှင် ငါးခြောက်ပြုလုပ်ပါက အရမ်းချိုပြီး စားကောင်းသည့်ငါး ဖြစ်သည့်အပြင် မြစ်ချောင်း၊ အင်းအိုင်များပေါများသော ပဲခူးတိုင်းဒေသကြီးတွင် ငါးရံ့ခြောက်ကို ဒေသထွက်ကုန်တစ်ခုအနေဖြင့် ထုတ်လုပ်ရောင်းချလျက်ရှိပါသည်။ ငါးရံ့မျိုးစိတ်ပေါင်းများစွာရှိသည့်အနက် မြန်မာနိုင်ငံတွင် ငါးရံ့ (၅) မျိုးရှိပြီး ရေချိုတွင်သာနေထိုင်ကြကာ ရေချို၌သာ သားပေါက်လေ့ရှိပါသည်။

      ငါးရံ့ကို ငါးရံ့အူဆီပြန်၊ ငါးရံ့ခေါင်းချည်ရည်ဟင်း၊ ငါးရံ့ဒန့်သလွန်ဟင်း၊ ငါးရံ့ပင်စိမ်း၊ ငါးရံ့ဆန်လှော်ဟင်း စသည်ဖြင့် အမျိုးမျိုး ချက်ပြုတ်စားသောက်ကြပါသည်။ ငါးရံ့ငါးသည် ချိုလှသဖြင့် မုန့်ဟင်းခါးပြုလုပ်ရာ၌လည်း အသုံးပြုကြသောကြောင့် ဈေးကွက်တွင် လူကြိုက်များသော ငါးဖြစ်ပါသည်။ ငါးရံ့ငါးသည် မွေးမြူရာတွင်  ရောဂါမရှိဘဲ အကြမ်းခံနိုင်ခြင်း၊ အစာချေးမများခြင်း၊ အသေအပျောက်နည်းခြင်း၊ ကျွေးသလောက်စား၊ စားသလောက်အရွယ်အစားကြီးထွားနိုင်ခြင်းတို့အပြင် ငါးစိုရော ငါးခြောက်ပါ ဝယ်လိုအားကောင်းမွန်ခြင်းကြောင့် စီးပွားရေးတွင်လည်း အရေးပါသောငါးတစ်မျိုး ဖြစ်ခြင်းကြောင့် တိုးချဲ့မွေးမြူသင့်သော ငါးတစ်မျိုးဖြစ်သည်။

      ငါးခြောက်ပြုလုပ်ရာတွင် ငါးရံ့အစိုတစ်ပိဿာကို ၁၈၀၀၀ ကျပ် ဈေးမှ ၂၀၀၀၀ ကျပ်ဈေးအထိ အကောင်၊ အကြီး၊ အသေးပေါ် မူတည်၍ ဝယ်ယူရပြီး အဆိုပါ ငါးအစိုကို ခွဲခြမ်းပြီး နေလှမ်းရာတွင် ငါးခြောက်အဖြစ် ၂၅ ကျပ်သားမှ ၃၀ ကျပ်သားအထိ ထွက်ရှိပါသည်။ ငါးရံ့ခြောက်ထုပ် လုပ်သူများအနေဖြင့် ငါးရံ့အစိုတစ်ပိဿာကို အခြောက်ပြုလုပ်ရာ၌ ခန့်မှန်းကုန်ကျငွေ ၅၅၀၀၀ ကျပ်ဖြစ်ပြီး ငါးရံ့ခြောက်တစ်ပိဿာ ၆၀၀၀၀ ကျပ်မှ ၆၅၀၀၀ ကျပ်ဈေးဖြင့် ရောင်းချရ၍ ငါးရံ့ခြောက်တစ်ပိဿာအပေါ် ၈၀၀၀ ကျပ်ခန့် အမြတ်အစွန်းရရှိသဖြင့် ထုတ်လုပ်သူများအနေဖြင့် တစ်ပိုင်တစ်နိုင် ထုတ်လုပ်ရောင်းချလျက်ရှိကြောင်း သိရှိရသည်။

DOCA(ပဲခူး)

     လူကြီး/လူငယ်မရွေး စားသင့်သော အသီး (သို့) အစေ့များထဲတွင် သစ်ကြားသီး (သို့) အစေ့လည်းပါဝင်ပါသည်။ သစ်ကြားသီးများကို ကချင်ပြည်နယ်ဘက်တွင် အများဆုံးစိုက်ပျိုးလေ့ရှိ ပါသည်။ သစ်ကြားစေ့လေးများကို သစ်ကြားသီးအခွံ့မာများမှ ခွာ၍စားရပါသည်။

     သစ်ကြားသီးများကို စားသုံးပေးခြင်းအားဖြင့် ဆီးချိုရောဂါ၊ ကင်ဆာရောဂါနှင့် နှလုံး သွေးကြောရောဂါများဖြစ်နိုင်ချေကိုလျှော့ချပေးနိုင်ပြီး ရင်ကျပ်ပန်းနာ၊ အဆုပ်ပွရောဂါတို့ကဲ့သို့သော အသက်ရှူလမ်းကြောင်းဆိုင်ရာ ပြဿနာများကိုလည်းလျှော့ချပေးနိုင်ကြောင်း သိရှိရပါသည်။

     သစ်ကြားသီးလက်တစ်ဆုပ်စာပမာဏကိုစားပေးခြင်းဖြင့် ကိုယ်အလေးချိန်လျော့ကျစေခြင်း၊ အရိုးကျန်းမာရေးကောင်းမွန်စေခြင်း၊ မှတ်ဉာဏ်များကိုကောင်းမွန်စေခြင်း၊ ဝမ်းမှန်ခြင်းနှင့် ဖွံ့ဖြိုးကြီးထွားမှုအတွက်အထူးကောင်းမွန်ခြင်း စသည့်ကောင်းကျိုးများကိုရရှိမည်ဖြစ်ကြောင်း သိရှိရပါသည်။

  သစ်ကြားသီးလေးများ၏အရသာမှာ ဆိမ့်၍အရသာလေးလေးပင်ပင်ရှိသောကြောင့် လူအများနှစ်သက်သည်ဖြစ်ပြီး ဈေးကွက်၌ ဈေးကောင်းရသောအသီးထဲတွင်ပါဝင်ပါသည်။ သစ်ကြားသီးအလုံး၁၀၀လျှင် ၉၅၀၀ကျပ်မှ ၁၁၀၀၀ကျပ်အထိဈေးရရှိကြောင်းနှင့် အရောင်းသွက်နေကြောင်း သစ်ကြားသီးရောင်းချသူများထံမှသိရှိရပါသည်။

DOCA(ပဲခူး)

     တောင်ငူမြို့၊ ညောင်ပင်ဈေးရှိ သားငါးဆိုင်များတွင် ၂၀၂၃ခုနှစ်၊ ဇူလိုင်လ (စတုတ္တအပတ်) ၌ ကြက်သား (အိမ်မွေးကြက်) အကောင်လိုက်ဈေးတစ်ပိဿာလျှင် ၁၆၀၀၀ကျပ်၊ အသားသီးသန့်တစ်ပိဿာလျှင် ၂၀၀၀၀ကျပ်၊ စီပီကြက်အခြမ်းလိုက်ဈေးတစ်ပိဿာလျှင် ၁၀၀၀၀ကျပ်၊ အသားသီးသန့်တစ်ပိဿာလျှင် ၁၂၀၀၀ကျပ်၊ ဝက်သား (ရေလွတ်သား) သုံးထပ်သားတစ်ပိဿာလျှင် ၁၅၀၀၀ကျပ်၊ ပေါင်သားတစ်ပိဿာလျှင် ၁၇၀၀၀ကျပ်၊ အသားသီးသန့်တစ်ပိဿာလျှင် ၁၉၀၀၀ကျပ်၊ အမဲသားတစ်ပိဿာလျှင် ၁၈၀၀၀ကျပ်တို့ဖြင့် ယခင်အပတ်၏ဈေးနှုန်းများအတိုင်း တည်ငြိမ်နေပါသည်။

     ငါးကြင်းမှာ ယခင်လကုန်ပိုင်းတွင် အကောင်လိုက်ဈေးတစ်ပိဿာလျှင် ၁၀၀၀၀ကျပ်၊ အသားသီးသန့်တစ်ပိဿာလျှင် ၁၂၀၀၀ကျပ်ရှိခဲ့ရာမှ ယခုအပတ်တွင် အကောင်လိုက်ဈေးတစ်ပိဿာလျှင် ၈၀၀၀ကျပ်၊ အသားသီးသန့်တစ်ပိဿာလျှင် ၁၀၀၀ကျပ်၊ ငါးကြင်းဖြူမှာ ယခင်လကုန်ပိုင်းတွင် အကောင်လိုက်ဈေးတစ်ပိဿာလျှင် ၁၈၀၀၀ကျပ်၊ အမြီးလွတ်၊ ခေါင်းလွတ်တစ်ပိဿာလျှင် ၂၀၀၀၀ကျပ်ရှိခဲ့ရာမှ ယခုအပတ်တွင်  အကောင်လိုက်ဈေးတစ်ပိဿာလျှင် ၁၂၀၀၀ကျပ်၊ အမြီးလွတ်၊ ခေါင်းလွတ်တစ်ပိဿာလျှင် ၁၅၀၀၀ကျပ်တို့ဖြင့် ဈေးနှုန်းကျဆင်းလာခဲ့ပါသည်။

      ငါးရံ့မှာ အကောင်သေးတစ်ပိဿာလျှင် ၁၄၀၀၀ကျပ်၊ အကောင်လတ်တစ်ပိဿာလျှင် ၁၆၀၀၀ကျပ်နှင့် အကောင်ကြီးတစ်ပိဿာလျှင် ၁၈၀၀၀ကျပ်ဖြင့် ဈေးနှုန်းတည်ငြိမ်နေပြီး ငါးခူမှာ ယခင်လကုန်ပိုင်းတွင် အကောင်သေးတစ်ပိဿာလျှင် ၁၈၀၀၀ကျပ်၊ အကောင်လတ် တစ်ပိဿာလျှင် ၂၀၀၀၀ကျပ်နှင့် အကောင်ကြီးတစ်ပိဿာလျှင် ၂၂၀၀၀ကျပ်တို့ရှိခဲ့ရာမှ ယခုအပတ်တွင်  အကောင်သေးတစ်ပိဿာလျှင် ၁၆၀၀၀ကျပ်၊ အကောင်လတ်တစ်ပိဿာလျှင် ၁၈၀၀၀ကျပ်နှင့် အကောင်ကြီးတစ်ပိဿာလျှင် ၂၀၀၀၀ကျပ်တို့ဖြင့် ဈေးနှုန်းအနည်းငယ်ကျဆင်းပါသည်။

     ပုစွန်ဆိတ်မှာ တစ်ပိဿာလျှင် အသေး ၈၀၀၀ကျပ်၊ အကြီး ၁၅၀၀ကျပ်ရှိပါသည်။ ယခင်လကုန်ပိုင်းတွင် ပုစွန်အသေးမှာ တစ်ပိဿာလျှင် ၂၄၀၀၀ကျပ်၊ အလတ်တစ်ပိဿာလျှင် ၂၆၀၀၀ကျပ်နှင့် အကြီးတစ်ပိဿာလျှင် ၃၂၀၀၀ကျပ်တို့ရှိခဲ့ရာမှ ယခုအပတ်တွင် ပုစွန်အသေးမှာ တစ်ပိဿာလျှင် ၂၂၀၀၀ကျပ်၊ အလတ်တစ်ပိဿာလျှင် ၂၄၀၀၀ကျပ်နှင့် အကြီးတစ်ပိဿာလျှင် ၂၆၀၀၀ကျပ်တို့ဖြင့် ဈေးနှုန်းကျဆင်းလာကြောင်း သိရပါသည်။

 DOCA(ပဲခူး)

      တောင်ငူခရိုင်၊ ဖြူးမြို့တွင် ၂၀၂၃ခုနှစ်၊ ဇူလိုင်လ (စတုတ္ထအပတ်) တွင် ရွှေဘိုပေါ်ဆန်းတစ်အိတ်လျှင် ၁၁၅၀၀၀ကျပ်၊ ဧည့်မထ (မိုး) ဆန်တစ်အိတ်လျှင် ၇၀၀၀၀ကျပ်၊ မြေပဲဆီတစ်ပိဿာလျှင် ၁၅၀၀၀ကျပ်တို့ဖြင့်ဈေးနှုန်းတည်ငြိမ်နေပြီး စားအုန်းဆီမှာ ယခင်အပတ်တွင် တစ်ပိဿာလျှင် ၈၀၀၀ကျပ်မှ ယခုအပတ်တွင် တစ်ပိဿာလျှင် ၇၀၀၀ကျပ်ဖြင့် ဈေးနှုန်းအနည်းငယ်ကျဆင်းလာခဲ့ပါသည်။

     ကြက်သွန်နီတစ်ပိဿာလျှင် ယခင်အပတ်တွင် အသေး၊ အလတ်ရော ၂၂၀၀ကျပ်၊ အကြီး ၂၃၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် အသေး ၂၄၀၀ကျပ်၊ အလတ် ၂၅၀၀ကျပ်နှင့် အကြီး ၂၆၀၀ကျပ်တို့ဖြင့်  ဈေးနှုန်းအနည်းငယ်တက်လာခဲ့ပြီး ကြက်သွန်ဖြူမှာ တစ်ပိဿာလျှင် အသေး ၇၀၀၀ကျပ်၊ အလတ် ၈၀၀၀ကျပ်၊ အကြီး ၉၀၀၀ကျပ်တို့ဖြင့် ဈေးနှုန်းတည်ငြိမ်နေပါသည်။

    ငရုတ်ခြောက်အရှည်မှာ ယခင်အပတ်တွင် တစ်ပိဿာလျှင် ၁၇၀၀၀ကျပ်မှ ၁၇၅၀၀ကျပ်ရှိပြီး ယခုအပတ်တွင် တစ်ပိဿာလျှင် ၁၇၅၀၀ကျပ်မှ ၁၈၀၀၀ကျပ်အထိဖြင့် ဈေးနှုန်းအနည်းငယ်တက်လာခဲ့ပြီး အာလူးမှာ ယခင်အပတ်တွင် တစ်ပိဿာလျှင် အသေး ၂၈၀၀ကျပ်၊ အလတ် ၃၀၀၀ကျပ်နှင့် အကြီး ၃၂၀၀ကျပ်ရှိတို့ခဲ့ရာမှ ယခုအပတ်တွင် တစ်ပိဿာလျှင် အသေး ၂၅၀၀ကျပ်၊ အလတ် ၂၈၀၀ကျပ်နှင့် အကြီး ၃၀၀၀ကျပ်အထိတို့ဖြင့် ဈေးနှုန်းအနည်းငယ်ကျဆင်းလာခဲ့ပါသည်။

     ကုလားပဲခြမ်းမှာ တစ်ပိဿာလျှင် ၆၃၀၀ကျပ်၊ ကုလားပဲလုံးမှာ တစ်ပိဿာလျှင် ၅၀၀၀ကျပ်၊ မြေပဲဆံ (အဖြူ) မှာ ၇၅၀၀ကျပ်၊ မြေပဲဆံ (အနီ) မှာ တစ်ပိဿာလျှင် ၉၂၀၀ကျပ်ဖြင့် ဈေးနှုန်းများတည်ငြိမ်နေကြောင်း သိရပါသည်။

DOCA(ပဲခူး)

တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။