ပြည်တွင်းကုန်သွယ်မှုသတင်း

     ရန်ကုန်တိုင်းဒေသကြီး၊ မင်္ဂလာတောင်ညွန့်မြို့နယ်၊ သိမ်ဖြူဈေးကြီးအတွင်းသို့ ကြက်သွန်ဖြူ/နီများအား ကား၊ ရထားတို့ဖြင့် ဘုရင့်နောင်ကုန်စည်ဒိုင်နှင့် ရှမ်းပြည်နယ်တို့မှ နေ့စဉ်ဝင်ရောက်လျက်ရှိပြီး လက်လီလက်ကားပြန်လည်ရောင်းချလျက်ရှိရာ (၂၉-၂-၂၀၂၄) ရက်နေ့မှ (၆-၃-၂၀၂၄) ရက်နေ့အထိ ကြက်သွန်နီ(ဆိပ်ဖြူ) ၃၀၈၀၀ပိဿာနှင့် ကြက်သွန်ဖြူ ၇၄၀၀ပိဿာဝင်ရောက်ခဲ့ပါသည်။ လက်ကားဈေးနှုန်းများအနေဖြင့် ကြက်သွန်နီ(ဆိပ်ဖြူ) ၁ပိဿာလျှင် အရွယ်အစားအလိုက် ၁၅၀၀ကျပ်မှ ၁၈၀၀ကျပ်ထိလည်းကောင်း၊ ကြက်သွန်ဖြူ (ကြူကုတ်) ၁ပိဿာလျှင် ၉၂၀၀ကျပ်မှ ၉၅၀၀ကျပ်ထိဖြစ်ပေါ်လျက်ရှိပြီး ကြက်သွန်ဖြူ (အောင်ပန်း) ၁ပိဿာလျှပ် ၁၁၀၀၀ကျပ်မှ ၁၃၅၀၀ကျပ်ထိဖြစ်ပြီး ကြက်သွန်ဖြူ/နီဈေးနှုန်းများကျဆင်းလျက်ရှိကြောင်း သိမ်ဖြူဈေးတာဝန်ခံရုံးမှတစ်ဆင့် စုံစမ်းသိရှိရပါသည်။

DOCA(ရန်ကုန်)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဝန်ကြီးရုံး၏ ရည်ညွှန်းပါစာလမ်းညွှန်ချက်အရ ဆန်စပါးဆိုင်ရာ အပတ်စဉ်လေ့လာသုံးသပ်ချက်(အကျဉ်းချုပ်) ၁၁/၂၀၂၄ အား သိရှိလမ်းညွှန်မှုပြုနိုင်ပါရန် တင်ပြအပ်ပါသည်။

       ၁၂.၃.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

      ကျွန်တော်တို့မြန်မာနိုင်ငံတွင် နွေး၊မိုး၊ဆောင်းဟူ၍ ဥတုသုံးပါးရှိပြီး ယခုအခါ ဆောင်းအကုန် နွေဦးပေါက်ချိန် ဖေဖော်ဝါရီနှင့်မတ်လများတွင် လက်ပံပွင့်များ ဖြိုင်ဖြိုင်ပွင့်ကြပါသည်။ လက်ပံပွင့် ချိန်နှင့်ပေါက်ပန်းတို့ပွင့်သောရာသီဖြစ်သောကြောင့် အညာဒေသတွင် ပန်းချီကားတစ်ချပ်ရေးဆွဲထားသကဲ့သို့ နီနီဆွေးဆွေးလက်ပန်ပွင့်နှင့်ပေါက်ပွင့်များကိုတွေ့ရှိနိုင်ပါသည်။ အညာဒေသ အမှတ်အသားဖြစ်သည့် လက်ပံပွင်လျှင်နွေရောက်ပြီဟုသိရှိရပါသည်။ထိုအချိန်အခါမျိုးတွင် ဆက်ရက်ငှက် များအပါအဝင် ကျေးငှက်အပေါင်းတို့သည် အအုပ်အသင်းဖွဲ့ကာ ပန်းဝတ်ရည်၊ဝတ်ဆံတို့ကိုလည်းကောင်း၊ ပန်းပွင့်အတွင်းရှိပိုးမွှားများကိုလည်းကောင်း၊ ဆူဆူညံညံအလုအယက်စားသောက်လေ့ရှိရာ လက်ပံပင်ဆက်ရက်ကျသလိုဟု ဆိုလေ့ဆိုထရှိကြပါသည် ။ ယခုအခါ လက်ပံပွင့်တို့ကြွေနေပြီဖြစ် သောကြောင့်လက်ပံပွင့်များကောက်ယူ၍ နေလှမ်းကာ မြေအိုးများတွင် ထည့်သွင်းသိမ်းဆည်းပြီး စားသုံးကြပါသည်။လက်ပံပွင့်ချိန်ရောက်ရှိနေသောကြောင့် လက်ပံပွင့်နှင့်ဗူးသီးရော၍ လက်ပံပွင့် အချဉ်ရည်ဟင်းများ ချက်ပြုတ်စားသောက်လေ့ရှိကြပါသည်။ လက်ပံပွင့်ကို ခရမ်းချဉ်သီး  ၊ကြက်သွန်နီ၊ ငရုတ်သီးစိမ်းလေးများဖြင့် အစပ်ချက်၊ဆီပြန်ချက်အဖြစ်လည်း စားသုံးကြပါသည် ။ လက်ပံပွင့်တွင် ပရိုတင်းဓါတ်၊ရေဓါတ်၊အမျှင်ဓါတ်နှင့် ဗီတာမင်အေနှင့် စီဓါတ်တို့ပါဝင်သောကြောင့် လက်ပံပွင့်ကို ချက်ပြုတ်စားသုံးပေးပါက လိပ်ခေါင်းရောဂါ ၊ ဝမ်းပျက်ဝမ်းလျော ရောဂါများသက်သာစေပြီး အပူလောင်နာ၊ အဖုအကျိတ်များကိုလည်း ပျောက်ကင်းသက်သာစေပါကြောင်း ၊ တစ်နှစ်တစ်ခါပေါ်သော ဆေးဘက်ဝင်လက်ပံပွင့်အခြောက်များကို မိမိတို့စားသုံးချင်သလို ချက်ပြုတ်စားသုံးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

    မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကိုအခြေခံ၍ နွေ၊မိုး၊ဆောင်း ဥတုသုံးပါးနှင့်အညီ ရာသီအလိုက်သီးနှံမျိုးစုံ စိုက်ပျိုးသည့်ဒေသဖြစ်သည့်အလျှောက် တောင်သူများအနေဖြင့် ငရုတ်သီးနှံကိုလည်း အားထားစိုက်ပျိုးလာသည်ကို တွေ့ရှိရပါသည်။၂၀၂၃-၂၀၂၄ ဘဏ္ဍာနှစ်တွင် ကျောက်ဆည်မြို့နယ်တွင်(၂၁၀၈)ဧက ၊ စဉ့်ကိုင်မြို့နယ်တွင် (၇၁၃)ဧက ၊ မြစ်သား မြို့နယ်တွင် (၂၉၈၉)ဧက၊ စုစုပေါင်း(၅၈၁၀)ဧကစိုက်ပျိုးပြီးစီးကြောင်း လယ်ယာမြေစီမံခန့်ခွဲရေး နှင့်စာရင်းအင်း ဦးစီးဌာန၏စာရင်းများအရ သိရှိရပါသည်။ ငရုတ်မျိုးများအနေဖြင့် သာမို ၊ ဒီမွန် ၊ အက်စတာ ၊ ၆၉၂ ၊ ကျားခေါင်းနှင့် တိုးတိုးအောင် ငရုတ်မျိုးများကိုစိုက်ပျိုးကြပြီး ၄င်းမျိုးများအနက် တိုးတိုးအောင်ငရုတ် မျိုးများအား နိုဝင်ဘာလနှင့် ဒီဇင်ဘာလများတွင် စိုက်ပျိုးကြပြီး ယခုအချိန်တွင် အသီးအပွင့်များ ဝေဝေဆာဆာဖြင့် အပင်များ အောင်မြင်ဖြစ်ထွန်းလျက်ရှိပါသည်။ စိုက်ပျိုးရာတွင်(၁)ဧကလျှင် မျိုးစေ့ (၁၀)ထုတ်စိုက်ပျိုးရကြောင်း ၊ မျိုးစေ့တစ်ထုတ်လျှင်(၃၅၀၀၀/-)ကျပ်စျေးနှုန်းရှိကြောင်း ၊ (၁)ဧက ကုန်ကျစရိတ်အနေဖြင့် မြေပြင်စရိတ်၊ သွင်းအားစု၊ လုပ်သားခ၊စုစုပေါင်း (၈၀)သိန်းခန့်ကုန်ကျကြောင်း ၊ ယခင်နှစ်တွင် တိုးတိုးအောင်ငရုတ် အထွက်နှုန်းအနေဖြင့် (၁)ဧကလျှင် ပိဿာ(၈၀၀၀-၁၀၀၀၀)အထိထွက်ရှိပြီး  ငရုတ်စျေးနှုန်းအနေဖြင့် ငရုတ်အစို(အစိမ်း) (၁)ပိဿာလျှင်(၈၅၀၀/-)ကျပ်၊ ငရုတ်အစို (အမှည့်)(၁) ပိဿာလျှင်(၆၀၀၀/-)ကျပ်စျေးနှုန်းများရှိခဲ့ပြီး ယခုအချိန်တွင် တိုးတိုးအောင် ငရုတ်များ ထွက်ပေါ်သေးခြင်းမရှိသေးဘဲ ငရုတ်သီးပေါ်ချိန်တွင် အထွက်နှုန်းနှင့် စျေးနှုန်းများ ကောင်းမွန်ပါကအကျိုးအမြတ်များ ရရှိနိုင်မည်ဖြစ်ကြောင်း တိုးတိုးအောင်ငရုတ် စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)