HighLight News

           ၁၈.၃.၂၀၂၅ ရက်နေ့ နံနက်(၁၀:၂၀) နာရီအချိန်တွင် မြောက်ပိုင်းခရိုင်ဦးစီးမှူးရုံးမှ  ဒုခရိုင်ဦးစီးမှူး ဦးမျိုးအေးပါ(၃)ဦး၊ အထူးစုံစမ်းစစ်ဆေးရေးဦးစီးဌာနမှ (၁)ဦးနှင့် ဆီလုပ်ငန်းရှင်များ အသင်းမှ (၃)ဦး တို့ပူးပေါင်းပါဝင်လျက် မင်္ဂလာဒုံမြို့နယ်ရှိ စားအုန်းဆီလက်လီဆိုင်များသို့ ကွင်းဆင်းစစ်ဆေးခြင်း လုပ်ငန်းများ ဆောင်ရွက်ခဲ့ပါသည်။

           ထိုသို့ဆောင်ရွက်ခဲ့ရာတွင် လက်လီအရောင်းဆိုင်များဖြစ်သော မင်္ဂလာဒုံဈေးမှ ဆီကိုယ်စား လှယ်(၆)ဦးအား ကွင်းဆင်းစစ်ဆေးခဲ့ရာ မိမိတို့ရရှိသော ခွဲတမ်းများအား စာအုပ်စနစ်ဖြင့် ရပ်ကွက်အလိုက် အိမ်ထောင်စုတစ်စုလျှင် (၅၀)ကျပ်သားနှုန်းဖြင့် (၁)လလျှင် (၄)ကြိမ် (၂)ပိဿာနှုန်းဖြင့် ဖြန့်ဖြူးရောင်းချပေးပါကြောင်း၊ သတ်မှတ်ဈေးနှုန်းများအတိုင်း ရောင်းချပေးပြီး တစ်နေ့စာ တစ်နေ့ ကုန်အောင်ရောင်းပေးပါကြောင်း၊ လက်ကျန်လည်း မထားရှိပါကြောင်း၊ ရက်ကျော်လွန်လျှင်လည်း ပြန်လည်ရောင်းချပေးပါကြောင်း မိမိတို့ဌာနမှလည်း သိုလှောင်ထားခြင်းရှိပါက အရေးယူဆောင်ရွက် သွားမည်ဖြစ်ကြောင်း အသိပညာပေးဆွေးနွေးခဲ့ပါကြောင်း သိရှိရပါသည်။

DOCA(ရန်ကုန်)

          ၁၉.၃.၂၀၂၅ ရက်နေ့တွင် မွန်ပြည်နယ်၊‌ စားသုံးသူရေးရာဦးစီးဌာန၊ သထုံခရိုင်ဦးစီးမှူးရုံးမှ ဦးစီးအရာရှိ ဦးအောင်ကျော်မင်း၊ မြို့နယ်တာဝန်ခံ ဦးထိန်လင်းထွန်းတို့သည် သထုံမြို့နယ်၊ ဘူတာလမ်းပေါ်ရှိ (မင်းကြီး) မုန့်မျိုးစုံလုပ်ငန်းသို့ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ဈေးကွက်စောင့်ကြည့်စစ်ဆေးခဲ့ကြောင်း သိရသည်။

         ထိုသို့ ဈေးကွက်စောင့်ကြည့်စစ်ဆေးခဲ့ရာ သထုံခရိုင်၊ သထုံမြို့၊ ဘူတာလမ်းပေါ်ရှိ (မင်းကြီး) မုန့်မျိုးစုံတို့တွင် ကုန်အညွှန်းအမှတ်အသားအတည်ပြုချက် ရယူထားပြီး မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) ပြဠာန်းချက်နှင့်အညီ ဈေးကွက်မရောက်မီ ကုန်အညွှန်းအမှတ်အသား ပြည့်စုံစွာပါသော မုန့်မျိုးစုံကိုသာ ရောင်းချနေကြောင်း သိရှိရပါသည်။

DOCA(မွန်)

          ၁၉.၃.၂၀၂၅ ရက်နေ့ နံနက် (၀၇:၀၀) နာရီအချိန်တွင် မော်လမြိုင်မြို့၊ ဘိုကုန်းရပ်ကွက်၊ သမိန်းဗရမ်း(ဘက်စုံသုံးကွင်း)၌ (၅၁) နှစ်မြောက် မွန်ပြည်နယ်နေ့ အထိမ်းအမှတ် သဝဏ်လွှာဖတ်ကြားခြင်း အခမ်းအနား ကျင်းပပြုလုပ်ခဲ့ကြောင်း သိရသည်။

         အခမ်းအနားသို့ နိုင်ငံတော်စီးမံအုပ်ချုပ်ရေးကောင်စီ အတွင်းရေးမှူး ဗိုလ်ချုပ်ကြီး အောင်လင်းဒွေး၊ နိုင်ငံတော်စီမံအုပ်ချုပ်ရေးကောင်စီအဖွဲ့ဝင်များ၊ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီး၊ ပြည်ထောင်စုဝန်ကြီး၊ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ကရင်ပြည်နယ် ဝန်ကြီးချုပ်၊ ပြည်နယ်အစိုးရအဖွဲ့ဝင်ဝန်ကြီးများ၊ ပြည်နယ်/ ခရိုင်/ မြို့နယ်အဆင့် ဌာနဆိုင်ရာများ စုစုပေါင်း (၁၀၀၀)ဦးခန့် တက်ရောက်ခဲ့ကြောင်း၊ အခမ်းအနားတွင် သဘာပတိအဖွဲ့ဝင်များက စင်မြင့်ပေါ်၌ နေရာယူခဲ့ကြပြီး တက်ရောက်လာကြသူများက ပြည်ထောင်စုသမ္မတမြန်မာနိုင်ငံတော်အလံအား အလေးပြုခြင်း၊ ကျဆုံးလေပြီးသော အာဇာနည်ခေါင်းဆောင်ကြီးများနှင့် ရဲဘော်အပေါင်းအား အလေးပြုခြင်းများ ဆောင်ရွက်ခဲ့ကြောင်း၊ ဆက်လက်၍ ပြည်ထောင်စုသမ္မတမြန်မာနိုင်ငံတော်၊ နိုင်ငံတော်စီမံ အုပ်ချုပ်ရေးကောင်စီ ဥက္ကဋ္ဌ၊ နိုင်ငံတော် ဝန်ကြီးချုပ် ဗိုလ်ချုပ်မှူးကြီး သတိုးမဟာသရေစည်သူ၊ သတိုးသီရိသုဓမ္မ မင်းအောင်လှိုင်ထံမှ ပေးပို့သည့် ၂၀၂၅ ခုနှစ်၊ (၅၁)နှစ်မြောက် မွန်ပြည်နယ်နေ့ အထိမ်းအမှတ် သဝဏ်လွှာအား နိုင်ငံတော်စီမံအုပ်ချုပ်ရေးကောင်စီ၊ အတွင်းရေးမှူး ဗိုလ်ချုပ်ကြီး အောင်လင်းဒွေးမှ ဖတ်ကြားခဲ့ကြောင်း၊ ယင်းနောက် မွန်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ်မှ (၅၁)နှစ်မြောက် မွန်ပြည်နယ်နေ့ နှုတ်ခွန်းဆက်အမှာစကား ပြောကြားခဲ့ပြီး သဘာပတိအဖွဲ့ဝင်များ ပြန်လည်ထွက်ခွာကာ သဝဏ်လွှာဖတ်ကြားခြင်းအခမ်းအနား ပြီးဆုံးခဲ့ကြောင်း သိရှိရပါသည်။

DOCA(မွန်)

          ၁၈.၃.၂၀၂၅ ရက်နေ့တွင် မွန်ပြည်နယ်၊ မော်လမြိုင်ခရိုင်၊ စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံ ဦးစိုးညီညီသည် မြို့နယ်‌အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ကျိုက်မရောမြို့ပေါ်ရှိ ကုန်စုံဆိုင်များတွင် ဖြန့်ဖြူးရောင်းချနေသော စားသုံးဆီအရောင်းဆိုင်များသို့ ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရပါသည်။

        အဆိုပါ ဈေးကွက်ကွင်းဆင်းစစ်ဆေး ဆောင်ရွက်ရာတွင် စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံမှ စားသုံးဆီများ ရောင်းချနေသော ကုန်စုံဆိုင်အရောင်းဆိုင်များ အား စားသုံးသူကာကွယ်ရေးဥပဒေ ၂၀၁၉၊ အခန်း(၁၈) ပါ ကုန်အညွှန်းအမှတ်အသား ပြည့်စုံစွာ ဖော်ပြထားခြင်း ရှိ/မရှိကို ဈေးကွက်စောင့်ကြည့်စစ်ဆေးပြီးနောက် ကုန်အညွှန်းအမှတ်အသား ပြည့်စုံမှုမရှိသော စားသုံးဆီများအား ဝယ်ယူရောင်းချခြင်းမပြုရန်နှင့် ကုန်စည်များအား ဈေးကွက်ကစားလိုသော ရည်ရွယ်ချက်ဖြင့် သိုလှောင်ခြင်း၊ ရောင်းချခြင်းများ မပြုလုပ်ကြရန် အသိပညာပေး ကွင်းဆင်းစစ်ဆေးခဲ့ပါသည်။

DOCA(မွန်)

           ၁၈.၃.၂၀၂၅ ရက်နေ့တွင် မွန်ပြည်နယ်၊‌ စားသုံးသူရေးရာဦးစီးဌာန၊ ကျိုက်ထိုခရိုင်တာဝန်ခံ ဦးအောင်ကျော်မင်း၊ ကျိုက်ထိုမြို့နယ်တာဝန်ခံ ဦးဇော်ဦးတို့သည် မိတ်ဖက်ဌာနဆိုင်ရာများနှင့် ပူးပေါင်း၍ ကျိုက်ထိုမြို့နယ်အတွင်းရှိ ယိုမျိုးစုံရောင်းချလျက်ရှိသောဆိုင်များအား ဈေးကွက်စောင့်ကြည့်စစ်ဆေးခဲ့ကြောင်း သိရသည်။

          ထိုသို့ ဈေးကွက်စောင့်ကြည့်စစ်ဆေးရာတွင် စားသုံးသူရေးရာဦးစီးဌာန၊ ကျိုက်ထိုခရိုင် တာဝန်ခံ ဦးအောင်ကျော်မင်းက ကျိုက်ထိုမြို့နယ်အတွင်းရှိ ယိုမျိုးစုံထုတ်လုပ်ရောင်းချသော လုပ်ငန်းရှင်များအား မိမိတို့ရောင်းချသော ကုန်စည်များတွင် ကုန်အညွှန်းအမှတ်အသားဖော်ပြချက်နှင့် ကိုက်ညီမှုရှိ/မရှိ၊ ယိုတစ်မျိုးချင်းစီအလိုက် ဘေးအန္တရာယ်ဖြစ်ပေါ်နိုင်မှုအခြေအနေ၊ ကုန်အညွှန်းအမှတ်အသားမပြည့်စုံမှု၊ ကြိုတင်သတိပေးချက်မရှိသော ယိုမျိုးစုံတို့အား ရောင်းချခြင်းမပြုရန် အသိပေးပြောကြားခဲ့ကြောင်း သိရှိရပါသည်။

DOCA(မွန်)