ပြည်တွင်းကုန်သွယ်မှုသတင်း

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်ဦးစီးမှူးရုံးမှ ဝန်ထမ်းများသည် (၁၁-၉-၂၀၂၃)ရက်နေ့၊ နံနက်(၀၈:၃၀)နာရီအချိန်တွင် သရက်မြို့၊ မြို့မစည်ပင်သာယာဈေးအတွင်း ပလတ်စတစ်လျှော့ချအသုံးပြုစေရေးနှင့် အင်ဖက်အစားထိုးအသုံးပြုစေရေးတို့အတွက် အသား၊ ငါး ရောင်းချနေသော ဈေးတန်းတစ်လျှောက်နှင့် အသီးအရွက်ကုန်စိမ်းရောင်းချသူများအား မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ သဘာဝပတ်ဝန်းကျင်ထိန်းသိမ်းရေးဦးစီးဌာနတို့နှင့်ပူးပေါင်း၍ အသိပညာပေးဆွေးနွေးခဲ့ကြပါသည်။

    ထို့နောက် သရက်မြို့၊ မြို့မစည်ပင်ဈေးအတွင်း (၁၁-၉-၂၀၂၃)ရက်နေ့တွင် ဖြစ်ပေါ်လျက်ရှိသော အခြေခံစားကုန်ဈေးနှုန်းများမှာ ပေါ်ဆန်းမွှေး(ပုသိမ်) ဆန်(၁)ပြည်လျှင် ကျပ်(၅၀၀၀-၆၀၀၀)၊ ဧရာပဒေသာ(ပုသိမ်)ဆန်(၁)ပြည်လျှင် ကျပ်(၄၆၀၀-၅၀၀၀)၊ မနောသုခဆန်(၁)ပြည်လျှင် ကျပ်(၃၅၀၀)၊ မှော်ဘီဆန်(၁)ပြည်လျှင် ကျပ်(၃၆၀၀-၃၇၀၀)၊ ပဲဆီ(၁)ပိဿာလျှင် ကျပ်(၁၄၀၀၀)၊ နှမ်းဆီ(၁)ပိဿာလျှင် ကျပ်(၁၄၀၀၀-၁၆၀၀၀)၊ အာလူး(၁)ပိဿာလျှင် ကျပ် (၂၇၀၀-၂၈၀၀)၊ ကြက်သွန်ဖြူ (၁)ပိဿာလျှင် ကျပ်(၈၈၀၀-၉၀၀၀)၊ ကြက်သွန်နီ (၁)ပိဿာလျှင် ကျပ်(၂၅၀၀-၃၃၀၀)၊ ကုလားပဲခွဲခြမ်း (၁)ပိဿာလျှင် ကျပ်(၆၀၀၀-၆၃၀၀)၊ ငရုတ်စို (၁)ပိဿာလျှင် ကျပ်(၅၅၀၀-၆၀၀၀)၊ ခရမ်းချဉ်သီး(၁)ပိဿာလျှင် ကျပ်(၂၈၀၀-၃၀၀၀)၊ ကြက်သား(CP) (၁)ပိဿာလျှင် ကျပ်(၁၆၀၀၀)၊ ကြက်သား(ဗမာ)(၁)ပိဿာလျှင် ကျပ်(၂၂၀၀၀)၊ ဝက်သား (၁)ပိဿာလျှင် ကျပ်(၁၃၀၀၀)၊ အမဲသား(၁)ပိဿာလျှင် ကျပ်(၁၃၀၀၀)၊ ဆိတ်သား (၁)ပိဿာလျှင် ကျပ်(၁၆၀၀၀)၊ ငါးမြစ်ချင်း (၁)ပိဿာလျှင် ကျပ်(၁၆၀၀၀)၊ ငါးကြင်း(၁)ပိဿာလျှင် ကျပ်(၁၆၀၀၀)အသီးသီးရှိခဲ့ပြီး စက်တင်ဘာလ၊ ပထမအပတ်နှင့် ဒုတိယအပတ်ဈေးနှုန်းတို့ကိုနှိုင်းယှဉ်လျှင် စားကုန်ဈေးနှုန်းများမှာ သိသိသာသာပြောင်းလဲခြင်းမရှိဘဲ တည်ငြိမ်လျက်ရှိသော်လည်း အာလူး(၁)ပိဿာလျှင် ယခင်အပတ်အောက် ယခုအပတ်တွင်  ကျပ်(၂၀၀-၃၀၀)ဈေးလျော့ကျခဲ့ပါသည်။

      အသီးအရွက်နှင့် အသား၊ ငါးတို့ကို အောင်လံမြို့မှတစ်ဆင့် ဝယ်ယူရောင်းချခြင်းဖြစ်ပြီး ဆန်နှင့်ဆီတို့မှာ ရန်ကုန်၊ ပြည်၊ ဥသျှစ်ပင်မြို့တို့မှ ဝင်ရောက်လျက်ရှိရာ နေ့စဉ် ပုံမှန်အရောင်းအဝယ်ဖြစ်လျက်ရှိပါကြောင်း မြို့မစည်ပင်သာယာဈေးအတွင်းရှိ ဈေးသည်များထံမှသိရှိရပါသည်။

DOCA(မကွေး)         

    မကွေးတိုင်းဒေသကြီးအစိုးရအဖွဲ့အနေနဖြင့် မကွေးတိုင်းဒေသကြီး၊ မြို့နယ်အသီးသီးရှိ စျေးဆိုင်များ၌ စားအုန်းဆီများ သတ်မှတ်စျေးနှုန်းထက် ပိုမိုရောင်းချမှုမရှိစေရေး ခရိုင်/မြို့နယ်စိစစ်ဖော်ထုတ်ကြပ်မတ်ရေးအဖွဲ့အား တာဝန်ပေးအပ်လာခြင်းကြောင့် (၉-၉-၂၀၂၃)ရက်နေ့၊ နံနက် (၀၈:၃၀) နာရီအချိန်တွင် မကွေးခရိုင်အထွေထွေအုပ်ချုပ်ရေးဦးစီးဌာန၊ ခရိုင်အုပ်ချုပ်ရေးမှူး ဦးမောင်ထူးခေါင်းဆောင်၍ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးမြင့်ဝင်းနှင့် မကွေးခရိုင်ဦးစီးမှူး၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်အုပ်ချုပ်ရေးမှူး၊ မြို့နယ်ရဲတပ်ဖွဲ့မှူး၊ မြို့နယ်စည်ပင်သာယာရေးအဖွဲ့တို့ပါဝင်သော ပူးပေါင်းအဖွဲ့များဖြင့် မကွေးမြို့ရှိ စားသုံးဆီလက်လီ/ လက်ကားဖြန့်ဖြူးရောင်းချသော ရန်ပယ်ရပ်ရှိ ဦးသန်းဇော် (သန်းတစ်ရာ) စားသုံးဆီဆိုင်၊ ရန်ဝေးရပ်ရှိ ဒေါ်စန်းနွဲ့ (စပါယ်ဦး)စားသုံးဆီဆိုင်၊ ရန်ကင်းရပ်ရှိ ဒေါ်အေးအေးသင်း (ပါရမီ) စားသုံးဆီအရောင်းဆိုင်များ၌ လက်လီရောင်းချသည့်စျေးနှုန်း၊ လက်ကားဖြန့်ဖြူးသည့်စျေးနှုန်းများနှင့်ပတ်သက်၍ သတ်မှတ်စျေးနှုန်းထက် ပိုမိုရောင်းချမှုရှိ/မရှိ ကွင်းဆင်းစစ်ဆေးခဲ့ကြောင်းသိရှိရပါသည်။

 မကွေးတိုင်းဆီကုန်သည်နှင့်ဆီလုပ်ငန်းရှင်များအသင်းအနေဖြင့် ရရှိသောဆီခွဲတမ်းများအရ မကွေးမြို့နယ်အတွင်း စားအုန်းဆီတစ်ပိဿာလျှင် ကျပ်(၄၅၀၀)နှုန်းဖြင့် ရောင်းချနေသည့် မကွေးမြို့၊ ဆုံရပ်ကွက်၊ ဓမ္မာရုံ၌ အိမ်ထောင်စု (၅၅၀)စုအတွက် စားအုန်းဆီ(၅၅၀)ပိဿာ၊ မင်းကံကြီးရပ်ကွက်၊ ရပ်ကွက်၊ အုပ်ချုပ်ရေးမှူးရုံးရှေ့ အိမ်ထောင်စု (၁၁၀၀)စုအတွက် စားအုန်းဆီ (၁၁၀၀)ပိဿာနှင့် အောင်မင်္ဂလာရပ်ကွက်၊ ရပ်ကွက်အုပ်ချုပ်ရေးမှူးရုံးရှေ့၌ အိမ်ထောင်စု(၅၅၀)စုအတွက် စားအုန်းဆီ (၅၅၀)ပိဿာ၊ စုစုပေါင်း အိမ်ထောင်စု (၂၂၀၀)စုအတွက် စားအုန်းဆီ (၂၂၀၀)ပိဿာရောင်းချပေးနေရာ၌ အလေးချိန်ပြည့်ဝမှန်ကန်မှုရှိစေရေး၊ ရောင်းချရာတွင်စနစ်တကျရှိစေရေးတို့အတွက် ကွင်းဆင်းကြီးကြပ်ဆောင်ရွက်ခဲ့ကြောင်းသိရှိရပါသည်။

DOCA(မကွေး)

  (၁၂-၉-၂၀၂၃) ရက်နေ့တွင် စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည် အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ မြန်မာနိုင်ငံဆီကုန်သည်နှင့် ဆီလုပ်ငန်းရှင်အသင်းက မွန်ပြည်နယ်အတွင်း ခွဲဝေရရှိသောစားအုန်းဆီများအနက် မုဒုံမြို့နယ်အတွက် ခွဲဝေရရှိသော စားအုန်းဆီများကို ပြည်သူများအား သက်သာသောဈေးနှုန်းဖြင့် ရောင်းချရာတွင် ဈေးနှုန်းမြှင့်တင်ရောင်းချခြင်းမရှိစေရေး ပူးပေါင်းကြပ်မတ်ဆောင်ရွက်ခဲ့ပါသည်။

    မုဒုံမြို့နယ်အတွက် ခွဲဝေရရှိသောစားအုန်းဆီပိဿာ (၁၁၀၀) အနက် (၁၂-၉-၂၀၂၃) ရက်နေ့တွင် လူတစ်ဦးလျှင် တစ်ပိဿာနှုန်းဖြင့် လူဦးရေ (၅၅၀) အား စားအုန်းဆီပိဿာ (၅၅၀) ရောင်းချပေးခဲ့ပြီး တစ်ပိဿာလျှင် (၄၉၀၀) ကျပ်ဖြင့် ရောင်းချပေးခဲ့ကြောင်းသိရှိရပါသည်။

    ထို့ပြင် (၁၃-၉-၂၀၂၃) ရက်နေ့တွင် စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံသည် သက်ဆိုင်ရာဌာနများပါဝင်သော ပူးပေါင်းအဖွဲ့ဖြင့် ကျိုက်မရောမြို့နယ်၊ ပိန္နဲကုန်းဈေး၌ ပြည်သူများအား သက်သာသောဈေးနှုန်းဖြင့် စားအုန်းဆီများရောင်းချခဲ့ကြောင်းသိရှိရပါသည်။

DOCA(မွန်)

       ကရင်ပြည်နယ်တွင် ဝဥရာတူးဖော်ချိန်ရာသီရောက်၍ ဝဥအဝယ်ဒိုင်တစ်ချို့ ဈေးကွက်ဖွင့်၍ အရောင်းအဝယ်စသော်လည်း ယခုနှစ်ဝဥရာသီမှာအရောင်းအဝယ်အေးလျက်ရှိကြောင်း သိရသည်။

       ယခင်နှစ်များက ဝဥဈေးကွက်စဖွင့်ချိန် စက်တင်ဘာ ၁ ရက်တွင် အရောင်းအဝယ်စလုပ် ၍ ဈေးကွက်လှုပ်လှုပ်ရှားရှား ဖြစ်ခဲ့သော်လည်း ယခုနှစ်တွင် အဝယ်ဒိုင်တချို့ဈေးဖွင့်သော်လည်း အရောင်းအဝယ် လုပ်ငန်းအား တွင်တွင်ကျယ်ကျယ်မမြင်ရကြောင်း ကရင်ပြည်နယ်ဝဥ စိုက်ပျိုး၊ ထုတ်လုပ်၊ ရောင်းချသူများအသင်း အတွင်းရေးမှူး ဦးမင်းသူက “ ဒီနှစ်က အရောင်းအဝယ်အေးတဲ့ အဆင့်ကို ကျော်လွန်ပြီး၊ ခဲတဲ့အဆင့်ရောက်တယ်လို့တောင် ပြောလို့ရတယ်၊ ဒေသခံ တပိုင်တနိုင် ဝယ်ရောင်းသမားတွေကတော့ ဒေသအလိုက် ဝဥတစ်ပိဿာကို ၆၀၀/၇၀၀/၉၀၀/၁၀၀၀ စသဖြင့် အနည်းအကျဉ်း ဝယ်ရောင်းလုပ်တာတွေ့ရပေမဲ့ ဝဥလုပ်ငန်းရှင်ကြီးတွေနဲ့ စက်ရုံအဝယ်တော်တွေဘက်ကတော့ တိတ်နေတယ်၊ အရင်က ၉ လပိုင်း ၁ ရက်နေ့ဆို အရောင်းအဝယ်စတာနဲ့ ဈေးကွက် လှုပ်ရှားမှုရှိတယ်၊ ဒီနှစ်တော့တွင်တွင်ကျယ်မမြင်ရဘူး” ဟု ပြောသည်။

      ကရင်ပြည်နယ် ဒေသထွက် ဝဥဈေးနှုန်းများမှာ ယမန်နှစ်က ဝဥ၁ ပိဿာလျှင် အဖွင့်ဈေး ၈၀၀ ကျပ်၊ အပိတ်ဈေး ၁၆၅၀ ကျပ်ဖြစ်ကြောင်းနှင့် ကရင်ပြည်နယ်ဒေသထွက် ဝဥမှာ အရည်အသွေးမြင့်မားသောကြောင့် ဈေးကွက်ဝယ်လိုအား ကောင်းမွန်ကြောင်းနှင့် ကရင်ပြည်နယ်တွင် ဝဥတူးဖော် ၍ အရောင်းအဝယ်ကာလကို စက်တင်ဘာလဆန်းမှ နိုဝင်ဘာလလယ်ထိ လုပ်ကိုင်လေ့ရှိကြောင်း သိရသည်။

DOCA(ကရင်)

    မွန်ပြည်နယ်အတွင်းရှိ ခရိုင်အလိုက် ဆေးဆိုင်ဖွင့်လှစ်ရောင်းချနေမှုမှာ မော်လမြိုင်ခရိုင်၌ ဆေးဆိုင် ၄၅၅ဆိုင်နှင့် သထုံခရိုင်၌ ဆေးဆိုင် ၂၀၅ဆိုင်၊ စုစုပေါင်း ဆေးဆိုင် ၆၆၀ဆိုင်ရှိကြောင်းသိရသည်။

   အဆိုပါဆေးဆိုင်များ၌ ရောင်းချသည့်ဆေးပစ္စည်းအမျိုးအမည်၏ အုပ်စုများမှာ ဖျားနာအကိုက်အခဲပျောက်ဆေး၊ ချောင်းဆိုးဆေး၊ နှာစေးပျောက်ဆေး၊ ပိုးသတ်ဆေး၊ ဗိုင်းရပ်သတ်ဆေး၊ အရောင်ကျဆေး၊ သွေးကျဲဆေး၊ အစာအိမ်ဆေး၊ ကိုယ်ခံအားကျဆေး၊ ကာကွယ်ဆေး၊ Vitamin C, D, K, K2 နှင့် Zinc, Becozinc , Zincovit  စသည့်ဆေးဝါးများရောင်းချသည်။

   ၎င်းဆေးဝါးပစ္စည်းများ၏ ဈေးနှုန်းအခြေအနေများမှာ  ဖျားနာအကိုက်အခဲပျောက်ဆေးတစ်လုံးလျှင် ၄၀၀ကျပ်၊ ချောင်းဆိုးပျောက်ဆေးတစ်လုံးလျှင် ၁၀၇ကျပ်၊  ချောင်းဆိုးပျောက်ဆေး(Cough Syrup) တစ်ဘူးလျှင် ၂၁၂၅ကျပ်၊ နှာစေးပျောက်ဆေး(Certizine Tablet 10mg)တစ်လုံးလျှင် ၂၈ကျပ်၊ နှာစေးပျောက်ဆေး(Levo Certizine Tablet)တစ်လုံးလျှင် ၇၀ကျပ်၊ ပိုးသတ်ဆေးအုပ်စုတွင် ၁၁မျိုးပါ (Amoxicillin+ Clavlulinic Acid Tablet 375mg/625mg)တစ်လုံးလျှင် ၁၀၆၀ကျပ်မှ ၁၂၅၀ကျပ်အတွင်း၊ (Cefixime Tablet 200 mg)တစ်လုံးလျှင် ၂၂၅ကျပ်၊ Cefixime Tablet 500mg တစ်လုံးလျှင် ၁၉၄၃ကျပ်၊  ပိုးသတ်ဆေးတစ်ဘူးလျှင် အမျိုးအစားအလိုက် ၁၇၅ကျပ်မှ  ၄၉၄၃၅ကျပ်အတွင်း၊  ဗိုင်းရပ်သတ်ဆေး (Favipiavir 200mg/ 400mg)တစ်ဘူးလျှင် ၂၁၂၀၇ကျပ်မှ ၂၃၇၄၄ကျပ်အတွင်းနှင့် (Remdesivir 1G injection) တစ်လုံးလျှင် ၆၉၂၇ကျပ်၊ အရောင်ကျဆေး(Prednisolone Tablet 40 mg)တစ်လုံးလျှင် ၄၄ကျပ်၊ (Methyl Prednisolone Tablet 40 mg ) တစ်လုံးလျှင် ၂၄၇ကျပ်မှ ၁၀၁၃ကျပ်အတွင်း၊  သွေးကျဲဆေး (Enosaprian injection (0.4ml/0.6ml)တစ်လုံးလျှင် ၁၄၁၃၀ကျပ်မှ ၁၆၇၈၀ကျပ်အတွင်း၊ သွေးကျဲဆေး (Rivaroxaban Tablet 10mg) တစ်လုံးလျှင် ၁၈၄၄ကျပ်၊ အစာအိမ်ဆေး (Omperazole   Tablet 20mg/ injection 40 mg)တစ်လုံးလျှင် ၂၁၂၀ကျပ်၊ (panthoprazole 40mg Tablet/ injection)တစ်လုံးလျှင် ၁၉၃ကျပ်မှ ၃၀၀ကျပ်အတွင်း၊ ကိုယ်ခံအားကျဆေးနှင့် ကာကွယ်ဆေးတစ်လုံးစီလျှင် ၁၉၃ ကျပ်မှ ၃၀၀ကျပ်အတွင်း၊  Vitamin C 100mg တစ်လုံးလျှင် ၆၄ကျပ်၊ Vitamin D1000IU တစ်လုံးလျှင် ၄၈၃ကျပ်, Vitamin K, K2 တစ်လုံးလျှင် ၄၂ကျပ်နှင့် Zinc(20mg), Becozinc, Zincovit တစ်လုံးလျှင် ၁၃၇ကျပ်ဖြစ်ကြောင်းသိရှိရသည်။ အဆိုပါ ဆေးပစ္စည်းများ၏ဈေးနှုန်းသည် အပတ်စဉ်ပြောင်းလဲမှုရှိကြောင်းသိရှိရပါသည်။

DOCA(မွန်)