ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့မဈေးရှိ သစ်သီးဈေးကွက်တွင် စပျစ် သီး၊ လိမ္မော်သီး၊ ပန်းသီး၊ ဖရဲသီး၊ ပန်းသစ်တော်သီးများနှင့် သခွားမွှေးသီးများ ရောင်းချလျက်ရှိပြီး ရွှေသခွားမွှေးသီးနှင့် ကျောက်သခွားမွှေးသီးများကို မြစ်ကြီးနားမြို့နှင့် မန္တလေးမြို့တို့ရှိ သစ်သီးပွဲရုံ များမှ ဝယ်ယူရောင်းချလျက်ရှိကြောင်း သိရသည်။

     ၂၀၂၅ ခုနှစ် ၊ နိုဝင်ဘာလ တတိယပတ်အတွင်း ကန့်ဘလူမြို့ သစ်သီးဈေးကွက်တွင် ရွှေသခွားမွှေးသီး အကြီး(၁)လုံးလျှင်(၇၆၀၀)ကျပ်၊ အသေး(၁)လုံးလျှင်(၅၀၀၀)ကျပ်နှင့် ကျောက် သခွားမွှေးသီး အကြီး(၁)လုံးလျှင်(၁၀၀၀၀)ကျပ်နှင့် အသေး(၁)လုံးလျှင်(၆၀၀၀)ကျပ်ဈေးနှုန်းတို့ဖြင့် ရောင်းချလျက်ရှိရာ ယခုနိုဝင်ဘာလ ဒုတိယပတ် ဈေးနှုန်းများနှင့်နှိုင်းယှဉ်ပါက တတိယပတ်အတွင်း ကျောက်သခွားမွှေးသီး (၁)လုံးလျှင်(၄၀၀)ကျပ် ဈေးနှုန်းကျဆင်းသွားကြောင်း သစ်သီးရောင်းချသူ များထံမှ သိရှိရသည်။

DOCA(စစ်ကိုင်း)

     စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့မဈေးရှိ သစ်သီးဈေးကွက်တွင် ပန်းသီး၊ နာနတ်သီး၊ ပန်းသစ်တော်သီး၊ သခွားမွှေးသီး၊ နဂါးမောက်သီးနှင့် ဖရဲသီးများရောင်းချလျက်ရှိပြီး ဖရဲသီးကို မြစ်ကြီးနားမြို့နှင့် မန္တလေးမြို့တို့ရှိ သစ်သီးပွဲရုံများမှ ဝယ်ယူရပြီး နဂါးမောက်သီးမှာ ဒေသတွင်းမှ ဝယ်ယူရကြောင်း သစ်သီးရောင်းချသူများထံမှ သိရသည်။

     ကန့်ဘလူမြို့ သစ်သီးဈေးကွက်တွင် ၂၀၂၅ ခုနှစ် ၊ နိုဝင်ဘာလ တတိယပတ်အတွင်း ဖရဲသီး အကြီး(၁)လုံးလျှင် (၅၀၀၀)ကျပ်၊ အသေး(၁)လုံးလျှင် (၃၀၀၀)ကျပ်နှင့် ဖရဲသီးတစ်စိတ်လျှင် (၁၀၀၀)ကျပ်၊ နဂါးမောက်သီးအသေး(၁)လုံးလျှင် (၁၂၀၀)ကျပ်၊ အကြီး(၁)လုံးလျှင် (၁၇၀၀)ကျပ် ဈေးနှုန်းတို့ဖြင့် ရောင်းချလျက်ရှိရာ ယခုနိုဝင်ဘာလ ဒုတိယပတ်ဈေးနှုန်းများနှင့် နှိုင်းယှဉ်ပါက တတိယပတ်အတွင်း နဂါးမောက်သီး(၁)လုံးလျှင် (၂၀၀)ကျပ် ဈေးနှုန်းမြင့်တက်လာကြောင်း သစ်သီး ရောင်းချသူဒေါ်တုတ်ထံမှ သိရသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြောင်း သိရသည်။

      ယခုအခါ ကန့်ဘလူမြို့နယ်အတွင်းရှိ နတ်ပေးကျေးရွာ၊ တောက္ကရှပ်ကျေးရွာနှင့် အခြားသော ကျေးရွာများတွင် ထောပတ်ပဲများစိုက်ပျိုးကြကြောင်း၊ ပေါ်ဦးပေါ်ဖျား ထောပတ်ပဲအစိုများကို ကန့်ဘလူမြို့မဈေးတွင်ရောင်းချကြောင်း၊ နိုဝင်ဘာလ တတိယပတ်အတွင်း ထောပတ်ပဲစို(၁) ပြည်လျှင်(၁၀၀၀၀)ကျပ်၊ ထောပတ်ပဲနို့ဆီဘူး(၁)ဗူးလျှင် (၁၃၀၀)ကျပ်၊ ပဲစာဥစိုနို့ဆီဘူး(၁)လျှင် (၁၀၀၀)ကျပ်ဈေးနှုန်းဖြင့် ရောင်းချလျက်ရှိရာ ယခုနိုဝင်ဘာလ ဒုတိယပတ်ဈေးနှုန်းများနှင့် နှိုင်းယှဉ် ပါကတတိယပတ်အတွင်း ထောပတ်ပဲစို(၁)ပြည်လျှင်(၁၀၀၀)ကျပ် ဈေးနှုန်းကျဆင်း၍ အရောင်း အဝယ်ဖြစ်လျက်ရှိကြောင်း မြို့မဈေးရှိ ကုန်စိမ်းရောင်းချသူထံမှ သိရှိရပါသည်။

DOCA(စစ်ကိုင်း)

          မိတ္ထီလာမြို့နယ်အတွင်းရှိကျေးရွာများတွင် ဟင်းသီးဟင်းရွက်စိုက်ပျိုးရေးလုပ်ငန်းများကို အများအပြားလုပ်ကိုင်လျက်ရှိကြောင်းသိရပါသည်။ ဒေသခံများသည် ခရမ်းချဉ်သီး ၊ ခရမ်းသီး ၊ ရုံးပတီသီး၊ ချဉ်ပေါင်ရွက်၊ကန်စွန်းရွက် စသည့်သီးနှံများကိုစိုက်ပျိုးကြသည့် အပြင် ဘူးသီးများကို လည်းတစ်နိုင်တစ်ပိုင်စိုက်ပျိုးကြကြောင်းနှင့် တပ်ကုန်းနယ်ဘက်မှလည်း ဝင်ရောက်ကြောင်းသိရ ပါသည်။ ဖြန့်ဖြူးမှုအနေဖြင့် မြို့မဈေး ၊ ကုန်စိမ်းဈေး(ဘဲကန်)နှင့် မြို့ပေါ်ရပ်ကွက်ဈေးများတွင် ပြန် လည်ရောင်းချကြောင်းသိရပါသည်။ ဘူးသီးသည်အာဟာရဓါတ်များစွာပါဝင်ပြီး ကျန်းမာရေးအတွက် ကောင်းမွန်သည့် ဟင်းသီးဟင်းရွက်တစ်မျိုးဖြစ်၍ စားသုံးသူများအနေဖြင့် ဘူးသီးကြော် ၊ ဘူးသီးဟင်းချိုစသဖြင့် အမျိုးမျိုးပြုလုပ်စားလေ့ရှိကြောင်းသိရပါသည်။

          ဈေးနှုန်းအနေဖြင့် မိတ္ထီလာမြို့ဈေးကွက် နိုဝင်ဘာလ တတိယပတ်တွင် ဘူးသီးတစ်လုံး (၁၅၀၀ မှ ၅၀၀၀)ကျပ်ဈေးဖြင့် ရောင်းချလျှက်ရှိပြီး အလုံးအရွယ်အစားအလိုက် ဈေးနှုန်းပြောင်းလဲမှု ရှိကြောင်း ဈေးကွက်မှ စုံစမ်းသိရှိရပါသည်။ 

DOCA(မန္တ‌လေး)

              မိတ္ထီလာမြို့ဟင်းသီးဟင်းရွက်ဈေးကွက်တွင် ပဲတောင့်ရှည်သီးများအရောင်းအဝယ်ပုံမှန်ရှိ သော်လည်း ဈေးမြင့်နေကြောင်းသိရပါသည်။ မိတ္ထီလာမြို့နယ်ရှိကျေးရွာများတွင် စိုက်ပျိုးကြပြီး မိတ္ထီလာမြို့မဈေး ၊ ကုန်စိမ်းဈေး(ဘဲကန်) ၊ မြို့ပေါ်ရပ်ကွက်ဈေးများတွင် ရောင်းချလျှက်ရှိကြောင်း သိရပါသည်။ ပဲတောင့်ရှည်သီးသည် တစ်နှစ်ပတ်လုံးရရှိသော အစိမ်းရောင်ဟင်းသီးဟင်းရွက်တစ်မျိုး ဖြစ်သည်။ ပဲတောင့်ရှည်သီးတွင် ဗီတာမင်များစွာပါဝင်၍ စားသုံးသင့်သော အစားအစာတစ်ခုဖြစ်ပါသည်။ ပဲတောင့်ရှည်သီးကို   ကြော်ချက်၍ စားရသလို သုပ်စား၍လည်းရပါသည်။ 

          ဈေးနှုန်းအနေဖြင့် မိတ္ထီလာမြို့ဈေးကွက် နိုဝင်ဘာလ တတိယပတ်တွင် ပဲတောင့်ရှည်သီး (၂၅)ကျပ်သားလျှင် (၁၅၀၀)ကျပ် ၊ တစ်ပိဿာ(၅၀၀၀-၆၀၀၀)ကျပ်ဈေးဖြင့် အရောင်းအဝယ်ဖြစ်လျှက်ရှိပြီး ယခင်လဈေးနှုန်းနှင့် နှိုင်းယှဉ်လျှင် ဈေးမြင့်နေကြောင်း ဈေးကွက်မှ စုံစမ်းသိရှိရပါသည်။ 

DOCA(မန္တ‌လေး)