ပြည်တွင်းကုန်သွယ်မှုသတင်း

     ပြည်ဈေးကွက်အတွင်းသို့ ဆောင်းပဲမျိုးစုံ နေ့စဉ်အဝင်များလျက်ရှိသည့်အနက် မတ်ပဲ၊ ပဲတီစိမ်း၊ ကုလားပဲ၊ ပဲစင်းငုံသီးနှံများလည်းဝင်ရောက်မှုရှိခဲ့ကြပါသည်။ မတ်ပဲသီးနှံမှာ ဇန်နဝါရီလအတွင်းမှစ၍ ပဲသစ်များဝင်ရောက်လာပြီး ယခုအချိန်တွင်မူ ပဲအထွက်လှိုင်လာပြီဖြစ်သောကြောင့် တစ်ရက်လျှင် အိတ်၇၀၀ကျော်၊ အိတ်၈၀၀အထိ ပြည်အနီးတဝိုက်ဒေသများမှ ဝင်ရောက်ခဲ့ကြပါသည်။ ယခုကာလ၌ ပဲလှောင်သမားထက် လိုင်းသမားများ ပိုအဝယ်ဖြစ်သောကြောင့် ဝင်ရောက်လာသမျှ အရောင်းအဝယ်ဖြစ်ကြသည်။ ရန်ကုန်ဝယ်လက်အနေဖြင့် အဓိကဝယ်ယူမှုရှိပြီး ပဲဈေးနှုန်းမှာ ပိဿာ၂၀ဝင်တစ်တင်းလျှင် ၉၅၅၀၀ကျပ်ဖြင့် ဈေးနှုန်းလျော့နည်းသွားခဲ့ပါသည်။ မတ်ပဲသီးနှံသည် ပဲသစ်ပေါ်စအချိန်ကတည်းက ဈေးကောင်းရခဲ့သည့်အတွက် ပဲတစ်တင်းလျှင် ကျပ်တစ်သိန်းတစ်သောင်းကျော်ထိရရှိခဲ့ကာ ပဲအထွက်လှိုင်ချိန်တွင်မူ ကျပ်၁သိန်းအောက်သာရရှိခဲ့သောကြောင့်ဈေးနှုန်းလျော့နည်းသွားခဲ့ပါသည်။ မတ်ပဲသီးနှံ၏ နှစ်အလိုက် ကာလတူအချိန်ဈေးနှုန်းများကို လေ့လာရာ၌ ယခုနှစ်၌ ဈေးကွက်အတွင်းရှိ မတ်ပဲသီးနှံဈေးနှုန်းမှာ ရှေးယခင်နှစ်များထက် သိသိသာသာဈေးပိုရရှိလာခဲ့ကြောင်း လေ့လာသိရှိရပါသည်။

စဉ်               ခုနှစ်                       ဈေးနှုန်း

၁                 ၂၀၂၁                      ၃၁၇၀၀

၂                  ၂၀၂၂                      ၃၉၀၀၀

၃                 ၂၀၂၃                      ၆၃၀၀၀

၄                 ၂၀၂၄                      ၉၅၅၀၀

       မတ်ပဲသီးနှံ၏ နှစ်အလိုက်ကာလတူအချိန်ဈေးနှုန်းများအရ ၂၀၂၁ခုနှစ်တွင် တစ်တင်းလျှင် ၃၁၇၀၀ကျပ်ဖြင့် ပဲအထွက်လှိုင်ချိန်၌ အရောင်းအဝယ်ဖြစ်ခဲ့ပြီး ကုလားပဲ၊ ပဲစင်းငုံသီးနှံများထက်လည်း ဈေးပိုရရှိခဲ့ပါသည်။ ၂၀၂၂ခုနှစ်တွင် ၂၀၂၁ခုနှစ်ထက် ဈေးနှုန်းအနည်းငယ်ပိုလာသော်လည်း အဆိုပါနှစ်တွင် အခြားပဲများထက် မတ်ပဲသီးနှံဈေးနှုန်းမှာ လျော့နည်းနေခဲ့ပါသည်။ ၂၀၂၃ခုနှစ်မှစ၍ ပဲဈေးနှုန်းများမြင့်တက်လာခဲ့သောကြောင့် မတ်ပဲသီးနှံမှာ တစ်တင်းလျှင် ၆၃၀၀၀ကျပ်အထိဈေးရခဲ့ကာ နှစ်ကုန်ပိုင်းအထိ ပဲဈေးနှုန်းများ တရိပ်ရိပ်မြင့်တက်လျက်ရှိခဲ့ပါသည်။

         ၂၀၂၄ခုနှစ်၊ နှစ်ဆန်းပိုင်းကာလ ပဲသစ်ပေါ်ချိန်မှစ၍ ပဲဈေးနှုန်းများမှာ အဖွင့်ဈေးမှာကတည်းက ဈေးကောင်းရရှိပြီး တချို့တောင်သူများအနေဖြင့် ထွက်ရှိလာသောပဲသစ်များကိုရောင်းချပြီး တချို့တောင်သူများမှာ ငွေလိုသလောက်သာရောင်းချပြီး လက်ဝယ်သိုလှောင်ထားရှိကြသည်ဟုသိရပါသည်။ လှောင်သမားတချို့မှာလည်း ပဲဈေးနှုန်းလျော့နည်းလာချိန်၌ ဝယ်ယူသိုလှောင်မှုရှိကြသည့်အတွက် ပဲဈေးကွက်၌ မတ်ပဲသီးနှံမှာ အရောင်းအဝယ်သွက်နေကြောင်း လေ့လာသိရှိရပါသည်။

DOCA(ပဲခူး)

      ပြည်ပဲဈေးကွက်၌ အခြားဆောင်းပဲများအဝင်များလာသော်လည်း ပဲတီစိမ်းသီးနှံမှာမူ အဝင်ပါးသွားပြီဖြစ်ပါသည်။ ပြည်ခရိုင်၌ ပဲတီစိမ်းသီးနှံအား မိုးပဲတီစိမ်းနှင့် ဆောင်းပဲတီစိမ်းဟူ၍ နှစ်ရာသီစိုက်ပျိုးပြီး မိုးပဲတီစိမ်းသီးနှံအနေဖြင့် ဇူလိုင်လ၊ ဩဂုတ်လတို့တွင် ပဲအထွက်လှိုင်ပြီး အရောင်းအဝယ်လည်းသွက်ခဲ့ကြောင်း၊ ဆောင်းပဲတီစိမ်းသီးနှံမှာမူ နိုဝင်ဘာလနှင့် ဒီဇင်ဘာလတို့တွင် ပဲဈေးကွက်၌ အရောင်းအဝယ်သွက်ခဲ့ကာ ယခုလတွင်မူ ပဲအဝင်ပါးခဲ့သောကြောင့် အိတ်အနည်းငယ်သာဝင်ရောက်မှုရှိခဲ့ကြပါသည်။ ထို့ကြောင့် အခြားပဲများဖြစ်သော မတ်ပဲ၊ ကုလားပဲ၊ ပဲစင်းငုံသီးနှံများအဝင်လှိုင်ချိန်၌ ပဲတီစိမ်းသီးနှံမှာ အဝင်နည်းသွားပြီး အဆိုပါပဲများလောက် ဈေးကွက်၌ အရောင်းအဝယ်မဖြစ်တော့ဘဲ ဈေးနှုန်းအနေဖြင့်လည်း ပဲတစ်တင်းလျှင် ၇၃၀၀၀ကျပ်ဖြင့်သာ ရောင်းဝယ်လျက်ရှိကြပါသည်။ ပဲသစ်ပေါ်စအချိန်တွင် တစ်တင်းလျှင် ကျပ်၆သောင်းကျော်ဖြင့် ရောင်းဝယ်ခဲ့ကြပြီး ယခုမတ်လ ပထမပတ်တွင် ပဲတီစိမ်းသီးနှံအဝင်ပါးသွားသော်လည်း ပဲဈေးနှုန်းအနေဖြင့် အဖွင့်ဈေးထက် ဈေးပိုလျက်ရှိနေကြောင်းသိရှိရပါသည်။

DOCA(ပဲခူး)

     ပြည်ဈေးကွက်တွင် ၂၀၂၄ခုနှစ်၊ ဖေဖော်ဝါရီလ နောက်ဆုံးပတ်တွင် နှမ်းဈေးများမြင့်တက်လာခဲ့ပါသည်။ ထိုသို့နှမ်းဈေးများမြင့်တက်လာရခြင်းမှာ နှမ်းဝင်ရောက်မှုနည်းသွားပြီး ဝယ်လိုအားများလာသဖြင့် နှမ်းဈေးများမြင့်တက်လာသည်ဟုသိရပါသည်။ နှမ်းနီလက်ကျန်ရှားပါးလာပြီး ဆီကြိတ်ရန် ဆီစက်သမားများကဝယ်ယူမှုရှိ၍ ဈေးနှုန်းမြင့်တက်ခဲ့ကာ နှမ်းနက်နှင့် စမုံနက်နှမ်းမှာ ပြည်ပသို့တင်ပို့ရန်ဝယ်ယူမှုရှိ၍ ဈေးနှုန်းများမြင့်တက်လာသည်ဟုသိရပါသည်။ နှမ်းဈေးနှုန်းများအနေဖြင့် ဖေဖော်ဝါရီလ နောက်ဆုံးပတ်တွင် နှမ်းနီ(၃)တင်းဝင်တစ်အိတ်လျှင် ၃၄၀၀၀၀ကျပ်၊ နှမ်းနက်(၃)တင်းဝင်တစ်အိတ်လျှင် ၃၇၀၀၀၀ကျပ်နှင့် စမုံနက်နှမ်း (၃)တင်းဝင်တစ်အိတ်လျှင် ၃၅၀၀၀၀ကျပ်ဖြင့်အရောင်းအဝယ်ဖြစ်လျက်ရှိပါသည်။ ဇန်နဝါရီလ နောက်ဆုံးပတ်တွင် နှမ်းနီ (၃)တင်းဝင်တစ်အိတ်လျှင် ၂၈၅၀၀၀ကျပ်၊ နှမ်းနက်(၃)တင်းဝင်တစ်အိတ်လျှင် ၃၀၀၀၀၀ကျပ်နှင့် စမုံနက်နှမ်း(၃)တင်းဝင်တစ်အိတ်လျှင် ၃၄၀၀၀၀ကျပ်ဖြင့်အရောင်းအဝယ်ဖြစ်ခဲ့ပြီး ယခုဖေဖော်ဝါရီလ နောက်ဆုံးပတ်ဈေးနှုန်းတို့နှင့်နှိုင်းယှဉ်လျှင် နှမ်းနီ(၃)တင်းဝင်တစ်အိတ်လျှင် ၅၅၀၀၀ကျပ်၊ နှမ်းနက်(၃)တင်းဝင်တစ်အိတ်လျှင် ၇၀၀၀၀ကျပ်နှင့် စမုံနက်နှမ်း(၃)တင်းဝင်တစ်အိတ်လျှင် ၁၀၀၀၀ကျပ်တို့ဖြင့် ဈေးနှုန်းများမြင့်တက်လာခဲ့ပါသည်။ ဈေးနှုန်းများမြင့်တက်လာသော်လည်း အရောင်းအဝယ်မှာ ပစ္စည်းလက်ကျန်နည်း၍ ဖြစ်သင့်သလောက်မဖြစ်ဘဲ အနည်းငယ်သာမြင့်တက်ကြောင်းနှင့် နှမ်းဆီဈေးနှုန်းမှာ တစ်ပိဿာလျှင် ၁၄၅၀၀ကျပ်ဖြင့် ဈေးနှုန်းမြင့်တက်လာခဲ့ကြောင်းသိရှိရပါသည်။

DOCA(ပဲခူး)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့၊ ၂၀၂၄ခုနှစ်၊ မတ်လပထမပတ်တွင် အရောင်းအဝယ်ဖြစ်လျက်ရှိသော အိမ်သုံးဆေးဝါးများ၏ ဈေးနှုန်းများမှာ Decolgen (၁၀) လုံးပါ(၁)ကဒ်လျှင် (၁၇၀၀)ကျပ်၊ Paracetamol (၁၀)လုံးပါ (၁)ကဒ်လျှင် (၃၀၀)ကျပ်၊ Civit အလုံး (၁၀၀)ပါ(၁)ဘူးလျှင် (၂၄၀၀)ကျပ်၊ Burmeton အလုံး(၁၀၀)ပါ(၁)ဘူးလျှင် (၂၅၀၀)ကျပ်၊ Biogesic (၁၀)လုံးပါ (၁)ကဒ်လျှင် (၁၀၀၀)ကျပ်၊ Cetirizine (၁၀)လုံးပါ (၁)ကဒ်လျှင် ( ၂၅၀)ကျပ်၊ ဓာတ်ဆား MPF (၁)ထုပ်လျှင် (၃၅၀)ကျပ်၊ သီးစုံဓာတ်ဆား Royal-D (၁)ထုပ်လျှင် (၃၅၀)ကျပ်၊ Oramin –G (၅)လုံးပါ (၁)ကဒ်လျှင် (၃၆၀၀)ကျပ်၊ Enervon –c (၄)လုံးပါ (၁)ကဒ်လျှင် (၁၆၀၀) ကျပ်၊ Solmux (၄)လုံးပါ (၁)ကဒ်လျှင် (၁၅၀၀)ကျပ်၊ Becozin (၁၀)လုံးပါ (၁)ကဒ်လျှင် (၄၅၀၀) ကျပ်၊ Hepto Pep (၁)ဘူးလျှင် (၅၉၀၀)ကျပ်၊ Baby Cough (၁)ဘူးလျှင် (၂၁၀၀)ကျပ်ဖြင့် အရောင်းအဝယ် ဖြစ်လျက်ရှိပါသည်။

       အိမ်သုံးဆေးဝါးဈေးနှုန်းများအား ဖေဖော်ဝါရီလ စတုတ္ထပတ်နှင့်နှိုင်းယှဉ်ပါက Decolgen (၁၀) လုံးပါ(၁)ကဒ်လျှင် (၂၀၀)ကျပ်၊ Paracetamol (၁၀)လုံးပါ (၁)ကဒ်လျှင် (၁၀၀)ကျပ်၊ Civit အလုံး (၁၀၀)ပါ(၁)ဘူးလျှင် (၈၀၀)ကျပ်၊ Biogesic (၁၀)လုံးပါ (၁)ကဒ်လျှင် (၂၅၀)ကျပ်၊ Cetirizine (၁၀)လုံးပါ (၁)ကဒ်လျှင် (၁၀၀)ကျပ်၊Oramin –G (၅)လုံးပါ (၁)ကဒ်လျှင် (၄၀၀)ကျပ်၊ Enervon –c (၄)လုံးပါ (၁)ကဒ်လျှင် (၁၀၀) ကျပ်၊ Solmux (၄)လုံးပါ (၁)ကဒ်လျှင် (၂၀၀)ကျပ်၊ Hepto Pep (၁)ဘူးလျှင် (၆၀၀)ကျပ် ဈေးနှုန်းကျဆင်းပြီး ကျန်အိမ်သုံးဆေးဝါး ဈေးနှုန်းများမှာ  တည်ငြိမ်လျက်ရှိပြီး ပုံမှန်အတိုင်း ရောင်းချလျက်ရှိကြောင်း ဆေးနှင့်ဆေးပစ္စည်းအရောင်းဆိုင်များမှ သတင်းရရှိပါသည်။

DOCA(စစ်ကိုင်း)

     စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့“မြို့မဈေး”၌ ၂၀၂၄ ခုနှစ်၊ ဖေဖော်ဝါရီလ နောက်ဆုံးပတ်အတွင်း ရောင်းချနေသော ရေထွက်ကုန်ပစ္စည်းဈေးနှုန်းများမှာ ပုဇွန်ခြောက်(အချို)ကြီး(၁)ပိဿာလျှင် ကျပ်(၅၅၀၀၀)၊ ပုဇွန်ခြောက်(အချို)သေး(၁)ပိဿာလျှင် ကျပ်(၅၂၀၀၀) ၊ ငါးပုတ်သင်ခြောက်(အလတ်)(၁)ပိဿာလျှင် ကျပ်(၁၄၅၀၀)၊ ငါးပုတ်သင်ခြောက် (အသေး)(၁)ပိဿာလျှင် ကျပ် (၁၀၅၀၀) ၊ ငါးကြီးသားခြောက်(၁)ပိဿာလျှင် ကျပ်(၄၆၀၀၀)၊ မြီးဆံသွယ်ခြောက်(အချို)(၁)ပိဿာလျှင် ကျပ်(၁၁၀၀၀)၊ မြီးဆံသွယ်ခြောက်(အငံ) (၁)ပိဿာလျှင် ကျပ်(၉၅၀၀)၊ငါးနီတူခြောက် (၁)ပိဿာလျှင် ကျပ် (၁၅၀၀၀)၊ လသာခြောက်(အချို) (၁)ပိဿာလျှင် ကျပ်(၁၃၅၀၀) ၊ ငါးရောင်ခြောက်(၁)ပိဿာလျှင် ကျပ်(၂၄၀၀၀) ၊ ပလာတူးခြောက်(အချို) (၁)ပိဿာလျှင် ကျပ် (၁၃၀၀၀) ၊  ငါးရံ့အကောင်ခြောက်(၁)ပိဿာလျှင် ကျပ်(၁၇၅၀၀)နှင့် အသားမျှင်ခြောက် (၁)ပိဿာလျှင် ကျပ်(၂၇၀၀၀)ဖြင့် အရောင်းအဝယ်ဖြစ်လျက်ရှိကြောင်း ငါးခြောက်ရောင်းချသည့်လုပ်ငန်းရှင်ထံမှ သိရှိရပါသည်။

DOCA(စစ်ကိုင်း)