ပြည်တွင်းကုန်သွယ်မှုသတင်း

      ယခု၂၀၂၄ခုနှစ်၊ ဖေဖော်ဝါရီလ နောက်ဆုံးပတ်တွင် ပြည်ဈေးကွက်အတွင်း ဟင်းချိုချက်၍ စားသောက်ရသည့် ပုတက်စာများမှာ အရောင်းအဝယ်ဖြစ်လျက်ရှိပြီး ၎င်းတို့မှာ ရန်ကုန်မြို့မှ ဝင်ရောက်လျက်ရှိကြောင်းသိရှိရပါသည်။ ပုတက်စာများပေါများချိန် နွေရာသီတွင် ရွှေတောင်ဘက်မှ ဝင်ရောက်မှုများရှိပြီး ယခုအချိန်တွင် ဝင်ရောက်မှုမရှိဘဲ ရန်ကုန်ဘက်မှတစ်ဆင့် ပြောင်းပြန်စီးဝင်လျက်ရှိကြောင်းသိရှိရပါသည်။ ရာသီစာအဖြစ် ဟင်းချိုချက်ပြုတ်စားသောက်ရသည့် ပုတက်စာကို ရန်ကုန်ဘက်မှ ပြည်ဈေးကွက်အတွင်း ရက်ခြား အစည်း(၁၀၀)ခန့်ဝင်ရောက်မှုရှိပြီး အဝင်ရှိသလောက် အရောင်းအဝယ်ဖြစ်နေကြောင်းသိရှိရပါသည်။ ဈေးနှုန်းမှာ ပုတက်စာ(၂)ပင်ပါတစ်စည်းလျှင် ကျပ်၂၅၀ခန့်ရှိပြီး တစ်ခါချက်လျှင် (၃)စည်းခန့်ချက်ပြုတ်ရ၍ ဘူးသီး၊ ပုစွန်ခြောက်တို့နှင့်ရောကာ ချက်ပြုတ်၍ စားသောက်ကြကြောင်းသိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်တွင် ဆောင်းသီးနှံပြောင်းဖူးများထွက်ရှိလျက်ရှိပါသည်။  သဲကုန်းမြို့နယ်အနေဖြင့် ဆောင်း (ပြောင်း) စိုက်ဧက  (၉၀၃၃)ဧကစိုက်ပျိုးထားရှိပါသည်။ ပြောင်းစိုက်ပျိုးရာတွင် ဒေသမျိုးများကို စိုက်ပျိုးခြင်းမပြုဘဲ အဓိကအားဖြင့် အရည်အသွေးကောင်း၊ အထွက်နှုန်းကောင်း ပံအမှတ်တံဆိပ် ပြောင်းဖူးမျိုးနှင့် မြှားနီအမှတ်တံဆိပ်  ပြောင်းဖူးမျိုးများကို ရွေးချယ်စိုက်ပျိုးကြောင်း ၊ အထွက်နှုန်းကောင်းပြီး ဈေးကွက်ရှိ သီးနှံဖြစ်ခြင်းကြောင့် ပြောင်းစိုက်ပျိုးမှုများ ပိုမိုများပြားလာကြောင်း၊  ယခု ၂၀၂၄ခုနှစ်၊   ယခင်ဖေဖေါ်ဝါရီလ ပထမပတ်ပေါက်ဈေးနှုန်းမှာ ပံပြောင်းဖူးတစ်ဖူးလျှင်    (၃၃၀)ကျပ်၊ မြှားနီပြောင်းဖူးတစ်ဖူးလျှင် (၃၀၀)ကျပ်ဈေးနှုန်းရှိခဲ့ပြီး ဖေဖေါ်ဝါရီလ နောက်ဆုံးပတ်တွင်  ပံပြောင်းဖူးတစ်ဖူးလျှင် (၃၅၀)ကျပ်၊ မြှားနီပြောင်းဖူးတစ်ဖူးလျှင် (၃၂၀)ကျပ်ဖြင့် ရောင်းချလျက်ရှိသောကြောင့် ဈေးနှုန်းအနည်းငယ်မြင့်တက်လာကြောင်းသိရှိရပါသည်။

        လက်ရှိဈေးကွက်အနေဖြင့် ဒေသတွင်းမြို့နယ်များ၊ ပြည်နှင့် ရန်ကုန်မြို့များသို့ တင်ပို့ရောင်းချလျက်ရှိကြောင်းသိရှိရပါသည်။

DOCA(ပဲခူး)

      ရှမ်းပြည်နယ်(မြောက်ပိုင်း)၊ ကျောက်မဲခရိုင်၊ နောင်ချိုမြို့နယ်အတွင်းရှိ (၅.၃.၂၀၂၄) ရက်နေ့တွင် ဖြစ်ပေါ်နေသော ပြောင်း၊ကြံစိုက်တောင်သူများအတွက် အဓိကအသုံးပြုလျက်ရှိသော ပုလဲဓာတ်မြေဩဇာနှင့် ပိုးသတ်ဆေးဈေးနှုန်းများမှာ ပုလဲဓာတ်မြေဩဇာ- အာမို (၁၅) ပတ်လည် (၅၀ဂရမ်) တစ်အိတ်လျှင် (၁၅၇၀၀) ကျပ်၊ ကောမတ်(ဩဘာတံဆိပ်) တစ်အိတ်(၅၀ဂရမ်) လျှင် (၁၁၀၀၀၀) ကျပ်၊ စီပီမြေဝိဇ္ဇာ(စီပီတံဆိပ်) တစ်အိတ်(၅၀ ဂရမ်)လျှင် (၁၀၂၀၀၀) ကျပ် ရှိပြီး၊ ပိုးသတ်ဆေးဈေးနှုန်းများမှာ ပကလန်း(ဩဘာတံဆိပ်) ၁၀၀ဂရမ် လျှင် (၁၁၅၀၀) ကျပ်၊ အီမက်စ်   (Vanadi တံဆိပ်) ၁၀၀ ဂရမ်လျှင် (၁၀၀၀၀) ကျပ်၊ ဟာမိုနီ (မြင်းကျားတံဆိပ်) ၁၀၀ ဂရမ်လျှင် (၂၀၀၀၀) ကျပ် အသီးသီးရှိကြောင်း သိရှိရပါသည်။

DOCA(ရှမ်း)

    မြန်မာနိုင်ငံ စက်သုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ တိုင်းဒေသကြီး/ ပြည်နယ်အလိုက် မြို့ကြီးများ၏ စက်သုံးဆီရည်ညွှန်းလက်ကားစျေးနှုန်းများအား အပတ်စဉ် သောကြာနေ့တိုင်း ထုတ်ပြန်ပေးလျက်ရှိပါသည်။

 မကွေးမြို့နယ်တွင် စက်သုံးဆီဆိုင်(၂၃)ဆိုင်ရှိရာ ဆိုင်များအားလုံး ပုံမှန်ဖွင့်လှစ်ရောင်းချ ပေးလျက်ရှိပြီး ၂၀၂၄-ခုနှစ်၊ ဖေဖော်ဝါရီလ(စတုတ္ထပတ်)တွင် ဖြစ်ပေါ်ခဲ့သော စက်သုံးဆီစျေးနှုန်း များမှာ ဓါတ်ဆီ (92) (၁)လီတာလျှင် ကျပ်(၂၈၁၅)၊ ဓါတ်ဆီ (95) (၁)လီတာလျှင် ကျပ်(၂၉၂၅)၊ ဒီဇယ် (ရိုးရိုး) (၁)လီတာလျှင် ကျပ်(၂၆၄၀)၊ ဒီဇယ်(ပရီမီယံ) (၁)လီတာလျှင် ကျပ်(၂၆၉၀)ဖြစ်ပြီး ၂၀၂၄-ခုနှစ်၊ မတ်လ(ပထမပတ်)တွင် ဓါတ်ဆီ (92) (၁)လီတာလျှင် ကျပ်(၂၇၆၀)၊ ဓါတ်ဆီ (95) (၁)လီတာ လျှင် ကျပ်(၂၈၈၀)၊ ဒီဇယ်(ရိုးရိုး) (၁)လီတာလျှင် ကျပ်(၂၅၃၀)၊ ဒီဇယ်(ပရီမီယံ) (၁)လီတာလျှင် ကျပ်(၂၅၇၀)ဖြစ်၍ ယခင်အပတ်နှင့်နှိုင်းယှဉ်ပါက ယခုအပတ်တွင် ဓါတ်ဆီ (92) (၁)လီတာလျှင် ကျပ်(၅၅)၊ ဓါတ်ဆီ (95) (၁)လီတာလျှင် ကျပ်(၄၅)၊ ဒီဇယ်(ရိုးရိုး) (၁)လီတာလျှင် ကျပ်(၁၁၀)၊ ဒီဇယ်(ပရီမီယံ) (၁)လီတာလျှင် ကျပ်(၁၂၀)တို့ အသီးသီး စျေးနှုန်းအနည်းငယ်ကျဆင်းလာကြောင်း လေ့လာသိရှိရပါသည်။

DOCA(မကွေး)

     မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၌ နှမ်း၊ စားတော်ပဲ၊ ကုလားပဲ၊ ပဲကြီး၊ မြေပဲ၊ ပဲစဉ်းငုံ၊ နေကြာ၊ ပြောင်း၊ ဝါ၊ ကြက်သွန်နီနှင့် အခြားသီးပင်စားပင်များ စိုက်ပျိုးထွက်ရှိပြီး ဆောင်းသီးနှံကုလားပဲမှာ ၂၀၂၃-၂၀၂၄ဘဏ္ဏာနှစ်အတွက် စိုက်ဧက(၁၀၀၀၀)ကျော်စိုက်ပျိုးခဲ့ကြောင်း မြို့နယ်စိုက်ပျိုးရေးဦးစီးဌာနမှ သိရှိရပါသည်။

    အထက်မင်းလှမြို့၊ ပန်းတော်ပြင်ကျေးရွာအုပ်စု၊ ဥယျာဉ်ကျေးရွာတွင် ကုလားပဲစိုက်တောင်သူ (၅၀)ဦးခန့်ရှိပြီး စိုက်ဧကမှာ(၃၀၀)ဧကဝန်းကျင်စိုက်ပျိုးထားကြောင်း၊ မိမိအနေဖြင့် ကုလားပဲစိုက် ခင်း(၉) ဧကခန့်စိုက်ပျိုးထားကြောင်း၊ မျိုးအနေဖြင့် ရေဆင်း-၆ မျိုးကို အများဆုံးစိုက်ပျိုးပြီး ကုန်ကျ စရိတ်အနေဖြင့် (၁)ဧကလျှင် ကျပ်(၁၅၀၀၀၀)ခန့် ကုန်ကျကြောင်း၊ ၂၀၂၃ခုနှစ်၊ နိုဝင်ဘာလ (ဒုတိယပတ်)တွင် စိုက်ပျိုးသော ဆောင်းသီးနှံကုလားပဲကို ၂၀၂၄ခုနှစ်၊ ဖေဖော်ဝါရီလ(တတိယပတ်) တွင် စတင်ရိတ်သိမ်းလျက်ရှိပြီး မတ်လ(စတုတ္ထပတ်)တွင် အပြီးရိတ်သိမ်းသွားမည်ဖြစ်ကြောင်း၊ အထွက်နှုန်းအနေဖြင့် အပင်အထွက်ညီသော ကုလားပဲစိုက်ဧက(၁)ဧကလျှင် (၂၅)တင်းမှ(၃၆)တင်း အထိထွက်ရှိကြောင်း၊ မိမိကုလားပဲစိုက်ခင်းမှာ အပင်အထွက်မညီ၍ စိုက်ဧက(၁)ဧကလျှင် တင်း(၂၀) သာထွက်ရှိကြောင်း၊ ယခင်နှစ်က တစ်တင်းလျှင် အမြင့်ဆုံးဈေး ကျပ်(၆၀၀၀၀)ရရှိခဲ့ပါကြောင်း၊ ယခုနှစ်တွင်  ဈေးနှုန်းအနေဖြင့် ကုလားပဲစတင်ရိတ်သိမ်းချိန် ဖေဖော်ဝါရီလ(တတိယပတ်)တွင် (၁) တင်းလျှင် ကျပ်(၉၅၀၀၀)ဈေးရှိခဲ့ပြီး ယခုမတ်လ(ပထမပတ်)တွင် တစ်တင်းလျှင် ကျပ်(၈၀၀၀၀) ဈေးရရှိပါကြောင်း၊ ထွက်ရှိသည့်ကုလားပဲများကို အထက်မင်းလှမြို့ရှိ ပွဲရုံများသို့ ရောင်းချပါကြောင်း၊ ယခုနှစ်တွင်မူ ပို၍ဈေးကောင်းရရှိသောကြောင့် ကုလားပဲစိုက်တောင်သူများအနေဖြင့် အကျိုးအမြတ်များပိုမိုရရှိ၍ အဆင်ပြေလျက်ရှိကြောင်း ဥယျာဉ်ကျေးရွာနေ ကုလားပဲစိုက်တောင်သူ ဦးဇော်အောင်ထံမှ သိရှိရပါသည်။

DOCA(မကွေး)