၂၁.၃.၂၀၂၂ ရက်နေ့ မှ ၂၇.၃.၂၀၂၂ ရက်နေ့အထိ စားအုန်းဆီ တစ်ပိဿာကုန်ကျစရိတ် တွက်ချက်မှုစာရင်း
၂၁.၃.၂၀၂၂ ရက်နေ့ မှ ၂၇.၃.၂၀၂၂ ရက်နေ့အထိ အပတ်စဉ် စားအုန်းဆီ တစ်ပိဿာကုန်ကျစရိတ် တွက်ချက်မှုစာရင်းအား ပူးတွဲပါဖိုင်တွင် ကြည့်ရှုနိုင်ပါသည်-
၂၁.၃.၂၀၂၂ ရက်နေ့ မှ ၂၇.၃.၂၀၂၂ ရက်နေ့အထိ အပတ်စဉ် စားအုန်းဆီ တစ်ပိဿာကုန်ကျစရိတ် တွက်ချက်မှုစာရင်းအား ပူးတွဲပါဖိုင်တွင် ကြည့်ရှုနိုင်ပါသည်-
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်မှ ဦးဆန်းလင်းမောင်(ဦးစီးမှူး)သည် (16.3.2022)ရက်နေ့တွင် စလင်းမြို့နယ်၊ စာစီကျောင်းကျေးရွာ၌ ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် ကုလားပဲစိုက်ပျိုးသော တောင်သူများနှင့်တွေ့ဆုံ၍ စိုက်ပျိုးထုတ်လုပ်မှုကုန်ကျစရိတ်နှင့် အကျိုးအမြတ်ရရှိမှုတို့ကို ကွင်းဆင်းလေ့လာဆွေးနွေးခဲ့ပါသည်။ စာစီကျောင်းကျေးရွာသည် အိမ်ခြေ(200) ခန့်ရှိပြီး၊ လူဦးရေ(700)ခန့်ရှိကြောင်း နှစ်စဉ်စပါးနှင့်ကုလားပဲသီးနှံများကို အဓိကစိုက်ပျိုးလျှက်ရှိ ကြောင်း၊ ယခင်နှစ်က ကုလားပဲစိုက်ပျိုးရာတွင် အရှုံးပေါ်မှုများကြောင့် စိုက်ပျိုးမှုနည်းခဲ့သော်လည်း ယခုနှစ်စာစီကျောင်း ကျေးရွာတွင် ကုလားပဲစိုက်ပျိုးဧက (120)ခန့်စိုက်ပျိုးခဲ့ပြီး ကုလားပဲလုံးကြီး၊ ကုလားပဲလုံးသေး၊ 929 ကုလားပဲမျိုးများစိုက်ပျိုးခဲ့ကြောင်း တောင်သူဦးခင်မောင်ဦးအနေဖြင့် ကုလားပဲ လုံးကြီးမျိုး 3ဧကစိုက်ပျိုးခဲ့ရာ (42)တင်းထွက်ရှိ၍ တစ်ဧကပျမ်းမျှ(14)တင်းနှုန်းထွက်ရှိခဲ့ကြောင်း၊ ယခုနှစ်တွင် ရာသီဥတုကောင်းမွန်ပြီး မိုးနည်းပါး၍ အအေးပိုသောကြောင့် ကုလားပဲအထွက်ကောင်းကြောင်းသိရှိရပါသည်။
ကုလားပဲစိုက်ပျိုးရန် မိုးစပါးရိတ်သိမ်းပြီးချိန် ဒီဇင်ဘာလဆန်းမှစ၍ တစ်ဧကမျိုး(2)တင်းနှုန်း ကျဲပတ်ပြီး (16)သွားထွန်ဖြင့် ပြန်ဖုံးကြောင်း၊ မြေပြုပြင်ချိန်မှစ၍ စိုက်ပျိုးပြီးချိန်ထိ (13000ဝိ/-) ကုန်ကျကြောင်းသိရှိရပါသည်။စိုက်ပျိုးပြီး (3)လခွဲခန့်အကြာတွင် ကုလားပဲများရင့်မှည့်၍ ရိတ်သိမ်းနိုင်ကြောင်း၊ ကုလားပဲ (1)ဧကစိုက်ပျိုးမှုကုန်ကျစရိတ်အနေဖြင့် မြေပြုပြင်ရာတွင် နွားရှဉ်း (2)ရှဉ်း ငှားရမ်းခအတွက် ငွေကျပ်(2000ဝိ/-)ကုန်ကျကြောင်း၊ ထွန်စက်ဖြင့်ငှားရမ်းသုံးစွဲပါက (2)နာရီခန့် မောင်းရပြီး(1)နာရီကျပ် (2500ဝိ/-)နှုန်းပေးရသည့်အတွက် (5000ဝိ/-)ကုန်ကျကြောင်း၊ ကျဲပတ်စနစ်ဖြင့်စိုက်ပျိုးရာတွင် လူတစ်ဦးနေ့တွက်ခပေးရသည့်အတွက် လုပ်သားခ (800ဝိ/-) ကုန်ကျကြောင်း၊ စလင်းဒေသသည် လင်းဇင်းရေလွှဲဆည်၊ စလင်းတမံ၊ မဲဇလီရေလွှဲဆည်များမှ အောင်ရေရရှိသည့်အတွက် ရေသွင်းမှုအကြိမ်ရေလျော့နည်းပြီး ကုန်ကျစရိတ်နည်းသော်လည်း ပိုးသတ်ဆေး၊ အပင်အားဆေး၊ သွင်းအားစုအမျိုးအမျိုး၊ ဓါတ်ဆီ၊ ဒီဇယ်ဈေးနှုန်းများမှာ ယခင်နှစ်ကထက် ကုန်ကျစရိတ်များပြားခြင်း၊ (1) ဧကအထွက်နှုန်း (14)တင်း(15)တင်းရှိပြီး စက်ချွေခအနေဖြင့် (1)တင်း (2000)ကျပ်နှုန်းဖြင့် (3000ဝိ/-)ကုန်ကျကြောင်း၊ အိမ်အရောက်သယ်ယူခ (1000ဝိ/-)ကုန်ကျ၍ ကုလားပဲ(1)ဧက စိုက်ပျိုးကုန်ကျစရိတ်မှာ (35000ဝိ/-)ခန့်ရှိကြောင်းသိရှိရပါသည်။ ကုလားပဲစိုက်ပျိုးသူဦးခင်မောင်ဦးအနေဖြင့် ဝင်ငွေ (56000ဝိ/-)ပြန်လည်ရရှိ၍ အကျိုးအမြတ် (21000ဝိ/-)ဝန်းကျင်ရရှိကြောင်းသိရှိရပါသည်။
ကုလားပဲ(1)ဧကအထွက်နှုန်းမှာ စိုက်ပျိုးမြေကွာခြားမှု သွင်းအားစုသုံးစွဲပုံမတူညီမှု၊ ရေသွင်းအကြိမ်ရေကွာခြားမှုတို့ကြောင့်ဖြစ်ပြီး ယခုနှစ်ကုလားပဲဈေးကွက်အနေဖြင့် (1)တင်းလျှင် (4000ဝိ/-)မှ (4200ဝိ/-)ရှိ၍ တောင်သူများအဖို့ တွက်ခြေကိုက်ကြောင်း၊ စလင်းမြို့နယ်၊ စာစီကျောင်းကျေးရွာသည် လူဦးရေနည်းပါးပြီး ကုလားပဲစိုက်ဧကများသောကြောင့် ပိုလျှံသော ကုလားပဲများကို မြို့ပေါ်ရှိပွဲရုံများသို့ ဖြန်ဖြူးရောင်းချကြောင်း၊ ကုန်ချောအဖြစ် ဗယာကြော်၊ ပဲခွေကြော်၊ ပဲချောင်းလုပ်ငန်းများတွင်လည်း တွင်တွင်ကျယ်ကျယ်အသုံးပြုကြောင်း၊ ယခုနှစ်ကုလားပဲစိုက်ပျိုးချိန်တွင် ရာသီဥတုကောင်းမွန်သည့်အတွက် အမြစ်ပိုးစွဲမှုနည်းပါးခြင်း၊ မှိုရောဂါနည်းပါခြင်းတို့ကြောင့် အပင်အသေအပျောက်နည်းပြီး အထွက်နှုန်းကောင်းမွန်သည့်အပြင် ဈေးနှုန်းအနေဖြင့်လည်း သင့်တင်မျှတသောကြောင့် တောင်သူများအဖို့ တွက်ခြေကိုက်သောနှစ်တစ်နှစ်ဖြစ်ကြောင်း ရေးသားတင်ပြလိုက်ရပါသည်။
DOCA(မကွေး)
ဧရာဝတီတိုင်းဒေသကြီးသည် မြန်မာနိုင်ငံတွင် ဆန်စပါးအများဆုံးစိုက်ပျိုးရာ တိုင်းဒေသကြီး တစ်ခုဖြစ်ပြီး မြန်မာနိုင်ငံ၏ ဆန်အိုးကြီးအဖြစ် သတ်မှတ်ခြင်းခံရကာ တစ်နိုင်ငံလုံး စားသုံးရန်အတွက် ဆန်စပါးစိုက်ပျိုးထုတ်လုပ်ပေးနေသော တိုင်းဒေသကြီး ဖြစ်ပါသည်။ ဧရာဝတီတိုင်းဒေသကြီးအတွင်း မိုးစပါး(၃၇)သိန်းကျော်၊ တစ်ဧကပျမ်းမျှ အထွက်တင်း (၆၇)တင်းခန့်နှင့် နွေးစပါးစိုက်ဧက(၁၃)သိန်းကျော်၊ တစ်ဧကပျမ်းမျှ အထွက်တင်း (၉၆)တင်း ခန့်ထွက်ရှိကာ စုစုပေါင်း မိုး/နွေစပါးတင်းပေါင်း သိန်းပေါင်း (၄၀၀၀) ကျော်ခန့် ထွက်ရှိပါသည်။ ထို့အပြင် ဆီထွက်သီးနှံများဖြစ်သော မြေပဲ၊ နေကြာ၊ နှမ်း၊ ပန်းနှမ်း၊ ဆူးနှမ်း စိုက်ဧကစုစုပေါင်း (၉၉၆၁၂)ဧက စိုက်ပျိုးပြီး အထွက်တင်း(၂၄၈၁၉၃၅)တင်း ထွက်ရှိကာ ဆီပိဿာ (၁၂၇) သိန်း ခန့်ရရှိပြီး ဆီဖူလုံမှုမှာ(၂၉.၇၅)ရာခိုင်နှုန်းဖြစ်သည့်အတွက် ဆီလိုအပ်မှုများ ရှိနေသော တိုင်းဒေသကြီး ဖြစ်ပါသည်။
ယခုအခါ နိုင်ငံတော်အကြီးအကဲမှ စားသုံးဆီအား ပြည်တွင်း လိုအပ်ချက်အရ ပြည့်ပက တင်သွင်းမှုအပေါ် မှီခိုနေရချိန် စားသုံးဆီကို ပြည်တွင်းဖူလုံသော နိုင်ငံအဖြစ် ရပ်တည် နိုင်ရေးအတွက် အစိုးရ ပုဂ္ဂလိက ပူးပေါင်းဆောင်ရွက်သွားရန်အတွက်လည်းကောင်း၊ ပြီးခဲ့သည့် ဘဏ္ဍာနှစ်အတွင်း စားအုန်းဆီအမယ်တစ်ခုတည်းအတွက် အမေရိကန်ဒေါ်လာသန်း(၈၃၀)နီးပါး သုံးစွဲခဲ့ရခြင်းအား သက်သာစေရန်အတွက်လည်းကောင်း မိမိတို့နိုင်ငံအတွင်း ဆီဖူလုံရေးအတွက် အစီအမံများချမှတ်ဆောင်ရွက်သွားရန် လမ်းညွှန်မှာကြားခဲ့ပါသည်။
ထို့အတွက်ဧရာဝတီတိုင်းဒေသကြီး အစိုးရအဖွဲ့ကြီးကြပ်မှုဖြင့် စားသုံးသူရေးရာဦးစီး ဌာနက ဧရာဝတီတိုင်းဒေသကြီးအတွင်း ထွက်ရှိသော စပါးတင်းသိန်း(၄၀၀၀)ကျော်မှ ထွက်ရှိမည့် ဖွဲနုတန်ပေါင်း(၇၂၃၂၁၄)တန်အား ဖွဲနုဆီစက်များတည်ဆောက်လည်ပတ်ခြင်းဖြင့် နိုင်ငံတော်၏ ဆီလိုအပ်ချက် တစ်စိတ်တစ်ဒေသ ပြည့်မီအောင်ဆောင်ရွက်သွားမည်ဖြစ်ပါသည်။ ဖွဲနုတန်(၁၀၀) ကြိတ်ခွဲပါက ဖွဲဖတ်(၈၄)တန်၊ ဆီကြမ်း(၁၀)တန် ပြန်လည်ရရှိပြီး (၆)ရာခိုင် နှုန်းမှာ ထုတ်လုပ်မှု လျော့နည်းပျောက်ဆုံးသွားမည်ဖြစ်ပါသည်။ ဆီကြမ်း(၁၀) တန်အား အဆင့်ဆင့် ပြန်လည် သန့်စင်ပါက ဆီချောပိဿာ(၃)တန်မှ (၃.၅)တန်ထွက်ရှိပြီး ဘေးထွက်ပစ္စည်းများမှာ ဖယောင်း ကြမ်း(၅.၈)ရာခိုင်နှုန်း၊ ဆပ်ပြာကြမ်း(၅၀-၈၀)ရာခိုင်နှုန်း၊ အရောင်ချွတ်ဖတ်(၃) ရာခိုင်နှုန်းနှင့် ဖယောင်းချော(၁)ရာခိုင်နှုန်းတို့ကို ရရှိပြီး အဆိုပါပစ္စည်းများမှာ လူသုံးကုန်ပစ္စည်းများ ထုတ်လုပ်ရာတွင် ပြန်လည်အသုံးပြုကြောင်း သိရှိရပါသည်။ ထို့ကြောင့် ဖွဲနု(၁)တန်ကိုကြိတ်ခွဲပါက ဖွဲနုဆီ(၀.၀၃-၀.၀၃၅)တန်(၁၈ ပိဿာမှ ၂၁ပိဿာ အထိ) ရရှိကြောင်း လေ့လာသိရှိရပါသည်။
ထို့ကြောင့် ဧရာဝတီတိုင်းဒေသကြီးအတွင်း ထွက်ရှိသော ဖွဲနုတန်ပျမ်းမျှ (၇၂၃၂၁၄)တန်အား ကြိတ်ခွဲပါက ဆီပိဿာပေါင်း(၉၄)သိန်းခန့် ရရှိနိုင်မည်ဖြစ်ပါသဖြင့် ဧရာဝတီတိုင်းဒေသကြီး၏ ဆီလိုအပ်ချက်(၂၄.၃၇)ရာခိုင်နှုန်းခန့် ဖြည့်ဆည်းပေးနိုင်မည် ဖြစ်ပါသည်။
၎င်းအပြင် ဖွဲနုဆီသည် ဆီအရည်အပိုင်းများသော စားသုံးဆီဖြစ်ခြင်း၊ ဖွဲနုဆီတွင်မပြည့်ဝအဆီ အက်ဆစ်များအချိုးညီ ပေါင်းစပ်ပါဝင်ပြီး ပြည့်ဝအဆီအက်ဆစ်ပါဝင်မှု ရာခိုင်နှုူန်း အလွန်နည်းခြင်းတို့ကြောင့် မကောင်းသော ကိုလတ်စထရော မြင့်တက်မှုကို ကာကွယ်ပေးနိုင်ရေး၊ နှလုံးကျန်းမာရေးကို အလွန်အထောက်အကူပြုနိုင်သည်ဟု ပညာရှင်များက ထောက်ခံထားကြပါသည်။ ဓာတ်တိုးဆန့်ကျင်ပစ္စည်းများ ပါဝင်သောကြောင့် ဆီစားတည်မြဲမှု ကြာရှည်စေပြီး အထားခံခြင်း၊ အရွယ်မတိုင်မီ အိုမင်းရင့်ရော်မှုကို တားဆီးပေးခြင်း၊ အိုမီဂါ-၃ ပါဝင်မှုကြောင့် ကိုယ်ခံစားမြင့်တင်စေခြင်းစသည့် ကျန်းမာရေးဆိုင်ရာအကျိုးပြု စားသုံးဆီလည်း ဖြစ်ပါသည်။
သို့အတွက် ဧရာဝတီတိုင်းဒေသကြီး ဆန်စပါးကြိတ်ခွဲရာမှ ထွက်ရှိသော ဘေးထွက်ပစ္စည်းဖွဲနုအား ဖွဲနုဆီကြိတ်ခွဲထုတ်လုပ်ခြင်းအားဖြင့် ဒေသတွင်း၊ နိုင်ငံအတွင်း လိုအပ်သော ဆီဖူလုံမှု လိုအပ်ချက်အား ဖြည့်ဆည်းပေးနိုင်ပြီး နိုင်ငံခြားဝင်ငွေ သုံးစွဲမှုလျော့နည်းကာ ကျန်းမာရေးအတွက်လည်း အထောက်အကူဖြစ်စေမည့်အပြင် အလုပ်အကိုင်အခွင့်အလမ်းများ ရရှိနိုင်သည့် လုပ်ငန်းတစ်ခုဖြစ်သဖြင့် ဧရာဝတီတိုင်းဒေသကြီးအတွင် ဖွဲနုဆီစက်များ တည်ဆောက်ခြင်း၊ ဆီထွက်သီးနှံများ တိုးချဲ့စိုက်ပျိုးခြင်းဖြင့် မြန်မာနိုင်ငံ၏ ဆန်အိုးကြီးမှတစ်ဆင့် ဆီလိုအပ်ချက် ဖူလုံလာစေသည့် တိုင်းဒေသကြီးတစ်ခုအဖြစ် နိုင်ငံ့အတွက် အားထားရသောတိုင်းဒေသကြီးတစ်ခုဖြစ်လာမည်ဖြစ်ပါကြောင်း တင်ပြလိုက်ပါသည်။
DOCA(ဧရာဝတီ)
စစ်ကိုင်းတိုင်းဒေသကြီးအတွင်း ဆန်ပိုဒေသများဖြစ်သော ရွှေဘိုခရိုင်၊ ကလေးခရိုင်၊ ကသာခရိုင်များတွင် မတ်လ စတုတ္တပတ်တွင် စပါး/ဆန်ဈေး အနည်းငယ်မြင့်တက်နေပါသည်။ စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ယခင်အပတ်က ရန်ကုန်သို့အိတ်ရေ ၃၈၀၀၀၊ မန္တလေးသို့အိတ်ရေ ၄၄၂၀၀၊ မကွေးသို့အိတ်ရေ ၁၀၀၀၊ နေပြည်တော်သို့ အိတ်ရေ ၁၀၀၀၀၊ ရှမ်း(တောင်) သို့ အိတ်ရေ ၆၀၀၀၊ ရှမ်း(မြောက်)သို့ အိတ်ရေ ၅၀၀၀၊ စုစုပေါင်းအိတ်ရေ (၁၀၄၂၀၀)အိတ်၊ တန်အားဖြင့် (၅၂၁၀)စီးထွက်ခဲ့ပြီး၊ ယခုအပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၃၀၀၀၀၊ မန္တလေးသို့ အိတ်ရေ ၄၀၄၀၀၊ မကွေး သို့ အိတ်ရေ ၁၀၀၀၊ နေပြည်တော်သို့ အိတ်ရေ ၁၀၀၀၀၊ ရှမ်း(တောင်)သို့ အိတ်ရေ ၆၅၀၀၊ ရှမ်း(မြောက်)သို့ အိတ်ရေ ၆၅၀၀၊ စုစုပေါင်းအိတ်ရေ (၉၄၄၀၀)အိတ်၊ တန်အားဖြင့်(၄၇၂၀)စီးထွက်ခဲ့သည့်အတွက် ယခင်အပတ်နှင့် နှိုင်းယှဉ်လျှင် ယခုအပတ်တွင် အိတ်ရေ (၉၈၀၀)၊ တန်အားဖြင့် (၄၉၀) လျော့နည်းစီးထွက်ခဲ့ပါသည်။
စစ်ကိုင်းတိုင်းဒေသကြီးအတွင်း မတ်လ (စတုတ္တ)ပတ်တွင် ဖြစ်ပေါ်နေသော အခြေခံစားကုန်ဈေးနှုန်းများမှာ ရွှေဘိုခရိုင်တွင် ရွှေဘိုပေါ်ဆန်း(စပါး) တင်း၁၀၀လျှင် ကျပ်(၁၅၀၀၀၀၀)၊ ပေါ်ဆန်း (ဆန်)၂၄ပြည်ပါ တစ်အိတ်လျှင်ကျပ် ၅၃၀၀၀၊ ဧရာမင်း(စပါး)တင်း ၁၀၀လျှင် ၉၀၀၀၀၀၊ ဧရာမင်း(ဆန်) ၂၄ ပြည်ပါ တစ်အိတ် ကျပ် ၄၃၀၀၀၊ ရေဦးမြို့မှ ပေါ်ဆန်း (စပါး) တင်း ၁၀၀လျှင် ကျပ် ၁၅၀၀၀၀၀၊ ပေါ်ဆန်း(ဆန်) တစ်အိတ်လျှင်ကျပ် ၅၄၀၀၀၊ ဧရာမင်း (စပါး) တင်း၁၀၀ လျှင် ၉၅၀၀၀၀၊ ဧရာမင်း (ဆန်)၂၄ ပြည်ပါ တစ်အိတ် ၄၂၀၀၀ ကျပ်များဖြင့် အရောင်းအဝယ်ဖြစ်နေကြောင်း သိရပါသည်။
ကလေးခရိုင်၊ ကလေးမြို့နယ်မှ ဧည့်မထ(စပါး) တင်း၁၀၀ လျှင် ၈၀၀၀၀၀၊ ဧည့်မထ(ဆန်) ၂၄ပြည်ပါ တစ်အိတ်မှာ ကျပ် ၂၆၅၀၀၊ ငစိန်(စပါး) တင်း ၁၀၀ လျှင် ၈၀၀၀၀၀ ၊ ငစိန်(ဆန်)၂၄ပြည် ပါတစ်အိတ်မှာ ၂၆၅၀၀၊ ဧရာမင်း (စပါး)တင်း ၁၀၀ လျှင် ကျပ် ၉၀၀၀၀၀၊ ဧရာမင်း(ဆန်)၂၄ပြည်ပါ တစ်အိတ်မှ ာကျပ် ၃၄၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။
ကသာခရိုင်၊ ကောလင်းမြို့နယ်မှ မှော်ဘီ(၂)(စပါး) တင်း ၁၀၀လျှင် ကျပ်၇၀၀၀၀၀၊ မှော်ဘီ(၂) ဆန် ၂၄ပြည် တစ်အိတ် လျှင် ကျပ် ၃၀၀၀၀၊ ဆင်းဧကရီ(၃)(စပါး) တင်း၁၀၀ လျှင် ကျပ် ၅၈၀၀၀၀၊ ဆင်းဧကရီ-၃ဆန် ၂၄ပြည် တစ်အိတ်မှာ ကျပ် ၂၅၀၀၀၊ ဧရာမင်း (စပါး) တင်း ၁၀၀ လျှင် ကျပ် ၈၀၀၀၀၀၊ ဧရာမင်းဆန် ၂၄ ပြည် ဆန် တစ်အိတ်လျှင် ကျပ် ၃၅၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။
မုံရွာခရိုင်၊ မုံရွာမြို့တွင် ဧရာမင်း(စပါး)တင်း ၁၀၀ လျှင် ကျပ် ၉၅၀၀၀၀၊ ဧရာမင်း(ဆန်) ၂၄ပြည် တစ်အိတ်မှာ ကျပ် ၄၇၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။
DOCA(စစ်ကိုင်း)
မွန်ပြည်နယ်၊ မော်လမြိုင်ခရိုင်၊ ချောင်းဆုံမြို့နယ်တွင် ၂၀၂၂ ခုနှစ်၊ ဆောင်းသီးနှံစိုက်ပျိုးရာသီတွင် တစ်မြို့နယ်လုံးအနေဖြင့် ဆီထွက်သီးနှံ (မြေပဲ၊ နေကြာ၊ နှမ်း) ကို ဧကပေါင်း(၉၅၇) ဧကစိုက်ပျိုးနိုင်ခဲ့ကြောင်း စိုက်ပျိုးရေးဦးစီးဌာနမှ သိရသည်။
ဒေသတွင်း စားသုံးဆီဖူလုံရေး၊ သီးထပ်သီးနှံစိုက်ပျိုးသည့် တောင်သူများဝင်ငွေ တိုးပွားစေရေးအတွက် ရည်ရွယ်ပြီး ဆောင်းသီးနှံအဖြစ်တစ်မြို့နယ်လုံးတွင် ပဲမျိုးစုံစိုက်ဧက (၄၂၇၁) ဧက စိုက်ပျိုးထားခြင်းအပြင် ယခုဘဏ္ဍာနှစ်တွင် ဆီထွက်နေကြာသီးသန့်/သီးညှပ် စိုက်ဧက (၂၀၁) ဧက လျာထားရာ (၈၅၂) ဧက စိုက်ပျိုးနိုင်ခဲ့ကြောင်း၊ မြေပဲစိုက်ဧက (၇၈) ဧကလျာထားရာ (၉၄) ဧက စိုက်ပျိုး နိုင်ခဲ့ကြောင်းနှင့် နှမ်းစိုက်ဧက (၁၁) ဧကကိုလည်း စမ်းသပ်စိုက်ပျိုးနိုင်ခဲ့ကြောင်းနှင့် ချောင်းဆုံမြို့နယ်တွင် ယခုနှစ်အနေဖြင့် ဆီထွက်သီးနှံကိုလျာထားချက်စိုက်ဧကထက် ဧက (၆၀၀)ကျော် ပိုမိုစိုက်ပျိုး နိုင်ခဲ့ကြောင်း မြို့နယ် စိုက်ပျိုးရေးဦးစီးဌာနမှ သိရသည်။
DOCA(မွန်)
မတ်လပထမပတ်မှစ၍ ပြည်ပဲဈေးကွက်အတွင်း ပြည်ပဝယ်လက်ပဲများ ဈေးပြန်မြင့်တက် လာခဲ့သည်ကို တွေ့ရှိရပြီး မတ်ပဲသီးနှံနှင့် ပဲစင်းငုံသီးနှံများမှာ ပဲအထွက်လှိုင်ချိန်ဖြစ်သော်လည်း ဈေးမြင့်တက်နေခဲ့သလို ပဲအဝင်လည်း ဝင်ရောက်မှုများလျှက်ရှိနေခဲ့ပါသည်။ ပဲတီစိမ်းသီးနှံသည် ပဲအဝင်ပါးသွားပြီဖြစ်၍ အဟောင်းလက်ကျန်အနည်းငယ်သာ ရောင်းဝယ်မှုဖြစ်လာပါသည်။
ကုလားပဲနှင့် ပဲကြီးသီးနှံမှာလည်း ပဲအထွက်လှိုင်နေပြီး ဝင်ရောက်မှုများခဲ့ကာ ဝယ်လိုအား ကောင်းခဲ့ပြီး စားတော်ပဲအသစ်ကတော့ ပဲအဝင်များသလို ဈေးလည်းအမြင့်ဆုံး ရနေသည်ကို တွေ့ရှိရပါသည်။
မတ်ပဲသီးနှံအနေဖြင့် ဇန်နဝါရီလဆန်းမှစ၍ ပဲသစ်များ ဈေးကွက်သို့ဝင်ရောက်လာခဲ့ပြီး ပိဿာ၂၀ တစ်တင်းလျှင် ၄၅၀၀၀ကျပ်ဖြင့် ဈေးဖွင့်ရောင်းဝယ်ကြရာမှ ဖေဖော်ဝါရီလလယ်မှစ၍ ဈေးပြန်လျော့ခဲ့ကာ တစ်တင်းလျှင် ကျပ် ၄သောင်း အောက်လျော့နည်းခဲ့ကြောင်း၊ လကုန်ပတ်မှစ၍ ဈေးပြန်မြင့်တက်လာခဲ့သောကြောင့် ယခုတစ်ပတ်တွင် တစ်တင်း ၄၆၀၀၀ကျပ်ကျော်အထိ ရောင်းဝယ်နေခဲ့ကြကာ ပြည်ဈေးကွက်သို့နယ်စုံမှ ဝင်ရောက်ခဲ့ကြပြီး တစ်ရက်အိတ် ၄၀၀ကျော် ၅၀၀ ဝင်ရောက်ခဲ့ကြောင်း၊ လှောင်သမားများ၊ ရန်ကုန်လိုင်းသမားများပါ အဝယ်ရှိ၍ အဝင်ရှိသလောက် အရောင်းအဝယ်သွက်နေခဲ့ကြောင်း၊ ပဲစိုက်တောင်သူများအနေဖြင့်လည်း ထွက်ပေါ်လာသမျှ ပေါက်ဈေးဖြင့် ရောင်းချနေသူများရှိကြသလို အချို့တောင်သူများကလည်း ဈေးကောင်းမျှော်ကာ လှောင်ပဲအဖြစ်ထားရှိနေကြကြောင်း၊ ယခင်နှစ်ကဆိုလျှင် မတ်ပဲသီးနှံအထွက်လှိုင်ချိန် တစ်တင်း ၂၇၀၀၀ကျပ်ဖြင့်သာ ရောင်းဝယ်ခဲ့ကြပြီး ပဲဈေးအေးခဲ့ပေမယ့် ဇွန်လဆန်းမှစ၍ ပဲဈေးနှုန်းများ မြင့်တက်လာတာကြောင့် တစ်တင်း ၃၆၀၀၀ကျပ်ထိ ဈေးရရှိခဲ့ကာ နှစ်ကုန်ပိုင်းတွင် ကျပ်၅သောင်း နီးပါးအထိ ဈေးတရိပ်ရိပ်တက်လာခဲ့ကြောင်း၊ယခုနှစ်ပဲအထွက်လှိုင်ချိန် ဈေးကောင်းရရှိခဲ့၍ ယခင်နှစ်ကကဲ့သို့ ပဲအဝင်ပါးသွားချိန် ဈေးကောင်းရလာမည်ဟု မျှော်လင့်ပြီး လှောင်လက်သမားများကလည်း ဝယ်ယူသိုလှောင်နေခဲ့ကြကြောင်း သိရှိရပါသည်။
ပဲတီစိမ်းသီးနှံမှာ မတ်ပဲသီးနှံကဲ့သို့ တစ်နှစ်ပတ်လုံးအရောင်းအဝယ်ဖြစ်သည့် ပဲသီးနှံမျိုး မဟုတ်ဘဲ ပဲအထွက်လှိုင်ချိန်ထိသာ အရောင်းအဝယ်ဖြစ်ပြီး ကျန်ကာလများ အရောင်းအဝယ်ပါးခဲ့ပါသည်။ မိုးပဲတီစိမ်းသီးနှံသည်လည်း ပဲအထွက်လှိုင်ချိန် ဇူလိုင်/ဩဂုတ်လများတွင်သာ အရောင်းအဝယ်ဖြစ်ပြီး ဆောင်းပဲတီစိမ်းသီးနှံမှာ နိုဝင်ဘာ/ ဒီဇင်ဘာ/ ဇန်နဝါရီလများတွင်သာ ပဲအဝင်လှိုင်သလို အရောင်းအဝယ်လည်းသွက်ခဲ့ပြီး ယခုကာလတွင် ပဲဝင်ရောက်မှု မရှိသလောက်ဖြစ်ခဲ့ပြီး ပဲအဟောင်းများသာ လှောင်ပဲသမားအချို့ ရောင်းချမှုရှိ၍ အနည်းငယ် အရောင်းအဝယ် ဖြစ်ခဲ့ပါသည်။ ပဲတီစိမ်းသီးနှံမှာ နှစ်စဉ်လိုလိုဈေးကောင်းရခဲ့ပြီး ယခုနှစ်တွင်လည်း ပိဿာ ၂၀ တစ်တင်းကျပ် ၄သောင်းအထက်ရောင်းဝယ်ခဲ့ကြပြီး ပဲတီစိမ်းသီးနှံမှာ မန္တလေးဝယ်လက်သမား အဓိကဝယ်ယူမှုရှိခဲ့ပါသည်။
ပဲစင်းငုံသီးနှံကတော့ ပဲအဝင်များ၍ တစ်ရက်လျှင် အိတ် ၂၀၀ကျော် ဝင်ရောက်သလို လှောင်သမားရော ဝယ်လက်သမားပါ အဝယ်လိုက်လျှက်ရှိခဲ့ပြီး ပဲဈေးမှာ တစ်တင်းလျှင် ၄၂၅၀၀ကျပ်ဖြင့် ယခုနှစ် ပြည်ပဝယ်လက်ပဲထဲတွင် ဈေးကောင်းရခဲ့သော သီးနှံဖြစ်ခဲ့ပါသည် ။ ယခင်နှစ်များက ပဲစင်းငုံသီးနှံသည် ဈေးအေးသော သီးနှံထဲတွင်ပါဝင်နေပြီး လှောင်ပဲသမားရော စိုက်ပျိုးထုတ်လုပ်သူ တောင်သူများပါ တွက်ခြေမကိုက်ခဲ့ဘဲ ယခုနှစ်တွင် ဈေးကောင်းရနေသည့်အတွက် စိုက်ပျိုးထုတ်လုပ်သူတွေ အကျိုးအမြတ်ပိုရနိုင်သောနှစ် ဖြစ်ခဲ့ပါသည်။
ပဲကြီးသီးနှံမှာ ယခုကာလအတွင်း ဈေးကွက်တွင် ပဲဝင်ရောက်မှု အများအပြား ရှိလာသောကြောင့် တစ်ရက်အိတ် ၈၀၀ကျော်ထိ ပြည်မြို့အနီးတဝိုက်နှင့် မင်းတုန်း၊ ကံမဘက်မှ နေ့စဉ် ဝင်ရောက်လျှက်ရှိနေခဲ့ပါသည်။ ပဲကြော်ဖိုသမား နေ့စဉ်အဝယ်ရှိသလို ရန်ကုန်ဝယ်လက်သမားများလည်း ဝယ်ယူနေခဲ့ကြပြီး ပဲဈေးမှာ (ရွှေကျွန်း)တစ်တင်း ၆၆၀၀၀ကျပ်၊ (ကမ်းနား)တစ်တင်း ၆၄၀၀၀ကျပ် တို့ဖြင့် ယခင်လက ဈေးထက် ဈေးပြန်မြင့်တက်လာခဲ့ပါသည်။ ယခင်လအတွင်း ပဲကြီးသီးနှံမှာ ကျပ် ၈သောင်းကျော်မှ ၅သောင်းကျော်ထိ ဈေးသိသိသာသာ လျော့နည်းသွားခဲ့ ပြီး ယခုတစ်ပတ်တွင် ပဲအထွက်လှိုင်လာသလို ဈေးနှုန်းများပါ မြင့်တက်လာသဖြင့် ယခင်နှစ် ပဲကြီး သီးနှံပေါက်ဈေးထက် တစ်တင်းကျပ် ၃သောင်းကျော်ထိ မြင့်တက်ခဲ့ပါသည်။ ယခင်နှစ် ယခုလို ကာလအတွင်း တစ်တင်းကျပ် ၃သောင်းပတ်ဝန်းကျင်သာ ရောင်းဝယ်ခဲ့ရသော သီးနှံဖြစ်ပါသည်။
စားတော်ပဲသီးနှံမှာ ပဲဈေးကွက်အတွင်း ဈေးအမြင့်ဆုံးရနေသော ပဲဟုဆိုရမည်ဖြစ်ပြီး တစ်တင်း ၉၀၀၀၀ကျပ်ထိ ရရှိခဲ့ပါသည်။ ပဲသစ်များအဝင်များ၍ အိတ် ၅၀ကျော်ဝင်ရောက်ခဲ့သလို လက်လီသမားရော လက်ကားသမားပါ အဝယ်ရှိခဲ့၍ တစ်ရက်အိတ် ၄၀/၅၀ကျော် အရောင်းအဝယ် ဖြစ်ခဲ့ကြောင်းသိရှိရပါသည်။
DOCA(ပဲခူး)
ဆောင်းသီးနှံ ဖြစ်သောမတ်ပဲ စိုက်ပျိုးခြင်းသည် မတ်ပဲဈေးကောင်းလာသည်နှင့်အမျှ တောင်သူများ မိမိတို့ စိုက်ခင်းများသို့ သွားရောက်ပြီး အထူးဂရုစိုက် ပြုစုလုပ်ကိုင်လာကြသည်။ ဆေးဖျန်းခြင်း၊ ပေါင်းသတ်ခြင်း၊ လိုအပ်သော အားဆေးများ ဖျန်းပတ်ခြင်းများ ပြုလုပ်နေကြသည်။ သွင်းအားစု ဈေးနှုန်းများလည်း မြင့်တက်နေခြင်းကြောင့်လည်းကောင်း၊ ယခင်နှစ်များကဲ့သို့ ပဲပေါ်ပေးဖြင့် အလွယ်တကူ ဝယ်ယူကြခြင်းမရှိသောကြောင့် တောင်သူများ အခက်အခဲများ ရှိနေပါသည်။ ၎င်းအခက်အခဲများအပြင် တစ်ချို့သော တောင်သူများ အနေဖြင့် စိုက်ပျိုးသောပဲပင်များ တစ်ကွင်းလုံး အဝါပင်များ ပေါက်နေသည်ကို တွေ့ရှိရပါသည်။
မတ်ပဲသည် ဆောင်းသီးနှံ ဖြစ်ခြင်းကြောင့် ဆောင်းသီးနှံစိုက်ပျိုးခြင်း သဘောသဘာဝအရ မြေမှုန့်ခြောက်လှမ်း၍ စိုက်ပျိုးရခြင်း ဖြစ်ပါသည်။ သင့်လျော်သောအစိုဓါတ်တွင် ထယ်ကြမ်းခွဲပြီး (၄) ရက်ခန့် အခြောက်လှမ်းရသည်။ အခြောက်လှမ်းပြီးသော မြေတွင် ပဲစေ့များ ကြဲပက်ရသည်။ ထွန်စက်ဖြင့် အမှုန့်ဖြစ်အောင် ထွန်ယက်ပြီး လိုအပ်လှျင် ဓါးကြမ်းရိုက်ပြီး ဖုံးဖိပေးရပါသည်။ သို့မှသာ မြေကြီး အစိုဓာတ်သည် ခြောက်သွေ့ပြီး လေဟာနယ်မရှိသည့် မြေလွှာ၏ ဖုံးဖိထားမှုကြောင့် အမြစ်အတွက် လိုအပ်သော ရေဓာတ်ကို ပေးစွမ်းနိုင်ပြီး အပေါ်မှ ဖိထားပေးမှုကြောင့် အပင်၏ ပင်စည်အောက်ပိုင်းတွင်လည်း အစိုဓါတ်ဖြင့် မထိတွေ့ရ၍ ရောဂါဖြစ်ပွားမှုကို ကာကွယ်စေနိုင်သည်။
ယခုနှစ် စပါးရိတ်သိမ်းချိန်တွင် မိုးများအဆက်မပြတ် ရွာသွန်းမှုကြောင့် သင့်လျော်သော အစိုဓာတ်ကို စောင့်ဆိုင်းရခြင်း၊ လယ်သမားများမှာ နွားဖြင့် ထွန်ယက်ခြင်း မရှိတော့သည့်အတွက် ထွန်စက်များကိုသာ အလှည့်ကျ စောင့်ဆိုင်း၍ မိမိတို့ လယ်များတွင် စက်ထွန်ရန် ရက်ချိန်းရယူပြီးမှ စိုက်ပျိုးရခြင်းကြောင့် စိုက်ပျိုးရန် သင့်လျော်သော မြေအနေအထားမှာ အစိုဓာတ်များနေသော်လည်း စိုက်ပျိုးပြီးစီးရန်သာ အဓိကထား စိုက်ပျိုးနေကြရသည်ဖြစ်၍ ဆောင်းသီးနှံ၏ သဘာဝအရ မြေအစို ဓာတ်ဖမ်း စိုက်ပျိုးခြင်းနည်းစနစ်နှင့် လွဲချော်သွားသည့် တောင်သူများရှိသည်ကို လေ့လာတွေ့ရှိ ရပါသည်။
သွင်းအားစု ရွက်ဖျန်းဆေးသုံးစွဲမှုအနေဖြင့် အပင်ငယ်ချိန်တွင် အပင်အားဆေးမှာ နိုက်ထရိုဂျင် များသော ရွက်ဖျန်းဆေး မြေသြဇာများကို သုံးစွဲသော အလေ့အထရှိပါသည်။ အပင်၏ အစာချက်နှုန်းနှင့် အားဆေး၏ အာနိသင်တို့ ချိန်ညှိနိုင်မှုမရှိခြင်း၊ တောင်သူများ၏ စိုက်ပျိုးမှု ပုံစံပြောင်းလဲသွားသော်လည်း ရွက်ဖျန်းမြေသြဇာများ၏ အကျိုးသက်ရောက်မှုက လိုက်လျောညီမှု မရှိနိုင်ကြောင်း ယူဆနိုင်ပါသည်။
မှိုသတ်ဆေးဆိုသည်မှာ မတ်ပဲအပင်ရောဂါကာကွယ်ဆေး၊ ရောဂါသတ်ဆေးဖြစ်ပြီး ရောဂါဝင်ရောက်မှု မရှိအောင် လုပ်ဆောင်ခြင်းဖြစ်သည့်အပြင် အပင်၏ အစာချက်နှုန်းကိုလည်း တိုးတက်ကောင်းမွန်စေသော အာနိသင်ရှိကြောင်း လေ့လာတွေ့ရှိရပါသည်။
ဆောင်းသီးနှံ မတ်ပဲစိုက်ပျိုးရာတွင် တွေ့ရှိရသော ပိုးအမျိုးအစားများမှာ ပင်စည်ထိုးပိုး၊ (ပိုးလောင်းဘဝ) တွင် အပင်၏ အလယ်အူကြောင်းတွင် ဝင်ရောက်စားသောက်ဖျက်စီးစေတတ်သော ပိုးအမျိုးအစားဖြစ်ပြီး ငမြှောင်တောင်ပိုး (ပိုးလောင်းဘဝ) သည် အပင်ပေါ်နှင့် မြေကြီးခဲများ အောက်တွင် တွေ့ရှိရ၍ ၎င်း၏ စွမ်းဆောင်ရည်မှာ (၅) ရက်အတွင်း အပင်၏ အညွှန့်၊ အရွက်အားလုံး ကုန်သွားအောင် စားသောက်ဖျက်ဆီးတတ်သည်။ ပွင့်ထွေးပိုး (ပိုးလောင်းဘဝ) သည် အသီးအပွင့် ဝင်ချိန်တွင် ကျရောက်ပြီး လှေးပိုးနှင့် တစ်ချိန်တည်း ကျရောက်တတ်သည်။ ပွင့်ထိုးပိုးသည် ပိုးတုံးလုံး (ပိုးလောင်းဘဝ) တွင်ရှိပြီး ၊ လှေးပိုးမှာ ခွေးသန်းကဲ့သို့ ပျံသန်းနိုင်သော ပိုးအမျိုးအစားဖြစ်သည်။ ပွင့်ထွေးပိုးနှင့် လှေးပိုးတို့မှာ အပွင့်အတွင်းရှိဝတ်ဆံ၊ ဝတ်မှုံ တို့ကို စားသောက်ပြီး အပွင့်မှ အသီး ဖြစ်မလာပဲ ပွင့်သမျှ အပွင့်အားလုံး ခြောက်ကပ်ကြွေကျသွားပြီး အသီးခိုင်ရိုးတံသာလျှင် ကျန်ခဲ့သည်။ အသီးခိုင်ရိုးတံသည် အပင်မကျပါက နောက်တစ်ကြိမ် ပြန်လည်သီးပွင့်နိုင်သော အစွမ်းရှိသည်။
ယခင်နှစ် အချိန်အခါက မတ်ပဲ အဝါရောင်ဖြစ်ခြင်းမှာ ပဲခင်းများထဲတွင် ပြောက်တိ ပြောက်ကြား သာတွေ့ရလေ့ရှိပြီး ယခုအခါတွင် ပဲခင်းတစ်ခင်းလုံးအထိ ဖြစ်ပေါ်လာသည့်အတွက် ပိုမိုဆိုးရွားသွားသည်ကို တွေ့ရှိရပါသည်။ မည်ကဲ့သို့ ဖြစ်ပေါ်လာသည်ကို လေ့လာရန်နှင့် ဖြစ်ပေါ်စေနိုင်သော အကြောင်းအရင်းများမှာ- မြေအစိုဓာတ်လွန်ကဲခြင်းကြောင့် ရောဂါဖြစ်ပေါ်နိုင်ခြင်း၊ ရွက်ဖျန်းဆေး အသုံးများပြီး ဆေးကြွင်း၊ ဆေးကျန်များခြင်းကြောင့် အပင်များရောဂါဖြစ်ပေါ်နိုင်ခြင်း၊
ပိုးမွှားကျရောက်ရာတွင် ပဲပင်၏ အရွယ်အစားအလိုက်ဖော်ပြပါ ပိုးများမှာ သက်တမ်းတစ်လျောက် ကျရောက်နေခြင်း၊ ဆေးများအကြိမ်ကြိမ် သုံးစွဲခြင်းကြောင့် ရောဂါဖြစ်ပေါ်နိုင်ခြင်း၊ ပိုးမွှားများ ကျရောက်ခြင်းတို့ကြောင့် ဒဏ်ရာများ ၊ ပိုးချေးများ မှတစ်ဆင့် ရောဂါဝင်ရောက်နိုင်ခြင်းစသည့် အချက်များသည် မတ်ပဲပင် အဝါဖြစ်ပေါ်နိုင်ခြေရှိသော အကြောင်းအရင်းများသာ ဖြစ်သဖြင့် ပညာရှင်များ သုတေသနပြုစု ဆောင်ရွက်ပြီး နည်းပညာကောင်းများ ရှာဖွေဖော်ထုတ်၍ ဆေးကောင်းများ ဖော်ထုတ်သင့်ကြောင်း လေ့လာတွေ့ရှိရပါသည်။
သို့ဖြစ်ပါ၍ သွင်းအားစု ထုတ်လုပ်၊ ရောင်းချသူ လုပ်ငန်းရှင်များအနေဖြင့် မိမိတို့ ထုတ်လုပ် ရောင်းချသော ဆေးများကို သုံးစွဲခြင်းဖြင့် စိုက်ခင်းအတွင်း ဖြစ်ပေါ်ကျရောက်နေသော မှိုရောဂါနှင့် ပိုးမွှားရောဂါ ကင်းရှင်းမှုကို သက်တမ်း ရက်သတ္တပတ်ကာလ တစ်ခု သတ်မှတ်အာမခံရန်နှင့် ဆေးသုံးစွဲခြင်းကြောင့် ဖြစ်ပေါ်လာသော ဘေးထွက်ဆိုးကျိူး (အပင်ဝါခြင်း) နှင့် အခြားရောဂါကိုလည်း အာမခံရန် လိုအပ်ပါသည်။ ဤအပင်ဝါရောဂါဖြစ်ခြင်းသည် တစ်နှစ်ထက် တစ်နှစ် ပိုမိုများပြားလာပြီး ကြာလျှင် တောင်သူများ မတ်ပဲစိုက်ပျိုး၊ ထုတ်လုပ်ခြင်းကို ကံစမ်းမဲထိုးသည့် သဘောမျိုး မသေချာမှု များနှင့် ရင်းနှီး၊ မြှုပ်နှံရသည်အထိ စိုးရိမ်စရာ ဖြစ်လာနိုင်သည့် အဆင့်ထိ ဖြစ်လာနိုင်ကြောင်း လေ့လာ တွေ့ရှိရပါသည်။ အပင်ဝါ ပေါ်ပေါက်ခြင်းကြောင့် ပဲတစ်ပင်၏ အစာချက်နှုန်း ကျဆင်းစေပြီး အသီး မအောင်ခြင်း၊ သီးတောင့်ကောက်ပြီး အစေ့အကုန်မအောင်ခြင်း၊ အပွင့်ပွင့်နှုန်းကျဆင်းမှုများပြီး ပဲထွက်နှုန်းတို့ကို သိသာစွာကျဆင်းစေပါသည်။ ထူးခြားသည်မှာ အစေ့အရောင်မှာ ဝါမသွားပဲ အမဲရောင်သာရှိနေကြာင်း လေ့လာတွေ့ရှိရပါသည်။
DOCA(ပဲခူး)
ပဲခူးတိုင်းဒေသကြီးတိုင်းအစိုးရအဖွဲ့နှင့် စားသုံးသူရေးရာဦးစီးဌာနတို့၏ လမ်းညွှန်စီမံမှုဖြင့် စားသုံးသူပြည်သူများ သက်သာသောဈေးနှုန်းဖြင့် ဝယ်ယူစားသုံးနိုင်ရေးအတွက် စားသုံးဆီများအား အထူးနှုန်းဖြင့် ခွဲဝေရောင်းချပေးမှုအပေါ် ပဲခူးတိုင်းဒေသကြီး၊ သာယာဝတီခရိုင်၊ စားသုံးသူရေးရာ ဦးစီးဌာနရုံးမှ ပြည်တွင်း၊မူဝါဒဌာနတာဝန်ခံနှင့် လက်ပံတန်းမြို့နယ် စားသုံးသူရေးရာဦးစီးဌာန မြို့နယ်တာဝန်ခံတို့သည် (၁၃.၃.၂၀၂၂)ရက်နေ့ နံနက်(၉:၃၀)အချိန်တွင် လက်ပံတန်းမြို့နယ်အတွင်း အထူးဈေးနှုန်းဖြင့် ရောင်းချသောဆီဆိုင်သို့ သွားရောက်၍ ဆီတစ်ပိဿာ(၆၈၀၀/) ကျပ်ဖြင့် ရောင်းချနေမှုတို့ကို ကွင်းဆင်းကြပ်မတ် စစ်ဆေးဆောင်ရွက်ခဲ့ပါသည်။
DOCA(ပဲခူး)
စားသုံးသူပြည်သူများ သက်သာသော ဈေးနှုန်းဖြင့် ဝယ်ယူသုံးစွဲနိုင်ရန် ရည်ရွယ်၍ စားသုံးဆီများကို ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့ရှိ ရွှေဂျိူးဖို ကုန်စုံဆိုင်တွင် (၁၃.၃.၂၀၂၂) ရက်မှစ၍ ရောင်းချပေးလျက်ရှိပြီး (၁၄.၃.၂၀၂၂) ရက်နေ့ နံနက် (၉:၀၀) တွင် စားသုံးသူရေးရာဦးစီးဌာန၊ ခရိုင်ဦးစီးမှူးနှင့် မြို့နယ်တာဝန်ခံတို့မှ ကွင်းဆင်းကြီးကြပ်ခဲ့ပါသည်။
အဆိုပါ စားအုန်းဆီသည် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းတို့ ပူးပေါင်းစီစဉ်မှုဖြင့် မှာယူတင်သွင်းခဲ့သော စားအုန်းဆီများဖြစ်ပြီး သာယာဝတီခရိုင်၊ ကြို့ပင်ကောက်မြို့ စားအုန်းဆီခွဲတမ်း (၁၅)ပေပါအား ဆီကုန်သည်နှင့် ဆီလုပ်ငန်းရှင်များအသင်း၊ ကုန်စုံဆိုင် ၊ အရောင်းကိုယ်စားလှယ်တို့မှ ချိတ်ဆက်ဆောင်ရွက် ငွေသွင်းပြီး (၁၃.၃.၂၀၂၂) နေ့မှစ၍ တစ်အိမ်ထောင်လျှင် (၃) ပိဿာနှုန်း၊ တစ်ပိဿာဈေးနှုန်း (၆၈၀၀/)ကျပ်နှုန်းဖြင့် ပစ္စည်းရှိသလောက် ရောင်းချပေးနေပြီဖြစ်ကြောင်း သိရှိရပါသည်။
DOCA(ပဲခူး)
စားသုံးသူရေးရာဦးစီးဌာန၊ ရှမ်းပြည်နယ်(မြောက်ပိုင်း)၊ ဒုတိယပြည်နယ်ဦးစီးမှူးရုံးမှ သတင်းအချက် အလက်နှင့်နည်းပညာတာဝန်ခံနှင့် ဝန်ထမ်းများသည် (၈.၃.၂၀၂၂) ရက်နေ့တွင် ရပ်ကွက်(၁၀)မှ ဒေါ်ရွှေခင်၏ အောင်မြင်ဖြစ်ထွန်းနေသည့် စတော်ဘယ်ရီသီးစိုက်ခင်းသို့ သွားရောက် ကွင်းဆင်းလေ့လာခဲ့ကြပါသည်။
ဒေါ်ရွှေခင်၏ ပြောပြချက်အရ စတော်ဘယ်ရီသီး စိုက်ဧက (၂) ဧက ရှိပြီး တစ်ပိုင်တစ်နိုင်စီးပွားဖြစ် စိုက်ပျိုးခဲ့သည်မှာ (၁၀)နှစ်ခန့်ရှိပြီဖြစ်ကြောင်း မိသားစုဝင်ငွေရရှိ၍ အဆင်ပြေကြောင်းသိရှိရပါသည်။ စတော်ဘယ်ရီသီးမျိုးမှာ ထိုင်ဝမ်အကြီးမျိုးဖြစ်ပြီး အပျော့သီး/အကျွတ်သီးဟူ၍ နှစ်မျိုးရှိပြီး အပျော့သီးမျိုးကို သာအဓိအထားစိုက်ပျိုးကြောင်း သိရှိရပါသည်။ ၎င်းအပျော့သီးမှာ အလွန်နူးညံ့ချိုအိသောကြောင့် လူကြိုက် များ၍ ရောင်းအားသွက်ပြီးဈေးကောင်းရသောကြောင့် အဆိုပါအပျော့သီးကိုသာ အဓိကထားစိုက်ဖြစ်ကြောင်း သိရှိရပါသည်။
စတော်ဘယ်ရီသီးများကို ရေခြံမြေတွင်ဘောင်များဖော်ကာ ဘောင်အလိုက်စိုက်ပျိုးပါသည်။ အပင်များ အဟာရရှိစေရန် သဘာဝမြေဩဇာဖြစ်သည့် နောက်ချေးနှင့်မြေပြုပြင်ပြီးစိုက်ပျိုးကြောင်း သိရှိရပါသည်။ ၎င်းစတော်ဘယ်ရီပင်များမှာ မြေလျှောက်ပင်များဖြစ်ပြီး အသီးများသီးလျင် ပုရွက်ဆိတ်ဒဏ်မှ လွတ်ကင်းရန် နှင့်အသီးများတွင်မြေများကပ်နေလျှင် အသီးများရောင်းပန်းမလှသဖြင့် အဆိုပါပုရွက်ဆိတ်နှင့် မြေကြီးကပ် ခြင်းမရှိစေရန် အပင်များကြားတွင် ကောက်ရိုးများထည့်သွင်းစိုက်ပျိုးကြောင်းသိရှိရပါသည်။ စတော်ဘယ်ပင် များကို အောက်တိုဘာလတွင် စတင်စိုက်ပြီး၊ ဖေဖော်ဝါရီလတွင် အသီးများစတင်ထွက်ပေါ်ကြောင်း သိရှိရ ပါသည်။ အဆိုပါစတော်ဘယ်ရီသီးလေးများသည် ဖေဖော်ဝါရီလလည်တွင်စတင်ရင့်မှည့်ပြီး ခြင်းအနည်းငယ် ခူးဆွတ်ရပြီး မတ်လနှင့်ဧပြီလကုန်ခါနည်းတွင်နေ့စဉ်ပုံမှန် အနည်းဆုံး(၇)ခြင်းမှ (၁၁)ခြင်းထိခူးဆွတ်ရကြောင်း သိရှိရပါသည်။
စတော်ဘယ်ရီမျိုးပင်များကို ပျိုးပင်(၁)ပင်လျှင်(၁၀၀)ကျပ်ဖြင့် ပြင်ဦးလွင်မြို့မှဝယ်ယူရပြီး အပင်ပေါင်း(၅၀၀၀) ဝယ်ယူစိုက်ပျိုး ခဲ့ကြောင်းသိရှိရပါသည်။စတော်ဘယ်ရီသီးများ စိုက်ပျိုးရာတွင် နွားချီး၊ ကြက်ချီး၊ ကောက်ရိုး များ၊ အပင်အားတိုးဆေးများ၊ ပေါင်းသတ်ဆေးများဝယ်ယူရကြောင်းသိရှိရပါသည်။ ယခုကာလတွင် စတော် ဘယ်ရီသီးများမှည့်ပြီး စား၍ ကောင်းသည့်အချိန်ဖြစ်၍ စားသောက်ဆိုင်များ၊ ဖောက်သည်များမှ လာရောက် ဝယ်ယူရာ တစ်ရက်ကို(၁၀)ခြင်း ရောင်းရကြောင်းသိရှိရပါသည်။ စတော်ဘယ်ရီသီးများကို ယခင်ကပလပ် စတစ်ခြင်းသေး(၁)ခြင်း (၇၀၀၀)ကျပ် ဖြင့်ရောင်းချခဲ့သော်လည်း ယခုနှစ်ဝယ်ယူရသည့် ပစ္စည်းတန်ဖိုးများ မြင့်မားလာသည့်အတွက် ပလပ်စတစ် ခြင်းသေး(၁)ခြင်း (၈၀၀၀)ကျပ်ဖြင့် ရောင်းချကြောင်းသိရှိရပါသည်။
စတော်ဘယ်ရီသီးများ မိုးမမိပါက အရှုံးမပေါ်ပဲ အဆင်ပြေကြောင်း ကုန်ကျမှုနှင့် ဝင်ငွေရရှိမှုတို့ကို နှိုင်းယှဉ်ပါက အကျိုးအမြတ်အသင့်အတင့် ရရှိကြောင်း လေ့လာသိရှိရပါသည်။
DOCA(ရှမ်း)