ပြည်တွင်းကုန်သွယ်မှုသတင်း

      ပြည်ခရိုင်တွင် ဆီထွက်သီးနှံဖြစ်သော မြေပဲသီးနှံကို အဓိကထား၍ စိုက်ပျိုးကြပြီး တစ်နှစ်လျှင် (၂)ကြိမ် မိုးမြေပဲနှင့်ဆောင်းမြေပဲဟူ၍ ရှိပါသည်။ ပြည်ခရိုင်တွင် ၂၀၂၂-၂၀၂၃ ခုနှစ်တွင် မိုးမြေပဲစိုက်ဧကမှာ ၃၇၉၅၃ ဧကရှိပြီး တစ်ဧကအထွက်နှုန်းမှာ ၅၉ တင်းကျော်ခန့်ထွက်ရှိပါသည်။ ဆောင်းမြေပဲကို အောက်တိုဘာလတွင် စတင်စိုက်ပျိုးပြီး ယခုအချိန်အထိ ၂၆၀၂၅ ဧက စိုက်ပျိုးပြီးဖြစ်ပါသည်။ ဆောင်းမြေပဲများသည် လာမည့်နှစ် ၂၀၂၃ခုနှစ် ဇန်နဝါရီလနှင့် ဖေဖော်ဝါရီလတွင် ထွက်ပေါ်မည်ဖြစ်ပါသည်။ မြေပဲပင်သည် ၃ လခွဲနှင့် ၄ လအတွင်းရိတ်သိမ်းနိုင်ပြီး ရေမြေဒေသကိုလိုက်၍ တစ်နှစ်ပတ်လုံး စိုက်ပျိုးနိုင်သည့်သီးနှံဖြစ်ပါသည်။ မြေပဲအမျိုးအစား (၂)မျိုးရှိပြီး ပင်ထောင်မျိုးနှင့် ပင်ပြန့်မျိုးဟူ၍ရှိကာ  ပင်ပြန့်မျိုးကို မိုးခေါင်ရေရှားအရပ်ဒေသများတွင် အများဆုံးစိုက်ပျိုးပြီး ပြည်ခရိုင်အနေဖြင့် ပင်ထောင်မြေပဲကို အများဆုံးစိုက်ပျိုးကြပါသည်။ ဆောင်းရာသီတွင် ရွှေတောင်၊ ပန်းတောင်းနှင့် ပြည်မြို့နယ်ရှိ ကျွန်းမြေများပေါ်တွင်လည်း စိုက်ပျိုးကြပါသည်။ မြေပဲများစိုက်ပျိုးရာတွင် တစ်ဧကလျှင် မျိုး(၆)တင်းခန့်ကုန်ကျပြီး နုန်းမြေနှင့် သဲနုန်းမြေတို့တွင် စိုက်ပျိုးရန် အသင့်တော်ဆုံးဖြစ်ပါသည်။ မြေပဲတစ်ဧကလျှင် စိုက်ပျိုးထုတ်လုပ်မှုကုန်ကျစရိတ်မှာ ၃၈၀၀၀၀ ကျပ်ခန့်ကုန်ကျပြီး၊ မြေပဲတောင့်ဈေးမှာ တစ်တင်းလျှင် ၁၃၀၀၀ ကျပ်ဈေးရှိ၍ တစ်ဧကဝင်ငွေမှာ ၇ သိန်းကျော်ရှိ၍ တောင်သူအကျိုးအမြတ်မှာ ၃၄၀၀၀ ကျပ်ခန့်ရရှိသည်ဟု သိရှိိရပါသည်။ မြေပဲများနှုတ်သိမ်းချိန်တွင် အလေအလွင့်မရှိစေရန်ဂရုစိုက်ရပြီး နှုတ်သိမ်းချိန်နောက်ကျပါက မြေပဲနှုတ်ရခက်ပြီး၊ နှုတ်သိမ်းချိန်စောပါကလည်း အစိုဓါတ်များ၍ ဆီထွက်နှုန်းနည်းမည်ဖြစ်ပါသည်။

      ယခု ဒီဇင်ဘာလ နောက်ဆုံးအပတ်တွင် ပြည်ဈေးကွက်သို့ ကံမဘက် မြေပဲဆန်အိတ် ၉၀၀/၁၀၀၀ ခန့်ဝင်ရောက်မှုရှိပြီး ဝင်သလောက်အရောင်းအဝယ်ဖြစ်လျက်ရှိပါသည်။ လုံးဆန် (အနီ)ကို မန္တလေး ဝယ်လက်များနှင့် မြို့တွင်းပဲလှော်ဖိုသမားများက နေ့စဉ်ဝယ်ယူမှုရှိ၍ နေ့စဉ်ရောင်းဝယ်မှုရှိပြီး ဈေးလည်းမြင့်တက်လာပါသည်။ လုံးဆန်(အဖြူ)ကို မြဝတီဝယ်လက်များက အဝယ်ပြန်လိုက်လာသော်လည်း ရက်ခြားသာအရောင်းအဝယ်ဖြစ်လျက်ရှိပါသည်။ ဈေးနှုန်းများမှာ မြေပဲဆီဆန်တစ်ပိဿာလျှင် ၄၃၀၀ ကျပ်ဖြင့် ယခင်အပတ်ကအတိုင်း ဈေးငြိမ်နေပြီး၊ လုံးဆန်(အဖြူ) တစ်ပိဿာလျှင် ၄၉၀၀ ကျပ်ဖြင့် ယခင်အပတ်ထက် ဈေးအနည်းငယ်ကျလာခဲ့ပါသည်။ လုံးဆန် (အနီ) တစ်ပိဿာလျှင် ၆၀၀၀ ကျပ်ဖြင့် ယခင်အပတ်ထက် တစ်ပိဿာလျှင် (၅၀၀)ကျပ်ခန့် ဈေးမြင့်တက်လာခဲ့ပါသည်။

DOCA(ပဲခူး)

         စားသုံးသူရေးရာဦးစီးဌာနအနေဖြင့် ဌာနလုပ်ငန်းများနှင့်အတူ ပြည်တွင်းကုန်သွယ်မှု မြှင့်တင်ရေးလုပ်ငန်းများလည်း ဆောင်ရွက်လျက်ရှိသည့်အပြင် ကုန်ထုတ်လုပ်မှုလုပ်ငန်းများ ပိုမိုဖွံ့ဖြိုး တိုးတက်လာစေရေးအတွက်လည်း လုပ်ငန်းရှင်များနှင့်ပူးပေါင်း ဆောင်ရွက်လျက်ရှိပြီး စက်မှုကုန်ကြမ်း သီးနှံများ ပိုမိုထွက်ရှိလာနိုင်ရေး သက်ဆိုင်ရာဌာနများ၊ တောင်သူများနှင့်လည်း ပူးပေါင်းဆောင်ရွက်လျက်ရှိပါသည်။

          ပြည်ခရိုင်တွင်  ကြံသီးနှံကို ခရိုင်အတွင်းရှိ မြို့နယ်အားလုံးတွင် စိုက်ပျိုးလျက်ရှိရာ ပြည်မြို့ နယ်နှင့် ပေါက်ခေါင်းမြို့နယ်တို့တွင် အများဆုံးစိုက်ပျိုးဖြစ်ထွန်းလျက်ရှိပါသည်။ ယခင်နှစ်က ကြံသီးနှံကို (ခင်းသစ်)(၁၈၈၉၂)ဧက၊ (လမိုင်း) (၇၇၇၈)ဧက စုစုပေါင်း(၂၆၆၇၀)ဧက စိုက်ပျိုးခဲ့ပြီး တန်(၆)သိန်း ကျော်ထွက်ရှိခဲ့ကြောင်း သိရှိရပါသည်။

ကြံသီးနှံစိုက်ပျိုးမှုအခြေအနေ

          ကြံသီးနှံ(ခင်းသစ်) (၂၀၄၉၈)ဧက စိုက်ပျိုးပြီး တစ်ဧက ခန့်မှန်း (၂၅)တန်ထွက်ရှိလျှင် တန်ချိန် (၅)သိန်းကျော်ခန့်၊ (လမိုင်း)(၇၃၄၀)ဧက စိုက်ပျိုးပြီး အထွက်နှုန်းအနေ ဖြင့်(၁၇)တန်ခန့် ထွက်ရှိလျှင် တန်ချိန်(၁)သိန်းကျော်ခန့် စုစုပေါင်း(၂၇၈၃၈) ဧကမှ ပျှမ်းမျှအထွက်နှုန်း (၂၃)တန် ထွက်ရှိလျှင် ကြံတန်ချိန်ပေါင်း (၆၄၀၀၀၀)ကျော်ခန့် ထွက်ရှိနိုင်မည်ဖြစ်ကြောင်း သိရှိရပါသည်။၊

တစ်ဧကစိုက်ပျိုးထုတ်လုပ်မှုကုန်ကျစရိတ်နှင့် အကျိုးအမြတ်အခြေအနေ

           ၂၀၂၂-၂၀၂၃ဘဏ္ဍာနှစ်တွင် ခင်းသစ်တစ်ဧကကုန်ကျစရိတ် ကျပ်(၁၂)သိန်းကျော် ကုန်ကျပြီး လမိုင်း တစ်ဧကလျှင် ကျပ်(၈၄၀၀၀)ကျော် ကုန်ကျပါသည်။ ခင်းသစ်အနေဖြင့် အထွက်နှုန်း(၂၅) တန်ခန့် ထွက်ရှိပါက တစ်ဧကဝင်ငွေ ကျပ်(၁၈)သိန်းကျော်ရရှိပြီး အကျိုးအမြတ်အနေဖြင့် ကျပ်(၆) သိန်းကျော် ရရှိနိုင်ပါသည်။ လမိုင်းအနေဖြင့်အထွက်နှုန်း(၁၇)တန်ခန့်ထွက်ရှိပါက တစ်ဧကဝင်ငွေ ကျပ်(၁၂)ကျော်ရရှိပြီး အကျိုးအမြတ်အနေဖြင့် ကျပ်(၄)သိန်းကျော် ရရှိနိုင်ပါသည်။

ဈေးနှုန်းနှင့်ဈေးကွက်အခြေအနေ

           ပြည်မြို့နယ်၊ နဝဒေးသကြားစက်နှင့် ပေါက်ခေါင်းမြို့နယ် အင်ငါးခွသကြားစက်မှ ကြံတစ်တန်လျှင် စက်အရောက်(၇၅၀၀၀)ကျပ် ဈေးပေးဝယ်ယူလျက်ရှိပြီး တောင်သူများအနေဖြင့် ခုတ်သိမ်းပြီးသော ကြံများကို သကြားစက်များသို့ တိုက်ရိုက်တင်ပို့ရောင်းချလျက်ရှိကြောင်း သိရှိရပါသည်။ အချို့ တောင်သူများအနေဖြင့် တပိုင်တနိုင် ကြံသကာချက်လုပ်၍ ကြံသကာအဖြစ်ရောင်းချခြင်း၊ ကြံ သကာပြုလုပ်သည့် ဖိုများသို့ ရောင်းချခြင်းများဖြင့် ဈေးကွက်ရရှိလျက်ရှိပါသည်။

သကြားစက်များ၏ကြိတ်ခွဲထုတ်လုပ်နိုင်မှုအခြေအနေ

       ပြည်ခရိုင်အတွင်းရှိ ပြည်မြို့နယ်တွင် နဝဒေးသကြားစက်နှင့် ပေါက်ခေါင်းမြို့နယ်တွင် အင်ငါးခွ သကြားစက် စုစုပေါင်း(၂)စက်ရှိပါသည်။ နဝဒေးသကြားစက်မှ ယခုဘဏ္ဍာနှစ်တွင် ကြံ တန်ချိန် (၂၀၀၀၀၀)ခန့် ကြိတ်ခွဲရန်လျာထားပြီး သကြားတန်ချိန်(၂၀၀၀၀)ခန့် ထုတ်လုပ်ရန် လျာထား လျက်ရှိရာမှ ယခုဒီဇင်ဘာလတတိယပတ်ထိ ကြံတန်ချိန် (၃၁၄၀၉.၇၂)ကြိတ်ပြီး၍ သကြားတန်ချိန် (၃၁၄၁)ထွက်ရှိပြီးဖြစ်ပါသည်။ အင်းငါးခွသကြားစက်အနေဖြင့် ကြံတန်ချိန် (၁၅၀၀၀၀)ခန့် ကြိတ်ခွဲ ရန်လျာထားပြီး သကြားတန်ချိန်(၁၅၀၀၀)ခန့် ထုတ်လုပ်ရန် လျာထားရာ ယခုဒီဇင်ဘာလ တတိယ ပတ်ထိ ကြံတန်ချိန် (၁၃၄၉၃.၈၅)ကြိတ်ပြီးသဖြင့် သကြားတန်ချိန် (၁၃၄၉) ထွက်ရှိပြီး ဖြစ်ပါသည်။ စက်ရုံများမှ သကြားတစ်ပိဿာလျှင် ၂၁၀၀ ကျပ်ဖြင့် ထုတ်လုပ်ရောင်းချလျက်ရှိပါသည်။

          ပြည်ဈေးကွက်တွင် ယခင်က သကြားတစ်ပိဿာလျှင် လက်လီဈေး ၂၃၀၀ ကျပ်၊ လက်ကား ဈေး (၂၂၀၀)ကျပ်ဈေးရှိပြီး ယခု ကြံရာသီခုတ်သိမ်းကာလအချိန်တွင် လက်လီဈေး၂၈၀၀ကျပ်၊ လက်ကားဈေး ၂၄၀၀ ကျပ်ထိဈေးမြင့်လာကြောင်း တွေ့ရှိရပါသည်။ သကြားဈေးကောင်းနေသောကြောင့် စက်ရုံများအနေဖြင့် ကြံစိုက်တောင်သူများအား ယခင်နှစ်ထက် ဈေးကောင်းပေးဝယ်ယူခဲ့သည့်အတွက် တောင်သူများအနေဖြင့်လည်း အကျိုးအမြတ်များ ပိုမိုရရှိကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး ၊ ပြည်ခရိုင် ၊ ပြည်မြို့နယ်တွင် ပွင့်လင်းရာသီဖြစ်သည့်အတွက် အကျိုးအမြတ်ဖြစ်ထွန်းလျက်ရှိသော ဒိန်ချဉ်လုပ်ငန်းမှာ အရောင်းအဝယ်ကောင်းမွန်လျက်ရှိပါသည် ။

        ပြည်မြို့ ၊ နဝဒေးရပ်ကွက် ၊ နီလာလမ်းတွင် ထုတ်လုပ်သော ဒိန်ချဉ်မှာ ပြည်မြို့အနီးတဝိုက်တွင် ရောင်းအားကောင်းလျက်ရှိကြောင်း သိရှိရပါသည်။ ဒိန်ချဉ်ပြုလုပ်ရာတွင် အသုံးပြုရသော ကုန်ကြမ်းမှာ နွားနို့နှင့်သကြား ကုန်ကြမ်းကို ဒေသတွင်း နွားမွေးမြူရေးခြံများမှလည်း ဝယ်ယူသလို ကိုယ်ပိုင်မွေးမြူရေးခြံများမှလည်း ရရှိကြောင်း သိရှိရပါသည်။ လုပ်သားအရေအတွက် ၁၀ ဦးခန့်ဖြင့် လုပ်ငန်းလည်ပတ်လျက်ရှိကြောင်း သိရှိရပါသည်။ ဒိန်ချဉ်ထုတ်လုပ်ရာတွင် ကုန်ကျစရိတ်အနေဖြင့် နွားနို့တစ်ပိဿာလျှင် ဒိန်ချဉ် ၄ ဘူးထွက်ရှိပြီး နွားနို့ တစ်ပိဿာလျှင် ၁၆၀၀ကျပ် ၊ သကြား၂၅ ကျပ်သားလျှင် ၅၀၀ကျပ် ၊ ဘူးဖိုး တစ်ဘူးလျှင် ၁၅၀ ကျပ် ကုန်ကျပြီး လေးဘူးကုန်ကျငွေ ၆၀၀ ကျပ် ၊ အထွေထွေ ကုန်ကျငွေ ၆၅၀ ကျပ်ကုန်ကျသည့်အတွက် နွားနို့တစ်ပိဿာလျှင် စုစုပေါင်းကုန်ကျငွေ ၃၄၅၀ ကျပ်ဖြစ်ကြောင်း သိရှိရပါသည်။ တစ်ရက်လျှင် လုပ်သားတစ်ရက်ပေးချေရမှုမှာ ၅၀၀၀ကျပ်ဖြစ်ကြောင်း သိရှိရပြီး တစ်နေ့လျှင် နွားနို့ပိဿာ ၁၀၀ ၊ ဒိန်ချဉ်ဘူး (၀.၃၅) လီတာဘူး ၄၀၀ ထွက်ရှိကြောင်း သိရှိရပါသည်။ ဒိန်ချဉ်ဘူးများကို ရန်ကုန်တိုင်း ၊ မကွေးတိုင်း ၊ မော်လမြိုင် ၊ မြဝတီနှင့် ‌‌ဒေသတွင်း မြို့နယ်များသို့ ဖြန့်ဖြူးရောင်းချလျက်ရှိကြောင်း သိရှိရပါသည်။

DOCA(ပဲခူး)

      ပဲခူးတိုင်းဒေသကြီးသည် ဒေသထုတ်ကုန်များ ပေါများသည့် တိုင်းတစ်တိုင်းဖြစ်သည်နှင့်အညီ ဈေးကွက်ရောင်းဝယ်ဖောက်ကားမှုအရလည်း လမ်းပမ်းဆက်သွယ်ရေး ကောင်းမွန်သော တိုင်းတစ်တိုင်း ဖြစ်ပါသည် ။ ညောင်လေးပင်ခရိုင် ၊ ရွှေကျင်မြို့နယ်တွင် သဘာဝသစ်သီးကို အခြေခံကာ ဒေသထုတ်ကုန်တစ်ခုအဖြစ် ‌‌‌ရှောက်ပြားရည်ကို   ထုတ်လုပ်ရောင်းချလျက်ရှိကြောင်း သိရှိရပါသည် ။

     သဘာဝ‌ရှောက်သီးကို အခြေခံ၍ ထုတ်လုပ်သော ရှောက်ပြားရည်သည် ရှောက်သီး ၊ သကြား ၊ ပျားရည်တို့ကို ကုန်ကြမ်းအဖြစ်အသုံးပြုကာ ထုတ်လုပ်ရပြီး ကုန်ကြမ်းကို ဒေသတွင်းနှင့် မွန်ပြည်နယ် ၊ ဘီးလင်းမြို့တို့မှ ရရှိကြောင်း သိရှိရပါသည် ။   လုပ်သားအရေအတွက် (၃၀)ဦးခန့်ဖြင့် လက်ရှိတွင် လုပ်ငန်းလုပ်ကိုင်လျက်ရှိကြောင်း သိရှိရပါသည်။ တစ်ရက်လုပ်သားခအနေဖြင့် လုပ်သားတစ်ဦးလျှင် (၇၀၀ဝိ-/) ကျပ်ခန့် ပေးချေရကြောင်း သိရှိရပါသည်။ ထုတ်လုပ်မှု ပမာဏအားဖြင့် တစ်နှစ်လျှင် ‌ရှောက်ချဉ်ရည် ပုလင်း နှစ်သိန်းခန့် ၊ ‌ရှောက်ပျားရည် ပုလင်း ၅၀၀၀ခန့် ၊ ‌‌‌ရှောက်သီးဆေးပြား တစ်နှစ်လျှင် ပိဿာချိန် (၇၀၀၀)ခန့် ထုတ်လုပ်ရောင်းချလျက်ရှိကြောင်း သိရှိရပါသည် ။ ရှောက်ပျားရည် တစ်ပုလင်းလျှင် ၂၀၀ဝိ-/ ကျပ်ဖြင့် ရန်ကုန် ၊ ပဲခူး ၊ မန္တလေး ၊ နေပြည်တော် ( ပျဉ်းမနား) သို့ ဈေးကွက် ဖြန့်ဖြူးရောင်းချလျက်ရှိကြောင်း သိရှိရပါသည်။

DOCA(ပဲခူး)

      ကယားပြည်နယ်၊ လွိုင်ကော်မြို့တွင် စက်သုံးဆီအရောင်းဆိုင်(၁၄)ဆိုင်ဖွင့်လှစ်ရောင်းချလျက်ရှိပြီး ယခုဒီဇင်ဘာလစတုတ္ထပတ်အတွင်း ဒီဇယ်(ရိုးရိုး)တစ်လီတာလျှင် (၂၄၁၀/-) ကျပ်၊ ဒီဇယ်(ပရီမီယမ်) တစ်လီတာလျှင် (၂၄၉၀/-) ကျပ်၊ ဓာတ်ဆီ(92)တစ်လီတာလျှင်(၁၉၆၅/-) ကျပ်နှင့် ဓာတ်ဆီ (95) တစ်လီတာလျှင် (၂၁၃၅/-) ကျပ်တို့ဖြင့်ရောင်းချလျက်ရှိပြီး ယခင်အပတ်နှင့်နှိုင်းယှဉ်ကြည့်လျှင် ဒီဇယ် (ရိုးရိုး) တစ်လီတာလျှင် (၃၀) ကျပ်၊ ဒီဇယ်(ပရီမီယမ်) တစ်လီတာလျှင် (၃၀) ကျပ်တို့ဖြင့်ဈေးနှုန်း ကျဆင်းလျက်ရှိပြီး ဓါတ်ဆီ (92)တစ်လီတာလျှင်(၉၀) ကျပ် ၊ဓါတ်ဆီ (95) တစ်လီတာလျှင် (၅)ကျပ်တို့ဖြင့် ဈေးနှုန်းမြှင့်တက်လျက်ရှိကြောင်း စက်သုံးဆီအရောင်းဆိုင်မှ သိရှိရပါသည်။

DOCA(ကယား)