ပြည်တွင်းကုန်သွယ်မှုသတင်း

       မိတ္ထီလာခရိုင်အတွင်း စိုက်ပျိုးထုတ်လုပ်သော သီးနှံများအနေဖြင့် မနောသုခစပါးကို ဒေသတွင်း စားသုံးမှုများသောကြောင့် စျေးကောင်းရရှိရာ ယခုနှစ် မိုးစပါးပေါ်ချိန်တွင် စတင်ထွက်ရှိချိန် ဖြစ်၍ မိုးစပါး (မနောသုခ) တင်း ၁၀၀ လျှင် ၁၂၀၀၀၀၀ိ/- နှင့် အထက်ရှိကြောင်း၊ ဒေသတွင်းစိုက်ပျိုးသော သီးနှံများဖြစ်သည့် ပဲစဉ်းငုံကို ရိတ်သိမ်းနေရာ တစ်တင်းလျှင် ၅၃၅၀၀ိ/- ကျပ်ဖြင့်လည်းကောင်း၊ ထောပတ်ပဲမှာ ၆၀၀၀၀ိ/- ကျပ်ဖြင့်လည်းကောင်း၊ စျေးကောင်းရလျှက်ရှိပြီး၊ နေကြာသီးနှံအနေဖြင့် ယခင်က စိုက်ပျိုးမှုနည်းခဲ့သော်လည်း ယခုနှစ် စားသုံးဆီစျေးနှုန်းများ မြင့်တက်ခဲ့ခြင်းကြောင့် ဆီထွက် သီးနှံဖြစ်သည့် နေကြာကို ပိုမိုတိုးချဲ့စိုက်ပျိုးခဲ့ကြောင်း တောင်သူများထံမှ သိရှိရပြီး၊ မိုးနေကြာကို သြဂုတ်၊ စက်တင်ဘာလများတွင် စတင်စိုက်ပျိုးခဲ့ပြီး၊ ဒီဇင်ဘာလဆန်းတွင် စတင်ရိတ်သိမ်းရာ တောင်သူရောင်းစျေး တစ်ပိဿာလျှင် ၃၉၀၀ိ/- ရှိကြောင်း သိရသည်။ နေကြာသီးနှံမှာ စျေးကောင်းရသဖြင့် ဆောင်းသီးနှံအဖြစ် နေကြာကို တိုးချဲ့စိုက်ပျိုးနေပါကြောင်း တောင်သူများထံမှ သိရသည်။

DOCA(မန္တလေး)

       ရှမ်းပြည်နယ် (အရှေ့ပိုင်း)၊ ကျိုင်းတုံမြို့နယ်တွင် ဒေသထွက် ပန်းဂေါ်ဖီထုပ်ကို ရာသီပေါ် သီးနှံအဖြစ် စပါးများရိတ်သိမ်းပြီးချိန်၌ မြေပြန့်လွင်ပြင်များတွင် နွေ၊ မိုး၊ ဆောင်း ရာသီမရွေး စိုက်ပျိုးနိုင်သော်လည်း ဆောင်းရာသီ၌သာ အများဆုံးစိုက်ပျိုးကြပါသည်။ မြေပြန့်ဒေသများဖြစ်သော ယန်းလော၊ ကတ်ထိုက်၊ လွယ်လုံ၊ မိုင်းလတ်၊ မိုင်းဇင်း ကျေးရွာအုပ်စုတို့တွင် တစ်ပိုင်တစ်နိုင် စိုက်ပျိုးဖြစ်ထွန်းလျက်ရှိသည့် အခြေအနေများကို စိုက်ပျိုးသည့်တောင်သူကြီးများထံမှ မေးမြန်းခဲ့ပါသည်။

         ပန်းဂေါ်ဖီထုပ်မျိုးစေ့များကို EAST WEST SEED (ဒေသအခေါ် မြှားနီ)အမှတ်တံဆိပ် (10g) တစ်ထုပ်လျှင် ကျပ် (၁၅၀၀၀)ဈေးရှိပြီး၊ (၅)ထုပ်လျှင် ကျပ် (၇၅၀၀၀)ဖြင့် ဝယ်ယူ၍ တစ်လကြာမြင့်သည်အထိ ပျိုးထောင်ရပါသည်။ ပျိုးထောင်ချိန်တွင် ပန်းဂေါ်ဖီထုပ်စိုက်ပျိုးမည့်မြေနေရာကို မြေပြုပြင်ခြင်းဆောင်ရွက်ရာတွင် လုပ်အားခအနေဖြင့် တစ်ဧကလျှင် ကုန်ကျငွေစုစုပေါင်း ကျပ်(၃)သိန်း ကျော်ခန့်ပေးရပါသည်။ ပန်းဂေါ်ဖီထုပ်၏ တစ်ဧကစိုက်ပျိုးရန်အတွက် အဓိကလိုအပ်သောသွင်း အားစုများမှာ သဘာဝမြေဆွေး (၈၀)အိတ်လျှင် ကျပ်(၁)သိန်းကျော်ခန့်၊ ကြက်ချေး (၈)အိတ်လျှင် ကျပ်(၄)သောင်းခန့်၊ နွားချေး (၅၀)အိတ်လျှင် ကျပ် (၁)သိန်းကျော်၊ MPK ကွန်ပေါင်း (၁၅ပတ်လည်) နှစ်အိတ်လျှင် ကျပ်(၂)သိန်းကျော်ခန့်ဈေးရှိပြီး၊ ပိုးသတ်ဆေး(၂)ဘူးလျှင် ကျပ်(၂)သောင်းကျော်ခန့်၊ အပင်အားတိုးဆေး (၂)ဘူးလျှင် ကျပ်(၂)သောင်းခန့်တို့ဖြစ်ကြပါသည်။

          ပန်းဂေါ်ဖီထုပ်အပင်များ ကြီးထွားရန်အတွက် ရေလုံလောက်စွာရရှိရန် လိုအပ်ကြောင်းနှင့် ပျိုးသက်တမ်း တစ်လကြာပြီးနောက် ပျိုးပင်ပေါက်များကို မြေပြုပြင်ထားသည့်နေရာတွင် ပေခြား တန်းခြား (၂)ပေပတ်လည်၌ တစ်ပင်နှုန်းစိုက်ပျိုးပါသည်။ တစ်ဧကလျှင် အပင်စုစုပေါင်း တစ်သောင်းကျော်ခန့်စိုက်ပျိုး၍ အပင်စိုက်ခလျှင် ကျပ် (၁)သိန်းနှင့် ပေါင်းရှင်းခလျှင် ကျပ် (၁)သိန်းကုန်ကျပါသည်။ အချိန်ကာလ နှစ်လအကြာ၌ ပန်းဂေါ်ဖီထုပ်ခူးဆွတ်ချိန်တွင် ရိတ်သိမ်းခလျှင် ကျပ် (၁)သိန်းကုန်ကျပါသည်။ ခူးဆွတ်ပြီး ပန်းဂေါ်ဖီထုပ်များကို ကျိုင်းတုံမြို့၊ မြို့မဈေး၌ အရွယ်အစားအပေါ်မူတည်၍ လက်ကား ဈေးတစ်လုံးလျှင် ကျပ် (၄၀၀) မှ ကျပ် (၆၀၀) ထိရရှိပြီး လက်လီဈေးတစ်လုံးမှာ ကျပ် (၁၀၀၀)မှ ကျပ် (၁၅၀၀)အထိ ပေးဝယ်ရကြောင်းသိရှိရပါသည်။ ပန်းဂေါ်ဖီထုပ်စိုက်ပျိုးသောတစ်ဧကစုစု ပေါင်းကုန်ကျစရိတ်မှာ ကျပ် (၁၂)သိန်းကျော်ခန့်ဖြစ်ပြီး တစ်ဧကအထွက်နှုန်းမှာ အလုံးအရေအတွက် (၈၀၀၀)လုံးခန့်ထွက်ရှိပါသည်။ ရောင်းရငွေမှာ လက်ကားအနိမ့်ဆုံးဈေးဖြင့်တွက်လျှင် ကျပ်(၃၂)သိန်း ခန့်ရရှိ၍ တစ်ဧကအကျိုးအမြတ်မှာ ကျပ်(၁၉)သိန်းခန့်ရရှိပါသည်။

       ပန်းဂေါ်ဖီထုပ်စိုက်ပျိုးသည့်တောင်သူကြီးများသည် ပန်းဂေါ်ဖီထုပ်စိုက်ပျိုးခြင်းဖြင့် အရင်းအနှီးနည်း၍ အလုပ်မရှုပ်စေပဲ အမြတ်အစွန်းများများရရှိသောကြောင့် ပန်းဂေါ်ဖီထုပ်များကို ဒေသအတွင်း ဈေးနှုန်းချိုသာစွာဖြင့် စားသုံးမှုဖူလုံစေရန် တိုးချဲ့စိုက်ပျိုးလုပ်ကိုင်သင့်ကြောင်း အကြံပြုရေးသားလိုက်ရပါသည်။

DOCA(ရှမ်း)

            မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်၊ ရွှေဘုံသာကျေးရွာအုပ်စု၊ သာစည်ကျေးရွာ တွင် ထန်းပင်မြစ်စိုက်ပျိုးရောင်းချခြင်းဖြင့် မိသားစုစီးပွားရေးအဆင်ပြေလျက်ရှိကြောင်း၊ တောင်သူ များသည် လယ်ယာလုပ်ငန်းကို အဓိကလုပ်ကိုင်ကြပြီးအပိုဝင်ငွေရရှိစေရန် ထန်းပင်မြစ် စိုက်ပျိုးခြင်းကို လည်း တစ်ဖက်တစ်လမ်းမှလုပ်ကိုင်ကြကြောင်း သိရှိရပါသည်။

            သာစည်ကျေးရွာရှိ တောင်သူများသည် ထန်းသီးမှည့်ချိန်ဖြစ်သည့် ဝါဆို၊ ဝါခေါင်လများတွင် ထန်းသီးမှည့်များအားကောက်ယူစုဆောင်းပြီး၊ တောင်သူ(၁)ဦးလျှင် အလျား (၁၀)ပေ၊ အနံ(၅)ပေနှင့် အမြင့် (၁)ပေရှိသော မြေကျဥ်းတူးကာရရှိလာသော ထန်းသီးမှည့်များကိုထည့်ထားပြီး နောင်အချိန် တွင် တူးဖော်ရာ၌လွယ်ကူစေရန် သဲမြေများဖြင့် ဖုံးအုပ်ထားကြောင်းသိရပါသည်။ ထန်းပင်မြစ် အချောင်း ရေ(၁၀၀၀)ခန့် ထွက်ရှိရန် ထန်းသီးမှည့်အလုံးရေ(၇၀၀)ခန့် မြေကျဉ်းထဲသို့ထည့်ပြီး စိုက်ပျိုးကြ ကြောင်း၊ သုံးလကျော်လေးလလယ်တွင်  စတင်တူးဖော်ရာ ထန်းပင်မြစ်(၈၀၀)ခန့်ရရှိပါကြောင်း၊ ရောင်းချ ရာတွင် အချောင်းရေ(၂၀)ပါ (၁)စည်းလျှင် ယခင်နှစ်က ကျပ်(၇၀၀-၈၀၀)သာ ရောင်းချခဲ့ရပြီး၊ ယခုနှစ်တွင် အကောင်းဆုံး(၁)စည်းလျှင် ကျပ်(၁၅၀၀)ရရှိကာ ပျမ်းမျှ(၁)စည်းလျှင် ကျပ်(၁၀၀၀)ခန့်ဖြင့် ရောင်းချ ရသည့်အတွက် ထန်းပင်မြစ်စိုက်ပျိုးသော မြေကျဉ်း(၁)ကျဉ်းလျှင် အပိုဝင်ငွေ ကျပ်(၄၀၀၀၀)ခန့်ရရှိ ကြောင်းသိရှိရ ပါသည်။

            စလင်းမြို့နယ်မှထွက်ရှိသည့် ရာသီပေါ်အညာဒေသထွက်ထန်းပင်မြစ်များအား ဒေသတွင်း စားသုံးသူပြည်သူများမှ ဝယ်ယူစားသုံးကြပြီး၊ နီးစပ်ရာမြို့များနှင့် ကျေးရွာများသို့ဖြန့်ဖြူးရောင်းချလျက် ရှိကြောင်း ထန်းပင်မြစ်စိုက်ပျိုးရောင်းချသည့်တောင်သူ ဒေါ်မိုးမိုးမြင့်ထံမှ သိရှိရပါသည်။

DOCA(မကွေး)

          မင်းဘူးမြို့မဈေး၌ ရောင်းချလျက်ရှိသော ရေထွက်ပစ္စည်းများမှာ ဒီဇင်ဘာလ တတိယပတ် တွင် ငါးတံခွန်ခြောက်(1)ပိဿာလျှင် ကျပ်(9000 မှ 12000) ၊ ငါးသေတ္တာခြောက် (၁)ပိဿာလျှင် ကျပ်(10000 မှ 11000)၊ အာဗြဲခြောက် အကြီး၊ အလတ်၊ အသေး (၁)ပိဿာလျှင် ကျပ် (29000/ 27000/22000) ဖြစ်ကြောင်း၊ ငါးနီတူး(1)ပိဿာလျှင် ကျပ်(10000 မှ 12000)၊ ပုဇွန်ခြောက် (1) ပိဿာလျှင် ကျပ်(35000 မှ 60000)ထိ ရှိကြောင်း၊ ပုဇွန်ခြောက်သည် ဆားအပေါ့အငန်ပေါ် မူတည်၍ ဈေးနှုန်းကွာခြားရခြင်းဖြစ်ကြောင်း သိရှိရပါသည်။

           ပုဇွန်ခြောက်များကို ရခိုင်ပြည်မှ လည်းကောင်း၊ ငါးခြောက်များကို ရန်ကုန် (ဘုရင့်နောင်ပွဲရုံ) နှင့် ရခိုင်ပြည်နယ်တို့မှလည်းကောင်း ဝယ်ယူရောင်းချလျက်ရှိကြောင်း ငါးခြောက်ဈေးမှာ ယခင်နှစ်က ထက် (၁)ပိဿာ ကျပ်(၈၀၀၀ မှ ၁၅၀၀၀)ထိ ဈေးနှုန်းမြင့်တက်လျက်ရှိကြောင်း သိရှိရပါသည်။

DOCA(မကွေး)

             တောင်ငူခရိုင်၊ အုတ်တွင်းမြို့နယ်၌ နွေစပါးစိုက်တောင်သူများ စိုက်ပျိုးရေရရှိရေးနှင့် နွေစပါးအထွက်နှုန်းတိုးစေရေးအတွက် ဒီဇင်ဘာလ ၁၅ ရက်နေ့မှစ၍ ခပေါင်းဆည်မှ ရေများစတင် လွှတ်ပေးလျက်ရှိပါသည်။

            အုတ်တွင်းမြို့နယ်အနေဖြင့် ၂၀၂၁-၂၀၂၂ ဘဏ္ဍာနှစ်တွင် နွေစပါး ၂၈၆၆၂ ဧက စိုက်ပျိုး နိုင်ခဲ့ပြီး ယခု ၂၀၂၂-၂၀၂၃ ဘဏ္ဍာနှစ်တွင် နွေစပါး ၂၉၁၂၁ ဧက စိုက်ပျိုးနိုင်ရန်အတွက်  လျာထား ဆောင်ရွက်လျက်ရှိပါသည်။ လျာထားချက်အတိုင်း စိုက်ပျိုးနိုင်ပါက အုတ်တွင်းမြို့နယ်တွင် နွေစပါး တင်း ၂၃ သိန်းခန့် ထွက်ရှိနိုင်မည် ဖြစ်ပါသည်။

             နွေစပါးစိုက်လယ်မြေများသို့ ဆည်ရေအပြည့်အဝရရှိရေးအတွက် ဆည်မှရေများစတင် လွှတ်ပေးမှုအခြေအနေနှင့် ရေဝေမြောင်းများသို့ ရေများရောက်ရှိစေရေးတို့ကို ဆည်မြောင်းနှင့်ရေ အသုံးချမှုစီမံခန့်ခွဲရေးဦးစီးဌာနနှင့် ပူးပေါင်းဆောင်ရွက်ခဲ့ကြောင်း အုတ်တွင်းမြို့နယ် စိုက်ပျိုးရေး ဦးစီးဌာန၏ ပြောကြားချက်အရ သိရှိရပါသည်။

DOCA(ပဲခူး)