HighLight News

             စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေး အသိပညာပေးဟောပြောပွဲများ၊  စီးပွားရေးလုပ်ငန်းရှင်များအားတွေ့ဆုံပြီး ဥပဒေ၊ အမိန့်နှင့်ညွှန်ကြားချက်များအား ရှင်းလင်းဆွေးနွေးခြင်းနှင့် ကုန်အညွှန်းအမှတ်အသား များပြည့်စုံစွာထည့်သွင်းဖော်ပြရေးအတွက် တွေ့ဆုံဆွေးနွေးခြင်းများကို လစဉ်ဆောင်ရွက်လျက်ရှိရာ (၁၂.၁၂.၂၀၂၄)ရက်နေ့၊  နံနက်(၁၀:၃၀)နာရီအချိန်တွင် ရွှေဘိုခရိုင်စားသုံးသူရေးရာဦးစီးဌာနမှ ဒု-ခရိုင် ဦးစီးမှူးနှင့် စားသုံးသူရေးရာဌာနခွဲတာဝန်ခံတို့သည် ရွှေဘိုမြို့၊ အမှတ်(၃)ရပ်ကွက်ရှိ ဧဒင်စားသောက်ဆိုင် နှင့်ပေါင်မုန့်၊ ကိတ်မုန့်လုပ်ငန်းရှင်အား တွေ့ဆုံဆွေးနွေးခဲ့ပါသည်။

           ထိုသို့တွေ့ဆုံရာတွင် ရွှေဘိုခရိုင်စားသုံးသူရေးရာဦးစီးဌာနမှ ဒု-ခရိုင်ဦးစီးမှူးမှ ဌာနမှဆောင်ရွက်လျက်ရှိသော လုပ်ငန်းများအကြောင်း၊ စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းအကြောင်းများ၊ အသင့်စားမုန့်အမျိုးမျိုးတွင်ပါဝင်ရမည့် ကုန်အညွှန်းအမှတ်အသားအကြောင်း၊ စားသုံးသူများသာမက စီးပွားရေးလုပ်ငန်းရှင်များအနေဖြင့် ဌာနမှဆောင်ရွက်နေသော လုပ်ငန်းများကိုသိရှိလိုပါက ရုံးဖွင့်ရက်ရုံးချိန်အတွင်း Consumer Call Center No 1535သို့ ဆက်သွယ်မေးမြန်းနိုင်သည့်အကြောင်းများ၊ အွန်လိုင်းစနစ်ဖြင့်ရောင်းချခြင်း မှတ်ပုံတင်လက်မှတ်လျှောက်ထားခြင်းနှင့် ပတ်သက်၍ သိကောင်းစရာများ အသိပညာပေးဆွေးနွေးခဲ့ပြီး စားသုံးသူကာကွယ်ရေး အသိပညာပေး လက်ကမ်းစာစောင်များ ဖြန့်ဝေခဲ့ကြောင်းသတင်းရရှိပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊ မြန်အောင်မြို့နယ်ဦးစီးမှူးသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အခြေခံပညာဦးစီးဌာန၊ မြို့နယ်စီမံအုပ်ချုပ်ရေးအဖွဲ့၊ လူမှုဝန်ထမ်းဦးစီးဌာန၊ မြန်မာနိုင်ငံရဲတပ်ဖွဲ့ဝင်များနှင့် အတူပူးပေါင်း၍(၁၁.၁၂.၂၀၂၄)နေ့ နံနက်(၁၀:၀၀)နာရီအချိန်တွင် မြန်အောင်မြို့၊ အုတ်ရှစ်ကုန်းကျေးရွာရှိ အခြေခံပညာအထက်တန်းကျောင်း(ခွဲ)ရှိ အနော်ရထာခန်းမတွင် ဆရာ၊ ဆရာမနှင့် ကျောင်းသား၊ ကျောင်းသူ ၂၀၀ ဦးအား  စာဖတ်ရှိန်မြှင့်တင်ရေးလူငယ်စကားဝိုင်းနှင့် လူငယ်အသိပညာပေးဟောပြောပွဲကို ဆောင်ရွက်ခဲ့ကြောင်းသိရသည်။

          အဆိုပါဟောပြောပွဲတွင် မြို့နယ်စီမံအုပ်ချုပ်ရေးအဖွဲ့ဝင်မှ အဖွင့်အမှာစကားပြောကြားပြီး၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မြို့နယ်ဦးစီးမှူးက လူငယ်စကားဝိုင်းကျင်းပရခြင်း၏ရည်ရွယ်ချက်များ၊ စားသုံးသူရေးရာဦးစီးဌာန မြို့နယ်ဦးစီးမှူးဦးမြင့်အောင်မှ အစားအသောက်များတွင်ပါဝင်သော ဓါတုဆိုးဆေး၏ ဆိုးကျိုးများအကြောင်း၊ မြန်မာဘာသာဖြင့် ကုန်အညွှန်းဖော်ပြထားခြင်းမရှိသော အစားအသောက်များနှင့် လူသုံးကုန်ပစ္စည်းများဝယ်ယူအသုံးပြုရာတွင် သတိပြုလိုက်နာဆောင်ရွက်ရမည့်အချက်များ၊ လူမှုဝန်ထမ်းဦးစီးဌာနမှ မြို့နယ်ဦးစီးအရာရှိမှ ကလေးသူငယ်အသိပညာပေးဟောပြောခြင်း၊ မြန်မာနိုင်ငံရဲတပ်ဖွဲ့မှ မှုခင်းကျဆင်းရေးနှင့် သက်ငယ်မုဒိန်းအသိပညာပေးခြင်းများ ဟောပြောခဲ့ပြီး ကျောင်းအုပ်ဆရာမကြီးမှ ကျေးဇူးတင်စကားများ ပြန်လည်ပြောကြားကာ  နေ့လယ် (၁၂:၀၀) နာရီအချိန်တွင် ဟောပြောပွဲကိုရုတ်သိမ်းခဲ့ကြောင်း သိရှိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ်ဦးစီးမှူးသည် ၂၀၂၄ ခုနှစ်  ဒီဇင်ဘာလ(၁၁)ရက်နေ့ နေ့လယ်(၁၃:၀၀)နာရီအချိန်တွင် ဇလွန်မြို့၊ ဖတ်သောင်ကျေးရွာရှိ ဓမ္မာရုံ၌ စားသုံးသူပြည်သူများအား စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့ကြောင်းသိရသည်။

           ဟောပြောပွဲတွင် စားသုံးသူ‌‌‌ရေးရာဦးစီးဌာန မြို့နယ်ဦးစီးမှူးမှ  စားသုံးသူကာကွယ်ရေးဥပဒေများအကြောင်း၊  စားသုံးကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များအကြောင်း၊ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ သိကောင်းစရာများအကြောင်း၊ ကုန်စည် (သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့်နစ်နာဆုံးရှုံးမှုများနှင့် စပ်လျဉ်း၍ ကုစားခွင့်ရရှိခြင်းများအကြောင်း၊ ပြစ်မှုနှင့်ပြစ်ဒဏ်များအကြောင်း၊ ဈေးကွက်အတွင်းရောင်းချနေသော ကုန်ပစ္စည်းများကို ရွေးချယ်ဝယ်ယူအသုံးပြုတတ်စေရန် အသိပညာပေးခြင်းများ၊ စားသုံးသူမိဘပြည်သူများအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်း၊ စသည့်တို့ကို အသိပညာပေးဟောပြောခဲ့ပြီး တက်ရောက်လာသူများမှလည်း သိလိုသည်များကိုမေးမြန်း၍ စားသုံးသူကာကွယ်ရေး လက်ကမ်းစာစောင်များကို ဖြန့်ဝေပေးခဲ့ကြကြောင်းသိရှိရပါသည်။

DOCA(ဧရာဝတီ)

           စားသုံးသူရေးရာဦးစီးဌာန၊ ပဲခူးတိုင်းဒေသကြီးအတွင်း ပြည်ခရိုင်ရှိ မြို့နယ်များဖြစ်သော ပေါက်ခေါင်းမြို့နယ်တွင် (၅.၁၁.၂၀၂၄)နေ့၌ စားသုံးသူရေးရာဦးစီးဌာန၊ မြို့နယ်တာဝန်ခံရုံးတွင် ပေါက်ခေါင်းမြို့ပေါ်ရှိ ကုန်မျိုးစုံရောင်းချသည့် စတိုးဆိုင်လုပ်ငန်းရှင်များအားလည်းကောင်း၊ ပြည်မြို့နယ်တွင် (၁၂.၁၁.၂၀၂၄)နေ့၌ နဝဒေးရပ်ကွက်အုပ်ချုပ်ရေးမှူးရုံးတွင် နဝဒေးစက်မှုဇုန် ရှိလုပ်ငန်းရှင်များ အားလည်းကောင်း၊ ရွှေ‌တောင်မြို့နယ်တွင် (၁၉.၁၁.၂၀၂၄)နေ့၌ စားသုံးသူရေးရာ ဦးစီးဌာန၊ မြို့နယ်တာဝန်ခံရုံးတွင် ရွှေ‌တောင်မြို့ပေါ်ရှိ Onlineစနစ်ဖြင့် ရောင်းချသည့် လုပ်ငန်းရှင်များအားလည်းကောင်း၊ ပန်းတောင်းမြို့နယ်တွင် (၂၇.၁၁.၂၀၂၄)နေ့၌ မင်းရပ်ရပ်ကွက်ရှိ Online စနစ်ဖြင့်ရောင်းချသည့် လုပ်ငန်းရှင်များအားလည်းကောင်း မြို့နယ်အသီးသီးတွင် တွေ့ဆုံ၍ မြို့နယ်တာဝန်ခံနှင့်ဝန်ထမ်းများသည် အဆိုပါလုပ်ငန်းရှင်များအား Online စနစ်ဖြင့်ရောင်းချခြင်း လုပ်ငန်းကို မှတ်ပုံတင်လက်မှတ် လျှောက်ထားရရှိပြီးမှ လုပ်ကိုင်ရမည်ဖြစ်ပြီး မှတ်ပုံတင်လက်မှတ် မရှိဘဲ ဆောင်ရွက်ကြောင်းတွေ့ရှိပါက အရေးကြီးကုန်စည်နှင့် ဝန်ဆောင်မှု ဥပဒေအရ အရေးယူခြင်း ခံရမည်ဖြစ်ကြောင်း၊ Online စနစ်ဖြင့်ရောင်းချခြင်းလုပ်ငန်းမှတ်ပုံတင်ကို Online ဖြင့် ကုန်သွယ်ရေးဦးစီးဌာနသို့လျှောက်ထားရမည်ဖြစ်ကြောင်း၊ စားသုံးသူရေးရာဦးစီးဌာနအနေ ဖြင့် အဆိုပါ မှတ်ပုံတင်ပါဖော်ပြပါ အချက်အလက်များနှင့် မြေပြင်အချက်အလက်များ မှန်ကန်ခြင်းရှိ/မရှိ ဆောင်ရွက်ရမည့်အကြောင်း၊ Online စနစ်ဖြင့်ရောင်းချခြင်းလုပ်ငန်း မှတ်ပုံတင်ခြင်း ဆိုင်ရာ အမိန့်အရ မှတ်ပုံတင်လက်မှတ်လျှောက်ထားခြင်းဆိုင်ရာ အကြောင်းအရာများ၊ မှတ်ပုံတင် လက်မှတ်ရရှိသူ၏ အခွင့် အရေးနှင့်တာဝန်များအကြောင်း၊ အဆိုပါလိုက်နာရမည့် တာဝန်တစ်ရပ်ရပ်ကိုဖောက်ဖျက်ကြောင်းတွေ့ရှိပါက သက်ဆိုင်ရာမှတ်ပုံတင်လက်မှတ်ကို ကာလအကန့်အသတ်ဖြင့်ဆိုင်းငံ့ခြင်းနှင့် မှတ်ပုံတင်လက်မှတ်ပယ်ဖျက်ခြင်းတို့ကို အရေးယူဆောင်ရွက်မည်ဖြစ်ကြောင်း စသည့်အချက်များကို အသိပညာပေးဆွေးနွေးပြောကြားခဲ့ကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ် မဲတောအုပ်စု၊ ရှင်ညိုကျေးရွာရှိ အ.မ.က ရှင်ညိုကျောင်းတွင် (၁၂.၁၂.၂၀၂၄)ရက်နေ့ နံနက်(၀၉:၀၀)နာရီအချိန်မှ (၁၁:၀၀)နာရီအချိန်အထိ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများသည် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့နှင့် ပူးပေါင်း၍ စားသုံးသူအသိပညာပေး ဟောပြောပွဲကျင်းပ ဆောင်ရွက်ခဲ့ပါသည်။

          ထိုသို့ စားသုံးသူအသိပညာပေးဟောပြောပွဲတွင် စားသုံးသူရေးရာဦးစီးဌာန၊ ရွှေတောင်မြို့နယ်တာဝန်ခံရုံးမှ ဒု-ဦးစီးမှူး ဒေါ်ဇင်မာချောစုကြည်မှ ကုန်အညွှန်းအမှတ်အသား (၈)ချက်ကိုလည်းကောင်း၊ ကျောင်းသား/ ကျောင်းသူများ မုန့်မျိုးစုံနှင့် ကုန်ပစ္စည်းများဝယ်ယူသုံးစွဲသည့်အခါ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေးအတွက် ကုန်အညွှန်းအမှတ်အသားများကို မြန်မာဘာသာဖြင့်ထည့်သွင်းဖော်ပြသော ကုန်ပစ္စည်းများအားဝယ်ယူသုံးစွဲရန်အား ရှင်းလင်းဆွေးနွေးဟောပြောခဲ့ပါသည်။ ထိုနောက် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ငြိမ်းငြိမ်းသန့်မှ ကလေးအလုပ်သမားပပျောက်ရေး ပိုစတာများအားရှင်းလင်းခြင်း၊ လက်ချောင်းလေးများသန်မာစေရန် လက်လေ့ကျင့်ခန်းများပြုလုပ်ခြင်း၊ ပုံပြင်ပြောပြခြင်းနှင့် ပုံပြင်စာအုပ်များကို ကျောင်းသား/ ကျောင်းသူ (၅၈)ဦးအား ဖတ်စေခြင်းစသောအသိပညာပေး အကြောင်းအရာများကို ဟောပြောခဲ့ကြောင်းသိရှိရပါသည်။

DOCA(ပဲခူး)