HighLight News

    စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် (၂၃-၆-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်း၏ စီစဉ်ကြီးကြပ်မှုဖြင့် Zabu Kan Tun Trading Co.,Ltd ၏ စားအုန်းဆီများရောင်းချပေးနေမှုအခြေအနေများကို သွားရောက်ကြီးကြပ်ဆောင်ရွက်ပေးခဲ့ကြောင်းသိရပါသည်။

   အဆိုပါရောင်းချရာတွင် Zabu Kan Tun Trading Co.,Ltd က ရည်ညွှန်းဈေးဖြင့် ဖြန့်ဖြူးရောင်းချပေးသောစားအုန်းဆီများ၏ ရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များထပ်ပေါင်း၍ ၂%အမြတ်ထက်မပိုသောဈေးနှုန်းဖြင့် ဈေးကွက် အတွင်းသို့ ပြန်လည်ဖြန့်ဖြူးရောင်းချပေးခဲ့ရာ စားအုန်းဆီ ၁ပိဿာလျှင် (၄၁၀၀) ကျပ်ဖြင့် လူတစ်ဦးလျှင် (၁) ပိဿာနှုန်းစီ အမှတ် (က)၊ လွတ်လပ်ရေးလမ်းနှင့် ဘောဂလမ်းထောင့်တွင်လည်းကောင်း၊ အောင်ရတနာလမ်းနှင့် နဝရတ်လမ်းထိပ်တွင်လည်းကာင်း စားသုံးသူပြည်သူများအား ရောင်းချပေးလျက်ရှိရာ ရပ်ကွက်နေပြည်သူများအနေဖြင့် စားအုန်းဆီဈေးနှုန်းမှန်ကန်မှုရှိခြင်း၊ ဈေးနှုန်းသက်သာမှုရှိခြင်း၊ အလေးချိန်မှန်ကန်မှုရှိခြင်းတို့ကြောင့် စိတ်ချမ်းမြေ့စွာဝယ်ယူစားသုံးလျက်ရှိကြောင်းသိရှိရပါသည်။

DOCA(ရန်ကုန်)

    မကွေးတိုင်းဒေသကြီး၊ မကွေးခရိုင်၊ မြို့သစ်မြို့နယ်အတွင်းရှိ ဒေသခံပြည်သူများ စားသောက်ကုန်ပစ္စည်းများဝယ်ယူစားသုံးရာတွင် ဘေးကင်းလုံခြုံမှုရှိစေရေးနှင့် အန္တရာယ်ကင်းသည့်စားသောက်ကုန်များကို ရွေးချယ်ဝယ်ယူစားသုံးနိုင်စေရေးအတွက် စားသုံးသူကာကွယ်ရေးဥပဒေ ၂၀၁၉ပါ ကုန်အညွှန်းအမှတ်အသားများအကြောင်းနှင့် စားသုံးရန်မသင့်ဟုတားမြစ်ထားသော စားသောက်ကုန်အမှတ်တံဆိပ်များအကြောင်းတို့အား ဒေသခံပြည်သူများသိရှိနားလည်သဘောပေါက်စေရန်အတွက် မြို့သစ်မြို့၊ စည်ပင်သာယာစျေး၏တောင်ဘက်၊ မြန်မာ့လယ်ယာဖွံ့ဖြိုးရေးဘဏ်သို့ (၂၃-၆-၂၀၂၃) ရက်နေ့၊ နံနက် (၀၉:၀၀) နာရီအချိန်တွင်သွားရောက်၍ အသိပညာပေးဟောပြောခဲ့ရာ စိုက်ပျိုးစရိတ်ထုတ်ချေးရန် လာရောက်သည့် မြို့သစ်မြို့နယ်၊ သဖန်းကုန်းကျေးရွာအုပ်စုမှ တောင်သူ (၁၅၀) ဦးတက်ရောက်ခဲ့ကြောင်း သိရှိရပါသည်။

     ထိုသို့ ကွင်းဆင်း၍ အသိပညာပေးဆွေးနွေးရာတွင် မြို့နယ်စားသုံးသူရေးရာဦးစီးဌာန၊ မြို့နယ် ဦးစီးမှူး ဦးဆယ်မောင်က မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)ပါ အကြောင်းအရာများ၊ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြရာတွင် ပြည့်စုံစွာပါဝင်ရမည့်အချက်များ၊ စားသုံးရန်မသင့်ဟု တားမြစ်ထားသောစားသောက်ကုန်များအကြောင်း၊ တားမြစ်ထားသောစားသောက်ကုန်ပစ္စည်းများ ဖြန့်ဖြူးရောင်းချနေမှုအား စစ်ဆေးတွေ့ရှိရပါက စားသုံးသူကာကွယ်ရေးဥပဒေ ၂၀၁၉အရ အရေးယူဆောင်ရွက်သွားမည်ဖြစ်ကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှုရှိ/မရှိကို မိမိတို့ဌာနသို့ တင်ပြစိစစ်လျှောက်ထားနိုင်ပါကြောင်း အသိပညာပေးရှင်းလင်းဆွေးနွေးးခဲ့ကြောင်း သိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် (၂၃-၆-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် မွန်ပြည်နယ်အစိုးရအဖွဲ့ရုံး၌ ကျင်းးပပြုလုပ်ခဲ့သော သဘာဝမြေဩဇာထုတ်လုပ်သူလုပ်ငန်းရှင်များနှင့်တွေ့ဆုံဆွေးနွေးပွဲသို့ တက်ရောက်ခဲ့ရာ အဆိုပါဆွေးနွေးပွဲသို့ မွန်ပြည်နယ်အစိုးရအဖွဲ့ဝင် စီးပွားရေးရာဝန်ကြီး နိုင်လယိတမနှင့် ပြည်နယ်အဆင့်သက်ဆိုင်ရာဌာနများ၊ သဘာဝမြေဩဇာထုတ်လုပ်သောလုပ်ငန်းရှင်များအပါအဝင် စုစုပေါင်း (၁၁) ဦးတက်ရောက်ခဲ့ကြသည်။

     အဆိုပါဆွေးနွေးပွဲတွင် စီးပွားရေးရာဝန်ကြီး နိုင်လယိတမက အဖွင့်အမှာစကားပြောကြားပြီးနောက် မွန်ပြည်နယ်သည် စိုက်ပျိုးရေး၊ မွေးမြူရေးကို အဓိကလုပ်ကိုင်နေသောပြည်နယ်တစ်ခုဖြစ်သည့်အတွက် စိုက်ပျိုးရေးသွင်းအားစုဖြစ်သောမြေဩဇာများမှာ လိုအပ်လျက်ရှိကြောင်း၊ ပြည်ပမှ ဓာတ်မြေဩဇာတင်သွင်းမှုကိုလျော့ချရန်အတွက် ပြည်တွင်း၌ မြေဩဇာများကို လုံလောက်စွာထုတ်လုပ်ရန်လိုအပ်ကြောင်း၊ သဘာဝမြေဩဇာထုတ်လုပ်သည့်လုပ်ငန်းရှင်များ၏  ရင်းနှီးငွေအခက်အခဲများကို နိုင်ငံ့စီးပွားမြှင့်တင်ရေးမတည်ရန်ပုံငွေဖြင့် အတိုးနှုန်းသက်သာစွာထုတ်ချေးပေးလျက်ရှိကြောင်း၊ နည်းပညာလိုအပ်ချက်၊ ဈေးကွက်လိုအပ်ချက်များကိုလည်း သက်ဆိုင်ရာဌာနများနှင့် ချိတ်ဆက်ဆောင်ရွက်ပေးရန် ဆွေးနွေးမှာကြားခဲ့ကြောင်းသိရှိရပါသည်။

DOCA(မွန်)

    ပုသိမ်မြို့၊ မဟာဗန္ဓုလလမ်းရှိ တိုင်းဆန်စက်ပိုင်ရှင်များအသင်းရုံးတွင် ၂၀၂၃ခုနှစ်၊ ဇွန်လ(၂၆)ရက်နေ့၊ နံနက်ပိုင်းအချိန်၌ စားသုံးသူရေးရာဦးစီးဌာန၊ တိုင်းဦးစီးမှူးရုံးမှ ဒု-တိုင်းဦးစီးမှူး ဦးစိုးဦးသည် ဆန်စက်ပိုင်ရှင်၊ ဆန်ကုန်သည်နှင့် ဆန်စပါးအ‌ရောင်းအဝယ်ပြုလုပ်နေသူများအား သမားရိုးကျရောင်းဝယ်ခြင်းမဟုတ်သောလုပ်ငန်းများကိုထိန်းကျောင်းနိုင်ရန်နှင့် ဆန်စပါးသိုလှောင်မှုအခြေအနေအား စနစ်တကျဆောင်ရွက်နိုင်ရန် ဆန်စပါးသိုလှောင်မှုလုပ်ငန်းမှတ်ပုံတင်ခြင်းဆိုင်ရာ အစိုးရပုဂ္ဂလိကလုပ်ငန်းအဖွဲ့ ဖွဲ့စည်းထားရှိမှုနှင့် လုပ်ငန်းတာဝန်များကိုရှင်းလင်းဆွေးနွေးခဲ့ပါသည်။

 ဆန်စက်ပိုင်ရှင်လုပ်ငန်းရှင်များအနေဖြင့် လုပ်ငန်းတည်နေရာတစ်နေရာတွင် ဆန်တန်ချိန်(၅၀)၊ (၁၀၀၀)အိတ်နှင့် စပါးတင်း(၅၀၀၀)အတွက် သိုလှောင်မှုပမာဏကိုမှတ်ပုံတင်ရန်သတ်မှတ်ခြင်း၊ ပမာဏပြောင်းလဲခြင်းကို သတင်းပို့သည့်စနစ်ကောင်အထည်ဖော်ရန်၊ ICTနှင့် Digital နည်းပညာကိုအသုံးပြု၍ အွန်လိုင်းမှမှတ်ပုံတင်ခြင်း၊ Online Registration   စနစ်ကျင့်သုံးဆောင်ရွက်ရန်နှင့် မှတ်ပုံတင်လုပ်ငန်းထိရောက်စေရေး စားသုံးသူရေးဦးစီးဌာနမှတစ်ဆင့် ကြပ်မတ်ဆောင်ရွက်ရန်သာမက မှတ်ပုံတင်စနစ်ကျင့်သုံးနိုင်ရေး အသိပညာပေးလုပ်ငန်းများဆောင်ရွက်ရန် အသေးစိတ်ဆွေးနွေးခဲ့ပြီး အခမ်းအနားသို့ တိုင်းဆန်စက်ပိုင်ရှင်များအသင်းဥက္ကဋ္ဌ ဦးစိုးဝင်းနှင့် မြို့ပေါ်ရှိ ဆန်စက်ပိုင်ရှင်၊ လုပ်ငန်းရှင်စုစုပေါင်း(၂၃)ဦးတက်ရောက်ခဲ့ကြောင်းသိရပါသည်။

DOCA(ဧရာဝတီ)

  ဧရာဝတီတိုင်းဒေသကြီး၊ ဖျာပုံခရိုင်စားသုံးသူရေးရာဦးစီးဌာနမှ ဒုတိယခရိုင်ဦးစီးမှူးနှင့် မြို့နယ်တာဝန်ခံတို့သည် ၂၀၂၃ခုနှစ်၊ ဇွန်လ(၂၀)ရက်နေ့၊ နံနက်(၁၀:၀၀)နာရီအချိန်တွင် ဖျာပုံတမံကျေးရွာ (အ-ထ-က) ကျောင်းတွင် ပြည်သူ့ကျန်းမာရေးဌာန၊ ကျောင်းကျန်းမာရေးဌာနတို့နှင့်ပူးပေါင်း၍ ကျောင်းသား/ကျောင်းသူ(၂၆၅)ဦး၊ ဆရာ/ဆရာမ(၁၇)ဦး၊ စုစုပေါင်း(၂၈၂)တို့အား စားသုံးသူကာကွယ်ရေးအသိပညာပေးဟောပြောခြင်းကိုဆောင်ရွက်ခဲ့ပါသည်။

    အဆိုပါဟောပြောပွဲတွင် ခံတွင်းဆိုင်ရာဆရာမက နည်းစနစ်မှန်စွာသွားတိုက်ခြင်းများကို လက်တွေ့သင်ကြားပေးပြီး သွားနှင့်ခံတွင်းဆိုင်ရာအကြောင်းအရာများကိုဟောပြောခြင်း၊ စားသုံးသူရေးရာဦးစီးဌာနမှ ဒုတိယခရိုင်ဦးစီးမှူး ဦးစိုးမင်းထိုက်က စားသုံးသူကာကွယ်ရေးဥပဒေ ၂၀၁၉ပါ  အခန်း(၉)၊ ဥပဒေပုဒ်မ(၁၉)အရ စားသုံးသူအခွင့်အရေးနှင့်တာဝန်များ၊ ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူကတောင်းဆိုနိုင်သည့်အခွင်အ‌ရေးများ၊ လုပ်ငန်းရှင်များက မိမိတို့ဖြန့်ဖြူးသောကုန်စည်များ၏တာဝန်ယူမှု၊ အာမခံချက်များအကြောင်း၊ ဈေးကွက်တွင် ဖြန့်ဖြူးရောင်းချလျက်ရှိသောကုန်စည်၊ ဝန်ဆောင်မှုများကို မည့်သို့ရွေးချယ်ဝယ်ယူရမည်ဖြစ်ကြောင်းတို့ကိုဟောပြောခဲ့ခြင်း၊ ဆက်လက်၍ မြို့နယ်တာဝန်ခံ ဦးမင်းဇော်က စားသုံးသူကာကွယ်ရေးဥပဒေ ၂၀၁၉ပါအခန်း (၁၈)၊ ပုဒ်မ(၄၁)၊ (၄၃)အရ ကုန်အညွှန်းအမှတ်အသားဖော်ပြခြင်းဆိုင်ရာများကိုပြောကြားခြင်းနှင့် ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များလိုက်နာဆောင်ရွက်ရန်ညွှန်ကြားချက်များ၊ စားသုံးသူများနစ်နာမှုဖြစ်ပေါ်လာပါက တိုင်ကြားခွင့်စင်တာများဖွင့်ထားကြောင်း၊ Call Center No. (1535) သို့လည်းတိုင်ကြားနိုင်ကြောင်း အသိပညာပေးဟောပြောခြင်းတို့ဆောင်ရွက်ခဲ့မှုအား သတင်းရရှိပါသည်။

DOCA(ဧရာဝတီ)