HighLight News

               (၆.၁၂.၂၀၂၄)ရက်နေ့ နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာနမှ ညောင်တုန်းမြို့နယ် တာဝန်ခံရုံးမှ ဦးအောင်လွင် မြို့နယ်ဦးစီးမှူးသည် ညောင်တုန်းမြို့ အွန်လိုင်းရောင်းချသူလုပ်ငန်းရှင်(၁၀)ဦးအား မြို့နယ်အထွေထွေအုပ်ချုပ်ရေးဦးစီးမှူးရုံး အစည်းအဝေးခန်မသို့ဖိတ်ကြား၍ အွန်းလိုင်းမှတ်ပုံတင်ခြင်းနှင့် စပ်လျည်း၍ အသိပညာပေးဆွေးနွေး ဟောပြောခြင်းပြုလုပ်ခဲ့ကြောင်းသိရသည်။

              ထိုသို့ ဆွေးနွေးရာဟောပြောရာတွင် အွန်လိုင်းလုပ်ငန်းများဖြင့် ကုန်စည်နှင့် ဝန်ဆောင်မှုများကို လုပ်ငန်းရှင်များက ဆိုရှယ်မီဒီယာသုံး၍ ရောင်းချလာကြပြီး၊ မသမာသူလုပ်ငန်းရှင်တစ်ချို့မှ လိမ်လည်၍ရောင်းချနေမှုများဖြစ်ပေါ်လာ၍ စားသုံးသူများထိခိုက်နစ်နာမှုများ ဖြစ်ပေါ်လာသည့်အတွက် အွန်လိုင်းဖြင့်ရောင်းချသောလုပ်ငန်းများကို စိစစ်သင့်သည်အတွက် အွန်လိုင်းစနစ်ဖြင့် ရောင်းချခြင်းလုပ်ငန်းအား အရေးကြီးဝန်ဆောင်မှုလုပ်ငန်းအဖြစ် သတ်မှတ်သည့်အမိန့်ထုတ်ပြန်ပြီး မှတ်ပုံတင်ခြင်းဆိုင်ရာအမိန့်၊ အခွင့်အာဏာအပ်နှင်းသည့်အမိန့်များနှင့် သတိပြုရမည့်အချက်များ၊ အွန်လိုင်းစနစ်ဖြင့် ရောင်းချခြင်း လုပ်ငန်းနှင့်ပတ်သက်၍ စားသုံးသူဦးစီးဌာနမှ ဆောင်ရွက်နေသည့် လုပ်ငန်းစဉ်(၄)ရပ် အားရှင်းလင်းခြင်း၊ မှတ်ပုံတင်ထားသည့် အွန်လိုင်းရောင်းချမှု လုပ်ငန်းများမှ ဈေးဝယ်ယူခြင်းဖြင့် ရရှိလာမည့်အကျိုးရလဒ်များ၊ လိမ်လည်မှုပုံစံ (၂) မျိုးဖြင့် လိမ်လည်နိုင်ကြောင်း၊ အွန်လိုင်းမှဝယ်ယူမှုများအတွက် နစ်နာဆုံးရှုံးမှုများရှိခဲ့လျင်လည်း နည်းလမ်း (၅) မျိုးဖြင့် တိုင်ကြားနိုင်ပါကြောင်း၊ တိုင်ကြားရာတွင်လည်း မိမိတို့ဌာနမှ စေ့စပ်ညှိနှိုင်းဖြေရှင်းပေးခြင်း၊ စီမံခန့်ခွဲရေးနည်းလမ်းအရ အရေးယူခြင်းစသည့် နည်းလမ်း (၂) မျိုးဖြင့် ဖြေရှင်းပေးပါကြောင်း၊ ထုတ်ပြန်ချက်များကို လိုက်နာဆောင်ရွက်ခြင်းမရှိပါက  ပြစ်မှု၊ ပြစ်ဒဏ်အရ အနည်းဆုံး ထောင်ဒဏ် ၆လမှ ၃ နှစ်အထိ ချမှတ်နိုင်သည့်အပြင် ကျပ် ၅သိန်းထက်မပိုသော ဒဏ်ငွေကိုချမှတ်ခံရမည်ဖြစ်ကြောင်းတို့ကို ရှင်းလင်းခဲ့ပြီး လုပ်ငန်းရှင်များက သိရှိလိုသည်များမေးမြန်းမှုကိုလည်း ပြန်လည်ရှင်းလင်းဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

              ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်တွင် ဆန်စျေးကွက်အတွင်း  စျေးနှုန်းမြှင့်တင်ရောင်းချမှုမရှိစေရေးနှင့် ဆန်များပြတ်လပ်မှုရှိ/ မရှိကို ၅.၁၂.၂၀၂၄ ရက်နေ့ နံနက် (၁၀း၀၀) နာရီအချိန်တွင် မိတ်ဖက်ဌာနဆိုင်ရာ တာဝန်ရှိသူများနှင့်အတူ ကွင်းဆင်းစစ်ဆေးခဲ့ကြောင်းသိရသည်။

             ထိုသို့ကွင်းဆင်းစစ်ဆေးမှုအရ စားသုံးသူရေးရာဦးစီးဌာနမှ ဒုခရိုင်ဦးစီးမှူး ဦးအောင်ဇော်ဦးနှင့် မိတ်ဖက်ဌာနဆိုင်ရာ စစ်ဆေးရေးအဖွဲ့သည် မအူပင်မြို့ပေါ်ရှိ ဆန်အရောင်ဆိုင်များဖြစ်သော 999 အရောင်းဆန်ဆိုင်၊ ဦးတရုတ်ကြီးဆန်ဆိုင်၊ ရွှေလင်းယုန်ဆန်ဆိုင်၊ ဝင်းသိင်္ဂီဆန်ဆိုင်၊ အောင်ဆန်ဆိုင်နှင့် သော်သော်ဆန်ဆိုင်တို့တွင် ဆန်ပြတ်လပ်မှုရှိ/ မရှိ၊ ဆန်အိတ်သိုလှောင်ထားမှုအခြေအနေများ၊  သတ်မှတ်ရည်ညွှန်းဈေးဖြင့် ရောင်းချနေမှုအခြေအနေများကို စစ်ဆေးခဲ့ကြောင်းသိရသည်။  

             စစ်ဆေးရာတွင် စပါးသစ်များထွက်ပေါ်ပြီးဖြစ်၍ ဆန်ဆိုင်များမှရောင်းချလျက်ရှိသောဆန်များမှာ ဒေသထွက်စပါးများကို ဆန်စက်များကြိတ်ခွဲမှုမှဝယ်ယူ၍ ကရင်မဆန်၊ မနောသုခဆန်၊ ရက်၉၀ဆန်၊ GW11ဆန်၊ ရတနာတိုးဆန်၊ ဆင်းသုခရှယ်၊ မင်းဧရာဆန်၊ ဖျာပုံတောင်ပျံ၊ ကျားပျံဆန်များကိုရောင်းချနေပြီး၊  သတ်မှတ်ရည်ညွှန်းဈေးအပေါ် ဈေးနှုန်းကပ်ဖော်ပြ၍ရောင်းချနေကြာင်း စစ်ဆေးတွေ့ရှိရသည်။  မအူပင်မြို့နယ်တွင်းစားသုံးရန် ဆန်ပြတ်လပ်မှုမရှိနိုင်ကြောင်း၊ လက်လီ/ လက်ကားရောင်းချနေသော ဆန်ဆိုင်များတွင် ဈေးကစားရန် ဆန်များကိုသိုလှောင်ထားခြင်းမပြုရန်၊ ဆန်ဆိုင်များ ဆန်အိတ် ၁၀၀၀နှင့် အထက် သိုလှောင်ထားရှိပါက (MyRo) တွင် မှတ်ပုံတင်ဆောင်ရွက်ပြီးမှ ရောင်းချရန်ကိုလည်းကောင်း၊ မှတ်ပုံတင်ထားခြင်းမရှိပါက သက်ဆိုင်ရာမြို့နယ်ဦးစီးမှူးရုံး၊ စားသုံးသူရေးရာဦးစီးဌာနရုံးများနှင့် ချိတ်ဆက်၍ မှတ်ပုံတင်ခြင်းဆောင်ရွက်နိုင်ရေးတို့ကို ဆောင်ရွက်ပေးလျက်ရှိကြောင်း ဆန်များကို သတ်မှတ်ရည်ညွှန်းဈေးထက် မြှင့်တင်ရောင်းချခြင်းများရှိပါက အရေးကြီးကုန်စည်နှင့် ဝန်ဆောင်မှု ဥပဒေအရအရေးယူ ဆောင်ရွက်သွားမည်ဖြစ်ကြောင်းကို ရှင်းလင်းပြောကြားခဲ့ကြောင်း သိရှိရပါသည်။

DOCA(ဧရာဝတီ)

              ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာနအနေဖြင့် စားသုံးသူများအားအသိပညာပေးခြင်း၊ ဈေးကွက်စောင့်ကြည့်စစ်ဆေးခြင်းများကို ဆောင်ရွက်လျက်ရှိရာ ၂-၁၂-၂၀၂၄ ရက်နေ့တွင် Today News မှ ရေးသားဖော်ပြခဲ့သည့် “ ဈေးကွက်အတွင်း သွင်းကုန်ဆေးဝါးများ ဆက်လက်ပြတ်လပ်နေ” သတင်းနှင့် ပတ်သက်၍ ဈေးကွက်အတွင်း ဆေးဝါးများပြတ်လပ်မှုရှိ/ မရှိနှင့် ဈေးနှုန်းမြှင့်တက်မှုရှိ/ မရှိကို ကွင်းဆင်းတင်ပြရန် ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်အရ ကွမ်းခြံကုန်းမြို့နယ်၊ စားသုံးသူရေးရာဦးစီးဌာနမှ ဝန်ထမ်းများ၊ မြို့နယ်စည်ပင်သာယာရေးအဖွဲ့၊ မြို့နယ်ပြည့်သူကျန်းမာရေးဦးစီးဌာနတို့ ပူးပေါင်း၍ မြို့နယ်အတွင်းရောင်းချနေသော ဆေးဆိုင်များသို့  ဒီဇင်ဘာလ(၉)ရက်နေ့၊ နံနက်(၁၀:၀၀)နာရီအချိန်တွင်  ကွင်းဆင်းစစ်ဆေးခဲ့ကြောင်း သိရသည်။

           ထိုသို့ကွင်းဆင်းစစ်ဆေးခဲ့ရာတွင် ကွမ်းခြံကုန်းမြို့နယ်၊ ကံကြီးမကျီးရပ်ကွက်တွင်ရောင်းချသော ဦးစံရွှေ+ဒေါ်တင်အိဆေးဆိုင်၊ ထွန်းဝေဆေးဆိုင်နှင့် ဈေးပိုင်းရပ်ကွက်တွင် ရောင်းချသော ကောင်းမြတ်ချမ်းသာဆေးဆိုင်တို့တွင် လူသုံးများသောဆေးဝါးဖြစ်သည့် သွေးကျဲဆေး၊ အကိုက်အခဲပျောက်ဆေး၊ သွေးကျဆေး၊ ဆီးချိုဆေး၊ နှလုံးဆေး၊ လေဆေး၊ အာရုံကြောဆေး၊ ဒဏ်ကြေလိမ်းဆေးအပါအဝင် ပုံမှန်သောက်သုံးနေရသည့် ဆေးဝါးများ၊ ပြတ်လပ်မှုရှိ/ မရှိနှင့် ဈေးနှုန်းမြှင့်တင်မှုရှိ/ မရှိတို့ကိုစစ်ဆေးခဲ့ကြရာ အဆိုပါဆေးဝါးများ ပြတ်လပ်မှုမရှိကြောင်း၊ ယခင်လရောင်းဈေးနှင့်ယခုလရောင်းဈေးမှာ ကွာခြားမှုမရှိခြင်းကြောင့် ဈေးနှုန်းမြှင့်တက်ရောင်းချခြင်း မရှိကြောင်းတို့ကို စစ်ဆေးတွေ့ရှိခဲ့ကြောင်းသိရသည်၊၊

            ထိုနောက် စားသုံးသူရေးရာဦးစီးဌာန၊ ကွမ်းခြံကုန်းမြို့နယ်တာဝန်ခံ ဒေါ်နွယ်နွယ်အေးမှ ဆေးဝါးရောင်းချသူများအနေဖြင့် စားသုံးသူတို့၏ ခံစားနေရသော ရောဂါဝေဒနာများကို သက်သာပျောက်ကင်းအောင် အသက်အန္တရာယ်ကိုကယ်တင်သူများဖြစ်၍ ကုသိုလ်ရသည့်လုပ်ငန်းဖြစ်သောကြောင့် ဆေးဝါးများပြတ်လပ်မှုမရှိစေရေး၊ ဈေးနှုန်းမြင့်တက်ရောင်းချမှု မဖြစ်စေရေးတို့ကို ထိန်းသိမ်းဆောင်ရွက်သွားကြရန် ဆေးဆိုင်ပိုင်ရှင်နှင့် ရောင်းချသူတာဝန်ခံများသို့ တွေ့ဆုံဆွေးနွေးခဲ့ကြကြောင်း သိရှိရပါသည်၊၊

DOCA(ရန်ကုန်)

              ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် ဈေးကွက်အတွင်း ကုန်အညွှန်းအမှတ်အသား ပြည့်စုံစွာဖော်ပြထားခြင်းမရှိသော စားသုံးဆီအမျိုးမျိုးတို့ ဖြန့်ဖြူးရောင်းချနေခြင်းရှိ/ မရှိကို ဒီဇင်ဘာလ(၉)ရက်နေ့၊ နံနက်(၁၀း၃၀)အချိန်တွင် စည်ပင်သာယာမြို့မဈေးအတွင်းအပြင်ရှိ ကုန်ခြောက်ဆိုင်များသို့ ကွင်းဆင်းစစ်ဆေးခဲ့ကြောင်း သိရသည်။

              ထိုသို့ ဈေးကွက်အတွင်းကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာန၊ တိုင်းဒေသကြီး ဦးစီးမှူးရုံး၏ညွှန်ကြားချက်နှင့်အညီ စားသုံးသူများဘေးအန္တရာယ် ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှုရှိစေရေးတို့အတွက် ကော့မှူးမြို့နယ် စည်ပင်သာယာရေးအဖွဲ့မှဈေးတာဝန်ခံ ဦးအေးသွင်နှင့်ဝန်ထမ်းများ၊ စားသုံးသူရေးရာဦးစီးဌာန၊ ကော့မှူးမြို့နယ်တာဝန်ခံ ဦးတင်မင်းတို့ ပူးပေါင်း ၍ စည်ပင်သာယာမြို့မဈေးအတွင်းအပြင်ရှိ ကုန်ခြောက်ဆိုင်များမှ ဆိုင်ပိုင်ရှင် စီးပွားရေးလုပ်ငန်းရှင်များနှင့် တွေ့ဆုံ၍ မိမိတို့အနေဖြင့် ဖြန့်ဖြူးရောင်းချပေးလျက်ရှိသော စားသုံးဆီအမျိုးမျိုးတို့တွင်    ကုန်အညွှန်းအမှတ်အသားဖော်ပြရာ၌ အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့အား မြန်မာဘာသာဖြင့်သော်လည်းကောင်း၊ မြနမာဘာသာနှင့် အခြားဘာသာ တစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ရေးသားဖော်ပြပါရှိသော အမှတ်တံဆိပ် စားသုံးဆီအမျိုးမျိုးတို့ကိုသာ ဝယ်ယူဖြန့်ဖြူးရောင်းချပေးကြရန်နှင့် စံချိန်စံညွှန်းနှင့်မကိုက်ညီသော၊ ကုန်အညွှန်းအမှတ်အသား ပြည့်စုံစွာဖော်ပြထားခြင်းမရှိသော စားသုံးဆီအမျိုးမျိုးတို့သာ ဈေးကွက်အတွင်းဝယ်ယူ ဖြန့်ဖြူးခြင်းများမပြုလုပ်ကြရန် အသိပညာပေးပြောကြားခဲ့ပြီး ကုန်ခြောက်ဆိုင်များရှိ စားသုံးဆီအမျိုးမျိုးတို့တွင် ကုန်အညွှန်းအမှတ်အသားပြည့်စုံစွားဖော်ပြထားခြင်းရှိ/ မရှိ ဈေးကွက်စောင့်ကြည့် ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

              စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံး ကွပ်ကဲမှုအောက်ရှိ မှော်ဘီမြို့နယ်ခွဲရုံးမှ ဝန်ထမ်းများသည် ၁၂.၁၂.၂၀၂၄ ရက်နေ့၊ နေ့လယ် (၁၂:၃၀)နာရီအချိန်တွင် မှော်ဘီမြို့နယ်၊ အခြေခံပညာမူလတန်းကျောင်း၊ ပြည်လမ်းတွင် ကျောင်းသား/ ကျောင်းသူများအား စားသုံးသူကာကွယ်ရေးဆိုင်ရာ အသိပညာပေးဟောပြောခဲ့ကြောင်းသိရသည်။

            ဟောပြောပွဲတွင် မှော်ဘီမြို့နယ်၊ အခြေခံပညာမူလတန်းကျောင်း၊ ပြည်လမ်းမှ ကျောင်းအုပ်ဆရာမကြီး ဒေါ်သန်းသန်းဦးမှ အဖွင့်အမှာစကားပြောကြားပြီး စားသုံးသူရေးရာ ဦးစီးဌာနမှ ဒေါ်ဖြူဖြူမြင့် ဒုကြီးကြပ်ရေးမှူးက စားသုံးသူအခွင့်အရေး(၈)ချက်နှင့် လိုက်နာရမည့်တာဝန်များအကြောင်း၊ အသင့်စားမုန့်များနှင့် အသင့်သောက်အချိုရည်များတွင် ကုန်အညွှန်းအမှတ်အသား ပြည့်စုံစွာဖော်ပြထားသည့် ကုန်ပစ္စည်းများကိုသာ ရွေးချယ်ဝယ်ယူစားသုံးတတ်စေရန်၊ စားသုံးသူများသည် ကုန်စည်(သို့မဟုတ်)ဝန်ဆောင်မှုများကို ဝယ်ယူအသုံးပြုရာတွင် နစ်နာဆုံးရှုံးမှုရှိခဲ့လျှင် Consumer Call Center 1535 သို့လည်း ဆက်သွယ်တိုင်ကြားနိုင်ကြောင်းနှင့် အခြားတိုင်ကြားနိုင်သည့်နည်းလမ်းများကိုလည်း အသိပညာပေးဟောပြောခဲ့ပြီး ဟောပြောပွဲသို့ ဆရာ/ ဆရာမ(၁၄)ဦး၊ ကျောင်းသား/ ကျောင်းသူ (၆၈)ဦး စုစုပေါင်း (၈၂)ဦးတက်ရောက်ခဲ့ကြောင်း သိရှိရပါသည်။

DOCA(ရန်ကုန်)