HighLight News

    ကချင်ပြည်နယ်၊ စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ဦးဘောမ်ဇုန်း(ရုံးအုပ်)သည် (၁၂-၉-၂၀၂၃) ရက်နေ့တွင် အမှတ်(၁)ရပ်ကွက်၊ ဝိုင်းမော်မြို့ရှိ ခေါက်ဆွဲထုတ်လုပ်ဖြန့်ဖြူးသည့် စီးပွားရေးလုပ်ငန်းရှင်နှင့်တွေ့ဆုံဆွေးနွေးခဲ့ပါသည်။

    ထိုသို့ဆွေးနွေးရာတွင် ဦးဘောမ်ဇုန်း(ရုံးအုပ်)က စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုကြောင်း၊ စားသုံးကာကွယ်ရေးဥပဒေ ၂၀၁၉ပါ စီးပွားရေးလုပ်ငန်းရှင်၏တာဝန်များ၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းအပေါ် စီးပွားရေးလုပ်ငန်းရှင်သည် မိမိဝန်ဆောင်မှုနှင့်စပ်လျဉ်း၍ အချက်အလက်များကို စားသုံးသူသိရှိစေရန်ကြိုတင်အသိပေးခြင်း၊ မှန်ကန်သောသတင်းအချက်အလက်နှင့်ပြည့်စုံသော ဝန်ဆောင်မှုအဆင့်အတန်းနှင့်အညီ ပြည့်ဝစွာပေးခြင်း၊ စားသုံးသူ၏လိုအပ်ချက်နှင့်ကိုက်ညီမှုရှိခြင်း၊ အာမခံထားသောအချိန်ကာလအတွင်း ပြီးမြောက်အောင်ဆောင်ရွက်ပေးခြင်း၊ စားသုံးသူနှင့်သဘောတူညီထားသည့် ဝန်ဆောင်မှုတန်ဖိုးအတိုင်း ပေးအပ်စေခြင်း စသည့်အချက်များကိုရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ကချင်)

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှု၊ ခရိုင်ဦးစီးမှူး၏ ကြီးကြပ်မှူဖြင့် စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးဇော်ထွန်းဦး ဦးဆောင်သောဝန်ထမ်းများအဖွဲ့သည် နို့စို့ကလေးနှင့်ကလေးငယ်များ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိသော ကလေးအာဟာရဖြည့်စွက်စာများ ဝယ်ယူသုံးစွဲနိုင်ရန်ရည်ရွယ်၍ (၅-၉-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် အစားအသောက်နှင့်ဆေးဝါးကွပ်ကဲရေးဦးစီးဌာနတို့နှင့်ပူးပေါင်း၍ ဈေးကွက်စောင့်ကြည့်စစ်ဆေးခဲ့ကြပါသည်။

    ထိုသို့ ဈေးကွက်စောင့်ကြည့်စစ်ဆေးရာတွင် မြန်မာနိုင်ငံစားသုံးသူကာကွယ်ရေးကော်မရှင်ကထုတ်ပြန်ထားသည့် ညွှန်ကြားချက်အမှတ် (၂/၂၀၁၉) ဖြင့်ထုတ်ပြန်ထားသော “ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ဖြစ်စေ ဖော်ပြရာ၌ စီးပွားရေးလုပ်ငန်းရှင်များလိုက်နာဆောင်ရွက်ရန်ညွှန်ကြားချက်” တွင် (က) အစားအသောက်အုပ်စုများအောက်ရှိ အမှတ်စဉ်(၁၆)၌ ကလေးအာဟာရဖြည့်စွက်စာအမျိုးမျိုးနှင့်စပ်လျဉ်း၍ ကုန်အညွှန်းအမှတ်အသားဆိုင်ရာ လိုက်နာရမည့်အချက်များနှင့် ကုန်ပစ္စည်းအမျိုးအမည်၊ အရွယ်အစား၊ အရေအတွက် (သို့မဟုတ်) အသားတင်ပမာဏ၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်၊ ဘေးထွက်ဆိုးကျိုးနှင့် ကြိုတင်သတိပေးချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကိုလည်း ထည့်သွင်းဖော်ပြရပါမည်ဖြစ်ကြောင်း၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသောကုန်စည်များ ရောင်းချသည်ကိုစစ်ဆေးတွေ့ရှိရပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်းနှင့် စားသုံးသူကာကွယ်ရေးဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအကြောင်းတို့ကို အသိပေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(ပဲခူး)

   ရခိုင်ပြည်နယ်၊ သံတွဲခရိုင်၊ သံတွဲမြို့၌ ဒေသဖွံ့ဖြိုးရေးအတွက် ကွင်းဆင်းဆောင်ရွက်မှု၌ နိုင်ငံတော်မှ ချမှတ်ထားသည့် စစ်ကြောင်း (၅) ကြောင်းပုံသဏ္ဍာန်ဖော်၍ ဟောပြောပွဲကို (၈-၉-၂၀၂၃) ရက်နေ့၊ နေ့လယ်  (၁၃:၃၀) နာရီအချိန်တွင် ငပလီမြို့၊ ဇီးဖြူကုန်းရပ်ကွက်၌ သံတွဲမြို့စစ်ကြောင်း(၅)မှ တာဝန်ရှိသူများသည် ရပ်ကွက်နေပြည်သူများအား အသိပညာပေးအခမ်းအနားကျင်းပခဲ့ပါသည်။

    အဆိုပါ အခမ်းအနားတွင်နိုင်ငံရေးစစ်ကြောင်းမှ ဗိုလ်မှူးကျော်လင်းဦးက အဖွင့်အမှာစကားပြောကြားပြီး အဖွဲ့ဖြင့်လိုက်ပါလာသော အုပ်ချုပ်ရေးစစ်ကြောင်းမှ သံတွဲမြို့အုပ်ချုပ်ရေးမှူး ဦးမောင်သာစိန်၊ ဒေသဖွံ့ဖြိုးရေးစစ်ကြောင်းမှ မြို့နယ်ကျေးလက်ဖွံ့ဖြိုးရေး ဦးစီးဌာနမှူး ဦးမြတ်သူ၊ စည်းရုံးရေးစစ်ကြောင်း၊ ပြည်သူ့အင်အားဦးစီးဌာနမှ မြို့နယ်ဦးစီးမှူး ဦးမြင့်ဇော်နှင့် တာဝန်ရှိသူများက သက်ဆိုင်ရာကဏ္ဍအလိုက် အသီးသီးဆွေးနွေးခဲ့ကြကြောင်း၊ လူမှုရေးစစ်ကြောင်းမှ စားသုံးသူရေးရာဦးစီးဌာန၊ သံတွဲခရိုင်ဦးစီးမှူး ဦးဝင်းနိုင်(ဦးစီးအရာရှိ)က စားသုံးသူရေးရာဦးစီးဌာန၏လုပ်ငန်းဆောင်ရွက်ချက်တို့ကို ရှင်းလင်းပြောကြားပြီးနောက် ဌာန၏စားသုံးသူကာကွယ်ရေးဥပဒေပါ ပြဋ္ဌာန်းချက်များ၊ စားသုံးသူအခွင့်အရေးနှင့်တာဝန်များ၊ ကုန်စည်/ဝန်ဆောင်မှုပေါ်တွင် စားသုံးသူကတောင်းဆိုနိုင်သည့်အခွင့်အရေးများ၊ စားသုံးသူများလုံခြုံစိတ်ချရမှုရှိစေရေးအတွက် စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာဖော်ပြရမည့်အကြောင်းအရာများ၊ စားသုံးသူနစ်နာဆုံးရှုံးမှုများအပေါ် အရေးဆိုတောင်းဆိုနိုင်သည့် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းဖွင့်လှစ်ဆောင်ရွက်နေမှုအခြေအနေများ၊ Online စနစ်ဖြင့် ရောင်းချသည့်လုပ်ငန်းများအတွက်လည်း မှတ်ပုံတင်လျှောက်ထားပြီးမှသာ လုပ်ဆောင်ရန်လိုအပ်ကြောင်း အကျယ်တဝင့်ရှင်းလင်းဆွေးနွေးခဲ့ပြီး တက်ရောက်လာသူများ၏ မေးမြန်းချက်များအား ပြန်လည်ဖြေကြားခဲ့ကြောင်း သတင်းရရှိပါသည်။       

DOCA(ရခိုင်)                                                          

    စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးအနေဖြင့် ၂၀၂၃ခုနှစ်၊ စက်တင်ဘာလ ၇ရက်နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့၊ ရှမ်းပိုင်းရပ်ကွက်၊ နောင်ယား(ခ)ရပ်ကွက်၊ ဒေါနိုးကူးရပ်ကွက်ရှိ ကလေးအာဟာရဖော်စပ်ဖြည့်စွက်စာအမျိုးမျိုးရောင်းချနေသော ကုန်စုံဆိုင်များနှင့်ဆေးဆိုင်များသို့ မြန်မာနိုင်ငံစားသုံးသူကာကွယ်ရေးကော်မရှင်၏ (၂/၂၀၁၉)ပါ ကုန်အညွှန်းအမှတ်အသားသတ်မှတ်ချက်များနှင့်ကိုက်ညီမှုရှိ/မရှိ၊ မိတ်ဖက်ဌာနများဖြစ်သော မြို့နယ်စည်ပင်သာယာရေးအဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်နယ်ရဲတပ်ဖွဲ့တို့နှင့်ပူးပေါင်း၍ ဈေးကွက်စောင့်ကြည့်စစ်ဆေးခဲ့ပါသည်။

 ကယားပြည်နယ်၏ ကလေးအာဟာရဖြည့်စွက်စာအများစုမှာ လက်ရှိဈေးကွက်အနေအထားအရ တန်ဖိုးကြီးဖော်စပ်စာနှင့် ဖြည့်စွက်စာတချို့မှာ ဝယ်လိုအားနည်းပါးကြောင်း၊ အလယ်အလတ်တန်းစား ကလေးအာဟာရဖြည့်စွက်စာများမှာ အရောင်းပိုသွက်ကြောင်း၊ ဈေးနှုန်းများမှာလည်း မြှင့်တက်လျက်ရှိကြောင်း၊ မိခင်နို့ရည်အစားထိုးအစာဖြင့် အာဟာရပြည့်ဝစွာမရရှိနိုင်သည့် ကလေးငယ်များအတွက် ထုတ်လုပ်ထားသည့် နို့ရည်နှင့်နို့မှုန့်များတွင် အသက်အပိုင်းအခြားတိကျစွာဖော်ပြပါရှိပြီး ဖျော်စပ်သုံးစွဲရန်အညွှန်းများကို မြန်မာဘာသာဖြင့် တိကျစွာဖော်ပြထားကြောင်း၊ ပြည်ပမှတစ်ဆင့် ဝင်ရောက်သောကလေးအာဟာရဖြည့်စွက်စာများတွင် မြန်မာနိုင်ငံစားသုံးသူကာကွယ်ရေးကော်မရှင်၏ (၂/၂၀၁၉)ပါ ကုန်အညွှန်းအမှတ်အသားသတ်မှတ်ချက်များကို စတစ်ကာများဖြင့် ကပ်နှံဖော်ပြထားရှိပြီး အဆိုပါပစ္စည်းများမှာ  အသစ်ဝင်ရောက်ခြင်းမဟုတ်ဘဲ သက်တမ်းရက်ကျော်လွန်ခြင်းမရှိသေးသောပစ္စည်းလက်ကျန်များဖြစ်ကြောင်း၊ တချို့ကုန်စုံဆိုင်နှင့် ဆေးဆိုင်များ၌ တင်သွင်းရောင်းချမှုမရှိကြောင်းစစ်ဆေးတွေ့ရှိရပါသည်။

   ဆိုင်ရှင်များအနေဖြင့် ကလေးငယ်များနှင့်သက်ကြီးရွယ်အိုများ ကျန်းမာရေးဆိုင်ရာ ထိခိုက်မှုများဖြစ်ပွားစေနိုင်သည့် အာဟာရဖြည့်စွက်စာအမျိုးမျိုးကို နေရောင်ခြည်နှင့်တိုက်ရိုက်မထိတွေ့  သောနေရာတွင် စနစ်တကျထားသိုသိမ်းဆည်းရောင်းချရန်လိုအပ်ကြောင်းနှင့် စားသုံးသူကိုနစ်နာဆုံးရှုံးမှုဖြစ်စေမည့် ကုန်အညွှန်းအမှတ်အသားမပါရှိသောကုန်စည်များ၊ ဘေးအန္တရာယ်ရှိသည်ဟု ထင်မြင်ယူဆရသော ကျန်းမာရေးနှင့်ကိုက်ညီမှုမရှိသည့် ကလေးအာဟာရဖြည့်စွက်စာများ၊ အသက်အရွယ်အလိုက် ရောင်းချသင့်သည့် ကလေးအာဟာရဖြည့်စွက်စာတို့ကို ခွဲခြား၍ရောင်းချရန်လိုအပ်ကြောင်း၊ သတ်မှတ်ချက်နှင့်ကိုက်ညီမှုမရှိသော ကလေးအာဟာရဖြည့်စွက်စာတို့ကို ဈေးကွက်အတွင်း ရောင်းချဖြန့်ဖြူးခြင်းများစစ်ဆေးတွေ့ရှိရပါက သက်ဆိုင်ရာဌာနများ၏ ဥပဒေအရ အရေးယူခြင်းခံရမည်ဖြစ်ကြောင်း၊ ၎င်းနောက် ကလေးအာဟာရဖြည့်စွက်စာများအမျိုးမျိုးရောင်းချသည့် ကုန်စုံဆိုင်နှင့် ဆေးဆိုင်(၁၀)ဆိုင်အား အသိပညာပေး၍ စစ်ဆေးဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

   ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်ရှိ ဆန်စက်လုပ်ငန်းရှင်များအား (၆-၉-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် စားသုံးသူရေးရာဦးစီးဌာန၊ မအူပင်ခရိုင်ဦးစီးမှူး ဦးဇော်မင်းနှင့်ဝန်ထမ်းများသည် မြို့ကွက်သစ်ရပ်ကွက်ရှိ တောင်ထိပ်ပန်းပွင့်အစည်းအဝေးခန်းမ၌ တွေ့ဆုံ၍ အသိပညာပေးဆွေးနွေးခဲ့ပါသည်။

 အဆိုပါတွေ့ဆုံဆွေးနွေးပွဲတွင် ဆန်စက်လုပ်ငန်းရှင်တစ်ဦးက ပန်းတနော်မြို့နယ်၏ ဆန်စပါးဈေးနှုန်းဈေးကွက်အခြေအနေ၊ ဆန်စက်လုပ်ငန်းရှင်အသင်း၏ဆောင်ရွက်ထားရှိမှုနှင့် အသင်းအဖွဲ့စည်းမျဉ်းစည်းကမ်းများနှင့် လိုက်နာဆောင်ရွက်မှုတို့၏တိုးတက်မှုများကို စတင်ဆွေးနွေးခဲ့ပါသည်။

   စားသုံးသူရေးရာဦးစီးဌာန၊ ခရိုင်ဦးစီးမှူး ဦးဇော်မင်းက အသင်းအဖွဲ့စည်းမျဉ်းစည်းကမ်းများကို ပိုမိုလိုက်နာဆောင်ရွက်ပါက အသင်းအဖွဲ့ဖွံ့ဖြိုးတိုးတက်မှုရလဒ်ကောင်းများနှင့် ဆန်စပါးဈေးကွက်ဖြစ်ပေါ်လာမှုအပေါ် ဆန်စက်လုပ်ငန်းရှင်များအသင်းနှင့် စားသုံးသူရေးရာဦးစီးဌာနတို့ပူးပေါင်းဆောင်ရွက်သင့်သည့် အခြေအနေများကို အပြန်အလှန်ရင်းနှီးပွင့်လင်းစွာဆွေးနွေးခဲ့ကြပြီး ဆန်စက်လုပ်ငန်းရှင် (၉)ဦးတက်ရောက်ခဲ့ကြကြောင်း သတင်းရရှိပါသည်။

DOCA(ဧရာဝတီ)