HighLight News

 ကျိုက်လတ်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံအနေဖြင့် ကုန်မျိုးစုံရောင်းချသည့် လုပ်ငန်းရှင်(၁၈)ဦးအား ၂၀၂၃ခုနှစ်၊ စက်တင်ဘာလ(၁၁)ရက်နေ့၊ နေ့လယ် (၁၁:၀၀)နာရီအချိန်တွင် ကျိုက်လတ်မြို့နယ်၊ စားသုံးသူရေးရာဦးစီးဌာနရုံးတွင် ကုန်စည်(သို့မဟုတ်) ဝန်ဆောင်မှုများဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေးအတွက် စီးပွားရေးလုပ်ငန်းရှင်များလိုက်နာဆောင်ရွက်ရမည့်တာဝန်များနှင့် ရောင်းချနေသောကုန်စည်များတွင် သတ်မှတ်ထားသောကုန်အညွှန်းအမှတ်အသားပြည့်စုံစွာဖော်ပြထားခြင်းမရှိပါက ဈေးကွက်အတွင်းရောင်းချခြင်းမပြုကြရန်၊ ကုန်စည်(သို့မဟုတ်)  ဝန်ဆောင်မှု၏အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သောသတင်းအချက်အလက်များပေးခြင်း၊ စားသုံးသူနစ်နာဆုံးရှုံးမှုဖြစ်ပွားစေမည့် ကုန်စည်(သို့မဟုတ်)ဝန်ဆောင်မှုကို တိုက်ရိုက်ရောင်းချခြင်း (သို့မဟုတ်) သွယ်ဝိုက်ရောင်းချခြင်းများမပြုကြရန် အသိပညာပေးဟောပြောခဲ့ကြောင်း သတင်းရရှိပါသည်။

DOCA(ဧရာဝတီ)

  စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်ဦးစီးမှူးရုံးမှ မြို့နယ်ဦးစီးမှူး ဦးအောင်လွင်နှင့်ဝန်ထမ်းများသည် (၁၈-၉-၂၀၂၃) ရက်နေ့၊ နံနက် (၀၉:၃၀)နာရီအချိန်တွင် ညောင်တုန်းမြို့၊ ကုန်မျိုးစုံအရောင်းဆိုင်၊ မြို့မဈေးအတွင်းရှိ မုန့်မျိုးစုံအရောင်းဆိုင်တွင် ရောင်းချနေသော ကလေးအာဟာရမုန့်အရောင်းဆိုင်သို့သွားရောက်၍ ကုန်စည်ဈေးကွက်စောင့်ကြည့်စစ်ဆေးခဲ့ကြ ပါသည်။

    ကွင်းဆင်းစစ်ဆေးရာတွင် စစ်ဆေးရေးတာဝန်ရှိသူနှင့် မိတ်ဖက်တာဝန်ရှိစစ်ဆေးသူများက ဌာနတို့၏ခွင့်ပြုချက်၊ ထုတ်လုပ်မှုအမှတ်စဉ်နှင့်၊ ထောက်ခံချက်နှင့် ကုန်အညွှန်းဖော်ပြထားသော ကုန်စည်များကိုရောင်းချကြကြောင်း၊ လိုက်နာဆောင်ရွက်ခြင်းမရှိပါက အရေးယူဆောင်ရွက်ခြင်းခံရမည်ဖြစ်ကြောင်းနှင့် မိခင်နို့ရည် အစားထိုးအစာဖြင့် အာဟာရပြည့်ဝစွာမရရှိနိုင်သည့်ကလေးများအတွက် ထုတ်လုပ်ထားသည့်နို့ရည်နှင့် နို့မှုန့်များတွင် အသက်အပိုင်းခြားအလိုက် တိကျစွာဖော်ပြထားခြင်းမရှိပါက ကလေးငယ်များအန္တရာယ်ဖြစ်စေနိုင်ကြောင်း၊ သုံးစွဲရမည့်နည်းလမ်းအညွှန်းများကို မြန်မာဘာသာဖြင့်ဖော်ပြခြင်းမရှိပါက ကလေးငယ်များကျန်းမာရေးဆိုင်ရာထိခိုက်မှုများရှိနိုင်သောကြောင့် ကုန်အညွှန်းအမှတ်အသားပါဝင်ခြင်းရှိ/မရှိကို စစ်ဆေးရခြင်းဖြစ်ကြောင်း၊ စီးပွားရေးလုပ်ငန်းရှင်များသည် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်လိုက်နာရမည့်တာဝန်များကို လိုက်နာဆောင်ရွက်ရန်လိုအပ်ကြောင်း ရှင်းလင်းပေးခဲ့မှုကိုသတင်းရရှိပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူးရုံး၊ သင်တန်းခန်းမ၌ ကျင်းပပြုလုပ်သော ဝန်ထမ်းစွမ်းဆောင်ရည်မြှင့်တင်ရေးသင်တန်းအမှတ်စဉ်(၁/၂၀၂၃)ကို (၁၈-၉-၂၀၂၃)ရက်နေ့မှ (၁၉-၉-၂၀၂၃) ရက်နေ့ထိ ဝန်ထမ်းများစွမ်းဆောင်ရည်မြင့်မားစေရန်ရည်ရွယ်၍ သင်တန်းဖွင့်လှစ်ရခြင်းဖြစ်ကြောင်း ခရိုင်ဦးစီးမှူးက အဖွင့်အမှာစကားပြောကြား၍ သင်တန်းကို နံနက်(၀၉:၃၀)နာရီအချိန်တွင် ဖွင့်လှစ်ဆောင်ရွက်ခဲ့ပါသည်။

     ဆက်လက်၍ စီမံရေးရာဌာနခွဲတာဝန်ခံက စားသုံးသူရေးရာဦးစီးဌာနရှိ ဝန်ထမ်းများ ဝန်ထမ်းစွမ်းဆောင်ရည်မြင့်မားစေရန်နှင့် ဌာနအချင်းချင်း လုပ်ငန်းများဆောင်ရွက်ရာတွင် အဆင်ပြေချောမွေ့စေရန်အတွက် ရုံးစာရေးသားနည်းများ၊ စာပေးစာယူနှင့်ပတ်သက်သည့် ဝန်ထမ်းများသိသင့်သိထိုက်သော အကြောင်းအရာတို့ကိုလည်းကောင်း၊ ငွေစာရင်းဌာနခွဲတာဝန်ခံက ငွေစာရင်းဆိုင်ရာကိစ္စရပ်များ၊ ဘဏ္ဍာရေးစည်းမျဉ်းစည်းကမ်းများနှင့်ပတ်သက်သော ညွှန်ကြားစာများကိုလည်းကောင်း၊ မူဝါဒလေ့လာရေးနှင့်စီမံကိန်းစာရင်းအင်းဌာနခွဲနှင့် ပြည်တွင်းကုန်သွယ်မှုဌာန ခွဲတာဝန်ခံကလည်း ပြည်တွင်းကုန်သွယ်မှုကဏ္ဍနှင့်ပတ်သက်သည့်အကြောင်းအရာများကို ရှင်းလင်းသင်ကြားပို့ချခဲ့ပါသည်။ သင်တန်းသို့ သင်တန်းသား၊ သင်တန်းသူ(၁၄)ဦးတက်ရောက်ခဲ့ကြကြောင်းသိရှိရပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် စားသုံးသူပြည်သူများဘေးအန္တရာယ်ကင်းရှင်းစေရေးအတွက် (၁၃-၉-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် သရက်ခရိုင်၊ ကံမမြို့နယ်၊ အမှတ် (၁၊၂၊၃၊၄)ရပ်ကွက်ရှိ ဆေးနှင့်ဆေးပစ္စည်းအရောင်းဆိုင်(၅)ဆိုင်သို့သွားရောက်၍ စားသုံးသူရေးရာဦးစီးဌာန၊ တိုင်းဒေသကြီးအစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်စည်ပင်သာယာရေးအဖွဲ့တို့ပူးပေါင်း၍ ဈေးကွက်စောင့်ကြည့်စစ်ဆေးခဲ့ပါသည်။

   ထိုသို့ စစ်ဆေးခဲ့ရာ စားသုံးသူရေးရာဦးစီးဌာနဝန်ထမ်းများက ဈေးနှုန်းများအဆမတန်မြှင့်တင်ရောင်းချမှုမရှိစေရေး၊ တားမြစ်ဆေးနှင့်သက်တမ်းလွန်ဆေးများ ရောင်းချမှုမရှိစေရေး ပြောကြားခဲ့ပြီး တိုင်းဒေသကြီးအစားအသောက်နှင့်ဆေးဝါးကွပ်ကဲရေးဦးစီးဌာနမှ ဆေးဆိုင်များတွင်လိုင်စင်များရှိ/မရှိ မေးမြန်းကောက်ယူခြင်း၊ ဆေးနှင့်ဆေးပစ္စည်းများတို့ကိုစနစ်တကျထားရှိရန်၊ မှတ်ပုံတင်ထားခြင်းမရှိသည့် ဆေးနှင့်ဆေးပစ္စည်းများရောင်းချခြင်းမပြုရန် ပြောကြားခဲ့ကြောင်း သတင်းရရှိပါသည်။

DOCA(မကွေး)

   မကွေးတိုင်းဒေသကြီး၊ ချောက်ခရိုင်၊ ‌ချောက်မြို့၌ ကျောင်းသား/ ကျောင်းသူများအား ဗလငါးတန်ဖွံ့ဖြိုးရေး လူငယ်ရေးရာအသိပညာပေးဟောပြောပွဲနှင့် မြန်မာနိုင်ငံလူကုန်ကူးမှုတိုက်ဖျက်ရေးနေ့အထိမ်းအမှတ် အသိပညာပေးဟောပြောပွဲကို (၁၂-၉-၂၀၂၃)ရက်နေ့၊ နံနက် (၀၉:၀၀)နာရီအချိန်တွင် အမှတ်(၄)အခြေခံပညာမူလတန်းလွန်ကျောင်း(ရွာဟောင်း)ရှိ ပညာရတနာခန်းမ၌ ကျင်းပခဲ့ကြောင်းသိရသည်။

   ဟောပြောပွဲတွင် မြို့နယ်ပြန်ကြားရေးနှင့်ပြည်သူ့ဆက်ဆံ‌ရေးဦးစီးဌာန၊ ဦးစီးအရာရှိ ဒေါ်သိမ့်ဝါက မြန်မာနိုင်ငံလူကုန်ကူးမှုတိုက်ဖျက်ရေးနေ့အထိမ်းအမှတ် အသိပညာပေးဟောပြောရာတွင် လူကုန်ကူးမှုအဓိပ္ပါယ်၊ လူကုန်ကူးမှုဖြစ်ပေါ်ရသည့်အကြောင်းအရင်းများ၊ လူကုန်ကူးမှုအမျိုးအစားပုံစံများ၊ လူကုန်ကူးမှုမခံရရေးသိရှိထားသင့်သည့်အချက်များ၊ လူကုန်ကူးမှုပပျောက်ရေး ဆောင်ရွက်နေမှုအခြေအနေများကိုလည်းကောင်း၊ မြို့နယ်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ လက်ထောက်ညွှန်ကြားရေးမှူး ဦးစောမြဖောင်းက “သဘာဝဘေး အသိပညာပေး” ခေါင်းစဉ်ဖြင့်လည်းကောင်း၊ မြို့နယ်အားကစားနှင့်ကာယပညာဦးစီးဌာန၊ အကြီးတန်းစာရေးဒေါ်ချယ်ရီခိုင်က “အားကစားနှင့် လူငယ်ရေးရာ” ခေါင်းစဉ်ဖြင့်လည်းကောင်း၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒု-ဦးစီးမှူးဒေါ်ခင်ချိုချိုဝင်းက “လူငယ်နှင့်ဗလငါးတန်” ခေါင်းစဉ်ဖြင့်လည်းကောင်း၊ မြို့နယ်စားသုံးသူရေးရာဦးစီးဌာန၊ ဒု-ဦးစီးမှူး ဒေါ်ချိုဝေလွင်က “ကုန်အညွှန်းအမှတ်အသားပြည်စုံစွာပါဝင်သည့် ပစ္စည်းများအား ဝယ်ယူသုံးစွဲတတ်စေရေး” ခေါင်းစဉ်ဖြင့်လည်းကောင်း၊ မြို့နယ်ပတ်ဝန်းကျင်ထိန်းသိမ်း ရေးဦးစီးဌာန၊ ဒု-ဦးစီးမှူးဦးစိုးဝဏ္ဏထင်က “အိုဇုန်းလွှာအကြောင်း သိကောင်းစရာ” ခေါင်းစဉ်ဖြင့်လည်းကောင်း အသီးသီးပြောကြားခဲ့ကြသည်။

     ဆက်လက်၍ ကျောင်းသား/ကျောင်းသူများက မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှပြသထားသည့် လူကုန်ကူးမှုဆိုင်ရာအသိပညာပေး နံရံကပ်စာစောင်တို့ကိုကြည့်ရှုခဲ့ကြပြီး သိရှိလိုသည်များမေးမြန်းမှုအပေါ် ဝန်ထမ်းများက ပြန်လည်ရှင်းလင်းဖြေကြားပေးခြင်း၊ သက်ဆိုင်ရာဌာနအလိုက် အသိပညာပေးလက်ကမ်းစာစောင်များဖြန့်ဝေပေးခြင်းတို့းဆောင်ရွက်ခဲ့ကြောင်းသိရသည်။ အဆိုပါ အသိပညာပေးဟောပြောပွဲတွင် ကျောင်းအုပ်ဆရာမကြီး ဒေါ်လှမြင့်မော်နှင့် ဆရာ၊ ဆရာမ၊ ကျောင်းသား၊ ကျောင်းသူစုစုပေါင်း (၁၆၂)ဦးတက်ရောက်ခဲ့ကြောင်းသိရပါသည်။

DOCA(မကွေး)