သတင်းနှင့် လှုပ်ရှားမှုများ

ကြက်သွန်နီသည် ကမ္ဘာတစ်ဝှမ်းလုံးတွင် စားသုံးသော ဟင်းသီးဟင်းရွက်အုပ်စုအဖြစ် သတ်မှတ်ထားပြီး အဓိကအားဖြင့် အစားအစာနှင့် အချက်အပြုတ်ပြင်ဆင်မှုများတွင် အသုံးပြုသည်။ ကြက်သွန်နီကို နှစ်ပေါင်းငါးထောင်ကျော်မှ စတင်သိရှိခဲ့ကြပြီး ယခုအခါ နိုင်ငံပေါင်း ၁၄၀ ကျော်ခန့် တွင် စိုက်ပျိုးလျက်ရှိရာ အိမ်ထောင်စုအားလုံးနီးပါးတွင် တစ်နှစ်ပတ်လုံး နေ့စဉ်အစားအစာ၏ အစိတ်အပိုင်းအဖြစ် စားသုံးလျက်ရှိပါသည်။ ကြက်သွန်နီသည်အရေးပါသောအစာအာဟာရဖြစ်ပြီး လူတစ်ဦးချင်းစီ၏ စားသုံးမှုသည် တစ်နှစ်လျှင် ပျမ်းမျှ ၆.၂ ကီလိုဂရမ်ခန့်ရှိပါသည်။ (National Onion Association, 2013)။ မြန်မာနိုင်ငံတွင် တစ်နှစ်ပတ်လုံး ကြက်သွန်နီသုံးစွဲမှုမှာ စုစုပေါင်း တန်ချိန် ၆၄၁၂၁၅ ခန့်ရှိပါသည်။

ကြက်သွန်နီသည် လူတို့၏ ကျန်းမာရေးကိုထိခိုက်စေနိုင်သော ဆိုဒီယမ်နှင့်အဆီပါဝင်မှုမှာ အလွန်နည်းပြီး အာဟာရနှင့်ကျန်းမာရေးကိုမြှင့်တင်ပေးနိုင်သည့် ဗီတာမင်ဘီ၊ ဗီတာမင်စီ၊ သံဓာတ် နှင့်ကယ်လစီယမ်တို့ပါဝင်၍ ကပ်ပါးကောင် fungal, ဘက်တီးရီးယားနှင့် ဗိုင်းရပ်စ် ကူးစက်မှုများကို ကာကွယ်ပေးနိုင်သည်ဟု လူ့အဖွဲ့အစည်းအများစုကယုံကြည်လက်ခံထားကြသည်။ ကြက်သွန်နီတွင် သဘာဝကျကျဖြစ်ပေါ်နေသော organo-sulfur ဒြပ်ပေါင်းများသည် သွေးပေါင်ချိန်ကို ထိန်းညှိပေးပြီး နှလုံးသွေးကြောဆိုင်ရာ ရောဂါများနှင့် ကင်ဆာဖြစ်နိုင်ခြေများကို လျှော့ချပေးနိုင် သည့်အပြင် ကိုယ်လက်ရောင်ရမ်းခြင်းနှင့် ပန်းနာရင်ကျပ်ရောဂါကို ကာကွယ်ပေးနိုင်ပါသည်။ (Corzo-Martinez et al 2007) ။ ကြက်သွန်နီစားသုံးခြင်းဖြင့် အစာအိမ်အနာကို တားဆီးနိုင်သည့်အပြင် ပျို့အန်ခြင်းကဲ့သို့သော ကျန်းမာရေးအခြေအနေများအတွက် လူကြိုက်များသော အိမ်သုံးဆေးတစ်မျိုးဖြစ်ပါသည်။

ကြက်သွန်နီသည် ပျက်စီးလွယ်သောကုန်ကြမ်းဖြစ်ပြီး သာမန်အခြေအနေများတွင်ရိတ်သိမ်းပြီး‌နောက် အချိန်ကြာမြင့်စွာ သိုလှောင်၍မရခြင်းနှင့်သင့်လျော်သော ရိတ်သိမ်းချိန်လွန်သိုလှောင်ရုံ အဆောက်အအုံများမရှိပါက ဇီဝဓာတုဖြစ်စဉ်များ၊ ပိုးမွှားများ အန္တရာယ် ကြောင့် ပျက်စီးဆုံးရှုံးမှုများ ဖြစ်စေနိုင်သည်။ ကြက်သွန်နီကို တန်ဖိုးမြှင့်ထုတ်ကုန်များအဖြစ် ပြုပြင်ထုတ်လုပ်နိုင်ခြင်းအားဖြင့်  ပျက်စီးဆုံးရှုံးခြင်းနှင့်ကြက်သွန်ပေါ်ချိန် ဈေးနှုန်းကျဆင်းမှုကိုလည်း ထိန်းသိမ်းနိုင်မည်ဖြစ်ပါသည်။ အစားအစာနှင့် ဆေးဘက်ဆိုင်ရာရည်ရွယ်ချက်များအတွက် ကြက်သွန်နီကိုလူသိများမှုနည်းပါးသော် လည်း  အခြားနည်းလမ်းအသုံးပြုမှုဖြစ်သော အသင့်စား သို့မဟုတ် လတ်ဆတ်သော ကြက်သွန်နီ၊ ကြက်သွန်နီငါးပိ၊ သွေ့ခြောက်သော ကြက်သွန်အလွှာများ၊ ကြက်သွန်အမှုန့်၊ ကြက်သွန်ဆီ၊ ကြက်သွန်နီ ရှာလကာရည်၊ ကြက်သွန်အဖျော်ယမကာ၊ ကြက်သွန်နီငံပြာရည်၊ ကြက်သွန်ချဉ်၊ ကြက်သွန်နီဆားစသည်ဖြင့် ကြက်သွန်နီမှတန်ဖိုးမြှင့်ထုတ်ကုန်များကို ထုတ်လုပ်လျက်ရှိကြောင်း လေ့လာသိရှိရပါသည်။ အချို့သော အစားအစာ ထုတ်ကုန် များတွင် ကြက်သွန်ဆီကို သဘာဝ အစားအစာထိန်းသိမ်းမှုအဖြစ် အသုံးပြုသည်။ ကြက်သွန်နီဆားကို စားပွဲဆားအဖြစ်အသုံးပြုနိုင်သည်။

ကြက်သွန်အခြောက်အဖြစ် ပြုပြင်ထုတ်လုပ်ခြင်းသည် သာမန်အားဖြင့် ကြက်သွန်နီကို လပေါင်းများစွာထိန်းသိမ်းရန်အတွက် ထိရောက်သောလုပ်ငန်းစဉ်တစ်ခုဖြစ်၍ ရေရှည်သိုလှောင်ထားနိုင်ပြီး စားသုံးသူများကို တစ်နှစ်ပတ်လုံး အာဟာရပြည့်ဝစွာဖြင့် စားသုံးနိုင် စေပါသည်။ ခြောက်သွေ့ အောင် ပြုလုပ်ထားသောအစားအစာများသည် အခြားမည်သည့်ထိန်းသိမ်းထားသည့် အစားအစာ အမျိုးအစားထက်မဆို အာဟာရဓာတ်ပိုမိုစုစည်းထားနိုင်သည်။ ခြောက်သွေ့အောင် ပြုလုပ်ထားသော ကြက်သွန်နီ တန်ဖိုးမြှင့် ထုတ်ကုန်များ အားလုံးနီးပါးသည် သိုလှောင်ရန် လွယ်ကူခြင်း၊ အလေးချိန်ပိုမိုပေါ့ပါးပြီး လတ်ဆတ်သော သို့မဟုတ် အခြားပြုပြင်ထားသော ကြက်သွန်နီများထက် ပမာဏ သေးငယ်ခြင်းစသည်တို့သည် အခြောက်ခံထားသော ကြက်သွန်နီ၏ အဓိကအားသာချက်များ ဖြစ် ကြသည်။ စည်သွပ်ဗူးများနှင့်နှိုင်းယှဉ်ပါက ထုပ်ပိုးမှုကုန်ကျစရိတ်လည်း ပိုမိုသက်သာစေနိုင်သည်။ ကြက်သွန်ခြောက်ကို အမှုန့် သို့မဟုတ် အချိုမှုန့်အနေဖြင့်လည်း အသုံးပြုနိုင်သည်။ ကြက်သွန်နီခြောက်ကို ၁၉ ရာစုမှစတင်၍ အနည်းငယ်သာထုတ်လုပ်ခဲ့ကြသည်။ သေသပ်လှပစွာထုပ်ပိုးထား သည့် အခြောက်ခံထားသော ကြက်သွန်နီသည့် အစားအစာထုတ်ကုန်များထဲတွင် လူကြိုက်များမှု ကြောင့် ကမ္ဘာ့အနှံ့တွင် စားသုံးမှုများပြားလာသည်ကို တွေ့ရှိရပါသည်။ အသင့်စား သို့မဟုတ် အသုံးပြုရန်အတွက် အဆင့်သင့်ဖြစ်သည့် ကြက်သွန်သည် ကြက်သွန်နီအခွံဖယ်ရှားရခြင်း၊ ဖြတ်တောက်ခြင်း စသည်ဖြင့် အစားအစာပြင်ဆင်မှုအချိန်ကို လျှော့ချပေးနိုင်သည်။ တနည်းအားဖြင့် ကြက်သွန်နီများကို အကွင်းလိုက်လှီးဖြတ်ပြီး သင့်လျော်သောထုပ်ပိုးပစ္စည်းများတွင် သိုလှောင်ထားသည့် ကြက်သွန်နီများကို အပူချိန်နိမ့်သော(Frozen) တွင် အေးခဲထားခြင်းဖြစ်ပြီး ၁၂ လခန့်ထိ သိုလှောင်၍ အသုံးပြုနိုင်သည်။

ကြက်သွန်နီအမှုန့်သည် သန့်စင်ထားသောကြက်သွန်နီအမျိုးအစားဖြစ်ပြီး လတ်ဆတ်သော ကြက်သွန်နီ၏ အရသာမပျောက်ပျက်ဘဲ အဆင်ပြေစွာအသုံးပြုနိုင်သည်။ ကြက်သွန်အမှုန့်ကို အစားအစာ၊ အချဉ်ရည်၊ အသုပ်၊ ဟင်းချို၊ ဟင်းသီးဟင်းရွက်ကြော်များတွင် အရသာအနေဖြင့် အလယ်အလတ်အရွယ်ရှိသော ကြက်သွန်နီပမာဏခန့်ထည့်၍ အစားထိုးအသုံးပြုနိုင်ပါသည်။ ထို့အပြင် ကြက်သွန်မှုန့်ကို ထုပ်ပိုးထားသော ဟင်းချိုများ၊ ဆော့စ်များ၊ ခေါက်ဆွဲများ၊ ပင်လယ်စာနှင့် အသားများကို ပြင်ဆင်ရာတွင် အသုံးပြုသည်။ ကြက်သွန်နီအမှုန့်သည် လတ်ဆတ်သောကြက်သွန်နီ များနှင့်စာလျှင် ကိုင်တွယ်ရန်ပိုမိုလွယ်ကူပြီး ချက်ပြုတ်နေစဉ်လှီးဖြတ်ရန် မလိုသောကြောင့် အချိန် ကုန်သက်သာ၍ အသုံးပြုရန် ပိုမိုလွယ်ကူပါသည်။ အထူးသဖြင့် အိန္ဒိယနိုင်ငံတွင် ကြက်သွန်မှုန့် ဝယ်လိုအား တိုးမြှင့်သည်ကို တွေ့ရှိရပြီး မြို့ပြလူနေမှုစနစ်တိုးတက်လာမှုနှင့်အတူ အလုပ်လုပ်နေရ သည့် လူဦး‌ရေများပြားလာမှုတို့ကြောင့် အချိန်ကုန်သက်သာစေရန်အတွက် စားသုံးသူများသည် ဟင်းလျာများထဲတွင် ကြက်သွန်နီခတ်ခြင်းကို ခက်ခဲစွာချက်ပြုတ်သည့် လုပ်ထုံးလုပ်နည်းများဖြင့် မလုပ်လိုကြတော့ပေ။ ပြည်ပသို့ ကြက်သွန်မှုန့်တင်ပို့သော ဈေးကွက်အနေအထးမှာလည်း တိုးတက်လာခြင်းကြောင့် ကြက်သွန်မှ တန်ဖိုးမြှင့်ထုတ်ကုန်အဖြစ် ထုတ်လုပ်လိုသူများအတွက် ကောင်းမွန်သော ဈေးကွက်ရရှိနိုင်ပါသည်။ အိန္ဒိယ နိုင်ငံတွင် စားနပ်ရိက္ခာကို တန်ဖိုးမြှင့်ထုတ်ကုန်အဖြစ် ပြုပြင် ထုတ်လုပ်မှုသည် အကြီးဆုံးကဏ္ဍတစ်ခုဖြစ်ပြီး ကြက်သွန်မှုန့်ဝယ်လိုအားကိုလည်း မြင့်တက်စေ သည်။

ကြက်သွန်ငါးပိသည် ထုတ်ကုန်များအား ကြာရှည်စွာအသုံးပြုနိုင်ရန်အတွက် သင့်လျော်သည့် အကောင်းဆုံးအစားအစာတစ်ခုဖြစ်သည်။ ကြက်သွန်ငါးပိသည် အိန္ဒိယဟင်းလျာများအတွက် မရှိမဖြစ်လိုအပ်သောအရာဖြစ်ပြီး အနံ့နှင့်အရသာအတွက် အလွန်ကောင်းမွန် ပါသည်။ ဥပမာအားဖြင့် ကြက်သားဟင်းချက်ပြုတ်ရာတွင် ၎င်းကိုအသုံးပြုနိုင်ပြီး ဟင်း၏အရသာကို အံ့ဩဖွယ်ကောင်းအောင် တိုးမြှင့်စေနိုင်သည်။

ကြက်သွန်နီဈေးကွက်ကျဆင်းချိန်တွင် ကုန်ကြမ်းအဖြစ် ရောင်းချခြင်းသာမက တန်ဖိုးမြှင့် ထုတ်ကုန်များကိုပါ နိုင်ငံတော်အဆင့်မီသည်အထိ အရည်အသွေးကောင်းမွန်စွာဖြင့် ကြိုးပမ်း ထုတ်လုပ်မည်ဆိုပါက မိမိနိုင်ငံ၏ဒေသတွင်း စိုက်ပျိုးသီးနှံထွက်ကုန်ပစ္စည်းအခြေခံ တန်ဖိုးမြှင့် ထုတ်ကုန်များအနေဖြင့် နိုင်ငံတကာဈေးကွက်တွင်းသို့ ဝင်ရောက်ထိုးဖောက်နိုင်မည် ဖြစ်ပါသည်။ ကြက်သွန်နီကို တန်ဖိုးမြှင့်ထုတ်ကုန်များအဖြစ် ဖန်တီးရန်အတွက် အပြောင်းအလဲနှင့် ကုန်ကျစရိတ်ကို လျှော့ချရန် အလားအလာရှိသည့် နည်းလမ်းများကို ရှာဖွေရန် သုတေသနကြိုးပမ်းမှုများ ဆောင်ရွက်ရန် လိုအပ်ပါသည်။ ထိုသို့ဆောင်ရွက်ရာတွင် ဈေးကွက်အလားအလာများကို အကဲဖြတ် ခြင်း၊ ထုတ်လုပ်မှုနည်းစနစ်များကို အသေးစိတ်ရေးဆွဲခြင်း၊ ကုန်ကြမ်းများလိုအပ်မှုနှင့် ကုန်ကျစရိတ်ကို ခန့်မှန်းခြင်း၊ အခြား ဘဏ္ဍာရေးလိုအပ်ချက်များကို ကြိုတင်ခန့်မှန်းခြင်းစသည့် လိုအပ်ချက်အမျိုးမျိုးကို ကူညီထောက်ပံ့ပေးရန် လိုအပ်ပါသည်။ ထုတ်လုပ်သူများသည် အစာအာဟာရကြွယ်ဝသော အသင့်အစားအစာများကို စားသုံးသူများ၏ လိုအပ်ချက်အရ အမြဲတမ်း ကြိုးစား ထုတ်လုပ်ရန် လိုအပ် ပြီး အထူးသဖြင့် ဖွံ့ဖြိုးဆဲနိုင်ငံများရှိ စားသုံးသူများအကြားတွင် အသင့်စား သို့မဟုတ် ခြောက်သွေ့သော အစားအစာများ၏ ‌‌ရေရှည်သက်တမ်းတိုးမြှင့်ခြင်းနှင့်ပတ်သက်၍ စားသုံးသူများ သိရှိနားလည် မှုမြင့်တက်လာစေရန် အသိပညာပေးရေး လုပ်ငန်းများ ဆောင်ရွက်သင့်ပါသည်။

သို့ဖြစ်ပါ၍ နိုင်ငံတော်စီမံအုပ်ချုပ်ရေးကောင်စီ၏ စီးပွားရေးဦးတည်ချက် ၃ ရပ် အနက် “စိုက်ပျိုးရေးနှင့် မွေးမြူရေးကို အခြေခံသည့် ကုန်ထုတ်လုပ်မှုကို ခေတ်မီနည်းစနစ်များဖြင့် ပိုမိုဖွံ့ဖြိုး တိုးတက်အောင် ဆောင်ရွက်ပြီး အခြားစီးပွားရေးကဏ္ဍများကိုလည်း ဘက်စုံဖွံ့ဖြိုးတိုးတက်အောင် ဆောင်ရွက်ရေး” နှင့်အညီ ကြက်သွန်နီအား ကြက်သွန်အခြောက်၊ ကြက်သွန်နီအမှုန့်၊ ကြက်သွန် အလွှာ၊ ကြက်သွန်အချဉ်စသည့် တန်ဖိုးမြှင့်ထုတ်ကုန်များအဖြစ် ထုတ်လုပ်နိုင်ပါက ကြက်သွန်စိုက် တောင်သူများ၏ အကျိုးစီးပွားကို မြှင့်တင်နိုင်ခြင်း၊ ပြည်တွင်းအလုပ်အကိုင်များ ရရှိလာစေနိုင်ခြင်း၊ ပြည်ပမှကုန်ချောများ ပြန်လည်တင်သွင်းနေရမှုကို လျှော့ချနိုင်ခြင်းစသည့်  အကျိုးရလဒ်များရရှိလာ မည်ဖြစ်ရာ နည်းပညာ၊ ငွေကြေးအရင်းအနှီးနှင့် ဈေးကွက်ရရှိရေးတို့ကို သက်ဆိုင်ရာဌာနများ၊ အသင်းအဖွဲ့များက ဟန်ချက်ညီညီ ပေါင်းစပ်ဆောင်ရွက်သင့်ပါကြောင်း တင်ပြလိုက်ရပါသည်။

Social media အချို့တွင်
ပျံ့နှံနေသော ဖော်ပြပါရုံးစာသည်
စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ
ထုတ်ပြန်ထားခြင်း မဟုတ်ပါကြောင်း၊
စာအတုသာဖြစ်ပါကြောင်း
ပြည်သူများအား
လေးစားစွာ အသိပေးအပ်ပါသည်။

၃၀.၆.၂၀၂၁ ရက်နေ့၊ နံနက် (၁၀:၀၀) နာရီတွင် ပြည်ပပို့ကုန်များဖြစ်သည့် ဖရဲသီး၊ သခွားမွှေး သီး၊ သရက်သီးနှင့် ကြက်သွန်နီတို့၏ အရည်အသွေးသတ်မှတ်ချက်များ ထုတ်ပြန်နိုင်ရေးနှင့် ပတ်သက်၍ ညှိနှိုင်းအစည်းအဝေးကို စားသုံးသူရေးရာဦးစီးဌာန၊ ညွှန်ကြားရေးမှူးချုပ်က ဦးဆောင်၍ Virtual Meeting ကျင်းပပြုလုပ်ခဲ့ရာ စိုက်ပျိုးရေးဦးစီးဌာန၊ သုတေသနနှင့် တီထွင်ဆန်းသစ်မှုဦးစီးဌာန၊ ကုန်သွယ်ရေးဦးစီးဌာန၊ မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက်စိုက်ပျိုးထုတ်လုပ်သူများအသင်း၊ မြန်မာနိုင်ငံ ဖရဲ၊ သခွားမွှေး စိုက်ပျိုး ထုတ်လုပ်တင်ပို့ရောင်းချသူများအသင်း၊ မြန်မာနိုင်ငံ သရက်စိုက်ပျိုးထုတ်လုပ်တင်ပို့ရောင်းချ သူများအသင်း၊ မြန်မာနိုင်ငံ ကြက်သွန်နီ၊ ကြက်သွန်ဖြူနှင့် စားဖိုဆောင်သုံးသီးနှံ စိုက်ပျိုး ထုတ်လုပ်တင်ပို့ရောင်းချသူများအသင်း၊ ပြည်ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်နှင့် Unique Lawk Sawk Mango Public Co., Ltd. တို့မှ တာဝန်ရှိသူများနှင့် ကိုယ်စားလှယ်များ တက်ရောက်ခဲ့ကြပါသည်။
အစည်းအဝေးတွင် စီးပွားရေးနှင့် ကူးသန်း‌ရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီး ဌာနမှ ညွှန်ကြားရေးမှူးချုပ် ဦးမြင့်ချိုက အဖွင့်အမှာစကားပြောကြားရာတွင် မြန်မာနိုင်ငံ အပါအဝင် တစ်ကမ္ဘာလုံး၌ Covid-19 ကပ်ရောဂါကူးစက်မှုများကြောင့် ကုန်စည်စီးဆင်းမှု များတွင် အခက်အခဲများကြုံတွေ့နေရပါကြောင်း၊ အထူးသဖြင့်နယ်စပ်မှ ပို့ကုန်တင်ပို့မှုတွင် အခက်အခဲများ ဖြစ်ပေါ်နေပြီး ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေး ဗဟိုကော်မတီအား ဖွဲ့စည်းထားရှိပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးသည် အတွင်းရေးမှူးအဖြစ် တာဝန်ယူဆောင်ရွက်လျက်ရှိသည့်အတွက် ကုန်သွယ်မှုဆောင်ရွက်ရာတွင် အခက်အခဲများရှိပါက မိမိတို့ဦးစီးဌာနသို့ ဆက်သွယ်တင်ပြနိုင် ပါကြောင်း၊ စားသုံးသူရေးရာဦးစီးဌာနအနေဖြင့် စိုက်ပျိုးရေးအခြေခံထုတ်ကုန် စံချိန်စံညွှန်း ရေးဆွဲရေးနည်းပညာဆပ်ကော်မတီကို တာဝန်ယူဆောင်ရွက်လျက်ရှိရာ လယ်ယာထုတ်ကုန် စံချိန်စံညွှန်းများအား ဦးဆောင်ရေး ဆွဲလျက်ရှိပါကြောင်း၊ မြန်မာနိုင်ငံစံချိန်စံညွှန်းကောင်စီမှ ထုတ်ပြန်ထားသော မြန်မာစံချိန်စံညွှန်းများကို ရည်ညွှန်းအသုံးပြု၍ နယ်စပ်မှပြည်ပသို့ တင်ပို့ ရာတွင် ဈေးကွက်နှင့် ဈေးနှုန်းရရှိရေးတို့တွက် ဖရဲ၊ သခွားမွှေးသီး၊ သရက်သီးနှင့် ကြက်သွန်နီ တို့ကို အရည်အသွေးသတ်မှတ်ချက်ထုတ်ပြန်ရန် မူကြမ်းများ ပြုစုထားပါကြောင်း၊ သို့ရာတွင် Voluntary စံချိန်စံညွှန်းတစ်ခုစလုံးကို Mandatory ထုတ်ပြန်ခြင်းမဟုတ်ပါကြောင်း၊ ဈေးကွက်လိုအပ်ချက်အရ ဘေးအန္တရာယ်ကင်းရှင်းမှု (Safety) နှင့် အရည်အသွေး (Quality) မြင့်မားရေးဆိုင်ရာ လိုအပ်ချက်များကိုသာ ကိုးကားအသုံးပြုထားပါကြောင်း၊ အထူးသဖြင့် ကုန်သွယ်မှုပြုရာတွင် အရည်အသွေးပိုင်းဆိုင်ရာ စံသတ်မှတ်ချက်များနှင့်အညီ တင်ပို့နိုင်ရေး အတွက်ဖြစ်ပါကြောင်း အဖွင့်အမှာစကားပြောကြားခဲ့ပြီး အစည်းအဝေးသို့တက်ရောက်လာ သော သက်ဆိုင်ရာဌာနများနှင့် အသင်းအဖွဲ့များမှ ကိုယ်စားလှယ်များက ဖရဲသီး၊ သခွားမွှေး သီး၊ သရက်သီးနှင့် ကြက်သွန်နီတို့၏ အရည်အသွေးသတ်မှတ်ချက် (မူကြမ်း) အပေါ် ဝိုင်းဝန်း အကြံပြုဆွေးနွေးခဲ့ပြီး အစည်းအဝေးအား နေ့လယ် ၁၂:၀၀ နာရီအချိန်တွင် ရုပ်သိမ်းခဲ့ကြောင်း သိရှိရပါသည်။
ITQM

            ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ မိုင်းယောင်းမြို့နယ်၏ ဒေသခံအများစုသည် တောတောင်ရေ မြေသဘာဝကောင်းမွန်၍ ရာသီသီးနှံအလိုက် စိုက်ပျိုးရေးအဆင်ပြေသောကြောင့် လယ်ယာနှင့် ရော်ဘာစိုက်ပျိုးခြင်းကို အဓိကထားလုပ်ကိုင်ကြသည်။ ၂၀၂၀-၂၀၂၁ ဘဏ္ဍာနှစ်တွင် မိုင်းယောင်းမြို့ရှိ ရော်ဘာစိုက်ဧက (၁၇၈၆၇)ဧကခန့်ရှိပြီး ရိတ်ဧက(၅၂၀၄)ဧက အစေးခြစ်၍ (၂၇၃၀၅၅၆)ပေါင် ထွက်ရှိကြောင်း သိရှိရပါသည်။ နှစ်စဉ် ဧပြီလ(တတိယပတ်)မှ နိုဝင်ဘာလကုန်အထိ ရော်ဘာအစေးခြစ်ခြင်းကိုလုပ်ကိုင်ပြီး ကျန်(၄)လအတွင်း နှစ်ရှည်ပင်များဖြစ်သည့်အလျှောက် ပေါင်းရှင်းပေးခြင်းနှင့် သဘာဝမြေဩဇာ (နွားချေး၊ဝက်ချေး)စသည်များ ထည့်ပေးခြင်းတို့ကို လုပ်ဆောင်ပေးရပါသည်။ ရော်ဘာစေးကို တစ်ကီလိုလျှင်(၇၀၀)ကျပ်မှ (၈၅၀)ကျပ်အထိ ရရှိကြောင်းနှင့် မိုင်းယောင်းမြို့၊ ဝမ်မိုင်လုံရွာတွင် အသေးစားရော်ဘာပြားထုတ်လုပ်သည့်စက်ရုံရှိပြီး အလုပ်သများ(၁၀)ဦးခန့်ဖြင့် လုပ်ကိုင်လျှက်ရှိပြီး တရုတ်နိုင်ငံသို့အများဆုံးတင်ပို့လျှက်ရှိကြောင်း သိရှိရသောကြောင့် ရော်ဘာစေးခြစ်လုပ်ငန်းဖြင့် တောင်သူများ တဖက်တလမ်းမှ ဝင်ငွေတိုးပွားလျက်ရှိပါကြောင်း သတင်းရရှိပါသည်။

ရှမ်းပြည်နယ်(DOCA)

              စားသုံးသူရေးရာဦးစီးဌာန   ပဲခူးတိုင်းဒေသကြီး၊ ပဲခူးခရိုင်အတွင်း ဆန်စပါးကဏ္ဍ ဖွံ့ဖြိုးတိုးတက်နိုင်ရေးအတွက် စိုက်ပျိုးသည်မှ ကြိတ်ခွဲထုတ်လုပ်တင်ပို့ ရောင်းချသည် အထိ Supply Chain တစ်ခုလုံး တွင် ပါဝင်သည့် ဌာနဆိုင်ရာများ၊ အသင်းအဖွဲ့များနှင့် လုပ်ငန်းရှင်များ ဟန်ချက်ညီစွာ ပူးပေါင်းပါဝင် ဆောင်ရွက်နိုင်ရေးနှင့် ပြုပြင်ပြောင်းလဲ ဖြည့်ဆည်းရန် လိုအပ်နေသည့် ဆန်စပါးကဏ္ဍမှ လိုအပ်ချက်များကို ပူးပေါင်း အဖြေရှာ ဖြေရှင်းနိုင်ရေး ရည်ရွယ်၍ (၁၆.၆.၂၀၂၁) ရက်နေ့   နံနက် ၁၀ : ၀၀ နာရီတွင် ပဲခူးခရိုင်အတွင်းရှိ     ဆန်စက် လုပ်ငန်းရှင်များ၊ ဆန်စပါးကုန်သည်များနှင့် ဆန်စပါးစိုက်ပျိုး  ထုတ်လုပ်သူ တောင်သူ   (၃၁)ဦးနှင့် တိုင်းဒေသကြီး အဆင့် ဌာနဆိုင်ရာအသီးသီးမှ တာဝန်ရှိသူများ တက်ရောက်ကြသည့် အလုပ်ရုံဆွေးနွေးပွဲကို ပဲခူးတိုင်းဒေသကြီးဦးစီးမှူးရုံး၌ ကျင်းပခဲ့ပါသည်။

          အဆိုပါဆွေးနွေးပွဲတွင် ပဲခူးတိုင်းဒေသကြီး ၊ စီမံအုပ်ချုပ်ရေးကောင်စီဝင် (၁) ဗိုလ်မှူးကြီးလှမျိုးရွှေ က စပါး အထွက်နှုန်းကောင်းရန် မျိုးကောင်းမျိုးသန့်များ ရွေးချယ် စိုက်ပျိုးခြင်း၊ မြေယာများ စနစ်တကျပြုပြင်စိုက်ပျိုးခြင်း၊ သွင်းအားစုများစနစ်တကျ ထည့်သွင်း စိုက်ပျိုးခြင်း၊  ကောင်းမွန်သော စိုက်ပျိုးရေး ဆိုင်ရာ အခြေခံအလေ့အကျင့်ကောင်း(Good Agricultural Practices G.A.P )စနစ်ဖြင့့်် စိုက်ပျိုးရေး၊ ဈေးကွက်စီးပွားရေးစနစ်အရ လုပ်ငန်းရှင်များ အနေဖြင့် ဆန်စပါးကို လွတ်လပ်စွာ ရောင်းဝယ်ခွင့်ရှိသည်နှင့်အညီ ပြည်တွင်းစားသုံးရန်နှင့် ပြည်ပတင်ပို့ရန် ဆန်များကို အရည်အသွေးမီ ဆန်များ ကြိတ်ခွဲထုတ်လုပ် ရောင်းချနိုင်ရေး ကြိုးပမ်းဆောင်ရွက်သွားရန် တိုက်တွန်းကြောင်း အဖွင့်အမှာစကားပြောကြားခဲ့ပါသည်။

             ဆက်လက်၍ ပဲခူးတိုင်းဒေသကြီး စိုက်ပျိုးရေးဦးစီးဌာန၊ ဒုတိယတိုင်းဒေသကြီးဦးစီးမှူးက  စျေးကွက်တန်းဝင် မျိုးကောင်းမျိုးသန့်မျိုးစေ့ ထုတ်လုပ်သိုလှောင်ဖြန့်ဖြူးပေးခြင်း၊ စိုက်ကွင်းကြီး များရှိှ တောင်သူ များအား ခေတ်မှီစိုက်ပျိုးနည်းစနစ်များနှင့် ရိတ်သိမ်းချိန်လွန် နည်းပညာ ဆွေးနွေး ပညာပေးခြင်း လုပ်ငန်းများ ဆောင်ရွက်လျက်ရှိကြောင်း၊ အစိုးရတာဝန်ရှိသူများ အသင်းအဖွဲ့များနှင့် ပူးပေါင်းဆောင်ရွက်၍ ထွက်ရှိသည့် သီးနှံများကို ပြည်တွင်း/ပြည်ပစျေးကွက်တွင် စျေးကောင်းရရှိအောင် စွမ်းဆောင်ခြင်း နှင့် လူငယ်မျိုးဆက်သစ် တောင်သူများအား ပျိုးထောင်ပေးလျက်ရှိကြောင်း  ရှင်းလင်းဆွေးနွေးခြင်း၊ ပဲခူးတိုင်းဒေသကြီး စက်မှုကြီးကြပ်ရေး နှင့် စစ်ဆေးရေးဦးစီးဌာန ၊ ဒုတိယညွှန််ကြားရေးမှူးက  ပုဂ္ဂလိက စက်မှုလုပ်ငန်းများကို သတ်မှတ်ထားသည့် နည်းလမ်းများနှင့်အညီ လုပ်ငန်းအရွယ်အစားသတ်မှတ်၍ မှတ်ပုံတင်ခြင်း လုပ်ငန်းများဆောင်ရွက်လျက်ရှိပြီး SME လုပ်ငန်း၏အဓိကကျသော ငွေကြေးလိုအပ်မှုအတွက် အထာက် အကူပြုနိုင်ရန် ချေးငွေရရှိ‌ရေး ပံ့ပိုးမှုများ ဆောင်ရွက် လျက်ရှိကြောင်း ရှင်းလင်းဆွေးနွေးခြင်း၊ ပဲခူးတိုင်းဒေသကြီး၊ လယ်ယာမြေစီမံခန့်ခွဲရေးနှင့် စားရင်းအင်းဦးစီးဌာန  လက်ထောက်ညွှန်ကြားရေးမှူးက  လယ်ယာမြေစီမံခန့်ခွဲ ရေးနှင့် ပတ်သက်သည့် ဥပဒေများ ၊ စည်းမျဉ်းစည်းကမ်း များကို ရှင်းလင်းဆွေးနွေးခြင်း၊ ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးမှ မြန်မာနိုင်ငံ၏ ဆန်စပါး စိုက်ပျိုးထုတ်လုပ်မှု ၊သုံးစွဲမှု ၊ပိုလျှံမှု စာရင်းနှင့် စျေးနှုန်းစျေးကွက်အ‌ခြေအနေများ၊ စပါး (၁)ဧက ထုတ်လုပ်မှုကုန်ကျစရိတ်အပေါ် တောင်သူ အကျိုးအမြတ်ရရှိနုင်မှု အခြေအနေများ ၊မိမိနိုင်ငံမှ ဆန်စပါး တင်ပို့နိုင်မှုအပေါ် နိုင်ငံအလိုက် စျေးကွက်ရရှိမှုနှင့် ကမ္ဘာ့ဆန်တင်သွင်းမှုအပေါ် မြန်မာနိုင်ငံမှ တင်ပို့နိုင်မှုနှင့် စျေးကွက်ရရှိမှု အခြေအနေများအား အကျယ်တဝင့်ရှင်းလင်းဆွေးနွေးခြင်းများ ဆောင်ရွက်ခဲ့ပါသည်။

              ထို့နောက် တက်ရောက်လာသည့် ဆန်စက် လုပ်ငန်းရှင်များ၊ ဆန်စပါးကုန်သည်များနှင့် ဆန်စပါးစိုက်ပျိုး  ထုတ်လုပ်သူ တောင်သူများ၏ လယ်ယာ စိုက်ပျိုးရေး၊ ကြိတ်ခွဲရေး ၊ ကုန်သွယ်ရေး နှင့် ပတ်သက်သည့် မေးမြန်းမှုများကို သက်ဆိုင်ရာ ဌာန အသီးသီးမှ ပြန်လည်ရှင်းလင်း ဖြေကြားမှုများ ဆောင်ရွက်ခဲ့ပြီး အခမ်းအနားကို (၁၄:၀၀) နာရီတွင် ရုတ်သိမ်းခဲ့ကြောင်း သတင်းရရှိပါသည်။

ပဲခူးတိုင်းဒေသကြီး(DOCA)