သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူး ဦးဇော်မင်းနှင့်ဝန်ထမ်းများသည်သာစည်မြို့အတွင်းရှိ (တောင်ကြီး-မိတ္ထီလာ)ကားလမ်းရှိ စက်သုံးဆီအရောင်းဆိုင်များသို့(၂၁.၃.၂၀၂၂) ရက်နေ့ (၀၉၀၀) နာရီအချိန်တွင် ရှမ်းရွှေတောင် စက်သုံးဆီအရောင်းဆိုင်နှင့် Moon Sun စက်သုံးဆီအရောင်းဆိုင်များသို့ သွားရောက်၍ စက်သုံးဆီများအား အထူးစျေးနှုန်းဖြင့်ရောင်းချနေမှု အခြေအနေများ၊ စျေးနှုန်းများ၊ အချိန်အတွယ်ပမာဏများ ပြည့်စုံမှန်ကန်စွာ ရောင်းချမှုရှိစေရေး စျေးကွက်စောင့်ကြည့်စစ်ဆေးခြင်းများ ကွင်းဆင်းဆောင်ရွက်ခဲ့ပါသည်။

             ထိုသို့ ကွင်းဆင်းဆောင်ရွက်ရာတွင် အဆိုပါ စက်သုံးဆီအရောင်းဆိုင်များအနေဖြင့် နိုင်ငံတော်ဗဟိုဘဏ်က ရည်ညွှန်းစျေးနှုန်းဖြင့် ရောင်းချပေးသည့် အမေရိကန်ဒေါ်လာဖြင့် ပြည်ပမှတင်သွင်းသော စက်သုံးဆီများအား သတ်မှတ်စျေးနှုန်းများအတိုင်းရောင်းချစေရေး၊ ပြည်သူလူထုလက်ဝယ်သို့ အမှန်တကယ် ရောင်းချစေရေး၊ သတ်မှတ်စျေးနှုန်းများအတိုင်း ရောင်းချစေရေး/အခြင်အတွယ်များ မှန်ကန်စွာရောင်းချစေရေး၊ ယာဉ်တစ်စီးချင်းအလိုက် ကုမ္ပဏီသတ်မှတ်ထားသည့်အတိုင်း ရောင်းချနေသည်။ သို့သော်လည်း ရောင်းချခွင့်ရရှိသည့် စက်သုံးဆီပမာဏအတိုင်း အမှန်တကယ်ရောင်းချစေရေး၊ အများပြည်သူသိရှိစေရန်အတွက် အထူးစျေးနှုန်း ဆိုင်းဘုတ်များကို ဆိုင်ရှေ့မျက်နှာစာများတွင် မြင်သာထင်သာအောင်ချိတ်ဆွဲထားစေရေးစသည်များအား အဓိကထား စစ်ဆေးခဲ့ကြောင်း သိရှိရပါသည်။

DOCA(မန္တလေး)

          စစ်ကိုင်းတိုင်းဒေသကြီး၊ မုံရွာမြို့နယ်အတွင်း စက်သုံးဆီဈေးနှုန်းများကို ဆက်သွယ်မေးမြန်းခဲ့ရာ ၂၀၂၂ ခုနှစ်၊ မတ်လ၂၃ ရက်နေ့တွင် အောက်တိန်း92 တစ်ဂါလံလျှင် (၉၆၀၀)ကျပ်၊ အောက်တိန်း95 တစ်ဂါလံလျှင် (၁၀၂၀၀)ကျပ်နှင့် ပရီမီယံဒီဇယ် တစ်ဂါလံလျှင် (၁၀၂၂၀)ကျပ်ထိ အသီးသီး ရောင်းချ လျှက်ရှိကြောင်း သိရှိရသည်။

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံစက်သုံးဆီတင်သွင်းဖြန့်ဖြူး ရောင်းချရေးအသင်းတို့ ပူးပေါင်းကာ အများပြည်သူသက်သာစေရေးအတွက် (၈.၂.၂၀၂၂)ရက်နေ့မှ ၈.၃.၂၀၂၂ရက်နေ့အထိ အထူးသတ်မှတ်ဈေးနှုန်းဖြင့် Asia Energy၊ BOC၊ Max(Monywa-1)၊ Denko(မုံရွာ-၁)၊ Denko(မုံရွာ-၂)နှင့် Denko(မုံရွာ-၃) စက်သုံးဆီဆိုင်တို့မှ ရောင်းချပေးလျှက်ရှိကြောင်း သိရှိရသည်။

          မုံရွာမြို့ပေါ်ရှိ စက်သုံးဆီဈေးနှုန်းများကို ယခင်လနှင့် နှိုင်းယှဉ်လျှင် ဓာတ်ဆီတစ်ဂါလံကို (၁၀၀၀)ကျပ်နှင့် ဒီဇယ်တစ်ဂါလံလျှင် (၁၂၅၀)ကျပ်အထိ ဈေးနှုန်းမြှင့်တက်ခဲ့ကြောင်း လေ့လာ သိရှိရပါသည်။

        စစ်ကိုင်းတိုင်းဒေသကြီး စားသုံးသူရေးရာဦးစီးဌာနမှ စစ်ဆေးရေးမှူးများ လုပ်ငန်းကျွမ်းကျင်မှု ဆိုင်ရာ အလုပ်ရုံဆွေးနွေးပွဲတက်ရောက်ခဲ့သည့် စစ်ဆေးရေးမှူးများမှ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များ စားသုံးသူဘေးအန္တရယ်ကင်းရှင်းရေး စားသုံးသူအခွင့်အရေးများ အပြည့် အဝရရှိစေရေး၊ ထုတ်ကုန်များလုံခြုံစိတ်ချရမှုရှိစေရေး၊ ဘေးအန္တရာယ်ရှိသည်ဟု ထင်မြင်ယူဆရသော ကုန်စည်များအား စျေးကွက်အတွင်းမှပပျောက်စေရေးတို့အတွက် လုပ်ငန်းကျွမ်းကျင်မှုရှိသော စစ်ဆေး ရေးမှူးများ မွေးထုတ်ပေးနိုင်စေရန်ရည်ရွယ်၍ စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာ ဆင့်ပွား သင်တန်းကို မတ်လ(၂၃)ရက်နေ့ နံနက်(၁၀)နာရီအချိန်က စစ်ကိုင်းတိုင်းဒေသကြီး၊ စားသုံးသူရေးရာ ဦးစီးဌာန အစည်းအဝေးခန်းမ၌ ကျင်းပပြုလုပ်ခဲ့ကြောင်းသိရသည်။

        ရှေးဦးစွာ အခမ်းအနားတွင် စစ်ကိုင်းတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြီး ဦးစီးမှူး ဦးကျော်ကျော်လွင်က စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာ ဦးစီးဌာနအနေဖြင့် မိမိတို့ဌာန၏ ရည်မှန်းချက်တာဝန်များကို အကောင်အထည်ဖော်ဆောင်ရွက်ရာတွင် စားသုံးသူကာကွယ်ရေးဥပဒေနှင့်အညီ စစ်ဆေးရေးမှူးများခန့်အပ်တာဝန်ပေးပြီး စျေးကွက်စောင့်ကြည့် စစ်ဆေးခြင်းလုပ်ငန်းများ၊ စားသုံးသူ နစ်နာဆုံးရှုံးများနှင့်စပ်လျဥ်း၍ လိုအပ်သည့် စုံစမ်းစစ်ဆေးခြင်းများ ဆောင်ရွက်လျက်ရှိပါကြောင်း၊ ထိုသို့ဆောင်ရွက်ရာတွင် ဝန်ထမ်းများအနေဖြင့် အရည်အချင်းပြည့်ဝပြီး လုပ်ငန်းကျွမ်းကျင်မှုရှိစေရေး လိုအပ်သည့်အတွက် စစ်ဆေးရေးမှူးများလုပ်ငန်းကျွမ်းကျင်မှုဆိုင်ရာ ဆင့်ပွားသင်တန်းကို ဖွင့်လှစ်ပို့ချရခြင်းဖြစ်ကြောင်းနှင့် သင်တန်းသားသင်တန်းသူများအနေဖြင့် ယခု သင်တန်းမှရရှိလာမည့် အသိပညာဗဟုသုတအသီးသီးကို စားသုံးသူကာကွယ်ရေးလုပ်ငန်းများ အကောင် အထည်ဖော်ဆောင်ရွက်ရာတွင် အကျိုးရှိရှိအသုံးပြုနိုင်ပြီး နိုင်ငံတော်နှင့်ပြည်သူများအတွက် အလေး ထားရသည့် တာဝန်ကျေပွန်သောဝန်ထမ်းကောင်းများအဖြစ် ရပ်တည်သွားကြစေလိုကြောင်း တိုက်တွန်း ပြောကြားခဲ့သည်။

         ဆက်လက်၍ တိုင်းဒေသကြီးစားသုံးသူရေးရာဦးစီးဌာနနှင့်မုံရွာခရိုင်စားသုံးသူရေးရာဦးစီးဌာနတို့မှ စစ်ဆေးရေးအရာရှိများ လုပ်ငန်းကျွမ်းကျင်မှုဆိုင်ရာအလုပ်ရုံဆွေးနွေးပွဲ တက်ရောက်ပြီးသည့် စစ်ဆေးရေးမှူးတို့မှ တက်ရောက်လာသော သင်တန်းသား သင်တန်းသူများအား စစ်ဆေးရေးအရာရှိများ ၏ လုပ်ပိုင်ခွင့်နှင့်လုပ်ငန်းတာဝန်များ၊ စျေးကွက်စောင့်ကြည့်စစ်ဆေးရာတွင် လိုက်နာရမည့် လုပ်ငန်း တာဝန်များ၊ ဘေးအန္တရာယ်ရှိသောကုန်စည် သို့မဟုတ် ဝန်ဆောင်မှုများတွေ့ရှိပါကဆက်လက်ဆောင်ရွက် ရမည့်လုပ်ငန်းစဥ်များ၊ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ဆက်လက်ဆောင်ရွက်ရမည့် လုပ်ငန်းစဥ်များကို ပါဝါပွိုင့်များဖြင့် အသေးစိတ်ကျယ်ကျယ်ပြန့်ပြန့် ရှင်းလင်းသင်ကြားပေးခဲ့သည်။ အဆိုပါသင်တန်းတွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ သင်တန်းသား သင်တန်းသူ (၃၀)ဦး တက်ရောက်ပြီး သင်တန်းကာလ တစ်ရက်ကြာ သင်ကြားပို့ချပေးခဲ့ကြောင်း နောင်တွင်လည်း ယခုကဲ့သို့ ဝန်ထမ်းစွမ်းဆောင်ရည်မြှင့်တင်ရေးသင်တန်းများကိ အခါအားလျော်စွာ ထပ်မံဖွင့်လှစ်သွားမည်ဖြစ်ကြောင်း သတင်းရရှိပါသည်။

             စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးနှင့် စားသုံး/ ထုတ်လုံဌာနခွဲတာဝန်ခံတို့သည် မတ်လ ၃ ရက်တွင် ပြည်မြို့နယ်၊ နဝဒေးရပ်ကွက်ရှိ နီလာရိုးမစက်သုံးဆီအရောင်းဆိုင်သို့လည်းကောင်း၊ ရွှေတောင်မြို့နယ်တာဝန်ခံနှင့် ဝန်ထမ်းများသည် မတ်လ (၁၇) ရက်တွင် ရတနာစက်သုံးဆီဆိုင်နှင့် မတ်လ (၁၈) ရက်တွင် Petro – K စက်သုံးဆီဆိုင်တို့သို့ လည်းကောင်း သွားရောက်၍ ရရှိထားသည့် စက်သုံးဆီခွဲတမ်းများအား သတ်မှတ်ဈေးနှုန်းများဖြင့် ရောင်းချမှုရှိစေရေး၊ အရည်အသွေးနှင့် အချိန်အတွယ် မှန်ကန်မှုရှိစေရေး ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြပါသည်။

          အဆိုပါ စစ်ဆေးခြင်းများဆောင်ရွက်ရာတွင် လုပ်ငန်းရှင်များအနေဖြင့် မိမိတို့ရောင်းချမည့် စက်သုံးဆီများအား ရရှိသောခွဲတမ်းများအတိုင်း အထူးဈေးနှုန်းဖြင့် သတ်မှတ်ထားသော အရေအတွက်အတွင်း ရောင်းချမည်ဆိုပါက စီးပွားရေးကျင့်ဝတ်စည်ကမ်းများနှင့်အညီ ရောင်းချကြရန်၊ အရည်အသွေးပြည့်မီသော စက်သုံးဆီများသာ ရောင်းချကြရန်၊ စားသုံးသူပြည်သူများအား မိမိတို့ ရောင်းချသည့် စက်သုံးဆီနှင့် ပတ်သက်သည့် သတင်းအချက်အလက်များကို ပြည့်စုံမှန်ကန်စွာ ဖြန့်ဝေခြင်းများ ဆောင်ရွက်ကြရန် အသိပေးပြောကြားခဲ့ကြောင်းနှင့် စားသုံးသူအသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)

     ရခိုင်ပြည်နယ်၊ စားသုံးသူရေးရာဦးစီးဌာန၊ မင်းပြားမြို့နယ်တာဝန်ခံ ဦးမောင်သန်းဝင်းနှင့် ဝန်ထမ်းများသည် ၂၅-၃-၂၀၂၂ နေ့ နံနက်( ၉:၃၀) နာရီအချိန်တွင် မင်းပြားမြို့၊ မြို့မဈေးအတွင်းရှိ ကုန်စုံဆိုင်များ၌ ရောင်းချနေသောစားသောက်ကုန်များ၊ အလှကုန်ပစ္စည်များနှင့်ပတ်သက်၍  ဈေးကွက်စောင့်ကြည့်စစ်ဆေးခြင်းကို မင်းပြားမြို့နယ်စည်ပင်သာယာရေးအဖွဲ့မှ ဈေးတာဝန်ခံနှင့် ပူးပေါင်းပြီး စားသုံးသူပြည်သူများနေ့စဉ်ဝယ်ယူစားသုံးနေကြသော ကုန်စည်များတွင် ကုန်အညွှန်းအမှတ်အသားများကို သတင်းအချက်အလက်ပြည်စုံမှန်ကန်စွာဖြင့် စားသုံးသူကာကွယ်ရေးဥပဒေနှင့်အညီ  ဖော်ပြထားခြင်း ရှိ/မရှိ နှင့် စားသုံးသူများဘေးအန္တရာယ်ကင်းရှင်းစွာဖြင့် စိတ်ချယုံကြည်စွာ အသုံးပြုနိုင်ရေးတို့အတွက် ရည်ရွယ်၍ ဆောင်ရွက်ခဲ့ပါသည်။

          မင်းပြားမြို့မြို့မဈေးအတွင်းရောင်းချနေသော လုပ်ငန်းရှင်များအား ကုန်စည်များတွင် ကုန်အညွှန်းအမှတ်အသားများကို ၂၀၁၉ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်နှင့် ကိုက်ညီမှုရှိသော မြန်ဘာဘာသာဖြင့်ဖော်ပြထားသော ကုန်ပစ္စည်းများကိုသာ ဦးစားပေး ရောင်းချကြရန်၊ အကယ်၍ သတ်မှတ်ကုန်အညွှန်းအမှတ်အသားဖော်ပြချက်နှင့် ကိုက်ညီမှုမရှိသော ကုန်ပစ္စည်းများအား ရောင်းချပါက ၂၀၁၉ စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်နိုင်ပါကြောင်း၊ ၎င်းအပြင် ကျန်းမာရေးဝန်ကြီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ (သို့မဟုတ်) သက်ဆိုင်ရာဌာနများမှ  စားသုံးရန်(သို့)သုံးစွဲရန် မသင့်ထုတ်ပြန်ထားသည့် သုံးစွဲသူမိဘပြည်သူများအတွက် ဘေးအန္တရာယ်ဖြစ်စေနိုင်သည့် ကုန်ပစ္စည်းများအားလည်း ရောင်းချမှုမပြုလုပ်ကြပါရန် အသိပညာပေးဆွေးနွေးခြင်း၊ ၂၀၁၉ စားသုံးသူကာကွယ်ရေးဥပဒေပြဌါန်းချက်လက်ကမ်းစာစောင်များနှင့် FDA မှ လတ်တလော စားသုံးရန်မသင့်ထုတ်ပြန်ထားသည့် ကုန်ပစ္စည်းနမူနာများအားဖြန့်ဝေပေးခြင်းနှင့် ဈေးကွက်စောင့်ကြည့်စစ်ဆေးခြင်းတို့ကို ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)