သတင်းနှင့် လှုပ်ရှားမှုများ

        ပဲခူးတိုင်းဒေသကြီး ၊ ညောင်လေးပင်ခရိုင် ၊ ညောင်လေးပင်မြို့ ၊ မြို့မဈေးအတွင်းရှိ ကုန်စုံဆိုင်များတွင် ရောင်းချလျက်ရှိသော စည်သွပ်အစားအစာများကို ၁၃.၁၂.၂၀၂၂ ရက်နေ့တွင် စားသုံးသူရေးရာဦးစီးဌာနမှ တာဝန်ရှိဝန်ထမ်းများနှင့် စည်ပင်သာယာရေးအဖွဲ့များ ပူးပေါင်း၍ စားသုံးသူကာကွယ်ရေး ဥပဒေပါ ကုန်အညွှန်းအမှတ်အသားနှင့် ကိုက်ညီမှုရှိ/မရှိ ဈေးကွက် စောင့်ကြည့် စစ်ဆေးခဲ့ပါသည်။

       ထိုသို့ ဈေးကွက်စောင့်ကြည့်စစ်ဆေးရာတွင် မြို့မဈေးအတွင်းရှိ စည်သွပ်အစားအစာများသည် စားသုံးသူများဝယ်ယူသုံးစွဲရာတွင် ဘေးအန္တရာယ်ရှိ/မရှိ ၊ ကုန်အညွှန်းအမှတ်အသား ဖော်ပြချက်ပါ အာမခံချက်များနှင့် ကိုက်ညီမှု ရှိ/မရှိ ၊ အာမခံချက်နှင့်ကိုက်ညီသော အရည်အသွေးမြင့်မားသော ကုန်စည်များကို  ရောင်းချရန် နှင့် စားသုံးသူကာကွယ်‌ရေး ဥပဒေပါ လုပ်ငန်းရှင်များ လိုက်နာရမည့် တာဝန် ၊ ဝတ္တရားများကို ဆိုင်ပိုင်ရှင်များ သိရှိနိုင်စေရန် အသိပညာပေး၍ လက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(ပဲခူး)

        ၆.၁၂.၂၀၂၂ ရက်နေ့တွင် စားသုံးသူရေးရာဦးစီးဌာန ၊ ပဲခူးတိုင်းဒေသကြီးဦးစီးမှူးဦးဆောင်၍ ဒုတိယတိုင်းဒေသကြီးဦးစီးမှူး ၊ ဌာနခွဲတာဝန်ခံများနှင့် ပဲခူးခရိုင်ဦးစီးမှူး ၊ တိုင်းဒေသကြီးဦးစီးမှူးရုံးရှိ ဝန်ထမ်းများ စုစုပေါင်း (၁၅) ဦးသည် ပဲခူးတိုင်းဒေသကြီး ၊ ရင်းနှီးမြုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနရှိ ရုံးလုပ်ငန်းဆိုင်ရာများ ၊ စာရင်းဇယားထားသို သိမ်းဆည်းမှုနှင့် စပ်လျဉ်း၍ လေ့လာနိုင်ရန်အတွက် ရက်တိုလေ့လာရေးခရီးစဉ်သွားရောက်ခဲ့ပါသည်။

        အဆိုပါ လေ့လာရေးခရီးစဉ်တွင် ရင်းနှီးမြုပ်နှံမှုနှင့် ကုမ္ပဏီများညွှန်ကြားမှု ဦးစီးဌာန ၊ ပဲခူးတိုင်းဒေသကြီးဦးစီးမှူးမှ ရုံးစတင်ဖွဲ့စည်း၍ ဝန်ထမ်းနေရာချထားမှု အခြေအနေများ ၊ မိမိတို့ ဌာနမှ ဆောင်ရွက်နေရသည့် လုပ်ငန်းဆောင်ရွက်နေမှု အခြေအနေများကို ဆွေးနွေးပြောကြားခဲ့ရာ စားသုံးသူရေးရာဦးစီးဌာန ၊ ပဲခူးတိုင်းဒေသကြီးဦးစီးမှူးမှ ယခုလိုရုံးဌာနအတွင်း စာရင်းဇယား ထားသို သိမ်းဆည်းမှုများကို လေ့လာခွင့်ရသည့်အတွက်  ကျေးဇူးတင်ရှိပါကြောင်း ပြောကြားပြီး ဝန်ထမ်းများမှ ရုံးအသုံးအဆောင်ထားသိုသိမ်းဆည်းမှုများ ၊ စာရင်းဇယား ထားသိုသိမ်းဆည်းမှုနှင့် စာအုပ်စာတမ်း ထားသိုသိမ်းဆည်းမှုများကို လှည့်လည်ကြည့်ရှု၍ လေ့လာခဲ့ကြောင်း သိရှိရပါသည်။

DOCA(ပဲခူး)

         ဖြူးမြို့နယ်အတွင်းရှိ ကျောင်းသားကျောင်းသူများ သိသင့်သိထိုက်သည့် အသိပညာဗဟုသုတများရရှိစေရန် ရည်ရွယ်၍ စားသုံးသူရေးရာဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီး ဌာန၊ တိုင်းရင်းဆေးပညာဦးစီးဌာနနှင့် အားကစားနှင့်ကာယပညာဦးစီးဌာနတို့ ပူးပေါင်း၍ အသိ ပညာပေးဟောပြောပွဲများကို အခြေခံပညာကျောင်းများတွင် ကျင်းပပြုလုပ်လျက်ရှိပါသည်။

         ဒီဇင်ဘာလ ၁၁ ရက်နေ့ နံနက်ပိုင်းက ဖြူးမြို့နယ် အကြပ်အင်းကျေးရွာ အခြေခံပညာ အထက်တန်းကျောင်းခွဲတွင် ကျင်းပပြုလုပ်သည့် အသိပညာပေးဟောပြောပွဲတွင် စားသုံးသူရေးရာဦးစီးဌာန မြို့နယ်တာဝန်ခံ ဒေါ်သန္တာစိုးက စားသုံးသူအခွင့်အရေးနှင့်တာဝန်များ၊ ကုန်စည်များတွင် ကုန်အညွှန်းအမှတ်အသားများဖော်ပြရန် ဥပဒေတွင်ပြဌာန်းထားပါသဖြင့် ကုန်စည်များဝယ်ယူရာ တွင် ကုန်အညွှန်းအမှတ်အသားများကို ဦးစားပေးဖတ်ရှုသင့်ပုံများနှင့် ကုန်အညွှန်းအမှတ်အသား တွင် ညွှန်းဆိုထားသည့်အတိုင်း စားသောက်/သုံးစွဲကြရန် လိုအပ်ပုံများ၊ ကုန်အညွှန်းအမှတ်အသား ဖော်ပြထားခြင်းမရှိသော ကုန်စည်များသည် လုံခြုံစိတ်ချရသောကုန်စည်များ မဖြစ်နိုင်သည့်အတွက် စားသောက်/သုံးစွဲရန် မသင့်သည့်အကြောင်းများကို ဟောပြောပါသည်။

         အလားတူ ယင်းနေ့ မွန်းလွဲပိုင်းတွင် ဖြူးမြို့နယ် ကျော်လှကြီးကျေးရွာ အခြေခံပညာ အထက်တန်းကျောင်း၌ ကျင်းပပြုလုပ်သည့် အသိပညာပေးဟောပြောပွဲတွင် စားသုံးသူရေးရာဦးစီး ဌာန၊ ဖြူးမြို့နယ်တာဝန်ခံရုံးမှ ဌာနခွဲစာရေး ဒေါ်ပပလင်းက စားသုံးသူအခွင့်အရေးနှင့် တာဝန်များ၊ စားသုံးသူနစ်နာဆုံးရှုံးမှုများ ဖြစ်ပေါ်ပါက စားသုံးသူရေးရာဦးစီးဌာန တိုင်းဒေသကြီး/ပြည်နယ်ဦးစီး မှူးရုံးများနှင့် ခရိုင်ရုံးများတွင် ဖွင့်လှစ်ထားသည့် စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ (CICC)များတွင်လည်းကောင်းနှင့် စားသုံးသူရေးရာဦးစီးဌာန၏ website ဖြစ်သော www.doca.gov.mm သို့ဝင်ရောက်၍လည်းကောင်း တိုင်ကြားနိုင်ခြင်းများကို ဟောပြောပါသည်။

       အကြပ်အင်း အခြေခံပညာအထက်တန်းကျောင်းခွဲ ဟောပြောပွဲသို့ ကျောင်းသား/ကျောင်း သူ ၃၆၀ ဦးနှင့် ကျော်လှကြီး အခြေခံပညာအထက်တန်းကျောင်း ဟောပြောပွဲသို့ ကျောင်းသား/ ကျောင်းသူ ၂၅၅ ဦး တက်ရောက်ကြောင်း၊ မိတ်ဖက်ဌာနများဖြစ်သော ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ တိုင်းရင်းဆေးပညာဦးစီးဌာနနှင့် အားကစားနှင့်ကာယညာဦးစီးဌာနတို့မှ တာဝန်ရှိသူများကလည်း သက်ဆိုင်ရာဌာနများအလိုက် ကျောင်းသားကျောင်းသူများ သိသင့်သိထိုက်သည့် အသိပညာဗဟုသုတများကို ဟောပြောခဲ့ကြောင်း သိရှိရပါသည်။

DOCA(ပဲခူး)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်ချက်ဖြင့် သရက်ခရိုင်ဦးစီးမှူးရုံးမှ ဝန်ထမ်းများနှင့် မင်းတုန်းမြို့နယ်တာဝန်ခံ ဦးကျော်ရွှေသည်(၈.၁၂.၂၀၂၂)ရက်နေ့ နေ့လယ် (၁၃:၀၀)နာရီအချိန် မင်းတုန်းမြို့နယ်၊ ကျောက်ကြီးကျေးရွာ၊ အခြေခံပညာအထက်တန်းကျောင်း(ခွဲ)၌ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ရပ်ကွက်အုပ်ချုပ်ရေးမှူးတို့ဖြင့် ပူးပေါင်း၍ ကျောင်းသား/ကျောင်းသူများ သိသင့်သည့် စားသုံးသူကာကွယ်ရေး ဥပဒေအကြောင်း သိကောင်းစရာများအား အသိပညာပေး ဟောပြောခဲ့ပါသည်။

          ထိုသို့ဟောပြောရာတွင် ဒုခရိုင်ဦးစီးမှူး ဦးအုန်းမြင့်(ဦးစီးမှူး)မှ ဌာန၏မျှော်မှန်းချက်နှင့် ရည်မှန်းချက်များ၊ မင်းတုန်းမြို့နယ်တာဝန်ခံ ဦးကျော်ရွှေမှ စားသုံးသူကာကွယ်ရေးဥပဒေ(၂၀၁၉) အခန်း(၁၈)ပါကုန်အညွှန်းအမှတ်အသားတွင်ပြည့်စုံစွာပါဝင်ရမည့်အချက်များ၊ ခရိုင်ဦးစီးမှူးရုံးမှ ဒေါ်ရီရီထွေး ဒုဦးစီးမှူးမှစားသုံးသူများရရှိနိုင်မည့် စားသုံးသူအခွင့်အရေး(၈)ချက်၊ လိုက်နာရမည့် တာဝန်(၄)ချက်နှင့်  ကံမမြို့နယ် တာဝန်ခံဒေါ်နွဲ့ယဉ်ဝင်း ဒုဦးစီးမှူးမှ စားသုံးသူ နစ်နာဆုံးရှုံးမှုများ အတွက် တိုင်ကြားနိုင်သူများ၊ တိုင်ကြားပုံနည်းလမ်းနှင့် Internetနှင့် Mobile Application တွင် ဝင်ရောက်တိုင်ကြားပုံ၊ Consumer Call No.1535သို့ ခေါ်ယူတိုင်ကြားနိုင်မှုများအား အသေးစိတ် ရှင်းလင်းဆွေးနွေးခဲ့ပါသည်။ မင်းတုန်းမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာန ဦးစီးမှူးရုံးမှ ဦးမြင့်ရွှေ ဦးစီးအရာရှိမှလည်း လူငယ်နှင့် ကိုယ်ချင်းစာတရားခေါင်းစဉ်ဖြင့် ဟောပြောခဲ့ပါသည်။ အဆိုပါအသိပညာပေးဟောပြောပွဲသို့  ဆရာ/ဆရာမနှင့် ကျောင်းသား/ကျောင်းသူ (၁၁၇)ဦး တက်ရောက်ခဲ့ပြီး ဌာနမှ စားသုံးသူအသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး၊ ပန်းတနော်မြို့နယ်ရုံးမှ ဦးခိုင်လွမ်းမိုးနှင့် ဝန်ထမ်းများသည် မိတ်ဖက်ဌာနများဖြစ်သော စိုက်ပျိုးရေးဦးစီးဌာန၊ စည်ပင်သာယာ ရေးအဖွဲ့တို့နှင့်အတူ (၅.၁၂.၂၀၂၂၀) ရက်နေ့ နံနက် (၁၀:၃၀)နာရီအချိန်တွင် ပန်းတနော်မြို့ပေါ်ရှိ ဓါတ်မြေဩဇာအရောင်းဆိုင် (၁၀)ဆိုင်သို့ ကွင်းဆင်း၍  ဓါတ် မြေဩဇာများတွင် ကုန်အညွှန်းအမှတ်အသားများကို မြန်မာဘာသာဖြင့် ဖော်ပြထားခြင်း ရှိ/ မရှိ ဆင်တူရိုးမား အတုအပများ ရောင်းချခြင်း ရှိ/မရှိကို ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြပါသည်။

          ပူးပေါင်းအဖွဲ့ဖြင့် ကွင်းဆင်းစစ်ဆေးရာတွင် စားသုံးသူရေးရာဦးစီးဌာနက  ဆိုင်ရှင်များအား ‌မိမိတို့ရောင်းချနေသော ဓါတ်မြေဩဇာများတွင် စားသုံးသူကာကွယ်ရေး ဥပဒေအရ ကုန်အညွှန်းအမှတ် အသားပြည့်စုံစွာ ဖော်ပြထားသော ကုန်ပစ္စည်းများသာ ဈေးကွက်အတွင်း ရောင်းချရန်နှင့် ကုန်အညွှန်းအမှတ်အသားမပြည်စုံပါက ဈေးကွက်အတွင်း ရောင်းချမှုမရှိစေရေးနှင့် မည်သည့်စီးပွားရေးလုပ်ငန်းရှင်မဆို စားသုံးသူကာကွယ်ရေးဥပဒေပါ တားမြစ်ချက်တစ်ရပ်ရပ်ကို ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ပုဒ်မ ၇၃ အရ အရေးယူခြင်းကို ခံယူမည် ဖြစ်ကြောင်း ဆွေးနွေးပြောကြားခဲ့ပါသည်။

          ပူးပေါင်းမိတ်ဖက်အဖွဲ့ကလည်း လုပ်ငန်းရှင်များကို သက်ဆိုင်ရာဌာနတို့၏ ထောက်ခံ ချက်ပါဝင်သော၊ ခွင့်ပြုချက်ပါဝင်သော၊ ကုန်စည်များကိုသာရောင်းကြရန်နှင့် ဈေးကွက်အတွင်း ဌာနတို့၏ တားမြစ်ကုန်စည်များကို ရောင်းချနေခြင်းမျိုးတွေ့ရှိပါက သက်ဆိုင်ရာ ဌာနတို့၏ ဥပဒေတို့ဖြင့် အရေးယူဆောင်ရွက်နိုင်ကြောင်းကို  ဆိုင်ရှင်များမှလည်း သိရှိလိုက်နာ ဆောင်ရွက်မည်ဖြစ်ကြောင်း လက်မှတ်ရေးထိုး မှတ်တမ်းရယူခဲ့ကြကြောင်း သတင်းရရှိပါသည်။

DOCA(ဧရာဝတီ)